San Lucas 6

1Ayaa pu ajta tyuju'urɨj ajna ɨ xɨcajra'a mej jetzen rusa'upi. Aa pu auma'acaa a'ita'a u vi'ira'ata'a ɨ Jesús. Majta maɨn ɨ maj jamuan á'ujhua'anya'a, aɨ mu autyajhuii maj ru'ijtzaanaxɨ'ɨn ti'itɨ atzi tɨ triigu jetze huijnyaxɨ. Matɨ'ɨj mi raatyámuatɨ'ɨsixɨ ɨ rumuajca'a jetze. Majta autyajhuii maj raacua'ani. 2Meenti aɨme ɨ fariseos, seica mu a vejli'i a'utyáuuca'a. Matɨ'ɨj mi meyan tiraataihua'uri'i aɨjna ɨ Jesús. Meyan tɨcɨn: ―¿A'ini hui een cɨn peyan ti'imuare'e ti'itɨ tɨ nu'u cai rɨ'ɨri tɨ ayan ti'itɨj u'uruuren ajna xɨcajra'a mej jetzen pua'a rusa'upi? 3Jesús pu ayan tihua'uta'ixaa tɨcɨn: ―¿Ni sacai muan a'anaj ra'ujijve ɨ yu'uxari jetze a'ij tɨ huarɨj aɨjna ɨ David tyaacan tɨ'ɨj huata'icuataca'a, majta maj jamuan á'ujhua'anya'a? 4Au pu hui a'utyajrupi u teyujta'a, ɨ tɨ ee chi'ira'an pueen ɨ Dioj. Ajta e'eyan, aɨ pu ru'iraɨ'ɨpɨ ɨ pan maj Dioj huatámuaɨ'ɨvejte. Tɨ'ɨqui raacuaa. Ajta aɨme tyu'umi ɨ maj jamuan á'ujhua'anya'a. Aɨjna ɨ pan, aɨ mu'u racua'aca aɨme ɨ mej ti'ivaɨre'e aujna teyujta'a. Capu hui ti'itɨ a'ij huarɨj aɨjna jemi ɨ David tyaacan. 5Ajta ayan tɨcɨn: ―Ayaa nu tyaja'amue'ixaate'e inyaa, i nyaj nyajta hua'a jetze airaanye ɨ tyaɨte, ayaa nu hui een cɨn antinmua'aree nyajta nyaɨjna xɨcaara'an mej jetzen rusa'upi. ―Ayaa pu tihua'uta'ixaa ɨ Jesús. 6Ajtahua'a hua'a seij jetze ɨ xɨcaara'an mej jetzen rusa'upi, au pu a'utyajrupi u teyujta'a. Au pu tihuá'amua'atyajcaa. Ajta saɨj au pu unú'ujvaaca'a tɨ cɨyaaxara'a ɨ rumuajca'a jetze, jɨrɨɨta'an pujme'en. 7Majta maɨn ɨ fariseos, majta maɨn ɨ mej ti'imua'ata ɨ yu'uxari jetze tɨ ra'uyu'uxaca'a aɨjna ɨ Moisés tyaacan, aɨ mu reeva'acaa ti'itɨj maj cɨme'en jetzen tya'ujpuá'ajte'en. Ayaa mu ti'imuajcaa yee aisɨ tɨ pua'a cai seij tyu'uhuaate'en, aijna xɨcajra'a tyej jetzen tasa'upi. 8Ma ajta Jesús, aɨ pu rú'umua'areeracaa a'ij mej ti'imuajcaa. Aj pu i ayan tiraata'ixaa aɨjna tɨ rumuajca'a jetze cɨyaaxara'a tɨcɨn: ―Ajchesi. Ma huatyechaxɨ ma e'ita'a. Aj pu i ajche. Aa pu a'utyeechaxɨ. 9Tɨ'ɨqui Jesús ayan tihua'uta'ixaa tɨcɨn: ―Ayaa nu tyajamuaataihua'ura ti'itɨ tɨ í'irɨni aijna xɨcajra'a tyej jetzen tasa'upi. ¿Ni qui í'irɨni tɨ a'atɨ ayan raaruuren ɨ tɨ i'ixa'apɨ'ɨn na'ari ɨ tɨ a'ij pua'a een? ¿Ni qui ajta í'irɨni tɨ seij huiirajtuaa tɨ ij aɨn cai huamɨ'ɨni na'ari hui tɨ raaje'ica? 10Tɨ'ɨqui Jesús hua'useirajraa aɨme ɨ maj aa a'antavaatɨma'acaa. Aj pu i ayan tiraata'ixaa aɨjna tɨ cɨyaaxara'a ɨ rumuajca'a jetze tɨcɨn: ―Huatatzaara hui mua'a muajca'a. Aj pu i raatatzaaraca'a. Cɨme'en pu'u ayan huarɨj, aj pu i huaruj. 11Majta maɨn ɨ fariseos, eecan mu huatanínyu'ucacuca'a maɨjna cɨme'e maj cai a'ij tirajtyau a'ij mej ye'i cɨme'en jetzen tya'ujpuá'ajte'en. Matɨ'ɨj mi autyajhuii mej ti'ityurixaate'en yee a'ij mej ye'i raaruuren maɨjna ɨ Jesús. 12Ajna'ɨmɨ, Jesús pu a'umej jɨri tzajta'a tɨ'ij huatyejnyuuni ɨ Dioj jemi. Huataxai tɨ huatyenyuu. 13Tɨ'ɨj tapua'arijma'aca, aɨ pu hua'utajee aɨme ɨ maj jamuan á'ujhua'anya'a. Tɨ'ɨqui hua'ava'ajajpuaxɨ a'achu cumu tamuaamuata'a japuan hua'apua maj ara'ase. Ayaa pu hua'utamuá'a tɨcɨn apuusturu'u, tɨ ayan huataujmua'a tɨcɨn saɨj tɨ tyu'utaijti'ire. Ayaa mu huataujmua'a aɨme ɨ mej tyu'utaijti'ire. 14- 15Ai mu aɨn pueen ɨ tɨ hua'ava'ajajpuaxɨ. Anacaican, aɨj pu huatajee aɨjna ɨ Simón, ɨ maj majta meyan raatamuá'a tɨcɨn Pedro. Aj pu ijta'ij aɨjna huatajee ɨ Andrés. Juutzajra'an pu pueen aɨjna ɨ Simón. Seica pu ajta huatajee. Aɨme mu aɨn pueen aɨjna ɨ Jacobo, ajta aɨjna ɨ Juan, ajta aɨjna ɨ Felipe. Aɨj pu ajta huatajee aɨjna ɨ Bartolomé, ajta aɨjna ɨ Mateo, ajta aɨjna ɨ Tomás. Ajta aɨjna ɨ Jacobo, aɨ pu yaujra'an pueen ɨ Alfeo. Jesús pu ajta aɨjna huatajee ɨ Simón. Aɨme pu jetze ajtyama'acan aɨme ɨ mej meyan hua'atamua'amua tɨcɨn ɨ maj raayɨ'ɨtɨ maj huanyá'use'en. 16Aɨme pu ajta huatajee aɨjna ɨ Judás tɨ yaujra'an pueen ɨ Jacobo, ajta aɨjna ɨ Judás tɨ ayan te'entimu'utaca tɨcɨn Iscariote. Ai pu aɨn pueen tɨ tyu'utatuii ɨ Jesús. Aɨme pu'u avá'ajajpuaxɨ. 17Tɨ'ɨqui Jesús acajraa ɨ jɨri japua, majta ɨ maj jamuan á'ujhua'anya'a. Au pu a'ará'a a'u tɨ a'upa'atza. Au mu eihua ajtyáxɨɨraca'a ɨ tyaɨte, ɨ maj jamuan á'ujhua'anya'a, majta seica. Eihua mu majta ajtyáxɨɨraca'a ɨ maj huachaatɨme au tɨ huatacá'a u Judeeya, majta maɨn ɨ maj aun huachaatɨme u Jerusalén. Aɨ mu ajta ajtyáxɨɨraca'a ɨ maj aun huachaatɨme aujna la coosta, ajna a'ahua'a u Tiro, ajta ajna a'ahua'a u Sidón. 18Ayaa mu een cɨn mu e'ire'enye mej mi raanamua, tɨ ij aɨn tihua'uhuaate'en ɨ maj cɨn ti'icucui'ijmee. Majta maɨn ɨ maj rajpueijtzica'a aɨjna cɨme'e ɨ tiyaaru'use tɨ hua'a tzajta'a seijre'e, Jesús pu ajta tihua'uhuaa. 19Naimi'i matɨj mana'a maun a'utyáuuca'a, ayaa mu tí'ityesa'aca'a mej ra'ajtamuare'en aɨjna cɨme'e tɨ aɨn jetze a'iraaye'i ɨ muáre'eri'ira'ara'an tɨ cɨn tihua'uhuaate'en naijmi'ica. 20Tɨ'ɨqui hua'antaseirajraa aɨme ɨ maj jamuan á'ujhua'anya'a. Tɨ'ɨqui Jesús ayan tihua'uta'ixaa tɨcɨn: ―Sata'aj hui huataujtyamua'ave'en, muan mɨ saj cai a'ij ti'ijviicue'i, a'ini muejmi pu ari tyu'ucɨ'ɨ tɨ Dioj tyaja'amue'ijte'e sej si jamuan tyu'utaijta para rusen cɨme'e. 21’Sata'aj hui huataujtyamua'ave'en, muan mɨ saj tajcu. Dioj pu tyajamuaata'asin ɨ saj cɨn huataujvaɨre'en. ’Sata'aj huataujtyamua'ave'en mɨ saj ruyein saɨjna cɨme'e tɨ a'ij pua'a ti'iseijre'e iiyan chaanaca japua. Muaan xu na'anaa xa'aju'un saɨjna cɨme'e tɨ Dioj ari amua'ancu'uvajxɨ. 22’Sata'aj hui huataujtyamua'ave'en tɨ pua'a seica tyaɨte majamuájchaɨre'e, na'ari tɨ pua'a majamuaatamuarite'en, na'ari tɨ pua'a maj a'ij pua'a á'amuaruuren nusu tɨ pua'a metyaja'amuaxajtzi'ira maɨjna cɨme'e sej na'astijre'e ineetzi, i nyaj nyajta hua'a jetze airaanye ɨ tyaɨte. 23Tɨ'ɨj tyaja'ure'enen ajna mej meyan a'ij pua'a á'amuaruuren ɨ tyaɨte, sata'aj hui huataujtyamua'ave'en a'ini eihua pu huapɨ'ɨ tyaja'amuacɨ'ɨti aɨjna cɨme'e tɨ aun tyeje'ema'acan a'u tɨ Dioj e'eseijre'e. Sata'aj tyu'uteene'en saɨjna cɨme'e saj rutyamua'ave'e, a'ini hua'avaujsimua'acɨ'ɨ, ayaa mu hui che'eta mana'a a'ij pua'a hua'uruu aɨme ɨ mej ti'ixaxa'ata'a ɨ Dioj jetze ma'acan. 24’Sajta muaan, mɨ sej chijtyaani, sata'aj hui huataujxaamɨste'en a'ini xu'uri ra'ancura'a iiyan chaanaca japua ɨ tɨ rɨ'ɨ tyajamuaata'asin. 25’Sata'aj huataujxaamɨste'en, muan mɨ sej nain tí'ijcha'ɨ, a'ini capu hui ti'itɨ huatyaturaasin muejmi jemi tɨj na'a rusen cɨme'e. ’Sata'aj huataujxaamɨste'en, muan mɨ sej na'ana, cha'a sana'a, a'ini muan xu ruyeinixɨ'ɨsin, sajta huataujxaamɨste'esin. 26’Sata'aj hui huataujxaamɨste'en tɨ pua'a naimi'i meyan tyaja'amue'ixaate'e yee xa'apɨ'ɨn xu huarɨj, a'ini hua'avaujsimua'acɨ'ɨ, ayaa mu che'eta mana'a tihua'uta'ixaa aɨme ɨ maj cai tzaahuati'ira'a cɨme'e ti'ixaxa'ata'a ɨ Dioj jetze ma'acan. 27’Me nyajta inyaa, ayaa nu tyaja'amue'ixaate'e mɨ sej ne'inamua: ’Sata'aj hui hua'axe'eva'a saɨme ɨ maj amuajchaɨre'e, sata'aj sajta rɨ'ɨ hua'uruuren saɨme ɨ maj a'ij pua'a a'amuaruure. 28’Sata'aj rɨ'ɨ tihua'uta'an aɨme ɨ maj a'ij pua'a tyaja'amuaxa. Sata'aj hui sajta ɨ Dioj jemi hua'a cɨme'en huatyejnyuuni aɨme ɨ maj a'ij pua'a a'amuaruure. 29’Tɨ pua'a a'atɨ mui'ityejveeni a'ɨpee jetze, pata'aj hui pajta u jetze pujme'en raatanyɨste'en tɨ'ij ajtahua'a mui'ityejveeni aun jetze. Tɨ pua'a a'atɨ mua'achuira mɨ a'achamaara, pata'aj pajta mɨ asiicu'u raatapijte'en. 30’Pata'aj pajta tihua'uta'an naijmi'ica a'achu maj hui pua'amua ti'itɨj muahuavii. Ajta tɨ pua'a a'atɨ ti'itɨ antɨni ɨ tɨ mueetzi a'a, capaj hui rahuaviira ca'anejri cɨme'e tɨ muaatatuire'en. 31’Pata'aj pajta hui peyan hua'uruuren ɨ seica a'ij pej ti'ijxe'eve'e mej meyan muáaruuren mueetzi. 32’Niche'e seij tyajamuaataihua'u. Tɨ pua'a seyan hue'ixe'eve'e sana'a aɨme ɨ maj amue'ixe'eve'e muejmi, ¿a'ini hui tyajamua'amitejte'e aɨjna cɨme'e ɨ nyuucari? ¿Ni qui ti'itɨ samue'itɨn ɨ Dioj jemi? Caxu xaa nya'u ti'itɨ huamué'itɨn a'ini aɨme ɨ maj a'ij pua'a rɨcɨ, aɨ mu majta hui hue'ixe'eve'e aɨme ɨ seica ɨ maj majta hue'ixe'eve'e. 33’Ajta, tɨ pua'a seyan rɨ'ɨ tihua'ata'acare'en sana'a aɨme ɨ maj rɨ'ɨ tyajaamuaata'aca, ¿ni tzaa ayan tyajamua'amitejte'e saj saɨjna cɨn ti'itɨj huamué'itɨn ɨ Dioj jemi? Ayaa nu tyaja'amue'ixaate'e yee caxu hui a'atzu ti'itɨj huamué'itɨn a'ini ayaa mu che'eta mana'a rɨcɨ aɨme ɨ maj a'ij pua'a rɨcɨ. 34’Ajta, tɨ pua'a hui seyan tihua'utanyaɨjte'en ti'itɨj tɨ na'a saɨjna cɨme'e mej mi e'eyan amuaatatuire'en, ¿ni ayan tyajamua'amitejte'e saj saɨjna cɨn ti'itɨj huamué'itɨn ɨ Dioj jemi? Capu ayan te'eme. Caxu hui a'atzu ti'itɨj huamué'itɨn a'ini aɨme ɨ maj a'ij pua'a rɨcɨ, aɨ mu hua'utanyaɨjte ɨ seica, majta meyan rachu'eve'en mej mi e'eyan tihua'utatuire'en nain ɨ maj caj tihuatanyɨjte. 35’Ayaa xu'u huarɨni. Sata'aj hui hua'axe'eva'a aɨme ɨ maj amua'ajchaɨre'e. Sata'aj rɨ'ɨ tihua'ajchaɨ. Sata'aj sajta ti'itɨj tɨ na'a hua'utanyaɨjte'en. Caxu hua'ahuaviira ca'anejri cɨme'e mej mi amuaatatuire'en. Ayaa nu tyaja'amue'ixaate'e tɨ pua'a seyan huarɨni, eihua pu hui tyajá'amuacɨ'ɨti. Sajta xu yaujmua'ame'en puéenya'a xa'aju'un aɨjna ɨ Dioj ɨ tajapua tɨ e'eseijre'e, a'ini aɨ pu rɨ'ɨ tihua'ajchaɨ aɨme ɨ maj cai rɨ'ɨ tihua'ata'aca, ajta aɨme ɨ maj a'ij pua'a rɨcɨ. 36’Sata'aj seyan hua'ancu'uvajxɨ'ɨn, a'ini aɨn ɨ tɨ amue'iya'upua, aɨ pu hui ajta hua'ancu'uvajxɨ'ɨsin. 37’Caxu a'ij tihua'ajeeva ɨ seica; tɨ ij cai Dioj a'ij tyaja'amuajeeva muejmi. Caxu sajta hua'axɨjtya'a ɨ seica, tɨ ij cai Dioj tyaja'amuaxɨjte'en muejmi. Sata'aj hui tihua'utauuni'i ɨ seica. Tɨ pua'a seyan huarɨni, Dioj pu ajta tyajamuaatauuni'ira. 38’Sata'aj tihua'utapueijve'en ɨ seica jemi. Tɨ pua'a seyan huarɨni, eihua pu ajta muejmi tyajamuaatapueijve'esin. Ayaa pu te'eme tɨj a'atɨ ra'ava'ɨste'en ɨ medida jetze. Aɨjna ɨ a'atɨ, mi'i pu rɨ'ɨ ra'ura'aruuren, ajta raatyáruuráaxɨ'ɨn tɨ'ij rɨ'ɨ huáujra'atza. Tyamua'a pu naa tira'ava'ɨste'esin tɨ ij cai avé'evitzen. Aj pu i, amua'ancara'atzi'ira ɨ a'amuasiicu'u jetze. Ayaa pu á'amuaruuren a'ini a'achu saj hui caj tyu'utapueijve'e, ayaa pu che'eta na'a Dioj pu amuaatapueijve'esin muejmi. ―Ayaa pu tihua'uta'ixaa aɨjna ɨ Jesús. 39Ajtahua'a seij nyuucari pu cɨn tihue'itiiri'i. Ayan tɨcɨn: ―A'ini tyajamua'amitejte'e muejmi aɨjna cɨme'en ɨ tɨ aracun. ¿Ni rɨ'ɨri tɨ aɨn tɨ aracun ra'anvi'itɨn ɨ juye jetze seij tɨ ajta aracun? Ayaa nu tyaja'amue'ixaate'e. Capu a'atzu rɨ'ɨri, tɨ aɨn ra'anvi'itɨn, a'ini tɨ pua'a aɨn ra'anvi'itɨn, naimi'i mu hui atyávatzɨjsin a'u tɨ a'atyacun. 40’Ajta ayaa pu hui een aɨjna cɨme'e ɨ mej nyaa jamuan á'ujhua'an. Aɨn ɨ a'atɨ tɨ ayan tyu'ujmua'ate capu ayan che'eta na'a ruxe'eve'e tɨj aɨn tɨ ti'ijmua'ate, silu tɨ'ɨj ari ra'antipua'arite'en ɨ tɨ tyu'ujmua'ate, aj pu hui xaa ayen eenya'a a'ame tɨj aɨjna ɨ tɨ tiraamuá'ate. 41’Pajta muaa, a'ini hui een cɨn peyan raseij ɨ a'ihuaara'a aɨjna tɨ cɨj caj tya'utyajturaa ɨ Dioj jemi. Ma pajta muaa, capaj aseij ɨ paj hui cɨn eihua a'atura ɨ Dioj jemi. 42Tɨ pua'a peri eihua cɨn autyajturaa ɨ Dioj jemi, ¿a'ini hui ti'irɨ'ɨri pej peyan tiraata'ixaate'en paɨjna ɨ a'ihuaara'a tɨ cɨj caj tya'utyajturaa a'ij tɨ ti'itɨj cɨn tya'utyajturaa ɨ Dioj jemi? Capu a'atzu a'ij ti'irɨ'ɨri a'ini capaj hui aseij muaa asaɨj a'ij pej ti'itɨj cɨn tya'utyajturaa ɨ Dioj jemi. ’Muaa mɨ paj a'ij pua'a ti'ijrɨ'ɨre me eijre'e, pauj mi'i saɨque tyu'umua'ati, pajta nain cɨn tihua'uta'ixaate'en ɨ tyaɨte ɨ paj hui cɨn autyajturaa ɨ Dioj jemi. Aj pu hui xaa ayan tiraavijte'e pej peyan tiraata'ixaate'en ɨ seij a'ij tɨ ti'itɨj cɨn tya'utyajturaa ɨ Dioj jemi. 43’Ayaa pu'u ajta een, tɨj ɨ cɨye, nain tɨ ti'ire'en, re'enye'en pu tí'itaaca. Ajta nain ɨ cɨye tɨ cai ti'ire'en, capu ajta re'enye'en tí'itaaca. 44Ajta naijmi'i ɨ cɨye tɨ tí'itaaca, ayaa mu hui ti'imua'amua maɨjna ɨ tɨ tí'itaaca, a'ini aɨjna ɨ huarej taca'i, capu aɨn rataca'i ɨ cɨye tɨ tyetzicare'e silu aij pu jetze ma'acan ɨ rucɨye'e. Ajta aɨjna ɨ uuva taca'i, capu ajta aɨn rataca'i ɨ jɨ'ɨtzijca'ixa'a jetze silu aij pu ajta jetze ma'acan ɨ rucɨye'e. Ayaa xu che'eta sana'a sajta ti'ijmua'areeran a'atɨ tɨ tevijra'a pueen tij rɨ'ɨ ti'ityevi nusu cai saɨjna cɨme'e a'ij tɨ rɨcɨ. 45’Aɨjna ɨ a'atɨ tɨ rɨ'ɨ ti'itevi, aɨ pu hui rɨ'ɨ ti'ixaxa'a, ajta aɨjna tɨ rɨ'ɨ ti'ixaxa'a, au pu ma'acan tzajta'an a'u tɨ eihua ya'avaa tɨ xa'apɨ'ɨn een. Ajta aɨn tɨ a'ij pua'a ti'itevi, aɨ pu a'ij pua'a ti'ixaxa'a, ajta aɨjna tɨ a'ij pua'a ti'ixaxa'a, au pu hui ma'acan tzajta'an a'u tɨ eihua ya'avaa tɨ a'ij pua'a een. Ayaa nu tyaja'amue'ixaate'e. A'atɨ tɨ na'a, aɨ pu hui ti'ixaxa'a aɨjna cɨme'e ɨ tɨ ra'avaa ɨ ru tzajta'a. 46’Sajta muan, mɨ saj hui cai seyan ti'iruure a'ij nyej tyaja'amue'ixaate'e, a'ini een cɨn seyan ti'inejee tɨcɨn: “Nyavastara'a, nyavastara'a.” 47’Ayaa nu hui tyajamuaata'ixaate'esin a'ini een aɨjna ɨ a'atɨ tɨ neetzi jemi mu a'uve'eme tɨ ij neetzi huanamua, ajta ayan tyu'uruuren a'ij nyej ti'ixa. 48Ayaa pu hui een tɨj aɨjna ɨ a'atɨ tɨ chi'i ájtaahuaca'a. Aɨjna ɨ a'atɨ, eecan pu ru'uca'ijche tyetya'ɨmɨ. Tɨ'ɨqui rá'ajtaahuaca'a ɨ jaxu'u ɨ tyetye japua. Matɨ'ɨj mi huatyeviiyaca'a. Ajta huatamɨ'ɨyaca'a ɨ jatya'ana. Aj pu i jetzen ajtya'a ɨ jatya'ana ɨ chi'i. Ajta aɨn ɨ chi'i, capu hui a'ave a'ini tyamua'a pu naa rɨ'ɨ tira'ajtaahuaca'a ɨ a'atɨ. 49’Ma ajta, aɨjna ɨ a'atɨ tɨ ayan ti'inyanamua, tɨ pua'a cai ayan tyu'uruuren a'ij nyej ti'ixa, ayaa pu hui een tɨj ɨ saɨj tɨ ajta chi'i ájtaahuaca'a. Capu ru'uca'ijche tyetya'ɨmɨ aɨjna ɨ a'atɨ. Matɨ'ɨjta mi huatyeviiyaca'a. Ajta huatamɨ'ɨyaca'a ɨ atya'ana. Tɨ'ɨj jetzen ajtya'a, aj pu i ra'arai. Nain pu hui tyaja'uraii aɨjna ɨ a'atɨ.

will be added

X\