San Marcos 5

1Aj mu mi antacɨɨ antavan pujme'en. Ayaa pu tyaja'arajtyahuaa tɨcɨn Gadara. 2Aj pu'i Jesús aitaraa ɨ baarcu jetze. Tɨ'ɨqui e'eyan saɨj ave'ere'enye tiyaaru'u tɨ tzajta'an seijra'acaa. Au pu huiirajraa aɨjna ɨ a'atɨ aa maj mɨ'ɨchite a'avá'anaamɨca. 3Au pu e'echajca'a aɨjna ɨ a'atɨ. Eecan pu simuarun. Capu rɨ'ɨristaca'a tɨ a'atɨ ra'anajɨ'ɨque'en caujnari cɨme'e, ni alampi cɨme'e. 4Mui'i mu raatatése. Mara'anajɨ'ɨquihua'a muajca'ara'ara'an jetze, majta ɨɨcajra'an jetze alaampi cɨme'e. Aru aɨn, tɨ'ɨj pɨ na'a pu tijtzá'ana'a. Cɨle'enye'en ajta majca'i iyaúhua'anaa. Capu huatarɨ'ɨristaraca'a tɨ a'atɨ a'ij raaruuren tɨ ráamua'ajcante'en. 5Nain tujca'ari tzajta'a, ajta nain tɨca'ari tzajta'a, aɨ pu á'ucha'acanya'a, anjiihua ajna jɨri jetze. Ajta ajna a'u maj mɨ'ɨchite a'avá'anaamɨca, a pu ayan tihua'utyatu'asixɨn tetej cɨme'e. 6Tɨ'ɨj raaseij ɨ Jesús, tɨ'ɨj i u a'utatáij. Aj pu'i titunutaca'a ajna vejli'i tɨ a'utyavaaca'a ɨ Jesús. 7Ajta huajijhuaca'a ca'anin cɨme'e. Ayan tiraata'ixaa tɨcɨn: ―¿A'ini ti'itɨj petyaruuren nyeetzi jemi, Jesús pej i'i yaujra'an ɨ Dioj tɨ nainjapua tie'ijta? Aij nu muahuavii ɨ Dioj jemi pata'aj cai pueijtzi naatá'acara'a. 8Ayaa pu tyu'utaxajtaca'a aɨjna ɨ a'atɨ, a'ini ayaa pu tiraata'ixaatya'aca'a ɨ Jesús tɨcɨn: ―Tiyaaru'u paj tzajta'an seijre'e mɨ tevi, pej a'ij pua'a metyáumua'aree, huiirajra'a mɨ tevi jetze. ―Yaa pu tiraata'ixaa ɨ Jesús. 9Ajta ayan raataihua'uri'i tɨcɨn: ―¿A'ini pua'antyahuaa muaa? Ajta ayan tyu'utanyúu tɨcɨn: ―Ayaa nu antyahuaa tɨcɨn i tyej arájsevi vi'ira'a ara'ase. Ayaa tu ti'itamua'amua aɨjna cɨme'e tyej i'i mui'i. ―Ayaa pu tyu'utaxajtaca'a. 10Aj pu'i aɨjna ɨ a'atɨ eihua rájhuaviiri'i ɨ Jesús tɨ aɨn hua'utaite maj á'ucɨɨnye ma a'ahua'ayee ɨ mej tzajta'an seijra'acaa. 11Meenti maɨn tuiixu, vejli'i tya'antácua'atɨ́ye'icá jɨri jetze. Maj mui'icaa ɨ tuiixu a'achu cumu hua'apua vi'ira'a. 12Aj mu mi maɨn tiyaaru'u meyan rájhuaviiri'i tɨcɨn: ―Taatá'a ityejmi tyaj a'utyarute mɨ tuiixu tzajta'a. 13Tɨ'ɨqui aɨn hua'uta'a. Matɨ'ɨj mi huiiraacɨ maɨjna ɨ tiyaaru'use ɨ mej tzajta'an seijra'acaa aɨjna ɨ tevi. Aj mu mi tiyaaru'u huataseijre ɨ tuiixu tzajta'a. Majta maɨn ɨ tuiixu, muaatauru aun pujme'en u ate'e. Aj mu mi atyáavatzɨ a jaata'a. Matɨ'ɨj mi aujamɨ, naijmi'i. 14Majta maɨn ɨ mej tuiixu chaɨca'a, aɨ mu tyamua'a tyu'utatzɨn. Matɨ'ɨj mi a'ucɨj maj hua'uta'ixaate'en mej chajta'a a'uchaatɨme, majta matɨj mana'a maj a'uchaatɨme a'ɨmɨ. Aj mu mi e'ire'enye ɨ tyaɨte mej mi raamua'aree a'ij tɨ ti'itɨ huarɨj. 15Matɨ'ɨj mi ave'ere'enye a'u tɨ e'ij e'enya'a ɨ Jesús. Aj mu mi maɨn huaseij ɨ tevi ɨ tiyaaru'use maj tzajta'an seijra'acaa. A pu a'utácatii. Capu che'e mua'avi'i. Capu che'e rutɨmue'i. Pu'uri huaruj aɨjna ɨ tevi. Aj mu mi tyu'utatzɨn. 16Majta maɨn ɨ mej raaseij a'ij tɨ ti'itɨj huarɨj, nain mu hua'uta'ixaa ɨ tyaɨte a'ij tɨ tiraaruu ɨ tevi ɨ tiyaaru'use maj tzajta'an seijra'acaa, a'ij tɨ tihua'uruu ɨ tuiixu. 17Aj mu mi a'utyajhuii ɨ tyaɨte maj raahuavii ɨ Jesús tɨ a'ura'ani u a'ahua'ayee. 18Tɨ'ɨqui á'uraa ɨ Jesús. Aun pu atyajraa ɨ baarcu jetze. Tɨ'ɨj i aɨjna i tɨ tzajta'an seijra'acaa ɨ tiyaaru'use, aɨ pu rájhuaviiri'i tɨ Jesús raata'an tɨ a'ura'ani jamuan. 19Ajta aɨn ɨ Jesús, capu raata'a aɨjna ɨ tevi tɨ a'ura'ani jamuan. Ayaa pu tiraata'ixaa tɨcɨn: ―Aricu a'u pej e'eche hua'a jamuan a'ihuaamua'a. Pata'aj hua'uta'ixaate'en nain a'ij tɨ timuaaruu ɨ tavastara'a jemi, a'ij tɨ ye'i rɨ'ɨ timuajcha'ɨ. 20Aj pu i iya'uraa ɨ a'atɨ. Ajta e'eyan aɨn a'utyejche tɨ hua'uta'ixaate'en ɨ mej maun a'uchaatɨme ajna tɨ ayan tyaja'arajtyahuaa tɨcɨn Tamuaamuata'a tɨ chajta'atajme. Nain pu hua'uta'ixaa a'ij tɨ tyu'uruu aɨjna ɨ Jesús. A'u tɨ na'a rɨ'ɨ mu tiraanamuajraca'a ɨ tyaɨte a'ini jajcua ma'acan pu puéenya'a ɨ nyuucari. 21Aj pu ijta'i huara'araa ɨ Jesús ɨ baarcu jetze. Tɨ'ɨj ii aun a'ará'a aun jetze pujme'en vejli'i a'u tɨ a'avastɨme ɨ jaj. Matɨ'ɨj mi avere'enye eihua tyaɨte a'u tɨ a'utyavaaca'a ɨ Jesús. 22Aj pu'i saɨj a'ará'a a'atɨ tɨ ti'ivaɨra'acaa hua'ateyujta'a. Va'acan pu cɨn ti'ityavaaca'a. Ayaa pu antyahuaaca'a tɨcɨn Jairo. Tiyauj, jɨitacan. Ti'icui'ica'a aɨjna ɨ yaujra'an. Tɨ'ɨj aɨn Jairo raaseij ɨ Jesús, aj pu'i titunutaca'a a chuaata'a Jesús tɨ é'ejvee. 23Eihua pu rájhuaviiri'i, ayan tɨcɨn: ―Niyauj pu a'ame'ere. Mu a'uta'iyi'i pata'aj ra'ajtamuaren, ta'aj huarún, ta'aj auj ruuri a'ara'ani. ―Ayaa pu tiraata'ixaa. 24Aj pu'i Jesús u á'umej jamuan. Majta eihua tyaɨte a'ucɨj hua'a jamuan aɨme ɨ maj hua'apua. Matɨ'ɨj mi ajtyáxɨɨraca'a ɨ tyaɨte. Tyamua'a mu huapɨ'ɨ tityá'acataca'a. 25Ajta hua'a tzajta'a a'utyavaaca'a ɨ jɨita'a tɨ ti'icu'i. Pu'uri a'ateevi'i a'achu cumu tamuaamuata'a japuan hua'apua ninye'ira'a tɨ ti'icu'i aɨjna ɨ jɨita'a. Tɨ'ɨj pɨ na'a pu uva'amɨ'ɨyica'a xure'ejtacan. 26Pu'uri eihua huaurijtaca'a ɨ mej ti'ihua'ataca jemi. Pu'uri tyaja'ahuáujrai nain tɨj na'a tɨ caj ti'ituava'aca. Ajta capu ti'itɨj a'ij tiraatyavaɨ. Ma ajta'i, ayaa pu i éenya'a ajtahua'a eitze'e ti'ijcuí'inyaca'a. Aɨj pu cɨn, rajpueijtzica'a eihua aɨjna ɨ jɨita'a. 27- 28Tɨ'ɨqui tyu'unamuajri'i a'ij tɨ ti'itɨj huáruu ɨ Jesús. Ayan tɨcɨn: “Aij nu cɨn neyan rɨni nyej ra'ajtamuaren cɨɨxura'ara'an jetze, aj nu rujni.” Yaa pu tyu'utaurixajtya'aca'a aɨjna tɨ ti'icui'ica'a. Aɨj pu cɨn a aurupi tyaɨte tzajta'a aɨjna ɨ jɨita'a. Tɨ'ɨj i a e'ire'enye huarita'an ɨ Jesús. Aj pu'i ra'ajtamuárej cɨɨxura'ara'an jetze. 29Cɨme'en pu'u ra'ajtamuárej, aj pu'i huatyapua'araca'a tɨ uva'axuurica'a. Tɨ'ɨj i yaa raata'a ɨ tzajta'an cumu pu'uri huaruj. 30Aj pu i raamua'areeri'i ɨ Jesús ɨ rutzajta'a tɨ ti'ihuaujhuaa ɨ a'atɨ cumu tɨ cai che'e raca'anisti'i. Aj pu i pɨ a'ure'eve, hua'useirajraa ɨ tyaɨte. Ayan tɨcɨn: ―¿A'ataani na'ajtamuare i nyacɨɨxu jetze? ―Ayaa pu tihua'utaihua'uri'i. 31Aj mu mi meyan tiraata'ixaa ɨ maj jamuan á'ujhua'anya'a. Meyan tɨcɨn: ―Muaa pa hua'aseij ɨ tyaɨte maj a'acata. ¿A'ini een cɨn peyan tyu'utaihuau?, yee: “¿A'ataani na'ajtamuare?” ―Yaa mu tiraata'ixaa. 32Ma ajta'i aɨn Jesús, aɨ pu hua'useirajye'icaa matɨj mana'a a titya'antavaatɨma'aca. Ayaa pu aɨn rɨjcaa ta'aj raaseij a'atɨ tɨ ra'ajtamuárej. 33Aj pu i aɨn ɨ jɨita'a, tyamua'a tyu'utatzɨn. Tyamua'a pu tyújvivaaca'a ɨ rutzajta'a a'ini rú'umua'areeracaa ti'itɨ tɨ a'ij huáruu. Aj pu i ajtyáxɨɨraca'a a'u tɨ a'ij een aɨjna ɨ Jesús. Titunutaca'a a vejli'i ɨ jemin. Tɨ'ɨqui nain raata'ixaa a'ij tɨ ti'itɨ raaruu tzaahuati'ira'a cɨme'e. 34Aj pu i Jesús ayan tiraata'ixaa tɨcɨn: ―Niyauj, petya'antzaahua nyej timuaahuaate'enche'e. Aɨj paj cɨn peri huaruj. Aricu, rɨ'ɨ pej tya'amua'astɨ́. Pauche'e paj reenya'a pua'ame. 35Auche'e pu ti'ixáataca aɨjna matɨ'ɨj seica a'ará'a. Ai mu aɨn pueen ɨ mej e'eche jamuan ɨ tɨ va'acan cɨn ti'itejvee hua'ateyujta'a. Aj mu mi meyan tiraata'ixaa ɨ ya'upuaara'an ɨ tyamueij tɨ ti'icu'i. Meyan tɨcɨn: ―Pu'uri huamɨ'ɨ a'ayauj. ¿A'ini een cɨn para'ɨtziite'e mɨ maeestru? ―Yaa mu tyu'utaxajtaca'a. 36Ma ajta'i aɨn Jesús, capu hua'antzaahua a'ij mej ye'i tí'ixajtacaa. Ayaa pu tiraata'ixaa ɨ ya'upuaara'an tɨcɨn: ―Capej ti'itzɨɨnya'a. Ai pu'u ruxe'eve'e pej tya'atzaahuatya'a. ―Yaa pu tiraata'ixaa ɨ Jesús. Aj pu i huaja'uvi'itɨ a'u tɨ e'eche ɨ ya'upuaara'an. 37Aru Jesús capu hua'uta'a naijmi'ica ɨ tyaɨte mej a'uju'un jamuan. Aɨmej pu'u, ɨ Pedro, ajta ɨ Jacobo, ajta aɨjna ɨ Juan, tɨ i'i juutzajra'an ɨ Jacobo. 38Aa mu a'ará'a a'u tɨ e'eche ɨ ya'upuaara'an ɨ tɨ huamɨ'ɨ. Aj mu mi hua'useij ɨ tyaɨte maj chi'ita huiraati. Eihua mu u'utaujyeinijma'a. Maujyeinyaca'a. Ca'anin mu cɨn u'utaujyeinijma'a maɨjna cɨme'e ɨ tɨ huamɨ'ɨ. 39Aj pu'i chi'ita utyajrupi. Tɨ'ɨqui hua'uta'ixaa ɨ Jesús. Ayan tɨcɨn: ―¿A'ini sej si ca'anin cɨn ijhua? ¿A'ini sej si ruyein? Capu mɨ'ɨchi mɨ tyamueij, silu cutzu pu'u. 40Matɨ'ɨj raanamuajri'i a'ij tɨ ye'i tyu'utaxajtaca'a, aj mu mi ra'utaxaahuari'iri'i a'ini májmua'areeraca'a tɨ aɨn pa'arɨ'ɨ huamɨ'ɨ. Aj pu'i aɨn hua'utaij maj huiracɨɨnye. Aj mu mi huiiraacɨ. Tɨ'ɨqui ya'uvi'itɨ ɨ ya'upuaara'an, ajta ɨ naanajra'an, ajta aɨmej ɨ mej á'ujhua'anya'a jamuan. Au mu utyajrupi a'u tɨ aucá'a ɨ tyamueij. 41Aj pu'i rajví'i muajca'ara'ara'an jetze. Ayaa pu tiraatajee runyuuca cɨme'e tɨcɨn: ―Taliita, cuumi. ―Taliita, cuumi, ayaa pu huataujmua'a tɨcɨn: Tyamueij, ayaa nu ti'imue'ixaate'e, ájchesi. 42Cɨme'en pu'u ayan huarɨj ɨ Jesús, aj pu i xaa ájche ɨ tyamueij. Tɨ'ɨqui autyejche tɨ a á'ucha'acanye'en. Majta maɨn ɨ tyaɨte, eecan mu u huataujtzaahua. Ajta aɨn ɨ pa'arɨ'ɨ, ayaa pu rájchaɨca'a a'achu cumu tamuaamuata'a ninye'ira'a japuan hua'apua. 43Ajta aɨn Jesús, eihua pu huéijca maj cai a'atɨj ixaatya'a, ajta maj nu'u tiraamín ɨ tyamueij.

will be added

X\