San Lucas 5

1A'anaj tɨ ayan tyuju'urɨj tɨ aɨn Jesús aun a'utyavaaca'a a'u tɨ jaj a'avastɨme tɨ ayan tyaja'arajtyahuaa tɨcɨn: Genesaret. Eihua mu tyaɨte ajtyáxɨɨraca'a aɨjna jemi. Aɨ mu ranamuajracaa ɨ nyuucari tɨ cɨme'en raxa ɨ Dioj. 2Tɨ'ɨqui Jesús hua'apuaca huaseij baarcu ma a'acávivɨ́jma'acaa ɨ mej hue'ité jetze viivi'i. Majta aɨme, mu'uri ti'ija'usica'a ɨ tyu'ujxajmua'a. 3Tɨ'ɨqui Jesús atyajraa ɨ seij jetze ɨ baarcu, aɨjna Simón tɨ racɨi. Tɨ'ɨqui ayan tiraatahuaviiri'i aɨjna ɨ Simón tɨ a'atzu ɨmɨ huatyechaxɨn a aata'a. Tɨ'ɨqui a'ujyeijxɨ. A pu aracaii tihua'amua'ate ɨ tyaɨte. 4Tɨ'ɨj raatapua'ajtaca'a tɨ tihue'ixaate'en, aj pu i ayan tiraata'ixaa aɨjna ɨ Simón tɨcɨn: ―Pata'aj eitze'e a'ɨmɨ huatyechaxɨn a'u tɨ eitze'e autɨ'ɨ ɨ jaj. Pajta ra'atyahua'axɨn mɨ a'axajmua'a pata'aj hue'ité huavívi'i. 5Simón pu ayan tyu'utanyúu tɨcɨn: ―Maestru, tu'uri huatáxai tyej ti'imuare'e. Catu ti'itɨj huatyeevi'i. Capu amɨn a'ij, a'ini muaa pa hui peyan tinaata'ixaa, ayaa nu rɨni. 6Matɨ'ɨj mi ra'atyaahua'axɨ ɨ hua'axajmua'a. Ayaa mu cɨn huarɨj, eihua mu huapɨ'ɨ hue'ityátɨɨ. Tɨn pu ajtyasujtza'anixɨ ɨ xajmua'ari ɨ hue'ité cɨme'e. 7Matɨ'ɨj mi hua'utajee ɨ ru'amiincustyamua'a ɨ maj araati ɨ seij jetze ɨ baarcu, mej mi mu a'uré'enyen mata'aj hua'utavaɨre'en. Matɨ'ɨj mi a'uré'enye. Matɨ'ɨj mi hua'ava'ɨstya'axɨ ɨ hue'ité ɨ baarcu jetze. Tɨn mu atyarutixɨ aɨjna cɨme'e maj ava'ɨstyaca'a. 8Ajta aɨn Simón, cɨme'en pu'u raaseij, aj pu i titunutaca'a ɨ Jesús jemi. Ayaa pu tiraata'ixaa tɨcɨn: ―A'ura'a ineetzi jemi, nyavastara'a, a'ini eihua nu autyajturaa mueetzi jemi. 9Ayaa pu tyu'utaxajtaca'a a'ini eihua pu naa rɨ'ɨ tira'utaseij aɨjna cɨme'e maj eihua huapɨ'ɨ hua'uvívi'i ɨ hue'ité. 10Ayaa mu che'eta mana'a naa rɨ'ɨ tira'utaseij aɨjna ɨ Jacobo, ajta aɨjna ɨ Juan. Aɨ pu hua'ataata aɨjna ɨ Zebedeo. Majta aɨme, aɨ mu jemin ti'imuare'e jamuan ɨ Simón. Tɨ'ɨqui aɨn Jesús, ayan tiraata'ixaa aɨjna ɨ Simón tɨcɨn: ―Capej ti'itzɨɨnya'a. Ijii tɨ yu auca'itɨ a'ame, neetzi jemi papu'u hui tyaɨte tisaɨre'esin. ―Ayaa pu tiraata'ixaa. 11Matɨ'ɨj mi hue'itajájpuaxɨ ɨ baarcu a tɨ a'uhuáchi, matɨ'ɨj mi nain teje'etiá'a. Matɨ'ɨj mi a'ucɨj jamuan ɨ Jesús. 12Ajna'ɨmɨ, tɨ'ɨj Jesús aun a'utyavaaca'a ajna a'ahua'a chajta'a, seij pu e'ire'enye jemin. Tyamua'a pu eihua ti'icá'atza aɨjna cɨme'e tɨ tinyajxɨ ɨ hue'ira'ara'an jetze. Tɨ'ɨj raaseij, aj pu i titunutaca'a jemin ɨ Jesús. Aa pu chuaata'ɨmɨ é'etya runyeerime cɨme'e. Ayaa pu ti'ijree tɨcɨn: ―Nyavastara'a, tɨ pua'a hui mua'araanajchi paj tinaahuaate'en. 13Tɨ'ɨqui Jesús huatamuájca'ataca'a. Ayaa pu tiraata'ixaa tɨcɨn: ―A ni'ijta nya'u na'araanajchi nyej timuaahuaate'en. Papu'uri hui huaruj. Cɨme'en pu'u ayan tiraata'ixaa, aj pu i xaa huaruj icu. 14Tɨ'ɨqui Jesús ayan tiraataij tɨcɨn: ―Capaj a'atɨ ixaatya'a silu aun pajá'ume'en jemin ɨ tɨ ti'ivaɨre'e u teyujta'a. Pata'aj huata'aseijrata jemin aɨjna. Pajta peyan tyu'utamuaɨ'ɨvajta a'ij tɨ tyu'utaijtaca'a aɨjna ɨ Moisés tyaacan mej mi raamua'aree tɨcɨn papu'uri huaruj. ―Ayaa pu tiraata'ixaa. 15Majta maɨn ɨ tyaɨte, nainjapua mu raamua'areeri'i a'ij tɨ Jesús huarɨj. Tɨj na'a ti'itápuaapua'are, eitze'e mu ranamuajracaa. Aɨj mu cɨn, eihua mu ajtyáxɨɨraca'a ɨ tyaɨte ɨ Jesús jemi tɨ aɨn tihua'uhuaate'en aɨjna cɨme'e ɨ mej ti'icucui'i. 16Ajta aɨn Jesús, a'anaj tɨ na'a pu aun a'atáninyeica'a a'u tɨ cai e'e ti'itɨjcaa tɨ'ij rusaɨj huatyejnyuuni. 17Ayaa pu tyuju'urɨj ajna'ɨmɨ. Mui'itɨ mu a e'ire'enye ɨ tyaɨte tɨj na'a aun maj huachaatɨme aujna u Galileeya, ajta aujna u Judeeya, ajta aujna u Jerusalén. Ai mu aɨn pueen ɨ fariseos, majta aɨme ɨ mej ti'imua'ata a'ij tɨ te'eyu'usi'i jetzen ɨ yu'uxari jetze ɨ Moisés tyaacan tɨ ra'uyu'uxaca'a. Aɨ mu huirátya'acaa ɨ Jesús jamuan. Ajta ɨ muáre'eri'ira'ara'an ɨ tavastara'a, aɨ pu jemin huatyajturaa tɨ'ij tihua'uhuaate'en ɨ tyaɨte. 18Majta seica aun e'ire'enye. Tevi mu huáchuisima'a, itari japua mara'ujtáca. Nainjapua pu cɨyaaxara'a ɨ ru jetze aɨjna ɨ a'atɨ. Aɨ mu huataujtese maj ru'utyajtuaani u chi'ita mej mi yanu'uhuaré'eten ɨ Jesús jemi. 19Aru capu huatarɨ'ɨristaraca'a a'ini eihua mu tyaɨte aityaujsaɨra'acaa ta'apueerta. Matɨ'ɨj mi anticɨj japuan ɨ chi'i. Matɨ'ɨj mi ra'anaacu. Aɨ mu cɨn ayan huarɨj, matɨ'ɨj ru'ucajtuaa japuan maru'ujtyaca ɨ itari. Au mu ru'ucajtuaa hua'a tzajta'a ɨ tyaɨte a'u tɨ Jesús a'utyejvee. 20Tɨ'ɨj Jesús hua'useij aɨme, aj pu i xaa raamua'areeri'i tɨcɨn metya'atzaahuate'e, tzɨte'e. Tɨ'ɨqui ayan tiraata'ixaa aɨjna tɨ cɨyaaxara'a tɨcɨn: ―Nya'amiincu, nu'uri timuaatauuni'iri'i ɨ paj hui cɨn autyajturaa ɨ Dioj jemi. 21Majta maɨn ɨ fariseos, majta maɨn ɨ mej ti'imua'ata ɨ yu'uxari jetze, aɨ mu autyajhuii mej meyan ti'imua'atze ɨ ru tzajta'a tɨcɨn: ―¿A'ataqui hui pɨrɨcɨ amɨjna mɨ a'atɨ tɨ ayan a'ij pua'a ti'ixa ɨ Dioj jemi? Seij pu'u na'a aɨn pueen tɨ tihua'utauuni'i ɨ tyaɨte ɨ maj cɨn autyajturaa ɨ Dioj jemi. Dioj pu aɨn pueen tɨ ayan tihua'utauuni'i. Ajta amɨn, capu hui aɨjna cɨn antyujmua'aree. 22Ajta aɨn ɨ Jesús, aɨ pu rusaɨj rú'umua'areeracaa a'ij mej ti'imuajcaa. Aj pu i ayan tihua'utaihua'uri'i tɨcɨn: ―¿A'ini hui een cɨn seyan ti'imua'atze ɨ rutzajta'a? 23¿Ti'itaani eitze'e muare'eri? ¿Ni eitze'e muare'eri nyej neyan tiraata'ixaate'en nyaɨjna tɨ cɨyaaxara'a yee: “Nu'uri timuaatauuni'iri'i ɨ paj cɨn autyajturaa ɨ Dioj jemi”, na'ari yee: “Ajchesi, ma paj tamé'en”? Ee xaa nya'u, ayaa nu tyaja'amue'ixaate'e nyeijna cɨme'e tɨ eitze'e muare'eri nyej neyan tiraata'ixaate'en yee: “Ajchesi, ma paj tamé'en.” 24’Aru sej si raamua'aree ɨ nyaj hui xaa nyaɨjna cɨn antinmua'aree iiyan chaanaca japua nyej ni tihua'utauuni'i ɨ maj cɨn autyajturaa ɨ Dioj jemi, ayaa nu huarɨni inyaa i nyaj nyajta hua'a jetze airaanye ɨ tyaɨte. Aj pu i ayan tiraata'ixaa aɨjna tɨ cɨyaaxara'a tɨcɨn: ―Nya'amiincu, ayaa nu ti'imue'ixaate'e tɨcɨn, ájchesi hui, pajta anchuá mɨ a'utaatzi. Aricu á'uraa u a'ache. 25Cɨme'en pu'u ayan tiraata'ixaa, aj pu i aɨn tɨ cɨyaaxara'a, ajche, yá'uchui ɨ ru'utaatzi. Tɨ'ɨqui rɨ'ɨ tiraatajee ɨ tavastara'a. Tɨ'ɨj i á'uraa ɨ ruche. 26Naimi'i mu naa rɨ'ɨ tira'utaseij. Eecan mu rɨ'ɨ tiraata'a ɨ Dioj jemi. Majta cai che'e a'ij tirájtyauva'a. Ayaa mu'u tɨcɨn: ―Ijii tu xaa ti'itɨj huaseij tɨ huapɨ'ɨ ruxe'eve'e. 27A'atzu a'ateevi'i, aj pu i Jesús aa a'uré'enye. Seij pu a'atɨ huaseij tɨ ti'ityeji'ivi. Ayaa pu antyahuaa tɨcɨn Leví. Au pu e'irajca u chi'ita a'u maj tityeje'eji'ivi. Ayaa pu tiraata'ixaa aɨjna ɨ Jesús tɨcɨn: ―Pata'aj hui nyaa jamuan á'ucha'acanye'en. 28Tɨ'ɨqui aɨn Leví ajche. Naimi'i pu tyeje'etiá'a. Tɨ'ɨqui jamuan á'uraa. 29Tɨ'ɨqui aɨn Leví tyu'uyé'este ɨ ruche aɨjna cɨme'e tɨ ari Jesús jamuan a'ucha'acan. Majta maɨn ɨ mej titye'eji'ivi, majta seica, aɨ mu hua'a jamuan ti'icua'acaa. 30Majta aɨme ɨ fariseos, majta aɨme ɨ mej ti'imua'ataca ɨ yu'uxari jetze tɨ Moisés ra'uyu'uxaca'a, aɨ mu autyajhuii mej tihua'uxajtzi'i aɨme jemi ɨ maj Jesús jamuan á'ujhua'anya'a. Ayaa mu tihua'uta'ixaa tɨcɨn: ―¿A'ini een cɨn seyan hua'a jamuan ti'icua'aca, sajta hui ya'aca jamuan ɨ mej ti'ityeji'ivi, sajta hua'a jamuan ɨ mej a'ij pua'a rɨjcaa? 31Ajta aɨn Jesús, ayaa pu tyu'utanyúu tɨcɨn: ―Ayaa nu tyaja'amue'ixaate'e. Ayaa pu hui een cɨme'en ɨ tyaɨte ɨ maj a'ucɨ́'ɨca'an jemin ɨ tɨ ya'anaca. Capu ruxe'eve'e maj a'ucɨ́'ɨca'an jemin ɨ mej re'en silu aɨme mu'u hui ɨ mej ti'icucui'i. 32Me nyajta inyaa, canu hui nyaɨjna cɨn a'uve'eme nyej ni nyaɨme huatájeevi aɨme ɨ tɨ ayan tihua'amitejte'e yee xa'apɨ'ɨn mu rɨcɨ silu aɨme nu'u ɨ maj ru'umua'aree ɨ ru tzajta'a ɨ maj cai xa'apɨ'ɨn rɨcɨ. 33Matɨ'ɨj mi meyan tiraataihua'uri'i ɨ Jesús tɨcɨn: ―Aɨme ɨ maj hui Juan jamuan á'ujhua'an, eihua mu ru'itzi'ivi, majta huatyejnyuuve ɨ Dioj jemi. Ayaa mu che'eta mana'a rɨcɨ aɨme ɨ fariseos. Ma majta, aɨme hui ɨ maj a jamuan á'ujhua'an, metiji'icua'aca, majta ya'aca, micu. 34Ajta aɨn Jesús, ayaa pu tihua'uta'ixaa tɨcɨn: ―Tɨ pua'a a'atɨ huatyényaɨchej, aɨ pu ajta ru'amiincustyamua'a huata'inen mej mi tyú'uye'esten. Aj pu i tihué'imicuan. ¿Ni qui meyan tyu'uritzi'ive'e meenti au hua'a jamuan a'utyavaaca? Camu xaa nya'u. 35’Ma ajta, auche'e pu hui tyaja'ure'enyejsin ajna xɨcajra'a tɨ jetzen ra'ajjan aɨjna tɨ huatyényaɨchej. Aj mu xaa amiincustyamua'ame'en ru'itzi'ive'en a'ini capu che'e a'ahua'a ɨ hua'amiincu. A'ini nyauche'e nu ya huatyejvee, camu hui ru'itzi'ive'en ɨ nya'amiincustyamua'a. 36Seij pu tihua'uta'ixaa ɨ nyuucari tɨcɨn: ―Tɨ pua'a a'atɨ racu'unya'apua ɨ cɨɨxuri tɨ mi'ima'acan, capu aɨjna cɨn racu'unya'apua cɨɨxuri cɨme'e tɨ cai xɨ a'anaj á'usini'i. Tɨ pua'a ayan aɨjna cɨn racu'unya'apua, aɨ pu huatyatzu'uta aɨjna ɨ cɨɨxuri tɨ jajcua tɨ'ɨj huatyaja'usini'ihua. Tɨ'ɨqui ra'atyásujtza'anaxɨ'ɨsin ɨ tɨ mi'ima'acan. Aj pu i, ɨ tɨ anásujtza'ani, eitze'e pu hui va'atɨ a'ame. 37’Ajta camu meyan rɨjcaa mej ru'ucajtu'ani navij limeetajra'a tzajta'a tɨ cára'ajchira'a viinu ti'itɨ maj mauchan raataahuaca'a. Tɨ pua'a meyan raaruuren, aɨjna ɨ viinu tɨ jajcua, aɨj pu jetze huiitaxɨ́jsin ɨ aaca, ajta autasujtza'ani ɨ navij tɨ cára'ajchira'a. Aj pu i a'uvaɨjtzi ɨ navij, ajta hui ɨ viinu. 38Aɨj pu hui cɨn ayan tyu'ujxe'eve'e tɨ iru'ucajtu'ani navij tzajta'a tɨ jajcua aɨjna ɨ viinu tɨ ajta jajcua, icu. 39’Ajta, matɨ'ɨj ra'anti'i ɨ viinu tɨ mi'ima'acan, capu a'atɨ ayan raxe'eve'e tɨ ra'antiye'en ɨ tɨ jajcua a'ini ayaa pu tira'amitejte'e tɨ cɨme'en yee eitze'e pu hui ajme'ira'a ɨ tɨ mi'ima'acan cai ɨ tɨ jajcua. ―Ayaa pu tihua'uta'ixaa aɨjna ɨ Jesús.

will be added

X\