San Mateo 2

1Au pu a'unu'ihuaca'a aɨjna ɨ Jesús, chajta'a tɨ ayan tyaja'arajtyahuaa tɨcɨn Belén. Au pu ajtyama'acan aɨjna ɨ chuejra'a japua tɨ ayan tyaja'arajtyahuaa tɨcɨn Judea. Ajna tɨ aɨn a'unu'ihuaca'a ɨ Jesús, au pu ti'ityavaaca'a ɨ rey cɨme'e aɨjna ɨ Herodes. Matɨ'ɨj mi seica Jerusalén e'ire'enye ɨ maj eihua támua'arajcaa. U jetze pujme'en mu a'araacɨ a'utɨ e'ijninyei ɨ xɨcaj. 2Matɨ'ɨj mi meyan tiraataihua'uri'i ɨ Herodes meyan tɨcɨn: ―¿A'uní a'ij een aɨjna ɨ hua'a rey ɨ maj Israel jetze ajtyama'acan, aɨjna tɨ auchan huanu'eihuaca'a? Ajna a'ahua'a a'utɨ e'ijninyei ɨ xɨcaj, aujna a'u tyej e'eche, xu'ura'ave tu huaseij tɨ a'utátzaarajraa aɨjna cɨme'e tɨ huanu'eihuaca'a. Aɨj tu cɨn tyaun a'uva'aju'un tyej ti rɨ'ɨ tíraatyáanajche. 3Tɨ'ɨj raamua'areeri'i aɨjna ɨ rey, aɨjna ɨ Herodes, eecan pu ti'ijmua'astɨ́raa aɨjna cɨme'e. Majta, ɨ tyaɨte ɨ maj Jerusalén a'uchaatɨma'acaa, naimi'i mu ti'itzɨɨnya'acaa. 4Tɨ'ɨqui Herodes hua'utajee naijmi'ica ɨ maj tihue'ijte'e aɨme ɨ maj ti'ivaɨre'e hua'ateyujta'a, majta ɨ maj tihua'amua'atyahua'a ɨ tyaɨte a'ij tɨ te'eyu'usi'i ɨ yu'uxari jetze. Ayaa pu tihua'utaihua'uri'i tɨcɨn: ―¿A'uni nu'u á'anu'eihuan aɨjna ɨ Cɨriistu'u? 5Aj mu mi meyan tiraata'ixaa tɨcɨn: ―Aujna u Belén, ɨ chajta'a tɨ aun a'ajtyáma'acan aujna a'ahua'a u Judea, a'ini ayaa pu ajmi'i ra'uyu'uxaca'a aɨjna ɨ a'atɨ tɨ ti'ixaxa'ata'a ɨ Dioj jetze ma'acan. 6Ayan tɨcɨn: Muan mɨ saj Belén a'uchaatɨme, aujna chuejra'a japua tɨ aun auucá'a u Judá, ijii, muan xu xaa saɨn pueen ɨ saj eitze'e cɨle'en cɨn ti'ijta. Ma ajta, majca'i huayee, seij pu a'amua jetze nú'eihuan tɨ va'acan cɨn tyu'utaijta. Aɨ pu antyujmua'aréera a'ame hua'a cɨme'e ɨ nyetyaɨtestyamua'a, aɨme ɨ maj Israel jetze ajtyama'acan. 7Aj pu i Herodes huaja'utajee aviitzi cɨme'e aɨme ɨ maj eihua támua'arajcaa. Tɨ'ɨqui ayan tihua'utaihua'uri'i tɨcɨn: ―¿A'achuni ari a'atee tɨ huaja'utaseijre aɨjna ɨ xu'ura'ave? 8Ajta e'eyan ihua'utáij maj a'ucɨɨne aujna u Belén. Ayan tihua'uta'ixaa tɨcɨn: ―Sericu, sata'aj yá'uhuauni tyamua'a naa saɨjna ɨ pa'arɨ'ɨ. Satɨ'ɨj raatyaún, aj xu si mu a'uva'aju'un sata'aj naata'ixaate'en, nyata'aj nyajta inyaa á'ume'en, nyata'aj rɨ'ɨ tiraatyajtuaani. 9Matɨ'ɨj raanamuajri'i maɨjna ɨ rey, aj mu mi a'ucɨj. Ajta aɨn xu'ura'ave tɨ a'utaseijre aɨme jemi aujna seij chuejra'a japua a'u tɨ e'ijnyinyei ɨ xɨcaj, aɨ pu anacai huama'acaa. Tɨ'ɨqui an a'ujcháxɨ ɨ chi'i japua a'u tɨ a'ij e'enya'a aɨjna ɨ pa'arɨ'ɨ. 10Eecan mu huataujtyamua'ave matɨ'ɨj raaseij maɨjna ɨ xu'ura'ave. 11Mua'antyenyéesima'acaa mu u chi'ita, matɨ'ɨj mi raaseij ɨ pa'arɨ'ɨ jamuan ɨ naanajra'an. Aj mu mi titunutaxɨ'ɨn. Tyamua'a mu naa rɨ'ɨ tiraata'a. Matɨ'ɨj mi tye'enticúunaxɨ tyu'ujcaaja, aɨ mu raatapueijve ti'itɨ ooro, majta ti'itɨ cɨtzive'eri, majta ti'itɨ cuaane'e tɨ ayan antyahuaa tɨcɨn mirra. 12Majta e'eyan tyu'umaaraca'a tɨ nu'u Dioj hua'uta'ijmɨjri'i maj nu'u cai huara'acɨɨne aɨjna jemi ɨ Herodes. Aɨj mu cɨn seij jetze a'ucɨ́j ɨ juye mej mi a'uré'enyen maujna chuejra'a japua a'u mej e'echajca'a. 13Matɨ'ɨj a'ucɨj aɨme ɨ maj eihua támua'arajcaa, a'atɨ pu huataseijre aɨjna jemi ɨ José tɨ'ɨj ti'imaaracaa. Aɨjna ɨ a'atɨ, ai pu aɨn pueenya'a seij tɨ ti'ivaɨre'e u tajapua. Ayaa pu tiraata'ixaa tɨcɨn: ―Ajchesi. Pata'aj ra'anvi'itɨn paɨjna ɨ pa'arɨ'ɨ, pajta ɨ naanajra'an. A'ura'a pata'aj raatyá'avaa mɨ pa'arɨ'ɨ, pajta ɨ naanajra'an. Hua'amvi'itɨchi aujna Egipto. Sata'aj saun a'uté'en asta nyana'ajcai nyajtahua'a ámuaata'ixaate'en a'anaj tɨ huatarɨ'ɨristari saj ya uvé'enyen seyajna. Ayaa xu huarɨni a'ini aɨjna ɨ Herodes, aɨ pu rahuauni ɨ pa'arɨ'ɨ tɨ i raaje'ica. ―Ayaa pu tiraata'ixaa. 14Tɨ'ɨqui ájche ɨ José. Ya'uvi'itɨ aɨjna ɨ pa'arɨ'ɨ, ajta naanajra'an. Ajta aɨn hua'a jamuan pu á'uraa ajna tɨca'ari tzajta'a. Au mu a'ará'a aujna Egipto. 15Au mu e'etyee asta cai huamɨ'ɨ aɨjna ɨ Herodes. Ayaa pu aɨjna cɨn huarɨj tɨ'ij aráurasten ɨ nyuucari tɨ cɨme'en ayan ajmi'i tyu'utaxajtaca'a saɨj tɨ ti'ixaxa'ata'a ɨ Dioj jetze ma'acan tɨcɨn: “U nu ya'utajée ɨ niyauj aujna Egipto.” 16Tɨ'ɨj Herodes raamua'areeri'i maj raatyaamue'itɨ aɨme ɨ maj eihua támua'arajcaa, eecan pu huatanyu'ucaca'a. Tɨ'ɨj ij ra'utamua'areeri'i a'ij mej tyu'utaxajtaca'a aɨme, aj pu i Herodes tyu'utaijtaca'a maj nu'u hua'ucui'ini naijmi'ica ɨ tɨ'ɨrii mej tyetyaca ɨ maj meyan rajchaɨtɨmee hua'apua ninye'ira'a muucɨ pujme'en. Naijmi'ica mu huaja'ucuii au maj Belén e'echajca'a, majta ɨ seica ɨ maj a'ɨmɨ antacháatɨma'acaa. 17Ayaa pu tya'arauraste aɨjna ɨ nyuucarijra'a tɨ cɨme'en ayan ajmi'i ra'uyu'uxaca'a aɨjna ɨ a'atɨ tɨ ti'ixaxa'ata'a ɨ Dioj jetze ma'acan. Ayaa pu antyahuaaca'a tɨcɨn Jeremías. 18Ayan tɨcɨn: Ayaa pu tyu'unamuajri'i aujna a'ahua'a u Ramá, Maj ruyeinyaca'a, majta eihua ruxaamɨjtya'acaa. Aɨjna ɨ Raquel, aɨ pu seij aɨn pueen ɨ maj ruyeinyaca'a. Ruyaujmua'a pu cɨme'en ruyeinyaca'a. Capu raxe'eva'acaa maj rɨ'ɨ tiraatejeeve aɨjna cɨme'e ɨ maj meri cai che'e ma'a a'ahua'a ɨ yaujmua'ame'en. ―Ayaa pu'u. 19Aru tɨ'ɨj ari huamɨ'ɨ aɨjna ɨ Herodes, saɨj pu ajta huataseijre aɨjna jemi ɨ José tɨ'ɨj ti'imaaracaa. Ai pu aɨn pueen saɨj tɨ ti'ivaɨre'e tajapua ɨ tavastara'a jemi. Ayaa pu aɨn tiraata'ixaa tɨcɨn: 20―Ajchesi. A'anvi'itɨchi hui aɨjna ɨ pa'arɨ'ɨ, pajta ɨ naanajra'an. Sata'aj ja'ucɨɨne saujna chuejra'a japua tɨ ayan tyaja'arajtyahuaa tɨcɨn Israel. Pu'uri'i huamɨ'ɨ ɨ tɨ raje'icatamɨ'ɨcaa aɨjna ɨ pa'arɨ'ɨ. ―Ayaa pu tiraata'ixaa. 21Tɨ'ɨqui ajchee aɨjna ɨ José. Aj pu'i ya'uvi'itɨ aɨjna ɨ pa'arɨ'ɨ, ajta naanajra'an. Au mu a'ará'a maujna Israel. 22Ma ajta aɨn José, ayaa pu raamua'areeri'i tɨ nu'u aɨn Arquelao tie'ijtacaa ruya'upuacɨ'ɨ jetze ma'acan, aɨjna ɨ Herodes tyaacan. Ajta pu Dioj raata'ixaa tɨ'ɨj ti'imaaracaa. Aɨj pu cɨn ti'itzɨɨnya'acaa tɨ aun a'ara'asti, aujna Judea. Tɨ'ɨqui aun a'ará'a tɨ jetzen ajtyama'acan aujna Galileeya. 23Tɨ'ɨj aun a'ará'a, au pu a'ahuauchejte, chajta'a jetze tɨ ayan tyaja'arajtyahuaa tɨcɨn Nazaret. Au pu huayeijxɨ. Ayaa pu tyuju'urɨj tɨ ij ayan aráurasten a'ij mej tyu'utaxajtaca'a aɨme ɨ mej mejmi'i ti'ixaxa'ata'a ɨ Dioj jetze ma'acan. Meyan tɨcɨn: “Ayaa mu raatámua'atzi tɨcɨn Nazaret tɨ e'ema'acan.”

will be added

X\