San Marcos 13

1Matɨ'ɨj mi huiiraacɨ aujna teyujta'a. Pu'uri huirama'aca aɨjna ɨ Jesús, tɨ'ɨqui saɨj tɨ jamuan á'ucha'acanya'a ayan tiraata'ixaa tɨcɨn: ―Maeestru, casi'i. Huaseij. Tyamua'a pu ti'ivivejme mɨ tetej tɨ ticaitɨmee iiyaj jaxu'u jetze. Ajta mɨ chi'i, naa pu een. 2Aj pu i ayan tyu'utanyúu aɨjna ɨ Jesús tɨcɨn: ―Casi'i, muan. Xaaseij. Naijmi'i tɨ vivejmá'a huavaatɨmee ɨ chi'i, nain pu huatyauuni'ihua'a tɨ are'evee ɨ chi'i. Capu che'e seira'a a'ame ɨ jaxu'u jetze ɨ tetej tɨ rujapua ticaitɨmee. 3Matɨ'ɨj mi a'ucɨj. Aun mu a'ará'a ajna teyuu tɨ é'ijnyee jɨri jetze tɨ ayan tyaja'arajtyahuaa tɨcɨn Aceituunajremi. Tɨ'ɨqui a a'ujyeijxɨ aɨjna ɨ Jesús, majta seica, aɨjna ɨ Pedro, ajta ɨ Jacobo, ajta ɨ Juan, ajta ɨ Andrés. Ai mu aviitzi cɨn meyan tirajhuaviiri'i tɨcɨn: 4―Pata'aj titaata'ixaate'en a'anaj tɨ ayan ti'irɨni. ¿Ti'itajni a'ij ti'iseijre'en tɨ'ɨj ajna pɨ tyaja'ure'enyen tɨ tya'ara'asten nain patɨj peri tyu'utaxajtaca'a? 5Aj pu i Jesús ayan tihua'uta'ixaa tɨcɨn: ―Rɨ'ɨ xu'u muan, tɨ'ij cai a'atɨ amuaacuanamuan. 6Ayaa nu tyaja'amue'ixaate'e. Mui'itɨ mu huataseijre'esin maj nyenyuuca cɨme'e ti'ixaata mua'aju'un. Meyan tɨcɨn: “Nyaa nu Cɨriistu'u pueen.” Eihua mu hua'acuanamuan ɨ tyaɨte. 7’Tɨ pua'a seri seyan tinamuaara maj nu'u nya'use'en a a'ahua'a, na'ari maj nu'u meri tɨmua'a autyahuijsin mej nya'use'en, caxu ti'itzɨɨnya'a. Capu amɨn a'ij. Ayaa pu tyu'ujxe'eve'e tɨ ayan tyaja'ure'enyen. Caxɨɨ pu ajna tyaja'ure'enyejsin ajna xɨcajra'a jetze tɨ jetzen tya'ara'asti nain cɨme'e. 8’Ayaa pu te'eme. Seica mu tyaɨtejra'a, majta seica tyaɨtejra'a, aɨ mu naijmi'i huataujnya'usi'ite'esin. Majta ɨ mej seica chuejra'a japua a'uchaatɨme, majta maj seij chuejra'a japua a'uchaatɨme, aɨ mu naijmi'i huataujnya'usi'ite'esin. Ajta huataujca'atzɨjxɨ'ɨsin ɨ chuej pua'amuaque iiyan chaanaca japua. Mui'itɨ mu majta huatatájcu. Ai pu aɨn pueen ɨ ta'anajca ɨ maj cɨn rajpueitzi mua'aju'un. 9’Sahua'uchaɨn muan, a'ini majamuá'avi'itɨn hua'a jemi ɨ mej ti'ijta. Majta teyujta'a mu amua'atyávajxɨ'ɨsin. Majamuaatajeevi sej si tyu'uxáj jamuan ɨ tajtuhuan, sajta jamuan ɨ rey. Majamuaatajeevi maɨjna cɨme'e ɨ nyenyuucajtze'e inyeetzi. Ayaa mu maɨjna cɨn rɨni, muan xu nyeetzi jetze ma'acan tihua'uta'ixaate'esin. 10Anacai, ai pu ruxe'eve'e sej tihua'uta'ixaate'en nainjapua ɨ chuejra'a a'ij tɨ een cɨn Dioj tihua'utauuni'ira. Ayaa xu saɨjna cɨn huarɨn, aj pu xaa te'entipua'ari nain. 11’Tɨ pua'a seica maj amua'anvi'itɨn aɨmej jemi ɨ mej ti'ita'ijte'e, caxu seyan ti'imuajca a'ij sej ye'i tihua'uta'ixaate'esin. Ayaa xu'u huarɨni ajna xɨcajra'a jetze. Aɨjna ɨ xaijnyu'ucara'ara'an ɨ Dioj, aɨ pu amuaata'asin a'ij sej ye'i tyu'utaxaj. Aɨj pu cɨn, a'ij tɨ tyajamuaatamityejte'esin, aɨj xu'u hua'uta'ixaate'en. Ai pu aɨn pueen tɨ ti'ixa aɨjna ɨ xaijnyu'ucara'ara'an ɨ Dioj. 12Ayaa pu ajta te'eme ajna xɨcajra'a jetze. Seica mu rujuutzimua'a á'avi'itɨn aɨme jemi ɨ mej ti'ijta mej mi hua'ucui'ini. Ayaa mu che'eta mana'a hua'aruuren ɨ ruja'atzimuá. Majta seica ayan che'eta mana'a hua'aruuren ɨ ruyaujmua'a. Majta maɨn yaujmua'ame'en, aɨ mu hua'utyenya'usi'ite'esin ɨ ruvaujsimua'a. Aɨ mu majta tyu'uta'asin mej seica hua'ucui'ini. 13Naijmi'i ɨ tyaɨte, muejmi jemi camu a'amuaxe'eva'a mua'aju'un aɨjna cɨme'e saj inyeetzi jetze ajtyama'acan, aɨ mu naimi'i amuajchaɨɨra'a mua'aju'un. Ajta aɨn ɨ a'atɨ tɨ ayan tya'utaviicue'i asta cai huamɨ'ɨni, Dioj pu ra'ancure'evi'itɨ ajna tɨ tyeje'ijta. 14’Ajna xɨcajra'a jetze ti'itɨj xu seijran tɨ a'ij pua'a een, tɨ xana'avi'ire'e, tɨ tzɨɨni'ire'e. Au mu raatyechajtza a'u tɨ cai ayan tiraavijte'e. (Aɨ pu yau'eitaa a'ame tɨ ra'ajijve'en aijna jetze i yu'uxari.) ’Satɨ'ɨj raseijran, ayaa xu huarɨni. Aɨme ɨ maj Judea huachaatɨme, miche'e maɨn a'ucɨ́jxɨ'ɨn ca'anacan a'u tɨ á'ujɨrime. 15Tɨ pua'a ajna xɨcajra'a jetze, a'atɨ an a'ujcatii ɨ ruchi'i japua ta'ava'anami'i, che'e aɨn ca'anacan acajra'ani. Ajta cai ayan rɨjca, tɨ ti'itɨj huirá'avacare'en u ruchi'ita. 16Na'ari tɨ pua'a saɨj tyaja'amuare'e ɨ ruvi'ira'ata'a, che'e cai a'uré'eninyeica'an ɨ ruche tɨ'ij rucɨɨxu huiraapin. 17’Cui'i xaa aɨme, ɨ maj rajpueitzi mua'aju'un ajna xɨcajra'a jetze aɨme ɨ juuca ɨ maj a'utájucájme, majta aɨme ɨ maj hua'atzi'ite ɨ ruyaujmua'a. 18Muan xu seyan ti'ihuaviira ɨ Dioj tɨ'ij cai ayan ajna tyaja'ure'enyen tɨ'ɨj huáseevi'in. 19’Ayaa nu tyaja'amue'ixaate'e tɨ ayan te'eme ajna xɨcajra'a jetze. Eitze'e mu rajpueitzi mua'aju'un macai ɨ mej meri rajpueitzi mua'araa tɨ yu e'ire'enye. Capu ajta che'e ayan tyaja'ure'enyejsin seij xɨcajra'a jetze tɨj ajna. 20Ajta tɨ pua'a aɨn tavastara'a cai aɨn ayan raruuren tɨ'ij cai che'e ayan a'ateevi'in tɨ tyaume'en a'achu pua'an xɨcaj, capu a'atɨ ruuri a'ame'enche'e. Ma ajta, hua'a cɨme'en ɨ tyaɨte tɨ Dioj ari hua'antihuau ɨ jajcua ɨmɨ, aɨ pu ari ayan raruure tɨ'ij cai che'e ayan a'ateevi'in. 21’Ayaa nu tyaja'amue'ixaate'e, ajna xɨcajra'a jetze, ayaa pu te'eme. A'atɨ pu ayan tyajamuaata'ixaate'esin yee: “Casi'i, iiya pu e'ita'a een aɨjna ɨ Cɨriistu'u”, na'ari saɨj ayan yee: “A'acui, aa pu e'ita'a een.” Tɨ pua'a meyan tyajamuaata'ixaate'en ajna xɨcajra'a jetze, caxu ra'atzaahuatya'a. 22Seica mu ya uve'enyejsin ɨ mej ti'ihue'itaca. Meyan tɨcɨn: “Nyaa nu nyaɨn pueen ɨ Cɨriistu'u.” Majta seica meyan tɨcɨn: “Neti'ityejvee nyaɨjna cɨme'e nyuucajtze'en ɨ Dioj.” Ai mu ha'utaseijrate'esin ɨ tyaɨte a'ij mej ye'i ti'itɨj tyu'uyɨ'ɨtɨ mej mi hua'ucuanamuan, tɨ pua'a huatarɨ'ɨristare maj hua'ucuanamuan ɨ tyaɨte tɨ Dioj ari hua'antihuau rusaɨj. 23Aru, xaanamuajri'i tyamua'a naa. Caxu xaa nya'u yá'uhua'anan nyej anacai nyeri amue'ixaa nain cɨme'e. 24’Ajta hui ajna xɨcajra'a jetze, ajna maj rajpueitzi mua'aju'un, capu che'e airáxɨri ɨ xɨcaj. Ajta ɨ maxcɨra'i cɨme'e, capu che'e ajta huanyeeri'icɨj a'ame. 25Majta ɨ maj tatatzavi'i ɨ tajapua, aɨ mu huataujca'atzɨjsin. Aj mu mi cávatzɨjxɨ'ɨsin ɨ xu'ura'ave aujna ɨ tajapua. 26Aj xu xaa si nyeseiran inyeetzi, i nyej nyajta jetzen airaanye ɨ tyaata'a. Yá nu va'acányejsin jaitɨri tzajta'a. Naa pu tyamua'a tyu'unyéeri'icɨj a'ame. Nain nu cɨn antinmua'aréera na'ame ajna xɨcajra'a jetze. 27’Matɨ'ɨj mi hua'are'itixɨ'ɨsin ɨ mej nyavaɨre'e mej mi hua'ajsaɨre'en naijmi'ica ɨ tyaɨte tɨ Dioj ari hua'antíhuau ɨ jajcua ɨmɨ. A'u tɨ na'a mu hua'ura'asaɨre'esin iiyan chaanaca japua a'u maj a'ucaitɨme ɨ tyaɨte. 28’Sej si eitze'e yau'eitaa xa'ara'ani a'ij nyej tyaja'amue'ixaate'e. Aij xu jetze huáurityejte'en ɨ pi'ista aɨjna ɨ huarej. Tɨ'ɨj antícua'atíjme'eni ánɨmɨ tɨ antipístáre'ejmee, ajta tɨ'ɨj ajtaxámue'itaxɨ'ɨn, ayaa xu eenye'eque'en ramua'areeran tɨ ari vejli'i ɨ viita'ari. 29Ayaa pu che'eta na'a ti'iseijran tɨ ari pɨ ti'irɨcɨ a'ij nyej nyauchan tyajamue'ixaa. Ayaa xu eenye'eque'en ramua'areeran tɨ ari vejli'i ajna xɨcajra'a jetze tɨ jetzen te'entipua'ari naijmi'i. Pu'uri xaa nya'u vejli'i tɨmua'a. 30’Ayej xaa nya'u ti'ayajna, ayaa nu tyaja'amue'ixaate'e ɨ maj mauj ruuri ɨ tyaɨte mej iiyan seijre'e chaanaca japua, aɨ mu cai cui'ini hasta cai naijmi'i ayan tyu'urɨni. 31Naijmi'i pu te'entipua'ari eijna i chaanaca japua, ajta ɨ tajapua. Ma ajta, auche'e tya'araurastejsin aijna i nyej nyeri tyajamue'ixaa. 32’Cɨme'en ajna xɨcajra'a tɨ jetzen te'entipua'ari naijmi'i, capu a'atɨ ramua'aree a'anaj tɨ ayan te'eme. Capu ajta a'atɨ ramua'aree a'atzaj tɨ pua'a ayan te'eme. Aɨme ɨ mej ti'ivaɨre'e u tajapua, camu majta ramua'aree. Nyajta inyaa, i nyej i'iyaujra'an ɨ Dioj, canu nyajta ramua'aree. Aɨ pu'u ramua'aree ɨ niya'upua ɨ Dioj. 33’Muan, caxu sajta ramua'aree a'anaj tɨ ajna tyaja'ure'enyejsin. Aɨj nu cɨn neyan tyaja'amue'ixaate'e. Rɨ'ɨ xu'u huaujruuren muan. Sauche'e xu atanyéjnye'eri. Sajta nyejchú'eva'a. 34’A'atɨ tɨ huatyapuasaaruve'en a a'ahua'a ɨmɨ. Anacai pu ruchi'i hue'ijcate'en ɨ mej ti'imɨjhuaca aujna chi'ita. Aɨ pu hue'ijcatye'e seij ajta seij mej tyu'umuare'en ti'itɨj tɨ saɨj huayɨ'ɨtɨ. Ajta saɨj pu ti'ijcate'en aɨjna cɨme'e tɨ tí'ichaɨca'a a ta'apueerta. 35Ayaa nu che'eta nyana'a tyaja'amueijcate'e muejmi, sata'aj atanyéjnye'eri a'ini caxu ramua'aree a'anaj nyaj uve'enyejsin, inyaa ye nyaj i'ichej. Capu a'ij ámuaatámityejte'esin a'anaj nyaj uve'enyejsin, tɨ pua'a huatyechuíxaren, na'ari tɨ e'ita'a tɨca'a nusu matɨ'ɨj huajijhuan ɨ tyacuaara'isi, na'ari a'atzaa tapua'arijma'aca. 36Tɨ pua'a ca'anacan nu'uvé'enyen, caxu taura'acare'en nyaj amuáatyauni sacu'utzúca'a. 37Aijna i nyaj á'amue'ixaate'e, aij nu nyajta hue'ixaate'e naijmi'ica ɨ seica neyan tɨcɨn: Sáuche'e xu atanyéjnye'eri. ―Ayaa pu tihua'uta'ixaa aɨjna ɨ Jesús.

will be added

X\