San Marcos 11

1Matɨ'ɨj meri vejli'i anna antyenyéesima'acaa u Jerusalén, au mu a'atanyéj a'u tɨ chajta'atajme tɨ ayan tyaja'arajtyahuaa tɨcɨn Betfagé, ajta Betania. Au pu a'achajta'a jɨri jetze tɨ ayan tyaja'arajtyahuaa tɨcɨn Aceituunajremi. Tɨ'ɨqui Jesús hua'apuaca huataityaca'a. 2Ayan tɨcɨn: ―Sericu, sata'aj saun a'atanyén ajna vejli'i chajta'a tɨ e'eseijre'e. Tɨ pua'a seri ara'asti, au xu puuru'u e'etyauni tɨ cai xɨ a'anaj a'atɨ japuan ava'aca. Au pu a'ijtápi'ihuá a'ame. Sata'aj rá'ijxɨjta, sajta mu ya'aráajan. 3Tɨ pua'a a'atɨ ayan tyajamuaataihua'u yee: “¿A'ini een cɨn sara'ixɨjta mɨ puuru'u?”, ayaa xu tiraata'ixaate'en yee: “Aɨ pu ra'ucupadu ɨ tavastara'a”, sajta seyan tiraata'ixaate'en yee: “Sajtahua'a xu ca'anacan saraatatuire'esin ɨ tɨ racɨi.” 4Matɨ'ɨj mi u á'uju'un. A mu pua'aque caaye jetze yá'utyau maɨjna ɨ puuru'u. Au pu a'ijtapi'ihuaca'a pueerta jetze. Matɨ'ɨj mi ra'ijxɨjtaca'a. 5Seica mu maun a'utyáuuca'a aujna. Aɨ mu tihua'utaihua'uri'i tɨcɨn: ―¿Ti'itajni a'ij saruure? ¿A'ini een cɨn sara'ixɨjta mɨ puuru'u? 6Ayaa mu tihua'uta'ixaa a'ij tɨ ye'i Jesús tihua'uta'ixaa. Majta maɨn ɨ seica, aɨ mu hua'uta'a maj ra'anján. 7Matɨ'ɨj mi ya'ujáj ɨ Jesús jemi aɨjna ɨ puuru'u. Mara'ityé'itarite rucɨɨxu cɨme'e. Tɨ'ɨqui ave'eyeijxɨ ɨ Jesús ɨ puuru'u japua. 8Majta maɨn ɨ tyaɨte, eihua mu cɨɨxuri te'epíitɨraa juye jetze. Majta seica pi'ista te'entivéichixɨ'ɨ, aɨj mu majta a'apíitɨraa ajna juye jetze. 9Majta maɨn maj anáatyá'a muaju'ucaa, aɨ mu autyajhuii mej huajijhua, majta maɨn ɨ maj huaju'uca'a cujta'an aɨjna ɨ Jesús. Yaa mu ti'ijíjhuaca'a tɨcɨn: ―Pu'uri i'i xa'apɨ'ɨn. Che'e Dioj raave'esi aijna tɨ yeve'eme nyuucajtze'en ɨ tavastara'a. 10Pu'uri i'i xa'apɨ'ɨn. Che'e Dioj raave'esi tyamua'a naa, aijna tɨ a yeve'eme tɨ'ij tyu'utaijta tɨj ajmi'i tyu'utaijtaca'a ɨ tahuaacɨxa'a, aɨjna ɨ David tyaacan. Ajta hui maɨn ɨ maj ti'ivaɨre'e u tajapua, miche'e meyan tiraataxaj yee tyamua'a pu i'ixa'apɨ'ɨn. ―Yaa mu mi tyu'utaxajtaca'a, aujna caaye jetze. 11Tɨ'ɨj i Jesús utyajrupi anna Jerusalén. Ajta e'eyan a'utyajrupi aujna teyujta'a. Tɨ'ɨj tyu'useij nainjapua, tɨ'ɨqui á'uraa, majta ɨ maj tamuaamuata'a japuan hua'apua ara'ase. Pu'uri tyechuiixarijma'aca, matɨ'ɨj mi maun a'ará'a ajna Betania. 12Yaa ruijmua'a yee majta u a'araacɨ aujna Betania. Pu'uri i'icuataca'a aɨjna ɨ Jesús. 13Tɨ'ɨj ii aɨn huarej pi'ista huaseij tɨ a'ɨmɨ a'atávaaca'a. Eihua pu tyaxamue'i. Tɨ'ɨqui u á'umej tɨ'ij raaseij tɨ pua'a taca'a. Ma ajta'i cai, capu taca'acaa. Aɨ pu'u, xamue'ira'an seijracaa a'ini capu ajna pɨti'irɨjcaa tɨj pua'a taaca. 14Aj pu i Jesús ayan tiraata'ixaa aɨjna ɨ huarej, tɨcɨn: ―Capu che'e a'atɨ mu a'uve'ema'a a'ame tɨ raacua'ani mɨ a'ataca'i. ―Yaa pu tiraata'ixaa. Majta maɨn ɨ maj á'ujhua'anya'a ɨ Jesús jamuan, aɨj mu raanajmuajri'i a'ij tɨ tyu'utaxajtaca'a. Matɨ'ɨjta mi a'ucɨj. 15Aun mu a'ará'a anna Jerusalén. Tɨ'ɨjta'i aɨn Jesús a'utyajrupi aujna teyujta'a. Ajta autyejche tɨ hue'iramuarite'en ɨ mej maun tya'utu'araca, ajta ɨ mej maun tya'unanaave. Tyamua'a pu tyajhua'axɨxɨ ɨ tihua'ameesa ɨ mej tumin jetzen tihua'apuata'ati'iraca, ajta a'u maj cucui'ise a'atu'aracara'a. 16Ajta cai hua'uta'a tɨ a'atɨ ti'itɨ áutɨsime'en a e'ita'a teyujta'a. 17Ajta e'eyan tihua'amua'atyájraa, ayan tɨcɨn: ―¿Ni cai ayan te'eyu'usi'i ɨ yu'uxari jetze tɨ ayan tiraaxajtaca'a ɨ Dioj tɨcɨn: “Ayaa pu nu'u tyaja'arajtyahuáa a'ame ɨ chi'ira'an yee tɨcɨn chi'i maj tzajta'an rɨ'ɨ tirata'aca ɨ Dioj ɨ maj cura'acɨ'ɨca nain japua ɨ chuej tɨ seijre'e”? Ma ajta, capu aɨjna cɨn ti'ivaɨre'e. Ayaa xu raaruu ɨ chi'i tɨj tyasta'a a'u maj a'iraati ɨ nahua'ari. ―Yaa pu tyu'utaxajtaca'a aɨjna ɨ Jesús. 18Majta maɨn ɨ tyaɨte, naijmi'i mu a'ij tira'utaseij aɨjna cɨme'e a'ij tɨ ye'i tihua'amua'ate. Majta maɨn ɨ mej ti'ijta teyujta'a, majta aɨme ɨ mej te'eyu'uxaca, aɨ mu raatzɨɨnya'aca'a matɨ'ɨj raanamuajri'i a'ij tɨ ye'i tihua'umuá'ate. Aj mu mi raahuau a'ij mej ye'i huarɨni mej mi raaje'ica maɨjna ɨ Jesús. 19Ajta aɨn ɨ Jesús, tɨ'ɨj huatyatɨca'araca'a, aj pu'i huirajraa aujna chajta'a, majta ɨ maj jamuan á'ujhua'anya'a. 20Yaa ruijmua'ate'e yee, tɨ'ɨj huatapua'araca'a, au mu a'uré'enye a'utɨ a'atávaaca'a aɨjna ɨ huarej. Pu'uri tyamua'a tí'ihuachica'a nainjapua, ajta téta'ɨmɨ ɨ runaana'a jetze huatyaahua. 21Tɨ'ɨqui aɨn ɨ Pedro ra'utamua'areeri'i a'ij tɨ een cɨn huatyaahua. Aj pu i ayan tiraata'ixaa aɨjna ɨ Jesús tɨcɨn: ―Maeestru, casi'i. Pu'uri tyamua'a ti'ihuachi mɨ huarej pej a'ij pua'a tiraatyajtuaa. 22Aj pu i Jesús ayan tihua'uta'ixaa tɨcɨn: ―Ayaa pu tyu'ujxe'eve'e sej ra'atzaahuatya'a ɨ Dioj. 23Ajta ayan tihua'uta'ixaa tɨcɨn: ―Ayaa nu xaa nya'u tyaja'amue'ixaate'e. Ayej ti'ayajna. Tɨ pua'a a'atɨ tya'atzaahuate'e ɨ rutzajta'a tɨ ayan tya'ara'asti a'ij tɨ aɨn tira'amitejte'e, ayaa pu te'eme. Tɨ pua'a aɨjna ɨ a'atɨ ayan tiraataijte'en aɨjna ɨ jɨri tɨcɨn: “Tichesi, atyaaruti ma jaata'a ajna a'ahua'a el mar”, ayaa pu'i rɨni rɨ'ɨri. Na'ari cai, tɨ pua'a utyaavatzɨn ɨ tzajta'an aijna i mua'ariira'a tɨcɨn: “Ayej nya'ase capu a'ij ti'irɨ'ɨri”, capu ayen te'eme tɨ ayan huarɨni. 24Aɨj nu cɨn, neyan tyaja'amue'ixaate'e. A'ij sej ye'i tiraatahuaucu ɨ Dioj jemi, tɨ pua'a seyan tya'atzaahuatya'a saj seyan ra'ancura'asin, ayaa pu te'eme, ti'itɨ saj a'ij tyu'utyahuausin. 25Ajta, patɨ'ɨj raatyajhuauni ɨ Dioj jemi, tɨ pua'a a'atɨ autyaturan mueetzi jemi, ayaa pu tyu'ujxe'eve'e pej tiraatauuni'i. Tɨ pua'a peyan huarɨni, aɨn ɨ aya'upua tɨ aun e'eseijre'e u tajapua, aɨ pu timuaatauuni'ira mueetzi nain cɨme'e ɨ paj cɨn autyajturaa ɨ jemin. 26Na'ari tɨ pua'a paj cai tiraatauuni'i ɨ tɨ a jemin autyajturaa, capu ajta timuaatauuni'ira ɨ Dioj ɨ paj cɨn autyajturaa ɨ jemin. ―Yaa pu tyu'utaxajtaca'a aɨjna ɨ Jesús. Matɨ'ɨj mi a'ucɨj. 27Aj mu mi majtahua'a u Jerusalén a'uju'un. Aj pu i Jesús aun vejli'i a'ucha'acanya'aca'a teyujta'a matɨ'ɨj seica a e'ire'enye. Aɨ mu pueen ɨ mej ti'ijta teyujta'a, majta ɨ mej te'eyu'uxaca, majta seica vaujsi. 28Aj mu mi meyan tiraataihua'uri'i tɨcɨn: ―¿Ti'itajni cɨn peti'ityejvee pej pi peyan rɨcɨ? ¿A'ataani ayan timuaataíj pej pi peyan rɨjca? 29Aj pu i Jesús ayan tihua'uta'ixaa tɨcɨn: ―Nyajta nu inyaa seij tyajamuaataihua'ura. Tɨ pua'a sanaata'ixaate'en seijna, aj nu ni amuaata'ixaate'esin ti'itɨ ɨ nyaj cɨn ti'ityejvee nyej ni neyan rɨcɨ. 30¿A'ataani raata'a aɨjna ɨ Juan tɨ'ij hua'umuaɨ'ɨhua ɨ tyaɨte?, ¿ni Dioj, ca'ɨn mɨ tyetyaca? Xaatanyuuchi. 31Matɨ'ɨj mi a'utyahui maj rujɨɨmua'a ti'ihuáurihua'ura. Meyan tɨcɨn: ―Tɨ pua'a teyan tiraata'ixaate'en yee: “Dioj ya'utaiityaca'a”, ayaa pu titaata'ixaate'esin yee: “¿A'ini een cɨn tyacai ra'atzaahuate'e a'ij tɨ tyu'utaxajtaca'a aɨjna?” 32Ma ajta, capu hui rɨ'ɨri tyej teyan tiraata'ixaate'en yee: “Tyetyaca mu ya'utaiityaca'a.” Yaa mu tyu'utaxajtaca'a aɨme, a'ini mu'uri ramua'areeraca'a maj naijmi'i meyan ra'atzaahuatya'acaa tɨ aɨn ɨ Juan ti'ixaxa'ata'a ɨ Dioj jetze ma'acan. Aɨj mu cɨn hua'atzɨɨnya'aca'a ɨ tyaɨtye. 33Aɨj mu mi cɨn meyan tiraata'ixaa maɨjna ɨ Jesús tɨcɨn: ―Catu hui ramua'aree. Aj pu i Jesús ayan tihua'uta'ixaa tɨcɨn: ―Canu nyajta nyáa tyajamuaata'ixaate'esin ɨ nyaj cɨn ti'ityejvee nyej ni neyan rɨcɨ. ―Ayaa pu tihua'uta'ixaa.

will be added

X\