San Mateo 11

1Tɨ'ɨj Jesús raatapua'ajtaca'a tɨ hua'uta'ixaa ɨ tɨ cɨn tihuéijca, aj pu i á'uraa. A'ayee pu a'ará'a chajta'a a'ɨmɨ a'u ma a'ityachaatɨmee tɨ ij tihua'umua'aten, tɨ ij ajta tihua'uta'ixaate'en ɨ tyaɨte. 2Ajta aɨjna ɨ Juan, au pu a'ahua'a a'anami'ihuaca'a. Aj pu i yá'umua'areeri'i a'ij tɨ Jesús rɨjcaa. Tɨ'ɨqui hua'utaityaca'a seica ɨ maj jamuan á'ujhua'anya'a mej mi u ya'utyeeseij, majta mej mi tiraataihua'u maɨjna ɨ Jesús. 3Ayaa mu tiraataihua'uri'i tɨcɨn: ―¿Ni muaa paj paɨn pɨrɨcɨ paɨjna ɨ pej jee i'i Cɨriistu'u paj muaa iiyan ruxe'eve'e, paj nu'u yan va'acáanyen? Na'ari cai, ¿ni ayan tyu'ujxe'eve'e tyej seij huachu'eve'en? 4Jesús pu ayan tyu'utanyúu tɨcɨn: ―Sericu, sata'aj seyan tiraata'ixaate'en saɨjna ɨ Juan a'ij sej ye'i ti'iseij, sajta ti'inamua. 5Sata'aj raata'ixaate'en yee mu'uri atanyéjnye'e ɨ maj aracúcu'unijma'acaa; ajta yee mu'uri a á'ujhua'an aɨme ɨ maj anacɨyáaxavi'ijma'acaa ruɨɨca jetze; majta yee mu'uri huarúj maɨjna cɨme'e cui'ini'ira'a tɨ tinyajxɨ ɨ hua'ahue'ira'a jetze. Majta hui aɨme ɨ maj nacuxaitaraca'a, mu'uri huiityajnamua. Majta seica, aɨme ɨ maj huacuii, mu'uri ajtahua'a mana'a huatarú. Nyajta tihua'uta'ixaate'esin aɨme ɨ maj cai a'ij ti'ijviicue'i ɨ nyuucari tɨ cɨn Dioj hue'iratuaasin. 6Che'e huaujtyamua'ave'en aɨjna ɨ a'atɨ tɨ cai ruhuarita'a huare'eye'ica inyeetzi jemi aɨjna cɨme'e tɨ cai che'e tye'eviicue'i nyeetzi jemi. 7Matɨ'ɨj a'ucɨj aɨme ɨ maj Juan jamuan á'ujhua'anya'a, Jesús pu autyejche tɨ tihua'uta'ixaate'en ɨ seica cɨme'en aɨjna ɨ Juan. Ayan tɨcɨn: ―¿Ti'itaani sana'a u a'utyeeseij saujna u mu'utzita? ¿Ni qui seyan tiraaseij ɨ huiini tɨ aaca raru'uxante'e? Caxu xaa nya'u. 8Tɨ pua'a sacai seyan huarɨj, ¿ti'itaani sana'a a'utyeeseij? ¿Ni a'atɨ sa'utyeeseij tɨ tya'ucáavɨ re'enye'en cɨme'e? Caxu xaa nya'u, a'ini xu'uri ramua'aree tɨcɨn aɨme ɨ mej meyan re'enye'en cɨn tya'ucáavɨ, au mu e'eche hua'achi'ita ɨ rey. 9Ari tɨ pua'a sacai seyan huarɨj, ¿ti'itaani nya'u? ¿Ni sacai seyan aɨn a'utyeeseij a'atɨ tɨ Dioj jetze ma'acan ti'ixaxa'a? Ayaa nu tyaja'amue'ixaate'e tɨ aɨn pueen tzɨte'e aɨjna ɨ Juan. Ayej xaa nya'u ti'ayajna, eihua pu eitze'e va'acan cɨn ti'ityejvee aɨjna ɨ Juan cai saɨj tɨ ayaa na'a aɨjna cɨn ti'ityejvee tɨ Dioj jetze ma'acan ti'ixaxa'a. 10Aɨ pu aɨn pueen ɨ tɨ cɨme'en ra'axa ɨ yu'uxari jetze. Tɨcɨn: Nyaa nu a'atɨ huataíti tɨ anajca mueetzi jemi mej mi rɨ'ɨ huaujruuren ɨ tyaɨte. 11Ayaa nu tyaja'amue'ixaate'e tzaahuati'ira'a cɨme'e hua'a tzajta'a naijmi'i ɨ tyaɨte ɨ maj huanyej iiyan chaanaca japua, capu a'atɨ a'anaj tye'entyajrupi ti'itɨj cɨme'e tɨ eitze'e ve'e cai ɨ tɨ cɨn ti'ityejvee aɨjna ɨ Juan. Ma ajta, aɨn tɨ eitze'e cɨle'en cɨn ti'ityejvee ɨ Dioj jemi, eitze'e pu ve'e aɨjna ɨ a'atɨ cai aɨjna ɨ Juan. 12’Tɨj na'a ajna'ɨmɨ tɨ tyu'uséijre aɨjna ɨ Juan, tɨ yu e'iré'enye, tyaɨte mu ca'anyejri cɨn rahuauca mej mi maun a'utyarute ajna Dioj tɨ e'eseijre'e. Majta ca'anyejri mu cɨn tí'ityese'e aɨme ɨ tyetyaca ɨ maj ruca'anye mej mi huataura'an maɨjna cɨme'e. 13Aɨme ɨ maj Dioj jetze ma'acan ti'ixaxa'ata'a, ajta aɨjna ɨ yu'uxari jetze tɨ Moisés tyaacan ra'uyu'uxaca'a, naimi'i mu tyu'utaxajtaca'a aɨjna cɨme'e ɨ Dioj tɨ nain japua tie'ijta iiyan chaanaca japua. Mauche'e raaxajtaca'a hasta na'a cai ya huataseijre aɨjna ɨ Juan. 14Ajta, tɨ pua'a seyan titya'ahuaujca'anen saj rá'antzaahuate'en, aɨjna ɨ Juan, ai pu aɨn pueen aɨjna tɨ nu'u ruxe'eve'e tɨ ya uvé'enyen, aɨjna ɨ tɨ ayan antyahuaa tɨcɨn Elías. 15Aɨme ɨ maj huityánajca'amua, miche'e rɨ'ɨ tiraanamua. 16’¿A'ini nyana'a tiraataxaj yee a'ini me'en aɨme ɨ tyaɨte ɨ maj eijna ninye'ira'a jetze yan huachaatɨme ijii? Ayaa mu e'en matɨj ɨ tɨ'ɨrii ɨ maj vejri'i a'ujti a'u maj tyaja'atua. Aɨ mu hua'atéji'ivihua'a ɨ seica. 17Meyan tɨcɨn: “Tetyu'utacɨ'ɨsite sej si tyu'utyeenye'en. Ma sajta cai, caxu tyu'utyeenye. Tyajta tu tyu'utáchuiica'a ɨ chuiicari cɨme'e ɨ maj cɨn tí'ichuicaca tɨ pua'a seij huamɨ'ɨni, ma sajta, caxu saɨjna cɨn huataujxaamɨste.” 18Ayaa nu hui een cɨn neyan tyaja'amue'ihua'u a'ini ayaa pu ti'irɨnyaca. Aɨjna ɨ Juan, ayaa pu mu a'uve'eme. Aɨ pu rú'itzi'iva'acaa. Ajta capu raya'aca'a ɨ nahuaj. Aɨj xu cɨn seyan tyu'utaxajtaca'a yee tiyaaru'u pu tzajta'an seijre'e amɨjna mɨ tevi. 19Nyajta e'eyan inyaa ya uve'enye, i nyaj nyajta tyaata'a jetze a'iraanye. Canu nye'itzi'ivi. Nyajta raya'aca ɨ nahuaj. Muan xu si seyan ti'inyaxa yee huapɨ'ɨ nu ti'icua'aca, nyajta nu'u nyatahueive'e, majta meyan nya'amiincustyamua'a pueen aɨme ɨ maj nu'u eihua ata'ɨtza'ara ɨ Dioj jemi, majta aɨme ɨ maj hua'ajijve'e ɨ mej ti'itɨ'ɨcɨca. Ayaa xu ramua'aree tyej rɨ'ɨ me tityaumuámua'aree aɨme jemi ɨ mej ta'ará'astijre'e ityejmi. 20Aj pu i Jesús autyejche tɨ hua'ajtya'axɨ'ɨn aɨme ɨ maj maun antacháatɨma'acaa a'u tɨ ayan tyaja'urɨj ɨ muáre'eri'ira'ara'an cɨme'e mui'icaca ɨ maj cɨn rɨ'ɨ tya'utaseij. Aɨ pu hua'ajtya'axɨ seij ajta seij ɨ tyaɨtejra'a ɨ maj maun a'uchaatɨma'acaa u chajta'ana jetze a'ini camu autyajhuii maj saɨque tyu'umua'ati. 21Ayan tɨcɨn: ―Che'e a'ij tɨ na'a, muan mɨ sej Corazín e'eche. Che'e a'ij tɨ na'a, muan mɨ sej Betsaida e'eche. Tɨ pua'a neyan che'eta nyana'a huárɨniiche'en nyamuare'eri'ira'a cɨme'e nyaujna u Tiro, nyajta nyaujna u Sidón, a'ij nyej nyeri ye'i huarɨj nyamuare'eri'ira'a cɨme'e muejmi jemi, mej mi'i mu saɨque tyu'umua'atíiche'en. Aɨ mu majta mej mi'i raataséiratache'en maɨjna cɨme'e mej tyu'utyaujchejte'en xu'umuavi'in cɨme'e, majta mej mi'i nasi avá'ujhua'atyahua'anche'e. 22Ayaa nu tyaja'amue'ixaate'e tɨ ayan te'eme ajna xɨcajra'a jetze tɨ'ɨj Dioj hua'axɨjte'en matɨj mana'a pua'amua tyaɨtejra'a. Eitze'e xu rajpueitzi xa'aju'un macai aɨme ɨ maj aun a'uchaatɨma'acaa maujna u Tiro, majta maujna u Sidón. 23Sajta muan mɨ sej Capernaum a'uchaatɨme, ¿a'ini tyajamua'amitejte'e? ¿Ni qui ayan yee tyajamua'amitejte'e saj nu'u rɨ'ɨ tiraata'a ɨ Dioj? Caxu xaa nya'u. Dioj pu pueijtzi amuaata'asin. Au xu a'utyaturaasin mɨ'ɨchite jamuan. Tɨ pua'a neyan che'eta nyana'a huárɨniiche'en nyaujna Sodoma a'ij nyej nyeri tyu'uruu nyamuare'eri'ira'a cɨme'e muejmi jemi, aujna u chajta'a u Sodoma, aɨ pu auj e'etéeriche'en tɨj na'a ajna'ɨmɨ tɨ yu e'ire'enye. 24Ma ajta, ayaa nu tyaja'amue'ixaate'e, ajna xɨcajra'a tɨ jetzen Dioj hua'axɨjte'en aɨme ɨ mej japuan a'uchaatɨme iiyan chaanaca japua, muan xu eitze'e rajpueitzi xa'aju'un sajna, macai aɨme ɨ maj maun a'uchaatɨma'acaa aujna tɨj na'a tɨ Sodoma e'ejtyama'acan. 25Ajna xɨcajra'a jetze tɨ Jesús ayan tyu'utaxajtaca'a, aj pu i ayan raatyahuau ɨ ruya'upua tɨcɨn: ―Muaa ɨ paj nye'iya'upua, ɨ paj tie'ijta paujna u tajapua, pajta iiyan chaanaca japua, rɨ'ɨ nu timuata'aca nyaɨjna cɨme'e paj hua'uta'a mej mi yau'eitaa mua'ara'ani a'ij tɨ een mueetzi jemi aɨme ɨ maj cai eihua tyu'ujmua'ate. Ma pajta, capaj peyan hua'uta'a mej mi yau'eitaa mua'ara'ani aɨme ɨ maj támua'aree, majta aɨme ɨ maj raayɨ'ɨtɨ. 26A ni pijta, ayaa paj ti'ijxe'eva'acaa muaa ɨ pej ni'iya'upua. ―Ayaa pu tiraatyajhuau. 27Aj pu i ajtahua'a ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Nain pu tinaatatui aɨjna tɨ ni'iya'upua mej mi raamua'ati tzaahuati'ira'a cɨme'e. Capu a'atɨ nyamua'ate nain cɨme'e a'ij nyej een silu aɨ tɨ ni'iya'upua, aɨ pu xaa nyamua'ate. Ajta, capu a'atɨ ramua'ate nain cɨme'e ɨ tɨ ni'iya'upua silu inyaa i nyej yaujra'an pueen, nyaa nu xaa ramua'ate. Majta, aɨ mu ramua'ate aɨme ɨ tɨ hua'araanajchi nyej tihua'utaseijrate'en a'ij tɨ een. 28’Sata'aj ye ve'ere'enyen inyeetzi jemi, satɨj sana'a pua'amua muan, mɨ saj cua'ana saɨjna cɨme'e ɨ saj rahuauca saj rɨ'ɨ tiraata'an ɨ Dioj, sajta saɨjna cɨn ti'ityese'en ɨ sej ra'ara'astijre'en nain cɨme'e. Nyaa nu xaa amuaata'asin saj huaujsa'upe'en. 29Sata'aj tye'entyarute saɨjna cɨme'e ɨ nyaj cɨn tyaja'amueijcate'e. Sajta tyu'urɨ'ɨren inyeetzi jemi, a'ini nyaa nu nyaɨn pueen saɨj tɨ i'i mua'acan, canu nyajta a'antzaahuate'e. Tɨ pua'a seyan ye ve'ere'enyen inyeetzi jemi, nyaa nu amuaata'asin saj rɨ'ɨ huarɨni ɨ a'amua tzajta'a. 30Capu muare'eri saj raanaijmi'ire'en saɨjna cɨme'e ɨ nyaj cɨn amuaata'asin. Ajta, ɨ nyaj cɨn tyaja'amueijcate'e, capu ajta muare'eri sej seyan huarɨni a'ij nyej ti'ijxe'eve'e. ―Ayaa pu tihua'uta'ixaa aɨjna ɨ Jesús.

will be added

X\