San Marcos 10

1Jesús pu huiirajraa aujna u Capernaum. Tɨ'ɨqui aun a'ará'a ajna a'ahua'a Jerusalén. Ayuu pu pujme'en á'ucha'acanya'a ayun jetze ɨ jatya'ana jetze ɨ Jordán. Majtahua'a mu tyujsaɨj ɨ tyaɨte a'u tɨ a'utyavaaca'a ɨ Jesús. Ajta aɨ pu e'eyan a'utejche tɨ tihua'umua'aten a'ij tɨ ari ti'ijrɨ'ɨrajcaa. 2Aj mu mi seica e'ire'enye. Fariseo mu pɨrɨcɨ aɨme. Aɨ mu tí'itesa'acaa mej meyan ca'anijra'a raata'an tɨ ij aiirá'ɨtzen aɨjna ɨ Jesús. Aɨj mu cɨn meyan raataihua'uri'i tɨ pua'a nu'u aɨn ayan ti'ita'aca tɨ a'atɨ ma ruuraini ɨ ru'ɨj. 3Aj pu i ayan tihua'uta'ixaa tɨcɨn: ―¿Ti'itaani amuaataij aɨjna ɨ Moisés tyaacan? 4Aj mu mi meyan tiraata'ixaa tɨcɨn: ―Aɨ pu hui Moisés tyu'uta'a tɨ papee raatapijte'en ɨ tɨ cɨn a'atɨ ma ruuraini ɨ ru'ɨj. ―Yaa mu tyu'utaxajtaca'a. 5Tɨ'ɨqui Jesús ayan tihua'uta'ixaa tɨcɨn: ―A'ij xu pua'a tirajtyau ɨ rutzajta'a. Moisés pu tyu'uta'a tɨ a'atɨ ma ruuraini ɨ ru'ɨj. Aɨ pu xaa ayan papee raatapijte'en aru capu ayan tiraata'a ruxé'evi'ira'a cɨme'e. Ai pu'u een cɨn huarɨj aɨjna a'ini ayaa xu ti'ijxe'eva'acaa sana'a rujɨɨmua'a. 6Ma ajta, tɨ'ɨj Dioj raatyataahuaca'a ɨ chaanaca tyajapuan yen seijre'e, “aɨ pu nu'u aɨme huataahuaca'a ɨ tyaata'a jamuan ɨ jɨita'a.” 7“Aɨj pu cɨn aɨn tyaata'a ma huaúuhua'axɨjsin ɨ ruvaujsimua'a. Ru'ɨj pu nu'u jamuan a'utyaváa a'ame. 8Matɨ'ɨj mi meyan eenya'a mua'aju'un ɨ maj hua'apua, cumu saɨj pu'u ɨ tevi.” Camu che'e hua'apua, silu saɨj pu'u. 9Ayaa nu tyaja'amue'ixaate'e. Dioj pu ayan tiraaxajtaca'a tɨ saɨj na'a ɨ tevi. Aɨj pu cɨn, capu ayan tiraavijte'e sej seyan ma tihuauuhua'anan ɨ ru'ɨstyamua'a, papee sahua'utapiite'en ɨ cɨ́nastyamua'ame'en. ―Yaa pu tyu'utaxajtaca'a aɨjna ɨ Jesús. Tɨ'ɨqui á'uraa, majta ɨ maj jamuan á'ujhua'anya'a. 10Matɨ'ɨjtahua'a mi chi'ita a'utyajrupi, majtahua'a mu meyan tiraataihua'uri'i aɨjna cɨme'e ɨ papee tɨ cɨn a'atɨ ru'ɨj ma uuraini. 11Aj pu i Jesús ayan tihua'uta'ixaa tɨcɨn: ―Tɨ pua'a a'atɨ ru'ɨj ma uuraini, aɨ pu ti'ixana'acɨre'en tɨ pua'a e'eyan seij ancure'evi'itɨn ɨ jɨita'a. Aɨj pu cɨn autyaturaasin jemin ɨ ru'ɨj ɨ tɨ ma rúujɨsin. 12Na'ari tɨ pua'a jɨita'a rucɨn ma uuraini, aɨ pu ajta ti'ixana'acɨre'en tɨ pua'a ajta e'eyan seij antyaanaxca ɨ tyaata'a. Aɨ pu ajta autyaturaasin jemin ɨ rucɨn ɨ tɨ ma rúujɨsin. 13Matɨ'ɨj mi tɨ'ɨrii ayauvi'itɨche ɨ Jesús tɨ'ij hua'ajtamuare'en. Aj mu mi maɨn ɨ maj Jesús jamuan á'ujhua'anya'a, aɨ mu hua'uta'ijmɨjri'i ɨ tɨ'ɨrii maj nu'u cai huaja'uve'evi'itɨcare'en. 14Tɨ'ɨj Jesús hua'useij a'ij mej ye'i rɨjcaa, aɨ pu huatanyu'ucaca'a. Tɨ'ɨqui ayan tihua'uta'ixaa tɨcɨn: ―Miche'e yej huave'ere'enyejte'en mɨ tɨ'ɨrii inyeetzi jemi. Matɨj mana'a pua'amua ɨ maj á'ujca'ane tɨ Dioj tihua'utaijte'en, naijmi'i mu meyan e'en matɨj i tɨ'ɨrii. Aɨj nu cɨn neyan tyaja'amue'ixaate'e. Caxu hue'ijmɨjra. 15’Ayej xaa nya'u ti'ayajna. Naa pu hua'ase mɨ tɨ'ɨrii tɨ tihua'utaijte'en ɨ Dioj. Tɨ pua'a a'atɨ raxe'eva'a tɨ a'utyarute aujna a'u tɨ Dioj tie'ijta, ayaa pu ruxe'eve'e tɨ ayan che'eta na'a raxe'eva'a tɨ tiraataijte'en ɨ Dioj tɨj seij pa'arɨ'ɨ, mɨ tɨ yaa seijre'e. Na'ari cai, capu a'anaj a'utyaruti aujna aɨjna ɨ a'atɨ. 16Aj pu i aɨn Jesús hua'ancure'evi'itɨ ɨ tɨ'ɨrii. Saxu'ijme'en pu ancaujtɨstyajxɨ ɨ rujetze. Ajta hua'ava'amuara'axɨ, aj pu'i raatyahuau ɨ Dioj jemi tɨ'ij aɨn hua'uchaɨn. Tɨ'ɨqui á'uraa aɨjna ɨ Jesús. 17Tɨ'ɨj Jesús ari huirama'aca, saɨj pu ave'ere'enye, taichijma'a. Aj pu i titunutaca'a vejripuan ɨ Jesús. Tɨ'ɨqui ayan tiraataihua'uri'i tɨcɨn: ―Maeestru, nyaa nu ramua'aree pej rɨ'ɨ ti'itevi. ¿Ti'itajni a'ij ruxe'eve'e tɨ ayan naacɨ'ɨti nyej ruuri na'ara'ani ɨ Dioj jemi tɨj na'a rusen cɨme'e matɨ'ɨj a'itacɨɨnye a chuaata'a ɨ mej meri huacuii? 18Aj pu i Jesús ayan tiraata'ixaa tɨcɨn: ―¿A'ini een cɨn peyan ti'inyaxa yee nyaj rɨ'ɨ ti'itevi? Saɨj pu'u seijre'e tɨ rɨ'ɨ ti'itevi, ai pu aɨn pueen ɨ Dioj. 19Muaa paj peri ru'umua'aree a'ij tɨ tyu'utaijtaca'a ɨ Dioj. Ayaa paj eenye'en: “Capaj ti'ixana'acɨra'a.” Ajtahua'a seij, ayan tɨcɨn: “Capej ti'ityacui'ica.” Ajtahua'a eijna tɨ ayan tɨcɨn: “Capej ti'inahua'a.” Ajta saɨj tɨ ayan tɨcɨn: “Capaj a'atɨ hue'itzi cɨn ti'ixaatya'a.” Ajta ayan tɨcɨn: “Capaj a'atɨ tzajrajmua'a.” Ajta ayan tɨcɨn: “Para'atzaahuatya'a a'ataata, pajta a'anaana.” Ai pu aɨn pueen ɨ tɨ raataijtaca'a ɨ Dioj. 20Aj pu aɨn a'atɨ ayan tiraata'ixaa tɨcɨn: ―Maeestru, cɨme'en ɨ paj pauchan raataxajtaca'a, nain nu cɨn tya'aste i nyuucari nyatɨj nyana'a tyu'uvé'ese. 21Tɨ'ɨj raaseij, rɨ'ɨ pu tya'utyaujmua'a ɨ rutzajta'a aɨjna ɨ Jesús. Aj pu i ayan tiraata'ixaa tɨcɨn: ―Ti'itɨ pu auj mua'aturaate'e paj cai xɨ cɨn tya'ara'aste. Aricu. Nain tyu'utuá ɨ pej tí'ijcha'ɨ. Pata'aj hua'ura'ate'en ɨ tumin ɨ maj cai a'ij ti'ijviicue'i. Tɨ pua'a peyan huarɨni, eihua paj ra'ancura'asin aujna a'ahua'a u tajapua. Chijtyaani paj pueenya'a pua'ame aujna tɨ e'eseijre'e ɨ Dioj. Ajta pata'aj mu a'arajra'ani pej pi nyeetzi jamuan á'ucha'acanye'en. 22Tɨ'ɨj raanamuajri'i aɨjna ɨ nyuucari, tɨ'ɨj i utyaavatzɨ ɨ tzajta'an. Huataujxaamɨjte a'ini eihua pu tí'ijchaɨca'a. Tɨ'ɨqui á'uraa aɨjna ɨ a'atɨ. 23Aj pu i Jesús ruhuarita'a a'anyeerajraa. Ajta ayan tihua'uta'ixaa ɨ maj jamuan á'ujhua'anya'a tɨcɨn: ―Tyamua'a pu tihua'amuare'eriste'e maj a'utyarute aujna tɨ e'eseijre'e ɨ Dioj ɨ chijtyaani. ―Yaa pu tyu'utaxajtaca'a aɨjna ɨ Jesús. 24Aj pu i utyaavatzɨ ɨ hua'a tzajta'a aɨme ɨ maj jamuan á'ujhua'anya'a aɨjna cɨme'e a'ij tɨ tyu'utaxajtaca'a aɨjna ɨ Jesús. Ajtahua'a ayan tihua'uta'ixaa tɨcɨn: ―Niyaujmua'a, tyamua'a pu tihua'amuare'eriste'e ɨ mej eihua tí'ijcha'ɨ. Eihua pu hua'a jetze ruxe'eve'e ɨ maj caj tí'ijcha'ɨ. Aɨj pu cɨn muare'eri maj maun a'utyarute aujna tɨ e'eseijre'e ɨ Dioj. 25Capu xaa nya'u ayan muare'eri tɨ anajra'ani cameeyu'u ti'itɨ pɨ'ɨse'e jetze, tɨj ɨ chijtyaani tɨ a'utyarute ajna tɨ e'eseijre'e ɨ Dioj. 26Matɨ'ɨj raanamuajri'i, eecan mu a'ij tira'utanamuajri'i. Aj mu mi ti'ityurihua'uri'i rujɨɨmua'a. Meyan tɨcɨn: ―Tɨ pua'a ayan ti'ayajna, ¿ai ta'uj na'a ti'irɨ'ɨri tɨ a'atɨ aun a'utyaturan ɨ Dioj jemi? ―Yaa mu tyu'utaxajtaca'a. 27Ajtahua'a Jesús hua'useij. Ayan tihua'uta'ixaa tɨcɨn: ―Aɨme jemi ɨ tetyaca, capu xaa a'ij ti'irɨ'ɨri. Ma ajta, aɨ pu raayɨ'ɨtɨ ɨ Dioj. Nain cɨme'e pu jemin ti'irɨ'ɨri. 28Aj pu i aɨn Pedro a'utyejche tɨ raata'ixaate'en. Ayan tɨcɨn: ―¡Tavastara'a, ma'acui xaa!, nain tu tyeri tyaja'urai ɨ tyej tí'ijchaɨca'a tyej ti á'ujhua'anye'en a'a jamuan. ―Yaa pu tyu'utaxajtaca'a aɨjna ɨ Pedro. 29- 30Aj pu i Jesús ayan tihua'uta'ixaa tɨcɨn: ―Ayej xaa nya'u ti'ayajna. Ayaa nu tyaja'amue'ixaate'e, tɨ pua'a a'atɨ ti'itɨ a'uraini inyeetzi jemi, na'ari jemin ɨ nyuucari tɨ cɨn huaujjajcuare'en ɨ Dioj jemi, ti'itɨ tɨ na'a tɨ ya'uraini, aɨ pu mijmu eitze'e ancura'an tɨ'ɨj auj ruuri iiyan chaanaca japua. Tɨ pua'a saɨj na'a ɨ tɨ ya'urai, ayaa pu che'eta na'a ra'ancura'asin a'achu cumu anxɨte ti'itɨ tɨ a'ij, tɨ pua'a chi'i, na'ari a'atzimuá na'ari cu'utzimuá na'ari juutzimua'ame'en. Ajta ayan hua'ancure'evi'itɨ rutyaɨtestyamua'a, aɨme rutaata na'ari runaana nusu ru'ɨj, na'ari ruyaujmua'a. Ajta pu ra'ancura'asin ɨ chuej maj japuan vaujse ɨ tyaɨte. Nain pu tya'ancura'asin. Ajta rajpueitzi a'ame. Aru capu amɨn a'ij. Tɨ'ɨj aɨn a'utyarute aujna Dioj tɨ e'eseijre'e, Dioj pu raata'asin tɨ ruuri a'ara'ani jemin tɨj na'a rusen cɨme'e. 31Ajta ayen tɨ cɨme'en yee: ―Mamui'i ɨ maj vivejme'en cɨn títyatatí ijii, aɨ mu cɨleenye'en cɨn títyatatyá'a mua'aju'un. Majta mui'itɨ ɨ maj cɨleenye'en cɨn títyatatí ijii, aɨ mu vivejme'en cɨn títyatatyá'a mua'aju'un. Ayej xaa nya'u te'eme. ―Ayaa pu tihua'uta'ixaa. 32Tɨ'ɨqui á'uraa ɨ Jesús, majta ɨ maj jamuan á'ujhua'anya'a. An mu a'ucɨ́j a'ahua'a Jerusalén. Ajta aɨn ɨ Jesús, aɨ pu anacai huama'acaa. Eihua mu rutyamua'ava'acaa ɨ seica. Majta ti'itzɨɨnya'acaa ɨ maj hua'a cujta'a huaju'uca'a. Tɨ'ɨqui ajtahua'a Jesús hua'utajee rujɨɨme'e. Aj pu i autyejche tɨ tihua'uta'ixaate'en a'ij tɨ ti'itɨj raruuren. 33Ayaa pu tihua'uta'ixaa tɨcɨn: ―Casi'i, xaanamuajri'i muan. Tu'uri a'uju'un anna Jerusalén. Saɨj pu tyu'utatuire'esin ɨ nyacɨme'en, i nyaj nyajta tyaata'a jetze a'iraanye aɨmej jemi ɨ mej tihue'ijte'e teyujta'a, ajta aɨmej jemi ɨ mej te'eyu'uxaca. Aɨ mu tyu'uta'asin maj naaje'ica. Aj mu mi maɨn tyu'utatuiire'esin aɨmej jemi ɨ mej seij chuejra'a japua e'ema'acan. 34Matɨ'ɨj mi na'axaahuari'ira mua'aju'un, majta naatyavaaxɨ'ɨn. Majta nyatyetzítzi'ica'imuaxɨ'ɨn ɨ nyajetze. Majta naaje'icatan. Nyatɨ'ɨj hui huamɨ'ɨni, hueica xɨcaj tzajta'a nu nyajtahua'a a a'itamé hua'a tzajta'a ɨ mɨ'ɨchite. 35Aj mu mi ajtyáxɨɨraca'a Jesús jemi aɨjna ɨ Jacobo, ajta aɨjna ɨ Juan. Ai mu maɨn pueen yaujmua'ame'en aɨjna ɨ Zebedeu. Matɨ'ɨj mi meyan tiraata'ixaa tɨcɨn: ―Maeestru, ayaa tu ti'ijxe'eve'e pej peyan huarɨni a'ij tyej ye'i ti'imuaatahuaviira. ―Yaa mu tyu'utaxajtaca'a. 36Aj pu i Jesús ayan tihua'utaihua'uri'i tɨcɨn: ―¿A'ini seti'ijxe'eve'e nyej neyan huarɨni muejmi cɨme'e? ―Yaa pu tyu'utaxajtaca'a. 37Aj mu mi meyan tiraata'ixaa tɨcɨn: ―Ahuii, ayaa tu ti'ijxe'eve'e ajna xɨcajra'a jetze patɨ'ɨj yatanyen pej titaataijte'en iiyan chaanaca japua. Pata'aj taata'an tyej uhuáraasixɨ'ɨn saɨj a'ɨrɨɨta'a, ajta saɨj autata'a. ―Yaa mu tyu'utaxajtaca'a. 38Aj pu i Jesús ayan tihua'uta'ixaa tɨcɨn: ―Muan, caxu ramua'aree a'ij sei ti'itɨj eenya'a huauhuau. ¿Ni seyan ra'aviicue'i saj rajpueitzi xa'ara'ani nyatɨj inyaa tirajpueitzi na'ame? ¿Na'ari sacai ra'aviicue'i ɨ tyaɨte maj a'ij pua'a amuaaruuren muejmi matɨj majta a'ij pua'a ti'inyaruure inyeetzi? ―Yaa pu tihua'uta'ixaa aɨjna ɨ Jesús. 39Aj mu mi meyan tɨcɨn: ―Níti'ijtá nya'u, ayaa tu tira'aviicue'iran. Aj pu i Jesús ayan tihua'uta'ixaa tɨcɨn: ―Ayej xaa nya'u ti'ayajna. Muan xu rajpueitzi xa'aju'un nyatɨj tirajpueitzi na'ame inyaa. Ajta, muejmi, a'ij mu pua'a amuaaruuren matɨj a'ij pua'a ti'inyaruuren inyeetzi. 40Ma ajta, canu nyaɨjna cɨn antinmua'aree nyaj amuaata'an saj uhuáraasixɨ'ɨn saɨj nya'ɨrɨɨta'a, ajta saɨj nyauutata'a. Aɨme pu'u cɨ'ɨti ɨ maj ayan huaujxa'apɨ'ɨntari'iri'i. 41Matɨ'ɨj mi raamua'areeri'i ɨ seica ɨ maj tamuaamuata'a maj ara'ase a'ij mej ye'i tyu'utaxajtaca'a aɨjna ɨ Jacobo, ajta aɨjna ɨ Juan. Aj mu mi tininyu'ucacuca'a aɨme jemi ɨ maj hua'apua. 42Aj pu i Jesús hua'utajee naijmi'ica. Ayaa pu tihua'uta'ixaa tɨcɨn: ―Xu'uri ramua'aree, muan, a'ij mej ye'i rɨcɨ ɨ mej ti'ita'ijte'e nain chuejra'a japua. Ca'anin mu cɨn tihue'ijte'e ɨ tyaɨte. Aɨme ɨ mej vivéjmee cɨn títyatatí, aɨ mu hue'ijte'e a'ij mej ye'i huarɨni ɨ seica. 43Ma ajta, capu ayan te'eme muejmi jemi. Tɨ pua'a a'atɨ raxe'eva'a tɨ va'acan cɨn ti'ityavaa a'ara'ani, ayaa pu tyu'ujxe'eve'e tɨ aɨn cɨleenya'a cɨn ti'ityavaa a'ara'ani. 44Ajta tɨ pua'a a'atɨ raxe'eva'a tɨ aɨn pueenye'en ɨ tɨ eitze'e ruxe'eve'e, ayaa pu tyu'ujxe'eve'e tɨ aɨn hua'utyavaɨre'en naijmi'ica ɨ seica. 45Ayej che'eta na'a ti'en inyeetzi jemi, inyaa i nyajta ɨ tyaata'a jetze airaanye. Canu nyaɨjna cɨn ya'uve'enye mej mi naatyavaɨre'en inyeetzi, silu nyata'aj hua'utyavaɨre'en mui'icaca ɨ tyaɨte. Ayaa nu xaa een cɨn ya'uve'enye nyexe'evi'ira'a cɨme'e nyata'aj hua'a japua huanyuuni, nyaɨjna cɨme'e nyaj huamɨ'ɨni hua'a jetze ma'acan. Nyetiraatanajchite'en ɨ Dioj tɨ cɨn aɨn hua'ajijve'e ɨ maj cɨn á'apua'aren ɨ tyaɨte. 46Matɨ'ɨj mi maun a'ará'a ajna a'ahua'a tɨ ayan tyaja'arajtyahuaa tɨcɨn Jericó. Matɨ'ɨj mi huiiraacɨ maujna. Pu'uri huirama'aca aɨjna ɨ Jesús, majta maɨn ɨ maj jamuan á'ujhua'anya'a, majta mui'itɨ ɨ tyaɨte. Au pu saɨj a'ityacatii vejli'i juye jetze. Ayaa pu antyahuaaca'a tɨcɨn Bartimeo. Yaujra'an pu puéenya'a aɨjna ɨ Timeo. Ajta aracuuni'icaa aɨjna ɨ Bartimeo. Aɨj pu limujna hua'ahuaviiraca'a. 47Tɨ'ɨj i hua'unamuajri'i maj avejli'i a'ava'aju'ucaa. Cɨme'en pu'u hua'unamuajri'i, tɨ'ɨqui aɨn ta'aracun autyejche tɨ huajijhua. Ayan tɨcɨn: ―Jesús, mɨ pej i'ihuaacɨxa'ara'an aɨjna ɨ tajtuhuan tyaacan ɨ David, na'ancu'uvajxɨ'ɨ inyeetzi. ―Ayaa pu tiraatajee. 48Majta maɨn ɨ tyaɨte, tyamua'a mu tira'ajtya'axɨ. Maraatá'ijmɨjri'i tɨ'ij cai ayan tí'ijijhua. Ajta aɨn, eitze'e pu ca'anin cɨn huajijhuaca'a, ayan tɨcɨn: ―Mɨ pej i'ihuaacɨxa'ara'an aɨjna ɨ David tyaacan, na'ancu'uvajxɨ'ɨ inyeetzi. 49Aj pu i Jesús a'utyeechaxɨ. Ayaa pu tihua'uta'ixaa tɨcɨn: ―Sericu, sa'utájee. Aj mu mi ya'utajée. Ayaa mu tiraata'ixaa tɨcɨn: ―Huatya'aca'anye ɨ a'a tzajta'a. Ajchesi. Aɨ pu muachu'eve'e ɨ Jesús. ―Yaa mu tiraata'ixaa. 50Aj pu i aɨn airaujchuiri'i ɨ rucɨɨxu ca'anin cɨme'e. Tɨ'ɨqui ájtzucu. Aj pu i e'ire'enye ɨ Jesús jemi. 51Aj pu i aɨn Jesús ayan tiraataihua'uri'i tɨcɨn: ―¿A'ini peti'ijxe'eve'e nyej ti'itɨ a'ij huáruuren mueetzi jemi? Tɨ'ɨqui ayan tiraata'ixaa aɨjna ɨ tɨ aracun tɨcɨn: ―Maeestru, ayaa nu ti'ijxe'eve'e nyaj atányeeri. 52Aj pu i Jesús ayan tiraata'ixaa tɨcɨn: ―Pu'uri paja'ura'ani muaa. Petya'atzaahuate'e nyaj inyaa timuaahuaate'en. Aɨj paj cɨn peri huaruj. Cɨme'en pu'u ayan tiraata'ixaa ɨ Jesús, aɨjna ɨ tɨ aracun, aj pu i atanyeeraca'a. Tɨ'ɨqui, aɨ pu Jesús jamuan á'ucha'acanya'a a'araa, a'u tɨ na'a tɨ huaye'icaa.

will be added

X\