San Mateo 17

1Tyauma'aca a'achu cumu arájsevi xɨcaj, aj pu'i Jesús antiraa ɨrij japua. Aɨme pu a'uví'itɨ aɨjna ɨ Pedro, ajta aɨjna ɨ Jacobo, ajta aɨjna ɨ Juan, ɨ tɨ juutzajra'an pueen aɨjna ɨ Jacobo. 2Matɨ'ɨj maun a'utyáuuca'a, aj pu'i saɨque tyu'utaujseijrataca'a aɨjna ɨ Jesús mejseiiraca. Ayaa pu tyamua'a ti'ityámastacare'e ɨ nyeerima'ara'an tɨj xɨcaj. Tyamua'a pu tyu'utyacueinaraca'a ɨ cɨɨxura'ara'an. Ayaa pu ti'ityatáatɨye'icaa tɨj taij. 3Majta e'eyan, hua'apua huataseijre hua'a tzajta'a. Ai mu aɨn pue'enya'a aɨjna ɨ Moisés tyaacan, ajta aɨjna ɨ Elías tɨ ajmi'i ti'ixaxa'ata'a ɨ Dioj jetze ma'acan. Aɨ mu tí'ixajtacaa ɨ Jesús jamuan. 4Ajta aɨn ɨ Pedro, aɨ pu ayan tiraata'ixaa aɨjna ɨ Jesús tɨcɨn: ―Tavastara'a, naa pu xa'apɨ'ɨn tyej ya huatyáuu tyeyajna. Tɨ pua'a mua'araanajchi, tyaj hueicaca huataahua ɨ ɨnaamua. Saɨj pu muacɨ'ɨti mueetzi, ajta seij, amɨjna mɨ Moisés. Ajta seij pu racɨ'ɨti amɨjna mɨ Elías. 5Auche'e pu ti'ixáataca tɨ'ɨj aitɨri a'acávi'irixɨ hua'a japua. Hua'a tzajta'a pu rájrupi aɨjna ɨ aitɨri tɨ naa tí'ityatáatɨye'i. Aj pu i tzajta'an a'icánamuajre tɨ a'atɨ ayan tyu'utaxajtaca'a tɨcɨn: ―Ai pu aɨn pueen ɨ niyauj, ɨ nyej raxe'eve'e. Eecan pu rɨ'ɨ tinata'aca inyeetzi. Xaanamuajri'i seijna. ―Ayaa pu tyu'utaxajtaca'a. 6Matɨ'ɨj raanamuajri'i maɨjna, aj mu mi a'aráavatzɨ a chuaata'a aɨme ɨ maj Jesús jamuan á'ujhua'anya'a, a'ini tyamua'a mu tyu'utatzɨn. 7Aj pu i Jesús a ve'ere'enye hua'a jemi. Tɨ'ɨqui hua'ajtamuarej. Aj pu i ayan tihua'uta'ixaa tɨcɨn: ―Xa'ajhuiixɨ'ɨ muan. Caxu ti'itzɨɨnya'a. 8Majta maɨn, matɨ'ɨj mauunyéjnye'eraca'a, capu che'e ma'a a'aja'atɨjca'a. Ai pu'u an e'eseijra'acaa aɨjna ɨ Jesús. 9Matɨ'ɨj e'ita'a a'ucaju'unca ɨ jɨri japua, Jesús pu ayan tihua'uta'ijmɨjri'i tɨcɨn: ―Caxɨɨ xu a'atɨ ixaatya'a a'ij sej tyu'useij. Sauche'e rachu'eva'a asta nya na'aj cai inyaa i nyaj nyajta tyaata'a jetze a'iraanye aitára'ani hua'a tzajta'a ɨ mɨ'ɨchite. 10Majta maɨn ɨ maj jamuan á'ujhua'anya'a, ayaa mu tiraataihua'uri'i tɨcɨn: ―¿A'ini een cɨn meyan ti'ixaxa'a aɨme ɨ mej tyu'ujmua'ate ɨ yu'uxari jetze meyan tɨcɨn anacai pu nu'u ruxe'eve'e tɨ ya uvé'enyen aɨjna ɨ Elías? 11Jesús pu ayan tihua'uta'ixaa tɨcɨn: ―Ayej ti'ayajna. Elías pu xaa ya uve'enyejsin tɨ ij nain tyu'ujájcuare'en mej mi majtahua'a ra'ara'astijre'en ɨ Dioj. 12Me nyajta inyaa, ayaa nu tyaja'amue'ixaate'e tɨ aɨn Elías ari ya uve'enye. Majta maɨn, camu raamuá'a silu ayaa mu raaruu a'ij mej ti'ijxe'eva'aca'a. Ayaa mu majta che'eta mana'a nyaruuren inyeetzi, i nyaj nyajta tyaata'a jetze a'iraanye. Pueijtzi mu majta naata'asin inyeetzi. 13Cɨme'en pu'u ayan tyu'utaxajtaca'a, aj mu mi raamua'areeri'i tɨ aɨn aɨjna cɨme'en tyu'utaxajtaca'a ɨ Juan tyaacan tɨ hua'amuaɨ'ɨhuacara'a. 14Matɨ'ɨj maun a'ará'a a'u mej e'etyujsaɨra'acaa eihua ɨ tyaɨte, saɨj pu avere'enye ɨ Jesús jemi. Aj pu i ava'ujtunutaca'a vejli'ipuan. 15Ayaa pu tirajhuaviiri'i tɨcɨn: ―Nyavastara'a, pata'aj ra'ancu'uvajxɨ'ɨn ɨ niyauj. Aɨ pu rutɨmue'i. Aɨj pu cɨn tirajpueiitzi huapɨ'ɨ. Mui'itɨ pu anajve taij tzajta'a, ajta a aata'a. 16Nyaa nu ya'araavi'itɨ aɨme jemi ɨ maj mueetzi jamuan á'ujhua'an mej mi tiraahuaate'en. Majta maɨn, camu raayɨ'ɨtɨhua'a mua'araa. 17Ajta aɨn ɨ Jesús, ayaa pu tyu'utanyúu tɨcɨn: ―Muan mɨ saj cai a'atzu tya'atzaahuate'e, mɨ saj cai máumua'aree, ¿a'achuni pua'an ninye'ira'a auche'e ruve'eve'e nyej neyan huatyavaa na'ara'ani muejmi jemi? ¿Ni ayan ruxe'eve'e nyej a'ateevi'in para rusen cɨme'e nyej neyan muejmi jemi ya huatyavaaca nyej ni rɨ'ɨ amuaaruuren? Ma sa'ave'evi'itɨchi mɨ pa'arɨ'ɨ. Matɨ'ɨj mi a ye'eve'evi'itɨ. 18Aj pu i Jesús ra'ajtya'axɨ aɨjna ɨ tiyaaru'u tɨ pa'arɨ'ɨ tzajta'a seijra'acaa. Aj pu i huirajraa. Cɨme'en pu'u huirajraa, tɨ'ɨqui huarúj aɨjna ɨ pa'arɨ'ɨ. 19Matɨ'ɨjta mi, aɨme ɨ maj jamuan á'ujhua'anya'a, rujɨme'e mu tyu'uxajtaca'a aɨjna jamuan ɨ Jesús. Ayaa mu tiraataihua'uri'i tɨcɨn: ―¿A'ini een cɨn tyacai raayɨ'ɨtɨhua'a ta'araa tyej raatamuarite'en tyaɨjna ɨ tiyaaru'u tɨ tzajta'an seijra'acaa? 20Aj pu i Jesús ayan tihua'uta'ixaa tɨcɨn: ―Ayaa pu'u ti'ayajna, a'ini caxu a'atzu tya'atzaahuate'e. Ayaa nu tyaja'amue'ixaate'e huataujnyátacan cɨme'e, tyamua'a pu ti'ivaɨre'e sej seyan tya'atzaahuate'e ɨ rutzajta'a tɨ ayan tyaja'ure'enyen a'ij tɨ tyajamua'amitejte'e. Aɨ pu'u ruxe'eve'e sej seyan tya'atzaahuate'e cɨj caj. Tɨ pua'a seyan cɨj caj tya'atzaahuate'e, aj pu xaa rɨ'ɨri sej si seyan tiraataijte'en amɨjna mɨ jɨri tɨcɨn: “Tichesi, atyajra'a a aata'a a'ahua'a atya'ana jetze tɨ ve'e.” Ajta aɨn mɨ jɨri, ayaa xaa nya'u rɨni. Ayaa pu'u xaa nya'u, tɨ pua'a seyan tya'atzaahuate'e, nain xu cɨn raayɨ'ɨtɨhua'a xa'aju'un. 21Ajta, sata'aj seyan raatamuarite'en saɨjna ɨ tiyaaru'u tɨ ayan een tɨj amɨjna, ayaa pu tyu'ujxe'eve'e saj raatahuavii ɨ Dioj, sajta huauritzi'ive'en. 22Matɨ'ɨj mauj naijmi'i á'ujhua'anya'a maujna a'ahua'a tɨ jetzen e'ejtyáma'acantaca'a u Galileeya, Jesús pu ayan tihua'uta'ixaa tɨcɨn: ―Ayaa pu a'atɨ tyu'utatuiire'esin inyeetzi cɨme'e i nyaj nyajta tyaata'a jetze a'iraanye. Aɨ pu nyeetzi cɨme'e hua'utatuiire'esin aɨme jemi ɨ tyetyaca. 23Majta maɨn, ayaa mu naje'icatan. Me nyajta inyaa, ayaa nu hui huatarujsin hueica xɨcaj jetze. Yaa pu'u xaa nya'u tyaja'ure'enyesin. Majta maɨn ɨ maj Jesús jamuan á'ujhua'anya'a, eihua mu huataujxaamɨste matɨ'ɨj raanamuajri'i a'ij tɨ tyu'utaxajtaca'a. 24Matɨ'ɨj mi chajta'a a'ará'a aujna Capernaum. Matɨ'ɨj mi seica e'ire'enye jemin aɨjna ɨ Pedro. Ai mu aɨn pueen ɨ mej tyú'ujijve'e maɨjna cɨme'e ɨ hua'apua meeru'u ɨ tɨ cɨn tyu'utyavaɨre'esin hua'a teyujta'a. Ayaa mu tiraataihua'uri'i tɨcɨn: ―¿Ni cai ti'inajchitan a'amua maeestru aɨjna ɨ hua'apua meeru'u ɨ tɨ tyu'utyavaɨre'esin u tatéyujta'a? 25Aj pu i ayan tihua'uta'ixaa tɨcɨn: ―Aa ni'ijta nya'u. Aj pu i Pedro utyajrupi u chi'ita. Capu xɨ ti'itɨ a'ij tyu'utaxajtaca'a aɨjna ɨ Pedro, silu Jesús pu anacai ayan tiraata'ixaa tɨcɨn: ―¿A'ini timua'amitejte'e, Simón? ¿A'atyaɨnqui mejijve'e aɨme ɨ rey ɨ mej tie'ijta iiyan chaanaca japua? ¿A'atyaɨnqui mejijve'e ca'ɨn aɨme ɨ maj ti'itua'araca ɨ mej ti'ira'atɨ'ɨcɨ, na'ari maɨjna cɨme'e a'achu tɨ caj seij tijcha'ɨ? ¿Ni qui aɨme mejijve'e ɨ ruyaujmua'a ca'ɨn qui aɨme ɨ mej seij chuejra'a japua e'ema'acan? 26Pedro pu ayan huatanyuu tɨcɨn: ―Aɨme ɨ mej seij chuejra'a japua e'ema'acan. Ajta Jesús pu ayan tiraata'ixaa tɨcɨn: ―Aɨj pu cɨn, capu ruxe'eve'e ɨ mej tyu'utanajchita aɨme ɨ hua'ayaujmua'a. 27Ma ajta, tyata'aj cai teyan hua'utanyu'ucaste'en, ayaa paj huarɨni. Pata'aj hui u á'ume'en a'u tɨ a'avastɨme ɨ jaj. Pajta ra'atyahua'axɨn ɨ cue'itzɨ'ɨpua a aata'a. Pajta, paɨjna ɨ hue'i, ɨ ta'anajca paj raatyévi'ira, pata'aj ra'acána'axɨn, an pej pi ye'etyauni ɨ tenita'a seij ɨ tumin tɨ ayan ti'inajchi a'achu cumu muaacua meeru'u. Pata'aj ya'ara'ɨn ɨ tumin pata'aj tihua'unajchite'en, pajta inyeetzi cɨme'e.

will be added

X\