San Lucas 17

1Jesús pu ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Ayaa pu te'eme tɨ ti'itɨ huataseijre'en ɨ maj cɨn autyaturan ɨ Dioj jemi. Aru lástima é'ecan jemin aɨjna ɨ a'atɨ tɨ ayan ca'anijra'a hua'uta'an mej mi ti'itɨj cɨn auta'ɨtzen ɨ Dioj jemi. 2’Na'ajtzɨ aɨjna ɨ a'atɨ maj anacaican ra'acátapi'iran cɨjpaara'an jetze ɨ tetej sa'unijra'a tɨ ve'e mej mi ra'atyajraini a jaata'a tɨ ij an aujamɨn a'u tɨ autɨ'ɨj. Eitze'e pu hui tiraatyava'ɨrihua'an cai ayan tiraatyava'ɨrihua'an tɨ pua'a aɨn ca'anijra'a tihua'uta'an aɨme ɨ maj cɨle'en mej mi maɨn autyaturan ɨ Dioj jemi. 3’Aɨj pu cɨn, rɨ'ɨ xu'u muan. Tɨ pua'a aɨn a'ihuaara'a autyaturan mueetzi jemi, pata'aj ra'ajtya'axɨ'ɨn. Tɨ pua'a saɨque tyu'umua'ati mueetzi jemi, aj paj xaa tiraatauuni'ira. 4’Tɨ pua'a seij xɨcaj, a'atɨ autyaturan mueetzi jemi aráhua'apuacajretze, ajta tɨ pua'a aɨn a a'uré'enyen mueetzi jemi ayan pua'amua aráhua'apuacajretze tɨ'ij ajtahua'a ayan timuaatahuavii yee tinaatauuni'iri'i ɨ nyaj cɨn autyajturaa mueetzi jemi, ayaa paj hui huarɨni pej tiraatauuni'i. ―Ayaa pu tihua'uta'ixaa aɨjna ɨ Jesús. 5Majta aɨme ɨ maj tamuaamuata'a japuan hua'apua ara'ase, ayaa mu tiraata'ixaa maɨjna ɨ tavastara'a tɨcɨn: ―Taatávaɨre'e tyata'aj tya'antzaahuate'en eitze'e. 6Aj pu i Jesús ayan tihua'uta'ixaa tɨcɨn: ―Aɨ pu tyu'ujxe'eve'e saj cɨj caj tya'antzaahuate'en. Tɨ pua'a seyan cɨj caj sana'a tya'antzaahuate'en, ayaa pu tyu'utarɨ'ɨristari sej seyan tiraataijte'en saɨjna ɨ huarej tɨ a'ityujcuta, tɨ a e'ita'a jaata'a e'etyaujhuiite'en rusaɨj. Ajta aɨn huarej, ayaa pu rɨni a'ij sej tiraataijte'esin. 7- 8’Tiche'e teyan tiraataxaj. Tɨ pua'a a'atɨ ti'imuare'e muejmi jemi aɨjna cɨme'e tɨ tasaahua na'ari canya'axɨ cha'ɨ, ¿A'ini ye'i setiraatajeevi tɨ'ɨj aɨn uvé'enyen a'u tɨ tyaja'amuare'e? ¿Ni qui hui seyan tiraatájeevi yee: “Mu a'uta'iyi'i, a'ujyeijxɨ'ɨ pata'aj tyu'ucua'ani”? Caxu xaa nya'u seyan tiraatájeevi silu ayaa xu'u tiraatájeevi tɨcɨn: “Pata'aj yee rɨ'ɨ tyu'uruuren ɨ tyej ti'icua'ani. Pajta, pata'aj rɨ'ɨ hua'aruuren pej pi titaamin, aj pu yee xaa huatarɨ'ɨristari pej tyu'ucua'ani, pajta paj huaye'en.” 9’Ajta aɨn, tɨ'ɨjta ari ayan tyu'uruuren a'ij sej tiraataij, ¿ni sacai che'e a'ij tiraata'ixaate'esin yee che'e Dioj timuaatanajchite'en? Caxu xaa nya'u a'atzu, a'ini ayaa pu tyu'uruu a'ij sej tiraataij. 10’Ayaa xu che'eta sana'a huarɨni. Satɨ'ɨj seri raacɨ́'ɨ nain cɨme'e ɨ tɨ cɨn Dioj tyajamueijca, ayaa xu'u tyu'utaxajta yee catu hui ti'itɨj vaɨre'e ityan. Ayaa tu'u huarɨj a'i tɨ tyu'ujxe'eve'e itejmi jemi. ―Ayaa pu tihua'uta'ixaa aɨjna ɨ Jesús. 11Auche'e pu huama'aca ɨ juye jetze Jerusalén tɨ a'uré'eninyei. Au pu a'uma'aca a'u tɨ a'avastɨme aun tɨ huatacá'a u Samaariya, ajta u Galileeya. 12Tɨ'ɨj aun a'utyarutijma'acaa, au mu ra'antinajchaca'a ɨ tyetyaca ɨ maj tamuaamuata'a ara'ase. Aɨme meti'icucui'i maɨjna cɨme'e tɨ tinyajxɨ hua'ahue'ira'a jetze, ɨ mej meyan ratamua'amua tɨcɨn leepra. A'atzu mu ɨmɨ a'utyahuiixɨ. 13Matɨ'ɨj mi ca'anin cɨn raatajé tɨcɨn: ―Jesús, mɨ paj maeestru pueen. Pata'aj tá'ancu'uvajxɨ'ɨn. 14Tɨ'ɨj Jesús hua'useij, ayaa pu tihua'uta'ixaa tɨcɨn: ―Sata'aj u a'uju'un hua'a jemi ɨ mej ti'ivaɨre'e u teyujta'a sej si huataujseijrata maj maɨn raamua'aree tɨcɨn xu'uri huaruj. Matɨ'ɨj mi u a'uju'un. Mu'uri a a'uju'uca, aj mu mi huaruj. 15Tɨ'ɨj i saɨj huara'araa tɨ'ɨj raamua'areeri'i tɨcɨn pu'uri huaruj. Aj pu i a'atzu ca'anin cɨn tyu'utaxajtaca'a ɨ Dioj jemi tɨcɨn: ―Rɨ'ɨ nu timuaata'asin nyavastara'a. 16Aj pu i a'arajve a chuaata'a a vejli'i jemin ɨ Jesús. Aj pu i ayan tiraata'ixaa tɨcɨn: ―Che'e Dioj timuaatanajchite'en. Aɨjna ɨ a'atɨ, Samaariya pu e'ema'acan. 17Jesús pu ayan tihua'uta'ixaa tɨcɨn: ―¿Ni macai ara'ase a'achu cumu tamuaamuata'a aɨme ɨ maj huaruj? ¿A'uni a'ij me'en ɨ seica ɨ maj aramuaaca? 18¿Ni amɨ na'a rusaɨj huara'araa tɨ ij rɨ'ɨ tiraata'an ɨ Dioj jemi, amɨjna tɨ seij chuejra'a japua e'ema'acan? 19Aj pu i ayan tiraata'ixaa aɨjna tɨ ti'icui'ica'a tɨcɨn: ―Ajchesi. Papu'uri huaruj a'ini petya'antzaahua. ―Ayaa pu tiraata'ixaa aɨjna ɨ Jesús. 20A'anaj pu ayan tyuju'urɨj. Aɨ mu fariseos meyan tiraataihua'uri'i maɨjna ɨ Jesús tɨcɨn: ―¿A'anajni rɨ'ɨ tyaja'ure'enyejsin tɨ Dioj tyu'utaijta iiyan chaanaca japua? Aj pu i Jesús ayan tyu'utanyúu tɨcɨn: ―A'anaj tɨ tyaja'ure'enyejsin tɨ Dioj tyu'utaijta iiyan chaanaca japua, capu ayan huataseijre'esin aɨjna cɨme'e ɨ saj cɨn raamua'aree, ajta ɨ saj cɨn raaseij yee pu'uri yan huataseijre. 21’Camu hui meyan tiraataxajta ɨ tyaɨte yee, “Ya'acui seijre'e”, na'ari yee, “A'acuí seijre'e”. Camu a'atzu, a'ini pu'uri ye seijre'e aɨjna cɨme'e nyej nyaa ya huatyejvee muejmi tzajta'a. ―Ayaa pu tihua'uta'ixaa. 22Aj pu i ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Pu'uri ajna tyaja'ure'enyejsin ɨ xɨcajra'a sej jetzen seyan raxe'eva'a xa'aju'un huapɨ'ɨ sej raaseij nyatɨ'ɨj anacai tye'entyarute nyaɨjna cɨme'e nyaj nain cɨn antinmua'aréera. Aru, caxu hui raseijran. 23’Tyetyaca mu meyan tyajamuaata'ixaate'esin tɨ cɨme'en yee pu'uri ajna tyaja'ure'enye tɨ Dioj tyu'utaijta iiyan chaanaca japua a'ini ya pu nu'u huatyejvee na'ari yee ma pu nu'u huatyejvee na'ari yee aa pu nu'u e'eseijre'e. Caxu hui u a'ucɨ́'ɨca'an hua'ajamuan. 24A'ini, ayaa nu hui seira'a na'ame nyajna xɨcajra'an nyej jetzen anacaican tye'entyaruti nyaɨjna cɨme'e nyaj nain cɨn antinmua'aréera na'ame. Ayaa nu che'eta nyana'a seira'a na'ame matɨj ɨ maj tyámaxcɨva'ara u ute'e. Tɨ'ɨj huatátaaxɨ'ɨn, ca'anacan pu huanyeeri'icɨ ye'icaa a'ame. 25’Aru mi'i pu hui ayan tyu'ujxe'eve'e nyej eihua rajpueiitzi na'ara'ani inyaa. Ayaa pu ajta tyu'ujxe'eve'e mej nyetite aɨme iiji maj huátyaamua. 26’Ayajna tɨj tyu'urɨj ajca'ihua'ɨmɨ tɨ'ɨj auj ruuricaa aɨjna ɨ Noé tyaacan, ayaa pu che'eta na'a te'eme ajna xɨcajra'an jetze nyaj jetzen ya uve'enyejsin inyaa, i nyaj nyajta hua'a jetze airaanye ɨ tyaɨte. 27’Meti'icua'acara'a ɨ tyaɨte, majta ya'acara'a. Seica mu nyejnya'ɨjcha'acara'a, majta seica vivɨ'ɨcha'acara'a. Camu a'ij mana'a. Ayaa mu rɨjcaa asta na'a cai Noé aun pu a'utyajrupi ɨ baarcu jetze. Ajta pu i eihua tijɨstyaca'a ɨ jaj. Aɨ pu hui naijmi'ica antipua'ari. 28’Ayaa pu che'eta tiraaruu ajca'ihua'ɨmɨ tɨ'ɨj auj ruuricaa aɨjna ɨ Lot tyaacan. Aɨ mu ti'icua'acara'a ɨ tyaɨte. Majta ya'acara'a. Majta ti'inanaavacara'a. Majta ti'ituaacara'a. Majta ti'ihuiityahua'a mu mi, majta chi'i ta'ahuacara'a. 29’Aru ajna xɨcajra'an jetze tɨ'ɨj Lot huiirajraa aujna u Sodoma, taij pu hui huaje'icáaxɨre, tɨ azufre cɨn á'ataaca'a. Naijmi'ica pu antipua'araca'a. 30Ayaa pu che'eta na'a tihua'aruuren ajna xɨcajra'an jetze nyaj huataseijre'esin inyaa i nyaj nyajta hua'a jetze airaanye ɨ tyaɨte. 31’Ayaa xu hui huarɨni ajna xɨcajra'an jetze. Tɨ pua'a a'atɨ an a'ujvaaca ɨ ruchi'i japua tɨ ava'ajaxu'umue'i, tɨ pua'a aun tya'ura'aca ɨ tia'ara'an u chi'ita, che'e cai aun utyaru'iipiche'en tɨ ij tye'ira'ɨn. Ajta aɨn tɨ tyaja'amuare'e ɨ ruvi'ira'ata'a, che'e ajta aɨn cai u a'uye'ican u ruche tɨ ij ti'itɨ a'uva'ɨn. 32’Sata'aj hui ra'utamua'aree a'ij tɨ tiraaruu ɨ ɨra'ara'an ɨ Lot tyaacan. 33A'atɨ tɨ na'a, tɨ pua'a aɨn ayan huarɨni a'ij tɨ tirajtyau rusaɨj tɨj na'a nain xɨcaj tzajta'a, aɨ pu xaa a'uvaɨjtzi. Ajta aɨn tɨ taura'aca tɨ huamɨ'ɨni ineetzi jetze ma'acan, aɨ pu xaa huatyaturaasin tɨj na'a rusen cɨme'e. 34’Ayaa nu tyaja'amue'ixaate'e, ajna tɨca'ari tzajta'a, ma hua'apua mu huatyéje'itɨ́ mua'aju'un ɨ utaatzi japua. Dioj pu hui seij á'avi'itɨn. Ajta ɨ saɨj, aa pu a'utyaturaasin. 35’Majta hua'apua juuca, ma naijmi'i mu tya'atɨ'ɨxɨ́ mu mua'aju'un. Dioj pu seij á'avi'itɨn. Ajta ɨ saɨj, aa pu a'utyaturaasin. 36’Majta hua'apua tyetyaca, ma naijmi'i mu tyaja'amuára'a mua'aju'un u vi'ira'ata'a. Dioj pu hui ajta seij á'avi'itɨn. Ajta ɨ saɨj, aa pu a'utyaturaasin. ―Ayaa pu tihua'uta'ixaa aɨjna ɨ Jesús. 37Majta maɨn ɨ maj Jesús jamuan á'ujhua'anya'a, ayaa mu tiraataihua'uri'i tɨcɨn: ―Tavastara'a, ¿a'uni jetzera'a ra'avi'itɨn ɨ Dioj? Ayaa pu tyu'utanyúu tɨcɨn: ―Au mej e'etyujsaɨre'esin ɨ mua'ara'ica a'u tɨ ti'itɨ aucá'a tɨ mɨ'ɨchi.

will be added

X\