San Lucas 21

1Aj pu i Jesús antanyeerajraa. Aɨme pu huaseij ɨ mej chijtyaani pueen. Au mu tumin u'usaɨra'acaa, tɨ ij aun tyu'utyavaɨre'esin u teyujta'a aɨjna ɨ tumin. 2Aɨ pu ajta jɨita'a huaseij tɨ cai a'ij ti'ijviicue'i. Ajta aɨjna ɨ jɨita'a aɨ pu hua'apuaca ucaahua'axɨ ɨ tumin tɨ cai a'ij ti'ijnajchi. 3Aj pu i Jesús ayan tyu'utaxajtaca'a tɨcɨn: ―Ayaa nu tyaja'amue'ixaate'e tzaahuati'ira'a cɨme'e, ayaa pu ti'en ɨ Dioj jemi. Amɨjna mɨ jɨita'a, eitze'e pu ru'ucaahua'axɨ macai naimi'i ɨ seica. 4’Aɨme ɨ seica, naimi'i mu'u hui meyan ru'ucaahua'axɨ maɨjna cɨme'e tɨ ava'aturaa ɨ mej eihua tí'ijcha'ɨ. Aru amɨjna, capu a'ij ti'ijviicue'i. Ma ajta amɨn, nain u'ucaahua'axɨ aɨjna ɨ tɨ cɨn huataujvaɨre'esin. ―Ayaa pu tyu'utaxajtaca'a. 5Majta seica meyan tyu'urixaatya'acaa maɨjna cɨme'e tɨ naa seijra'acaa ɨ teyuu, ajta ɨ tetej tɨ cure'ete'ete nainjapua, ajta aɨn ɨ muaɨ'ɨvejri ɨ maj tyauhuará'avɨ tɨ naa ti'en. Aj pu i Jesús ayan tihua'uta'ixaa tɨcɨn: 6―Naijmi'i tɨj na'a sej yan ti'iseij, aj pu tyaja'ure'enyejsin ajna xɨcajra'an mej jetzen nain huatyauuna tyamua'a naa. Capu che'e seira'a a'ame jaxu'u jetze ɨ tetej tɨ rujapua ticaitɨmee. 7Matɨ'ɨj mi meyan tiraataihua'uri'i tɨcɨn: ―Maeestru, ¿a'anajqui ayan te'eme? ¿Ti'itajni cɨn tyájmua'areeran tɨ ari tɨmua'a ayan tyaja'ure'enyejsin? 8Ayaa pu tihua'uta'ixaa tɨcɨn: ―Rɨ'ɨ xu'u muan tɨ ij cai a'atɨ amuaacuanamua. Mui'itɨ mu uve'enyejsin nyenyuucajtze'e. Ayaa mu tyajamuaata'ixaate'esin yee: “Nyaa nu yeehui nyaɨn pueen ɨ Cɨriistu'u.” Majta meyan ti'ixaata mua'aju'un tɨcɨn: “Pu'uri hui tɨn tyaja'ure'enyejsin.” Caxu hui á'ujhua'anye'en hua'a jamuan aɨme. 9’Satɨ'ɨj seyan tyu'unamua tɨcɨn: “Muaataujnya'usi'ite'esin a a'ahua'a seica jamuan ɨ tyaɨte, majta seica meri autyahuijsin mej tyu'ujnya'usi'ite'en”, caxu ti'itzɨɨnya'a. Ayaa pu hui tyu'ujxe'eve'e tɨ anacai ayan tya'ara'ani. Aru capu xɨ ca'anacan te'entipua'ari nainjapua. 10Aj pu i ayan tihua'uta'ixaa tɨcɨn: ―Seica mu tyaɨtyejra'a, majtahua'a seica tyaɨtejra'a, aɨ mu naijmi'i huataujnya'usi'ite'esin. Majta ɨ maj seica chuejra'a japua huachaatɨme, majtahua'a ɨ maj majta seij chuejra'a japua huachaatɨme, aɨ mu naijmi'i huataujnya'usi'ite'esin. 11’Pua'amaque pu huataujca'atzɨjxɨ'ɨsin eihua huapɨ'ɨ ɨ chaanaca japua, ajta huatuuri'ihua a'ame. Ajta eihua pu tyu'ucuí'ini'ira'a a'ame. Ayaa pu ti'itɨ rɨni tɨ tyu'utzɨɨni'ira'a a'ame. Ajta ute'e, ti'itɨ pu huataseijre'esin tɨ huapɨ'ɨ ruxe'eve'e. 12’Aru tɨ cai xɨ ayan tyu'urɨni, aɨ mu hui anacaican á'amuavivi'iran, majta a'ij pua'a á'amuaruuren. Au mu tyu'utatuire'esin muejmi u teyujta'a na'ari a'u maj amue'ityaanan. Au mu amua'avi'itɨn aɨme jemi ɨ tajtuhuaani, majta aɨme jemi ɨ maj rey cɨn antyujmua'aree. Ayaa mu een cɨn á'amuaruuren maɨjna cɨme'e saj na'ara'astijre ineetzi. 13Ayaa pu hui ajta tye'iráame sej si seyan tihua'uta'ixaate'en a'ij tɨ Dioj amuaaruu muejmi. 14- 15’Sajta muan, sata'aj seyan huarɨni. Caxu anacaican saɨjna cɨn tyu'umua'ati a'ij sej titeetyaujnan, a'ini nyaa nu amuaata'asin a'ij sej tyu'utaxaj, sajta sej raayɨ'ɨtɨhua'an, sej si hua'utyamue'itɨn aɨme. Camu a'ij tirájtyauváa mua'aju'un a'ij mej tyajámuaatíte, ni camu hue'itzi cɨn amuaatyamue'itɨn. 16’Majta aɨme ɨ a'amuavaujsimua'a, majta ɨ a'amue'ihuaamua'a, majta aɨme a'amuanyausimua'a, majta a'amincustyamua'a, aɨ mu aviitzi cɨn tyu'utatuire'esin muejmi. Majta e'icaca muejmi cui'ini. 17Naijmi'i ɨ tyaɨte, aɨ mu amuajchaɨra'a mua'aju'un muejmi maɨjna cɨme'e saj na'ara'astijre ineetzi. 18’Camu a'atzu a'ij á'amuaruuren tɨj pua'a cai Dioj hua'uata'acare'en, silu aɨ pu Dioj a'amuachaɨj a'ame tɨj na'a rusen cɨme'e. 19Sata'aj hui huatyaujca'anyen ɨ rutzajta'a sej si tya'utaviicue'i. Tɨ pua'a seyan huarɨni, muan xu ramue'itɨn sej si ruuri huatyatura'ani ɨ Dioj jemi. 20’Ayaa xu een cɨn raamua'aree tɨ ari tɨmua'a ajna tyaja'ure'enyejsin a'anaj maj pua'a tyu'utyauuna u Jerusalén. Aɨme xu seijran maj antavaatɨmee ɨ xantaaru'u aujna u Jerusalén. 21’Majta aɨme ɨ maj Judeeya a'utyáuu, miche'e aɨme iye'itzi cɨn á'ucɨɨnye a'utɨ á'ujɨrime. Majta aɨme ɨ maj Jerusalén a'utyáuu, miche'e aɨme huiracɨɨnye a pua'aque u chajta'ana jetze. Majta aɨme ɨ maj ɨtzitá a'utyáuu, miche'e cai maun a'utyaru'ipiche'en u chajta'ana jetze. 22’Che'e ayen tya'ara'ani a'ini pu'uri hui tyaja'ure'enye ajna xɨcajra'an tɨ jetzen araurastejsin nain a'ij tɨ te'eyu'usi'i ɨ yu'uxari jetze. Eihua mu rajpueiitzi mua'aju'un maɨjna cɨme'e tɨ Dioj ayan pueijtzi hua'uta'asin. 23’Eecan pu a'ij pua'a hua'aruuren ajna xɨcajra'an jetze aɨme ɨ juuca ɨ maj autájucájmee, ajta aɨme ɨ maj mauj hua'atzi'ite ɨ ruyaujmua'a. Eihua mu hui huapɨ'ɨ rajpueiitzi mua'aju'un aɨme ɨ maj Israel huachaatɨme. Eecan pu pueijtzi hua'uta'asin ɨ Dioj. 24’Xantaaru'u mu eihua tyaɨte cui'ini ɨ tyú'ujchún cɨme'e. Majta mui'icaca mu á'avi'itɨn nainjapua ɨ chuej tɨ yen seijre'e iiyan chaanaca japua. Majta aɨme ɨ maj cai Israel e'ema'acan, aɨ mu ratyáuuna ɨ Jerusalén asta na'a cai aráurasten ajna xɨcajra'an mej jetzen tyu'utaijta aɨme ɨ maj cai Israel e'ema'acan. 25’Ajta eihua pu tyu'utaseijre'esin u ute'e ɨ xɨcaj jetze, ajta ɨ maxcɨra'i jetze, ajta xu'ura'ave tzajta'a. Ajta iiyan chaanaca japua, eihua pu tyujta'ahua'a a'ame a jaata'a jetze tɨ ve'e. Eecan pu tɨ'ɨráana a'ame. Aɨj pu cɨn utyavatzɨjsin ɨ hua'a tzajta'a ɨ tyaɨte aɨjna cɨme'e mej ti'itzɨɨne'e. Camu a'ij tihua'amityejtya'a a'ame. 26Eihua mu huataujtɨmue'ira ɨ tyetyaca maɨjna cɨme'e mej a'ij pua'a titya'ujmua'ate a'ij tɨ hua'a japua yee tiéiixa iiyan chaanaca japua, a'ini ti'itɨj tɨj na'a tɨ ute'e tyeje'eseijre'e, aɨ pu hui huataujca'atzɨjxɨ'ɨsin. 27’Ajna xɨcajra'an jetze, aɨ mu nyeseijran inyaa i nyaj nyajta hua'a jetze airaanye ɨ tyaɨte nyej a'icáamá'a na'ame jaitɨri tzajta'a. Huapɨ'ɨ pu naa seira'a a'ame mej mi naa rɨ'ɨ tira'utaseij ɨ tyaɨte. Nyamuare'eri'ira'a cɨn nu yava'acányejsin. 28’Tɨ'ɨj autyejcheni tɨ ayan tyu'urɨni, rɨ'ɨ xu'u huaujruuren. Sata'aj ajnyejnye'erixɨ'ɨn a'ini pu'uri hui vejli'i ajna xɨcajra'an Dioj tɨ jetzen amue'irajtuaani. ―Ayaa pu tihua'uta'ixaa. 29Ajta seij nyuucari hua'uta'ixaa tɨcɨn: ―Casi'i, xaaseij saɨjna ɨ huarej, ajta naijmi'i ɨ cɨye tɨ ti'iseijre'e. 30Tɨ'ɨj antinyajxɨ'ɨn ɨ xamue'ira'an, muan xu rujɨɨmua'a sana'a raseijran, sajta seyan ramua'areeran tɨ ari vejli'i pɨ ti'irɨcɨ ɨ viita'ari tzajta'a. 31Ayaa pu che'eta na'a ti'en. Satɨ'ɨj seri raaseijra a'ij nyej tyajamuaata'ixaa, sajta seyan ramua'areeran tɨ ari tɨmua'a ajna pɨ tyaja'arɨcɨ tɨ Dioj tyu'utaijta. 32’Ayaa nu tyaja'amue'ixaate'e tzaahuati'ira'a cɨme'e, aɨme cɨme'en ijii mej huátyaamua, mauche'e mu meyan seira'a mua'aju'un tɨ'ɨj naijmi'i tya'araurasten a'ij nyej neri tyajamuaata'ixaa. Camu maɨn anáatyá'a muá'apua'aren. 33Aɨ pu xaa á'apua'aren ɨ tajapua tɨ e'eseijre'e. Ajta ɨ chaanaca, aɨ pu ajta á'apua'aren. Ma ajta hui aɨn ɨ nyuucari nyej raataxajtaca'a, capu a'anaj á'apua'aren. 34’Rɨ'ɨ xu'u tyamua'a naa muan. Caxu a'ij pua'a ruruura ɨ ru tzajta'a saɨjna cɨme'e sej eihua ruta'arujve'e, ajta ayan tyajamuaata'asáa a'aye'i mɨ a'amua tzajta'a ti'itɨj tɨ a'ij pua'a een. Rɨ'ɨ xu'u sajta muan tɨ ij cai a'ij pua'a amuaaruuren mɨ a'amua tzajta'a saɨjna cɨme'e sej eihua huapɨ'ɨ a'ij pua'a tityá'ujmuajte a'ij tɨ ye'i te'eme. Na'ari cai, ajna xɨcajra'an jetze pu hui ca'anacan muejmi japuan rávaɨjtzi satɨ'ɨj pua'a cai che'e hui rachu'eve'e. 35A'ini aɨ pu hua'a japua rávaɨjtzi naijmi'ica japua ɨ maj yan japuan huachaatɨme ɨ chaanaca. 36’Tɨ'ɨj pɨ na'a xu atanyéjnye'eri. Sata'aj seyan rahuaviira ɨ Dioj jemi tɨ ij amuaatyavaɨre'en tɨ ij cai ti'itɨ a'ij amuaaruuren a'ij tɨ ti'itɨj rɨni. Sata'aj sajta rahuaviira sej si seyan nye jemi seira'a xa'ara'ani, neetzi jemi, i nyaj nyajta hua'a jetze airaanye ɨ tyaɨte. ―Ayaa pu tihua'uta'ixaa aɨjna ɨ Jesús. 37Nain tujca'ari tzajta'a, aɨ pu tihua'amua'atyahua'a u teyujta'a. Ajta tɨ'ɨj pɨ na'a tɨ huará'acaanacaare'e, au pu a'uye'icaa a'aye'i aujna jɨri jetze tɨ ayan tyaja'arajtyahuaa tɨcɨn Aceituunajremi. Au pu a'atáxairihua'a. 38Majta aɨme ɨ tyaɨte, aɨ mu iiya'a mana'a a'ure'eninyéica'a jemin aujna teyujta'a mej mi raanamua.

will be added

X\