San Lucas 20

1Ajna'ɨmɨ pu ayan tyuju'urɨj. Au pu tihua'amua'atyajcaa u teyujta'a a'u tɨ a'aráyaujta'a. Ajta pu hué'ixaatya'acaa ɨ tyaɨte ɨ nyuucari tɨ cɨn Dioj hue'iratuaasin. Matɨ'ɨj mi seica a e'ire'enye, aɨme ɨ maj teyujta'a tie'ijta, majta aɨme ɨ maj ti'imua'ata ɨ yu'uxari jetze Moisés tɨ ra'uyu'uxaca'a, majta ɨ hua'avaujsimua'a. 2Ayaa mu tiraata'ixaa tɨcɨn: ―¿Ti'itajni cɨn peti'ityejvee pej pi peyan rɨcɨ? ¿A'atani hui aɨjna cɨn timuéijca? 3Aj pu i Jesús ayan tyu'utanyúu tɨcɨn: ―Nyaa nu nyajta tyajamuaataihua'ura sej si sajta muan seyan tinaata'ixaate'en. 4Aɨjna tɨ cɨn hua'umuaɨ'ɨhuaca'a ɨ Juan tyaacan, ¿a'atani hui tiraijca aɨjna? ¿Ni ɨ Dioj ca'ɨn ɨ tyaɨte? 5Matɨ'ɨj mi meyan ti'ityurihua'uri'i tɨcɨn: ―Tɨ pua'a teyan tiraata'ixaate'en yee Dioj tɨ ute'e e'eseijre'e, aɨ pu tiraijca, aj pu xaa ayan titaata'ixaate'esin yee a'ini tyej tij cai ra'atzaahuate'e. 6Na'ari, tɨ pua'a hui teyan raataxaj yee tyetyaca mu tiraijca, aj mu mi tyaɨte taatyatu'asixɨ'ɨsin tetej cɨme'e, a'ini ayaa pu tihua'amityejte'e tɨ Juan aɨn púeenya'a saɨj tɨ ti'ixaxa'ata'a ɨ Dioj jetze ma'acan. 7Aɨj mu cɨn meyan tiraata'ixaa tɨcɨn: ―Catu ramua'aree a'atɨ tɨ jemin ti'ityavaaca'a aɨjna ɨ Juan. 8Ajta aɨn Jesús, ayaa pu tihua'uta'ixaa tɨcɨn: ―Canu nyajta nyaa amuaata'ixaate'esin a'atɨ nyaj jemin ti'ityejvee nyej ni neyan rɨcɨ. 9Ajta e'eyan Jesús pu seij nyuucari cɨn hua'uta'ixaa ɨ tyaɨte ayan tɨcɨn: ―A'atɨ pu nu'u hui eihua uuva huahuii. Tɨ'ɨqui, seica huata'a ɨ tyaɨte maj man tyu'umuare'en ɨ huastari tzajta'a. Aj pu nu'u i á'uraa aɨjna ɨ a'atɨ. Eihua pu mu'u e'etee. 10’Tɨ'ɨj ajna tyaja'ure'enye matɨ'ɨj pua'a raju'uraca, seij pu nu'u u a'utaityaca'a hua'a jemi ɨ tɨ hua'utanyaɨjte mej mi raatatuire'en e'icaca tɨ tyu'ucɨɨraca'a. Majta aɨme ɨ tyaɨte, aɨ mu nu'u raatyaavajxɨ maɨjna tɨ ti'ivaɨre'e. Majta nu'u cai ti'itɨ raata'a, ayaa mu'u tiraataityaca'a. 11’Ajtahua'a nu'u seij huataityaca'a tɨ jemin ti'ivaɨre'e. Majta aɨme tɨ hua'utanyaɨjte, majta mu nu'u raatyaavajxɨ. E'ij mu pua'a raaruu. Majta cai ti'itɨ raata'a, ayaa mu'u nu'u tiraataityaca'a. 12Hueicacajretze, aɨ pu nu'u hui seij ajtahua'a huataityaca'a. Majta nu'u maɨn tɨ hua'utanyaɨjte, aɨ mu tiraapueij. Majta raara'ityaca'a. 13’Tɨ'ɨqui nu'u ayan tyu'umuá'a aɨjna ɨ a'atɨ tɨ a'ara'an pueen ɨ chuej, tɨcɨn: “¿A'iqui yeehui naarɨni inyaa? Niyauj nu hui huataíti ɨ nyaj huapɨ'ɨ raxe'eve'e. Ayej nya'ase, aɨ mu xaa ra'arátyese'esin maɨjna.” 14’Ma majta aɨme, matɨ'ɨj nu'u raaseij, aj mu mi tyu'utaurixaa. Ayaa mu tiraaxa'apɨ'ɨntare tɨcɨn: “Ai pu yeehui aɨn pueen ɨ tɨ ti'ijcɨ'ɨti. Tiche'e raaje'ica tɨ ij tyejmi huacɨ'ɨti.” 15’Aɨj mu nu'u cɨn raara'ityaca'a. Matɨ'ɨj nu'u mi raaje'ica. ’¿A'ini hui tyajamua'amitejte'e muejmi, a'iqui hua'aruuren aɨjna tɨ a'ara'an pueen a'u tɨ uuva a'ahuiiti'i? 16’Ayaa nu tyaja'amue'ixaate'e. Aɨ pu aun a'ure'enyejsin. Ajta e'eyan aɨn hua'acui'ini aɨme ɨ tɨ hua'utanyaɨjte. Aj pu i xaa seica huatapueijve'esin mej mi maun hui tyaja'umuare'en. Matɨ'ɨj meyan tiraanamuajri'i ɨ tyaɨte, ayaa mu tyu'utaxajtaca'a tɨcɨn: ―Che'e cai a'anaj ayan ti'irɨjca. 17Aj pu i Jesús hua'useirajraa. Tɨ'ɨqui ayan tyu'utaxajtaca'a tɨcɨn: ―Na'ari cai ayan ti'ayajna a'ij nyaj tyajamuaata'ixaa, a'ini een cɨn ayan tya'asɨɨmue'i ɨ yu'uxari jetze tɨ ayan tɨcɨn: Aɨjna ɨ tetej ɨ maj majca'i ruurai aɨme ɨ maj chi'i ta'ahuaca, ayaa pu te'irajraa tɨ ain aɨn pueen ɨ maj ra'atyéchajtza u esquiina a'u maj ya'ajtaahua ɨ chi'i. 18A'atɨ tɨ na'a tɨ pua'a saɨj ɨ a'atɨ aɨjna japua rajveti ɨ tetej ɨ mej meri ra'atyejche u isquiina, aɨ pu huatyana'axɨjsin nainjapua u rujetze. Na'ari a'atɨ tɨ na'a ɨ mej ti'imuare'e, tɨ pua'a seij japua rajveti aɨjna ɨ tetej, aɨ pu tira'iraxayeepe'esin. ―Ayaa pu tihua'uta'ixaa aɨjna ɨ Jesús. 19Majta aɨme ɨ mej tí'imua'atajcaa ɨ yu'uxari jetze Moisés tɨ ra'uyu'uxaca'a, majta aɨme ɨ mej tie'ijtacaa u teyujta'a, eihua mu tyu'umuá'a a'ij mej ye'i huarɨni mej mi ca'anacan raatyeevi'i, a'ini ayaa mu tiru'umua'areeracaa tɨ hua'a jemi huatyenyuu aɨjna cɨme'e ɨ nyuucari tɨ raataxajtaca'a. Aru aɨme, aɨ mu hua'atzɨɨnya'acaa ɨ tyaɨte. 20Eihua mu re'eeva'acaa. Aɨj mu cɨn seica huataityaca'a ɨ mej meyan ruseijrataca'a mej meyan ti'ixaxa'a tzaahuati'ira'a cɨme'e. Ayaa mu ti'ijxe'eva'acaa mej tiraataihua'u ti'itɨj cɨme'e tɨ i aɨn aɨjna cɨn aira'ɨtzen mej mi tyu'utatuiire'en ɨ tajtuhuan jemi. 21Majta aɨme ɨ maj re'eeva'acaa, ayaa mu tiraataihua'uri'i tɨcɨn: ―Maeestru, tyan tu ramua'aree tɨcɨn pej peyan ti'ixaxa'a tzaahuati'ira'a cɨme'e, pajta tihua'amua'atya a'ij tɨ tiraavijte'e. Ayaa papu'u che'eta hua'aruuren ɨ tyaɨte. Muaa paj tzaahuati'ira'a cɨme'e tihua'amua'ate a'ij tɨ ti'ijxe'eve'e ɨ Dioj. 22¿Ni qui xa'apɨ'ɨn tyej teyan tyu'unajchi aɨjna jemi tɨ ti'itaijte'e, aɨjna tɨ ayan antyahuaa tɨcɨn César? 23Ajta aɨn Jesús, aɨ pu ru'umua'areeracaa maj cai meyan ti'ire'ihua'uracaa tzaahuati'ira'a cɨme'e. Aj pu i ayan tihua'uta'ixaa tɨcɨn: 24―Seij sanaataseijrate'e ɨ tumin. ¿A'ataani nyeerima'ara'an pɨrɨcɨ tɨ jetzen acajvee? ¿A'ini tya'axa tɨ jetzen a'aseijre'e? ¿A'ini hui antyahuaa? 25Matɨ'ɨj mi meyan tyu'utanyúu tɨcɨn: ―Aɨ pu pɨrɨcɨ ɨ César. Aj pu i ayan tihua'uta'ixaa tɨcɨn: ―Sata'aj seyan raata'an saɨjna ɨ César, ti'itɨ tɨ a'ara'an pueen. Sata'aj sajta raata'an ɨ Dioj ti'itɨ tɨ a'ara'an pueen. 26Majta aɨme, camu a'ij tirajtyauva'acaa a'ij mej ye'i huarɨni maj raatyaamue'itɨn maɨjna cɨme'e a'ij tɨ aɨn tihua'uta'ixaa a eijre'e hua'a tzajta'a ɨ tyaɨte. Majta aɨme ɨ tyaɨte, naa mu rɨ'ɨ tira'utaseij a'ij tɨ aɨn tyu'utaxajtaca'a. Aj mu mi raatapua'ajtaca'a mej tí'ixajtacaa aɨme ɨ seica. 27A'atzu a'ateevi'ica, seica mu e'ire'enye. Aɨme mu pɨrɨcɨ ɨ saduceos. Ayaa mu ti'ixaxa'a aɨme yee camu che'e huatarujsin ɨ mej meri huacuii. Matɨ'ɨj mi meyan tiraataihua'uri'i tɨcɨn: 28―Maeestru, ayaa pu ra'uyu'uxaca'a aɨjna ɨ Moisés tyaacan tɨ ayen te'eme itejmi jemi. Tɨ pua'a nu'u a'atɨ tɨ nyaɨche, tɨ pua'a aɨn cai titɨ'ɨrijmua'a huamɨ'ɨni, ruxe'eve'e nu'u tɨ aɨn ihuaara'ara'an ra'ancure'evi'itɨn aɨjna tɨ ratyevi'itɨnya'a ɨ tɨ huamɨ'ɨ tɨ ij aɨjna jetze ma'acan tiyauj a'ara'ani. 29’Ayaa pu hui a'anaj tyuju'urɨj itejmi jemi. Ayaa mu ará'axcaa a'achu cumu arahua'apua ɨ tyaɨte ɨ maj ru'ihuaamua'atacaa. Tɨ'ɨqui aɨn tɨ vasta'a, aɨ pu huatyenyaɨchaca'a. Ajta e'eyan huamɨ'ɨ. Capu xɨ tiyauuca. Ayaa pu hui che'eta na'a tiraaruu ɨ seij tɨ ra'itya'asi. Mu'uri i'i hua'apua. 30’Ajta aɨn ɨ saɨj tɨ ra'itya'asi, aɨ pu ra'ancure'evi'itɨ aɨjna ɨ jɨita'a tɨ raatyevi'itɨnya'a aɨjna ihuaara'ara'an tyaacan. Mu'uri i'i hueica. 31Ajtahua'a saɨj tɨ ra'itya'asi, aɨ pu ajta ra'ancure'evi'itɨ. Ayaa pu che'eta na'a tihua'uruu naijmi'ica ɨ maj arahua'apua, maj cai jetzen tiyauj mua'araa, naimi'i mu huacuii. 32Ajta e'eyan, aɨn ɨ jɨita'a pu huamɨ'ɨ. 33’Ma'acui xaa, matɨ'ɨj aitacɨɨnye hua'a tzajta'a ɨ mɨ'ɨchite, ¿a'ataani jɨra'ara'an puéenya'a a'ame?, a'ini naijmi'i mu ra'ancure'evi'itɨ. 34Aj pu i Jesús ayan tihua'uta'ixaa tɨcɨn: ―Aɨme ɨ tyaɨte ɨ mej ijii huátyaamua, aɨ mu nyejnya'ɨche, majta vivɨɨche. 35Majta aɨme tɨ ayan tihua'uvijte'e maj ajna a'ara'asti maj aitacɨɨnye hua'atzajta'a ɨ mɨ'ɨchite, majta majna a'ara'asti ajna xɨcajra'an jetze tɨ Dioj nainjapua tyu'utaijta, aɨ mu cai che'e nyejnya'ɨchen, camu majta vivɨɨchen. 36Camu majta che'e cui'ini, a'ini ayaa mu e'en matɨj aɨme ɨ maj tajapua ti'ivaɨre'e. Aɨ mu yaujmua'ame'en pueen ɨ Dioj a'ini mu'uri huanyej hua'a tzajta'a ɨ mɨ'ɨchite. 37’Ajta aɨn ɨ Moisés, aɨ pu hui titaata'ixaa aɨjna cɨme'en tɨ'ɨj ra'uyu'uxaca'a a'ij tɨ a'anaj saɨj a'utyajtaa tu'upi tɨ ajtɨtɨ'ɨ. Aɨj pu cɨn Moisés ayan raatamuá'a ɨ tavastara'a tɨcɨn: “Ɨ tɨ Diojra'an pueen aɨjna ɨ Abraham, ajta ayen che'eta na'a Diojra'an pueen aɨjna ɨ Isaac, ajta Diojra'an pueen ɨ Jacobo.” 38’Moisés pu hui tihua'uta'ixaa cumu maj mauche'e ruuricaa. Aɨj pu cɨn, ai pu aɨn pueen ɨ hua'a Dioj aɨme ɨ maj ruuri. Capu hua'a Dioj pueen aɨme ɨ maj mɨ'ɨchijta muaatyajturaa tɨj na'a rusen cɨme'e. ―Ayaa pu tihua'uta'ixaa aɨjna ɨ Jesús. 39Majta seica ɨ mej ti'imua'ata ɨ yu'uxari jetze Moisés tɨ ra'uyu'uxaca'a, ayaa mu tyu'utanyúu tɨcɨn: ―Maeestru, xa'apɨ'ɨn paj tyu'utaxajtaca'a. 40Tɨjna'a ajna'ɨmɨ, capu che'e a'atɨ ahuaujca'anye tɨ ti'itɨ raataihua'u. 41Ajta Jesús ayan tihua'uta'ixaa tɨcɨn: ―¿A'ini een cɨme'e meyan ti'ixaxa'a maɨjna cɨme'e ɨ Cɨriistu'u Dioj tɨ ra'antihuau yee yaujra'an pueen ɨ David tyaacan? 42Ajta aɨn ɨ David, ayaa pu tyu'utaxajtaca'a aɨjna cɨme'en tɨ te'eyu'usi'i ɨ yu'uxari jetze tɨ ayan antyahuaa tɨcɨn Chuicari. Ayan tɨcɨn: Dioj pu ayan tiraata'ixaa ɨ nyavastara'a ɨ tɨ ra'antihuau tɨ cɨme'en yee: “Acaayeijxɨ'ɨ ɨpuari japua iiya nya'ɨrɨɨta'a. 43Pauche'e paj hui maj cájcatii asta nyacai hua'utyamue'itɨn ɨ maj muájchaɨre'e.” 44’Ajta aɨn ɨ David, aɨ pu hui ayan raatamuá'a aɨjna tɨ Dioj ra'antihuau tɨcɨn nyavastara'a. Tɨ pua'a ayan ti'ayajna, ¿a'ini ti'irɨ'ɨri tɨ aɨn Cɨriistu'u ayan aɨn púeenya'a aɨjna tɨ David jetze airaujnejte? Capu a'ij ti'irɨ'ɨri tzɨte'e. ―Ayaa pu tihua'uta'ixaa aɨjna ɨ Jesús. 45Aj pu i Jesús ayan tihua'uta'ixaa aɨme ɨ maj jamuan á'ujhua'anya'a. Majta tyaɨte ti'inamuajracaa. 46Ayan tɨcɨn: ―Rɨ'ɨ xu'u muan, aɨme jemi ɨ mej ti'imua'ata ɨ yu'uxari jetze, Moisés tɨ ra'uyu'uxaca'a. Eecan pu hua'araanajchi maj tɨ́tɨ'ɨjmé'en ti'ityecháatɨmá'a maa ma'ujhua'anye'en ajna mej tyaja'atu'araca, majta aɨme ɨ tyaɨte, aɨ mu majta hua'aséira'a mua'aye'i. ’Ayaa mu maɨjna cɨn titya'ujtzáahuatya'a mua'aju'un aɨme ɨ puaarijse maɨjna cɨme'e maj va'acan cɨn títaatatyé'ete ɨ Dioj jemi. Majta, ayaa mu ti'ijxe'eve'e mej aun a'ujrá'asen ɨ ɨpuari japua tɨ eitze'e ruxe'eve'e aujna teyujta'a, ajta hua'araanajchi mej mi a vejli'i a'ujra'ase jemin tɨ tihua'amin matɨ'ɨj ti'iyeste. 47’Aɨ mu hui majta hua'ari'iraca ɨ hua'achi'i aɨme ɨ juuca maj huataujsaɨjtaraca'a. Ayaa mu cɨn huarɨn, aj mu mi aun a'utyaruti u teyujta. Matɨ'ɨjta mi a'atyeevi'i mu mua'aju'un mej tyenyuusima'a mua'aju'un mej mi seica tyaɨte hua'useij. Majta maɨn ɨ mej meyan e'en, eihua mu huapɨ'ɨ rajpueiitzi mua'aju'un. ―Ayaa pu tihua'uta'ixaa aɨjna ɨ Jesús.

will be added

X\