1 Majta aɨme ɨ fariseos, majta aɨme ɨ saduceos, aɨ mu á e'iré'enye a'u tɨ a'utyavaaca'a ɨ Jesús, mej mi raatyamue'itɨn hue'itzi cɨme'e. Aɨj mu cɨn meyan raatahuaviiri'i tɨ aɨn hua'utaseijrate'en ɨ maj cɨn raamua'aree tɨ ute'e e'ema'acan ɨ tɨ jetzen araujca'anye. 2 Ajta aɨn Jesús, ayaa pu tihua'uta'ixaa tɨcɨn: ―Muan xu raayɨ'ɨtɨ a'ij sej ye'i tyu'utaxaj a'ij tɨ ti'itɨ rɨni u ute'e. Tɨ'ɨj huatyechuixare, ayaa xu ti'ixaxa'a tɨ nu'u naa hue'eenya'a a'ame a'ini aurá'apá'uvi'i pu a'araa. 3 Na'ari cai, tɨ'ɨj huatapua'are, ayaa xu sajta seyan cɨme'en ti'ixaxa'a yee ijii mu huatyeviiye, a'ini aurá'apá'uvi'i pu a'araa, majta nu'u ra'utanáa. Muan xu xaa raayɨ'ɨtɨ a'ij sej ye'i tyu'utaxaj a'ij tɨ ti'itɨj rɨni u ute'e. Ma sajta muan, caxu a'atzu raayɨ'ɨtɨ a'ij sej ye'i tyu'utaxaj aɨjna cɨme'e tɨ ari tyaja'ure'enyejsin ɨ xɨcajra'a, tɨ jetzen Dioj ra'antipua'arite'en nain. 4 Muan mɨ sej a'ij pua'a ti'ityetyaɨte, mɨ sej eihua cɨn ata'ɨtza'ara, ayaa xu rahuauca ɨ saj cɨn raamua'aree tɨ ute'e e'ema'acan ɨ nyaj jetzen aranca'anye. Canu xaa nya'u ti'itɨj amuaataseijrate'esin silu ayaa nu'u, ɨ tɨ e'eseijre'e cɨme'en aɨjna ɨ Jonás. Aj pu i Jesús a huaja'utyáhui. Tɨ'ɨqui ya'uraa. 5 Matɨ'ɨj antacɨj utavan pujme'en aɨme ɨ maj Jesús jamuan á'ujhua'anya'a, aɨ mu ya'uhua'axɨ mej ya'araɨ'ɨpɨ'ɨn ɨ pan maj raacua'ani. 6 Aj pu i Jesús ayan tihua'uta'ixaa tɨcɨn: ―Rɨ'ɨ xu'u muan, saɨjna cɨme'e fariseos maj ru'utyaaratzɨ ɨ pan tzajta'a tɨ ij ájcu'ustaa, sajta saɨjna cɨme'e saduceos maj majta ru'utyaaratzɨ. ―Ayaa pu tihua'uta'ixaa. 7 Majta aɨme ɨ maj Jesús jamuan á'ujhua'anya'a, aɨ mu tyú'urixaatya'acaa ɨ rujɨɨmua'a. Ayaa mu tyu'utaxajtaca'a tɨcɨn: ―Ayaa pu tyu'utaxajtaca'a amɨjna, a'ini catu ya'araɨ'ɨpɨ ɨ pan. 8 Aj pu i Jesús raamua'areeri'i a'ij mej ye'i tí'ixajtacaa. Tɨ'ɨqui ayan tihua'utaihua'uri'i tɨcɨn: ―Muan, mɨ saj cai a'atzu tya'atzaahuate'e, ¿a'ini een cɨn seyan tyu'urixaate'e yee saj cai pan ticha'ɨ? 9 ¿Ni sacai xɨ yau'eite? ¿Ni seri ya'uhua'axɨ a'achu tɨ pua'an sicɨri tye'irájraa ɨ pan tɨ tya'avá'aturaa nyatɨ'ɨj hua'uraɨ'ɨpɨ'ɨte ɨ maj anxɨj vi'ira'a ara'asicaa ɨ tyaɨte nyaɨjna cɨme'e ɨ tya'anxɨvi ɨ pan? 10 ¿Ni sajta seri ya'uhua'axɨ a'achu saj pua'amua caj tya'ava'ɨste ɨ sicɨri jetze nyatɨ'ɨj hua'uraɨ'ɨpɨ'ɨte ɨ maj muaacua vi'ira'a ara'asicaa ɨ tyaɨte nyaɨjna cɨme'e ɨ tya'aráhua'apua ɨ pan? 11 ¿A'ini auj ti'irɨ'ɨri saj cai yau'eite saɨjna, ɨ nyaj cai á'amue'ixaate'e nyaɨjna cɨme'e ɨ pan silu rɨ'ɨ xu'u muan saɨjna ɨ maj cai huataujnyátacan cɨn ti'ixaxa'a aɨme ɨ fariseos, majta aɨme ɨ saduceos? 12 Aj mu xaa mi yau'eitaa mua'araa tɨ ayan tihue'ixaatya'a aɨjna cɨme'e a'ij mej ye'i ti'imua'ataca aɨme ɨ fariseos, majta aɨme ɨ saduceos. Capu xaa nya'u ayan aɨjna cɨn tihua'uta'ixaa yee rɨ'ɨ xu'u muan saɨjna cɨme'e ɨ maj cɨn ru'utyaaratzɨ ɨ pan tzajta'a. 13 Tɨ'ɨqui Jesús aun a'ará'a aujna a'ahua'a aun tɨ e'ejtyama'acan tɨ ayan tyaja'arajtyahuaa tɨcɨn Cesarea de Filipo. Aj pu i ayan tihua'utaihua'uri'i aɨme ɨ maj jamuan á'ujhua'anya'a tɨcɨn: ―¿A'iqui meti'ixa ɨ tyaɨte a'atɨ nyaj pueen i nyaj nyajta tyaata'a jetze a'iráanye? 14 Ayaa mu tiraata'ixaa tɨcɨn: ―Seica mu meyan ti'ixaj paj nu'u aɨn pueen aɨjna ɨ Juan tyaacan tɨ ti'ityámuaɨ'ɨhuacara'a, majta seica meyan ti'ixa paj nu'u aɨn pueen aɨjna ɨ Elías, majta seica meyan tɨcɨn paj nu'u aɨn pueen aɨjna Jeremías tyaacan na'ari paj nu'u saɨj pueen aɨme ɨ mej Dioj jetze ma'acan ti'ixaxa'a. 15 Aj pu i ayan tihua'utaihua'uri'i tɨcɨn: ―Ari muan, ¿a'ini tyajamua'amitejte'e a'ataani nyaj pueen? 16 Ajta aɨjna ɨ Simón, tɨ ajta i'i Pedro, aɨ pu ayan tiraata'ixaa tɨcɨn: ―Muaa paj paɨn pueen aɨjna ɨ Cɨriistu'u tɨ Dioj an yá'ujra ɨ ɨpuari japua, muaa paj paɨn pueen aɨjna ɨ yaujra'an ɨ Dioj tɨ i'i ruuri. 17 Jesús pu ayan tiraata'ixaa tɨcɨn: ―Pata'aj hua'atyamua'ave'en muaa, Simón, i pej i'i yaujra'an aɨjna ɨ Jonás. Hua'atyamua'ave'e aɨjna cɨme'e, a'ini capu a'atɨ ayan timuaata'ixaa tɨ iiyan seijre'e chaanaca japua, silu aɨjna tɨ i'i nye'iya'upua tɨ ute'e e'eseijre'e u tajapua, aɨ pu xaa ayan timuaata'ixaa. 18 Nyajta inyaa, ayaa nu hui ti'imue'ixaate'e paj muaa paɨn pueen ɨ Pedro, ɨ paj pajta peyan antyahuaa tɨcɨn ɨ tɨ i'i tetej. Nyajta inyaa, nyeijna japua i tetej, nyaa nu ra'ajtaahua ɨ nyeteyuu. Ajta, capu rɨ'ɨriista a'ame tɨ aɨn tiyaaru'u raatyamue'itɨn aɨjna ɨ tɨ aɨjna cɨn antyujmua'aree mej mi huacui'ini ɨ tyaɨte. 19 Nyaa nu muaata'asin paj paɨjna cɨn anti'amua'areera pej tihua'antacuunye'en ɨ tyaɨte mej mi a'utyarute ajna Dioj tɨ tie'ijta. Patɨj pana'a paj te'ityaanan iiyan chaanaca japua, Dioj pu ayen che'eta na'a te'ityanajsin u tajapua. Ajta patɨj pana'a paj tya'antacuuna iiyan chaanaca japua, Dioj pu ajta ayen che'eta na'a tya'antacuuna u tajapua. ―Ayaa pu tiraata'ixaa aɨjna ɨ Jesús. 20 Aj pu i Jesús ayan tihuéijca aɨme ɨ maj jamuan á'ujhua'anya'a maj nu'u cai a'atɨ ixaatya'a tɨ aɨn pueen aɨjna tɨ Dioj an yá'ujra ɨ ɨpuari japua. 21 Ajna'ɨmɨ, Jesús pu autyejche tɨ tihua'uta'ixaate'en aɨme ɨ maj jamuan á'ujhua'anya'a tɨ nu'u ayan ruxe'eve'e tɨ a'ura'ani anna Jerusalén. Au pu nu'u eihua rajpueitzi a'ame. Majta nu'u aɨme ɨ maj hua'avaujsi ɨ maj Israel jetze ajtyama'acan, majta nu'u aɨme ɨ mej ti'ijta hua'ateyujta'a, majta nu'u aɨme ɨ mej tyu'ujmua'ate ɨ yu'uxari jetze, naimi'i mu a'ij pua'a raruuren. Ruxe'eve'e nu'u maj raaje'ica. Aj pu ijta huatarujsin hueica xɨcajra'a jetze. 22 Ajta aɨn ɨ Pedro, aɨ pu ra'iraavi'itɨ ayée. Aj pu i autyejche tɨ ra'ajtya'axɨ'ɨn aɨjna ɨ Jesús. Ayaa pu tiraata'ixaa tɨcɨn: ―Che'e a'ij ti'imuavaɨra'a tɨ ij cai ayan ti'imuaruura, nyavastara'a. 23 Aj pu i pɨ ancure'eve aɨjna ɨ Jesús. Ayaa pu tiraata'ixaa aɨjna ɨ Pedro tɨcɨn: ―Aricu a'ura'a, mɨ pej i'i Satanás. Eecan paj tina'antyu'uuni'i nyej ni autyaturan ɨ Dioj jemi a'ini capej peyan ti'imua'atze a'ij tɨ ti'ijxe'eve'e ɨ Dioj, silu a'ij mej ti'ijxe'eve'e ɨ tyaɨte. 24 Aj pu i Jesús ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Tɨ pua'a a'atɨ raxe'eva'a tɨ nyaa jamuan á'ucha'acanye'en, ruxe'eve'e tɨ aɨn cai che'e ayan rɨjca a'ij tɨ ti'ijxe'eve'e rusaɨj, silu ayaa pu tyu'ujxe'eve'e tɨ aɨn rajpueitzi a'ara'ani nyaa jamuan ruxé'evi'ira'a cɨme'e. 25 Ayaa pu'u, a'atɨ tɨ na'a tɨ ti'ityese'e tɨ cai huamɨ'ɨni, aɨ pu xaa nya'u mɨ'ɨni. Aɨj pu á'ujɨsin ɨ ruxaijnyu'uca tɨ auj ruuricaa. Ajta aɨn ɨ a'atɨ tɨ ayan eenye'eque'e huamɨ'ɨni aɨjna cɨme'e tɨ na'ara'astijre inyeetzi, aɨ pu xaa nya'u ratyauuni ɨ ruxaijnyu'uca tɨ auj ruuricaa. 26 Ahuii, tɨ pua'a a'atɨ nain huámue'itɨn naijmi'i tɨ iiyan seijre'e chaanaca japua, ¿ni qui tiraatyava'ɨri aɨjna tɨ raamue'itɨ tɨ pua'a ya'uraini ɨ ruxaijnyu'uca tɨ auj ruuricaa? Capu xaa nya'u a'atzu tiraatyava'ɨri. Ari, ¿ti'itaani cɨn ti'ipuata'atan aɨjna ɨ a'atɨ tɨ ij Dioj ajtahua'a raatátɨsten ɨ xaijnyu'ucara'an tɨ auj ruuricaa? Capu ti'itɨj cɨn ti'ipuata'atan xaa nya'u. 27 Nyajta inyaa, i nyaj nyajta tyaata'a jetze a'iraanye, nyaa nu nyajtahua'a ya va'acányejsin. Ayaa nu che'eta nyana'a huataseijre'esin nain cɨme'e tɨj ajta seijre'e ɨ Dioj tɨ ni'iya'upua. Hua'a jamuan nu hui nyajta huataseijre'esin aɨme ɨ mej ti'ivaɨre'e ɨ tajapua. Nyajta nu tihua'uta'asin seij nyajta seij naijmi'ica a'ij tɨ tihua'uvijte'e a'ij mej ti'itɨj huáruu, seij ajta mɨ seij. 28 Ayaa nu tyaja'amue'ixaate'e tzaahuati'ira'a cɨme'e, seica mej ya huatyáuuca ayajna, aɨ mu cai huacui'ini asta mana'a cai anacaican naaseij ɨ nyaj nyajta tyaata'a jetze a'iraanye nyej ni ya tanyen nyej ni tyu'utaijta iiyan chaanaca japua.
