San Mateo 21

1Aj mu mi maun a'ará'a ajna a'ahua'a vejli'i u Jerusalén a'u tɨ a'uchajta'atajme tɨ ayan tyaja'arajtyahuaa tɨcɨn Betfagé. Au pu a'achajta'a ɨrij jetze mej meyan ratamua'amua tɨcɨn Aceituunajremi. Aj pu i Jesús hua'apuaca huataityaca'a. 2Ayan tɨcɨn: ―Sericu, sata'aj a'atanyén ajna vejli'i chajta'a tɨ e'eseijre'e. Satɨ'ɨj a'utyarute saujna, aun xu hui ye'etyauni ɨ puuru'u tɨ ajtatapi'i jamuan ɨ yaujra'an. Sata'aj rá'ijxɨjta. Sajta mu huaja'arajájpuan nyeetzi jemi. 3Tɨ pua'a a'atɨ ayan tyajamue'ihua'ura aɨjna cɨme'e, aj xu si seyan tiraata'ixaate'en tɨ cɨme'en yee tavastara'a pu nu'u raxe'eve'e, sajta hua'a xu ca'anacan raatatuire'esin. 4Ayaa pu tyuju'urɨj tɨ ij ayan tya'araurasten a'ij tɨ ajmi'i tyu'utaxajtaca'a aɨjna tɨ Dioj jetze ma'acan ti'ixaxa'ata'a. Ayan tɨcɨn: 5Pata'aj peyan tihua'uta'ixaate'en aɨme ɨ maj a'uchaatɨme au tɨ huatacá'a aɨjna ɨ chajta'a u Sión tɨ cɨme'en yee: “Casi'i muan, pu'uri mu a'uve'eme muejmi jemi aɨjna ɨ a'amua Rey. Capu a'ij ti'ijviicue'i. Ajta ava'acái puuru'u japua tɨ cɨle'en tɨ yaujra'an pueen saɨj ɨ maj japuan ti'itɨ'ɨcɨca.” 6Majta maɨn ɨ maj hua'apua, aj mu mi a'ucɨj. Majta meyan huarɨj a'ij tɨ Jesús tihua'utaij. 7Aj mu ya'aráaja ɨ Jesús jemi maɨjna ɨ puuru'u, majta ɨ yaujra'an. Matɨ'ɨj mi ra'ityéechejte ɨ puuru'u rucɨɨxu cɨme'e. Aj pu i Jesús ave'eyeijxɨ japuan ɨ puuru'u tɨ cɨle'en. 8Majta maɨn ɨ tyaɨte, eihua mu ajtyáxɨɨraca'a. Majta cɨɨxuri te'epíitɨraa juye jetze. Majta seica, pi'ista te'entivéichixɨ'ɨ, aɨ mu majta a'apíitɨraa majna juye jetze. 9Majta maɨn ɨ maj anáatyá'a huaju'uncaa, majta maɨn ɨ maj cujta'an huaju'uncaa, aɨ mu huatajijhuaxɨ tɨcɨn: ―Ayaa tu hui ti'imuahuavii paj tu'irajtuaani mɨ paj i'i huaacɨxa'ara'an aɨjna ɨ rey, ɨ David tyaacan. Dioj pu rɨ'ɨ tiraatyajtuaa tyamua'a naa aijna tɨ ye ve'eme nyuucajtze'en ɨ tavastara'a. Che'e aɨn tu'irajtuaani aɨjna tɨ aun e'eseijre'e u tajapua. 10Aj pu i Jesús a'utyajrupi u Jerusalén. Tɨ'ɨj a'utyajrupi, aj mu mi tyúritzii naijmi'i ɨ maj aun a'uchaatɨma'acaa. Eihua mu tyú'urixaatya'acaa. Meyan tɨcɨn: ―¿A'ataani pueen amɨjna? 11Majta maɨn ɨ tyaɨte, ayaa mu tihua'uta'ixaa tɨcɨn: ―Ai pu aɨn pueen ɨ Jesús tɨ Nazaret e'ema'acan, tɨ ajta Dioj jetze ma'acan ti'ixaxa'a. 12Ajta e'eyan, Jesús a'utyajrupi u teyujta'a tɨ a'aráyaujta'a. Aj pu i hua'utamuari naijmi'ica aɨme ɨ maj maun tí'itu'acara'a, ajta aɨme ɨ maj maun ti'inana'avacara'a. Tihua'ameesa pu pɨ tyahua'axɨ aɨme ɨ mej japuan tumin hua'apuata'ati'iracara'a, ajta tihuaɨ'ɨpua aɨme ɨ maj cucui'ise tu'aaracara'a. 13Ayaa pu tihua'uta'ixaa tɨcɨn: ―Ayaa pu tye'eyu'usi'i ɨ yu'uxari jetze tɨ Dioj ayan tiraataxajtaca'a tɨ cɨme'en yee ayaa pu nu'u tyaja'arajtyahuáa a'ame ɨ chi'ira'an tɨcɨn: “Chi'i maj tzajta'an ti'ixaxa'a ɨ Dioj jemi.” Ma sajta muan, ayaa xu saɨque raruure ɨ chi'i tɨj tyasta'a a'u maj tzajta'an á'urava'ataca ɨ nahua'ari. ―Ayaa pu tihua'uta'ixaa. 14Meenti seica maun e'ere'etya'acaa aujna teyujta'a. Seica mu mua'aracucu'un, majta seica, tzare'e mu huaɨɨcajmee. Aɨ mu e'ire'enye ɨ Jesús jemi. Ajta aɨn tihua'uhuaa. 15Majta maɨn ɨ mej ti'ijta teyujta'a, majta ɨ mej tyu'ujmua'ate ɨ yu'uxari jetze, matɨ'ɨj raaseij a'ij tɨ Jesús huarɨj mej mi meyan rɨ'ɨ tya'utaseij ɨ tyaɨte, matɨ'ɨj majta hua'useij ɨ tɨ'ɨrii ɨ maj rujijhuava'acaa tɨcɨn: “Tiche'e nu'u rɨ'ɨ tiraatyajtuaani tyamɨjna tɨ David tyaacan jetze a'iraanye”, eecan mu huatanínyu'ucacuca'a. 16Matɨ'ɨj mi meyan tiraataihua'uri'i maɨjna ɨ Jesús tɨcɨn: ―¿Ni tzaa pacai ti'inamua a'ij mej ti'ixa amɨme mɨ tɨ'ɨrii? Aj pu i Jesús ayan tyu'utanyúu tɨcɨn: ―Aa ni'ijta nya'u. ¿Ni tzaa sacai seyan ra'ujijve ɨ yu'uxari jetze tɨ ayan te'eyu'usi'i? Ayan tɨcɨn: Aɨ mu nu'u majta rɨ'ɨ tirata'aca aɨme ɨ tɨ'ɨrii, majta aɨme ɨ unyaaca'ise. Aɨ mu Dioj jetze araujca'anye mej mi meyan huarɨni. 17Aj pu i Jesús hua'utatuaa. Ajta iya'uraa. Au pu a'ará'a chajta'a tɨ ayan tyaja'arajtyahuaa tɨcɨn Betania. Au pu huatáxai. 18Yaa ruijmua'a yee tɨ'ɨj ajtahua'a amuu pɨja'ure'eve, pu'uri i'icuataca'a aɨjna ɨ Jesús. 19Aɨ pu huarej huaseij tɨ a'atavee ajna vejli'i juye jetze. Aj pu i a'uré'enye a'u tɨ a'atavee aɨjna ɨ huarej. Capu a'atzu taca'acaa silu tyáxamue'icaa pu'u. Aj pu i Jesús ayan tiraata'ixaa aɨjna ɨ huarej tɨcɨn: ―Capej che'e a'anaj taca'a. Cɨme'en pu'u ayan tyu'utaxajtaca'a, aj pu i huatyaahua aɨjna ɨ huarej. 20Majta maɨn ɨ maj Jesús jamuan á'ujhua'anya'a, matɨ'ɨj raaseij, eecan mu a'ij tya'utaseij. Ayaa mu tiraataihua'uri'i tɨcɨn: ―¿A'ini ti'irɨ'ɨri tɨ ayan ca'anacan huatyaahuan amɨjna mɨ huarej? 21Aj pu i Jesús ayan tihua'uta'ixaa tɨcɨn: ―Ayej xaa nya'u huarɨj. Ayaa nu tyaja'amue'ixaate'e. Tɨ pua'a seyan tya'atzaahuate'e tɨ ij ayan tyaja'ure'enyen a'ij tɨ tyajamua'amitejte'e, ajta tɨ pua'a cai a'ij a'amua'ase saj cai a'ij huarɨni, ayaa xu che'eta sana'a raayɨ'ɨtɨhua'a xa'ara'ani sej seyan raruuren samɨjna mɨ huarej nyatɨj neri raaruu. Sajta seyan raayɨ'ɨtɨhua'a xa'ara'ani sej seyan raataijte'en samɨjna mɨ jɨri tɨcɨn: “Tichesi yee, atyajra'a a jaata'a, a'ahua'a el mar.” Aj pu i xaa ayan tyaja'ure'enyejsin, tɨ ayan huarɨni ɨ jɨri. 22Satɨj sana'a sej seyan ti'ijhuavi ɨ Dioj, tɨ pua'a seyan tya'atzaahuatya'a, aj xu xaa ra'ancura'asin. 23Aj pu i Jesús a'utyajrupi teyujta'a a'u tɨ a'aráyaujta'a. Tɨ'ɨj aɨn tihua'umua'aten ɨ tyaɨte, aɨme ɨ mej ti'ijta u teyujta'a, majta hua'avaujsi, aɨ mu e'ire'enye ɨ Jesús jemi. Ayaa mu tiraataihua'uri'i tɨcɨn: ―¿Ti'itajni hui cɨn peti'ityejvee pej pi peyan rɨcɨ? ¿A'ataani muaata'a pej peyan huarɨni? 24Jesús pu ayan tyu'utanyúu tɨcɨn: ―Niche'e seij tyajamuaataihua'u. Tɨ pua'a seyan tinaata'ixaate'en saɨjna cɨme'e, aj nu xaa neyan tyajamuaata'ixaate'esin ti'itɨj ɨ nyaj cɨn ti'ityejvee nyej ni neyan rɨcɨ. 25Aɨjna ɨ tɨ cɨn ti'ityavaaca'a aɨjna ɨ Juan tɨ ij hua'umuaɨ'ɨhuan ɨ tyaɨte, ¿a'uni jetze a'ure'eme? ¿Ni u tajapua, Dioj tɨ e'eseijre'e, na'ari iiyan chaanaca japua, hua'a tzajta'a ɨ tyaɨte? Matɨ'ɨj mi ti'ityúrixaa rujɨɨmua'a. Meyan tɨcɨn: ―Tɨ pua'a teyan tiraata'ixaate'en yee Dioj pu ya'utaityaca'a, aɨ pu ayan titaata'ixaate'esin yee a'ini een cɨn tyacai ra'atzaahuate'e tyaɨjna. 26Me tyajta ityan, capu hui rɨ'ɨri tyej teyan raataxaj yee tyetyaca mu ya'utaityaca'a a'ini tyahua'atzɨɨne'e ɨ tyaɨte. Naijmi'i mu meyan ra'atzaahuate'e tɨ aɨn Juan ti'ixaxa'ata'a ɨ Dioj jetze ma'acan. 27Aj mu mi meyan tiraata'ixaa maɨjna ɨ Jesús. Meyan tɨcɨn: ―Catu ramua'aree. Ajta aɨn ɨ Jesús, ayaa pu tihua'uta'ixaa tɨcɨn: ―Canu nyajta inyaa amuaata'ixaate'esin ti'itɨj ɨ nyaj cɨn ti'ityejvee nyej ni neyan rɨcɨ. 28Ajta Jesús ayan tihua'uta'ixaa tɨcɨn: ―Casi'i, a'ini tyajamua'amitejte'e aijna cɨme'e i nyuucari. A'atɨ pu hua'apuaca tiyaujmua'a. Aj pu i a'ire'enye ɨ seij jemi. Ayaa pu tiraataityaca'a tɨcɨn: “Niyauj, aricu pata'aj tyaja'umuare'en ijii a'u nyaj uuva a'uhuii.” 29Aj pu i aɨn yaujra'an ayan tiraata'ixaa tɨcɨn: “Canu neyan rɨni.” Ma ajta aɨn, saɨque pu tyu'umuá'a. Aj pu i xaa u á'umej tɨ tyaja'umuare'en. 30Ajta e'eyan, aɨn ya'upuaara'an a'ire'enye ɨ saɨj jemi. Ayaa pu che'eta tiraataij aɨjna tɨj ajta ari ɨ saɨj tyu'utaij ɨ ta'anajca. Ajta aɨn yaujra'an, ayaa pu tiraata'ixaa tɨcɨn: “Aa ni'ijta, ayaa nu rɨni.” Ma ajta cai, capu. Capu á'umej tɨ tyaja'umuare'en. 31Niche'e a'atzu tyajamuaataihua'u. Aɨme ɨ maj hua'apua, ¿a'ataani ayan huarɨj a'ij tɨ ti'ijxe'eva'acaa ɨ ya'upuaara'an? Ayaa mu tiraata'ixaa tɨcɨn: ―Aɨjna, ɨ ta'anajca. Aj pu i Jesús ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e, aɨme ɨ maj hua'ajijve'e u'uvieernu jetze ma'acan, majta aɨme ɨ juuca ɨ maj huataura'an tumin cɨme'e, aɨ mu a'amuamue'itɨn maɨjna cɨme'e mej mi aun a'utyarute Dioj tɨ e'eseijre'e. 32Ayaa pu'u ti'en, a'ini ayaa pu hui een cɨn mu a'uve'eme aɨjna ɨ Juan tɨ i ayan tyajamuaata'ixaate'en a'ij sej ye'i huarɨni ɨ Dioj jemi. Ma sajta muan, caxu ra'antzaahuate. Majta maɨn ɨ maj hua'ajijve'e, majta aɨme ɨ juuca ɨ maj huataura'an tumin cɨme'e, aɨ mu xaa ra'antzaahuate. Muan xu raamua'areeri'i saɨjna. Capu amɨn a'ij, auche'e pu cai ti'itɨ a'amua jetze tasiseiri sej si saɨque tyu'umua'ati, sej si rá'antzaahuate'en. 33’Xaanamuajri'i seij i nyuucari. A'atɨ tɨ nu'u ayan uuva huahuii. Ajta raará'ana tyajcuá cɨme'e. Aj pu'i ti'itɨ atyé'ijche tɨ tzajta'an rámɨ'ɨye ja'ara'ara'an ɨ uuva. Ajta nu'u ti'itɨj ájtaahuaca'a maj japuan huéixe'ere'en mej mi raaseij nainjapua a'utɨ juástɨmee ti'imɨjhuaca. ’Ayaa pu aɨjna cɨn huarɨj, aj pu i hua'utanyaɨjte ɨ chuej mej mi tiraanajchite'en caj e'icaca. Aj pu i á'uraa aɨjna ɨ a'atɨ seij chuejra'a japua. 34’Tɨ'ɨj nu'u tyaja'ure'enye matɨ'ɨj pua'a raju'uraca aɨjna ɨ uuva, seica pu huataityaca'a aɨme ɨ mej ti'ijvaɨre'e mej mi hua'utahuavii a'achu tɨ caj ti'ijcɨ'ɨti aɨjna tɨ tichuéj. 35Majta maɨn ɨ chuej maj huataujnyaɨj, aɨ mu hua'uvívi'i aɨme ɨ maj huataiti'ihuaca'a. Seij mu ra'ityaavajxɨ. Majta seij mu huaje'ica, majta ɨ saɨj, ra'atyátu'asixɨ tetej cɨme'e. Camu ti'itɨj hua'uta'a. 36’Ajta nu'u aɨn ɨ tɨ ra'ijtya'aca'a, seica pu ajtahua'a huataityaca'a. Mu'uri eitze'e i'i mui'icaa. Majta maɨn ɨ chuej maj huataujnyaɨj, ayaa mu che'eta mana'a hua'uruu aɨme ɨ maj huataiti'ihuaca'a. 37’Yaa pu nu'u tyauma'aca. Tɨ'ɨqui, aɨ huataityaca'a aɨjna ɨ ruyauj. Ayaa pu tyu'umuá'a tɨcɨn: “Mara'antzaahuate'esin sein.” 38’Majta maɨn ɨ chuej maj huataujnyaɨj, matɨ'ɨj raaseij maɨjna ɨ yaujra'an, ayaa mu tiraaxa'apɨ'ɨntare rujɨɨmua'a tɨcɨn: “Ai pu aɨn pueen, tɨ nain ti'ijcɨ'ɨti. Che'eré, tiche'e raaje'ica tɨ ij tyejmi ta'aj a'ara'ani.” 39Aj mu nu'u mi rajví'i maɨjna ɨ yaujra'an. Matɨ'ɨj mi ru'irajrai a pua'aque. Majta raaje'ica. 40’Ma'acui ari'icu, ¿a'ini tyajamua'amitejte'e muejmi? Tɨ'ɨj mu a'uve'eme'en aɨjna ɨ a'ara'an ɨ chuej, ¿a'ini ti'itɨj hua'aruuren aɨme ɨ chuej maj huataujnyaɨj? 41Ayaa mu tiraata'ixaa tɨcɨn: ―Aɨ pu cai hua'acu'uvaa hua'antipua'arite'esin aɨme ɨ mej a'ij pua'a ti'ityetyaɨte. Ajta, aɨ pu hui seica huatanyaɨjte'esin ɨ chuej. Majta maɨn, ayaa mu xaa raata'asin ɨ tɨ raacɨ'ɨti tɨ'ɨj ajna tyaja'ure'enyen matɨ'ɨj pua'a ti'iju'uraca. 42Aj pu i Jesús ayan tihua'uta'ixaa tɨcɨn: ―¿Ni sacai a'anaj ra'ujijve ɨ yu'uxari jetze seijna i nyuucari tɨ ayan cɨme'en yee: Aijna i tetej i mej raatyá'uj, ájca'i maj ya'uhua'axɨ ɨ mej chi'i ta'ahuaca; ayan pu tye'irájraa tɨ aɨn puéenya'a a'araa tɨ i'i esquineeru? Tavastara'a pu ayan raaruu, ajta rɨ'ɨ tya'utyaavatzɨ ɨ tatzajta'a. 43’Aɨj pu cɨn, ayaa nu tyaja'amue'ixaate'e, Dioj pu amuá'ari'ira aɨjna tɨ tyaja'amuacɨ'ɨtíiche'e ute'e tɨ e'ema'acan ɨ Dioj jemi. Aɨ pu hua'uta'asin seica ɨ maj meyan rɨni a'ij tɨ tiraavijte'e. Aɨ mu ra'ara'astijre'esin xaa nya'u. 44Ajta ain i tetej, tɨ pua'a a'atɨ japuan tíveti, aɨjna ɨ a'atɨ huatyana'axɨjsin aijna i tetej japua. Na'ari cai, tɨ pua'a ain tetej an é'ejveti japuan seij ɨ tevi, aj pu i ain ra'iráxayepe'esin ɨ tevi. ―Ayaa pu tihua'uta'ixaa aɨjna ɨ Jesús. 45Majta maɨn ɨ maj ti'ijta teyujta'a, majta aɨme ɨ fariseos, matɨ'ɨj raanamuajri'i aij tɨ Jesús tí'ixajtacaa nyuucari cɨme'e, aj mu mi raamua'areeri'i tɨ aɨn aɨme tyaxajta'ajma'a. 46Matɨ'ɨj mi raahuau aɨj me ye'i huarɨni mej mi raatyeevi'i. Ma majta, camu meyan huarɨj a'ini mahua'atzɨɨnya'aca'a aɨme ɨ tyaɨte ɨ maj maun e'etyujsaɨra'acaa. Aɨme ɨ tyaɨte, naimi'i mu meyan ramua'areeraca'a tɨ Jesús aɨn pueenya'a saɨj tɨ Dioj jetze ma'acan ti'ixaxa'a.

will be added

X\