San Mateo 19

1Tɨ'ɨj Jesús raatapua'ajtaca'a tɨ ayan tihue'ixaate'e, tɨ'ɨqui aun a'arajraa aun tɨ a'utyaca'a u Galileeya. Ajta antaraa utan pujme'en ɨ atya'ana jetze u Jordán. Au pu a'ará'a tɨj na'a au tɨ huaca'a u Judea. 2Eihua mu tyaɨte a'ucɨ́j jamuan. Ajta au pu tihua'uhuaa ɨ mej tí'icucui'icaa. 3Aj mu mi seica e'ire'enye ɨ Jesús jemi. Fariseos mu pueen aɨme. Aɨme majhuauca'a mej raatyamue'itɨn tɨ ij aira'ɨtzen ti'itɨj cɨme'e. Ayaa mu tiraataihua'uri'i tɨcɨn: ―¿Ni qui a'ij ti'irɨ'ɨri tɨ a'atɨ ayan ma ruuraini ɨ ru'ɨj ti'itɨj cɨme'e, ti'itɨj tɨ na'a, capu amɨn a'ij? 4Jesús pu ayan tyu'utanyúu tɨcɨn: ―¿Ni qui sacai a'anaj ra'ujijve ɨ yu'uxari jetze tɨ cɨme'en yee aɨn tɨ nu'u anacai hua'utaahuaca'a ɨ tyaɨte, ayaa pu naijmi'i huataahuaca'a ɨ tyaata'a, ajta ɨ jɨita'a? 5Ajta ayan tyu'uxajtaca'a ajna'ɨmɨ tɨcɨn: “Aɨj pu cɨn aɨn tyaata'a ajtaméj ɨ ruvaujsimua'a jemi. Ru'ɨj pu nu'u jamuan huatyaturaasin. Majta maɨn ɨ maj hua'apua, ayaa mu huataujruurejsin cumu saɨj pu'u ɨ tevi.” 6Ayaa pu'i ti'en, camu che'e hua'apua mana'a silu cumu saɨj pu'u. Aɨj pu cɨn, ɨ tɨ Dioj hua'antyánajchi, miche'e cai ajtáujhua'anan ɨ tyaɨte. 7Aj mu mi meyan tiraataihua'uri'i tɨcɨn: ―Tɨ pua'a ayan ti'éenye'en, ¿a'ini een cɨn tyu'utaijtaca'a aɨjna ɨ Moisés tyaacan tɨ nu'u a'atɨ ru'ɨj aɨn huatapijte'en ɨ papee ti'itɨ ɨ tɨ cɨn ma ruuraini? 8Jesús pu ayan tihua'uta'ixaa tɨcɨn: ―Ayaa pu een cɨn Moisés ayan amuaata'a tɨ a'atɨ ru'ɨj ɨ papee huatapijte'en mej mi raamua'aree tɨ ma ruurai ɨ ru'ɨj a'ini capu ti'itɨ a'amua jetze tasiseiri sej si rɨ'ɨ tihua'ajchaɨ ɨ seica. Ayaa pu xaa Moisés amuaata'a. Ma ajta, capu ayan eenya'a ɨ jajcua ɨmɨ. 9Ayaa nu hui tyaja'amue'ixaate'e. Capu rɨ'ɨri tɨ a'atɨ cha'a na'a ma ruuraini ɨ ru'ɨj. Ai pu'u aɨn pueen ɨ tɨ cɨn rɨ'ɨri tɨ a'atɨ ma ruuraini ɨ ru'ɨj. Tɨ pua'a aɨn jɨra'ara'an seij jamuan ti'ihuaujxana'acɨre'en, aj pu xaa í'irɨni tɨ ma ruuraini. Ajta aɨn cɨna'ara'an tɨ ayan cha'a na'a ma ruurai ɨ ru'ɨj, tɨ pua'a e'eyan seij ancure'evi'itɨn ɨ jɨita'a, aɨ pu tyu'uxana'acɨre aɨjna jemi ɨ tɨ ma ruurai. ―Ayaa pu tihua'uta'ixaa aɨjna ɨ Jesús. 10Majta maɨn ɨ maj jamuan á'ujhua'anya'a, ayaa mu tiraata'ixaa tɨcɨn: ―Tɨ pua'a ayan een aɨme jemi ɨ maj nyejnya'ɨche, ayaa pu tita'amitejte'e ityejmi aɨjna cɨme'e, ayaa pu ti'ixa'apɨ'ɨn maj cai nyéjnya'ɨcha. 11Ajta Jesús pu ayan tihua'uta'ixaa tɨcɨn: ―Camu naijmi'i meyan yau'eitaa mua'aju'un, silu aɨ mu'u ɨ tɨ Dioj hua'uta'a mej mi meyan tya'utaviicue'i ruxé'evi'ira'a cɨme'e. 12Ayaa pu'u een a'ini ayaa pu tihua'ucɨ'ɨ seica tɨj na'a maj huanunu'eihuaca'a. Majta seica, ayaa mu e'en a'ini tyetyaca mu meyan hua'uruu. Majta seica, aɨ mu raaxa'apɨ'ɨntare rujɨɨmua'a mej mi tye'entyarute ɨ Dioj jemi. A'atɨ tɨ na'a tɨ ayan tiraayɨ'ɨtɨ, che'e aɨn ayan huarɨni. 13Majta maɨn ɨ seica, tɨ'ɨrii mu a a'ave'evi'itɨ ɨ Jesús jemi tɨ ij aɨn hua'ajtamuare'en, ajta tɨ ij Dioj jemi raatyajhuauni aɨme cɨme'e. Majta maɨn ɨ maj Jesús jamuan á'ujhua'anya'a, aɨ mu a'utyajhuii maj hua'ajtya'axɨ'ɨn aɨme ɨ maj tɨ'ɨrii a'avé'evi'itɨxɨ. 14Ajta aɨn, Jesús, ayaa pu tihua'uta'ixaa tɨcɨn: ―Sata'aj hua'uta'an mɨ tɨ'ɨrii mej ye ve'ere'enyen nyeetzi jemi. Caxu hue'ijmɨjra, a'ini aɨme ɨ mej a'utyáuu ɨ Dioj jemi, naimi'i mu meyan e'en matɨj maɨme mɨ tɨ'ɨrii. 15Aj pu i hua'amuutze'en hua'ava'amuara'axɨ aɨjna ɨ Jesús. Ajta iya'uraa. 16Ajta saɨj pu e'ire'enye ɨ Jesús jemi. Tyaata'a aɨjna. Aj pu i ayan tiraataihua'uri'i tɨcɨn: ―Maeestru mɨ paj rɨ'ɨ metyáumua'aree, ¿ti'itaani i'i xa'apɨ'ɨn tɨ ruxe'eve'e nyej ni neyan huarɨni tɨ i ayan naacɨ'ɨti nyaj ruuri na'ara'ani ɨ Dioj jemi tɨj na'a rusen cɨme'e? 17Jesús pu ayan tyu'utanyúu tɨcɨn: ―¿A'ini een cɨn peyan ti'inyejee paɨjna cɨme'e nyej rɨ'ɨ metyáumua'aree ca'ɨn qui inyaa rɨ'ɨ nyeti'itevi? Saɨj pu'u aɨn pueen tɨ rɨ'ɨ metyáumua'aree; ai pu aɨn pueen ɨ Dioj. Tɨ pua'a peyan raxe'eve'e tɨ muaacɨ'ɨti pej peyan ruuri pua'ara'ani ɨ Dioj jemi, pata'aj peyan ra'ara'astijre'en a'ij tɨ tyu'utaijtaca'a ɨ Dioj. 18Aj pu i ayan tiraataihua'uri'i aɨjna ɨ a'atɨ tɨcɨn: ―¿Ti'itaani nyuucarijra'a na'ara'astijre'en? Jesús pu ayan tiraata'ixaa tɨcɨn: ―Aijna nya'u tɨ ayan huataujmua'a yee capej ti'ityacui'ica, ajta aɨjna tɨ cɨme'en yee capaj ti'ixana'acɨra'a, ajtahua seij tɨ ayan yee capej ti'inahua'a, capaj pajta a'atɨ hue'itzi cɨn ti'ixaatya'a. 19Ajta pu hui ayan tyu'utaijtaca'a ɨ Dioj aɨjna cɨme'e paj nu'u hua'ajtzaahuati'ira'a ɨ ataata, pajta ɨ anaana. Pajta, peyan huarɨni pej pi peyan rɨ'ɨ tirajcha'ɨ ɨ axa'aj tevi patɨj asaɨj. 20Ajta aɨjna ɨ tyamueij, ayaa pu tiraata'ixaa aɨjna ɨ Jesús tɨcɨn: ―Nain nu cɨn tya'ara'aste tɨj na'a ti'ipua'amua. ¿Ti'itaani auj na'aturaate'e? 21Aj pu i Jesús ayan tiraata'ixaa tɨcɨn: ―Tɨ pua'a ayan timua'araanajchi pej nain cɨn tya'ara'asten, ayaa paj huarɨni. Aricu, nain tyu'utuaachi ɨ tiá'a. Pajta hua'ura'an ɨ tumin aɨme ɨ maj cai a'ij ti'ijviicue'i. Tɨ pua'a peyan huarɨni, eecan papu'u ra'ancura'asin ɨ tajapua ɨ Dioj jemi. Aj papu'u xaa, mu a'uta'iyi'i pata'aj nyeetzi jamuan á'ucha'acanye'en. ―Ayaa pu tiraata'ixaa aɨjna ɨ Jesús. 22Tɨ'ɨj ayan tiraanamuajri'i a'ij tɨ Jesús tyu'utaxajtaca'a, aj pu i utyaavatzɨ ɨ tzajta'an aɨjna ɨ tyamueij. Huatáujxaamɨjte a'ini eihua pu tí'ijchaɨca'a. 23Aj pu i Jesús ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Ayej xaa nya'u ti'ayajna. Tyamua'a pu ti'imuare'eri maj a'utyarute ajna Dioj tɨ e'eseijre'e aɨme ɨ chijtyaani. 24Nyajta neyan tyaja'amue'ixaate'e. Eitze'e pu muare'eri tɨ chijtyaani a'utyarute ajna Dioj tɨ e'eseijre'e cai tɨ cameeyu'u anaarute ti'itɨ pɨ'ɨse'e jetze tɨ anacun. 25Majta aɨme, matɨ'ɨj meyan tiraanamuajri'i, eecan mu a'ij tya'utaseij. Majta meyan tyu'urihua'u tɨcɨn: ―¿Tɨ pua'a ayan ti'eenye'en, ai ta'uj na'a ti'irɨ'ɨri tɨ a'atɨ aun a'utyaturan a'u tɨ Dioj e'eseijre'e? 26Aj pu i Jesús hua'useij. Ajta ayan tihua'uta'ixaa tɨcɨn: ―Aɨme jemi ɨ tyetyaca, capu xaa a'ij ti'irɨ'ɨri. Ma ajta, aɨ pu xaa raayɨ'ɨtɨ ɨ Dioj. 27Ajta aɨjna ɨ Pedro, ayaa pu tyu'utanyúu tɨcɨn: ―Tyajta ityan, nain tu teri me tyauhuá'axɨ ɨ tyej tí'ijchaɨca'a tyej ti á'ujhua'anye'en a'a jamuan. ¿Ti'itaani taacɨ'ɨti ityejmi? 28Aj pu i Jesús ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e. Ajna xɨcajra'a jetze tɨ Dioj nain cɨn tí'ijajcuare'en, inyaa, i nyaj nyajta tyaata'a jetze a'iraanye, ajna nyatɨ'ɨj antiyeijxɨ'ɨn japuan ɨ nya'ɨpua, ayaa pu seira'a a'ame tyamua'a naa mej mi atanyéjnye'ere. Sajta muan mɨ sej nya jamuan á'ujhua'an, ayaa xu che'eta sana'a antira'ase japuan ɨ a'amua'ɨpua, seij sajta seij. Tamuaamuata'a japuan hua'apua xu ara'ase muan, ajta ayan tya'ara'ase ɨ a'amua'ɨpua. Aj xu si seyan tihua'uxa'apɨ'ɨntari'ire'en aɨme tyaɨtejra'a ɨ mej Israel jetze ajtyama'acan, aɨme tyaɨtejra'a mej meyan tamuaamuata'a japuan hua'apua ara'ase. 29’Nyajta neyan tyaja'amue'ixaate'e, a'atɨ tɨ na'a tɨ ti'itɨ a'uraini aɨjna cɨme'e tɨ á'ucha'acanye'en nyeetzi jamuan, tɨ pua'a chi'i, nusu ruja'atzimuá na'ari rucu'utzimuá o rujuutzimua'a, ca'ɨn rutaata, runaana na'ari tɨ pua'a ya'uraini ɨ chuej tɨ japuan ti'ihuaste'e, ayaa pu ti'ijcɨ'ɨti. Tɨ pua'a saɨj na'a ɨ tɨ yá'ujɨsin, ayaa pu tiraacɨ'ɨti a'achu cumu anxɨte ɨ ti'itɨ. Ajta, ayan tiraacɨ'ɨti tɨ ruuri a'ara'ani tɨj na'a rusen cɨme'e ajna Dioj tɨ e'eseijre'e. 30Ajta, ayaa pu hui ajta te'eme: mui'itɨ ɨ maj nu'u va'acan cɨn títyatatí ɨ Dioj jemi ijii, aɨ mu cɨleenye'en cɨn títyatatyá'a mua'aju'un jemin ɨ Dioj. Majta mui'itɨ ɨ maj nu'u cɨle'en cɨn títyatatí ɨ Dioj jemi ijii, aɨ mu va'acan cɨn títyatatyá'a mua'aju'un aɨjna xɨcajra'a jetze tɨ jetzen Dioj tyu'utaijta.

will be added

X\