San Lucas 7

1Tɨ'ɨj Jesús raatapua'ajtaca'a tɨ tihue'ixaatya'acaa ɨ tyaɨte, aj pu i aun á'uraa u Capernaum. 2Au pu saɨj a'utyavaaca'a xantaaru'u tɨ anxɨte tie'ijta. Aɨjna jemi, seij pu ti'icu'i tɨ jemin ti'ivaɨre'e. Pu'uri á'ame'erajcaa. Ajta ɨ xantaaru'u, eihua pu raxe'eva'acaa aɨjna tɨ jemin ti'ivaɨre'e. 3Tɨ'ɨqui aɨn anxɨte tɨ tie'ijta, aɨ pu raamua'areeri'i a'ij tɨ ti'itɨ ruurajcaa ɨ Jesús. Aj pu i tyaɨte huataij mej mi ya'utajeeve. Aɨme ɨ tyaɨte, ai mu aɨn pueenya'a ɨ maj Israel jetze ajtyama'acantacaa, majta ɨ mej tie'ijtacaa u teyujta'a. 4Matɨ'ɨj mi aun e'ire'enye a'u tɨ Jesús a'utyavaaca'a. Eihua mu raatyéejee. Ayaa mu tiraata'ixaa tɨcɨn: ―Eecan pu raavijte'e paj a'ume'en jemin a'u tɨ e'eche pej pi peyan huarɨni a'ij tɨ timuaatahuaviira. 5’Eecan pu hui rɨ'ɨ titájcha'ɨ aɨjna. Ajta aɨ pu rá'ajtaahuaca'a ɨ teyuu. ―Ayaa mu tiraata'ixaa. 6Tɨ'ɨqui Jesús u á'umej hua'a jamuan. Aa pu vejli'i auma'aca, tɨ'ɨj aɨn tɨ anxɨte tie'ijta, ajta pu ru'amiincustyamua'a huataij mej mi meyan tiraata'ixaa tɨ nu'u cai aun a'ara'asti aujna tɨ e'eche. Ayaa mu tiraata'ixaa tɨcɨn: ―Nyavastara'a, capu hui rɨ'ɨ tiraavijte'e paj anya'asti. 7Aɨj pu cɨn, capu ayan tina'amitejtya'acaa tɨ raavijte'e nyaj nyaun a'atanyén a'u paj a'utyavaaca'a. Tɨ ij cai muamuare'eriste'e, ayaa papu'u hui huarɨni paj raataxaj yee pu'uri huaruj ɨ tɨ ajemi ti'ivaɨre'e. Tɨ pua'a peyan tyu'utaxaj, aj pu aɨn rujni ɨ tɨ nye jemi ti'ivaɨre'e. 8’Aɨj nu hui cɨn neyan ti'imue'ixaate'e a'ini seij pu ti'inye'ijte'e ineetzi. Nyaa nu nyajta ti'itɨj cɨn antinmua'aree; nyajta tihue'ijte'e ɨ xantaaru'u. Tɨ pua'a seij nyetyu'utaijte'en yee aricu, aɨ pu ayan rɨni tɨ á'ume'en. Na'ari tɨ pua'a seij neyan tyu'uta'ixaate'en yee mu a'uta'iyi'i, ayaa pu rɨni tɨ mu a'uve'eme'en. Ayaa nu hui tiraata'ixaate'en aɨjna tɨ nyej jemi'i ti'ivaɨre'e yee ayaa paj huarɨni. Ajta aɨn, ayaa pu rɨni. ―Ayaa pu tiraata'ixaa aɨjna ɨ xantaaru'u aɨjna ɨ Jesús. 9Ajta aɨn Jesús, tɨ'ɨj ayan tiraanamuajri'i, eecan pu naa rɨ'ɨ tira'utaseij aɨjna jemi. Tɨ'ɨqui pɨ a'ure'eve tɨ ij hua'useiirajra'ani ɨ tyaɨte ɨ maj jamuan á'ujhua'anya'a. Ayaa pu tihua'uta'ixaa tɨcɨn: ―Ayaa nu tyaja'amue'ixaate'e, ayun tɨ huatacá'a iiya Israel, canu hui a'anaj a'atɨ huátyau tɨ ayan che'eta na'a tya'atzaahuate'e tɨj aɨjna ɨ xantaaru'u. ―Ayaa pu tihua'uta'ixaa. 10Majta maɨn ɨ maj tyu'utaijti'ire, aɨ mu huara'acɨ a'u tɨ e'eche aɨjna ɨ xantaaru'u. Matɨ'ɨj a'uré'enye, pu'uri huarújcaa aɨjna tɨ jemin ti'ivaɨre'e. 11A'atzu a'atyeevi'i, Jesús pu aun a'ará'a chajta'a tɨ ayan tyaja'arajtyahuaa tɨcɨn Naín. Majta mu a'ucɨj jamuan aɨme ɨ maj jamuan á'ujhua'anya'a. Majta seica ɨ tyaɨte, mui'itɨ mu a'ucɨj jamuan. 12Mu'uri vejli'i auju'ucaa ta'antyéninyei chajta'ana jetze matɨ'ɨj seica antinájchaca'a maj mɨ'ɨchi huáchuisima'a. Aɨjna ɨ mɨ'ɨchi, aɨ pu pueenya'a yaujra'an ɨ jɨita'a tɨ rusaɨj. Aɨ pu'u caj pɨti'iyaujra'antaca'a tɨ tyaatacan. Eihua mu tyaɨte jamuan huaju'ucaa. 13Tɨ'ɨj Jesús raaseij, eihua pu huataujxaamɨste jemin ɨ jɨita'a. Aj pu i ayan tiraata'ixaa tɨcɨn: ―Capaj ayeinya. 14Tɨ'ɨqui ajtyáxɨɨraca'a. Aj pu i ra'ajtamuárej ɨ cɨye tɨ japuan a'ujcá'a aɨjna tɨ huamɨ'ɨ. Majta maɨn ɨ maj ráachuisima'a, aɨ mu huatyahuiixɨ. Aj pu i Jesús ayan tiraata'ixaa tɨcɨn: ―Muaa, tyamueij, ayaa nu ti'imue'ixaate'e yee: Ajchesi. ―Ayaa pu tiraata'ixaa. 15Ajta aɨn tɨ huamɨ'ɨ, aɨ pu a'ujyeijxɨ. Aj pu i autyejche tɨ tyu'utaxaj. Tɨ'ɨqui Jesús raatatui ɨ naanajra'an. 16Matɨ'ɨj mi naimi'i naa rɨ'ɨ tira'utaseij a'ij tɨ ti'itɨj huáruu ɨ Jesús. Eecan pu utyaavatzɨ ɨ hua'a tzajta'a. Matɨ'ɨj mi rɨ'ɨ tyu'uta'a ɨ Dioj jemi. Ayaa mu tyu'utaxajtaca'a tɨcɨn: ―A'atɨ pu hui huataseijre itejmi jemi tɨ va'acan cɨn ti'ityejvee, ajta tɨ Dioj jetze ma'acan ti'ixaxa'a. Pu'uri mu a'uve'eme ɨ Dioj tɨ ij hua'utyavaɨre'en ɨ rutyaɨtestyamua'a. 17Nainjapua mu raamua'areeri'i a'ij tɨ ti'itɨ huarɨj aɨjna ɨ Jesús. Nainjapua tɨj na'a aun tɨ huatacá'a u Judeeya, ajta ayée tɨ huacá'a, naimi'i mu raamua'areeri'i. 18Majta maɨn ɨ maj jamuan á'ujhua'anya'a aɨjna ɨ Juan tɨ hua'amuaɨ'ɨhuaca, aɨ mu raata'ixaa a'ij tɨ Jesús rɨjcaa. Tɨ'ɨqui hua'apuaca huatajee aɨjna ɨ Juan. 19Aj pu i hua'utaityaca'a mej mi raataihua'u aɨjna ɨ Jesús yee ni qui muaa paɨn pueen aɨjna tɨ nu'u me'e ve'eme, na'ari ayan ruxe'eve'e tej seij huachu'eve'en. Matɨ'ɨj mi a'ucɨj. 20Matɨ'ɨj mi aun e'ire'enye a'u tɨ a'utyavaaca'a aɨjna ɨ Jesús. Matɨ'ɨj mi meyan tiraata'ixaa tɨcɨn: ―Aɨjna ɨ Juan tɨ hua'amuaɨ'ɨhuaca, aɨ pu hui tyaja'utaityaca'a tyej ti teyan timuaataihua'u yee: “¿Ni qui muaa paɨn pueen aɨjna tɨ me'e ve'eme na'ari tyauj seij chu'eva'a?” ―Ayaa mu tiraata'ixaa. 21Ajta aɨn ɨ Jesús, auchan pu mui'icaca tyu'uhuaa ɨ maj tí'icucui'icaa, ajta seica ɨ maj cai re'enya'a ɨ rujetze, ajta ɨ maj tiyaaru'u hua'a tzajta'a seijra'acaa. Ajta aɨme ɨ maj aracucu'unijmee, aɨ pu tihua'uhuaa mej mi majtahua'a atanyéjnye'ere. 22Tɨ'ɨqui Jesús ayan tiha'uta'ixaa aɨme ɨ tɨ Juan hua'utaityaca'a tɨcɨn: ―Sericu muan. Sata'aj a'uju'un ɨ Juan jemi, sata'aj tiraata'ixaate'en a'ij sej seri tyu'useij, a'ij sej seri tyu'unamuajri'i yee aɨme ɨ maj aracucu'unijmee, aɨ mu hui mu'uri majtahua'a mauunyejnye'e. Majta aɨme ɨ maj anacɨyaaxavi'ijmee, aɨ mu mu'uritahua'a á'ujhua'an. Majta aɨme ɨ maj tijcúcui'inyaca'a maɨjna cɨme'e tɨ tinyajxɨ hua'ahue'ira'a jetze, tɨ ayan antyahuaa tɨcɨn leepra, mu'uri huarúj. Majta aɨme, ɨ maj nacuxa'itaca'a, mu'uritahua'a huityánajca'amua. Majta aɨme ɨ mej meri huacuii, mu'uri majtahua'a mana'a huatarú. Nyajta hui tihua'uta'ixaate'esin aɨme ɨ maj cai a'ij te'eviicue'i aɨjna cɨme'e ɨ nyuucari ɨ maj cɨn huataujtyamua'ave'en. 23’Rɨ'ɨ pu hui tiraata'asin aɨjna ɨ a'atɨ tɨ cai a'ij pua'a tiraata'an ma nuuraiini, aɨjna cɨme'e tɨ cai che'e te'eviicue'i neetzi jemi. ―Ayaa pu tihua'uta'ixaa aɨjna ɨ Jesús. 24Matɨ'ɨj mi a'ucɨj aɨme ɨ maj Juan jamuan á'ujhua'anya'a. Tɨ'ɨqui Jesús autyejche tɨ tihué'itii ɨ tyaɨte aɨjna cɨme'e ɨ Juan. Ayaa pu tihua'uta'ixaa tɨcɨn: ―¿Ti'itajni sej a'utyeeseij saujna ɨtzitá? ¿Ni qui huiini xámue'i u sa'useij tɨ aaca raru'uxante'e? Caxu xaa nya'u. 25Ca'ɨn, ¿ti'itajni sana'a hui a'utyeeseij? ¿Ca'ɨn a'atɨ sana'a u a'utyeeseij tɨ re'enye'en tya'ucaavɨ? Caxu xaa nya'u, a'ini xu'uri ramua'aree tɨcɨn aɨme mej meyan re'enye'en tya'ucavɨ́ɨtɨmee, majta aɨme tɨ hua'araanajchi naijmi'i tɨj na'a tɨ ti'inajchi, au mu e'eche a'u maj rey e'eche. 26’Ari tɨ pua'a sacai saɨjna a'utyeeseij, ¿ti'itajni sana'a a'utyeeseij? ¿Ni qui hui saɨj tɨ Dioj jetze ma'acan ti'ixaxa'a? Ee tzɨte'e, ayaa nu tyaja'amue'ixaate'e yee aɨ pu pɨrɨcɨ. Ajta aɨn, eitze'e pu va'acan cɨn ti'ityejvee. 27Ai pu hui aɨn pueen ɨ tɨ cɨme'en ra'axa ɨ yu'uxari jetze tɨcɨn: Nyaa nu hui seij anacai huataíti tɨ huataseijre'esin pacai muaa. Aɨ pu rɨ'ɨ hua'aruuren ɨ tyaɨte mej mi mua'ancure'evi'itɨn mueetzi. 28’Ayaa nu tyaja'amue'ixaate'e yee aɨme tzajta'a naijmi'i ɨ tyaɨte ɨ maj huataseijre iiyan chaanaca japua, capu a'atɨ a'anaj te'entyajrupi ti'itɨj cɨme'e tɨ eitze'e ve'e cai ɨ tɨ cɨn ti'ityejvee aɨjna ɨ Juan. Ma ajta, aɨn tɨ eitze'e cɨle'enya'a cɨn ti'ityejvee ɨ Dioj jemi, eitze'e pu hui va'acan cɨn ti'ityavaa a'ame aɨjna ɨ a'atɨ cai aɨjna ɨ Juan ajna xɨcajra'a jetze tɨ Dioj ayan autyéchesin tɨ tyu'utaijta nainjapua. 29’Majta naijmi'i ɨ maj raanamuajri'i a'ij tɨ tyu'utaxajtaca'a aɨjna ɨ Juan, aɨ mu hui ra'ancura'a a'ij tɨ ti'ijxe'eve'e ɨ Dioj maɨjna cɨme'e tɨ Juan hua'umuaɨ'ɨhua. Ayaa mu che'eta mana'a ra'ancura'a aɨme mej ti'ityeji'ivi. 30’Majta hui aɨme ɨ fariseos, majta aɨme ɨ mej tyu'ujmua'ate ɨ yu'uxari jetze tɨ Maisée ra'uyu'uxaca'a, aɨ mu hui ratityaca'a a'ij tɨ ti'ijxe'eve'e ɨ Dioj a'ini camu huaujmuaɨ'ɨhuaca'a ɨ Juan jemi. ―Ayaa pu tyu'utaxajtaca'a aɨjna ɨ Jesús. 31Ajtahua'a saɨque pu ayan tihua'utaihua'uri'i ɨ Jesús tɨcɨn: ―¿A'ini nyana'a tiraataxaj yee ayaa mu e'en aɨme ɨ tyaɨte ijii maj huátyaamua? ¿Ni cai me'e ti'itɨ tɨ ayan een cumu aɨme? 32’Ayaa mu hui e'en matɨj ɨ tɨ'ɨrii maj aj vejli'i a'ujti a'u maj tyaja'atua. Aɨ mu meyan tihua'atají'ivi ɨ seica tɨcɨn: “Tetyu'utacɨ'ɨsite sej si tyu'utyeenye'en, ma sajta cai, caxu tyu'utyeenye. Tyajta tu tyu'utachuiicaca'a tɨ tyu'uxaamɨste'e cɨme'e, ma sajta cai, caxu huaujyeinyaca'a.” 33’Ayaa nu neyan tyaja'amue'ixaate'e a'ini aɨjna ɨ Juan, tɨ'ɨj aɨn yee uve'enye, capu hui pan cua'aca, capu ajta viinu ya'aca. Sajta muaan, ayaa xu e'en matɨj aɨme ɨ tɨ'ɨrii saɨjna cɨme'e sej seyan ti'ixa saɨjna cɨme'en ɨ Juan tɨcɨn: “Tiyaaru'u pu tzajta'an seijre'e.” 34’Nyajta inyaa, i nyaj nyajta hua'a jetze airaanye ɨ tyaɨte, nyaa nu ti'icua'aca, nyajta ya'aca. Sajta muan, ayaa xu ti'ixa neetzi cɨme'en yee huapɨ'ɨ nu ti'icua'aca, nyajta nyatahueive'e. Ayaa xu sajta ti'ixa tɨcɨn yee ya'acui huatyejvee hua'amiincu aɨme mej ti'ityeji'ivi, ajta aɨme mej a'ij pua'a titetyújcha'ɨ. 35Aɨjna tɨ Dioj jemi rɨ'ɨ metyáumua'aree, aɨ mu hui ramua'areeran ɨ yaujmua'ame'en ɨ maj rɨ'ɨ metityaumuámua'aree ɨ Dioj jemi. ―Ayaa pu tihua'uta'ixaa aɨjna ɨ Jesús. 36Ayaa pu a'anaj tyuju'urɨj. Seij pu raata'inee aɨjna ɨ Jesús tɨ jamuan tyu'ucua'ani. Aɨjna ɨ a'atɨ, fariseo pu pueen. Ayaa pu antyahuaa tɨcɨn Simón. Aj pu i Jesús a a'ura'ahuiixɨ a'u tɨ meesa vejli'i a'utyejvee a'ij mej tiraaxa'apɨ'ɨntari'iri'i aɨjna tɨ raata'inee. 37Meenti aɨn jɨita'a, au pu a'utyavaaca'a. Eihua pu a'ij pua'a ti'ityújchaɨca'a aɨjna ɨ Dioj jemi. Tɨ'ɨqui aɨ raamua'areeri'i tɨcɨn au pu tyaja'acua'a fariseo tɨ e'eche aɨjna ɨ Jesús. Aj pu i tetej limeetajra'a pu ava'ajaj. Ti'itɨ pu urajmuaa tɨ naa tyáará'i. 38Tɨ'ɨqui a vejli'i a'utyeechaxɨ a'u tɨ Jesús anu'uhuará'aca'a ɨ meesa jetze. Ruyeinyaca'a aɨjna ɨ jɨita'a. Tɨ'ɨqui Jesús ɨɨca jetze títzutixɨ ɨ tɨ a'itajá'ara'ata aye'icaa aɨjna ɨ jɨita'a. Tɨ'ɨqui rucɨpua cɨn racahuatzi'iri'i, ajta ra'anávisiitɨmuaa. Tɨ'ɨqui ɨɨcajra'an jetze racaaxɨre aɨjna tɨ naa tyáará'i. 39Ajta aɨn fariseo tɨ Jesús huata'inyee, tɨ'ɨj raaseij a'ij tɨ rɨjcaa aɨjna ɨ jɨita'a, ayaa pu ti'imuajcaa ɨ rutzajta'a tɨcɨn: “Tɨ pua'a amɨn pueenye'en tevi saɨj tɨ Dioj jetze ma'acan ti'ixaxa'a, aɨ pu hui ramua'areeran ti'itɨ tɨ tevijra'an pɨrɨcɨ aɨjna ɨ jɨita'a tɨ a'ij pua'a ti'ityujcha'ɨ Dioj jemi.” 40Ajta aɨn Jesús, ayaa pu tyu'utaxajtaca'a tɨcɨn: ―Simón, ti'itɨj nu muaata'ixaate'esin. Ayaa pu tyu'utanyúu aɨjna ɨ Simón tɨcɨn: ―Maeestru, pata'aj naata'ixaate'en. 41Aj pu i Jesús ayan tiraata'ixaa tɨcɨn: ―Seica mu nu'u hui tira'achaɨra'acaa maɨjna ɨ a'atɨ tɨ tumin hua'utanyáɨjte, aɨme maj hua'apua. Seij pu nu'u ayan tira'achaɨra'acaa a'achu cumu anxɨ cieentu ɨ tumin. Ajta ɨ saɨj, ayaa pu nu'u tira'achaɨra'acaa a'achu cumu muaacua jetze ɨ tumin. 42’A'ini camu a'atzu ti'ituava'a ɨ maj cɨn tiraanajchite'en, aɨ pu nu'u hui tihua'utauuni'iri'i aɨme ɨ maj hua'apua a'achu maj caj tira'achaɨra'acaa. Ma'acui xaa, ¿a'ini ti'imua'amitejte'e? ¿A'ataani hui eitze'e raxe'eva'a a'ame aɨjna tɨ hua'utauuni'iri'i? ―Ayaa pu Jesús tiraataihua'uri'i. 43Ajta aɨn ɨ Simón, ayaa pu tyu'utanyúu tɨcɨn: ―Ayaa pu tina'amitejte'e ineetzi aɨjna cɨme'e tɨ tihua'utauuni'iri'i, aɨ pu hui eitze'e raxe'eva'a a'ame aɨjna tɨ eitze'e tira'achaɨra'acaa a'ini eitze'e pu tiraatauuni'iri'i. Jesús pu ayan tiraata'ixaa tɨcɨn: ―Xa'apɨ'ɨn pej hui tyu'utaxajtaca'a. 44Aj pu i pɨ a'ure'eve tɨ ij raaseij aɨjna ɨ jɨita'a. Aj pu i ayan tiraata'ixaa aɨjna ɨ Simón tɨcɨn: ―¿Ni pacai raseij peijna i jɨita'a? Nyaa nu utyajrupi iiyu pe e'eche. Capaj racaaxɨre ɨ jaj ɨ nyaɨɨca jetze. Ma ajta'i amɨn ɨ jɨita'a, aɨ pu hui na'anaɨɨri'i nyaɨɨca jetze aɨjna cɨme'e tɨ a'itaja'ara'atajye'ica. Ajta na'anáhuatzi'iri'i ɨ rucɨpua cɨme'e. 45’Muaa paj hui cai nu'ityevisiitɨmuaa. Ma ajta'i amɨn mɨ jɨita'a, tɨj na'a tɨ huiityajrupi yu chi'ita, aɨ pu na'anávisiitɨmuaa ɨ nyaɨɨca jetze. 46Muaa paj cai na'ava'axɨri'iri'i ti'itɨ aceiti yen nyamuutze'e. Ma ajta'i amɨn, aɨ pu hui na'anaxɨri'iri'i ɨ nyaɨɨca jetze ti'itɨ tɨ naa tyáará'i. 47’Aɨj nu cɨn neyan ti'imue'ixaate'e. Aɨ pu eihua autyajturaa ɨ Dioj jemi. Nyajta nu nain tiraatauuni'iri'i a'ini eihua pu nyexe'eva'a a'araa. Ma pajta muaa, mɨ nyaj cɨj caj timuaatauuni'iri'i, muaa paj hui cɨj caj ti'inyexe'eve'e. ―Ayaa pu tiraata'ixaa. 48Ajta Jesús pu ayan tiraata'ixaa aɨjna ɨ jɨita'a tɨcɨn: ―Nu'uri hui timuaatauuni'iri'i ɨ paj cɨn autyajturaa ɨ Dioj jemi. 49Majta maɨn ɨ seica ɨ tɨ hua'uta'inee, matɨ'ɨj meyan tiraanamuajri'i, matɨ'ɨj mi autyajhuii mej ti'ihuáurihua'u, tɨcɨn: ―¿A'ataani pueen amɨjna mɨ tɨ tihua'utauuni'ira aɨjna cɨme'e ɨ maj cɨn autyajturaa ɨ Dioj jemi? ―Ayaa mu tyu'urihua'uraca'a. 50Ajta Jesús ayan tiraata'ixaa aɨjna ɨ jɨita'a tɨcɨn: ―Pu'uri Dioj mue'irajtuaa a'ini petya'atzaahuate'e muaa. Aricu hui a'ura'a axaahua. ―Ayaa pu tiraata'ixaa.

will be added

X\