San Lucas 22

1Pu'uri ajna vejli'i pɨti'irɨjcaa matɨ'ɨj pua'a maɨjna cɨn ti'iyeste ɨ maj pan cua'aca ɨ maj cai levaduura ranajchite'e. Ayaa mu majta meyan ratamua'amua tɨcɨn Tɨ'ɨj Dioj tihua'utauuni'iri'i ɨ hua'ayaujmua'a ɨ maj anáatyá'a muanúnu'eihuaca'a, aujna a'ahua'a u Egipto. 2Majta aɨme ɨ mej tie'ijta teyujta'a, majta aɨme ɨ mej ti'imua'ata ɨ yu'uxari jetze, Moisés tɨ ra'uyu'uxaca'a, eihua mu ti'imuajcaa a'ij mej ye'i tiraaje'ica ɨ Jesús. Caxɨ mu a'ij tirajtyauuva'a a'ini hua'atzɨɨnya'acaa ɨ tyaɨte. 3Tɨ'ɨqui, aɨn tiyaaru'u, ɨ tɨ ayan antyahuaa Satanás, aɨ pu tzajta'an utyajrupi aɨjna jetze ɨ Judás, ɨ mej meyan raatamua'amua tɨcɨn Iscariotes. Aɨ pu ajta hua'a jetze ajtyama'acan ɨ maj tamuaamuata'a japuan hua'apua ara'ase. 4Tɨ'ɨqui aɨn Judás aɨme jemi a'uré'enye aɨme ɨ mej tie'ijta teyujta'a, ajta ɨ mej tihue'ijte'e aɨme ɨ maj tí'icha'ɨ aujna teyujta'a. Ayaa mu tyu'urixaatya'acaa maɨjna cɨme'e a'ij tɨ ye'i huarɨni aɨjna ɨ Judás tɨ'ij aviitzi cɨn tyu'utatuiire'en aɨjna ɨ Jesús. 5Majta aɨme, eecan mu huataujtyamua'ave. Majta tya'ataujratziiri'i maj tumin raata'an. 6Aɨ pu ra'ancura'a ɨ hua'anyuuca. Aj pu i autyejche tɨ tyu'uchu'eve'en a'anaj tɨ rɨ'ɨri tɨ hua'utatuire'en ɨ Jesús maj cai raseiraca ɨ tyaɨte. 7Tɨ'ɨj i ajna tyaja'ure'enye ɨ xɨcajra'a me jetzen racua'aca ɨ pan maj cai levaduura ranajchite'e. Ajna xɨcajra'an jetze, aɨ mu majta ramuaɨ'ɨvajta aɨjna ɨ canya'a ɨ maj cɨn ra'utamua'aree ajna xɨcajra'an tɨ Dioj jetzen tihua'utauuni'iri'i ɨ hua'ayaujmua'a ɨ maj anáatyá'a muanúnu'eihuaca'a. 8Aj pu i Jesús hua'utaityaca'a aɨjna ɨ Pedro, ajta aɨjna ɨ Juan maj u a'uju'un. Ayaa pu tihua'uta'ixaa tɨcɨn: ―Sata'aj a'uju'un sej si rɨ'ɨ tyaja'uruuren tyej ti raacua'ani tyaɨjna ɨ tyaj cɨn ra'utamua'aree tɨ Dioj tihua'utauuni'iri'i ɨ hua'ayaujmua'a ɨ maj anáatyá'a muanúnu'eihuaca'a. 9Ajta aɨme, ayaa mu tiraataihua'uri'i tɨcɨn: ―¿A'uni jetzera'a peyan ti'ijxe'eve'e tyaj rɨ'ɨ tyaja'uruuren? 10Ayaa pu tihua'uta'ixaa tɨcɨn: ―Satɨ'ɨj saun a'utyarute u chajta'ana, tyaata'a pu amua'antinajchi tɨ xa'ari huatɨsin, jaj tɨ urajmuaa. Sata'aj cujta'an u á'uju'un. Sajta jamuan a'utyaruti u chi'ita a'u tɨ aɨn a'aráiixa. 11’Sata'aj seyan tiraata'ixaate'en aɨjna tɨ anna e'eche yee: “Ayaa pu ti'ixa ɨ maeestru, yee: ¿A'uni jetzera'a a'arɨ'ɨri tɨ tzajta'an tyu'ucua'ani ɨ tɨ cɨn ra'utamua'aree tɨ Dioj tihua'utauuni'iri'i ɨ hua'ayaujmua'a ɨ maj anáatyá'a muanúnu'eihuaca'a? Aɨj pu yee ti'icua'ani aɨme jamuan ɨ tɨ hua'antihuau.” 12’Aɨ pu hui amuaataseijrate'esin ɨ cuaartu, tɨ ve'e, tɨ ánɨmɨ a'ujvee. Pu'uri ra'ava'ajaj. Sata'aj saujna rɨ'ɨ tya'uhuáruuren. ―Ayaa pu tihua'uta'ixaa aɨjna ɨ Jesús. 13Aj mu mi a'ucɨj. Matɨ'ɨj maun a'ará'a, ayaa pu te'irajraa a'ij tɨ tihua'uta'ixaa ɨ Jesús. Aɨj mu cɨn rɨ'ɨ tyu'uruu ɨ maj cɨn ra'utamua'aree a'ij tɨ Dioj tihua'utauuni'iri'i. 14Tɨ'ɨj tyaja'ure'enye a'atzaj maj pua'a raacua'ani, naimi'i mu huatyeeji a vejli'i meesa jetze, aɨjna ɨ Jesús, majta aɨme ɨ maj jamuan á'ujhua'anya'a. 15Tɨ'ɨj i ayan tihua'uta'ixaa tɨcɨn: ―Eihua nu huapɨ'ɨ raxe'eva'acaa nyaj muejmi jamuan anacaican tyu'ucua'ani, nyaj cai xɨ rajpueijtzi, tyej ti naimi'i ra'utamua'aree tyaɨjna cɨme'e ɨ tɨ Dioj tihua'utauuni'iri'i ɨ hua'ayaujmua'a ɨ maj anáatyá'a muanúnu'eihuaca'a. 16’Ayaa nu tyaja'amue'ixaate'e, canu hui che'e a'anaj raacua'ani ɨ pan asta cai nain aráurasten ajna xɨcajra'a Dioj tɨ jetzen nain cɨn huataura'ate'esin iiyan chaanaca japua. 17- 18Aj pu i rajtɨɨ ɨ taasa. Tɨ'ɨj i rɨ'ɨ tiraata'a ɨ Dioj jemi, aj pu i hua'utajajni. Ayaa pu tihua'uta'ixaa tɨcɨn: ―Ya'acui, sata'aj huara'ujaanten, a'ini ayaa nu tyaja'amue'ixaate'e nyaj cai che'e a'anaj ra'anti'isin ɨ a'ará'a tɨ uuva jetze airamɨ'ɨyaca'a, asta cai yan huataseijre'en a'anaj tɨ Dioj tyu'utaijta iiyan chaanaca japua. 19Tɨ'ɨj i raatyɨ'ɨ ɨ pan. Tɨ'ɨj i ajtahua'a pu rɨ'ɨ tiraata'a ɨ Dioj. Aj pu i ra'antitaaraxɨ ɨ pan. Aj pu i hua'utaɨ'ɨpɨ'ɨ. Ayaa pu tihua'uta'ixaa tɨcɨn: ―Ayaa pu huataujmua'a ɨ pan. Ai pu aɨn pueen ɨ nyetevira'a ɨ nyaj cɨn a'amua japua huanyúu. Ayaa xu huarɨni sej si ra'utamua'aree a'ij nyej huarɨni. 20Matɨ'ɨj meri tyu'ucuá'a, ayaa pu che'eta na'a huarɨj. Aɨ pu ra'ajjáj ɨ taasa. Ayaa pu tihua'uta'ixaa tɨcɨn: ―Aijna i taasa tzajta'a tu'urajmuaa, ayaa pu huataujmua'a ɨ nyuucari tɨ cɨme'en Dioj jajcua cɨn tya'ataujratziiri'i tɨ amue'irájtuaani. Nyajta inyaa, nu'uri raataseijrataca'a tɨ ayan ti'ayajna aɨjna cɨme'e ɨ nyaxuure'e nyaj ra'iráxɨre'esin muejmi jetze ma'acan. 21’Ajta aɨn ɨ a'atɨ tɨ aviitzi cɨn tyu'utatuire'esin ineetzi, aɨ pu hui ajta ye seijre'e neetzi jamuan iiyancui meesa japua. 22Ayaa pu ti'inyaruuren ineetzi i nyaj nyajta hua'a jetze airaanye ɨ tyaɨte a'ij tɨ tyu'uxa'apɨ'ɨntari'ihuaca'a. Aru che'e huataujxaamɨste'en aɨjna tɨ neetzi cɨme'en tyu'utatuire'esin aviitzi cɨme'e. 23Majta aɨme ɨ maj jamuan á'ujhua'anya'a, ayaa mu tya'utyajhuii mej huataurihua'u maɨjna cɨme'e a'atɨ tɨ aɨn pueen tɨ ayan rɨni. 24Matɨ'ɨj mi majta meyan autyajhuii mej huataurihua'u maujjaaxáivi'ira maɨjna cɨme'e a'atɨ tɨ nu'u eitze'e ruxe'eve'e. 25Ajta aɨn ɨ Jesús, ayaa pu tihua'uta'ixaa tɨcɨn: ―Aɨme ɨ maj rey cɨn ti'itátyatyá'upu'u hua'a tzajta'a ɨ maj cai Israel e'ema'acan, aɨ mu ca'anyejri cɨn tihue'ijte'e. Ajta aɨme ɨ mej meyan tihue'ijte'e, ayaa mu tyu'ujxaa yee rɨ'ɨ mu ti'ityaxá'apuei. 26’Aru muan, caxu seyan eenya'a xa'aju'un matɨj aɨme silu ayaa xu'u eenya'a xa'ara'ani. Aɨn ɨ a'atɨ tɨ eitze'e ruxe'eve'e muejmi jemi, che'e aɨn ayan eenya'a a'ara'ani tɨj tɨ eitze'e pa'arɨ'ɨ. Ajta aɨn hui tɨ tie'ijta, che'e ayan eenye'en tɨj aɨjna tɨ ti'ivaɨre'e. 27’Casi'i, ¿a'atani eitze'e va'acan cɨn ti'ityejvee? ¿Ni aɨjna tɨ a vejli'i a'ura'ahuiixɨ a'utɨ meesa a'utyejvee, na'ari aɨjna ɨ tɨ tí'ijmin? ¿Ni nyacai nyaɨn pueen inyaa i nyaj eitze'e va'acan cɨn, i nyaj ye vejli'i huara'aca'a iiya ɨ meesa jetze? Me nyajta inyaa, ya nu seijre'e a'amua jamuan nyej ni tyajámuaamín muejmi. 28’Sajta muan, muan xu saɨn pueen ɨ saj tɨ'ɨj pɨ na'a ya huatyauu neetzi jemi ɨ nyaj rajpueijtzi. 29Nyajta nu tyaja'amueijcate'en muejmi sej si tyu'utaijta a'ini aɨjna ɨ niya'upua pu'uri ayan tinyeijca ineetzi nej ni tyu'utaijta. 30’Ayaa nu hui tyaja'amueijcate'en sej si seyan tyu'ucua'ani, sajta huaye'en ɨ meesa jetze neetzi jamuan ajna xɨcajra'an nye jetzen yava'acányejsin nyej ni tyu'utaijta iiyan chaanaca japua. Muan xu a'ujra'ase japuan ɨ ɨpuari sej si tihua'axɨjte'en aɨme ɨ tyaɨtejra'a ɨ maj majta Israel jetze huanyej ɨ maj tamuaamuata'a japuan hua'apua ara'ase. ―Ayaa pu tihua'uta'ixaa aɨjna ɨ Jesús. 31Aj pu i aɨjna ɨ Jesús ayan tiraata'ixaa ɨ Pedro tɨcɨn: ―Simón, Simón, aɨjna ɨ tiyaaru'u tɨ i'i Satanás, aɨ pu raatahua'u tɨ Dioj raata'an tɨ i tyu'utyese'en tɨ muatyaamue'itɨn pej pi ma nuuraiini. 32’Aru inyaa, ayaa nu hui raatahua'u mueetzi cɨme'e ɨ Dioj jemi pej pi cai aiira'ɨtzen paɨjna cɨme'e paj na'astijre'e ineetzi. Nyajta neyan ti'imueijcate'e. Patɨ'ɨj rɨ'ɨ huarɨn mua'a tzajta'a, pata'aj pajtahua'a na'ara'astijre'en. Ayaa paj huarɨni. Pata'aj ca'anijra'a hua'uta'an a'ihuaamua'a. 33Ajta aɨn ɨ Pedro, ayaa pu tiraata'ixaa tɨcɨn: ―Nyavastara'a, nu'uri neyan ahuanca'anye nyej mueetzi jamuan aityanami'ihua na'ari nyaj huamɨ'ɨni mueetzi jamuan. 34Ajta Jesús ayan tyu'utanyúu tɨcɨn: ―Pedro, ayaa nu hui ti'imue'ixaate'e, tɨ'ɨj cai xɨ huajijhua ɨ tyacuaara'i, hueica paj peyan tinaatyaahue'ita tɨcɨn capej nyamua'ate. 35Aj pu i Jesús ayan tihua'utaihua'uri'i tɨcɨn: ―¿Ni cai ti'itɨ tyajamua'aturaatya'aca'a nyatɨ'ɨj amuaataityaca'a saj seyan a'ucɨ́jxɨ'ɨn, saj cai ca'ani anpiin, sajta cai ti'itɨ anyaɨ́'ɨn saj tumin tzajta'an uca'ɨn, saj sajta cai ajtáca'acaímá'a? Ayaa mu tyu'utanyúu tɨcɨn: ―Capu ti'itɨ autyajturaa. 36Aj pu i ayan tihua'uta'ixaa tɨcɨn: ―Ari ijii, tɨ pua'a peyan rajcha'ɨ aɨjna ɨ ca'ani, pata'aj ra'anpiin, na'ari pajta paɨjna ɨ paj tzajta'an tumin uca'ɨn. Tɨ pua'a pacai seij ticha'ɨ ɨ chun xantaaru'u maj raacha'ɨ, ayaa paj huarɨni. Pata'aj raatuaani ɨ a'acɨɨxu pej pi seij chun huananan ɨ tumin cɨme'e. 37’Ayaa pu te'eyu'usi'i tɨcɨn: “Ayaa pu hui tihua'amityejtya'acaa tɨcɨn ai pu aɨn pueen seij tɨ a'ij pua'a ti'itevi.” Ayaa nu tyaja'amue'ixaate'e tɨ ruxe'eve'e tɨ ayan che'eta na'a tya'araurasten ineetzi jemi. Ee xaa nya'u, aijna tɨ ayan te'eyu'usi'i ineetzi cɨme'e, pu'uri tɨmua'a araurastejsin. ―Ayaa pu tihua'uta'ixaa aɨjna ɨ Jesús. 38Majta aɨme ɨ maj jamuan á'ujhua'anya'a, ayaa mu tiraata'ixaa tɨcɨn: ―Casi'i, tavastara'a, hua'apua pu yee ti'iseijre'e ɨ chun. Ayaa pu i ayan tyu'utanyúu tɨcɨn: ―Amɨ pu'u ti'icɨ'ɨpe. 39Aj pu i huiirajraa ɨ Jesús. Tɨ'ɨj i aun a'ará'a ajna a'u tɨ a'asaca ɨ jɨri jetze tɨ ayan tyaja'arajtyahuaa tɨcɨn Aceituunajremi. Majta aɨme ɨ maj jamuan á'ujhua'anya'a, aɨ mu majta a'ucɨj jamuan. 40Tɨ'ɨj aun a'ará'a, ayaa pu tihua'uta'ixaa tɨcɨn: ―Sata'aj seyan huatyejnyuuni sej si cai auta'ɨtzen ti'itɨj cɨme'e. 41Tɨ'ɨj i aun huaja'utyajtuaa, a'atzu pu ɨmɨ a a'ure'enyáa a'achu cumu a'atzu ɨmɨ pu a'araava'ɨtzɨ ɨ tetej tɨ pua'a a'atɨ raataraini. Au pu titunutaca'a. Tɨ'ɨj i raatyahuau ɨ Dioj jemi. 42Ayan tɨcɨn: ―Niya'upua, ayaa nu ti'imuahuavii, tɨ pua'a mua'araanajchi paj naata'an nyej ni cai neyan tirajpueitzi na'ara'ani. Aru che'e ayen tyu'urɨni a'ij paj muaa ti'ijxe'eve'e. Che'e hui cai ayan tyaja'ure'eninyeica'a a'ij nyej nyaa ti'ijxe'eve'e. ―Ayaa pu tiraatahuaviiri'i. 43Aj pu i saɨj jemin huataseijre tɨ tajapua ti'ivaɨre'e. Aɨ pu ca'anijra'a raata'a. 44Ajta aɨn ɨ Jesús, eihua pu tí'ityesa'aca'a. Aɨj pu cɨn, eitze'e huatyejnyuu. Eecan pu taixɨ'ɨcaa. Ayaa pu seijra'acaa xuee tɨj xuure'e a airajtzunye a chuaata'a. 45Tɨ'ɨj i ajche a'u tɨ e'etyényuusima'a, tɨ'ɨj i a'uré'enye a'u maj a'ij e'eenya'a aɨme ɨ maj jamuan á'ujhua'anya'a. Mu'uri cu'utzuca'a a'ini eihua mu cua'anacaa maɨjna cɨme'e maj ruxaamɨste'e. 46Ayaa pu tihua'uta'ixaa tɨcɨn: ―¿A'ini sej si cu'utzu? Xa'ajhuiixɨ'ɨ, sajta huatyejnyuuni tɨ ij cai ti'itɨj a'amua japua rajveti, sej si cai autyaturan ɨ Dioj jemi. 47Auche'e pu tixáataca ɨ Jesús matɨ'ɨj eihua tyaɨte e'ire'enye. Ajta aɨn tɨ ayan antyahuaa tɨcɨn Judás, tɨ ajta hua'a jetze ajtyama'acantacaa ɨ maj tamuaamuata'a japuan hua'apua ara'ase, aɨ pu anacai huama'acaa. Aj pu i ajtyáxɨɨraca'a tɨ ij ru'ityévisiitɨmua'an aɨjna ɨ Jesús. 48Ajta aɨn ɨ Jesús, ayaa pu tiraataihua'uri'i tɨcɨn: ―Judás, ni peyan nu'ityévisiitɨmua'asin pej pi neetzi cɨme'e tyu'utatuiire'en ineetzi, i nyaj nyajta hua'a jetze airaanye ɨ tyaɨte. 49Majta aɨme ɨ maj Jesús jamuan á'ujhua'anya'a, matɨ'ɨj raaseij a'ij tɨ ti'itɨ rɨjcaa, matɨ'ɨj mi meyan tiraata'ixaa tɨcɨn: ―Tavastara'a, ¿ni teyan huarɨni tyaj hua'utyávajxɨ'ɨn taɨjna cɨme'e ɨ ti'itachun? 50Ajta saɨj tɨ Jesús jamuan á'ucha'acanya'a, aɨ pu ra'ajtyáavajxɨ aɨjna tɨ ravaɨre'e aɨjna tɨ tie'ijta u teyujta'a. Ra'ajtasijchaca'a ɨ naxaira'an, ru'ɨrɨɨta'an tɨ ra'ajtanaxaiica'a. 51Aj pu i Jesús ayan tyu'utaxajtaca'a tɨcɨn: ―Caxu che'e seyan raruure. Aj pu i Jesús ra'ajtamuárej aɨjna ɨ naxaira'an jetze. Ajta tiraahuaa. 52Aj pu i Jesús ayan tihua'uta'ixaa aɨme ɨ mej tie'ijta u teyujta'a, ajta ɨ mej tihue'ijte'e ɨ mej tí'icha'ɨ u teyujta'a, ajta aɨme ɨ hua'a vaujsi, naijmi'i matɨj mana'a mej jemin e'ire'enye. Ayaa pu tihua'uta'ixaa tɨcɨn: ―¿Ni qui nahua'ari nyaɨn pueen sej si seyan muan mu a'uva'aju'un sej chun tyu'ɨsime'en, sajta cɨye? 53Tɨ'ɨj pɨ na'a nain xɨcaj tzajta'a, au nu hui a'utyaváa na'aye'i a'u tɨ a'aráyaujta'a u teyujta'a muejmi jemi. Sajta muan, caxu a'anaj naatyeevi'i. Ari ijii xu xaa seyan nyaruure a'ini ayaa pu tyajamuaacɨ́'ɨ tɨ a'amua jetze huaraa aɨjna tɨ tie'ijta tɨca'amiste'e. ―Ayaa pu tihua'uta'ixaa aɨjna ɨ Jesús. 54Matɨ'ɨj mi raatyeevi'i. Aj mu mi ya'uvi'itɨ. Au mu ya'ure'enyejte a'u tɨ e'eche aɨjna tɨ nain cɨn antyujmua'aree u teyujta'a. Ajta aɨn Pedro, a'atzu pu ɨmɨ ra'asijma'a. 55Matɨ'ɨj mi aunai ajna e'ita'a tɨ a'aráyaujta'a u teyujta'a. Aj mu mi atyárá'asajraa. Ajta aɨjna ɨ Pedro, aɨ pu hua'a jamuan a'ujyeijxɨ. 56Tɨ'ɨj aɨn jɨita'a tɨ ti'ivaɨre'e, aɨ pu raaseij tɨ aun a'ajcatii a'u tɨ a'ataa. Tɨ'ɨj tyamua'a raaseij, aj pu i ayan tyu'utaxajtaca'a tɨcɨn: ―Amɨjna mɨ tyaata'a, amɨɨ pu ajta jamuan á'ucha'acanya'a. 57Ajta aɨn Pedro, ayaa pu tyu'utyaahue'itaca'a tɨcɨn: ―Jɨita'a, canu ramua'ate. 58A'atzu a'ateevi'i, ajtahua'a saɨj raaseij. Ayaa pu tyu'utaxajtaca'a aɨjna tɨcɨn: ―Muaa pa pajta hua'a jetze ajtyama'acan. Ajta aɨn ɨ Pedro, ayaa pu tyu'utanyúu tɨcɨn: ―Huumpi, canu xaa nya'u. 59Tɨ'ɨj sei hora tyauuma'aca, ajtahua'a saɨj ayan tyu'utaxajtaca'a tɨcɨn: ―Ayej xaa nya'u ti'ayajna tɨ amɨn aɨn pueen saɨj tɨ Jesús jamuan á'ucha'acanya'a, a'ini Galileeya pu e'ema'acan. 60Ajta aɨn ɨ Pedro, ayaa pu tyu'utanyúu tɨcɨn: ―Huumpi, capu a'ij tina'amitejte'e a'ij pej ti'ixa. Tɨ'ɨj auj ayan ti'ixáatacaa, tɨ'ɨj i huajijhuaca'a ɨ tyacuaara'i. 61Ajta aɨn ɨ tavastara'a, aɨ pu pɨ a'ure'eve. Aj pu i ra'araaseij aɨjna ɨ Pedro. Ajta aɨ pu ra'utamua'areeri'i a'ij tɨ tavastara'a tiraata'ixaa yee tɨ'ɨj cai xɨ huajijhuan ɨ tyacuaara'i, hueica paj peyan tinaatyaahue'ita tɨcɨn capej nyamua'ate. 62Tɨ'ɨj i Pedro huiirajraa a pua'aque. Aj pu i tyujyeinyajraa huapɨ'ɨ. A'ij pu pua'a tya'ujmua'ajcaa. 63Majta aɨme ɨ maj rachaɨca'a, aɨ mu autyajhuii maj ra'utaxaahuari'i, majta ra'ajtyaváaxɨ'ɨ maɨjna ɨ Jesús. 64Matɨ'ɨj mi ra'utajɨ'ɨque a jɨ'ɨsaara'an jetze. Aj mu mi ca'anyejri cɨn raataihua'uri'i tɨcɨn: ―Huataxaj yee a'ataani muaatyáavajxɨ. 65Majta eihua mu ra'utaxaahuari'iri'i maɨjna cɨme'e tɨ a'ij pua'a een. 66Tɨ'ɨj huatapua'araca'a, naimi'i mu tyujsaɨj, ɨ hua'avaujsimua'a, majta ɨ mej tie'ijta u teyujta'a, majta aɨme ɨ mej tí'imua'atajcaa ɨ yu'uxari jetze, Moisés tɨ ra'uyu'uxaca'a. Majta a yauuvi'itɨ hua'a jemi ɨ rujueesi. 67Ayaa mu tiraata'ixaa tɨcɨn: ―Pata'aj taata'ixaate'en tɨ pua'a muaa pa paɨn pueen ɨ tɨ Dioj an muja'ujyéijtza ɨ ɨpuari japua nusu pacai. Tɨ'ɨj i Jesús ayan tyu'utanyúu tɨcɨn: ―Tɨ pua'a neyan tyajamuaata'ixaate'en yee: “Nyaa nu nyaɨn pueen”, caxu muan na'antzaahuate'esin. 68Ajta tɨ pua'a neyan tyajamuaataihua'u yee: “¿A'atani nyaj pɨrɨcɨ inyaa?” caxu muan, a'atzu huatanyuusin. 69’Aru ijii tɨ yu auca'itɨ a'ame, inyaa nyaj nyajta hua'a jetze airaanye ɨ tyaɨte, au nu hui a'ujcaí na'ame aujna ɨrɨɨta'an ɨ Dioj tɨ nain cɨn antyujmua'aree. 70Naimi'i mu meyan tiraataihua'uri'i tɨcɨn: ―¿Ni paɨn pueen yaujra'an ɨ Dioj? Ajta aɨn ɨ Jesús, ayaa pu tyu'utanyúu tɨcɨn: ―Ayaa pu ti'ayajna, nyaa nu nyaɨn pueen a'ij sej tyu'utaxajtaca'a. 71Matɨ'ɨj mi meyan tyu'utaurixaa tɨcɨn: ―¿Ti'itaani maa a'ij tyeti'ixe'eve'e ɨ tyaj cɨn jetzen tya'ujpuá'ajte'en ti'itɨj cɨme'e? Tu'uri nya'u hui raanamuajri'i a'ij tɨ amɨn tyu'utaxajtaca'a.

will be added

X\