San Lucas 18

1Aj pu i Jesús seij nyuucari cɨn tihua'uta'ixaa mej mi raamua'aree tɨ ayan nu'u tyu'ujxe'eve'e mej tyenyuuca'an a'anaj tɨ na'a. Ajta ayan tyu'ujxe'eve'e maj nu'u cai ruxaamɨste'e. 2Ayaa pu tihua'uta'ixaa tɨcɨn: ―Aa pu nu'u a'ahua'a seij chajta'ana jetze a'atɨ pu e'echajca'a tɨ juees cɨn ti'ityavaaca'a. Capu nu'u hui ra'atyesa'acaa ɨ Dioj aɨjna ɨ juees, capu ajta jetzen ruxe'eva'acaa a'ij tɨ ti'itɨ hua'aruure ɨ tyaɨte. 3’Meenti nu'u saɨj aun a'utyavaaca'a jɨita'a tɨ huaujsaɨjtaraca'a. Ajta aɨn ɨ jɨita'a, a'anaj tɨ na'a pu a'ure'eninyéica'a ɨ juees jemi. Ayaa pu nu'u hui ti'ijhuaviiraca'a tɨcɨn: “Pata'aj yeehui peyan naaruuren paj nya'uxɨjte'en paɨjna cɨme'e tɨ a'atɨ nyejchaɨre'e.” 4’Ajta aɨn ɨ juees, aɨ pu nu'u ra'ijmɨjraca'a. Pu'uri a'atyeevi'i tɨ ayan raruurajca'a. Aj pu i ayan tyu'umuá'a tɨcɨn: “Ee xaa nya'u, canu yeehui ra'atese'e ɨ Dioj, capu ajta nyeetzi jetze ruxe'eve'e a'ij tɨ ti'itɨj hua'aruure ɨ tyaɨte. 5Aru amɨjna mɨ jɨita'a, tɨ'ɨj pu na'a pɨ yeehui ya taninyei. Eecan pu nyajaaxaijte'e. Tij cai nyaa nu yeehui ra'axɨjte'en nyaɨjna cɨme'e tɨ a'atɨ rajchaɨre'e. Na'ari cai, ajtahua'a pu yeehui yatáninyéica'a a'ame asta nyana'a cai tacua'anaxɨ'ɨn nyaɨjna cɨme'e.” Ayaa pu nu'u tyu'umuá'a. 6Ajta tavastara'a pu ayan tihua'uta'ixaa tɨcɨn: ―Xaanamuajri'i muan a'ij tɨ ti'ixa aɨjna ɨ juees tɨ a'ij pua'a ti'ityujcha'ɨ. 7Ajta aɨn ɨ Dioj ɨ saj rajya'upua, ¿a'ini tyajamua'amitejte'e a'ij tɨ huarɨni muejmi cɨme'e ɨ tɨ amua'antihuau? ¿Ni cai amuá'axɨjte'en aɨjna cɨme'e ɨ maj amuájchaɨre'e ɨ a'amua xa'aj tyaɨte, ɨ tɨ Dioj amua'antihuau? Ai nya'u cai. Nain xɨcaj tzajta'a, ajta nain tɨca'ari tzajta'a, muan xu rahuavii tɨ ayan huarɨni. ¿Ni qui a'ateere tɨ á'amue'ijmɨ́ɨra a'ame? Capu xaa nya'u a'atzu. 8’Ayaa nu hui tyaja'amue'ixaate'e. Dioj pu ayan tyá'ujca'anye tɨ ama'uxɨjte'en aɨjna cɨme'e ɨ maj amuájchaɨre'e. Ajta ca'anacan pu ayan rɨni. Ma ajta, nyatɨ'ɨj uvé'enyen inyaa i nyaj nyajta hua'a jetze airaanye ɨ tyaɨte, ¿ni qui macai che'e tya'atzaahuate'e aɨme ɨ maj yan chaanaca japua huachaatɨme? Camu a'atzu, tzɨte'e. 9Jesús pu ajtahua'a seij nyuucari cɨn tihua'uta'ixaa aɨme cɨme'en ɨ mej meyan tyu'umuá'a ɨ ru tzajta'a tɨcɨn rɨ'ɨ mu nu'u ti'ityetyaɨte, ɨ maj majta hua'axaahuata ɨ seica ɨ ruxa'a tyaɨte. Tɨcɨn: 10―Aɨme ɨ tyaɨte, ɨ maj hua'apua, au mu nu'u a'utyajrupi teyujta'a mej mi maun huatyejnyuuni. Saɨj pu fariseo pueenya'a. Ajta ɨ saɨj, aɨ pu hui pɨrɨcɨ tɨ hua'ajijva'acaa ɨ mej ti'itɨcɨ. 11’Ajta aɨn ɨ fariseo, aɨ pu nu'u huatyeechaxɨ. Aɨ pu i autyejche tɨ ayan tyu'utyejnyuuni ɨ rutzajta'a tɨcɨn: “Dioj, eecan nu huatantyamua'ave'e mueetzi jemi a'ini canu yeehui neyan een matɨj e'en ɨ seica ɨ tyaɨte. Aɨ mu yeehui ti'inahua'a na'ari a'ij mu pua'a titetyújcha'ɨ, majta meti'ixána'acɨra'a juucate jamuan. Canu yeehui nyajta neyen een tɨj amɨjna tɨ hua'ajijve'e aɨme ɨ mej ti'itɨcɨ. 12Hua'apuacajretze nu yeehui ne'itzi'ivi sei iteeri cɨme'e. Nyajta neyan tiraata'acaa seij tamuaamuata'a tɨ anxɨte ma'acan ɨ tɨ tinaacɨ'ɨ.” 13’Ajta aɨn tɨ hua'ajijve'e ɨ mej ti'itɨcɨ, aa pu nu'u hui a'atzu ɨmɨ a'utyaváa. Capu nu'u ajta á'ujca'anyajca'a tɨ ute'e a'ujnyeere, silu antyáujtu'axa'a ɨ rutaviitze'e ɨ rumuajca'a cɨme'e. Ayaa pu nu'u tyu'utyeenyuu tɨcɨn: “Dioj, pata'aj yeehui na'ancu'uvajxɨ'ɨn ineetzi, a'ini a'ij nu pua'a ti'itincha'ɨ.” Ayaa pu'u hui tyu'utaxajtaca'a. 14’Ayaa nu tyaja'amue'ixaate'e aɨjna ɨ a'atɨ tɨ hua'ajijve'e ɨ mej ti'itɨcɨ, aɨ pu xaa urare'enya'acan cɨn huatyajturaa ɨ rutzajta'a ɨ Dioj jemi tɨ'ɨj a'ará'a ɨ ruche. Ajta ɨ saɨj ɨ fariseo, capu hui a'atzu xa'apɨ'ɨn tyu'utyajturaa ɨ Dioj jemi. Ayaa pu'u tieenya'a a'araa a'ini tɨ pua'a a'atɨ tɨ na'a á'ujtzaahuate'e, aɨ pu tyu'utatyévi'ira'ata. Ajta tɨ pua'a a'atɨ tɨj na'a cai ayan tya'ujtzaahuate'e, Dioj pu va'acan cɨn tí'iraijcate'en. ―Ayaa pu tihua'uta'ixaa aɨjna ɨ Jesús. 15Majta seica ɨ tyaɨte, tɨ'ɨrii mu a ye'eve'evi'itɨche ɨ Jesús jemi tɨ ij aɨn hue'ire'echuiixɨ'ɨn tɨ ij Dioj ayan aɨjna cɨn rɨ'ɨ tihua'uta'an. Matɨ'ɨj maɨn hua'useij aɨme ɨ maj Jesús jamuan á'ujhua'anya'a, matɨ'ɨj mi hua'ajtya'axɨ ɨ tyaɨte. 16Ma ajta aɨjna ɨ Jesús, aɨ pu hua'utajee ɨ tɨ'ɨrii mej mi a'iré'enyen ɨ jemin. Ayaa pu tyu'utaxajtaca'a tɨcɨn: ―Miche'e mamɨn ma huaje'eve'evi'itɨn ineetzi jemi mɨ tɨ'ɨrii. Caxu hue'ijmɨjra a'ini amɨme pu hui ti'icɨ'ɨti mej mi maun a'utyarute aujna Dioj tɨ e'eseijre'e. 17’Ayaa nu tyaja'amue'ixaate'e tzaahuati'ira'a cɨme'e, a'atɨ tɨ na'a tɨ hui cai ayan che'eta na'a á'ujca'ane tɨ Dioj tiraataijte'en a'ij mej titya'ujca'ane mɨ tɨ'ɨrii, capu xaa nya'u ajna a'utyaruti a'u tɨ Dioj e'eseijre'e. ―Ayaa pu tyu'utaxajtaca'a aɨjna ɨ Jesús. 18Ajta aɨn ɨ a'atɨ, au pu a'utyavaaca'a. Ai pu aɨn pueen saɨj tɨ tie'ijta. Ayaa pu tiraataihua'uri'i aɨjna ɨ Jesús tɨcɨn: ―Maeestru, mɨ paj uraré'en ɨ a'a tzajta'a, a'ini tyu'ujxe'eve'e nyej neyan huarɨni tɨ ij tinaacɨ'ɨti nyaj ruuri na'ara'ani para rusen cɨme'e. 19Jesús pu ayan tyu'utanyúu tɨcɨn: ―¿A'ini een cɨn peyan ti'inyaxa yee nyaj uraré'en yu nya tzajta'a? ¿Ni pacai ramua'aree tɨ saɨj na'a aɨn pueen tɨ uraré'en ɨ ru tzajta'a? Ai pu aɨn pueen ɨ Dioj. 20’Papu'uri hui ru'umua'aree a'ij tɨ Dioj tyu'utaijtaca yee capaj ti'ixana'acɨra'a, capej yee ti'ityacui'ica, capaj ajta yee ti'inahua'a, capaj ajta yee ti'ihue'itaca. Pajta yee rɨ'ɨ tihua'uchaɨn a'ataata, pajta a'anaana. 21Ajta aɨn tɨ tie'ijta, ayaa pu tiraata'ixaa tɨcɨn: ―Nain nu cɨn tira'ara'astijre tɨj na'a nyej che'e pa'arɨ'ɨsta. 22Tɨ'ɨj Jesús raanamuajri'i a'ij tɨ tyu'utaxajtaca'a, aj pu i ayan tiraata'ixaa tɨcɨn: ―Saɨj pu'u hui mua'aturaate'e. Pata'aj nain tyu'utuaani a'achu paj caj tí'ijcha'ɨ. Aj pej pi hua'ura'an ɨ tumin aɨme ɨ maj cai a'ij ti'ijviicue'i. Tɨ pua'a peyan huarɨni, aj paj xaa ra'ancura'asin ɨ tɨ tajapua e'eseijre'e aɨjna tɨ huapɨ'ɨ ti'ijnajchi. Aj pej hui pijta'i mu a'arájra'ani neetzi jamuan. ―Ayaa pu tiraata'ixaa. 23Ajta aɨn tɨ tie'ijta, tɨ'ɨj raanamuajri'i a'ij tɨ Jesús tyu'utaxajtaca'a, eecan pu huataujxaamɨste a'ini eihua pu tí'ijchaɨca'a. 24Aj pu i Jesús ra'araaseij. Tɨ'ɨj i ayan tyu'utaxajtaca'a tɨcɨn: ―Eecan pu huapɨ'ɨ hua'amuare'eriste'e aɨme chijtyaani mej mi maun a'utyarute u tajapua Dioj tɨ e'eseijre'e. 25’Ee xaa nya'u, ayaa nu hui tyaja'amue'ixaate'e tɨ ayan ti'ayajna, eitze'e pu muare'eri tɨ chijtyaani aun a'utyarute u tajapua Dioj tɨ e'eseijre'e cai tɨ cameeyu'u ti'itɨ anaarute ɨ pɨ'ɨse'e jetze. ―Ayaa pu tyu'utaxajtaca'a aɨjna ɨ Jesús. 26Majta maɨn ɨ maj raanamuajri'i, ayaa mu tiraataihua'uri'i tɨcɨn: ―¿A'ini ye'i ti'irɨ'ɨri tɨ a'atɨ aun huatyaturan Dioj tɨ e'eseijre'e? 27Jesús pu ayan tihua'uta'ixaa tɨcɨn: ―Aɨme jemi ɨ tyetyaca, capu xaa a'ij ti'irɨ'ɨri. Ma ajta Dioj, aɨ pu xaa raayɨ'ɨtɨ. 28Ajta aɨn ɨ Pedro, ayaa pu tiraata'ixaa tɨcɨn: ―Maeestru, nain tu hui teri tyaja'uhua'axɨ ɨ tyej tí'ijchaɨca'a tyej ti á'ujhua'anye'en a jamuan. 29- 30Jesús pu ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e, ayaa pu hui tihua'acɨ'ɨti a'atɨ tɨ na'a tɨ ari eitze'e rɨ'ɨ tinajcha'ɨ ineetzi cai maa a'atɨ aɨjna cɨme'e tɨ nyaa jamuan a'ucha'acan. Tɨ pua'a hui a'atɨ ayan eitze'e ti'ijxe'eva'a tɨ nyaa jamuan á'ucha'acanye'en cai ayan ti'ijxe'eva'a tɨ aun huatyaturan ɨ ruchi'ita, nusu tɨ pua'a eitze'e rɨ'ɨ tinajcha'ɨ ineetzi cai ɨ ru'ɨj nusu ɨ ruja'atzimuá nusu ɨ rucu'utzimuá nusu ɨ rujuutzimua'a nusu ɨ ruvaujsimua'a, eihua pu eitze'e ra'ancura'asin ijii tɨ yu auume aijna jetze i chaanaca, ajta, aɨ pu hui ruuri a'ame para rusen cɨme'e tɨ'ɨj majca'i huayee tɨ ye e'eve'eme. ―Ayaa pu tihua'uta'ixaa aɨjna ɨ Jesús. 31Tɨ'ɨj i rujɨme'e hua'utajee aɨme ɨ maj tamuaamuata'a japuan hua'apua ara'ase. Ayaa pu tihua'uta'ixaa tɨcɨn: ―Tu'uri hui tɨmua'a a a'ujnyejsin antivi Jerusalén. Ajta naijmi'i pu tya'araurastejsin a'ij mej ye'i tira'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan ineetzi cɨme'e, i nyaj nyajta hua'a jetze airaanye ɨ tyaɨte. 32- 33’Aɨ mu tyu'utatuire'esin ineetzi aɨme jemi ɨ mej seij chuejra'a japua e'ema'acan. Majta aɨme, aɨ mu na'axaahuari'ira mua'aju'un, majta a'ij pua'a ti'inyaxajtan. Aɨ mu hui majta naatyétzi'itzica'imuaxɨ'ɨsin, majta naatyávajxɨ'ɨsin. Matɨ'ɨj mi nyeje'icatan. Tɨ'ɨj hui ari hueica xɨcaj jetze tyajaume'én, aj nu ni aitára'ani hua'a tzajta'a ɨ mɨ'ɨchite. ―Ayaa pu tihua'uta'ixaa. 34Majta maɨn ɨ maj jamuan á'ujhua'anya'a, camu a'atzu yau'eitaa mua'araa. Aɨ pu ra'avaataca'a a'ij tɨ huataujmua'a. Aɨj pu cɨn cai a'ij tihua'amityejtya'acaa a'ij tɨ huataujmua'a ɨ tɨ raataxajtaca'a. 35Aa mu vejli'i a'ucaju'uca ajna a'ahua'a u Jericó. Meenti saɨj, aa pu a'utácatii juye tɨ a'atanínye'ij, tɨ limujna huauuca'a. Aracun aɨjna ɨ a'atɨ. 36Tɨ'ɨj aɨn hua'unamuajri'i maj eihua tyaɨte u a'ucɨ́'ɨca'an, tɨ'ɨj i aɨ tyu'utaihuau ti'itɨ tɨ a'ij rɨjcaa. 37Matɨ'ɨj mi meyan tiraata'ixaa tɨcɨn: ―Ya pu e'icaave'eme aɨjna ɨ Jesús, Nazaret tɨ e'ema'acan. 38Tɨ'ɨj i ayan tiraatajee tɨcɨn: ―Jesús, mɨ pej i'i huaacɨxa'ara'an aɨjna ɨ David tyaacan, pata'aj hui na'ancu'uvajxɨ'ɨn. 39Majta maɨn ɨ maj anáatyá'a muaajú'ucaa, aɨ mu ra'ajtya'axɨ, majta raata'ijmɨjri'i tɨ nu'u cai ti'ixajta. Ma ajta aɨn cai, capu raatapua'ajtaca'a. Eitze'e pu ca'anin cɨn tyu'utaxajtaca'a tɨcɨn: ―Mɨ paj huaacɨxa'ara'an aɨjna ɨ David tyaacan, pata'aj na'ancu'uvajxɨ'ɨn ineetzi. 40- 41Ajta aɨn ɨ Jesús, aa pu a'utyeechaxɨ. Ajta hua'utaij mej ye'eve'evi'itɨn jemin. Tɨ'ɨj a vejli'i ave'ema'acaa, Jesús pu ayan tiraataihua'uri'i tɨcɨn: ―¿A'ini ti'itɨ peti'ixe'eve'e nyej neyan muaruuren mueetzi? Aj pu i aɨn ta'aracun, ayan tyu'utanyúu tɨcɨn: ―Nyavastara'a, ayaa nu hui ti'ijxe'eve'e nyaj nyajta atanyeere. 42Aj pu i Jesús ayan tiraata'ixaa tɨcɨn: ―Nyaa nu muaata'asin paj pajtahua'a atanyeere. Papu'uri huaruj a'ini petya'atzaahuate'e muaa. 43Cɨme'en pu'u ayan tiraata'ixaa, aj pu i aɨn ta'aracuunica'a, atanyeeraca'a. Ajta á'uraa jamuan ɨ Jesús. Ajta rɨ'ɨ pu tiraata'acara'a ɨ Dioj. Majta aɨme ɨ tyaɨte, matɨ'ɨj raaseij, aɨ mu majta rɨ'ɨ tiraata'a ɨ Dioj.

will be added

X\