San Mateo 10

1Aj pu i Jesús hua'utajee aɨme ɨ maj tamuaamuata'a japuan hua'apua ara'ase. Aɨ pu antyujmua'areeraca'a aɨjna cɨme'e mej mi hua'utamuarite'en ɨ tiyaaru'u maj hua'a tzajta'a seijra'acaa ɨ tyaɨte, ajta mej mi nain tihua'uhuaate'en ɨ maj cɨn tí'icucui'icaa, cui'ini'ira'a cɨme'e nusu tɨ cai huá'aca'anisti'iraca'a. 2Ayaa mu antya'aruu aɨme ɨ maj tamuaamuata'a japuan hua'apua ara'ase, aɨme ɨ tɨ Jesús hua'utaityaca'a. Anacaican, aɨjna ɨ Simón, ɨ maj majta meyan raatamua'amua tɨcɨn Pedro. Aɨ pu ajta huatajee aɨjna ɨ juutzajra'an ɨ Simón. Ayaa pu antyahuaa tɨcɨn Andrés. Ajta aɨme pu huatajee aɨjna ɨ Jacobo, ajta juutzajra'an tɨ ayan antyahuaa tɨcɨn Juan. Ai mu maɨn pueen yaujmua'ame'en ɨ Zebedeeyu. 3Majta seica huatajee, aɨjna ɨ Felipe, ajta aɨjna ɨ Bartolomé, ajta aɨjna ɨ Tomás, ajtahua'a seij, tɨ ayan antyahuaa Mateo, tɨ tí'itejí'ivihua'a aɨme ɨ mej ti'itɨ'ɨcɨca. Seij pu ajta huatajee. Ai pu aɨn pueen aɨjna ɨ Jacobo, Alfeo tɨ rape'eri, ajtahua'a seij, aɨjna ɨ Lebeo, tɨ ajta ayan antyahuaa tɨcɨn Tadeo. 4Aɨ pu ajta huatajee aɨjna ɨ Simón ɨ tɨ ajtyama'acan hua'a jetze ɨ mej meyan huataujmua'a tɨcɨn cananista, ajta aɨjna ɨ Judás tɨ ayan tye'entímu'utaca tɨcɨn Iscariote. Ai pu aɨn pueen ɨ tɨ aviitzi cɨn hua'utatui aɨjna ɨ Jesús. 5Ai mu aɨn pueen ɨ maj tamuaamuata'a japuan hua'apua ara'ase ɨ tɨ Jesús hua'utaityaca'a. Ayaa pu aɨjna cɨn tihuéijca, ayan tihue'ixaatya'a yee: ―Caxu saun a'ucɨ́'ɨca'an saujna a maj a'uchaatɨme ɨ maj seij chuejra'a japua ajtyama'acan, caxu sajta utyaru'iipiche'en chajta'a jetze a'u mej e'eche aɨme ɨ maj Samaariya jetze ajtyama'acan. 6Ma sajta muan, sata'aj saun á'uju'un hua'a jemi ɨ mej i'i yaujmua'ame'en aɨjna ɨ Israel tyaacan. Yaa mu e'en aɨme tɨj canya'axɨ ɨ maj á'uvej. 7Sata'aj á'uju'un, sara'antixáata yee pu'uri tɨn tyaja'ure'enyejsin tɨ Dioj ayan tyu'utaijta iiyan chaanaca japua. 8Sata'aj sajta tihua'uhuaate'en ɨ mej ti'icucui'i. Sajta seyan hua'uruuren ɨ maj mauchan huacuii mej mi ruuri mua'ara'ani majtahua'a mana'a. Sata'aj sajta hua'urújte'en aɨjna cɨme'e ɨ maj cɨn ti'icucui'i aɨjna ɨ mej meyan ratamua'amua tɨcɨn leepra. Sajta hua'utamuarite'en aɨme ɨ tiyaaru'use ɨ maj hua'a tzajta'a seijre'e ɨ tyaɨte. Muan, caxu tyu'unajchitaca'a aɨjna cɨme'e saj ra'ancura'a saɨjna ɨ muare'eri'ira'a ɨ saj cɨn tihua'amua'aten. Aɨj pu cɨn, caxu hua'ajijva'a. 9’Caxu sajta ti'itɨj anyaɨ́'ɨn tzajta'an ɨ puaasi ɨ saj cɨn ava'ujjɨ'ɨque'emee, meeru'u ti'itɨ, centaavu ti'itɨ. 10Caxu ca'ani pijca ɨ saj cɨn huataujvaɨre'en ɨ juye jetze. Sajta saɨn ajta ca'acaímá'a ɨ tɨ anátápi'ihuajme'e, sajta ucaujchejtya'axɨ'ɨn rusáxu'ijme'en seij cɨme'e ɨ sa'ahua. Caxu sajta itzɨj chuiica. Ayaa xu huarɨni a'ini ayej ti'ixa'apɨ'ɨn mej tyajámuaamín maɨjna cɨme'e ɨ sej ti'imɨjhuaca. 11’A'u tɨ na'a maj a'uchaatɨme, satɨ'ɨj a'utyarute saujna, aj xu si seij huahuauni tɨ cai ti'itɨ cɨn atyáturaavaca. Au xu a'utyá'a xa'aju'un u chi'ira'an tzajta'a aɨjna ɨ a'atɨ a'achu saj caj e'eteere saujna chajta'a. 12Satɨ'ɨj a'utyarute saujna u chi'ita, aj xu hua'utataujte'en. 13Tɨ pua'a meyan amua'ancure'evi'itɨn tyamua'a naa, che'e ayen éenye'en a'ij sej seri tihua'utataujte. Na'ari cai, sata'aj seij jemi raatyatuaani ɨ runyuuca ɨ saj cɨn seri tihua'utataujte aɨme ɨ maj mauchan amuaatíite. 14Ajta tɨ pua'a a'atɨ cai amua'ancure'evi'itɨn, na'ari tɨ pua'a macai ranamuajracu a'ij sej tihue'ixaate'en, satɨ'ɨj huirácɨɨnyen saujna chi'ita, sara'atyáca'atzɨjxɨ'ɨn ɨ ruca'acai tɨ i cávatzɨn ɨ chuej. Aj mu mi ramua'areeran ɨ maj cɨn autyajturaa ɨ Dioj jemi. 15Ayaa nu tyaja'amue'ixaate'e tzaahuati'ira'a cɨme'e, ajna xɨcajra'a tɨ jetzen tihua'axɨjte'esin ɨ Dioj ɨ maj cɨn autyajturaa ɨ jemin, eihua pu pueijtzi hua'uta'asin. Eitze'e mu rajpueitzi mua'aju'un aujna chajta'a macai ɨ mej mejmi'i maun e'echajca'a aujna tɨ ayan tyaja'arátyahuaaca'a tɨcɨn Sodoma, ajta aujna u Gomorra. 16’Casi'i muan, ayaa nu tyajamuaataijte'esin sej si á'ujhua'anye'en hua'a tzajta'a ɨ tyaɨte ɨ maj meyan á'amuaruuren tɨj ɨɨra'ave ɨ mej ti'ityacɨ'ɨmaca. Sata'aj seyan tityaumuámua'aren matɨj aɨme ɨ cu'ucu'use ɨ mej eihua raayɨ'ɨtɨ. Sata'aj huámua'ajcantare sej si cai tyu'ɨtzíita ma sá'ujhua'anye'en matɨj majta rɨcɨ aɨme ɨ cucui'ise. 17Rɨ'ɨ xu'u hua'a jemi ɨ tyetyaca. Aɨ mu muejmi a'utyatuaasin a'u maj tie'ijta hua'a jueesi jemi. Aj mu mi amua'ajvájxɨ'ɨsin a'amua huari jetze. 18Majta mu muejmi á'avi'itɨn ɨ tajtuhuaani jemi na'ari ɨ rey jemi maɨjna cɨme'e sej seyan ti'ivaɨre'e nye jetze ma'acan. Ayaa mu á'amuaruuren sej si hua'uta'ixaate'en aɨjna cɨme'e a'ij sej een cɨn na'astijre'en inyeetzi. Ayaa xu che'eta sana'a tihua'uta'ixaate'esin aɨme ɨ maj cai Israel jetze ajtyama'acan. 19Aru, ajna xɨcajra'a jetze matɨ'ɨj á'amuavivi'iran, caxu seyan ti'imuajca yee a'i qui ye'i tyetyu'utaxajta, na'ari yee ti'itaqui nyuucarijra'a taataxajta. Matɨ'ɨj meyan amuáaruurén, aj pu i Dioj amuaata'asin a'ij sej ye'i tyu'utaxaj. 20Ayaa xu'u, caxu ti'itzɨɨnya'a a'ini ɨ sej hua'uta'ixaate'esin, caxu rujɨɨmua'a rajtyauusin silu aɨn ɨ xaijnyu'ucara'ara'an aɨjna ɨ saj rajya'upua, aɨ pu amuaata'itiira a'ij sej ye'i tyu'utaxaj. 21’A'atɨ pu hui hue'itzi cɨn ti'ijxajtzi'iran ɨ ru'ihuaara'a mej mi raaje'ica. Ayaa pu che'eta na'a te'eme ɨ ya'upuaara'an hue'itzi pu hua'ataaven ɨ ruyaujmua'a. Majta maɨn ɨ yaujmua'ame'en, aɨ mu che'eta mana'a ajhuiixɨ'ɨn. Ayaa mu tihua'utaijta maj hua'ucui'ini. 22Majta ɨ tyaɨte naimi'i mu amuá'ajcháɨra'a mua'aju'un maɨjna cɨme'e saj na'astijre'e inyeetzi. Ajta aɨn ɨ tɨ tya'utaviicue'i asta na'a cai nain tye'entipua'are, Dioj pu ru'iratuaasin aɨjna. 23Matɨ'ɨj a'ij pua'a a'amuaruura iiya chajta'a, sata'aj ca'anacan huiracɨɨnye. Sej si seij chajta'a jetze a'utyarute. Ayaa nu tyaja'amue'ixaate'e, satɨ'ɨj sáuj á'ujhua'anye'en seij sajta seij jetze ɨ chajta'ana a'u maj a'uchaatɨme aɨme ɨ maj Israel jetze ajtyama'acan, i nyaj nyajta tyaata'a jetze airaanye, nyaa nu xaa ya va'acányejsin. 24’Aɨjna ɨ tɨ tihua'amua'ate, eitze'e pu ruxe'eve cai aɨme ɨ mej tyu'ujmua'ate. Ajta, aɨjna tɨ ti'iraijte'e, eitze'e pu ruxe'eve aɨjna cai aɨn tɨ ravaɨre'e. 25Aɨj pu cɨn, ayan tyu'ujxe'eve'e. Aɨjna tɨ tihua'amua'aten, che'e aɨn ayan che'eta na'a eenye'en tɨj aɨjna tɨ tyu'ujmua'ate. Ajta aɨjna tɨ ti'ivaɨre'e, che'e aɨn ajta ayan che'eta na'a eenye'en tɨj aɨjna tɨ ti'iraijte'e. Ayaa mu che'eta mana'a á'amuaruuren muejmi a'ij mej meri naaruu inyeetzi. A'ini ayaa mu meri naatamuá'a tɨ cɨme'en yee: “Muaa pej i'i Beelzebú aɨjna tɨ tihue'ijte'e ɨ tiyaaru'use”, ayaa mu che'eta mana'a á'amuaruuren muejmi, mɨ saj hui ni'ityaɨtestyamua'a. Ee xaa nya'u, majta mu eitze'e a'ij pua'a á'amuaruuren muejmi. 26’Aɨj xu cɨn, ca xu hua'atzɨɨnya'a ɨ tyaɨte. Ti'itɨ tɨ a'ij aviitzi'i ɨ saj cɨn rajpueijtzi, Dioj pu raataseijrata me eijre'e, na'ari ti'itɨ tɨ a'ij tɨ ru'avaa ɨ saj cɨn ti'imuare'e, Dioj pu hua'uta'asin mej mi raamua'aree. 27Aɨjna ɨ nyaj á'amue'ixaate'e aviitzi cɨme'e, ayaa xu huarɨni, sata'aj raataxaj me eijre'e. Ajta ɨ nyaj á'amue'ixaate'e xahuaani'i cɨme'e, ayaa xu raataxaj ca'anin cɨme'e, an xu'u ɨmɨ a'utyúu ɨ a'amuachi'i japua. 28Caxu hua'atzɨɨnya'a aɨme ɨ maj ruxa'aj tyaɨte cui'ica a'ini camu raayɨ'ɨtɨ maj a'amuaxaijnyu'uca antipua'arite'en. Ma sajta muan, aɨj xu xaa tzɨɨnya'a aɨjna ɨ Dioj tɨ ayan raayɨ'ɨtɨ tɨ ra'antipua'arite'en mɨ sej seyan che'eta raatyahue'ira'a. Ajta aɨ pu raayɨ'ɨtɨ tɨ ra'antipua'arite'en ɨ a'amuaxaijnyu'uca ɨ saj cɨn sauj ruuricaa ɨ taij jetze tɨ cai a'anaj a'amɨ'ɨni. 29’Ayaa pu hua'anajchi aɨme mɨ pina'ase, a'achu cumu sei tumin saɨj. Ayaa pu i een aɨjna ɨ a'amuaya'upua, auche'e pu hua'acha'ɨ mɨ pina'ase. Capu seij mɨ'ɨni ɨ pina'a tɨ pua'a aɨn cai xɨ ayan tyu'utaxaj. 30Dioj pu ajta ramua'aree a'achu tɨ pua'amua cáuu ɨ a'amuacɨpua. 31Aɨj pu cɨn, caxu ti'imuajca. Eitze'e xu ruxe'eve'e ɨ Dioj jemi macai mɨ pina'ase. 32’A'atɨ tɨ na'a tɨ ayan tya'anxájta hua'a jemi ɨ tyaɨte aɨjna cɨme'e yee nyaj nu'u nyara'astijre'e nyaɨjna ɨ Jesús, ayaa nu hui che'eta nyana'a tya'anxájta jemin ɨ tɨ ajta ni'iya'upua tajapua tɨ e'eseijre'e tɨ cɨme'en yee aɨ pu xa'apɨ'ɨn huarɨj. 33Ajta, a'atɨ tɨ ayan hua'a jemi ayan tya'anxájta ɨ tyaɨte tɨ nu'u cai nyamua'ate, ayaa nu che'eta nyana'a tya'anxájta jemin ɨ tɨ ajta ni'iya'upua, tajapua tɨ e'eseijre'e. Ayaa nu xaahui tiraata'ixaate'esin tɨ cɨme'en yee nyaj cai ramua'ate nyaɨjna ɨ a'atɨ. 34’Caxu seyan ti'imuajca ɨ nyaj nyaɨjna cɨn a'uve'eme mej mi rɨ'ɨ tyamua'a naa titeetyaturan iiyan chaanaca japua. Canu nyaɨjna cɨn a'uve'eme mej mi rɨ'ɨ titeetyaturan tyamua'a naa silu mej mi e'ita'a a'utácɨɨnye maɨjna cɨme'e a'ij nyaj rɨcɨ. 35Ayaa nu nyaɨjna cɨn a'uve'eme tɨ ij a'atɨ autyejcheni tɨ raatyénya'usi'ite'en ɨ rutaata. Ajta aɨn tɨ tyamueij ɨ jɨita'a, aɨ pu ajta raatyénya'usi'ite'esin ɨ runaana. Ayan che'eta na'a tihua'aruuren, ɨ jɨita'a tɨ ari timu'u tɨ jɨita'a; aɨ mu huataujnya'usi'ite'esin aɨme rumuunimua'aca. 36Aɨj mu cɨn, aɨ mu rajchaɨ́ɨra'a mua'aju'un ɨ seica aɨme ɨ ruxa'aj tyaɨtestyamua'a. 37’Tɨ pua'a a'atɨ eitze'e raxe'eva'a ɨ rutaata, ajta ɨ runaana cai inyeetzi, capu ayan tiraavijte'e tɨ aɨn nyeetzi jemi huatyaturan tɨj na'a rusen cɨme'e. Ajta tɨ pua'a a'atɨ eitze'e raxe'eva'a ɨ ruyauj tɨ tyaata'a, ajta tɨ jɨita'a, tɨ pua'a eitze'e raxe'eva'a cai inyeetzi, capu ajta ayan tiraavijte'e tɨ aɨn nyeetzi jemi seira'a a'ara'ani tɨj na'a rusen cɨme'e. 38Ajta, tɨ pua'a a'atɨ raxe'eva'a tɨ á'ucha'acanye'en nyeetzi jamuan, che'e aɨn huataura'an tɨ rajpueijtzi a'ara'ani nyenyuucajtze'e, capu amɨn a'ij tɨ pua'a huamɨ'ɨni ɨ curuu jetze. Na'ari cai, capu ayan tyaja'ure'enyejsin tɨ aɨn ayan huatyaturan nyeetzi jemi a'utɨ Dioj e'eseijre'e. 39Tɨ pua'a a'atɨ ti'itesa'a tɨ ij cai huamɨ'ɨni, auche'e pu xaa nya'u mɨ'ɨni. Aij pu á'ujɨsin ɨ ruxaijnyu'uca tɨ auj ruuricaa. Ma ajta, aɨn tɨ huataura'an tɨ huamɨ'ɨni aɨjna cɨme'e tɨ tyu'utavaɨ nyeetzi jetze ma'acan, aɨ pu ajtahua'a huatarujsin. Ratyauní ɨ ruxaijnyu'uca tɨ auj ruuri tɨj na'a rusen cɨme'e. 40’Aɨjna ɨ a'atɨ tɨ amua'ancure'evi'itɨ u ruchi'ita, aɨ pu ajta na'ancure'evi'itɨ inyeetzi. Ajta, aɨjna ɨ tɨ na'ancure'evi'itɨ inyeetzi, ayaa pu che'eta na'a ra'ancure'evi'itɨ aɨjna tɨ nyaja'utaityaca'a. 41Ajta aɨjna tɨ ra'ancure'evi'itɨ seij tɨ Dioj jetze ma'acan ti'ixaxa'a, ayaa pu che'eta na'a tí'iracɨ'ɨti ɨ Dioj jemi tɨj ajta tí'iracɨ'ɨti aɨjna tɨ Dioj jetze ma'acan ti'ixaxa'a. Na'ari, tɨ pua'a a'atɨ ra'ancure'evi'itɨn a'atɨ tɨ xa'apɨ'ɨn rɨcɨ, ayaa pu che'eta na'a tiraacɨ'ɨti ɨ Dioj jemi tɨj ajta tiraacɨ'ɨti aɨjna ɨ a'atɨ tɨ xa'apɨ'ɨn rɨcɨ. 42Ajta, tɨ pua'a a'atɨ raata'an cɨj caj ɨ jaj, vaasu tzajta'a saɨj ɨ tevi tɨ cai ti'itɨj cɨn antyujmua'aree, tɨ pua'a ayan tiraata'an aɨjna cɨme'e tɨ aɨn tevi na'astijre'e, ayej ti'ayajna, ti'itɨ pu tí'iracɨ'ɨti ɨ Dioj jemi.

will be added

X\