San Marcos 6

1Au pu á'uraa ɨ Jesús, majta ɨ maj jamuan á'ujhua'anya'a. Matɨ'ɨj mi a'ucɨ́j aun pujme'en a'u tɨ a'uve'ese aɨjna ɨ Jesús. 2Tɨ'ɨj tyaja'ure'enye ajna ɨ xɨcajra'a mej etzen rusa'upi, tɨ'ɨqui a'utyejche tɨ tihua'umua'aten hua'ateyujta'a. Eihua mu tyaɨte raanamuajri'i. Eecan mu a'ij tya'utaseij. Ayaa mu tyu'urihua'uraca'a tɨcɨn: ―¿A'uni ya'urɨ́'ɨre amɨjna i nyuucarijra'a? ¿Ti'itaani mua'atziira'ara'an pueen aijna tɨ raatyajtuaa amɨjna jemi mɨ Jesús tyaj cai xɨ a'anaj me'e yá'unamuajri'i? 3Amɨɨ pu yeehui aɨn pueen ɨ yaujra'an ɨ tɨ ti'isi'ichaca. Aɨ pu naanajra'an ayan antyahuaa tɨcɨn Mariiya. Aɨ mu juutzimua'ame'en pueen aɨme ɨ Jacobo, ajta ɨ José, ajta ɨ Judás, ajta aɨjna ɨ Simón. Majta seica ɨ juutzimua'ame'en ɨ ma juuca, aɨ mu yeche ta jamuan. ―Ayaa mu tyú'urixaatya'acaa. Aɨj mu cɨn ra'achueera'acaa maɨjna ɨ Jesús. Aɨj mu cɨn cai raxe'eva'acaa. 4Ajta ayaa pu Jesús tihua'uta'ixaa tɨcɨn: ―Naimi'i mu rájtyauve tyamua'a naa jemin ɨ tɨ ti'ixa ɨ nyuucari tɨ Dioj jemi ma'acan. Ma ajta'i, ɨ maj huacaitɨme ruche, majta ɨ mej i'ivaujsimua'ame'en, majta ɨ mej jamuan e'eche, camu tɨn rájtyauve aɨme. 5Ayaa pu'u cai huatarɨ'ɨristaraca'a tɨ aɨn Jesús ti'itɨ a'ij huáruuren ɨ maj cɨn a'ij tira'utaseij tɨj ari tyu'uruu pua'amuaque. Ai pu'u huarɨj; hua'ajtamuára'axɨ seica ɨ tyaɨte. Tɨ'ɨj i xaa tihua'uhuaa. 6Aɨj pu'i cɨn utyaavatzɨ ɨ tzajta'an maj cai ra'atzaahuatya'acaa. Tɨ'ɨqui á'uraa ɨ Jesús. Au pu a'uye'icaa a'ɨmɨ a'u tɨ a'uchajta'ajmee. Ajta tihuá'amua'atyajcaa. 7Tɨ'ɨqui Jesús pu hua'utajee aɨmej ɨ maj tamuaamuata'a japuan hua'apua ara'ase. Aj pu'i hua'are'itixɨ hua'apuacajme'en. Ajta tihuéijca aɨjna cɨme'e mej mi hua'utamuarite'en ɨ tiyaaru'use ɨ maj hua'a tzajta'a seijra'acaa ɨ tyaɨte. 8Ajta ayan tihuéijca maj cai ti'itɨ anyaɨ́'ɨn ɨ maj cɨn huataujvaɨre'en ɨ juye jetze. Aɨ mu'u nu'u a'achuiini, ti'itɨ itzɨj ɨ maj cɨn ráujca'aníhua'a. Capu a'ij ti'irɨ'ɨri mej ti'itɨj anyaɨ́'ɨn ca'ani na'ari ti'itɨ inye'e nusu tumin. 9Majta, ataujca'acaitya'axɨ'ɨn. Majta saxuijme'en tya'ucaujchéetya'axɨ'ɨn seij ajta seij. Capu nu'u a'ij ti'irɨ'ɨri maj hua'apuacajme'en te'entipíi ɨ siicu'uri. 10Ajta ayan tihua'uta'ixaa tɨcɨn: ―Tɨ pua'a hui chi'ita xu'utyarute ma a'ahua'a chajta'a, auu xu huatyaturaasin tɨj na'a a'achu saj a'ateere ajna chajta'a. 11Ajta tɨ pua'a ma a'ahua'a macai amuaata'acare'en saj utyarute, na'ari tɨ pua'a macai ranamuajracu ɨ sej tihue'ixaate'en, ayaa xu huarɨni saj huiracɨɨnye saujna. Sara'atyaca'atzɨjxɨ'ɨn ɨ ruca'acai tɨ'ij caaxɨn ɨ chuej. Ayaa xu huarɨni mej mi raamua'aree ɨ tyaɨte tɨcɨn ma'utyajturaa ɨ Dioj jemi. Miche'e raamua'aree maj autyajturaa ɨ Dioj jemi a'achu maj pua'amua maj cai a'amuanamuajracuca'a. ’Ayaa nu tyaja'amue'ixaate'e, ajna xɨcajra'a tɨ jetzen hua'uxɨjte'en ɨ Dioj ɨ maj cɨn autyajturaa ɨ jemin, eihua pu pueijtzi hua'uta'asin. Eitze'e mu rajpueitzi mua'aju'un aujna chajta'a macai ɨ mej maun e'echajca'a aujna tɨ ayan tyaja'arátyahuaaca'a tɨcɨn Sodoma, ajta Gomorra. ―Ayaa pu tihua'uta'ixaa. 12Matɨ'ɨj mi a'ucɨj. Metihue'ihue'ixaatya'a ɨ tyaɨte tɨ nu'u ayan tyu'ujxe'eve'e maj nu'u saɨque tyu'umua'ati ɨ rutzajta'a. 13Majta maɨn ɨ maj tamuaamuata'a japuan hua'apua ara'ase, aɨ mu eihua hua'utamuari ɨ tiyaaru'use ɨ maj hua'a tzajta'a seijra'acaa ɨ tyaɨte. Majta eihua tihua'avá'ahuaatya'axɨ aceiti cɨme'e hua'a muutze'e ɨ mej ti'icucui'i. Naijmi'ica mu tyu'uhuaa. 14Ira'ateevi'i, matɨ'ɨj mi raanamuajri'i nain japua, tɨj na'a aun maj a'uchaatɨma'aca'a ɨ tyaɨte a'ij tɨ tyu'uruu ɨ Jesús. Ajta aɨjna ɨ tajtuhuan tɨ ve'e, aɨ pu ajta raamua'areeri'i. Ayaa pu antyahuaaca'a ɨ tajtuhuan tɨcɨn Herodes. Aj pu'i ayan tyu'utaxajtaca'a aɨjna ɨ Herodes tɨcɨn: ―Aɨjna ɨ Juan tyaacan, ɨ tɨ hua'amuaɨ'ɨhuacara'a, aɨ pu hui huatarú. A'itaraa a'u maj ya'ava'ana. Aɨj pu cɨn raayɨ'ɨtɨ tɨ ayan tyu'uruuren. ―Yaa pu tyu'utaxajtaca'a aɨjna ɨ tajtuhuan. 15Majta seica, meyan tɨcɨn: ―Ai pu aɨn pueen ɨ Elías ɨ tɨ aɨjna cɨn ti'ixaxa'ata'a ɨ Dioj jetze ma'acan. Majta seica meyan tɨcɨn: ―Ai pu aɨn pɨrɨcɨ a'atɨ tɨ ti'ixaxa'ata'a ɨ Dioj jetze ma'acan. Ayaa pu che'eta na'a ti'ityejvee ɨ Dioj jemi matɨj ɨ seica ɨ mej mejmi'i meyan ti'ixaxa'ata'a. 16Ma ajta aɨn Herodes, tɨ'ɨj raamua'areeri'i, ayaa pu tyu'utaxajtaca'a tɨcɨn: ―Ai pu aɨn pueen aɨjna tyaacan ɨ Juan ɨ nyaj raataijtaca'a maj ru'ijvéijche ɨ muura'an. Pu'uri ijii, aɨ pu hui huatarú hua'a tzajta'a ɨ mɨ'ɨchite. ―Yaa pu tyu'utaxajtaca'a aɨjna ɨ Herodes. 17Aru saɨj pu pueenya'a, jɨita'a tɨ ayan antyahuaaca'a tɨcɨn Herodías. Aɨ pu ɨra'ara'an puéenya'a ɨ Felipe. Ajta aɨn Felipe, aɨ pu juutzajra'an puéenya'a ɨ tajtuhuan ɨ Herodes. Tɨ'ɨqui Herodes aɨn ancure'evi'itɨ aɨjna ɨ jɨita'a, aɨn tɨ Felipe raatyevi'itɨnya'a. 18Aj pu'i aɨn ɨ Juan ayan tiraata'ixaa aɨjna ɨ Herodes tɨcɨn: ―Capu a'ij ti'irɨ'ɨri paj ratyevi'itɨnye'en mue'ihuaara'a tɨ ratyevi'itɨn. ―Yaa pu tyu'utaxajtaca'a aɨjna ɨ Juan. 19Tɨ'ɨqui huatanyu'ucaca'a aɨjna ɨ jɨita'a. Aɨj pu cɨn aɨn Herodes, raataijtaca'a maj ra'anján aɨjna ɨ Juan. Majta ra'anaajɨ'ɨque alaampi cɨme'e a'u tɨ e'ityanami'ihuaca'a. Eecan pu rájchaɨra'acaa aɨjna ɨ jɨita'a. Aɨ pu cɨn raje'icatamɨ'ɨcaa. 20Ma ajta'i aɨn ɨ Herodes, aɨ pu raamua'areeraca'a tɨ rɨ'ɨ ti'itevistacaa aɨjna ɨ Juan, ajta tɨ ayan rɨjca a'ij tɨ ti'ijxe'eva'acaa ɨ Dioj. Ajta aɨ pu ti'imuajcaa aɨjna jemi ɨ Juan. Auche'e pu ra'aranajchaca'a aɨjna ɨ Herodes tɨ raanamuaa a'ij tɨ tyu'uxajtaca'a aɨjna ɨ Juan. Capu a'ij í'irɨni tɨ cai tyamua'a yau'eityajca'a a'ij tɨ tí'ixajtacaa. Aɨj pu cɨn Herodes cai raata'acara'a aɨjna ɨ jɨita'a tɨ raaje'ica. 21Tɨ'ɨj ajna tya'ará'a ɨ xɨcaara'an a'anaj tɨ ma'acan aɨjna ɨ Herodes, aj pu xaa aɨn jɨita'a rá'amityejtya'aca'a a'ij tɨ ye'i huarɨni tɨ raaje'ica ɨ Juan. Tɨ'ɨqui Herodes, aɨjna tɨ ti'iyesten tɨ tya'ará'a ɨ xɨcaara'an a'anaj tɨ ma'acan, eihua pu tyaɨte huata'inee, xantaaru'u, matɨj mana'a hua'a capitanme, majta mej ti'ityetatya'upu'u maɨjna cɨme'e mej tihue'ijte'e ɨ tyaɨte, majta ɨ maj maun a'uchaatɨme aujna Galileeya, ɨ mej eihua ruxe'eve'e. 22Aj pu'i yaujra'an aɨjna ɨ Herodías, aɨ pu utyajrupi u chi'ita a'u maj tyajanú'ucua'aca'a. Aɨjna ɨ yaujra'an, jɨita'a pu pɨrɨcɨ. Aj pu'i aɨn tyu'uteenyei rusaɨj huá'a vejripua. Tyamua'a pu eihua tira'aranajchaca'a aɨjna ɨ Herodes tɨ tyu'uteenyei, majta aɨme ɨ maj jamuan ti'icua'aca'a. Aj pu'i ayan tiraata'ixaa aɨjna ɨ tajtuhuan tɨcɨn: ―Naatahuaviiri'i ti'itɨj paj a'ij ti'ijxe'eve'e. Nyamuaata'asin. 23Eihua pu tya'ataujratziiri'i rusaɨj tɨ ayan raata'an ti'itɨj tɨ raatahuaviira. Capu nu'u a'ij rɨni tɨ pua'a raatahuavii e'ita'a a'u tɨ tihuaje'ijte'e. 24Aj pu'i á'uraa aɨjna ɨ jɨita'a. Tɨ'ɨj i ayan tiraataihua'uri'i aɨjna ɨ runaana tɨcɨn: ―¿Ti'itajni nyaraatahuavii ɨ tajtuhuan? ―Yaa pu tiraataihua'uri'i. Aj pu i ayan tyu'utanyúu aɨjna ɨ naanajra'an tɨcɨn: ―Huatahuaviiri'i ɨ muura'an aɨjna ɨ Juan tɨ hua'amuaɨ'ɨhuaca. 25Aj pu i ajtahua'a ca'anacan utyajrupi a'u tɨ a'utyavaaca'a aɨjna ɨ tajtuhuan tɨ ve'e. Aj pu i ayan tiraata'ixaa tɨcɨn: ―Ayaa nu ti'ijxe'eve'e paj naataɨ'ɨte'en tuxa'a jetze ɨ muura'an ɨ Juan tɨ hua'amuaɨ'ɨhuaca. ―Yaa pu tyu'utaxajtaca'a aɨjna ɨ yaujra'an ɨ Herodías. 26Tyamua'a pu a'ij pua'a tiraata'a aɨjna ɨ tajtuhuan tɨ rusaɨj ayan tya'ataujratziiri'i tɨ ayan nu'u huarɨni a'ij tɨ ti'ijxe'eve'e aɨjna ɨ jɨita'a ɨ yaujra'an ɨ Herodías. Majta aɨme tɨ hue'inee, aɨ mu majta raanamuajri'i tɨ'ɨj raata'a ɨ runyuuca. Aɨj pu cɨn ti'itevi'ira'aca'a hua'a jemi aɨjna ɨ tajtuhuan. Aɨj pu cɨn, aɨn ra'ara'aste ɨ runyuuca. 27Ajta e'eyan xantaaru'u huataityaca'a tɨ raaje'icatan, ajta e'eyan ya'araɨ'ɨte'en ɨ muura'an ɨ Juan. 28Ajta á'uraa ɨ xantaaru'u. Tɨ'ɨqui aun a'ará'a aa tɨ e'ityanami'ihuaca'a aɨjna ɨ Juan. Aj pu'i ru'ijvéijchaca'a ɨ muura'an ɨ Juan. Tɨ'ɨqui ya'araɨ'ɨte ɨ tuxa'a jetze. Ajta aɨn ɨ tajtuhuan, aɨ pu raataɨ'ɨte aɨjna ɨ yaujra'an ɨ Herodías. Tɨ'ɨjta'i aɨn raataɨ'ɨte ɨ runaana. 29Majta maɨn ɨ maj á'ujhua'anya'a jamuan ɨ Juan, matɨ'ɨj raamua'areeri'i, aj mu mi a'uré'enye jemin Herodes, meya'utɨɨ aɨjna ɨ mɨ'ɨchi. Matɨ'ɨj mi ra'ava'ana. Yaa pu eenye'eque'en huamɨ'ɨ aɨjna ɨ Juan. 30Majta maɨn ɨ maj tamuaamuata'a japuan hua'apua ara'ase, aɨ mu tyujsaɨj a'u tɨ a'utyavaaca'a aɨjna ɨ Jesús. Aj mu mi raata'ixaa nain a'ij mej ti'itɨj huáruu, nain a'ij mej ye'i tihua'umuá'ate. 31Aj pu'i ayan tihua'uta'ixaa aɨjna ɨ Jesús tɨcɨn: ―Mu sa'utauriyi'i. Tiche'e huatasa'upe'en ma a'ahua'a a'u tɨ cai ti'itɨ e'ere'evee. ―Ayaa pu tyu'utaxajtaca'a. Aru eihua mu a'ure'eninyéica'a ɨ tyaɨte a'u tɨ a'utyavaaca'a aɨjna ɨ Jesús. Majta a'ucɨ'ɨca'a jemin ma mui'itɨ ɨ tyaɨte. Aɨj pu cɨn cai huatacɨ'ɨpajca'a tɨ tyu'ucua'ani aɨme ɨ maj jamuan á'ujhua'anya'a. 32Aj mu mi a'ucɨj rujɨɨmua'a baarcu jetze. Matɨ'ɨj mi maun a'ará'a a'u tɨ cai a'a a'atɨ. 33Majta maɨn ɨ tyaɨte, aɨ mu hua'aséiraca matɨ'ɨj a'ucɨj. Eihua mu raamuá'a ɨ Jesús. Aɨj mu cɨn ru'ɨcan a'ire'enyajxɨ a'u tɨ na'a maj a'uchaatɨme. Aɨ mu mi anacai a'ará'a a'u tɨ a'araíxanche'e aɨjna ɨ Jesús, majta ɨ maj jamuan á'ujhua'anya'a. 34Ajta, tɨ'ɨj aɨn aitama'aca'a ɨ baarcu jetze, eihua pu tyaɨte huaséijraca'a. Tɨ'ɨj ii huataujxaamɨste tɨ'ɨj hua'useij. Yaa mu tityaja'uvátzɨj cumu canya'axɨ tɨ cai a'atɨ hua'a cujta'a huama'acaa. Aɨj pu'i cɨn a'utyejche aɨjna ɨ Jesús tɨ tihuá'umua'aten eihua. 35Tɨ'ɨj huatyechumua'araca'a, aj mu mi ave'ere'enye jemin ɨ maj jamuan á'ujhua'anya'a. Matɨ'ɨj mi meyan tiraata'ixaa tɨcɨn: ―Pu'uri tyechumua'ari. Ajta cai a'atɨ ye'eche ayajna vejli'i. 36Ajta cai ti'itɨj ticha'ɨ maj raacua'ani mɨ tyaɨte. Pata'aj hua'ure'itixɨ'ɨn, mej mi a'ucɨ́jxɨ'ɨn ma a'ahua'a chajta'a, a'u maj a'uchaatɨme tyaɨte mej mi pan huananan. 37Aj pu i ayan tihua'uta'ixaa aɨjna ɨ Jesús, tɨcɨn: ―Muan xu tihua'amin rujɨɨmua'a sana'a. Aj mu mi meyan tiraata'ixaa tɨcɨn: ―¿Ni rɨ'ɨri tyaj ja'uju'un tyaj pan a'uvá'ananan tyej ti tihua'umín? Tɨ pua'a teyan ti'ituava'a a'achu tɨ caj a'atɨ ramue'itɨcɨjca tɨ pua'a ayan tyu'umuare'en a'achu cumu hua'apua cieentu xɨcaj cɨme'e, capu ajta ti'icɨ'ɨpáa a'ame ɨ tumin tyej ti teyan huarɨni. 38Aj pu'i aɨn ɨ Jesús, ayan tihua'uta'ixaa tɨcɨn: ―Sericu, mu xaare'ixe'ere'e a'achuni caj me tirajcha'ɨ ɨ pan. Matɨ'ɨj mi raamua'areeri'i. Aj mu mi meyan tiraata'ixaa tɨcɨn: ―Ai pu'u caj ti'ixuavi. Anxɨvi ɨ pan. Majta hue'ité, caj mu tí'ityahua'apua. ―Yaa mu tyu'utaxajtaca'a. 39Tɨ'ɨqui hua'utaityaca'a maj a'ujra'ase aa tɨ a'utu'upi ma mui'itɨ ma'a. 40Aj mu mi a'ujrá'asaca'a, seica anxɨte ma arástɨmé'en, majta seica hua'apuate japuan tamuaamuata'a mu arástɨmé'en. 41Aj pu'i aɨn ɨ Jesús, ra'ancuraɨ'ɨpɨ'ɨ ɨ pan, ajta aɨmej ɨ hue'ité. Tɨ'ɨjta'i ra'antítaaraxɨ ɨ pan, aj mu mi hua'uráɨ'ɨpɨ'ɨte ɨ tyaɨte. Majta ɨ hue'ité, aɨ mu majta huatamui'iraca'a. Aj pu'i hua'utaɨ'ɨpɨ'ɨ aɨjna ɨ Jesús ɨ maj jamuan á'ujhua'anya'a mej mi hua'uraɨ'ɨpɨ'ɨte'en ɨ tyaɨte. 42Naijmi'i mu tyu'ucuaa ɨ tyaɨte. Tyamua'a mu eihua tityáaju'uxai. 43Ajta eihua pu ava'aturaa ɨ pan, majta ɨ hue'ité. Tamuaamuata'a japuan hua'apua mu tya'ava'ɨste tɨ'ɨti sicɨri jetze aɨjna cɨme'e ɨ tɨ ava'aturaa. 44Majta maɨn ɨ mej tyu'ucuaa ɨ tyetyaca, ayaa mu ará'axcaa a'achu cumu anxɨ vi'ira'a. 45Tɨ'ɨqui Jesús pu hua'utaij maj atyacɨɨnye ɨ baarcu jetze maj antacɨɨnye atavan pujme'en, maj nu'u anáatyá'a a'ara'asti ajna Betsaida. Ma ajta aɨn Jesús, aɨ pu aun a'utyajturaa tɨ'i hua'are'itixɨ'ɨn ɨ tyaɨte. 46Tɨ'ɨj hua'ure'itixɨ, aj pu'i á'uraa aɨjna ɨ Jesús. Tɨ'ɨqui aun a'ará'a a'u tɨ á'ujɨrime tɨ'ij raatyajhuauni ɨ Dioj jemi. 47Tɨ'ɨj huatyatɨca'araca'a, aa mu meri a'uju'unca'a e'ita'a ɨ jaj japua, jetzen mua'araatyá'a ɨ baarcu. Ajta aɨn ɨ Jesús, aɨ pu rusaɨj a'utácatii jɨri jetze. 48Tɨ'ɨqui raaseij tɨ hua'amuare'eristya'aca'a maj antacɨɨnye jaj japua a'ini a pu a'ava'aacacaa. Tɨ'ɨj tapua'arijma'aca, aɨ pu a e'ire'enye ajna vejli'i maj huaju'uca'a baarcu jetze. Aɨ pu huama'acaa ɨ jaj japua. Pu'uri hua'antinájchijma'a. 49- 50Majta maɨn, matɨ'ɨj raaseij, metyu'utatzɨn. Muaajijhuaca'a naijmi'i a'ini naijmi'i mu raaseij tɨ huama'acaa ɨ jaj japua. Ayaa mu tyu'umuá'a tɨcɨn: “Nyájcan pu pueen.” Aj pu'i ayan tihua'uta'ixaa aɨjna ɨ Jesús tɨcɨn: ―Xaatyaujca'anye ɨ rutzajta'a. Caxu ti'itzɨɨnya'a. Nyaa nu nyaɨn pɨrɨcɨ ɨ Jesús. 51Aj pu'i atyajraa ɨ baarcu jetze a'u ma a'araatya'aca'a. Tɨ'ɨqui huatyapua'araca'a tɨ hua'aacaca'a. Aj mu mi a'ij tya'utaseij. Tɨ'ɨqui utyaavatzɨ ɨ hua'a tzajta'a ɨ mej ti'imuajcaa. 52Eecan mu ti'imuajcaa a'ini camu yau'eitaa mua'araa a'ij tɨ een cɨn raayɨ'ɨtɨ tɨ aɨn raatamui'iren ɨ pan, a'ini rujɨɨmua'a muaatáujnaamɨ ɨ rutzajta'a. 53Matɨ'ɨj mi antacɨj jaj japua. Au mu mi a'ará'a ajna a'ahua'a tɨ ayan tyaja'arajtyahuaa tɨcɨn Genesaret. Aa tɨ a'avastɨme ɨ jaj, aa mu ra'ijtápe ɨ baarcu. 54Cɨme'en mu'u aitacɨj ɨ baarcu jetze, e'eyan mu raamuá'a aɨjna ɨ Jesús ɨ tyaɨte. 55Aɨj mu mi cɨn ca'anacan muaruáachijmá'a, a me ve'ere'enye ɨ jemin. Matɨ'ɨj mi a'utyajhuii maj hua'ajsaɨre'en jutaatzi japua ɨ mej ti'icucui'i ajna a'u maj ya'amua'areeraca'a tɨ a'utyavaaca'a aɨjna ɨ Jesús. 56Ajta a'u tɨ na'a tɨ a'ure'eninyéica'a raanchu tzajta'a tɨ huachájta'atajme na'ari tɨ huachájta'atajme tɨ vivejmá'a, a'u tɨ na'a nya'u, mahua'uraatzajye'icaa caaye jetze. Aj mu mi rájhuaviiri'i aɨjna tɨ hua'uta'an maj ra'ajtamuare'en cɨɨxura'ara'an jetze, aɨjna jetze tɨ uvijpi'i ɨ siicu'ura'ara'an tɨ'ij a'achu maj pua'amua ra'ajtamuare'en, mej mi huarún. Ayaa pu'u xaa nya'u tyu'uruu ajna u Genesaret.

will be added

X\