San Mateo 14

1Ajna xɨcajra'a jetze, aɨjna ɨ Herodes, ɨ tɨ i'i rey, aɨ pu raanamuajri'i a'ij tɨ rɨjcaa aɨjna ɨ Jesús. 2Aj pu i ayan tihua'uta'ixaa aɨme ɨ mej ti'ijvaɨra'acaa ɨ jemin tɨcɨn: ―Ai pu aɨn pueen aɨjna ɨ Juan tɨ ti'ityámuaɨ'ɨhuacara'a. Pu'uri a'itáraa a'u maj ya'ava'ana. Aɨj pu cɨn raayɨ'ɨtɨ tɨ ayan rɨcɨ aɨjna cɨme'e ɨ muare'eri'ira'a ɨ tyaj cɨn a'ij yá'useij. 3Ajta aɨn ɨ Herodes, aɨ pu ajmi'i raatyeevi'i aɨjna ɨ Juan. Ra'anajɨ́'ɨca'a pu ra'ityaana. Ayaa pu een cɨn raaruu a'ini Juan pu ra'ajtya'axɨ aɨjna cɨme'e tɨ Herodes ra'ancure'evi'itɨ aɨjna ɨ jɨita'a tɨ Felipe raatyevi'itɨnya'a. Aɨjna ɨ Felipe, ai pu aɨn pueenya'a ɨ juutzajra'an ɨ rey. Ajta aɨjna ɨ jɨita'a, ayaa pu antyahuaaca'a tɨcɨn Herodías. 4Ayaa pu tye'irájraa tɨ Juan ayan tiraata'ixaa aɨjna ɨ Herodes tɨcɨn: ―Capu a'ij ti'irɨ'ɨri paj ratyevi'itɨnye'en mue'ihuaara'a tɨ ratevi'itɨnya'a. 5Herodes pu raje'icatamɨ'ɨcaa aɨjna ɨ Juan. Aru hua'atzɨɨnya'aca'a ɨ tyaɨte, a'ini aɨ pu ramua'areeraca'a mej meyan ti'ixaxa'ata'a tɨ nu'u aɨn pueen saɨj tɨ ti'ixaxa'a Dioj jetze ma'acan. 6Tɨ'ɨj tyaja'ure'enye ajna xɨcajra'a tɨ jetzen huanu'eihuaca'a aɨjna ɨ Herodes, jɨita'a pu utyajrupi u chi'ita tɨ ij tyu'utyeenye'en rusaɨj hua'a vejli'ipua. Ai pu aɨn pueen yaujra'an aɨjna ɨ Herodías. Eecan pu ra'aranajchaca'a aɨjna ɨ rey tɨ ayan tyu'utyeenyei. 7Aɨj pu cɨn aɨn tya'ataujratziiri'i runyuuca cɨme'e tɨ ayan raata'an aɨjna ɨ jɨita'a a'ij tɨ ti'itɨj ti'ijxe'eve'e. 8Ajta aɨjna ɨ jɨita'a, aɨ pu ayan tiraataihua'uri'i ɨ runaana tɨcɨn: ―¿Ti'itajni nyaraatahuavii? Aj pu i aɨn naanajra'an ayan tɨcɨn: ―Huatahuaviiri'i ɨ muura'an ɨ Juan tɨ tí'ityamuaɨ'ɨhuaca. Aj pu i, aɨn jɨita'a ayan tiraata'ixaa aɨjna ɨ rey tɨcɨn: ―Pata'aj naataɨ'ɨte'en tuxa'a jetze ɨ muura'an aɨjna ɨ Juan tɨ tí'ityamuaɨ'ɨhuaca. 9A'ij pu pua'a raata'a aɨjna ɨ rey. Ma ajta, ari ayan tya'ataujratziiri'i tɨ ayan huarɨni a'ij tɨ ti'ijxe'eve'e. Majta aɨme tɨ hua'uta'inee, aɨ mu majta raanamuajri'i tɨ tyu'uta'a ɨ runyuuca. Aɨj pu cɨn, aɨn tyu'utaijtaca'a mej mi meyan huarɨni a'ij tɨ tiraatahuaviiri'i. 10Ajta e'eyan aɨ pu xantaaru'u huataityaca'a tɨ u á'ume'en a'u tɨ e'ityanami'i aɨjna ɨ Juan tɨ ij ru'ijvéijche ɨ muura'an. 11Tɨ'ɨj ayan huarɨj, aj pu i ya'araɨ'ɨte aɨjna ɨ muura'an ɨ tuxa'a jetze tɨ ij Herodías ayan raamua'aree tɨ raaje'ica, tzɨte'e, aɨjna ɨ Juan. Ajta aɨjna ɨ rey, aɨ pu raataɨ'ɨte aɨjna jemi ɨ yaujra'an ɨ Herodías. Aj pu i aɨjna ɨ jɨita'a raataɨ'ɨte ɨ runaana. 12Majta maɨn ɨ maj á'ujhua'anya'a ɨ Juan jamuan, aɨ mu a ve'ere'enyaa, meya'utɨɨ maɨjna ɨ mɨ'ɨchi. Matɨ'ɨj mi ra'ava'ana. 13Ajta aɨjna ɨ Jesús, tɨ'ɨj raamua'areeri'i tɨcɨn maraaje'ica aɨjna ɨ Juan, tɨ'ɨqui atyajraa ɨ baarcu jetze. Rusaɨj pu á'uraa. Au pu a'ará'a a'u tɨ cai je'e ti'itɨ. Majta ɨ tyaɨte, aɨ mu raamua'areeri'i a'u tɨ a'ij e'enya'a. Aɨj mu cɨn, cura'acɨjxɨ maj a'uchaatɨme. Aj mu mi ru'ɨcan raatavén. 14Tɨ'ɨj i Jesús aitaraa ɨ baarcu jetze. Tɨ'ɨj hua'useij ɨ tyaɨte ɨ maj mui'i, aɨ pu hua'ancu'uvajxɨ. Ajta tihua'uhuaa ɨ mej ti'icucui'i. 15Tɨ'ɨj huatyechumua'araca'a, aj mu mi ave'ere'enye jemin ɨ maj jamuan á'ujhua'anya'a. Aj mu mi meyan tiraata'ixaa tɨcɨn: ―Pu'uri tyechumua'ari, ajta capu a'atɨ yeche ayajna. Pata'aj hua'are'itixɨ'ɨn mej mi a'ucɨ́jxɨ'ɨn ma a'ahua'a chajta'a mata'aj ti'itɨ huananan ɨ maj raacua'ani. 16Ajta aɨjna ɨ Jesús, ayaa pu tyu'utanyúu tɨcɨn: ―Capu ruxe'eve'e maj a'ucɨ́jxɨ'ɨn. Sata'aj tihua'umín muan. 17Aj mu mi meyan tɨcɨn: ―Ayaa tu'u pua'amuaca ticha'ɨ anxɨvica ɨ pan, tyajta hua'apuaca ɨ hue'ité. 18Aj pu i Jesús ayan tɨcɨn: ―Me senyaja'avaɨ'ɨpɨ'ɨte'e. 19Aj pu i aɨn tihua'utaij maj a'ujra'ase ɨ tu'upi tzajta'a. Aj pu i Jesús ra'ancuraɨ'ɨpɨ'ɨ pan, ajta ɨ hue'ité. Aj pu i utye'e a'ujnyeeraca'a. Tɨ'ɨqui rɨ'ɨ tiraata'a ɨ Dioj. Aj pu i ra'antitaaraxɨ ɨ pan. Tɨ'ɨqui hua'uraɨ'ɨpɨ'ɨte aɨme ɨ maj jamuan á'ujhua'anya'a. Majta maɨn, aɨme mu hua'uraɨ'ɨpɨ'ɨte ɨ tyaɨte. 20Naijmi'i mu tyu'ucuaa. Eihua mu huáju'uxai. Ajta eihua pu a'ava'aturaa ɨ pan, majta ɨ hue'ité. Tamuaamuata'a japuan hua'apua mu tya'avaɨ'ɨste tzaacuri jetze maɨjna cɨme'e ɨ tɨ tya'avá'aturaa. 21Majta maɨn ɨ maj tyu'ucuaa, ayaa mu ara'asicaa a'achu cumu anxɨ vi'ira'a ɨ tyetyaca. Majta ɨ ma juuca, majta ɨ tɨ'ɨrii, aɨ mu majta tyu'ucuaa. 22Aj pu i hua'utaij aɨme ɨ maj jamuan á'ujhua'anya'a maj nu'u atyacɨɨnye ɨ baarcu jetze mej mi antacɨɨnye atan pujme'en, mej mi maɨn anacai maun a'ara'asti. Ajta aɨn ɨ Jesús, au pu a'utyajturaa tɨ ij hua'ure'itixɨ'ɨn ɨ tyaɨte. 23Tɨ'ɨj hua'ure'itixɨ, au pu a'utyájraa ɨ jɨri jetze rusaɨj tɨ ij raatyajhuauni ɨ Dioj jemi. Tɨ'ɨj huatyatɨca'araca'a, au pu a'utyavaaca'a rusaɨj. 24Ajta aɨjna ɨ baarcu, pu'uri a'ɨmɨ auma'acaa e'ita'a ɨ jaj japua. Aj pu i huata'aacaraca'a ca'anin cɨme'e. Tyamua'a pu te'etyaxɨjrihua'a ɨ jaj ɨ baarcu jetze aɨjna ɨ aaca cɨme'e tɨ auj ruurájvaaca'a. 25Ara'apua'a tɨ'ɨj tapua'arijma'aca, Jesús pu ave'ere'enye ajna vejli'i hua'a jemi. Jaj japua pu huama'acaa. 26Majta maɨn ɨ maj jamuan á'ujhua'anya'a, matɨ'ɨj raaseij, eecan mu tyu'utatzɨn. Tyamua'a mu titeejíjhuaca'a maɨjna cɨme'e mej tyu'utatzɨn. Ayaa mu tyu'utaxajtaca'a tɨcɨn: ―Nyájcan pu pueen amɨjna. 27Ajta e'eyan, Jesús ayan tihua'uta'ixaa tɨcɨn: ―Xu'uhuataujca'anyechi mɨ rutzajta'a. Nyaa nu nyaɨn pɨrɨcɨ ɨ Jesús. Caxu ti'itzɨɨnya'a. 28Ajta aɨjna ɨ Pedro, aɨ pu ayan tiraatajee tɨcɨn: ―Tavastara'a, tɨ pua'a muaa paɨn pueen, naataijte'e nyaj nyamaana ure'enyen mueetzi jemi aɨjna ɨ jaj japua. 29Aj pu i Jesús ayan tiraata'ixaa tɨcɨn: ―Mu pa'uvé'eme'en. Aj pu i aiitaraa ɨ baarcu jetze. Tɨ'ɨqui rajraa ɨ jaj japua. Aa pu vejli'i auma'acaa a'u tɨ a'ij e'enya'a ɨ Jesús. 30Tɨ'ɨj raamua'areeri'i tɨ ca'anin cɨn huata'aacaraca'a, aɨ pu tyu'utatzɨn. Aj pu autyejche tɨ a'ucarute ɨ jaj tzajta'a. Aj pu i ayan huajijhuaca'a tɨcɨn: ―Tavastara'a, nya japua huanyuuchi. 31Cɨme'en pu ayan tyu'ujijhuaca'a, aj pu i Jesús ajmuajca'ataca'a. Ravi'i aɨjna ɨ Pedro. Aj pu i ayan tiraata'ixaa tɨcɨn: ―Capaj a'atzu tya'atzaahuate'e muaa. ¿A'ini een cɨn pacai na'atzaahuate'e? 32Matɨ'ɨj atyaacɨ ɨ baarcu jetze, aj pu i huatyapua'araca'a aɨjna ɨ aaca. 33Matɨ'ɨj mi maɨn ɨ maj araati ɨ baarcu jetze, aɨ mu titunutaxɨ ɨ Jesús jemi. Aj mu meyan rɨ'ɨ tiraatajee tɨcɨn: ―Muaa paj tzɨte'e paɨn pueen i yaujra'an ɨ Dioj. 34Matɨ'ɨj antacɨj, aj mu mi aiitacɨj ɨ baarcu jetze ajna'a a'ahua'a, chajta'a tɨ ayan tyaja'arajtyahuaa tɨcɨn Genesaret. 35Majta maɨn ɨ tyaɨte, matɨ'ɨj raamuá'a maɨjna ɨ Jesús, aj mu mi tihua'ará'iti'iraxɨ nainjapua ɨ mej a'ɨmɨ antacháatɨma'acaa. Aj mu hua'araavi'itɨ naijmi'ica ɨ mej ti'icucui'i ɨ Jesús jemi. 36Eihua mu rájhuaviiri'i tɨ hua'uta'an mej mi ra'ajtamuare'en ajna cɨɨxura'ara'an jetze tɨj na'a tɨ uvijpi'i. Majta maɨn ɨ mej meyan ra'ajtamuárej, naijmi'i mu huaruj.

will be added

X\