San Lucas 16

1Jesús pu ajta ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Aa pu nu'u hui a'ahua'a chijtyaani e'echajca'a. Saɨj pu ravaɨra'aca'a aɨjna cɨme'e tɨ antyujmua'areeraca'a nain a'achu tɨ tí'ijchaɨca'a ɨ chijtyaani. Matɨ'ɨj nu'u mi seica jetzen tya'ujpuá'ajte aɨjna tɨ antyujmua'aree aɨjna cɨme'e tɨ ca'anacan raxɨjte'e cha'a na'a tɨ ti'iseijra'acaa. 2’Tɨ'ɨj i chijtyaani raatajée. Ayaa pu nu'u tiraataihua'uri'i tɨcɨn: “¿A'ini na'a qui nyej neri tyu'unamuajri'i a'ij paj rɨcɨ muaa? Pata'aj yeehui ra'uyu'uxan nain a'achu paj cɨn anti'amua'areera nyej ni raamua'aree a'achu tɨ caj tya'ara'ase, a'ini capej yeehui che'e peyan antí'amua'aréera pua'ame.” 3’Ajta aɨn tɨ ravaɨra'acaa, ayaa pu tyu'umuá'a tɨcɨn: “¿A'iqui nyarɨni? Aɨjna tɨ tí'inyeijte'e, aɨ pu nu'u tina'ari'ira ɨ nyaj cɨn antinmua'aree. Me nyajta inyaa, canu nyaca'anye nyej te'etye'ijche'en. Ajta neti'ityevi'ira'a nyaj yeehui limujna huatahuauni. 4Nu'uri yeehui ramua'aree a'ij nyaj rɨni, mej mi tyaɨte na'ancure'evi'itɨn tyamua'a naa aujna hua'ache nyatɨ'ɨj cai che'e ti'imuare'e neyajna.” 5’Tɨ'ɨj nu'u i hua'utajée seij ajta seij ɨ mej tira'achaɨra'acaa aɨjna ɨ chijtyaani. Ayaa pu nu'u tiraataihua'uri'i ɨ saɨj tɨ anacai ve'ere'enye tɨcɨn: “¿A'achuni yeehui petira'achaɨre'e ɨ tɨ ti'ineijte'e?” 6’Aj pu i ayan tyu'utanyúu aɨjna ɨ a'atɨ tɨcɨn: “Anxɨte pua'amuaca ɨ taampu aɨjna ɨ aceiti tɨ aceituuna jetze ma'acan.” ’Ajta aɨn tɨ antyujmua'aree, ayaa pu nu'u hui tiraata'ixaa tɨcɨn: “Ya'acui i papee tɨ jetzen te'eyu'usi'i a'achu paj caj tira'achaɨre'e. A'ujyeijxɨ muaa, ca'anacan. Pata'aj seij auyu'uxa tɨ jetzen a'ayu'usi'i a'achu cumu anxɨ tamuaamuata'a taampu tɨ ara'ase.” 7’Tɨ'ɨj nu'u i ajta seij ayan tyu'utaihua'uri'i tɨcɨn: “Cari muaa, ¿a'achuni yeehui petira'achaɨre'e?” ’Ajta aɨn, ayaa pu hui tiraata'ixaa tɨcɨn: “Anxɨte pua'amuaca mediida ɨ triigu.” ’Ayaa pu tiraata'ixaa tɨcɨn: “Ya'acui, i papee. Pata'aj seij auyu'uxa tɨ jetzen a'ayu'usi'i tɨcɨn: muaacuate paj nu'u ra'achaɨre'e.” 8’Ajta nu'u aɨn tɨ ti'iraijte'e, aɨ pu hui rɨ'ɨ tiraata'a a'ini rɨ'ɨ pu tyu'umuá'a aɨjna cɨme'e a'ij tɨ ye'i huarɨni. Majta aɨme ɨ maj huachaatɨme seij chuejra'a japua iiyan chaanaca japua, eitze'e mu raayɨ'ɨtɨ a'ij mej ye'i huarɨni ɨ seica ɨ ruxa'a tyaɨte macai aɨme ɨ maj maɨjna jetze ajtyama'acan ɨ tɨ hua'atatzavi'ijte'e ɨ tavastara'a. 9’Ayaa nu tyaja'amue'ixaate'e. Caxu cha'a sana'a raaxɨjtya'a ɨ tumin iiyan tɨ ma'acan chaanaca japua. Che'e ayan tyajamuaatyáva'ɨre'en majca'ihua yee sej si ru'amiincustyamua'a cɨn antimué'itɨn mej mi maɨn amua'ancure'evi'itɨn tyamua'a naa ajna xɨcajra'an jetze tɨ'ɨj cai che'e ma'a a'a túmintan. Au mu hui amua'ancure'evi'itɨn a'u tɨ cai a'anaj á'avatzɨjsin ɨ hua'achi'i. 10’Aɨjna tɨ xa'apɨ'ɨn rɨcɨ aɨjna cɨme'e tɨ cɨle'enye'en cɨn ti'ityejvee, aɨ pu ajta xa'apɨ'ɨn rɨni tɨ pua'a ti'ityavaa a'ara'ani va'acan cɨme'e. Ajta aɨn tɨ hui cai xa'apɨ'ɨn rɨcɨ aɨjna cɨme'e tɨ cɨle'enye'en cɨn ti'ityejvee, aɨn capu ajta xa'apɨ'ɨn rɨni tɨ pua'a ti'ityavaa a'ara'ani va'acan cɨme'e. 11’Aɨj pu cɨn tɨ pua'a sacai tya'astya ɨ saj cɨn antyujmua'aree saj rajmuáre'e ɨ tumin tɨ yan seijre'e iiyan chaanaca japua, ni qui seyan ti'imua'atze tɨ a'atɨ ayan tyajamueijcate'esin sej raamuáre'en tɨ huapɨ'ɨ ti'ijnajchi para rusen cɨme'e. Capu xaa nya'u ayan te'eme. 12’Tɨ pua'a sacai tya'astya saj rajmuáre'en saɨjna cɨme'e tɨ Dioj amuaatapueijve, capu a'anaj amuaata'asin tɨ muejmi a'amua'a puéenya'a a'ara'ani. 13’Capu hui rɨ'ɨri tɨ a'atɨ hua'apuaca hua'utyavaɨre'en aɨme jemi ɨ mej tie'ijta. Tɨ pua'a ayan huarɨni, ayaa pu te'eme. Eihua pu rajchaɨ́ɨra'a a'ame ɨ seij, ajta eihua pu rɨ'ɨ tirajchaɨ́ a'ame ɨ saɨj. Na'ari, aɨ pu rɨ'ɨ tira'atzaahuatya'a a'ame ɨ seij. Ajta ɨ saɨj, aɨ pu ra'axaahuari'ira a'ame. Capu a'atzu rɨ'ɨri saj huataura'an tɨ Dioj tyajamuaataijte'en, tɨ pua'a hui saɨjna cɨn huataura'an saj tumin tisaɨre'en. ―Ayaa pu tihua'uta'ixaa aɨjna ɨ Jesús. 14Majta aɨme ɨ fariseos, eihua mu ranyacua'atzacaa ɨ tumin. Matɨ'ɨj meyan tiraanamuajri'i, eihua mu ra'utaxaahuari'iri'i maɨjna ɨ Jesús. 15Ayaa pu tihua'uta'ixaa tɨcɨn: ―Muan xu aɨn pɨrɨcɨ ɨ sej seyan tyu'ujseijrata sej si rɨ'ɨ títyetyáturaave ɨ tyaɨte jemi. Ma ajta Dioj, aɨ pu ru'umua'aree a'ij sej een mu ru tzajta'a. Aɨjna tɨ nu'u ayan naa seijre'e ɨ tyaɨte jemi, aɨ pu hui a'ij pua'a seijre'e ɨ Dioj jemi. 16’Tɨj na'a hui ajna'ɨmɨ asta cai huataseijre ɨ Juan, aɨ pu'u tihue'ixaatya'acaa a'ij tɨ tira'uyu'uxaca'a aɨjna ɨ Moisés tyaacan, ajta a'ij mej ra'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan. Tɨj na'a tyu'utaseijre ɨ Juan, aɨj mu tihue'ixaate'e ɨ nyuucari cɨme'e ɨ maj cɨn huaujtyamua'ave'en a'ij tɨ een ɨ Dioj jemi a'u tɨ tyeje'ijta. Majta naimi'i ti'ityese'e maj maun a'utyarute ca'anyejri cɨme'e. 17’Ajta aɨn yu'uxari, Moisés tyaacan tɨ ra'uyu'uxaca'a, auche'e pu hui nain cɨn tya'ara'astejsin. Eitze'e pu a'ateere maj ra'ara'asten cai nain tɨj na'a tɨ ti'iseijre'e iiyan chaanaca japua, ajta ɨ tajapua tɨ tyeje'eseijre'e. 18Ajtahua'a seij nyuucari hua'uta'ixaa tɨcɨn: ―A'atɨ tɨ ma ruuraini ɨ ru'ɨj, tɨ pua'a e'eyan seij ancure'evi'itɨn, aɨ pu raxana'acɨre'en aɨjna jemi ɨ jɨita'a. Ajta, tɨ pua'a a'atɨ ra'ancure'evi'itɨn seij ɨ jɨita'a tɨ anacai ma ruurai ɨ rucɨn, aɨjna ɨ a'atɨ, aɨ pu hui ajta raxana'acɨre'en. 19Ajtahua'a pu ayan tihua'uta'ixaa tɨcɨn: ―Aa pu nu'u a'ahua'a chijtyaani e'echajca'a, tɨ naa e'enye'en ti'ityaujche'etyahua'a, cɨɨxuri cɨme'e tɨ ti'inacámua, ajta tɨ ti'ire'en. Tɨ'ɨj pɨ na'a pu ti'iyestyahua'a. Eihua pu hui ti'ina'achita'a aɨjna cɨme'e tɨ ruxaahua e'echajca'a. 20’Ajta nu'u aɨn tɨ cai a'ij ti'ijviicue'i, aa pu a'ityajca ta'apueerta a'u tɨ e'eche ɨ chijtyaani. Ayaa pu nu'u antyahuaaca'a aɨjna ɨ a'atɨ tɨ cai a'ij ti'ijviicue'i tɨcɨn Lázaro. Aɨ pu ti'icu'i. Nainjapua pu nu'u hui ca'atza ɨ rujetze. 21’Eecan pu raxe'eva'aca'a tɨ raacua'ani ɨ cue'ira tɨ tí'ite'ení tɨ tya'acajvitze meesa japua a'u tɨ tyaja'acua'a ɨ chijtyaani. Majta aɨme ɨ tzɨ'ɨcɨ, aɨ mu a'ure'eninyéica'a, majta raacánya'ɨxɨ ɨ tɨ hui ca'atza japua. 22’Tɨ'ɨqui ajna xɨcajra'an tɨ jetzen huamɨ'ɨ aɨjna ɨ Lázaro, matɨ'ɨj nu'u mi aɨme ɨ mej ti'ivaɨre'e ɨ tajapua, aɨ mu ya'uvi'itɨ ɨ Abraham jemi a'u tɨ Dioj e'eseijre'e. Ajta aɨn ɨ chijtyaani, tɨ'ɨj nu'u i aɨn huamɨ'ɨ. Majta hui ra'ava'ana. 23’Au pu a'utyajturaa a'u tɨ a'ataasin ɨ taij. Eihua pu rajpueijtzica'a aɨjna ɨ chijtyaani tyaacan. Tɨ'ɨj i ajnyeeraca'a. Aj pu i raaseij aɨjna ɨ Abraham, ajta aɨjna ɨ Lázaro tɨ a'utyavaaca'a ɨ Abraham jamuan. 24’Aj pu i raatajé tɨcɨn: “Abraham, mɨ pej ni'iya'upua, na'ancu'uvajxɨ'ɨ. Pata'aj mu ya'utaite pamɨjna mɨ Lázaro tɨ ij amɨn ra'antíru'unyen ɨ ruxɨte tɨ ij naatyacɨmuajte'en ɨ nenyanú jetze a'ini eihua nu rajpueijtzi iiya taij tzajta'a.” 25’Ajta aɨn Abraham, ayaa pu nu'u hui tyu'utanyúu tɨcɨn: “Niyauj, ni pacai ramua'aree a'ij tɨ timuaavaɨj patɨ'ɨj pauj ruuricaa ɨ chaanaca japua. Eihua pu yeehui rɨ'ɨ timuaavaɨj. Ajta amɨn mɨ Lázaro, eihua pu a'ij pua'a tirajpueijtzica'a. Ma ajta ijii, aɨ mu yeehui rá'ancu'uvajxɨ'ɨsin meyajna. Pajta muaa, ijii parajpueiitzi paj pua'ame. 26Ajta i'i, ayaa pu yeehui een, pu'uri ayan huaujruu tɨ ayan tye'etyácuuni'in. Aɨj pu cɨn cai rɨ'ɨri maj antacɨɨnye amun pujme'en muejmi jemi aɨme ɨ mej meyan raxe'eve'e. Ajta cai rɨ'ɨri maj ayun pujme'en aiitacɨɨnye tejmi jemi aɨme ɨ maj majta meyan raxe'eve'e.” Ayaa pu nu'u tiraata'ixaa aɨjna ɨ Abraham. 27- 28’Tɨ'ɨj i ayan tyu'utanyúu tɨcɨn: “Tɨ pua'a ayan ti'eenye'en, niya'upua, ayaa nu yeehui muahuavii, paj amɨjna Lázaro huataite tɨ aun a'atanen nitaata tɨ e'eche, a'ini anxɨvica nu ti'ihuaamua'a. Che'e yeehui amɨn rɨ'ɨ tihuaja'uta'ixaate'en mej mi cai meyun pujme'en a'uva'acɨ'ɨca'an mej mi cai tirajpueitzi mua'ara'ani meyajna.” 29’Abraham pu nu'u ayan tiraata'ixaa tɨcɨn: “Aɨ pu a'utyajturaa aɨme jemi aɨjna Moisés tyaacan tɨ ra'uyu'uxaca'a, ajta ɨ maj ra'uyu'uxaca'a aɨme ɨ maj Dioj jetze ma'acan ti'ixaxa'ata'a. Miche'e yeehui aɨjna huanamua.” 30’Ajta aɨn chijtyaani tyaacan, ayaa pu tiraata'ixaa tɨcɨn: “Niya'upua, mɨ paj Abraham pueen. Capu ti'itɨj vaɨre'e. Aru tɨ pua'a yeehui a'atɨ tɨ ari huamɨ'ɨ aj pu huataseijre'esin aɨme jemi, aj mu mi saɨque ti'imua'ati ɨ Dioj jemi.” 31’Aj pu nu'u i ayan tiraata'ixaa tɨcɨn: “Tɨ pua'a macai raanamua a'ij tɨ tyu'utaxajtaca'a aɨjna ɨ Moisés tyaacan, ajta aɨme ɨ maj Dioj jetze ma'acan ti'ixaxa'ata'a, camu yeehui majta ra'antzaahuate'esin tɨ pua'a huataseijre'en hua'a jemi ɨ a'atɨ tɨ a'itáraa ɨ mɨ'ɨchite tzajta'a.” ―Ayaa pu tiraata'ixaa aɨjna ɨ Jesús.

will be added

X\