San Mateo 15

1Matɨ'ɨj mi seica ave'ere'enye ɨ Jesús jemi. Aɨme mu aɨn pueen ɨ fariseos, majta aɨme ɨ mej ti'imua'ata ɨ yu'uxari jetze. Au mu a'araacɨ u Jerusalén. Aj mu mi meyan tiraataihua'uri'i tɨcɨn: 2―¿A'ini een cɨn macai ra'aste ɨ tavaujsimua'a tyaaca tihua'aye'ira aɨme ɨ ma a jamuan á'ujhua'an? Camu meyan ra'aste maɨjna cɨme'e ɨ maj cai anaujmuéitya'axɨ'ɨn meti'icua'aca. 3Ajta aɨn ɨ Jesús, ayaa pu tihua'uta'ixaa tɨcɨn: ―Sajta muan, ¿a'ini een cɨn seyan ma rúujɨpua ɨ tɨ tyu'utaijtaca'a ɨ Dioj sej si saɨjna a'ara'asten ɨ ruye'ira ɨ saj sana'a rajtyau rujɨɨmua'a? 4A'ini Dioj pu ayan tyu'utaxajtaca'a aɨjna tɨ cɨme'en yee: “Pata'aj ra'atzaahuatya'a a'ataata, pajta a'anaana.” Ajta ayan tɨ cɨme'en yee: “Sata'aj raaje'ica aɨjna ɨ a'atɨ tɨ a'ij pua'a ti'ijtyá'axɨ'ɨ ɨ rutaata na'ari ɨ runaana.” 5Ma sajta muan, ayaa xu ti'ixaxa'a tɨ i'i xa'apɨ'ɨn tɨ pua'a a'atɨ ayan tihua'uta'ixaate'en ɨ ruvaujsimua'a tɨcɨn: “Nain a'achu nyaj caj tí'ijcha'ɨ, aɨj nu neri raatámuaɨ'ɨvejte ɨ Dioj. Aɨj nu cɨn cai che'e tí'ijcha'ɨ ɨ nyaj cɨn amuaatavaɨre'en.” 6Tɨ pua'a a'atɨ ayan tihua'uta'ixaate'en ɨ ruvaujsimua'a, ayaa cha'ajta ti'ixaxa'a cɨme'en aɨjna ɨ a'atɨ yee capu che'e ruxe'eve'e tɨ aɨn hua'utavaɨre'en ɨ ruvaujsimua'a. Ayaa xu me tiruujɨpua saɨjna tɨ Dioj cɨn tyu'utaijtaca'a sej si ra'ara'asten saɨjna cɨme'e ɨ ye'ira sej seyan rujɨɨmua'a sana'a tirajtyau. 7Muan, mɨ sej a'ij pua'a ti'ityetyaɨte, mɨ saj seyan ra'asten eijre'ecɨtze'e, ayaa pu tyu'utaxajtaca'a muejmi cɨme'e aɨjna ɨ Isaías tyaacan, ɨ tɨ Dioj jetze ma'acan ti'ixaxa'ata'a. Ayaa pu tya'uyu'uxaca'a tɨcɨn: 8Naa pu namuajre'e tɨ pua'a metí'ixajta nyeetzi jemi, ma majta, aɨ mu meri ma nuurai. 9Capu ti'itɨj vaɨre'e tɨ pua'a menaatyaanajche a'ini matɨj mana'a mej ti'imua'ata, ɨ maj cɨn tihue'ijte'e, rujɨɨmua'a mana'a rájtyauve. 10Aj pu i aɨn hua'utajee ɨ tyaɨte. Tɨ'ɨqui ayan tihua'uta'ixaa tɨcɨn: ―Rɨ'ɨ xu'u tyamua'a naa tiraanamua muan sej si yau'eitaa xa'ara'ani. 11Ti'itɨ tɨ na'a tɨ ti'icue'iri'i, tɨ pua'a a'atɨ raacua'ani, capu a'atzu raxana'ave'e, silu aɨ pu raxana'ave'e ɨ tɨ e'ijninyei ɨ tene'etze'e. 12Aj mu mi ajtyáxɨɨraca'a jemin aɨme ɨ maj jamuan á'ujhua'anya'a. Matɨ'ɨj mi meyan tiraataihua'uri'i tɨcɨn: ―¿Ni tzaa pa cai ramua'aree ɨ tɨ cai hua'aranajchaca'a aɨme ɨ fariseos matɨ'ɨj raanamuajri'i a'ij pej tyu'utaxajtaca'a? 13Ajta aɨn ɨ Jesús, ayaa pu tihua'uta'ixaa tɨcɨn: ―Ayaa mu e'en tɨj tu'upi tɨ cai a'atɨ raahuaste, rusaɨj pu ajnyej. Ayaa pu che'eta na'a hua'aruuren ɨ Dioj tɨj ajta rú'uri'i ɨ tu'upi tɨ rusaɨj ajnyej aɨjna ɨ a'atɨ tɨ tyu'uhuaste, a'ini aɨ pu ra'ijcuuxɨjsin, ajta metyáuraaxɨjsin ɨ tu'upi, Dioj pu ayan che'eta na'a ma huaúuhua'axɨjsin aɨme. 14Miche'e meyan eenye'en. Ayaa mu e'en matɨj aɨme ɨ maj arácucu'un ɨ maj huauuvi'itɨ. Tɨ pua'a saɨj ta'aracun ayan ra'anaví'ira tɨ ajta aracun mej mi a'ahua'a a'ara'asti naijmi'i, naijmi'i mu atyávatzɨjsin a'u tɨ e'etyacun. 15Aj pu i Pedro ayan tiraata'ixaa tɨcɨn: ―Taata'ixaate'e a'ij tɨ huataujmua'a aɨjna ɨ nyuucari ɨ paj pauchan raataxajtaca'a. 16Ajta Jesús ayaa pu tihua'utaihua'uri'i tɨcɨn: ―¿Ni tzaa sacai sajta muan yau'eite? 17¿Ni tzaa sacai yau'eite saɨjna? Tɨ pua'a a'atɨ ti'itɨj huacua'ani tɨ cue'iri'i, aɨjna tɨ raacua'ani, pua'aque pu ma'acan. Aj pu i ancajrupi ɨ tene'etze'e, au pu a'arayeijxa ɨ ucaara'an jetze. Ajta e'eyan ɨ chuitɨraara'an jetze huiraame. 18Ma ajta, aɨjna tɨ e'ijninyei ɨ tene'etze'e ɨ a'atɨ, au pu a'uve'eye'i ɨ tzajta'an. Ai pu aɨn pueen ɨ tɨ raxana'ave'e aɨjna ɨ a'atɨ. 19Ayaa pu'u xaa nya'u a'ini ɨ tzajta'an pu a'uve'eye'i naijmi'i ɨ mua'atziira'a tɨ a'ij pua'a een, tɨ ca'anijra'a rata'aca tɨ a'atɨ ayan huarɨni ɨ tɨ a'ij pua'a een, tɨ pua'a ti'ityacui'i na'ari seij jamuan ti'ihuaujxana'acɨre'en. Ajta ɨ tzajta'an pu ajta tasiseiri tɨ ayan ca'anijra'a rata'aca tɨ ayan tyu'umua'ati tɨ tyu'unahua'an, nusu tɨ raacuanamua na'ari tɨ a'ij pua'a tyú'uxajtava'a hua'ajemi ɨ tyaɨte. 20Naijmi'i tɨj na'a tɨ hui ayan a'ij pua'a een, tɨ tasiseiri ɨ ta tzajta'a, aɨ pu xaa raxana'ave'e ɨ tevi. Ajta aɨjna tɨ cai anaujmuéite'en tyu'ucua'ani, capu ti'itɨ a'ij huataujmua'a ɨ Dioj jemi. Capu ti'itɨj cɨn autyajturaa ɨ Dioj jemi aɨjna ɨ a'atɨ tɨ cai anaujmuéite'en tyu'ucuaa. 21Aj pu i Jesús á'uraa. Au pu a'ará'a ajna a'ahua'a chajta'a tɨ ayan tyaja'arajtyahuaa tɨcɨn Tiro, ajtahua'a seij tɨ ayan tɨcɨn Sidón. 22Ajta, saɨj pu ave'ere'enye ɨ Jesús jemi. Jɨita'a pu pueen tɨ seij chuejra'a japua e'ema'acan. Ayaa mu hua'atamua'amua tɨcɨn Sirofenicia. Aun tɨ huaca'a pu e'echajca'a aɨjna ɨ jɨita'a. A pu e'eve'eme antijíihua tɨcɨn: ―Nyavastara'a, muaa pej i'i yaujra'an aɨjna ɨ David tyaacan, pata'aj na'ancu'uvajxɨ'ɨn. Eecan pu rajpueijtzi ɨ niyauj tɨ jɨita'a aɨjna cɨme'e tɨ tiyaaru'u tzajta'an seijre'e. 23Ajta aɨjna ɨ Jesús, capu a'atzu huatanyuu. Aj mu mi avere'enye aɨme ɨ maj jamuan á'ujhua'anya'a. Ayaa mu tirajhuaviiri'i tɨcɨn: ―Pata'aj raataite tɨ a'ura'ani, a'ini ta cujta'an pu e'eve'eme antijíihua. 24Aj pu i Jesús ayan tyu'utaxajtaca'a tɨcɨn: ―Ayaa pu Dioj nyaja'utaijtaca'a nyaj a'ura'ani hua'a jemi ɨ mej Israel jetze ajtyama'acan ɨ mej meyan seijre'e tɨj canya'axɨ ɨ maj á'uvej. Capu nyaja'utaijtaca'a aɨme jemi ɨ seica. 25Aj pu i aɨn jɨita'a avere'enye a vejli'i jemin. Ajta titunutaca'a. Aj pu i ayan tiraata'ixaa tɨcɨn: ―Nyavastara'a, naatávaɨre'e. 26Aj pu i Jesús ayan tiraata'ixaa tɨcɨn: ―Capu ayan tiraavijte'e nyej huáɨ'ɨpɨ'ɨra'acare'en ɨ pan ɨ maj racua'aca ɨ tɨ'ɨrii nyej ni chiicate huataɨ'ɨpɨ'ɨte'en. 27Aj pu i aɨn jɨita'a ayan tɨcɨn: ―Ayej xaa nya'u ti'ayajna, nyavastara'a. Aru, casi'i, aɨme ɨ chiicate, ayaa mu racua'aca maɨjna ɨ tɨ te'ení ɨ pan tɨ acajvitze ɨ meesa japua a'u mej tyaja'acua'aca aɨme ɨ mej tihue'ijte'e. 28Aj pu i Jesús ayan tyu'utanyúu tɨcɨn: ―Muaa jɨita'a, eecan paj tya'atzaahuate'e. Pu'uri muaata'a a'ij pej ti'ijxe'eve'e. Cɨme'en pu'u ayan tiraataxajtaca'a aɨjna ɨ Jesús, aj pu i huaruj aɨjna ɨ yaujra'an ɨ jɨita'a. 29Aj pu i Jesús á'uraa. Au pu ajtéenyee a'u tɨ a'avastɨme ɨ jaj tɨ jajmuaa aujna a'ahua'a u Galileeya. Aj pu i antiraa ɨ jɨri jetze. An pu a'ujyeijxɨ. 30Eihua mu a'ire'enye ɨ tyaɨte. Aɨme mu a'araavi'itɨ ɨ maj tzare'e rá'ajtuaatɨ́mee ɨ ruɨɨca, majta seica ɨ maj arácucu'un, majta seica ɨ maj cai tyá'anrɨ'ɨréjmee, majta seica ɨ maj puatuusi. Majta mui'icaca mu a'araavi'itɨ ɨ seica ɨ mej ti'icucui'i. Aa mu hua'ajtuaa a'u tɨ a'utyavaaca'a aɨjna ɨ Jesús. Ajta aɨn, aɨ pu naijmi'ica pu tyu'uhuaa. 31Eecan mu a'ij tya'utaseij ɨ tyaɨte ɨ maj huaje'iré'enijte matɨ'ɨj hua'useij ɨ mej meri rɨ'ɨrístaca'a maj tyu'utaxaj aɨme ɨ mej mejmi'i cai tya'anrɨ'ɨrájma'acaa; majta aɨme ɨ maj puatuusi, mu'uri re'en nainjapua; majta aɨme ɨ maj tzare'e rá'ajtuaatɨ́mee ɨ ruɨɨca, mu'uri á'ujhua'anya'a; majta aɨme ɨ maj aracúcu'unijma'acaa, mu'uri ti'iseijracaa. Majta maɨn ɨ tyaɨte, aɨ mu autyajhuii ɨ mej rɨ'ɨ tiraata'an maɨjna ɨ Dioj tɨ tihue'ijte'e aɨme ɨ maj Israel jetze ajtyama'acan. 32Aj pu i Jesús hua'utajee aɨme ɨ maj jamuan á'ujhua'anya'a. Ayaa pu tihua'uta'ixaa tɨcɨn: ―Naatyanxa'amɨste amɨme tyaɨtejra'a jemi, a'ini pu'uri hueica xɨcaj tyauume maj á'ujhua'an nyaa jamuan. Camu majta ti'itɨj ticha'ɨ maj raacua'ani. Canu raxe'eve'e maj cai tyu'ucuá'an nyahua'ure'itixɨ'ɨn. Na'ari cai tyamua'a mu tí'ityamue'itɨche'en ɨ juye japua. 33Majta maɨn ɨ maj jamuan á'ujhua'anya'a, ayaa mu tiraataihua'uri'i tɨcɨn: ―¿A'uni jetze a'arɨ'ɨri tyej raahuauni ɨ pan tɨj na'a tɨ ruxe'eve'e tɨ ij tihua'ucɨ'ɨti naijmi'ica ɨ tyaɨte? Capu sein i'i rɨ'ɨri ayajna a'u tɨ cai ma'a a'atɨ. 34Aj pu i ayan tihua'utaihua'uri'i tɨcɨn: ―¿A'achuni pua'amuaca sajcha'ɨ ɨ pan, muan? Aj mu mi meyan tiraata'ixaa tɨcɨn: ―Aráhua'apua pu pua'amua i pan. Tyajta cɨjca i hue'ité maj cɨle'en. 35Aj pu i hua'utaij ɨ tyaɨte maj a'ujra'ase a chuaata'a. 36Ra'ancuraɨ'ɨpɨ'ɨ ɨ pan, ajta ɨ hue'ité, aj pu i Jesús rɨ'ɨ tiraata'a ɨ Dioj. Ajta e'eyan ra'antitaaraxɨ ɨ pan. Aj pu i hua'uraɨ'ɨpɨ'ɨ ɨ maj jamuan á'ujhua'anya'a. Majta maɨn, aɨ mu míjtá'ij hua'uraɨ'ɨpɨ'ɨte ɨ tyaɨte. 37Naimi'i mu tyu'ucuaa. Tyamua'a mu tityáaju'uxai. Majta e'eyan, aɨme ɨ maj Jesús jamuan á'ujhua'anya'a, aɨ mu raara'asaɨj maɨjna tɨ ava'aturaa ɨ pan tɨ ra'antítaaraxɨ. Sicɨri mu jetze tya'ava'ɨste maɨjna cɨme'e tɨ ava'aturaa. Aráhua'apua sicɨri pu tya'ará'aj. 38Majta maɨn ɨ mej tyu'ucuaa, ayaa mu ará'asica'a a'achu cumu muaacua vi'ira'a ɨ tyetyaca. Majta rujɨme'e mu tyu'ucuaa aɨme ɨ juuca, majta ɨ tɨ'ɨrii. 39Tɨ'ɨj Jesús hua'ure'itixɨ ɨ tyaɨte, aj pu i atyajraa baarcu jetze. Tɨ'ɨqui á'uraa. Au pu a'ará'a aujna a'ahua'a a'u tɨ e'ejtyama'acan u Magdala.

will be added

X\