San Mateo 18

1Ajna'ɨmɨ, aɨ mu avere'enye ɨ Jesús jemi aɨme ɨ maj jamuan á'ujhua'anya'a. Ayaa mu tiraataihua'uri'i tɨcɨn: ―¿A'ataani eitze'e ruxe'eve'e ɨ Dioj jemi seij ɨ tɨ ta jetze ajtyama'acan? 2Aj pu i Jesús seij huatajee ɨ pa'arɨ'ɨ. A e'ita'a ya'utára a'u mej e'ere'eti ɨ seica. 3Aj pu i ayan tihua'uta'ixaa tɨcɨn: ―Ee xaa, ayaa nu tyaja'amue'ixaate'e tɨ ayan ti'ayajna. Tɨ pua'a sacai saɨque tyu'umua'ati, tɨ pua'a sacai seyan rahuauca sej seyan che'eta sana'a runyáta saj cɨn ti'imuajca matɨj mɨ tɨ'ɨrii, caxu a'anaj a'utyaruti ɨ tajapua Dioj tɨ e'eseijre'e. 4Aɨj pu cɨn ayan ti'en. A'atɨ tɨ na'a tɨ ayan huataujseijrata tɨ cai ti'itɨ cɨn ruxe'eve'e, ayaa pu xaa eenya'a a'ame tɨj aijna i pa'arɨ'ɨ. Ai pu aɨn pueen ɨ tɨ eitze'e ruxe'eve'e ɨ Dioj jemi. 5Ajta, a'atɨ tɨ na'a tɨ ayan ra'ancure'evi'itɨn nyenyuucajtze'en seij ɨ pa'arɨ'ɨ tɨj aijna, aɨjna ɨ tevi, aɨ pu ajta na'ancure'evi'itɨ inyeetzi. 6’A'atɨ tɨ na'a tɨ a'ij pua'a tiru'utyá'an ɨ tzajta'an ɨ ruxa'aj pa'arɨ'ɨ tɨ ayan na'atzaahuate'e tɨj aijna, ayaa pu tɨ'ɨjtzɨ́'ɨ aɨn ɨ a'atɨ, anacai maj maun u ra'acáavi'ire ɨ tetej sa'unijra'a tɨ ve'e mata'aj ra'atyajraini a aata'a tɨ ij aɨn a'ujamɨn. 7Cui'i xaa hua'a jemi, aɨme ɨ maj yan a'uchaatɨme iiyan chaanaca japua, ɨ maj majta ca'anijra'a hua'ata'aca ɨ seica mej mi autyaturan ɨ Dioj jemi. Ayaa pu tyuju'ujxe'eve'e mej mi ɨ seica ayan autyaturan ɨ Dioj jemi. Ma ajta, cui'i xaa nya'u aɨjna jemi tɨ ayan ca'anijra'a hua'ata'aca mej mi meyan huarɨni. 8’Patɨ'ɨj autyaturan ɨ Dioj jemi, tɨ pua'a peyan tiru'ujpua'ajte'en ɨ a jetze, peyan tɨcɨn nyamuajca'a pu puéenya'a, na'ari nyaɨɨca pu puéenya'a, ayaa nu ti'imuaxaate'e. Para'antiveijche, pej pi ma ruuraini. Eecan pu eitze'e timuaatyava'ɨri paj a'utyaturan seij cɨme'e ɨ amuajca'a, na'ari seij cɨme'e ɨ aɨɨca ajna Dioj tɨ e'eseijre'e, ajna paj a'aruuri pua'ame jemin. Na'ari pacai peyan huarɨni, hua'apuaca paj cɨn ɨ amuajca'a na'ari hua'apuaca cɨn ɨ aɨɨca paj utyarute ajna a'ahua'a a'u tɨ cai a'amɨ'ɨni ɨ taij. 9Ajta, tɨ pua'a peyan jetzen tiru'ujpua'ajte'en mua'a jɨ'ɨ paɨjna ɨ paj cɨn autyajturaa ɨ Dioj jemi, aiitátɨchi. Ma paj ruuraini. Eecan pu timuaatyava'ɨri paj peyan a'utyarute seij cɨme'e ɨ mua'a jɨ'ɨ ajna Dioj tɨ tie'ijta. Na'ari cai, ayaa paj hua'apuaca cɨn ajjɨ'ɨsi tɨ'ɨj an mujá'ujɨsin a'u tɨ cai a'anaj a'amɨ'ɨni ɨ taij. 10’Rɨ'ɨ xu'u muan sej si cai a'ij pua'a huaja'useijra saɨj tɨ auj cɨle'en. Ayaa nu tyaja'amue'ixaate'e tzaahuati'ira'a cɨme'e, aɨme ɨ mej ti'ivaɨre'e ɨ tajapua, ɨ maj majta hua'achaɨ mua'ara'ani, a'anaj tɨ na'a, aɨ mu huatyáuu jemin ɨ tɨ nye'iya'upua tɨ e'eseijre'e ɨ tajapua. 11Ayaa nu een cɨn a'uve'eme inyaa, i nyaj nyajta tyaata'a jetze a'iraanye nyej ni hua'a japua huanyuuni aɨjna tɨ á'uvej. 12’¿A'ini tyajamua'amityejtye'e a'ij tɨ huarɨni a'atɨ tɨ anxɨte hua'ajya'amua ɨ canya'axɨ? Tɨ pua'a saɨj a'uveti ma a'ahua'a, ¿ni cai ayan rɨni? Aɨ pu huaja'utyahuiite'esin naijmi'ica ɨ seica anna jɨri jetze. U pu a'uma'a a'ame tɨ ij raara'ahuauni aɨjna tɨ á'uvej. 13Ajta, ayaa nu tyaja'amue'ixaate'e. Ayaa pu ti'ayajna, tɨ pua'a aɨn me'e yá'utyauni, eitze'e pu rɨ'ɨ tiraata'ixaa aɨjna cɨme'e tɨ raatyau ɨ tɨ á'uvej, cai mɨ seica ɨ tɨ ari huája'utyáhuiita'acaa. 14Ayaa pu che'eta na'a een aɨjna jemi aɨjna ɨ tɨ amue'iya'upua tɨ tajapua e'eseijre'e. Capu a'atzu raxe'eve'e tɨ saɨj a'uveti tɨ cɨle'en tɨj aijna i pa'arɨ'ɨ. 15’Tɨ pua'a a'ihuaara'a ti'itɨj cɨn autya'ɨtzen mueetzi jemi, ayaa paj huarɨni. Aricu, u a'uta'ixaate'e aviitzi cɨme'e ɨ tɨ cɨn autya'ɨtze mueetzi jemi. Tɨ pua'a aɨn mua'antzaahuate'en, muaa paj xaa raamue'itɨ ɨ a'ihuaara'a sej si sajtahua'a ru'ihuaamua'a xa'ara'ani tyamua'a naa. 16Ma ajta, tɨ pua'a cai mua'antzaahuate'en, pata'aj seica anvi'itɨn aɨjna jemi, hua'apuaca mej mi raamua'aree tɨ pua'a mua'antzaahuate'en nusu cai. Tɨ pua'a a'ihuaara'a cai mua'antzaahuate'en, aɨme ɨ maj hua'apua ayaa mu tyu'utaxajta tɨ ayan ti'ayajna ɨ paj cɨn jetzen tí'ijpua'ajte'e aɨjna ɨ a'ihuaara'a. 17Ajta e'eyan, tɨ pua'a cai hua'antzaahuate'en ɨ maj hua'apua, pata'aj hua'uta'ixaate'en naijmi'ica ɨ mej tyujsa'ɨri. Ajta, tɨ pua'a a'ihuaara'a cai hua'antzaahuate'en aɨme, ayaa paj che'eta pana'a raruuren patɨj hua'aruure aɨme ɨ maj cai ajtyama'acan muejmi jetze nusu aɨme ɨ maj tyú'ujijve'e u'uvieernu jetze ma'acan. 18’Ayaa nu tyaja'amue'ixaate'e tzaahuati'ira'a cɨme'e, satɨj sana'a sej tié'ijmɨ iiyan chaanaca japua, Dioj pu ayan che'eta na'a tié'ijmɨ u tajapua. Ajta satɨj sana'a sej huata'aca iiyan chaanaca japua, Dioj pu ayan che'eta na'a huata'aca u tajapua. 19’Nyajta nu neyan tyaja'amue'ixaate'e mɨ sej iiyan chaanaca japua huatyáuu tɨ pua'a seyan che'eta sana'a tiru'umua'areera mɨ sej hua'apua saɨjna cɨme'e a'ij sej ye'i ti'ijhuaviiran ɨ Dioj jemi, aɨjna tɨ nye'iya'upua ayaa pu che'eta na'a á'amuaruuren a'ij sej ti'ijhuavii. 20Ayaa pu hui te'eme, a'ini a'u tɨ na'a maj e'etyujsa'ɨri nyenyuucajtze'e, au nu a'utyaváa na'ame hua'a tzajta'a. Capu amɨn a'ij tɨ pua'a mahua'apua mana'a na'ari mahueica mana'a. 21Ajta aɨn ɨ Pedro, aɨ pu avere'enye ɨ Jesús jemi. Ajta ayan tiraataihua'uri tɨcɨn: ―Nyavastara'a, ¿a'achuni pua'amua ruxe'eve'e nyej tiraatauuni'i ɨ nye'ihuaara'a tɨ pua'a ti'itɨj cɨn autya'ɨtzen nyeetzi jemi? ¿Ni qui aráhua'apuá pua'amua? 22Jesús pu ayan huatanyuu tɨcɨn: ―Canu neyan raataxajta yee aráhua'apua, silu hueicate japuan tamuaamuata'a japuan aráhua'apua. 23’Ayaa pu ti'ijxe'eve'e ɨ Dioj mej mi ti'ihuáuruuni'i seij majta seij. Na'ari cai, ayaa pu che'eta na'a hua'uruuren tɨj aɨjna ɨ rey tɨ ayan ti'ijxe'eva'aca'a tɨ raaxa'apɨ'ɨntare'en a'achu maj caj té'echaɨca'a aɨme ɨ maj ravaɨra'aca'a. 24Pu'uri pu autyejche tɨ ayan tiraaxa'apɨ'ɨntare'en, matɨ'ɨj seij a'ure'enyejte jemin tɨ eihua té'echaɨca'a, a'achu cumu tamuaamuata'a vi'ira'a meeru'u. 25Ajta aɨjna tɨ té'echaɨca'a, capu ti'ituaava'acaa ɨ tɨ cɨn tiraanajchite'en. Aɨj pu cɨn, ɨ rey ayan tyu'utaijtaca'a maj nu'u huá'utuaani aɨjna ɨ tyaata'a, ajta ɨra'ara'an, majta ɨ tɨ'ɨrii asta nain tɨ tí'ijchaɨca'a. Ayaa pu tyu'utaijtaca'a tɨ ij tiraanajchite'en nain a'achu tɨ té'echaɨca'a. 26’Aj pu i aɨn tɨ té'echaɨca'a titunutaca'a a vejli'ipua ɨ rey jemi. Eihua pu rajée tɨcɨn: “Pauche'e nyechu'eva'a. Nyaa nu xaa timuaanajchite'esin nain cɨme'e a'achu nyaj timua'achaɨre'e.” 27Ajta aɨjna tɨ rajijve'e, aɨ pu rá'ancu'uvajxɨ. Tiraatauuni'iri'i nain cɨme'e ɨ tɨ té'echaɨca'a. Aj pu i raatátuaa. 28’Cɨme'en pu'u huirajraa aɨjna tɨ ravaɨre'e, aj pu i seij huátyau tɨ ayan ajta tira'achaɨra'acaa. Anxɨte meeru'u pu'u té'echaɨca'a. Aɨ pu raatyeevi'i. Tɨ'ɨqui autyejche tɨ ra'anteevi'i cɨjpaara'an jetze. Ca'anin pu cɨn ayan tiraataijtaca'a tɨcɨn: “Tinaanajchite'e a'achu paj tina'achaɨre'e.” 29’Aj pu i titunutaca'a aɨjna tɨ ajta ayan ravaɨra'acaa aɨjna ɨ rey. Ayaa pu tiratajee tɨcɨn: “Pauche'e nyechu'eva'a. Nyaa nu ti'imuaanajchite'en.” 30’Ma ajta aɨjna ɨ saɨj, capu raataxe'eve, silu iya'uraa. Ajta e'eyan raataijtaca'a maj nu'u ra'ityaanan asta na'a cai tiraanajchite'en nain a'achu tɨ té'echaɨca'a. 31Majta maɨn ɨ seica ɨ maj ravaɨre'e aɨjna ɨ rey, matɨ'ɨj tyu'useij a'ij tɨ ti'itɨj huarɨj, matɨ'ɨj mi u a'uju'un jemin ɨ tɨ tihue'ijte'e. Nain mu raata'ixaa a'ij tɨ ti'itɨj huarɨj. 32’Ajta aɨn ɨ rey, tɨ'ɨqui raataijtaca'a aɨjna ɨ tɨ ravaɨre'e. Ayaa pu tiraata'ixaa tɨcɨn: “Muaa pej nyavaɨre'e, huapɨ'ɨ pej a'ij pua'a ti'itevi. Nyaa nu timuaatauuni'iri'i nain cɨme'e a'achu paj tina'achaɨra'aca'a nyaɨjna cɨme'e ɨ pej peyan tinajhuaviiri'i. 33¿Ni cai ayan tiraavijtya'acaa pej peyan che'eta pana'a ra'ancu'uvajxɨ'ɨn ɨ axa'aj tevi tɨ nyavaɨre'e nyatɨj nyajta inyaa timua'ancu'uvajxɨ mueetzi?” 34’Ajta aɨn tɨ ti'iraijte'e, eecan pu huatanyu'ucaca'a aɨjna jemi. Aj pu i aun tyu'utatuii aɨme jemi ɨ maj hua'anaamɨca mej mi ra'ityaanan asta na'a cai nain tiraanajchite'en a'achu tɨ té'echaɨca'a. 35’Ajta aɨn tɨ nye'iya'upua tɨ tajapua e'eseijre'e, ayaa pu che'eta na'a á'amuaruuren seij ajta seij tɨ pua'a pacai tiraatauuni'i ɨ a'ihuaara'a tzaahuati'ira'a cɨme'e.

will be added

X\