San Lucas 3

1Ayaa pu nu'u tyuju'urɨj tɨ'ɨj tyauma'aca a'achu cumu tamuaamuata'a japuan anxɨ ninye'ira'a tɨ ti'ijtaca'a aɨjna ɨ César, tɨ ajta ayan antyahuaa tɨcɨn Tiberio. Ajna'ɨmɨ, tɨ'ɨj auj ti'ityavaaca'a tajtuhuan cɨme'e aɨjna ɨ Póncio Pilaatu aujna Judeeya, ajtahua'a saɨj pu ti'ityavaaca'a tajtuhuan cɨme'e aujna Galileeya. Ayaa pu antyahuaaca'a tɨcɨn Herodes. Ajta juutzajra'an aɨjna ɨ Herodes, aɨ pu ti'ityavaaca'a tajtuhuan cɨme'e aujna Iturea, ajta aujna Traconite. Ayaa pu antyahuaaca'a aɨjna tɨcɨn Felipe. Ajta aɨn ɨ Lisanias, aɨ pu tajtuhuan cɨme'e ti'ityavaaca'a aujna Abilinia. 2Ajna'ɨmɨ, matɨ'ɨj mauj va'acan cɨn títyatatyá'acaa u teyujta'a aɨjna ɨ Anás, ajta aɨjna ɨ Caifás, au pu a'ucatii aɨjna ɨ Juan, a'ahua'a a'u tɨ cai je'e ti'itɨ. Aɨjna ɨ Juan, aɨ pu rayauj aɨjna ɨ Zacarías. Au pu a'ucaica tɨ'ɨj Dioj raatajé. 3Nainjapua pu ye'ivajca'a tɨj na'a aun tɨ huatyacá'a ɨ jatya'ana jetze, ɨ Jordán. Ayaa pu tihue'ixaatya'acaa tɨ nu'u ayan ruxe'eve'e maj nu'u saɨque tyu'umua'ati tɨ ij nu'u Dioj tihua'utauuni'i ɨ maj cɨn autyajturaa ɨ jemin. Aj pu i Juan hua'umuaɨ'ɨhuaca'a. 4Ayaa pu che'eta na'a rɨjcaa a'ij tɨ tya'uyu'uxaca'a ɨ yu'uxari jetze aɨjna ɨ Isaías, ɨ tɨ ajmi'i ti'ixaxa'ata'a ɨ Dioj jetze ma'acan. Ayan tɨcɨn: A'atɨ pu u e'ejijhua aujna a'ahua'a a'u tɨ cai e'e ti'itɨ. Ayaa pu tyaja'axa aɨjna ɨ a'atɨ tɨcɨn: “Naa xu rɨ'ɨ huaujcaten muan sej si rɨ'ɨ tira'ancure'evi'itɨn ɨ tavastara'a, sej si cai raatamuáre'eriste'en saɨjna tɨ yan huataseijre'esin tɨ'ij amue'irajtuaani. 5Miche'e meyan rɨ'ɨ huaujcaten matɨj aɨme ɨ maj juyeta. Miche'e tyava'ɨstya'axɨ'ɨn a'u tɨ e'etyácúcu'unijmee. Miche'e majta raatyauunaxɨ'ɨn nain ɨ jɨri tɨ huacaitɨme. Ajta ɨ juye tɨ tyujtutajmee, miche'e raataje'iyitya'axɨ'ɨn. Ajta a'u tɨ cai a'upa'atza, miche'e ra'upa'atzare'en. 6Ajta, tɨ'ɨj uvé'enyen ɨ tavastara'a, naimi'i ɨ tyaɨte ɨ maj yan huachaatɨme iiyan chaanaca japua, aɨ mu raseijran ɨ tɨ cɨn Dioj hue'iratuaasin.” ―Aii pu'u. 7Ajta aɨjna ɨ Juan, ayaa pu tihua'uta'ixaa aɨme ɨ tyaɨte ɨ maj a'ure'eninyéica'a. Ayan tɨcɨn: ―Mɨ sej seyan seijre'e. Cu xuee saj a'uruaachejye'i matɨj ɨ cu'ucu'use tɨ ij cai huá'utaiixɨ'ɨ ɨ taij. ¿Ni tzaa seri ti'itese'e sicu tɨ ij cai Dioj ama'uxɨjte'en? ¿A'ataani ca'anijra'a amuaata'a sej si seyan huarɨni? 8Na'ari cai, tɨ pua'a muan rujɨɨmua'a ya seve'eré'enyen tzaahuati'ira'a cɨme'e, ayaa xu huarɨni a'ij tɨ ye'i tiraavijte'e saɨjna cɨme'e sej seri saɨque tyu'umuá'a. Caxu seyan ti'imua'atze mɨ ru tzajta'a yee ayaa pu ti'ayajna tɨ naa tyajamuaatyava'ɨri ɨ Dioj jemi a'ini muan xu i'i huaacɨxa'astyamua'ame'en aɨjna ɨ Abraham tyaacan. ’Ayaa nu hui tyaja'amue'ixaate'e a'ini ayaa pu ti'ayajna tɨ Dioj ayan tiraayɨ'ɨtɨ tɨ ayan raaruuren ɨ tetej tɨ ij saɨque huaujruuren tɨj tɨ ayan seira'a a'ara'ani matɨj tyaɨte, matɨj aɨme ɨ mej Abraham tyaacan jetze huanyej. Capu ti'itɨ a'ij tyajamuatyava'ɨri ɨ Dioj jemi sej i'i huaacɨxa'astyamua'ame'en aɨjna ɨ Abraham tyaacan. 9’Pu'uri hui vejli'i ajna xɨcajra'an jetze a'anaj tɨ pua'a Dioj amuá'axɨjte'en ca'anin cɨme'e. Ayaa pu á'amuaruuren cumu a'atɨ tɨ cɨye é'ijveichixɨ'ɨsin tyapueij cɨme'e. Naijmi'i ɨ cɨye tɨ cai tí'itaaca, aɨ pu tyu'ure'eveijchi, ajta tí'itairan. Ayaa pu che'eta na'a amuá'axɨjte'en. 10Matɨ'ɨj maɨn tyaɨte meyan tiraataihua'uri'i tɨcɨn: ―¿A'ini tyana'aqui rɨni? 11Tɨ'ɨqui ayan tihua'uta'ixaa tɨcɨn: ―Tɨ pua'a a'atɨ hua'apuaca tisiicu'u, che'e seij raatapijte'en aɨjna tɨ cai tisiicu'u. Ayan che'e tana'a, tɨ pua'a a'atɨ tí'ijchaɨca ɨ tɨ ti'icue'iri'i, che'e aɨn raata'an ɨ tɨ cai ti'itɨj ticha'ɨ. 12Majta mu e'ire'enye seica ɨ maj hua'ajijva'acaa ɨ mej ti'itɨcɨ tɨ ij aɨn hua'umuaɨ'ɨhua. Ayaa mu tiraataihua'uri'i tɨcɨn: ―Maestru, ¿a'ini taarɨni ityan? 13Tɨ'ɨqui ayan tihua'uta'ixaa tɨcɨn: ―Aij xu ancura'an a'achu tɨ caj tiraaxa'apɨ'ɨntare. Caxu hui eitze'e hua'ajijva'a. 14Majta maɨn ɨ xantaaru'u, ayaa mu majta tiraataihua'uri'i tɨcɨn: ―Cari ityan, ¿a'ini taarɨni? Tɨ'ɨqui ayan tyu'utanyúu tɨcɨn: ―Caxu hua'anahue'ira ɨ hua'atúmin. Caxu hue'itzi cɨn tihua'axajtzi'ira ɨ tyaɨte. Sajta, saɨjna cɨn rɨ'ɨ titya'ujmuajtya a'achu maj caj tyajá'amuanajchite'en. ―Ayaa pu tihua'uta'ixaa aɨjna ɨ Juan. 15Majta maɨn ɨ tyaɨte, ayaa mu ti'imuajcaa ɨ rutzajta'a yee tij cai aɨ pɨrɨcɨ ɨ Cɨriistu'u aɨjna ɨ Juan, ɨ maj rachu'eva'acaa. 16Tɨ'ɨqui Juan ayan tihua'uta'ixaa naijmi'ica tɨcɨn: ―Aru inyaa, jaj nu cɨn a'amuamuaɨ'ɨhua. Ma ajta saɨj pu au me e'eve'eme tɨ eitze'e raayɨ'ɨtɨ nyacai inyaa. A'ini nyaa nu cɨle'enya'a cɨn ti'ityejvee, ineetzi, capu ayan tiraavijte'e nyaj ra'ajtyaɨ'ɨpɨn ɨ ca'acaira'an. Ma ajta i, amɨn, xaijnyu'ucari pu huataíti tɨ huatyaturan muejmi jemi. Aɨ pu pɨrɨcɨ Dioj tɨ raxaijnyu'uca. Ajta aɨjna tɨ me e'eve'eme, aɨ pu pɨrɨcɨ tɨ rɨ'ɨ á'amuaruuren mɨ a'amua tzajta'a. 17’Ayaa pu te'eme ajna tɨ aɨn ya uvé'enyen, cu xuee tɨ cu a'atɨ ru'ityeechuica ɨ tɨ cɨn jetzen ra'anaaca'atze ɨ jatza'ara'an ɨ triigu. Ajta aɨn ru'iratu'isin ɨ xaɨri a pua'aque. Ajta aɨjna ɨ imue'eri, rajsaɨre'esin u chi'ita. Ajta ɨ xaɨri, a pua'aque pu ya'atairan ɨ taij jetze tɨ cai a'anaj á'amɨ'ɨca. ―Ayaa pu tyu'utaxajtaca'a aɨjna ɨ Juan. 18Aɨjna cɨme'e ɨ nyuucari, ajta seica cɨme'e, aɨj pu cɨme'en tihue'itiiri'i mej mi raamua'aree a'ij tɨ een ɨ Dioj jemi. 19Tɨ'ɨqui Juan ra'ajtya'axɨ aɨjna ɨ Herodes, aɨjna cɨme'e tɨ yá'uvi'itɨn aɨjna ɨ Herodías, tɨ anacai vicha'acaa aɨjna jemi ɨ juutzajra'an ɨ Herodes. Ajta pu aɨjna cɨn ra'ajtya'axɨ a'ij tɨ ti'itɨj huáruu. 20Tɨ'ɨqui Herodes a'ij pua'a huarɨj ti'itɨ cɨme'e tɨ cai xa'apɨ'ɨn een, aɨ pu ra'ityaana aɨjna ɨ Juan. 21Meenti aɨn Juan hua'amuaɨ'ɨvijhuaca'a ɨ tyaɨte, ajta pu aɨj huamuaɨ'ɨhuaca'a aɨjna ɨ Jesús. Tɨ'ɨj Jesús tyenyuusima'a ɨ Dioj jemi, tɨ'ɨj i antácuunyaraca'a u tajapua tɨ a'utyájmuaa. 22Ajta aɨn xaijnyu'ucara'ara'an ɨ Dioj, aɨ pu áva'acáma'acaa. Ayaa pu seijra'acaa tɨj cucui'i. Aj pu i japuan ujyeijxɨ. Ajta e'eyan nyuucari huanamuajri'i tɨ uj e'icanamuajre'e ute'e. Ayan tɨcɨn: ―Niyauj paj hui pɨrɨcɨ ɨ nyaj eihua mue'ixe'eve'e. Eecan paj rɨ'ɨ naata'a i nyatzajta'a. ―Ayaa pu tyeje'ijcánamuajre. 23Ajta aɨn ɨ Jesús, ayaa pu rajcha'ɨca'a a'achu cumu seite japuan tamuaamuata'a ninye'ira'a tɨ'ɨj autyejche tɨ tihua'uta'ixaate'en ɨ tyaɨte. Ajta aɨn, aɨ pu nu'u jetze airaujnejte ɨ José. Ajta aɨn José, aɨ pu jetze airaujnejte ɨ Elí. 24Ajta aɨn Elí, aɨ pu jetze airaujnejte ɨ Matat. Ajta aɨn Matat, aɨ pu jetze airaujnejte ɨ Leví, ajta aɨn Leví aɨ pu jetze airaujnejte ɨ Melqui. Ajta aɨn Melqui, aɨ pu jetze airaujnejte ɨ Jana. Ajta aɨjna ɨ Jana, aɨ pu jetze airaujnejte ɨ José. 25Ajta aɨjna ɨ José, aɨ pu jetze airaujnejte ɨ Matatías. Ajta aɨn Matatías, aɨ pu jetze airaujnejte ɨ Amós. Ajta aɨjna ɨ Amós, aɨ pu jetze airaujnejte ɨ Nahum. Ajta aɨjna ɨ Nahum, aɨ pu jetze airaujnejte ɨ Esli. Ajta aɨjna ɨ Esli, aɨ pu jetze airaujnejte ɨ Nagai. 26Ajta aɨn Nagai, aɨ pu jetze airaujnejte ɨ Maat. Ajta aɨn Maat, aɨ pu jetze airaujnejte ɨ Matatías. Ajta aɨn Matatías, aɨ pu jetze airaujnejte ɨ Semei. Ajta aɨn Semei, aɨ pu jetze airaujnejte ɨ José. Ajta aɨn José, aɨ pu jetze airaujnejte ɨ Judá. 27Ajta aɨn Judá, aɨ pu jetze airaujnejte ɨ Joana. Ajta aɨn ɨ Joana, aɨ pu jetze airaujnejte ɨ Resa. Ajta aɨn Resa, aɨ pu jetze airaujnejte ɨ Zorobabel. Ajta aɨn Zorobabel, aɨ pu jetze airaujnejte ɨ Salatiel. Ajta aɨn Salatiel, aɨ pu jetze airaujnejte ɨ Neri. 28Ajta aɨn Neri, aɨ pu jetze airaujnejte ɨ Melqui. Ajta aɨn Melqui, aɨ pu jetze airaujnejte ɨ Adi. Ajta aɨn Adi, aɨ pu jetze airaujnejte ɨ Cosam. Ajta aɨn Cosam, aɨ pu jetze airaujnejte ɨ Elmodam. Ajta aɨn Elmodam, aɨ pu jetze airaujnejte ɨ Er. 29Ajta aɨn Er, aɨ pu jetze airaujnejte ɨ Josué. Ajta aɨn Josué, aɨ pu jetze airaujnejte ɨ Eliezer. Ajta aɨn Eliezer, aɨ pu jetze airaujnejte ɨ Jorim. Ajta aɨn Jorim, aɨ pu jetze airaujnejte ɨ Matat. Ajta aɨn Matat, aɨ pu jetze airaujnejte ɨ Leví. 30Ajta aɨn Leví, aɨ pu jetze airaujnejte ɨ Simeón. Ajta aɨn Simeón, aɨ pu jetze airaujnejte ɨ Judá. Ajta aɨn Judá, aɨ pu jetze airaujnejte ɨ José. Ajta aɨn José, aɨ pu jetze airaujnejte ɨ Jonán. Ajta aɨn Jonán, aɨ pu jetze airaujnejte ɨ Eliaquim. 31Ajta aɨn Eliaquim, aɨ pu jetze airaujnejte ɨ Melea. Ajta aɨn Melea, aɨ pu jetze airaujnejte ɨ Mainán. Ajta Mainán, aɨ pu jetze airaujnejte ɨ Matata. Ajta aɨn Matata, aɨ pu jetze airaujnejte ɨ Natán. Ajta aɨn Natán, aɨ pu jetze airaujnejte ɨ David. 32Ajta aɨn David, aɨ pu jetze airaujnejte ɨ Isaí. Ajta aɨn Isaí, aɨ pu jetze airaujnejte ɨ Obed. Ajta aɨn ɨ Obed, aɨ pu jetze airaujnejte ɨ Booz. Ajta aɨn Booz, aɨ pu jetze airaujnejte ɨ Salmón. Ajta aɨn Salmón, aɨ pu jetze airaujnejte ɨ Naasón. 33Ajta aɨn Naasón, aɨ pu jetze airaujnejte ɨ Aminadab. Ajta aɨn Aminadab, aɨ pu jetze airaujnejte ɨ Aram. Ajta aɨn Aram, aɨ pu jetze airaujnejte ɨ Esrom. Ajta aɨn Esrom, aɨ pu jetze airaujnejte ɨ Fares. Ajta aɨn Fares, aɨ pu jetze airaujnejte ɨ Judá. 34Ajta aɨn Judá, aɨ pu jetze airaujnejte ɨ Jacob. Ajta aɨn Jacob, aɨ pu jetze airaujnejte ɨ Isaac. Ajta aɨn Isaac, aɨ pu jetze airaujnejte ɨ Abraham. Ajta aɨn Abraham, aɨ pu jetze airaujnejte ɨ Taré. Ajta aɨn Taré, aɨ pu jetze airaujnejte ɨ Nacor. 35Ajta aɨn Nacor, aɨ pu jetze airaujnejte ɨ Serug. Ajta aɨn Serug, aɨ pu jetze airaujnejte ɨ Ragau. Ajta aɨn Ragau, aɨ pu jetze airaujnejte ɨ Peleg. Ajta aɨn Peleg, aɨ pu jetze airaujnejte ɨ Heber. Ajta aɨn Heber, aɨ pu jetze airaujnejte ɨ Sala. 36Ajta aɨn Sala, aɨ pu jetze airaujnejte Cainán. Ajta aɨn Cainán, aɨ pu jetze airaujnejte ɨ Arfaxad. Ajta aɨn Arfaxad, aɨ pu jetze airaujnejte ɨ Sem. Ajta aɨn ɨ Sem, aɨ pu jetze airaujnejte ɨ Noé. Ajta aɨn Noé, aɨ pu jetze airaujnejte ɨ Lamec. 37Ajta aɨn ɨ Lamec, aɨ pu jetze airaujnejte ɨ Matusalén. Ajta aɨn Matusalén, aɨ pu jetze airaujnejte ɨ Enóc. Ajta aɨn Enóc, aɨ pu jetze airaujnejte ɨ Jared. Ajta aɨn Jared, aɨ pu jetze airaujnejte ɨ Mahalaleel. Ajta aɨn Mahalaleel, aɨ pu jetze airaujnejte ɨ Cainán. 38Ajta aɨn Cainán, aɨ pu jetze airaujnejte ɨ Enós. Ajta aɨn Enós, aɨ pu jetze airaujnejte ɨ Set. Ajta aɨn Set, aɨ pu jetze airaujnejte ɨ Adán. Ajta aɨn Adán, Dioj pu jetzen airaanye.

will be added

X\