San Marcos 1

1Yaa pu eenye'eque'en autyejche ɨ nyuucari tɨ cɨme'en ra'axa aɨjna ɨ Jesús ɨ Cɨriistu'u tɨ ajta yaujra'an pɨrɨcɨ ɨ Dioj. 2Ayaa pu tya'uyu'uxaca'a ɨ a'atɨ tɨ ti'ixajtacara'a ɨ Dioj jetze ma'acan. Ayaa pu antyahuaaca'a tɨcɨn Isaías. Ayaa pu tira'uteyu'uxaca'a ayan tɨcɨn: Yaa pu Dioj ti'ixa aɨjna cɨme'en tɨ an yá'ujra ɨ ɨpuari japua ayan tɨcɨn: “Ma'acuí xaa nya'u, nu'uri a'atɨ huataíti tɨ'ij anacai huataseijre'en pacai muaa. Aɨ pu aɨn pueen tɨ anacai tihua'uta'ixaate'esin ɨ tyaɨte maj nu'u mua'ichu'eva'a.” 3Ajta nu'u ɨ Dioj ayan tɨcɨn: “Aɨjna ɨ tɨ anacai tihua'uta'ixaate'esin, aɨ pu nu'u u e'ejíihua a'ame a'ahua'a ɨtzitá.” Ayan tɨcɨn: “Naa xu rɨ'ɨ huaujruuren muan, a'ini'i aɨ pu ye uve'enyejsin ɨ tavastara'a. Caxu ra'antanaamɨn ɨ juyáara'an jetze.” 4Aɨjna ɨ tɨ nu'u anacai huataseijre'esin, ai pu aɨn pueen aɨjna ɨ Juan ɨ tɨ hua'amuaɨ'ɨhuacara'a. Aa pu a'utyavaaca'a a'u tɨ cai ti'itɨ a'ahua'aca'a. Ayaa pu tihue'ixaatya'aca'a tɨ ayan tyu'ujxe'eve'e mej saɨque tyu'umua'ati mej mi meyan huarɨni a'ij tɨ ye'i ti'ijxe'eve'e ɨ Dioj. Tɨ'ɨqui aɨn ha'umuaɨ'ɨhuan ɨ Juan tɨ ij Dioj tihua'utauuni'i ɨ maj cɨn autyajturaa ɨ jemin. 5Matɨ'ɨj mi naijmi'i e'ire'enye a'u tɨ a'utyavaaca'a ɨ Juan. Au mu a'arácɨ'ɨca'a tɨj na'a a'u tɨ huatacá'a aujna chuejra'a japua tɨ ayan tyaja'arajtyahuaa tɨcɨn Judea, majta aɨme ɨ maj aun a'uchaatɨme aujna chajta'a tɨ ayan tyaja'arajtyahuaa tɨcɨn Jerusalén. Au pu e'ejtyama'acan u Judea. Cɨme'en mu'u raataxajtaca'a ɨ maj cɨn autyajturaa ɨ Dioj jemi, aj pu i aɨjna ɨ Juan hua'umuaɨ'ɨhuaca'a ɨ atya'ana jetze tɨ ayan tyaja'arajtyahuaa tɨcɨn Jordán. 6Ajta Juan, ayaa pu e'enya'a ti'itechajca'a cɨɨxuri cɨme'e tɨ jitzijhua ti'itɨj cameeyu'u ju'uxa'a cɨme'e. Ajta navi pu tipuaasica'a. Aɨ pu cɨn ava'ujjɨ'ɨca'acaa. Ajta huatuna'ise pu cua'acara'a, ajta sarate ɨtzitá maj huaxuaavi. 7Ayaa pu tihue'ihue'ixaatye'e tɨcɨn: ―Saɨj pu ye e'e ve'eme auuche'e. Eitze'e pu va'acan cɨn ti'itejvee aɨjna nyacai inyaa. Aɨj pu cɨn cai naavijte'e inyeetzi nyej ti'itɨ cɨn ti'ityavaa na'ara'ani tɨ cɨle'en jemin aɨjna tɨ ye e'e ve'eme, capu xaa nya'u naavijte'e inyeetzi nyej ni ajtaɨ'ɨpɨ'ɨn ɨ ca'acaira'an. 8Ayaa nu xaa nya'u neri ámuaamuaɨ'ɨhuaca'a jaj cɨme'e. Ma ajta'i aɨn, seij pu huataíti tɨ huatyaturan muejmi jemi. Xaijnyu'ucara'ara'an ɨ Dioj pu utya'asin mɨ a'amua tzajta'a. 9Yaa pu tyuju'urɨj ajna tɨ'ɨj hua'amuaɨ'ɨhuaca'a ɨ Juan. Tɨ'ɨj i a'iraanye ɨ Jesús. Au pu a'arajraa u Nazaret, chajta'a tɨ e'ejtyama'acan aujna a'ahua'a Galileeya. Aj pu i aɨn Juan raamuaɨ'ɨhuaca'a ɨ Jesús u atya'ana jetze tɨ ayan tyaja'arajtyahuaa tɨcɨn Jordán. 10Cɨme'en pu'u Jesús e'itaraa a jaata'a, aj pu i raaseij tɨ antácuunyaraca'a ɨ tajapua tɨ a'utyájmuaa. Ajta e'eyan xaijnyu'ucara'ara'an huaseij ɨ Dioj tɨ e'icáma'acaa. Yaa pu seijra'acaa tɨj cucui'i. Aj pu'i múutze'en japua a'ujyeijxɨ. 11Ajta e'eyan nyuucari huanamuajri'i tɨ uj e'icanamuajre u tajapua. Ayaa pu tyu'utaxajtaca'a tɨcɨn: ―Niyauj paj pɨrɨcɨ ɨ nyaj mue'ixe'eve'e. Eecan paj rɨ'ɨ naata'aca. 12Tɨ'ɨqui aɨn xaijnyu'ucara'ara'an ɨ Dioj ca'anyejri cɨn ya'uvi'itɨ ɨ Jesús aa a'ahua'a ɨtzitá a'u tɨ cai ti'itɨ e'ere'evee. 13Aujna ɨtzitá, ayaa pu u e'etee sei maxcɨra'i japuan tamuaamuata'a xɨcaj. Auu pu a'utyavaaca'a a'u maj ti'ityaɨn a'ucɨ'ɨca mej simuaruuni. Tɨ'ɨqui aɨn ɨ tiyaaru'u ti'ihuaujtesi'ire tɨ ij ca'anijra'a raata'an aɨjna ɨ Jesús tɨ'ij ti'itɨj cɨn autya'ɨtzen ɨ Dioj jemi. Aru capu ayan tyaja'ure'enye. Aɨ mu raatavaɨ ɨ Jesús ɨ mej títyatatí u tajapua ɨ Dioj jemi. 14Tɨ'ɨj aiityanami'ihuaca'a ɨ Juan, aj pu'i Jesús u a'utanye u Galileeya. Aɨ pu hua'uta'ixaa cɨme'en aɨjna tɨ cɨn Dioj tiraijca ɨ Juan, ɨ Dioj tɨ tie'ijta nain japua ɨ chaanaca. 15Ayan tɨcɨn: ―Pu'uri arauraste tɨ ajna tyaja'ure'enyejsin tɨ tyu'utaijta ɨ Dioj nain japua iiyan chaanaca japua. Sata'aj saɨque huarɨni, sata'aj seyan saɨque tyu'umua'ati saɨjna cɨme'e a'ij tɨ ti'ijxe'eve'e ɨ Dioj. Sata'aj sajta rá'antzaahuate'en ɨ nyuucari tɨ cɨn Dioj ámue'irájtuaani. 16Tɨ'ɨjta'i Jesús pu aujna e'ejtyama'acaa ajna vejli'i a'u tɨ a'avastɨme ɨ jaj tɨ ayan tyaja'arajtyahuaa tɨcɨn Galileeya. Aj pu'i aɨme huaseij ɨ Simón, ajta ɨ Andrés tɨ juutzajra'an pueen ɨ Simón. Aɨ mu xajmua'ari áuuhua'anaa a jaata'a. Ayaa mu tí'ijrɨ'ɨrajcaa aɨme ɨ maj hue'ite vivi'iraca. 17Aj pu'i ayan tihua'uta'ixaa ɨ Jesús tɨcɨn: ―Mu sa'utauriyi'i inyeetzi jemi sata'aj nyaj jamuan á'ujhua'anye'en. Nyaa nu tyajá'amuamua'aten sej si cai che'e seyan hue'ite ti'ivivi'ira'a, silu tyaɨte xu'u si tisaɨre'esin inyeetzi jemi. 18Aj mu mi raatapua'ajtaca'a. Matɨ'ɨj mi a tyájaupíi ɨ xajmua'ari majna. Matɨ'ɨj mi a'ucɨj jamuan ɨ Jesús. 19Aj pu ijta'i ayée a'uré'enye. Tɨ'ɨqui seij huaseij ɨ a'atɨ tɨ ayan antyahuaa tɨcɨn Jacobo. Yaujra'an pɨrɨcɨ ɨ Zebedeo. Aɨ pu ajta raaseij aɨjna ɨ Juan, ɨ tɨ juutzajra'an pueen ɨ Jacobo. Au mu baarcu jetze aráatyá'a. Majta rɨ'ɨ meti'iruurajca'a ɨ xajmua'ari tɨ ti'isújtza'anica'a. 20Ajta e'eyan Jesús hua'utajee. Aj mu mi raatapua'ajtaca'a ɨ maj xajmua'ari rɨ'ɨ ti'iruurajca'a. Aa mu'u ayáurai ɨ rutaata ɨ baarcu jetze, ajta tɨ jemin ti'imuara'aca'a. Matɨ'ɨj mi Jesús jamuan a'ucɨj. 21Aj mu mi maun chajta'a a'utyajrupi, tɨ ayan tyaja'arajtyahuaa tɨcɨn Capernaum. Tɨ'ɨj tya'ará'aj a'atzaj tɨ pua'a e'ire'enyen ajna xɨcajra'a jetze ɨ maj jetzen rusa'upihua'a, aj pu'i Jesús teyujta'a utyajrupi. Au pu tihua'uhuamuá'ate. 22Aɨjna ɨ Jesús, capu cha'ana'a na'a tihua'umua'atyahua'a matɨj ɨ seica ɨ maj majta aun tihua'amua'atyahua'a ɨ mej te'eyu'uxacara'a, silu ayaa pu tɨj tɨ ti'itejvee ti'itɨj cɨme'e tɨ ve'e. Aɨj mu cɨn a'ij tya'utaseij matɨ'ɨj raanamuajri'i. 23Ajta pu saɨj a'utyavaaca'a u teyujta'a, tiyaaru'u tɨ tzajta'an seijra'acaa. A'ij pu pua'a tyaja'uxáataye'icaa aɨjna ɨ tiyaaru'u. 24Ayan tɨcɨn: ―Aa qui carai é'ecan, ¿a'ini ti'itɨj petya'umua'aree ityejmi jemi, Jesús paj peyan antyahuaa tɨcɨn ɨ paj Nazaret e'ema'acan? ¿Ni peyan mu a'uve'eme paj ta'antipua'arite'en? Nyamuamua'ate a'atɨ paj pɨrɨcɨ. Au paj a'uve'eme Dioj jemi, ɨ paj yaujra'an pueen. 25Aj pu'i Jesús ra'ajtya'axɨ ɨ tiyaaru'u. Ayan tɨcɨn: ―Capej yee ti'itɨj xajta. Huirájra'a mɨ tevi jetze. ―Ayaa pu tiraata'ixaa aɨjna ɨ Jesús. 26Aj pu'i aɨn ɨ tiyaaru'u raatyaca'atzɨjxɨ ɨ tevi ca'anin cɨme'e. Tɨ'ɨqui huajijhuaca'a aɨjna ɨ tiyaaru'u tɨ tzajta'an seijra'acaa aɨjna ɨ tevi. Aj pu'i huirajraa ɨ tevi jetze. 27Aj mu mi a'ij tya'utaseij aɨme ɨ mej e'etyujsaɨj. Eecan mu tyu'urixaatya'acaa seij ajta seij. Meyan tɨcɨn: ―¿Ti'itajni pueen tɨ jajcuacan cɨn ti'itejvee? ¿A'uqui e'ema'acan? Xuee tɨ cúj ti'itejvee ti'itɨj cɨme'e tɨ ve'e. Amɨ pu tihua'ijte'e ɨ tiyaaru'u. Majta maɨn ra'atzaahuate'e a'ij tɨ ye'i tihua'uta'ixaate'esin. ―Yaa mu tyu'urixaatya'acaa ɨ tyaɨte. 28Majta mu e'eyan nain japua raamua'areeri'i tɨj na'a u Galileeya a'ij tɨ ti'itɨ cɨn huarɨj ɨ Jesús. 29Aj mu mi huiiraacɨ u teyujta'a. Matɨ'ɨj mi maun a'ará'a Simón tɨ e'eche, ajta ɨ Andrés. Majta aɨme ɨ Jacobo, ajta ɨ Juan, aɨ mu hua'a jamuan á'ujhua'anya'a. 30Aɨ pu an a'ujca'atii ɨ mu'unyaara'an ɨ Simón. Aɨ pu ti'icui'icaa. Pɨstaca'a. Matɨ'ɨj mi meyan tiraata'ixaa ɨ Jesús tɨcɨn: ―Ti'icui'i. 31Aj pu'i ajtyáxɨɨraca'a ɨ jemin aɨjna ɨ Jesús. Tɨ'ɨj i rajví'i muajca'ara'ara'an jetze. Tɨ'ɨqui ra'ajjáj. Aj pu'i ca'anacan huaruj. Ajta e'eyan aɨn tɨ ti'icui'ica'a tihua'umí. 32Chumua'an, tɨ'ɨj ari u e'etyarutya ɨ xɨcaj, naijmi'ica mu cure'evi'itɨxɨ ɨ mej ti'icucui'i, majta ɨ maj tiyaaru'u hua'a tzajta'a seijre'e. 33Naijmi'i mu e'ityujsaɨj a pua'aque ta'apueerta, matɨj mana'a maj maun e'echajca'a, majta ɨ a'ahua'ayee. 34Aɨ pu tihua'uhuaa mui'icaca ɨ mej tí'icucui'icaa. Capu seicaj na'a ɨ cui'ini'ira'a. Tɨ'ɨj i Jesús hua'utamuari ɨ tiyaaru'u ɨ maj seijra'acaa seica ɨ tyaɨte tzajta'a. Jesús pu ajta cai hua'ata'acara'a aɨme ɨ tiyaaru'u mej tyu'utaxaj a'ini majmua'atyajca'a a'atɨ tɨ puéenya'a. 35Tapua'arijma'aca, tɨ'ɨj auj huachuíjxa, Jesús pu ajche. Aj pu'i mu a'ij huarupi. Aa pu a'ará'a a'ahua'a ɨtzitá, a'utɨ cai ti'itɨ e'ere'evee. Au pu huatyejnyuu ɨ Dioj jemi. 36Ajta aɨn ɨ Simón, ajta ɨ maj jamuan á'ujhua'anya'a, aɨ mu ra'ava'ahuau ɨ Jesús. 37Matɨ'ɨj ráatyau, aj mu mi meyan tiraata'ixaa tɨcɨn: ―Naijmi'i mu muahuauhuau. 38Aj pu'i ayan tihua'uta'ixaa ɨ Jesús tɨcɨn: ―Che'ere, tiche'e á'ucɨɨnye aun tɨ huatacá'a ɨ seica chajta'ana jetze. Au nu nyajta tihua'uta'ixaate'esin ɨ nyuucari tɨ cɨn Dioj hue'iratuaasin. Ayaa nu een cɨn u a'arajraa u Capernaum. ―Ayaa pu tihua'uta'ixaa ɨ Jesús. 39Tɨ'ɨqui hua'ateyujta'a tihue'ihue'ixaa nain japua tɨj na'a u Galileeya. Ajta aɨme ɨ tiyaaru'u, Jesús pu hua'utamuari ɨ maj hua'a tzajta'a seijra'acaa ɨ tyaɨte. 40Tɨ'ɨqui saɨj ajtyáxɨɨraca'a ɨ Jesús jemi. Ti'icui'ica'a aɨjna ɨ a'atɨ. Xana'avi'ire'e aɨjna cɨme'e tɨ tinyajxɨ ɨ hue'ira'ara'an jetze. Ayaa mu ratamua'amua tɨcɨn leepra. Tɨ'ɨj i aɨn titunutaca'a. Rajhuaviiri'i ɨ Jesús tɨ tiraahuaate'en. Ayaa pu tiraata'ixaa tɨcɨn: ―Tɨ pua'a mua'araanajchi, paj tinaahuaate'en. ―Yaa pu tyu'utaxajtaca'a ɨ a'atɨ tɨ titunutaca'a. 41Aj pu'i Jesús huataujxaamɨste aɨjna jemi tɨ'ɨj raaseij. Tɨ'ɨqui ra'ajtamuárej. Ayan tɨcɨn: ―Na'araanajchi paj huarún. 42Ayaa pu tyaja'ure'enye. Cɨme'en pu'u raataxajtaca'a ɨ Jesús, tiraacá'ari'iri'i ɨ tɨ cɨn ti'icui'ica'a. Aj pu'i huaruj. 43Tɨ'ɨj i aɨn Jesús eihua raijca tɨ nu'u cai raxajta a'ij tɨ ti'itɨ huarɨj. Aj pu'i á'uraa ɨ Jesús. 44Aru anacai pu ayan tiraata'ixaa tɨcɨn: ―Casi'i, capaj a'atɨ i'ixaatya'a ni cɨj caj, silu aricu, u á'ume'en jamuan ɨ tɨ ti'iva'ɨri teyujta'a, ta'aj muaaseij, pajta tyu'utamuaɨ'ɨvajta a'ij tɨ tyu'uxajtaca'a ɨ Moisés tyaacan. Aɨj mu cɨn ramua'areera mej ti'iva'ɨri teyujta'a tɨcɨn papu'uri huaruj. 45Ma ajta aɨjna ɨ tevi, tɨ'ɨj á'uraa, aɨ pu autyejche tɨ raataxaj eihua a'ij tɨ ti'itɨ huarɨj. Nain japua pu hua'ure'ixaa seij ajta seij. Aɨj pu cɨn cai che'e huatarɨ'ɨristaraca'a tɨ Jesús a'utyarute tɨ huachájta'atajme, silu ɨtzitá pu'u qui huaye'icaa a'utɨ cai ti'itɨ e'ere'evee. Aru a'anaj tɨna'a, aɨ mu tyaɨte a'acɨ'ɨca'a a'utɨ a'ij e'enya'a ɨ Jesús. Au mu a'arácɨ'ɨca'a a'u tɨ na'a maj huachaatɨme.

will be added

X\