1 Ajtahua'a pu Jesús ayan tihua'uta'ixaa nyuucari cɨme'e. Ayaa pu tihua'uta'ixaa tɨcɨn: 2 ―Ayaa pu Dioj hua'aruure ɨ tyetyaca maj iiyan japuan cɨɨnye ɨ chaanaca tɨ Dioj tie'ijta. Ayaa pu che'eta na'a hua'aruure tɨj aɨjna ɨ rey tɨ tyu'uyeste aɨjna cɨme'e tɨ yaujra'an huatyenyaɨɨchaca'a. 3 Ajta aɨn ɨ rey, aɨ pu nu'u hua'utaityaca'a aɨme ɨ mej ti'ijvaɨre'e maj nu'u u hua'utajeeve aɨme ɨ tɨ ari hua'uta'inee. Ma majta aɨme ɨ maj huata'iniihuaca'a, camu á'ujca'anyajca'a maj a a'iré'enyen. 4 ’Ajtahua'a, seica hua'utaityaca'a mej mi majta hua'utajeeve. Ayaa pu tihua'uta'ixaa aɨme ɨ mej ti'ijvaɨre'e tɨcɨn: “Ayaa xu yeehui tihua'uta'ixaate'en aɨme nyej neri hua'uta'inee tɨcɨn pu'uri tyu'utyá'atɨme ɨ cue'ira, pu'uri ajta tyu'utaijtaca'a maj hua'ucui'ini ɨ ya'amuaate tɨ tihua'ucɨ'ɨmite, huaacasi, majta puuyesi. Nain pu yeehui ari huaxa'apɨ'ɨn tyej ti tyu'uyesten.” 5 ’Majta maɨn ɨ maj huata'iniihuaca'a, camu a'atzu hua'utzaahua. Ma'ucɨ́jxɨ micu. Seij pu aun á'umej a'u tɨ tyaja'ahuaste'e. Ajta seij, au pu á'umej a'u tɨ tyaja'atua. 6 Majta ɨ seica, aɨ mu nu'u hua'uvívi'i ɨ mej ti'ijvaɨre'e maɨjna ɨ rey. Majta e'ij pua'a hua'uruu. Majta hua'ucuii seica. 7 ’Eecan pu nu'u huatanyu'ucaca'a aɨjna ɨ rey. Aɨ pu hua'utaityaca'a aɨme ɨ xantaaru'u. Matɨ'ɨj mi hua'ucuii naijmi'ica ɨ tyaɨte. Majta raará'atai ɨ hua'achi'i. 8 Aj pu i aɨn ɨ rey ayan tihua'uta'ixaa aɨme ɨ mej ti'ijvaɨre'e tɨcɨn: “Pu'uri huaxa'apɨ'ɨn tyej ti'iyesten. Ma ajta, aɨme ɨ nyej neri tihua'uta'inyee, capu ayan hua'ucɨ́'ɨ maj mu a'uva'aju'un. 9 Sericu muan, tɨj na'a tɨ cure'enyáatɨmee ɨ caaye sata'aj hua'uta'inen matɨj mana'a ɨ tyaɨte a'achu saj pua'amua huaje'etyauni.” 10 Matɨ'ɨj mi huiiraacɨ caaye jetze aɨme ɨ mej ti'ijvaɨre'e. Eihua mu hua'ajsaɨj ɨ tyaɨte a'achu maj pua'amuaca á'utyau, ɨ maj a'ij pua'a ti'ityetyaɨte, majta ɨ maj rɨ'ɨ ti'ityetyaɨte. Ayaa mu'u pua'amua a'utyajrupi u chi'ita a'achu maj ú'uve. 11 ’Aj pu nu'u i aɨn rey, a'utyajrupi aujna tɨ'ij aɨme huaseij ɨ tɨ hua'uta'inee. Aj pu i a'atɨ huaseij tɨ cai ayan ti'itéechan a'ij tɨ tiraavijte'e tɨ pua'a seij huatyenaɨche. 12 Ayaa pu tiraataihua'uri'i tɨcɨn: “Casi'i, nyá'amincu, ¿a'ini tyu'utarɨ'ɨristaraca'a paj cai peyan ée'enye'en ti'itéechan a'ij tɨ tiraavijte, peyan u'utyajrupi peyujna?” Ajta aɨn ɨ a'atɨ, capu nu'u a'atzu huatanyuu. 13 ’Aj pu i aɨn rey ayan tihua'utaij aɨme ɨ mej ti'ijvaɨre'e tɨcɨn: “Sata'aj yeehui ra'anajɨ'ɨque'en muajca'ara'ara'an jetze, sajta ɨɨcajra'an jetze. Sajta, ma pua'aque ya'urájraini a'u tɨ a'utɨca'a. Au mu yeehui ruyeinya mua'aju'un, majta rutamej cɨn ancurá'ujcɨ'ɨmáa mua'aju'un maɨjna cɨme'e ɨ maj rajpueijtzi.” 14 Majta maɨn tɨ Dioj hua'ajee, aɨ mu mui'i. Ma majta, maɨn tɨ Dioj hua'ava'ahuau, camu mui'i, silu cɨj mu'u micu. 15 Majta maɨn ɨ fariseos, aɨ mu a'ucɨj. Majta meyan raaxa'apɨ'ɨntare mej mi raatyamue'itɨn maɨjna ɨ Jesús tɨ ij aɨn ayan aiira'ɨtzen mej mi maɨjna cɨn jetzen tya'upuá'ajte'en. 16 Matɨ'ɨj mi seica huataityaca'a mej mi tyu'uxáj jamuan ɨ Jesús. Aj mu mi a'ucɨj, majta seica jamuan ɨ maj jamuan á'ujhua'anya'a aɨjna ɨ Herodes. Ayaa mu tiraata'ixaa tɨcɨn: ―Maeestru, aij tu mua'aree tɨ cai ti'itɨ timua'aturaate'e, pajta hui peyan tzaahuati'ira'a cɨn ti'imua'ata a'ij tɨ ti'ijxe'eve'e ɨ Dioj. Muaa paj cai tí'ajaahuate'e ɨ tyaɨte jemi a'ini capu mueetzi jetze ruxe'eve'e a'atyaɨn maj pueen. 17 Pata'aj peyan titaata'ixaate'en yee, ¿ni qui xa'apɨ'ɨn tyej tyu'unájche aɨjna cɨme'e ɨ maj hua'ajijve'e ɨ u'uvieernu jetze ma'acan nusu tyacai? ¿Ni qui teyan tiraanajchite'en tyaɨjna tɨ ti'ita'ijte'e tɨ ayan antyahuaa tɨcɨn César? 18 Ajta aɨn ɨ Jesús, pu'uri ramua'areeraca'a maj cai meyan ti'ire'ihua'u huataujnyátacan cɨme'e silu ayaa mu raxe'eva'acaa mej a'ij pua'a raruuren. Ayaa pu tihua'uta'ixaa tɨcɨn: ―Muan xu cai seyan ti'ijrɨ'ɨre huataujnyátacan cɨme'e. ¿A'ini een cɨn seyan ti'itese'e saj naatyeevi'i? 19 Tumin sanaataseijrate'e ɨ maj cɨn ti'inajchita maɨjna ɨ maj cɨn hua'ajijve'e. Aj mu mi seij ya'avaɨ'ɨte, tumin ti'itɨ. 20 Aj pu i ayan tihua'utaihua'uri'i tɨcɨn: ―¿A'ataani nyeerima'ara'an a'aseijre'e? ¿A'ini antyahuaa yaj tɨ a'ayu'usi'i? 21 Ayaa mu tiraata'ixaa tɨcɨn: ―Amɨjna nya'u ɨ tyej teyan ratamua'amua tɨcɨn César. Aj pu i ayan tihua'uta'ixaa tɨcɨn: ―Sata'aj seyan huarɨni. Saraata'an saɨjna ɨ César a'achu tɨ caj tiraacɨ'ɨti, sajta raata'an ɨ Dioj a'achu tɨ caj tiraacɨ'ɨti aɨjna. 22 Matɨ'ɨj meyan tiraanamuajri'i, eecan mu naa rɨ'ɨ tira'utaseij. Matɨ'ɨj mi a yáurai. Majta a'ucɨj. 23 Ajna xɨcajra'a jetze, aɨ mu majta a e'ire'enye aɨme ɨ saduceos. Ayaa mu ti'ixaxa'a aɨme tɨ cɨme'en yee camu che'e huatarujsin ɨ mej huacuii. Matɨ'ɨj mi meyan tiraataihua'uri'i maɨjna ɨ Jesús tɨcɨn: 24 ―Maeestru, ayaa pu tira'uyu'uxaca'a aɨjna ɨ Moisés tyaacan. Tɨ pua'a nu'u a'atɨ tɨ nyaɨche, tɨ pua'a aɨn cai titɨ'ɨrijmua'a huamɨ'ɨni, ruxe'eve'e nu'u tɨ aɨn ihuaara'ara'an rancure'evi'itɨn aɨjna tɨ ratyevi'itɨnya'a ɨ tɨ huamɨ'ɨ tɨ ij titɨ'ɨrijmua'a a'ara'ani aɨjna jetze ma'acan. 25 Ayaa pu hui a'anaj tyuju'urɨj tyejmi tzajta'a. Mua'aráhua'apuaca'a maɨjna ɨ ru'ihuaamua'a. Ajta aɨn tɨ i'ivasta'a, aɨ pu huatyenyaɨchaca'a. Ajta e'eyan huamɨ'ɨ. Aru capu titɨ'ɨrijmua'a a'araa aɨjna tɨ ratyevi'itɨnya'a. Aɨ pu jemi huatyajturaa aɨjna tɨ ra'itya'ase. 26 Ayaa pu che'eta na'a tiraaruu aɨjna ɨ juutzajra'an ɨ tɨ hua'apuacajretze ma'acan, aɨ pu ajta cai titɨ'ɨrijmua'a a'araa, huamɨ'ɨ. Ajta e'eyan ɨ saɨj, ɨ tɨ hueicacajretze, aɨ pu ra'antyanaxcaca'a. Ajta, ayaa pu che'eta na'a tiraaruu. Ajta e'eyan, ayan tye'irájraa tɨ ayan tihua'uruu naijmi'ica ɨ maj aráhua'apua. Capu a'atɨ titɨ'ɨrijmua'a a'araa. 27 Tɨ'ɨqui, aɨn jɨita'a ajta huamɨ'ɨ. 28 Ari ijii, ¿a'ataani hui ɨra'ara'an puéenya'a a'ame, ajna xɨcajra'a mej jetzen majtahua'a huatarujsin? Naijmi'i mu xaa ratyevi'itɨnya'a, aɨme ɨ maj arahua'apua. 29 Aj pu i Jesús ayan tyu'utanyúu tɨcɨn: ―Setya'utyaujxua muan a'ini caxu ramua'aree a'ij tɨ tye'eyu'usi'i ɨ yu'uxari jetze. Caxu sajta ramua'aree a'ij tɨ een ɨ muáre'eri'ira'ara'an ɨ Dioj. 30 Ajna xɨcajra'a mej jetzen huatarujsin ɨ mɨ'ɨchite, camu meyan nyejnaɨchen ɨ tyetyaca. Majta ɨ juuca, camu majta vɨɨchen, silu ayaa mu eenya'a mua'aju'un matɨj aɨme ɨ mej ti'ivaɨre'e u tajapua Dioj tɨ e'eseijre'e. 31 ’Ma sajta muan, cɨme'en ajna xɨcajra'a mej jetzen huatarujsin aɨme ɨ maj huaacuii, ¿ni tzaa sacai a'anaj ra'ujijve ɨ yu'uxari jetze a'ij tɨ Dioj tyaja'amue'ixaate'e tɨcɨn: 32 “Nyaa nu nyauj hua'a Dioj pueen aɨme ɨ a'amuaya'upua, aɨjna ɨ Abraham, ajta aɨjna ɨ Isaac, ajta aɨjna ɨ Jacobo”? Dioj pu tihue'ixaa cumu maj mauj ruuricaa. Aɨj pu cɨn, aɨ pu aɨn pueen ɨ hua'a Dioj aɨme ɨ maj ruuri. Capu hua'a Dioj pueen aɨme ɨ maj mɨ'ɨchite. ―Ayaa pu tihua'uta'ixaa. 33 Majta maɨn ɨ tyaɨte ɨ maj e'etyujsaɨ ɨ jemin, eecan mu naa rɨ'ɨ tira'utaseij maɨjna cɨme'e a'ij tɨ aɨn tihuá'amua'atyajcaa. 34 Majta maɨn ɨ fariseos, matɨ'ɨj raamua'areeri'i tɨ Jesús ayan hua'utyámue'itɨ aɨme ɨ saduceos, aj mu mi tyujsaɨj. 35 Ajta saɨj tɨ hua'a jetze ajtyama'acantaca'a, tyamua'a pu tiraayɨ'ɨtɨhua'a a'ij tɨ tye'eyu'usi'i ɨ yu'uxari jetze. Aɨ pu ayan tiraataihua'uri'i tɨcɨn: 36 ―Maeestru, ¿ti'itaani nyuucarijra'a eitze'e ruxe'eve'e ɨ tɨ ra'uyu'uxaca'a aɨjna ɨ Moisés tyaacan? 37 - 38 Aj pu i Jesús ayan tiraata'ixaa tɨcɨn: ―Ai pu aɨn pueen ɨ nyuucarijra'a ɨ ta'anajca, tɨ eitze'e ruxe'eve'e cai maa seij nyuucarijra'a, tɨ ayan tɨcɨn: “Pata'aj peyan rɨ'ɨ tya'uta'amua'ati ɨ a'a tzajta'a ɨ Dioj jemi, nain ɨ paj cɨn rɨ'ɨ tya'uta'amua'ati, a'achu paj caj tya'aca'anye ɨ a'axaijnyu'uca jetze, pajta nain cɨn a'axe'evi'ira'a cɨme'e, ajta a'amua'atziira'a cɨme'e.” 39 Ajta, ayaa pu hui che'eta na'a een ɨ tɨ ra'itya'asi tɨcɨn: “Pata'aj nu'u peyan che'eta pana'a rɨ'ɨ tirajchaɨ ɨ axa'aj tevi patɨj asaɨj ti'itiá'acha'ɨ.” 40 Nain a'ij tɨ tira'uyu'uxaca'a aɨjna ɨ Moisés tyaacan, ajta nain a'ij mej tyu'utaxajtaca'a aɨme ɨ mej Dioj jetze ma'acan ti'ixaxa'ata'a, nain pu cɨn ayan tirájtyauusin aɨjna cɨme'e i tɨ ti'ihua'apua i nyuucari. ―Ayaa pu Jesús tiraata'ixaa. 41 Mauche'e mu e'ere'etya'acaa aɨme ɨ fariseos. Tɨ'ɨqui Jesús ayan tihua'utaihua'uri'i tɨcɨn: 42 ―¿A'ini tyajamua'amitejte'e muejmi cɨme'en aɨjna ɨ Cɨriistu'u, tɨ Dioj an yá'ujra ɨ ɨpuari japua? ¿A'ataani yaujra'an pueen? Ayaa mu tityaatanyúu tɨcɨn: ―Aɨ pu hui rayauj aɨjna ɨ David tyaacan. 43 Aj pu i Jesús ayan tihua'utaihua'uri'i tɨcɨn: ―Tɨ pua'a ayan ti'ayajna, tɨ'ɨj aɨn xaijnyu'ucara'ara'an ɨ Dioj raata'a tɨ David tyu'utaxaj aɨjna cɨme'e ɨ Cɨriistu'u, ¿a'ini een cɨme'e David ayan raatamuá'a tɨcɨn nyavastara'a? Ayaa pu tyu'utaxajtaca'a aɨjna ɨ David tyaacan tɨcɨn: 44 Tavastara'a pu ayan tiraata'ixaa aijna i nyavastara'a tɨ cɨme'en yee: “Antiyeijxɨ'ɨ ɨpuari japua iiya nya'ɨrɨɨta'a. Pauche'e anticatii asta nyana'a cai hua'utyamue'itɨn ɨ maj muájchaɨre'e.” 45 Aɨj pu cɨn, tɨ pua'a David ayan raatamuá'a tɨcɨn nyavastara'a, ¿a'ini ti'irɨ'ɨri tɨ aɨn Cɨriistu'u ayan aɨn pueenya'a a'ara'ani ɨ yaujra'an? Capu a'ij ti'irɨ'ɨri xaa nya'u, a'ini Cɨriistu'u pu eitze'e va'acan cɨn ti'ityejvee cai David tyaacan ayan ti'ityavaaca'a. 46 Majta maɨn ɨ maj raanamuajri'i, camu a'atzu a'ij tirajtyau a'ij mej tyu'utanyuuni. Tɨj na'a ájná'ɨmɨ, capu che'e a'atɨ ahuaujca'anyajca'a tɨ ayan tiraataihua'u.
