San Lucas 24

1Tɨ'ɨjta ajna tyaja'ure'enye ɨ tujca'ari ta'anajca iteeri jetze. Iiya'a mu'u u á'uju'un maɨjna ɨ juuca mej tyaja'utɨɨ ɨ maj rɨ'ɨ tyu'uruu ɨ tu'upi tɨ naa tyáará'i. Matɨ'ɨj mi u á'uju'un a'u tɨ auucun. 2Matɨ'ɨj mi maun a'ará'a. Aj mu mi raaseij aujna tɨ auucun tɨ pua'a ari tya'antacuuni'i. Ajta aɨn ɨ tetej ɨ maj ra'ityajmua, pu'uri a'atɨ ya'usíjcɨripuajraa. 3Matɨ'ɨj mi aun a'utyajrupi a'u tɨ auucun. Aru camu ráatyau ɨ tevijra'an ɨ Jesús. 4Meenti mauj maɨjna cɨn ti'imuajcaa a'ij tɨ ti'itɨ huarɨj aɨjna cɨme'e ɨ mɨ'ɨchi, iye'itzi cɨn mu hua'apua huataseijre ɨ tyetyaca aɨme jemi ɨ juuca. Ayaa mu cueinavi'in ti'ityecháatɨma'acaa. Ayaa pu ti'ityamastajye'icaa cumu mej tyámaxcɨva'ara'an. 5Eecan mu tyu'utatzɨn ɨ juuca. Aɨj mu cɨn titunutaxɨ, majta aicaujtuuxɨ. Majta aɨme ɨ tyetyaca, ayaa mu tihua'uta'ixaa tɨcɨn: ―¿A'ini sej si een cɨn seyan rahuauhuau hua'a tzajta'a ɨ mɨ'ɨchite seij tɨ ari ruuri? 6- 7Capu hui ya'a a'ahua'a a'ini pu'uri ajtahua'a huatarú. ¿Ni hui sacai ramua'aree a'ij tɨ tyajamuaata'ixaa tɨ'ɨj auj a'utyavaaca'a muejmi jemi aujna u Galileeya yee tɨ ayan tyu'ujxe'eve'e maj tyu'utatuiire'en aɨjna tɨ hua'a jetze airaanye ɨ tyaɨte hua'a jemi ɨ mej a'ij pua'a titetyújcha'ɨ mej mi rá'utatan? Ajta yee hueica xɨcaj tzajta'a pu ajtahua'a nu'u huatarujsin. ―Aɨ mu tyetyaca meyan tihua'uta'ixaa. 8Majta aɨme ɨ juuca, aj mu mi ra'utamua'areeri'i a'ij tɨ tihua'uta'ixaa. 9Matɨ'ɨj mi huiiraacɨ a'u tɨ auucun. Matɨ'ɨj mi a'ucɨj ruche. Aj mu hua'uta'ixaa aɨme ɨ maj tamuaamuata'a japuan seij ara'ase, ajta ɨ seica. Nain mu hua'uta'ixaa a'ij mej ti'itɨ tyu'useij. 10Aɨme ɨ juuca, aɨ mu aɨn pueen, ɨ Mariiya, Magdala tɨ e'ema'acan, ajta aɨn ɨ Juana, ajtahua'a saɨj ɨ Mariiya tɨ naanajra'an pueen aɨjna ɨ Jacobo, majta seica ɨ juuca. Aɨ mu meyan tihua'uta'ixaa aɨme ɨ maj Jesús hua'antihuau. 11Aru aɨme, camu hua'antzaahua ɨ juuca a'ini capu a'ij tihua'amityejtya'acaa a'ij mej tyu'utaxajtaca'a. 12Ajta aɨn Pedro, aɨ pu ajchá. Tɨ'ɨqui a'utáichajraa ajna a'u tɨ auucun. Tɨ'ɨj i a'utyajrupi. Tɨ'ɨqui aicaujtutá tɨ'ij cɨɨxuri tyu'useij. Aa pu rujɨme'e tí'ijpiica'a a chuaata'a. Tɨ'ɨqui á'uraa. Eihua pu ti'imuajcaa ɨ rutzajta'a a'ij tɨ ti'itɨ huarɨj. 13Ajna xɨcajra'a jetze, ma hua'apua ɨ maj hua'a jetze ajtyama'acan aɨme ɨ mej Jesús jamuan á'ujhua'anya'a, au mu auju'ucaa chajta'a tɨ ayan tyaja'arajtyahuaa tɨcɨn Emaús. A'atzu pu a'ɨmɨ pɨtyaja'arɨcɨ aujna u Jerusalén a'achu cumu tamuaamuata'a kiloometru. 14Ayaa mu tyu'uxájtajma'a nain a'ij tɨ ti'itɨj huarɨj. 15Mauche'e mu tyu'uxaatajma'aca, majta ti'ihuáurihuaurajma'a rujɨɨmua'a, tɨ'ɨj aɨn Jesús ajtyáxɨɨraca'a tɨ i hua'a jamuan huame'en. 16Aru capu hua'uta'a mej raamua'ati. 17Tɨ'ɨj i Jesús ayan tihua'utaihua'uri'i tɨcɨn: ―¿Ti'itajni a'ij setyu'urixaate'e seyan huaju'un? Matɨ'ɨj mi huatyahuiixɨ, mue'icaujtutajma'a. 18Ajta seij tɨ ayan antyahuaa tɨcɨn Cleofas. Aɨ pu ayan tyu'utanyúu tɨcɨn: ―¿Ni pacai ramua'aree a'ij tɨ ti'itɨ huarɨj ijii itejmi jemi? ¿Ni pacai muaa paɨn pueen ɨ paj huaye'i pana'a paj cai ti'itɨ mua'aree a'ij tɨ ti'itɨ taruure itejmi? 19Aj pu i ayan tihua'utaihua'uri'i tɨcɨn: ―¿Ti'itaani a'ij huarɨj? Matɨ'ɨj mi meyan tiraata'ixaa tɨcɨn: ―Aɨjna cɨme'en ɨ Jesús, Nazaret tɨ e'ema'acan. Aɨ pu hui ti'ixaxa'ata'a ɨ rumuare'eri'ira'a cɨme'e ɨ Dioj jetze ma'acan. Ajta eihua pu ayan tyu'uruu tɨ huapɨ'ɨ ruxe'eve'e, mej seiiraca ɨ tyaɨte. 20Majta aɨme ɨ mej tie'ijta u teyujta'a, majta aɨme ɨ mej ti'itaijte'e, aɨ mu hui Jesús tyu'utatuii mej mi tyu'uta'an maj raaje'ica. Matɨ'ɨj mi rá'utatai. 21’Me tyajta ityan, ayaa tu hui ti'ijxe'eva'acaa tɨ aɨn pueenya'a a'ame'enche'e tɨ tu'irajtuaani itejmi i tyaj Israel jetze ajtyama'acan. Pu'uri hueica xɨcaj tyajauume ɨ maj rá'utatai. 22’Majta seica juuca ɨ maj tejmi jetze ajtyama'acan, eihua mu a'ij pua'a tya'utaseijra. Iya'a mu u a'atanye a'u maj ya'ava'ana maɨjna ɨ Jesús. 23Aru camu ráatyau ɨ mɨ'ɨchi. Matɨ'ɨj mi huara'acɨ. Aj mu mi taata'ixaa tɨcɨn seica mu huataseijre aɨme jemi. Aɨ mu nu'u maɨn pueen ɨ maj tajapua ti'ivaɨre'e. Ayaa mu eeri'i tihua'uta'ixaa tɨ nu'u ari ajtahua'a huatarú aɨjna ɨ Jesús. 24Majta seica ɨ maj ta jamuan á'ujhua'an, aɨ mu majta u a'atanye a'u maj ya'ava'ana. Ayaa pu eenya'a a'ij mej tyu'utaxajtaca'a aɨme ɨ juuca. Aru camu hui a'a ya'useij maɨjna ɨ Jesús. ―Ayaa mu tiraata'ixaa aɨme ɨ maj hua'apua. 25Ajta aɨn, ayaa pu tihua'uta'ixaa tɨcɨn: ―A'ij xu pua'a tityá'ujmuajte muan. Caxu a'ij tirajtyauve mɨ rutzajta'a sej si ca'anacan tira'antzaahuate'en nain tɨj na'a a'ij mej tyu'utaxajtaca'a aɨme ɨ mej Dioj jetze ma'acan ti'ixaxa'ata'a. 26’¿Ni cai ayan tyu'ujxe'eva'acaa tɨ i anacai ayan tirajpueitzi a'ara'ani aɨjna ɨ tɨ ajta Dioj an ra'ujyeijtza ɨ ɨpuari japua, tɨ i e'eyan tye'entyarute aɨjna cɨme'e tɨ tyu'utaijta iiyan chaanaca japua, ajta u tajapua, ajta nainjapua? 27Aj pu i ayan tihua'uta'ixaa aɨjna ɨ Jesús tyamua'a naa nain tɨj na'a tɨ te'eyu'usi'ihuaca'a ɨ yu'uxari jetze aɨjna cɨme'en, tɨj na'a tɨ aɨn ra'uyu'uxaca'a aɨjna ɨ Moisés tyaacan, ajta matɨj mana'a ɨ maj tyu'utaxajtaca'a aɨme ɨ maj Dioj jetze ma'acan ti'ixaxa'ata'a. 28Matɨ'ɨj meri a vejli'i auju'ucaa ajna chajta'a a'u maj a'aráiixa, auche'e pu huama'acaa aɨjna ɨ Jesús, yaa pu cumu mu pu a'ayee a'uma'a a'ame. 29Ajta aɨme, eihua mu ca'anijra'a raata'a tɨ aun huatyaturan. Ayaa mu tiraata'ixaa tɨcɨn: ―Pata'aj ya huatyaturan tyejmi jemi, a'ini pu'uri tyechuijxari, ajta ari tɨn tyatɨca'ari. Tɨ'ɨj i aun a'utyajrupi tɨ ij hua'a jamuan aun a'utyaturan. 30Tɨ'ɨj i Jesús ayan huarɨj tɨ'ɨj aɨn auca'atii hua'a jamuan a vejli'i meesa jetze. Tɨ'ɨj i raatyɨ'ɨpɨ ɨ pan, ajta rɨ'ɨ tiraata'a ɨ Dioj. Aj pu i ra'antitaaraxɨ ɨ pan. Tɨ'ɨj i autyejche tɨ hua'utaɨ'ɨpɨ'ɨte'en. 31Cɨme'en pu'u hua'utaɨ'ɨpɨ'ɨ, aj mu mi raamuá'a. Aj pu i a'ahuaujpua'arixɨ mej seiiraca. 32Matɨ'ɨj mi meyan ti'ityu'urihua'uri'i tɨcɨn: ―¿Ni cai u'utzunajca'a ɨ taxaijnyu'uca ɨ ta tzajta'a, ajta ca'anijra'a yu huataseijre u ta tzajta'a tɨ'ɨj aɨn tyu'uxájtajma'a ta jamuan ɨ juye jetze, tɨ ayan ti'ita'ixaatya'acaa a'ij tɨ huataujmua'a ɨ tɨ te'eyu'usi'i ɨ yu'uxari jetze? 33Matɨ'ɨj ajhuiixɨ. Ca'anacan mu huara'acɨ u Jerusalén. Au mu huá'utyau aɨme ɨ maj tamuaamuata'a japuan seij maj ara'ase, majta ɨ seica ɨ maj hua'a jamuan á'ujhua'anya'a. Naimi'i mu tyujsaɨj maujna. 34Majta maɨjna ɨ maj maun a'utyáuuca'a u Jerusalén, ayaa mu tihua'uta'ixaa ɨ maj hua'apua tɨcɨn: ―Ayej xaa nya'u ti'ayajna. Tavastara'a pu ajtahua'a a'itáraa hua'a tzajta'a ɨ mɨ'ɨchite. Ajta huataseijre jemin aɨjna ɨ Simón. 35Majta aɨme ɨ maj hua'apua, aɨ mu tihua'uta'ixaa a'ij tɨ ti'itɨ huarɨj matɨ'ɨj maun auju'ucaa ɨ juye jetze, ajta a'ij mej ye'i tiraamua'a tɨ'ɨj aɨn ra'antitaaraxɨ ɨ pan. 36Mauche'e mu ti'ixáatacaa maɨjna cɨme'e tɨ'ɨj aɨn Jesús huataseijre hua'a jemi. Au pu e'ita'a huatyeechaxɨ. Aj pu i ayan tihua'utataujte tɨcɨn: ―Che'e huatyáapua'are ɨ a'amua tzajta'a. 37Eecan mu huajɨjxɨca'a. Majta tyu'utatzɨn a'ini yaa pu hua'aseijratya'acaa. Cu xuee maj cu mɨ'ɨchí seijra. 38Ayaa pu tihua'uta'ixaa tɨcɨn: ―¿A'ini een cɨn a'ij pua'a amuaata'a? ¿A'ini sej si cai xɨ tya'atzaahuate'e? 39Casi'i, i nyamuajca'a jetze, ajta i nyaɨɨca jetze. Nyaa nu nyaɨn pueen. Sata'aj na'ajtamuare'en sej si seyan raaseij. Saɨj tɨ mɨ'ɨchi, capu ayan nyaxa'aj ti'ityahue'ira'a, capu ajta ayan nyaxa'aj ti'ityajcari. Xu'uri nyeseij nyaj xaa tyahue'ira'a, nyajta tyájcari. ―Ayaa pu tihua'uta'ixaa aɨjna ɨ Jesús. 40Tɨ'ɨj ayan tihua'uta'ixaa, aj pu i ayan tihua'utaseijra ɨ rumuajca'a jetze, ajta ruɨɨca jetze. 41Majta aɨme, camu xɨ ra'antzaahuate'e a'ini eihua mu a'ij pua'a yá'useijracaa, majta rutyamua'ava'acaa. Aj pu i ayan tihua'utaihua'uri'i tɨcɨn: ―¿Ni sacai ti'itɨj ticha'ɨ ɨ nyaj raacua'ani? 42Matɨ'ɨj mi seij raata'a ɨ hue'i tɨ hue'ijchi'i. 43Tɨ'ɨj i ra'ancure'echuii. Aj pu i raacuaa mej seiiraca aɨme. 44Ayaa pu tihua'uta'ixaa tɨcɨn: ―Ayaa nu tyajamuaata'ixaa nyatɨ'ɨj a'amua jemi huacatii tɨ ayan ruxe'eva'acaa tɨ nain cɨn tya'araurasten a'ij tɨ tya'uyu'uxaca'a neetzi cɨme'en aɨjna ɨ Moisés, majta aɨme ɨ maj Dioj jetze ma'acan ti'ixaxa'ata'a, ajta jetzen ɨ tihua'achuiica. 45Aj pu i hua'uta'a mej mi yau'eitaa mua'ara'ani a'ij tɨ te'eyu'usi'i ɨ yu'uxari jetze. 46Ayaa pu tihua'uta'ixaa tɨcɨn: ―Ayaa pu te'eyu'usi'i ɨ yu'uxari jetze nyaj nu'u neyan tirajpueitzi na'ara'ani inyaa, i nyaj nyaɨn pueen ɨ Cɨriistu'u tɨ Dioj an nyaja'ujyeijtza ɨ ɨpuari japua. Ajta nu'u hueica xɨcaj tzajta'a nu nyajtahua'a aitára'ani hua'a tzajta'a ɨ mɨ'ɨchite. 47’Majta nu'u, nainjapua tihua'uta'ixaate'esin nyenyuucajtze'e mej mi saɨque tyu'umua'ati ɨ Dioj jemi tɨ ij aɨn tihua'utauuni'i. Ma'utyajhuijsin nu'u mej meyan tihua'uta'ixaate'en iiya maj Jerusalén huachaatɨme, majta meyee ɨ maj a'ɨmɨ antachaatɨme, majta meyee ɨ mej seij chuejra'a japua huachaatɨme tɨj na'a ɨ tɨ yan seijre'e iiyan chaanaca japua nainjapua. 48’Muan xu tihua'uta'ixaate'esin a'ij sej seri saɨjna cɨn tyu'useij. 49Nyaa nu u ya'utaiti muejmi jemi aɨjna tɨ niya'upua cɨn tya'ataujratziiri'i. Sajta muan, sata'aj seyan yan huate'en iiyan chajta'a asta na'a cai huatyaturan muejmi jemi aɨjna tɨ ute'e e'icanyejsin. Aɨj xu jetzen aráujca'anyejsin. ―Ayaa pu tihua'uta'ixaa aɨjna ɨ Jesús. 50Tɨ'ɨj i aɨjna ɨ Jesús huaja'uvi'itɨ u a'ahua'a u Betania. Tɨ'ɨj i ajméijca'ataxɨ. Aj pu i rɨ'ɨ tihua'uta'a ɨ hua'a tzajta'a. 51Tɨ'ɨj auj rɨ'ɨ tihua'utá'asima'acaa, au pu huaja'uhua'axɨ. Aj pu i ute'e tíraa. 52Majta aɨme, au mu raatyanajchaca'a. Eihua mu huataujtyamua'ave. Matɨ'ɨj mi a'ucɨj u Jerusalén. 53Tɨ'ɨj pɨ na'a, mu maun a'utyáuuca'a u teyujta'a mej mi rɨ'ɨ tiraata'an ɨ Dioj. Aii pu'u.

will be added

X\