San Marcos 2

1Tyauma'aca hua'apua xɨcaj, hueica xɨcaj, ajtahua'a pu aɨn Jesús u'utyajrupi u Capernaum. Matɨ'ɨj mi raamua'areeri'i ɨ tyaɨte tɨcɨn: “U pu nu'u a'ahua'a e'irajca ruche.” 2Aj mu mi ca'anacan tyujsaɨj eihua tyaɨte, matɨj mana'a cai che'e titya'uve u chi'ita. Camu majta á'avejricaa ta'apueerta. Ajta aɨn ɨ Jesús, u pu anu'uhuatyavaa u chi'ita. Aɨ pu tihue'ixaatya'acaa a'ij tɨ ti'ijxe'eve'e ɨ Dioj. 3Aj mu mi a'atɨ a'ure'enyejte ɨ Jesús jemi saɨj tɨ ti'icu'i. Cɨyaaxara'acaa nainjapua ɨ a'atɨ. Mamuaacua mu ráachuisima'a. 4Aru capu huatarɨ'ɨristaraca'a maj ru'utyarujte'en u tete'e a'utɨ Jesús anu'ujvee, a'ini tyamua'a mu tí'ityamui'icaa ɨ tyaɨte. Aɨj mu cɨn, anticɨɨnya ánɨmɨ chi'i japua, matɨ'ɨj mi ra'anaacu ɨ chi'i japua. Aj mu mi ru'ucajtuaa ɨ tɨ ti'icu'i a'utɨ anu'uhuatyávaaca'a ɨ Jesús. 5Aj pu'i hua'useij, ajta ayan tyu'umuá'a tɨcɨn metya'atzaahuate'e, micu. Aɨj pu cɨn ayan tiraata'ixaa ɨ tɨ ti'icu'i tɨcɨn: ―Niyauj, pu'uri hui timuaatauuni'iri'i ɨ Dioj ɨ paj cɨn autyajturaa ɨ jemin. 6- 7Meenti a vejli'i seica maun e'iráuu ɨ mej te'eyu'uxaca ɨ ruye'ira cɨme'e. Matɨ'ɨj maɨjna huanamuajri'i a'ij tɨ tyu'utaxajtaca'a ɨ Jesús, matɨ'ɨj mi meyan tyu'umuá'a ɨ rutzajta'a tɨcɨn: “¿A'iqui een cɨn ayan ti'ixa amɨjna mɨ tevi? A'ij pu pua'a xaa nya'u ti'ixa. Capu aɨjna cɨn antyujmua'aree amɨjna tɨ seij tyu'utauuni'i ɨ tɨ cɨn autyajturaa ɨ Dioj jemi. Aɨ pu'u ɨ Dioj antyujmua'aree tɨ ayan seij tyu'utauuni'i. Yaa mu tya'umua'atzɨjca'a aɨme ɨ mej te'eyu'uxaca ɨ ruye'ira cɨme'e.” 8Ajta aɨn Jesús, aɨ pu rutzajta'a rú'umua'areeracaa a'ij mej ye'i ti'imua'atzɨjca'a ɨ rutzajta'a. Tɨ'ɨj i ayan tihua'utaihua'uri'i tɨcɨn: ―¿A'ini een cɨn seyan tya'umua'atze ɨ rutzajta'a? 9¿Ti'itajni cai muare'eri, ni qui nyej neyan tiraata'ixaate'en ɨ tɨ cɨyaaxara'a yee: “Pu'uri timuaatauuni'iri'i ɨ paj cɨn autyajturaa ɨ Dioj jemi”, na'ari yee: “Ajchesi, pata'aj ra'anchueni mɨ utaatzi. Pajta yee a'ura'ani”? 10- 11Ayaa nu xaa nya'u rɨni sata'aj raamua'aree, i nyej nyajta tyaata'a jetze a'iráanye, nyajta nu nyaɨjna cɨn antinmua'aree iiyan chaanaca japua nyej ni tihua'atauuni'i ɨ maj cɨn ata'ɨtza'ara ɨ Dioj jemi. ―Yaa pu tihua'uta'ixaa ɨ Jesús. Aj pu'i ayan tiraata'ixaa ɨ tɨ cɨyaaxara'a tɨcɨn: ―Ayaa nu ti'imue'ixaate'e. Ajchesi, pajta ra'anchueni mɨ utaatzi. Aricu a'u paj e'eche. 12Ajta e'eyan aɨn tɨ ti'icui'ica'a, aɨ pu ajchá. Ra'ajchuá ɨ ru'utaatzi. Tɨ'ɨj i á'uraa, meti'iseiraca ɨ tyaɨte. Aɨj mu cɨn naimi'i a'ij tya'utaseij. Rɨ'ɨ mu tiraata'a ɨ Dioj. Meyan tɨcɨn: ―Catu a'anaj ti'itɨj huaseij tyatɨj ijii. ―Yaa mu tyu'utaxajtaca'a ɨ tyaɨte. 13Tɨ'ɨqui ajtahua'a Jesús aun a'umej a'u tɨ a'avastɨme ɨ jaj. Aa mu a'ure'enineica'a naimi'i ɨ tyaɨte jemin ɨ Jesús. Ajta aɨn Jesús, aɨ pu hué'ixaatya'acaa ɨ nyuucari tɨ cɨn Dioj hue'irajtuaani. 14Aj pu'i ayée a'ure'ene. Tɨ'ɨqui aun ɨ Leví huaseij, ɨ tɨ i'i yaujra'an aɨjna ɨ Alfeo. Au pu unú'ujcatii chi'ita maj tzajta'an tíiteji'ivi ɨ mej ti'itɨ'ɨcɨca. Aj pu'i Jesús ayan tiraata'ixaa tɨcɨn: ―Pata'aj nya jamuan a'ujcha'acanye'en. Aj pu'i aɨn ajche ɨ Leví. Tɨ'ɨqui a'umej jamuan. 15Tɨ'ɨqui ayan tyuju'urɨj matɨ'ɨj a'ará'a ɨ Leví tɨ e'eche. Jesús pu aɨme jamuan ti'icua'aca'a ɨ maj a'ij pua'a ti'ityetyaɨte. Aɨ mu aɨn pɨrɨcɨ ɨ mej hua'ajijve ɨ mej ti'itɨ'ɨcɨca, majta ɨ maj cai xa'apɨ'ɨn rɨjca. Aɨ mu ti'icua'aca'a meesa japua jamuan ɨ Jesús, majta seica ɨ maj jamuan á'ujhua'anya'a. Naijmi'i mu ti'icua'aca'a a'ini mamui'icáa ɨ maj á'ujhua'anya'a ɨ Jesús jamuan. 16Meenti seica a'a vejli'i ma'acɨɨnyaca'a. Aɨme mu aɨn pueen ɨ mej tyu'ujmua'ate ɨ tɨ tyu'uxajtaca'a ɨ Moisés tyaacan. Eihua mu nu'u raxe'eve'e ɨ ruye'ira. Ayaa mu antya'aruu aɨme tɨcɨn fariseo. Aɨ mu meyan tyu'useij a'atyaɨn maj jamuan ti'icua'aca'a ɨ Jesús. Aj mu mi meyan aɨme tyu'uta'ixaa ɨ maj jamuan á'ujhua'anya'a tɨcɨn: ―¿A'ini een cɨn aɨn a'amua maestru ti'icua'aca, ajta ya'aca aɨme jamuan ɨ maj tí'iteji'ivi, ajta aɨme jamuan ɨ maj cai xa'apɨ'ɨn rɨcɨ? ―Ayaa mu tyu'utaxajtaca'a aɨme ɨ mej tyu'ujmua'ate yu'uxarira'an jetze ɨ Moisés, aɨme ɨ mej hua'a jetze ajtyama'acantaca'a ɨ fariseo. 17Tɨ'ɨj aɨn hua'unamuajri'i ɨ Jesús, ayaa pu tyu'utaxajtaca'a tɨcɨn: ―Ayaa nu tyaja'amue'ixaate'e. Ayaa pu tí'een aɨjna cɨme'e ɨ tyaɨte ɨ mej maun a'uré'eninyei jemin ɨ mej ya'anaca. Capu ruxe'eve'e maj maɨn a'uré'eninyeica'an ɨ jemin aɨme ɨ mej re'en, silu aɨ mu xaa a'uré'eninyei ɨ tɨ ya'anaca jemi ɨ mej ti'icucui'i. Ayaa pu che'eta na'a een inyeetzi jemi. Canu nyaɨjna cɨn yeve'eme nyej nyaɨme huata'inyen ɨ mej meyan ruseijrata yee maj xa'apɨ'ɨn rɨcɨ, silu aɨmej nu jemi yeve'eme ɨ maj meyan ru'umua'aree ɨ rutzajta'a maj cai xa'apɨ'ɨn rɨcɨ. 18Tɨ'ɨqui ayan tyuju'urɨj. Aɨ mu rú'itzi'iva'acaa ɨ maj Juan jamuan á'ujhua'anya'a, majta ɨ fariseo. Matɨ'ɨj mi seica e'ire'enye ɨ Jesús jemi. Ayaa mu tiraataihua'uri'i tɨcɨn: ―¿A'ini een cɨn mauritzi'ivi ɨ maj Juan jamuan á'ujhua'an, majta aɨme ɨ fariseo? Ma majta, ɨ mej mueetzi jamuan á'ujhua'an, camu meyan rɨcɨ. ―Yaa mu tiraata'ixaa. 19Aj pu'i Jesús ayan tihua'uta'ixaa tɨcɨn: ―Tɨ pua'a a'atɨ huatyenyaɨche, aj pu'i ru'amiincustyamua'a huata'inyeesin mej mi tyu'uyesten. Aj pu'i aɨn tihua'amin. ¿Ni qui í'irɨni maj ru'itzi'iva'a tɨ pua'a hua'a jamuan auj ti'iyestya'a ɨ a'atɨ? Capu xaa nya'u. 20Aru ee, aj pu tyaja'ure'enyejsin ɨ xɨcaj ɨ maj jetzen ra'avi'itɨn ɨ a'atɨ. Aj mu xaa maɨn amiincustyamua'ame'en ru'itzi'ive'en a'ini capu che'e hua'a jamuan a'utejvee ɨ hua'amiincu. A'ini'i inyaa, nyauche'e nu ye huatyejvee, camu ru'itzi'ive'en ɨ nya'amiincustyamua'a. 21’Niche'e seij amuaata'ixaate'en ɨ nyuucari. Tɨ pua'a a'atɨ aɨjna cɨn ti'ihuaujcu'une'epe'en ɨ cɨɨxuri tɨ mi'ima'acan, capu ayan aɨjna cɨn tyu'ujcu'unye'epe'en cɨɨxuri cɨme'e tɨ cai xɨ a'ana á'usini'i. Huatyatzu'uta aɨjna ɨ cɨɨxuri tɨ jajcua tɨ'ɨj huatyaja'usini'ihua. Tɨ'ɨj i raatyasujtza'ana ɨ tɨ mi'ima'acan. Aj pu'i aɨjna tɨ anásujtza'ani, eitze'e pu i va'atɨ anasuutza'ani a'ame. 22Ajta, capu ti'itɨ vaɨre'e tɨ pua'a a'atɨ ru'ucajtu'aani navij limeetajra'a tzajta'a tɨ racue'iríihuajmee nahuaj ɨ maj mauchan raataahuaca'a. Tɨ pua'a meyan raaruuren aɨjna ɨ nahuaj tɨ jajcua aɨ pu ra'anasujtza'ana ɨ navij tɨ racue'iríihuajmee. Tɨ'ɨqui a'uvaɨjtzi ɨ navij, ajta ɨ nahuaj. Aɨj pu cɨn ayan tyu'ujxe'eve'e tɨ ru'ucajtu'aani ɨ navij tzajta'a tɨ jajcua aɨjna ɨ nahuaj tɨ ajta jajcua. 23Tɨ'ɨqui ayan tyuju'urɨj. Ajna xɨcajra'an jetze maj rusa'upihua'a, au pu auma'aca e'ita'a ɨ vi'ira'a japua ɨ Jesús. Majta maɨn ɨ maj jamuan á'ujhua'anya'a, aɨme mu autyajhuii maj ru'ijtzaanaxɨ'ɨn ti'itɨ taujri atze'e a'ini eihua mu tajcuca'a. Au mu a'atajú'unca'a maru'ijtzá'ana. 24Majta maɨn ɨ fariseo, matɨ'ɨj hua'useij maj meyan rɨjcaa, aj mu mi meyan tiraata'ixaa ɨ Jesús. Meyan tɨcɨn: ―Casi'i, ¿a'ini een cɨn meyan rɨcɨ aɨme ɨ mej mueetzi jamuan á'ujhua'an? Capu a'ij ti'irɨ'ɨri tɨ a'atɨ ayan rɨjca ajna ɨ xɨcajra'an jetze mej jetzen rusa'upi. 25Aj pu'i hua'uta'ixaa ɨ Jesús. Ayan tɨcɨn: ―Niche'e a'atzu tyajamue'ixaate'en. ¿Ni sacai muan a'anaj ra'ujijve ɨ yu'uxari jetze a'ij tɨ ye'i huarɨj ɨ David tyaacan tɨ'ɨj huata'icuataca'a, majta ɨ maj jamuan á'ujhua'anya'a? 26Tɨ'ɨj nu'u ti'ityavaaca'a ɨ Abiatar tyaacan aɨjna cɨme'e tɨ tihue'ijte'e ɨ mej ti'ivaɨra'acaa teyujta'a, au pu utyajrupi ɨ David. Ajta aɨn ɨ pan ɨ maj Dioj huatamuaɨ'ɨvejte u teyujta'a, aɨ mu'u nu'u racua'aca ɨ mej ti'ivaɨre'e aujna teyujta'a. Capu maa a'atɨ racua'aca. Ma ajta aɨn ɨ David, aɨ pu cai teyujta'a ti'ivaɨra'acaa. Capu a'ij ti'itɨ huarɨj. Aɨ pu nu'u raacuaa aɨjna ɨ pan ɨ maj Dioj huatamuaɨ'ɨvejte. Ajta tihua'umí ɨ maj jamuan á'ujhua'anya'a. Capu a'atzu autyajturaa ɨ David tyaacan ɨ Dioj jemi. ―Ayaa pu tihua'uta'ixaa ɨ Jesús. 27Ajta Jesús ayan tihua'uta'ixaa. Ayan tɨcɨn: ―Ajna xɨcajra'an jetze ɨ mej jetzen rusa'upi, ayaa pu Dioj tiraaxa'apɨ'ɨntare ta'aj hua'utavaɨre'en ɨ tyaɨte. Capu ayaa na'a tiraaxa'apɨ'ɨntarej ɨ Dioj mej mi aráurasten mana'a ajna xɨcajra'an ɨ mej jetzen rusa'upi. 28Aɨj nu cɨn, inyaa i nyaj nyajta tyaata'a jetze a'iraanye, ayaa nu een cɨn antinmua'aree nyajta nyajna xɨcajra'an jetze matɨ'ɨj rusa'upi.

will be added

X\