San Marcos 8

1Tɨ'ɨj auj aun a'utyavaaca'a aujna Galileeya ɨ Jesús, eihua mu tyaɨte tyujsaɨj. Camu ti'itɨj tichaɨca'a maj raacua'ani. Tɨ'ɨqui aɨn Jesús hua'utajee aɨme ɨ maj jamuan á'ujhua'anya'a. 2Ayaa pu tihua'uta'ixaa tɨcɨn: ―Nyaanxaamɨste'e amɨme jemi mɨ tyaɨte, a'ini pu'uri hueica xɨcaj tyaume maj á'ujhua'an nyaa jamuan. Camu majta ti'itɨj ticha'ɨ maj raacua'ani. 3Seica mu ɨmɨ cura'acɨjxɨ. Aɨj pu cɨn tɨ pua'a nyahua'ure'itixɨ'ɨn ɨ ruche macai xɨ tyu'ucuá'an, camu tya'utaviicue'ira ɨ juye japua. 4Matɨ'ɨj mi meyan tiraataihua'uri'i, tɨcɨn: ―¿A'ini ti'irɨ'ɨri pej tihua'umín ayajna a'u tɨ cai a'atɨ e'eche? ―Ayaa mu tiraataihua'uri'i. 5Aj pu i ayan tihua'utaihua'uri'i tɨcɨn: ―¿A'achuni pua'amuaca saɨ'ɨpɨ'ɨsin ɨ pan? Matɨ'ɨj mi meyan tiraata'ixaa tɨcɨn: ―Arahua'apuaca. ―Yaa mu tiraata'ixaa aɨme. 6Aj pu i raataijtaca'a maj a'ujrá'asen ɨ tyaɨte a chuaata'a. Tɨ'ɨqui ra'antyɨ'ɨpɨ'ɨ ɨ pan ute'e aɨjna ɨ Jesús. Aj pu i rɨ'ɨ tiraata'a ɨ Dioj jemi, ajta ra'antitaaraxɨ. Aɨj pu i hua'ura'ɨpɨ'ɨ ɨ maj jamuan á'ujhua'anya'a. Majta maɨn, aɨme mu hua'ura'ɨpɨ'ɨ ɨ tyaɨte. 7Majta mu hue'ité hua'apuaca tichaɨca'a. Ajta pu raatyahuau ɨ Dioj jemi. Tɨ'ɨqui hua'utaij maj hua'ura'ujtaare'en. 8Naijmi'i mu tyu'ucuaa. Majta tyamua'a tityáaju'uxai. Ajta ava'aturaa ɨ pan tɨ ra'antitaaraxɨ. Sicɨri mu jetze ra'ava'ɨstya'axɨ aɨjna tɨ ava'aturaa. Arahua'apua sicɨ pu tya'aará'a. 9Majta maɨn ɨ tyaɨte ɨ mej tyu'ucuaa, mua'ara'asica'a cumu muaacua vi'ira'a. Aj pu i aɨn Jesús hua'are'itixɨ ɨ tyaɨte. 10Tɨ'ɨqui atyajraa baarcu jetze, majta ɨ maj jamuan á'ujhua'anya'a. Matɨ'ɨj mi a'ucɨj. Au mu a'ará'a ajna a'ahua'a tɨ ayan tyaja'arajtyahuaa tɨcɨn Dalmanuta. 11Matɨ'ɨj mi fariseo a e'ire'enye, majta e'eyan a'utyajhuii mej ti'ira'ihuau'un maɨjna ɨ Jesús. Maraatatése maj ca'anijra'a raata'an tɨ ij aɨn aiirá'ɨtzen. Maraatáhuaviiri'i tɨ hua'utaseijrate'en ɨ maj cɨn a'ij tya'utaseijra maj nu'u mi cɨn raamua'aree aɨjna tɨ jetzen araujca'anye aɨjna ɨ Jesús, tɨ pua'a aun a'uve'eme aɨjna jemi tɨ ute'e e'eseijre'e tɨ ij ayan huarɨni. 12Aj pu i aɨn cai che'e a'ij tya'anrɨ'ɨraa a'araa. Tɨ'ɨqui ayan tyu'utaxajtaca'a tɨcɨn: ―¿A'ini een cɨn manhuavii aime i tyaɨtejra'a nyej ti'itɨ hua'utaseijrate'en ɨ maj cɨn raamua'aree a'u tɨ e'ema'acan ɨ nyaj cɨn ti'imɨjhuaca? Ajta ayan tyu'utaxajtaca'a tɨcɨn: ―Ayaa nu xaa nya'u tyaja'amue'ixaate'e muejmi, canu ti'itɨj amuaataseijrate'esin. 13Aj pu i huaja'uhua'axɨ ɨ tyaɨte. Tɨ'ɨqui ajtahua'a atyajraa ɨ baarcu jetze. Aj mu mi a'ucɨj utavan pujme'en. 14Majta maɨn ɨ maj á'ujhua'anya'a jamuan ɨ Jesús, aɨ mu ya'uhua'axɨ mej ya'araɨ'ɨpɨ'ɨn ɨ pan maj raacua'ani. Seij mu'u caj tyu'ɨsima'a aɨjna ɨ baarcu jetze. 15Aj pu i ayan tihua'utaij tɨcɨn: ―Xaanamuajri'i muan. Rɨ'ɨ xu'u saɨjna cɨme'e ɨ fariseo maj rajnajchi ɨ pan jetze tɨ'ij huacu'usta, sajta saɨjna cɨme'e maj majta rajnajchi ɨ mej Herodes jamuan á'ujhua'anya'a. 16Matɨ'ɨj mi a'utyajhuii mej ti'ityurixaate'en ɨ maj jamuan á'ujhua'anya'a. Meyan tɨcɨn: ―Yaa pu aɨjna cɨn tyu'utaxajtaca'a a'ini catu pan ticha'ɨ. 17Aj pu i raamua'areeri'i a'ij mej ye'i tí'ixajtacaa. Tɨ'ɨqui ayan tihua'uta'ixaa tɨcɨn: ―¿A'ini een cɨn seyan ti'ixa yee sajcai pan ticha'ɨ? ¿Ni tzaa sacai xɨ yau'eite, ca'ɨn sacai xɨ tihuáuritejte? ¿Ni cai ti'itɨ a'amua jetze tasiseiri? 18¿Ni tzaa sacai ti'iseij, ca'ɨn sacai ti'inamua? ¿Ni sacai ramua'aree? 19¿A'achuni pua'an sicɨri ava'aturaa ɨ pan tɨ tya'avá'aturaa nyatɨ'ɨj hua'ura'ɨpɨ'ɨ ɨ maj anxɨ vi'ira'a a'asica'a ɨ tyaɨte aɨjna cɨme'e tɨ anxɨvi a'asica'a ɨ pan? ―Yaa pu tyu'utaxajtaca'a aɨjna ɨ Jesús. Aj mu mi meyan tiraata'ixaa tɨcɨn: ―Tamuaamuata'a japuan hua'apua pu ava'aturaa. 20Aj pu i aɨn Jesús, ayan ajtahua'a tihua'uta'ihua'uri'i tɨcɨn: ―Ajta, ¿a'achuni pua'an sicɨri setya'avaɨ'ɨstya'axɨ saɨjna cɨme'e ɨ tɨ tya'avá'aturaa ɨ ta'arahua'apua tɨ ará'axcaa nyatɨ'ɨj tihua'umí ɨ maj muaacua vi'ira'a ará'axcaa? Aj mu mi meyan tityaatanyú tɨcɨn: ―Arahua'apua sicɨri. 21Aj pu i ayan tihua'uta'ixaa aɨjna ɨ Jesús tɨcɨn: ―¿Ni tzaa sacai xɨ yau'eite muan? 22Matɨ'ɨjta mi maun a'ará'a ajna a'ahua'a chajta'a tɨ ayan tyaja'arajtyahuaa tɨcɨn Betsaida. Matɨ'ɨj mi seij e'ire'enyeijte tɨ aracuuni'icaa. Aj mu mi rájhuaviiri'i aɨjna ɨ Jesús tɨ ra'ajtamuare'en. 23Tɨ'ɨqui aɨn Jesús rajví'i muajca'ara'ara'an jetze aɨjna ɨ tɨ aracun. Ya'uvi'itɨ pua'aque ɨmɨ aujna a'u tɨ a'achajta'a. Aɨ pu ruɨjque'e ra'arameijraxɨ a jɨ'ɨsaara'an jetze. Ajta ra'ava'amuarej. Tɨ'ɨqui raataihua'uri'i tɨcɨn: ―¿Ni hui peri ma úunyee? 24Aj pu i aɨn ɨ tɨ aracun, antányeerejye'ica, ayan tɨcɨn: ―Ahuii, tyetyaca nu seij. Cu xuee cɨye mana'a pueen. Maj mu á'ujhua'an. ―Yaa pu tyu'utaxajtaca'a aɨjna ɨ tɨ aracun. 25Ajta aɨn Jesús, ajtahua'a pu ra'araamuare a jɨ'ɨsaara'an jetze ɨ tɨ aracun. Ajtahua'a pu rɨ'ɨ metyaunyeeraca'a. Pu'uri xaa ajna icu huaruj. Naijmi'i pu ti'iseijra'aca'a tyamua'a naa. 26Aj pu i aɨn Jesús raataijtaca'a aɨjna tɨ aracuuni'icaa tɨ nu'u a'ura'ani ɨ ruche. Ajta ayan tiraata'ixaa tɨcɨn: ―Capej utyaru'iipiche'en u chajta'a. Ni capaj pajta a'atɨ ixaatya'a eijna cɨme'e a'ij nyaj timuaahuaa. 27Tɨ'ɨj ayan tyuju'urɨj, aj pu'i Jesús, majta ɨ maj jamuan á'ujhua'anya'a, au mu a'ará'a a'u tɨ a'uchajta'atajme, ajna a'ahua'a tɨ ayan tyaja'arajtyahuaa tɨcɨn Cesarea de Filipo. Juye jetze mu auuju'ucaa. Tɨ'ɨj i ayan tihua'utaihua'uri'i aɨme ɨ maj jamuan á'ujhua'anya'a tɨcɨn: ―¿A'iqui meti'ixa ɨ tyaɨte yee a'ataani nyaj pɨrɨcɨ inyaa? 28Aj mu mi meyan tyu'utaxajtaca'a tɨcɨn: ―Seica mu meyan ti'ixa tɨcɨn muaa paj paɨn pɨrɨcɨ aɨjna ɨ Juan tɨ hua'amuaɨ'ɨhuaca'a, majta seica meyan tɨcɨn paj aɨn pɨrɨcɨ ɨ Elías. Majta seica, meyan ti'ixa tɨcɨn paj nu'u aɨn pɨji'irɨcɨ saɨj ɨ tɨ ti'ityejvee ɨ Dioj jemi. ―Yaa mu tiraata'ixaa. 29Tɨ'ɨjta'i aɨn ayan tihua'utaihua'uri'i tɨcɨn: ―Ari muan, ¿a'ini tyajamua'amitejte'e a'ataani nyaj pueen inyaa? Tɨ'ɨqui ayan tyu'utaxajtaca'a aɨjna ɨ Pedro, tɨcɨn: ―Muaa paj aɨn pɨji'irɨcɨ aɨjna ɨ mej meyan ratamua'amua tɨcɨn Ɨ Cɨriistu'u, ɨ tɨ Dioj an ya'ujyeíjtzaa ɨ ɨpuari japua. ―Yaa pu tyu'utaxajtaca'a aɨjna ɨ Pedro. 30Aj pu i aɨn hua'uta'ijmɨjri'i maj cai a'atɨ ixaatya'a. 31Tɨ'ɨqui a'utyejche tɨ tihuá'umua'aten. Ayaa pu tihua'uta'ixaa tɨ aɨn rusaɨj, ɨ tɨ ajta tyaata'a jetze airaanye, aɨ pu nu'u eihua rajpueitzi a'ame. Ajta tɨ nu'u ayan ruxe'eva'a a'ame maj cai raxe'eva'a mua'aju'un ɨ maj Israel jetze ajtyama'acan, majta ɨ maj va'acan cɨn títyatatí u teyujta'a, majta aɨme ɨ mej te'eyu'uxaca. Naijmi'i mu nu'u cai raxe'eva'a mua'aju'un. Ajta ayan tihua'uta'ixaa maj nu'u raaje'icatan. Tɨ'ɨj nu'u huamɨ'ɨn, aj pu ijta'i huatarujsin hueica xɨcajra'a tzajta'a. 32Tyamua'a pu tihue'ixaa a'ahuaritaacan cɨme'e. Ajta aɨn ɨ Pedro, aɨ pu ra'iraavi'itɨ ayée. Aj pu'i tiraatixaatya'ajraa tɨ nu'u cai ayan ti'itaura'acare'en. 33Ma ajta aɨn Jesús, aɨ pu ruhuarita'a a'achaacajraa. Hua'useirajraa aɨme ɨ maj jamuan á'ujhua'anya'a. Aj pu i aɨn ɨ Pedro titya'axɨ. Ayan tɨcɨn: ―Aricu. Ajtára'a inyeetzi jemi, mɨ pej peyan ti'ixaxa'a tɨj aɨjna ɨ tiyaaru'u. Muaa paj cai peyan ti'imua'atze a'ij tɨj ti'ijxe'eve'e ɨ Dioj silu a'ij mej ti'ijxe'eve'e ɨ tyaɨte. 34Tɨ'ɨqui Jesús hua'utajee aɨme ɨ maj jamuan á'ujhua'anya'a, ajta ɨ tyaɨte. Ayaa pu tihua'uta'ixaa tɨcɨn: ―Tɨ pua'a a'atɨ raxe'eva'a tɨ nyajamuan á'ucha'acanye'en, ayaa pu ruxe'eve'e tɨ cai che'e ayan rɨjca a'ij tɨ rusaɨj ti'ijxe'eve'e. Ma ajta, tɨ pua'a a'atɨ á'ucha'acanye'en nyajamuan, ayaa pu ruxe'eve'e tɨ rajpueitzi a'ara'ani ruxé'evi'ira'a cɨme'e. Ajta tɨ pua'a aɨn huamɨ'ɨni, capu a'ij i'irɨni. 35Ayaa nu tyajamuaata'ixaate'esin. Tɨ pua'a a'atɨ tyu'utesi'ira'a tɨ cai huamɨ'ɨni, auche'e pu mɨ'ɨni aɨjna ɨ a'atɨ. Aij pu á'ujɨsin ɨ ruxaijnyu'uca tɨ auj ruuri. Ma ajta, tɨ pua'a a'atɨ huamɨ'ɨni aɨjna cɨme'e tɨ á'ucha'acanye'en nyeetzi jamuan, na'ari aɨjna cɨme'e ɨ nyuucara'ara'an ɨ Dioj, aɨ pu ajtahua'a huatarujsin. Ajtahua'a pu ratyauni ɨ ruxaijnyu'uca tɨ auj ruuri. 36Ajta, tɨ pua'a a'atɨ tyu'umue'itɨn naijmi'i tɨj na'a tɨ iiyan ti'iseijre'e chaanaca japua, ¿a'iqui tiraatyava'ɨri aɨjna tɨ raamue'itɨ tɨ pua'a aɨn ya'uraini ɨ ruxaijnyu'uca tɨ auj ruuri? Capu ti'itɨ a'ij tiraatyava'ɨri, ¿ni cai? 37¿Ni cai a'ij ti'irɨ'ɨri tɨ huaujnanai ɨ ruxaijnyu'uca tɨ ari ya'urai aɨjna cɨme'e ɨ tɨ tí'ijchaɨca'a? Capu a'atzu a'ij ti'irɨ'ɨri, icu. 38Ayaa nu nyajta tyaja'amue'ixaate'e. Aijna i tyaɨtejra'a, eihua mu autyajturaa ɨ Dioj jemi. Ayaa mu e'en ɨ Dioj jemi matɨj aɨme ɨ mej ti'ixana'acɨra'a jɨita'a jamuan. Tɨ pua'a seti'itevi'ira'a saɨjna cɨme'e mej ramua'aree ɨ tyaɨte sej nyajamuan á'ujhua'an, na'ari mej ramua'aree tɨ a'amuaranajchi i nyenyuuca, tɨ pua'a seyan ti'itevi'ira'a hua'a jemi, aj nu nyajta inyaa i nyej nyajta tyaata'a jetze a'iraanye, nyaa nu neyan che'eta nyana'a ti'itevi'ira'a na'ame muejmi jemi. Neti'itevi'ira'a nu na'ame muejmi jemi ajna xɨcajra'a jetze nyatɨ'ɨj nyajtahua'a yatanyén iiyan chaanaca japua. Va'acan nu cɨn ti'ityavaa na'ame jemin ɨ Dioj tɨ niya'upua ajna nyatɨ'ɨj yatanyen hua'a jamuan ɨ mej ti'ivaɨre'e tajapua ɨ Dioj jemi.

will be added

X\