San Lucas 9

1A'anaj pu ayan huarɨj aɨjna ɨ Jesús. Aɨ pu hua'utajee aɨme ɨ maj tamuaamuata'a japuan hua'apua ara'ase. Aj pu tihuéijca aɨjna cɨme'e mej mi hua'utamuarite'en aɨme ɨ tiyaaru'use ɨ maj tyaɨte tzajta'a seijre'e, majta maj nu'u tihua'uhuaate'en tɨj na'a ti'ipua'amua ɨ cui'ini'ira'a ɨ maj cɨn ti'icucui'i ɨ tyaɨte. Jesús pu ajta hua'uta'a ɨ muáre'eri'ira'ara'an ɨ maj cɨn meyan tyu'uruuren. 2Tɨ'ɨqui hua'utaityaca'a mej mi a'ucɨ́jxɨ'ɨn mej mi tihua'uta'ixaate'en ɨ tyaɨte aɨjna cɨme'e ɨ nyuucari tɨ cɨme'en raxa ɨ Dioj tɨ nainjapua tie'ijta. Ajta pu hua'utaityaca'a mej mi tihua'uhuaate'en ɨ mej ti'icucui'i. 3Ayaa pu tihua'uta'ixaa tɨcɨn: ―Caxu ti'itɨ anyaɨ́'ɨn ɨ saj cɨn huataujvaɨre'en ɨ juye jetze, ni ti'itɨj jitzɨj, ca'ɨn ti'itɨ ca'ani na'ari ti'itɨ pan o tumin. Sajta hui, seij xu'u anpiin ɨ siicu'uri. Caxu hua'apuaca té'epiin. 4’A'u tɨ na'a saj a'aráiixa ajna a'u tɨ chi'i a'utyejvee, au xu u a'ateere asta sana'a cai á'ucɨɨnye aujna u chajta'a. 5Ajta, ayaa xu hui huarɨni tɨ pua'a macai amua'ancure'evi'itɨn, satɨ'ɨj á'ucɨɨnye saujna u chajta'a, sajtáujrɨ'ɨpɨ'ɨn ɨ saj ajtáca'acáijme, sajta raatyaca'atzɨjxɨ'ɨn tɨ ij caaxɨn ɨ chuej. Aɨ mu hui cɨn ramua'areeran maj autyajturaa ɨ Dioj jemi. ―Ayaa pu tihua'uta'ixaa aɨjna ɨ Jesús. 6Matɨ'ɨj mi a'ucɨ́jxɨ nainjapua tɨj na'a aun tɨ huatacá'a. Nainjapua mu hua'uta'ixaa ɨ nyuucari tɨ cɨn Dioj hue'irajtuaani. Majta tihua'uhuaa ɨ tyaɨte. 7Ajta aɨn ɨ Herodes, aɨjna tɨ tajtuhuan cɨn ti'ityavaaca'a, aɨ pu raamua'areeri'i a'ij mej ti'itɨj ruurajcaa. Capu a'ij tira'amitejtya'acaa a'ini seica mu meyan tí'ixajtacaa tɨcɨn: ―Pu'uri ajtahua'a a'itáraa aɨjna ɨ Juan aujna mej ya'ava'ana. 8Majta seica meyan tɨcɨn: ―Pu'uri ajtahua'a huataseijre aɨjna ɨ Elías. Majta seica meyan tí'ixajtacaa tɨ nu'u seij pu a'itáraa hua'a tzajta'a ɨ mɨ'ɨchite tɨ Dioj jetze ma'acan ti'ixaxa'ata'a. 9Ma ajta aɨn Herodes, ayaa pu tyu'utaxajtaca'a tɨcɨn: ―Tyajta hui ra'antiveijchaca'a ɨ muura'an tyaɨjna ɨ Juan. Aɨj pu cɨn cai aɨn pueen. ¿A'atajqui na'a pueen aɨjna ɨ nyaj cɨme'en neyan ti'inamua? ―Ayaa pu tyu'utaxajtaca'a. Ajta huataujtyese tɨ raaseij. 10Majta maɨn ɨ maj tamuaamuata'a japuan hua'apua ara'ase, matɨ'ɨj mu'u pɨja'urá'avatzɨ, matɨ'ɨj mi meyan tiraata'ixaa maɨjna ɨ Jesús a'ij mej ti'itɨj huáruu. Tɨ'ɨqui aɨn hua'uvi'itɨ aɨme. Matɨ'ɨj mi a'ucɨj rujɨme'e aujna a'ahua'a chajta'a tɨ ayan tyaja'arajtyahuaa tɨcɨn Betsaida. 11Majta maɨn ɨ tyaɨte, matɨ'ɨj raamua'areeri'i, au mu e'ire'enye a'u tɨ a'utyavaaca'a ɨ Jesús. Aɨ pu hua'ancure'evi'itɨ. Ajta tihua'uta'ixaa a'ij tɨ een aɨjna cɨme'e tɨ Dioj tie'ijta nainjapua. Ajta tihua'uhuaa ɨ mej ti'icúcui'ima'acaa. 12Tɨ'ɨj huare'echuijxaraca'a, aɨme ɨ maj tamuaamuata'a japuan hua'apua ara'ase, aɨ mu e'ire'enye ɨ Jesús jemi. Ayaa mu tiraata'ixaa tɨcɨn: ―Pata'aj hue'ire'itixɨ'ɨn ɨ tyaɨte mej mi a'ucɨ́jxɨ'ɨn tɨj na'a aun maj huachaatɨme u chajta'a, ajtahua'a ayée ɨmɨ maj huachaatɨme, mej mi maun tyu'unanan ti'itɨj maj raacua'ani, mej mi majta maun a'ucu'utzu a'ini capu hui ye'e ti'itɨ ayajna a'u tyaj a'utyáuu. 13Ajta aɨn Jesús, ayaa pu tihua'utaixaa tɨcɨn: ―Sata'aj muan tihua'umín. Matɨ'ɨj mi meyan tiraata'ixaa tɨcɨn: ―Aii tu'u ticha'ɨ a'achu cumu anxɨvica ɨ pan, tyajta hua'apuaca ɨ hue'ite, ca'ɨn tyej tyaja'uvá'ananan ɨ maj cɨn ti'icua'ani naijmi'i. ―Ayaa mu tiraata'ixaa. 14Majta aɨme ɨ tyetyaca, ayaa mu ara'ase a'achu cumu anxɨj vi'ira'a. Aj pu i Jesús ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Miche'e a'ujrá'asen ɨ tyaɨte, muaacua jetze mua'arástɨmá'a, meyee majta meyee. 15Matɨ'ɨj mi meyan huarɨj. Majta ɨ tyaɨte, naimi'i a'ujrá'asaca'a. 16Aj pu i Jesús, ra'ancuraɨ'ɨpɨ'ɨ ɨ pan, ajta ɨ hue'ite. Aj pu i ute'e a'unyeeraca'a. Rɨ'ɨ pu tiraata'a ɨ Dioj. Ajta, autyejche tɨ ra'antitaaraxɨ'ɨn ɨ pan, ajta ɨ hue'ite. Aj pu i hua'utaɨ'ɨpɨ'ɨ aɨme ɨ maj jamuan á'ujhua'anya'a. Matɨ'ɨj mi autyajhuii maj ha'uraɨ'ɨpɨ'ɨte'en ɨ tyaɨte. A'atzu mu a'atee maj hua'uraɨ'ɨpɨ'ɨte'esin ɨ pan, majta ɨ hue'ite. 17Naimi'i mu tyu'ucuaa. Tyamua'a mu tityáaju'uxai. Majta aɨme ɨ maj Jesús jamuan á'ujhua'anya'a, mauche'e majta tya'ava'ɨstya'axɨ sicɨri jetze maɨjna tɨ tya'avá'aturaa. Ajta aɨn ɨ sicɨri, ayaa pu tya'ará'asaca'a a'achu cumu tamuaamuata'a japuan hua'apua. 18A'anaj pu ayan tyuju'urɨj. Au pu a'ahua'a Jesús tényuusima'a rusaɨj. Aɨ mu raseijracaa ɨ maj jamuan á'ujhua'anya'a. Ayaa pu tihua'utaihua'uri'i tɨcɨn: ―¿A'ini meti'ixa ɨ tyaɨte a'atɨ nyaj pueen inyaa? 19Ayaa mu tiraata'ixaa tɨcɨn: ―Seica meyan ti'ixa tɨcɨn muaa pa nu'u paɨn pueen aɨjna ɨ Juan tɨ hua'amuaɨ'ɨhuacara'a. Majta seica meyan tɨcɨn muaa pa nu'u paɨn pueen aɨjna ɨ Elías tɨ ajmi'i seijra'acaa. Majta seica meyan tɨcɨn saɨj pu nu'u a'itáraa hua'a jemi ɨ mɨ'ɨchite tɨ Dioj jetze ma'acan ti'ixaxa'ata'a. 20Aj pu i ayan tihua'utaihua'uri'i tɨcɨn: ―Ari muan, ¿a'ini seti'imua'atze a'atɨ nyaj pueen? Ajta aɨn ɨ Pedro, ayaa pu tiraata'ixaa tɨcɨn: ―Muaa pa hui paɨn pueen ɨ Cɨriistu'u tɨ Dioj an muja'ujra ɨ ɨpuari japua. 21Ajta aɨn ɨ Jesús, eihua pu huéijca maj nu'u cai a'atɨ ixaatya'a a'atɨ tɨ pueen. 22Ajta Jesús ayan tihua'uta'ixaa tɨcɨn: ―Ayaa pu tyu'ujxe'eve'e ineetzi jemi, i nyaj nyajta hua'a jetze airaanye ɨ tyaɨte nyej ni inyaa eihua rajpueiitzi na'ara'ani. Majta aɨme ɨ hua'avaujsi, majta aɨme ɨ mej tie'ijta u teyujta'a, majta aɨme ɨ mej ti'imua'ata ɨ yu'uxari jetze tɨ Moisés ra'uyu'uxaca'a, naimi'i mu hui nyetíti. Majtá nyeje'icatan. Ajta, tɨ'ɨj tyauuma'aca hueica xɨcaj, na'itamej hua'a tzajta'a ɨ mɨ'ɨchite nyej ni ruuri na'ara'ani. ―Ayaa pu tihua'uta'ixaa. 23Tɨ'ɨqui ayan tihua'uta'ixaa tɨcɨn: ―Tɨ pua'a a'atɨ raxe'eva'a tɨ á'ucha'acanye'en nyaa jamuan, ayaa pu ruxe'eve'e tɨ aɨn anacaican ma ruuraini a'ij tɨ ti'ijxe'eve'e ɨ ru tzajta'a. Ajta e'eyan che'e aɨn huataura'an tɨj na'a tɨ yu auca'itɨ a'ame tɨ ayan che'eta na'a tirajpueiitzi a'ara'ani nyatɨj hui inyaa tirajpueiitzi na'ara'ani. Che'e aɨn ajta ayan huarɨni a'ij nyej ti'ijxe'eve'e inyaa, tɨj na'a tɨ yu auca'itɨ a'ame. 24’Ayaa pu'u, tɨ pua'a a'atɨ aɨjna cɨn ti'itesa'a tɨ nain ti'ijsaɨre'en tɨj na'a pua'amua yen ti'iseijre'e tɨ'ij ruxaahua chaa a'ara'ani, aru tɨ pua'a ari huamɨ'ɨni, capu che'e a'ij tiraatyavaɨre'esin aɨjna tɨ tí'ijcha'ɨ. Ajta tɨ pua'a a'atɨ huamɨ'ɨni aɨjna cɨme'e tɨ na'ara'astijre ineetzi, aɨ pu xaa hui auche'e ratyauuni ɨ ruxaijnyu'uca tɨ auj ruuricaa. 25’Ahuii, ¿a'ini tyajamua'amitejte'e muejmi? ¿A'ini ti'itɨ tiraatyava'ɨri ɨ a'atɨ tɨ nain huamué'itɨn tɨ ayan seijre'e iiyan chaanaca japua tɨ pua'a e'eyan ya'uraini aɨjna ɨ a'atɨ ɨ ruxaijnyu'uca tɨ auche'e ruuricaa? Capu hui a'atzu ti'itɨ a'ij tiraatyava'ɨri, tzɨte'e. 26’Tɨ pua'a a'atɨ ti'itevi'ira'a neetzi jemi ca'ɨn a'ij nyej ti'ixa, inyaa i nyaj nyajta hua'a jetze airaanye ɨ tyaɨte, ayaa nu hui che'eta nyana'a tyu'utatévi'ira'ata ɨ jemin ajna xɨcajra'a nyej jetzen yava'acányejsin. ’Ayaa nu tyaja'amue'ixaate'e. Ajna nu xaa yava'acányejsin, neti'ityavaa nu na'ame ti'itɨj Rey cɨme'e. Ayaa nu che'eta nain cɨn te'entinmua'areera na'ame tɨj ɨ niya'upua. Nyajta nu huataseijre'esin hua'a jamuan ɨ mej ti'ivaɨre'e ɨ tajapua. Huapɨ'ɨ pu hui naa seira'a a'ame mej mi naa rɨ'ɨ tinya'utaseij ɨ tyaɨte. 27’Ayaa nu hui tyaja'amue'ixaate'e tzaahuati'ira'a cɨme'e, seica maj ya huatyáuu ayajna, camuu xɨ cui'ini silu matɨ'ɨj anacaican raseijran tɨ Dioj tyu'utaijta iiyan chaanaca japua. ―Ayaa pu tihua'uta'ixaa aɨjna ɨ Jesús. 28Tyauuma'aca a'achu cumu arahueica xɨcaj tɨ Jesús ayan tyu'utaxajtaca'a, aj pu i aɨme a'uví'itɨ, aɨjna ɨ Pedro, ajta aɨjna ɨ Juan, ajta aɨjna ɨ Jacobo. Matɨ'ɨj mi anticɨj ɨ jɨri japua. Tɨ'ɨqui Jesús autyejche tɨ huatejnyuuni. 29Tɨ'ɨj auj tyenyuusima'a, aj pu i saɨque huaujruu aɨjna ɨ Jesús ɨ runyeerime jetze. Tyamua'a pu naa tyu'utyacueinaraca'a ɨ cɨɨxura'ara'an. Ayaa pu ti'ityátaave'e cumu metyamaxcava'ara. 30Matɨ'ɨj mi hua'apua huataseijre jamuan ɨ Jesús. Ai mu aɨn pueen aɨjna ɨ Moisés tyaacan, ajta aɨjna ɨ Elías. 31Huapɨ'ɨ mu naa seijra'acaa. Majta jamuan tí'ixajtacaa aɨjna ɨ Jesús. Aɨj mu cɨn tyú'urixaatya'acaa aɨjna ɨ tɨ cɨn araurastejsin ajna Jerusalén, tɨ aɨn huamɨ'ɨni ajna. 32Ajta aɨn ɨ Pedro, majta ɨ maj hua'apua ɨ maj a'utyáuuca'a jamuan, eihua mu cu'utzíjcucaa. Matɨ'ɨj huajɨ, matɨ'ɨj mi hua'useij aɨme ɨ tyetyaca ɨ maj aa huatyáuuca'a jamuan ɨ Jesús. Majta raaseij a'ij tɨ eenya'a ɨ Jesús tɨ eihua huapɨ'ɨ naa seijra'acaa. 33Matɨ'ɨj meri a'ucɨɨnicu aujna tɨ a'utyejvee ɨ Jesús aɨme maj hua'apua ɨ tyetyaca, aj pu i ayan Pedro tiraata'ixaa tɨcɨn: ―Maestru, naa pu xa'apɨ'ɨn tyej ya huatyáuu. Tiche'e hui hueicaca huataahua, ɨnaamua, seij tɨ mueetzi a'a a'ame, ajta seij, Moisés tɨ ra'a a'ara'ani, ajta seij, Elías tɨ ra'a a'ara'ani. ―Ayaa pu tyu'utaxajtaca'a aɨjna ɨ Pedro a'ini capu a'ij ra'amitejtya'acaa. 34Tɨ'ɨj auj ti'ixáatacaa, aj pu i aitɨri huataseijre. Aj pu i hua'a jetze rájrupi. Tɨ'ɨj hua'a jetze rájrupi, matɨ'ɨj mi tyu'utatzɨn aɨme ɨ maj Jesús jamuan á'ujhua'anya'a. 35Tɨ'ɨqui nyuucari a'icánamuajre ɨ jaitɨri tzajta'a, ayan tɨcɨn: ―Ai pu hui aɨn pueen ɨ niyauj, ɨ nyaj ra'antihuau. Sata'aj raanamua. ―Ayaa pu tyu'utaxajtaca'a. 36Tɨ'ɨj ayan tyu'utaxaa, an pu a'utyaváa a'araa rusaɨj aɨjna ɨ Jesús. Majta aɨme ɨ maj jamuan á'ujhua'anya'a, aɨ mu ru'utya'a ɨ ru tzajta'a. Camu a'atɨ huata'ixaa a'ij mej tyu'useij. 37Yaa ruijmua'a yee, matɨ'ɨj meri acaacɨj ɨ jɨri japua, eihua mu tyaɨte ra'antinajchaca'a. 38Meenti seij pu a'utyavaaca'a hua'a tzajta'a ɨ tyaɨte. Aɨ pu raatajé tɨcɨn: ―Maeestru, eihua nu hui muahuavii paj ya'utyeeseij ɨ niyauj, a'ini aɨ nu'u caj ti'ijyauj. 39Xaijnyu'ucari tɨ a'ij pua'a een, aɨ pu hui rájviivi'i. Aɨj pu cɨn, eihua rujijhuave'e ɨ pa'arɨ'ɨ. Ajta eihua pu hua'aruri rata'aca ɨ jetzen. Aɨj pu cɨn áijjaamɨxcue'ire'e ɨ ruteni jetze. Cɨj pu'u tirata'aca tɨ ruxaahua rɨ'ɨ me tyaja'ucha'acane'en. Pu'uri ra'apua'arite'esin. 40Nyahua'uhuaviiri'i hui nyaɨme ɨ maj a jamuan á'ujhua'an maj raatamuarite'en tɨ tzajta'an seijre'e. Majta cai raayɨ'ɨtɨhua'a. ―Ayaa pu tiraata'ixaa aɨjna ɨ a'atɨ. 41Ajta aɨn Jesús, ayaa pu tyu'utanyúu: ―Muan mɨ sej iiji huátyaamua, caxu hui tya'atzaahuate'e, mɨ sej a'ij pua'a ti'ityetyaɨte. ¿A'achuni ruxe'eve'e nyej a'ateeri muejmi jemi nyej ni rɨ'ɨ amuaaruuren? Ma ave'evi'itɨchi mɨ pa'arɨ'ɨ. 42Tɨ'ɨj auj e'eve'ema'acaa, aɨ pu tiyaaru'u ra'itarai a chuaata'a, ajta hua'aruri raata'a. Aru aɨn Jesús, aɨ pu ra'ajtya'axɨ ɨ tiyaaru'u. Aj pu i tiraahuaa ɨ pa'arɨ'ɨ. Ajta raatatui ɨ taatajra'an. 43Majta naimi'i mu naa rɨ'ɨ tira'utaseij aɨjna cɨme'e tɨ Dioj ayan raaruu aɨjna tɨ huapɨ'ɨ ruxe'eve'e. Matɨ'ɨj mauj a'ij tyaja'useijracaa ɨ tyaɨte maɨjna cɨme'e a'ij tɨ Jesús huarɨj, ayaa pu tihua'uta'ixaa aɨme ɨ maj jamuan á'ujhua'anya'a. 44Ayan tɨcɨn: ―Rɨ'ɨ xu'u muan tiraanamua. Ayaa pu hui ti'inyaruuren ineetzi, i nyaj nyajta hua'a jetze airaanye ɨ tyaɨte. Aviitzi mu cɨn neetzi tyu'utatuire'esin hua'a jemi ɨ tyaɨte. ―Ayaa pu tihua'uta'ixaa. 45Majta maɨn ɨ maj jamuan á'ujhua'anya'a, camu yau'eitaa mua'araa a'ij tɨ huataujmua'a ɨ nyuucari tɨ raataxajtaca'a aɨjna ɨ Jesús, silu huatauravaataca'a mej mi cai yau'eitaa mua'ara'ani. Majta mu ti'itzɨɨnya'acaa. Aɨj mu cɨn cai raataihua'uri'i maɨjna cɨme'e a'ij tɨ huataujmua'a. 46A'anaj pu ayan tyuju'urɨj. Aɨme ɨ maj Jesús jamuan á'ujhua'anya'a, aɨ mu a'utyajhuii mej tyujreeve aɨjna cɨme'e yee a'ataani eitze'e va'acan cɨn ti'ityejvee ityan tyaj tamuaamuata'a japuan hua'apua ara'ase. 47Ajta aɨn Jesús, aɨ pu ramua'areeraca'a a'ij mej ti'imuajcaa ɨ rutzajta'a. Aj pu i pa'arɨ'ɨ avé'evi'itɨ. Tɨ'ɨj i a vejli'i raatéjche a'u tɨ a'utyejvee. 48Aj pu i ayan tihua'uta'ixaa tɨcɨn: ―A'atɨ tɨ na'a tɨ ra'ancure'evi'itɨn aijna i pa'arɨ'ɨ nenyuucajtze'e, aɨ pu hui ajta na'ancure'evi'itɨn ineetzi. Ajta aɨn tɨ na'ancure'evi'itɨn ineetzi, aɨ pu ajta ra'ancure'evi'itɨn aɨjna tɨ tinaataij. Ayaa pu'u ti'en a'ini aɨjna tɨ eitze'e cɨle'enye'en cɨn ti'ityejvee muan mɨ sej nyaa jamuan á'ujhua'an, ɨ Dioj jemi, aɨ pu hui eitze'e va'acan cɨn ti'ityejvee cai maa a'atɨ. ―Ayaa pu tihua'uta'ixaa aɨjna ɨ Jesús. 49Ajta aɨn ɨ Juan, ayaa pu tiraata'ixaa tɨcɨn: ―Maeestru, a'atɨ tu a'useij tɨ hua'amuaritya'acaa ɨ tiyaaru'use maj hua'a tzajta'a seijre'e ɨ tyaɨte. Anyuucajtze'e pu cɨn hua'amuaritya'acaa. Tyajta ityan, tyan tu hui raata'ijmɨjri'i tɨ cai ayan rɨjcaa, a'ini capu tejmi jetze ajtyama'acan. 50Tɨ'ɨqui ayan tiraata'ixaa aɨjna ɨ Jesús tɨcɨn: ―Caxu ra'ijmɨjra a'ini a'atɨ tɨ na'a tɨ cai a'ij a'amuaruure, aɨ pu xaa a'amuavaɨre'e. ―Ayaa pu tihua'uta'ixaa. 51Tɨ'ɨj ari vejli'itaca tɨ tyaja'ure'enyejsin ajna xɨcajra'a tɨ jetzen Dioj ra'avi'itɨn ɨ tajapua, Jesús pu raaxa'apɨ'ɨntare nain cɨme'e tɨ aun a'ujnyén anti Jerusalén. 52Seica pu huataityaca'a mej mi anacai a'ujnyén. Aa mu a'ará'a chajta'a a'u maj huachaatɨme aɨme Samaariya tɨ e'ema'acan. Au mu a'atanye mej mi rɨ'ɨ tyu'uruuren a'u maj a'aráiixa. 53Majta aɨme ɨ maj aun e'echajca'a, camu ra'ancure'evi'itɨ maɨjna ɨ Jesús, a'ini mu'uri ramua'areeraca'a tɨcɨn Jerusalén pu a'ujnyejsin. 54Majta aɨme ɨ maj hua'apua, aɨjna ɨ Jacobo, ajta aɨjna ɨ Juan, matɨ'ɨj raamua'areeri'i, ayaa mu tiraataihua'uri'i maɨjna ɨ Jesús tɨcɨn: ―Tavastara'a, ¿a'ini hui peti'ijxe'eve'e tej ti teyan huarɨni? ¿Ni tyaraataijte'en ɨ Dioj tɨ ute'e ye'icáxɨre'en ɨ taij tɨ cɨn hua'ucui'ini naijmi'ica, matɨj mana'a ayan maj huachaatɨme? ―Ayaa mu tiraataihua'uri'i. 55Aj pu i Jesús pɨ a'ure'eve. Aj pu i hua'ajtya'axɨ. Aj pu i ayan tihua'uta'ixaa tɨcɨn: ―Ca xu hui ramua'aree ti'itɨ tɨ xaijnyu'ucara'ara'an ayan ca'anijra'a tyajamuaata'aca sej si seyan tyu'utaxaj. 56A'ini inyaa, i nyaj nyajta hua'a jetze airaanye ɨ tyaɨte, canu hui nyaɨjna cɨn mu a'uve'eme nyej ni hua'antipua'arite'en ɨ tyaɨte, silu aɨj nu cɨn mu a'uve'eme nyej ni hue'irajtuaani. ―Ayaa pu tihua'uta'ixaa. Majta a'ucɨj. Majta seij chajta'ana jetze a'atanye. 57Matɨ'ɨj mauj huaju'ucaa ɨ juye jetze, seij pu ayan tiraata'ixaa tɨcɨn: ―Nyaa nu hui a jamuan a'uma'a na'ame a'u tɨ na'a pa á'umej. 58Jesús pu ayan tyu'utanyúu tɨcɨn: ―Aɨme ɨ jarachuiise, au mu hui u'uche a'u tɨ aucúcu'unijmee. Majta aɨme ɨ pina'ase, pi'ista jetze mu tyu'uritu'aatya. Me nyajta inyaa, i nyaj nyajta hua'a jetze airaanye ɨ tyaɨte, canu huateechi'i a'u nyaj a'utacuti. 59Jesús pu seij huataij ɨ tevi tɨcɨn: ―Pata'aj á'ucha'acanye'en nyaa jamuan. Ajta aɨn tyaata'a, ayaa pu tiraata'ixaa tɨcɨn: ―Niche'e nya'u ya huatacati asta cai huamɨ'ɨni ɨ nitaata nyej ni ra'ava'anan a'ij tej ti'ijrɨ'ɨre ityan. Aj nu xaa a jamuan á'ucha'acanya'a na'ame. 60Jesús pu ayan tiraata'ixaa tɨcɨn: ―Miche'e maɨn ra'ava'ana ɨ mɨ'ɨchi aɨme ɨ hua'axa'a mɨ'ɨchite maɨjna cɨme'e ɨ maj cai ramua'ate ɨ Dioj. Pajta muaa, aricu a'ura'a pej pi ɨ nyuucari hua'uta'ixaate'en tɨ cɨme'en raxa ɨ Dioj tɨ nainjapua tie'ijta. ―Ayaa pu tiraata'ixaa aɨjna ɨ Jesús. 61Ajtahua'a seij pu ayan tiraata'ixaa tɨcɨn: ―Nyavastara'a, nyaa nu hui a jamuan á'ucha'acanya'a na'ame, aru nyauj mi'i u a'atanen nye e'eche nyej ni hua'utataujte'en ɨ ne'ihuaamua'a, nyajta ɨ nyavaujsimua'a. 62Ayaa pu tyu'utanyúu aɨjna ɨ Jesús tɨcɨn: ―Aɨjna ɨ a'atɨ tɨ autyejche tɨ ti'imuare'e, tɨ pua'a ari e'ita'a uma'aca ajta raatyaxaahua, aɨ pu hui cai ti'itɨj vaɨre'e jemin ɨ Dioj tɨ nainjapua tie'ijta.

will be added

X\