San Lucas 14

1Ayaa pu a'anaj tyuju'urɨj tɨ ajna pɨti'irɨjcaa aɨjna xɨcajra'an mej jetzen rusa'upi. Au pu a'ará'a a'u tɨ e'eche ɨ saɨj ɨ fariseo tɨ va'acan cɨn ti'ityejvee, tɨ ij tyu'ucua'ani jemin. Majta aɨme ɨ tyaɨte, eihua mu re'eeva'acaa maɨjna ɨ Jesús. 2Meenti saɨj a vejli'i áuuvaaca'a jemin ɨ Jesús. Ti'icui'i aɨjna ɨ a'atɨ. Nainjapua pu cajaa ɨ rujetze. 3Ajta aɨn ɨ Jesús, ayaa pu tihua'utaihua'uri'i aɨme ɨ fariseos, ajta aɨme ɨ maj ti'imua'ata ɨ yu'uxari jetze Moisés tɨ ra'uyu'uxaca'a. Ayan tɨcɨn: ―¿Ni cai a'ij ti'irɨ'ɨri nyej tiraahuaate'en aijna xɨcajra'an tyej jetzen tasa'upi nusu cai? 4Majta aɨme, camu ti'itɨ a'ij tyu'utaxajtaca'a. Ajta aɨn Jesús, aɨ pu ra'ajtamuárej aɨjna tɨ ti'icu'i. Ajta tiraahuaa. Aj pu i raataityaca'a tɨ a'ura'ani ruxaahua. 5Tɨ'ɨj i Jesús ayan tihua'utaihua'uri'i tɨcɨn: ―¿Ni cai rɨ'ɨri tɨ a'atɨ ayan huarɨni ajna xɨcajra'an jetze mej jetzen rusa'upi? Tɨ pua'a puuru'u atyejveti a'u tɨ e'etyacun, na'ari puuye atyejveti, ¿ni pacai hui peyan ca'anacan rɨni pej ra'itatuaani a'u tɨ e'etyejve? 6Majta aɨme jemi, capu u'u anú'uhua'acaa hua'a tzajta'a a'ij tɨ tyu'utaxaj. 7Tɨ'ɨj i Jesús raaseij a'ij maj rɨjcaa aɨme ɨ tɨ hue'inee mej tyu'ucua'ani. Aɨ mu raahuauca'a vejli'i maj a'ujra'ase jemin ɨ tɨ tihua'amicua. Aj pu i ayan tihua'uta'ixaa tɨcɨn: 8- 9―Tɨ pua'a hui a'atɨ mue'inen pej tyu'ucua'ani hua'a jamuan ɨ mej ti'iye'este aɨjna cɨme'e tɨ saɨj huatyenyaɨchaca'a, capaj panna a'ujye'ixɨ'ɨn ajna vejli'i jemin ɨ tɨ muaata'inee pej tyu'ucua'ani, silu a'atzu pa a'ɨmɨ a'utayeijxɨ'ɨn. Na'ari cai, tɨ pua'a saɨj uve'enye tɨ eitze'e ruxe'eve'e pacai muaa tɨ ajta raata'inee, aj pu i aɨn muaata'ixaate'esin yee ájchesi, ta'aj amanna a'ujyeijxɨ'ɨn eijna i a'atɨ. Aj pej pi tyu'utatévi'ira'ata, anna paj a'ujyeijxɨ'ɨn paɨjna japua ɨ tɨ eitze'e cai ruxe'eve'e. 10’Ma pajta muaa, ayaa papu'u hui huarɨni tɨ pua'a a'atɨ muaata'inen, an paj a'ujyeijxɨ'ɨn japuan ɨ tɨ eitze'e cai ruxe'eve'e tɨ i ayan aɨn tɨ muaata'inee timuaata'ixaate'en tɨ'ɨj uvé'enyen a'u paj a'ujyeijxɨ'ɨn. Ayaa pu timuaata'ixaate'esin tɨcɨn: “Nya'amiincu, pata'aj ájcheni peyajna pata'aj a'ujyeijxɨ'ɨn yee vejli'i a'u tɨ eitze'e a'ujxe'eve'e.” Ayaa paj paɨjna cɨn huarɨn, ayaa paj hui rɨ'ɨ tira'ancura'asin hua'a jemi ɨ tyaɨte maj a jamuan a'ujti. 11’A'ini a'atɨ tɨ na'a tɨ á'ujtzaahuate'e, aj pu i a'ij pua'a raataixa tɨ cai eihua ruxe'eve'e. Ajta aɨn tɨ cai á'ujca'anye tɨ ti'itɨ cɨn te'entyarute tɨ ve'e, aj pu i tiraata'asin tɨ ayan te'entyarute ti'itɨj cɨme'e tɨ eitze'e ve'e. ―Ayaa pu tihua'uta'ixaa aɨjna ɨ Jesús. 12Aj pu i ayan tiraata'ixaa aɨjna tɨ raata'inee tɨ tyu'ucua'ani tɨcɨn: ―Ayaa paj hui huarɨni patɨ'ɨj hua'uta'inen mej tyu'ucua'ani a'atzaj chumua'an nusu tɨca'a. Capaj hue'inen aɨme ɨ a'amincustyamua'a, ca'ɨn a'ihuaamua'a nusu a'ajuutzimua'a, o aɨme ɨ chijtyaani mej a e'eche vejli'i a jemi. Tɨ pua'a peyan hua'uta'inen aɨme, matɨ'ɨj mi majta maɨn muaata'ineesin mueetzi. Ayaa mu huarɨn, aɨ mu hui ti'imuanajchite'en. 13’Ma pajta muaa, patɨ'ɨj hua'uta'inen mej tyu'ucua'ani, aɨme papu'u huata'inen ɨ maj cai a'ij ti'ijviicue'i, pajta aɨme ɨ maj eihua rajpueijtzi cui'ini'ira'a cɨme'e, pajta aɨme ɨ maj a'ij pua'a tityaacɨ́'ɨca, pajta aɨme ɨ maj aracucu'unijmee. 14Ayaa paj huarɨn, rɨ'ɨ mu timuaata'asin, a'ini camu ti'ituave ɨ maj cɨn timuaanajchite'en. Ma ajta, aɨ pu Dioj hui timuaatanajchite'esin ajna xɨcajra'an jetze me jetzen a'itaju'un hua'a tzajta'a ɨ mɨ'ɨchite. ―Ayaa pu tiraata'ixaa aɨjna ɨ Jesús. 15Meenti saɨj tɨ ajta aun huatyajca hua'a jamuan, tɨ'ɨj raanamuajri'i a'ij tɨ tyu'utaxajtaca'a aɨjna ɨ Jesús, ayaa pu tiraata'ixaa tɨcɨn: ―Rɨ'ɨ pu tiraata'asin aɨjna tɨ tyu'ucua'ani ajna xɨcajra'an jetze tɨ jetzen Dioj huataseijre'esin tɨ ij tyu'utaijta iiyan chaanaca japua. 16Jesús pu ayan tyu'utanyúu tɨcɨn: ―A'atɨ pu nu'u hui rɨ'ɨ huaujruurajca'a tɨ ij tihua'umín. Muicaca pu nu'u huata'inyee. 17Tɨ'ɨj ajna tyaja'ure'enye tɨ tihua'umín, tɨ'ɨqui aɨn raataityaca'a ɨ tɨ jemin ti'ivaɨre'e tɨ ij hua'utajeeve aɨme ɨ maj huata'iniihuaca'a. Ayan tɨcɨn: “Sata'aj yeehui a'uré'enyen a'ini pu'uri huaxa'apɨ'ɨn.” 18’Majta aɨme, naimi'i mu nu'u meyan autyajhuii mej tyu'utauruuni'i. Ajta aɨn ɨ tɨ anacai raata'inee, ayaa pu tyu'utaxajtaca'a tɨcɨn: “Nauchan nu chuej huananai nyaj japuan tyu'umuare'en. Ruxe'eve'e nyej ya'utyeeseij. Ayaa nu ti'imuahuavii mueetzi pej tinaatauuni'i.” 19’Ajta saɨj, ayaa pu nu'u tyu'utaxajtaca'a tɨcɨn: “Nauchan nu puuyesi huananai. Anxɨj paari mu ara'ase. Nu'uri á'uraa nyej ni hua'ucalaadu. Pata'aj tinaatauuni'i pajta ineetzi.” 20’Ajtahua'a ɨ saɨj, ayaa pu nu'u tiraata'ixaa tɨcɨn: “Nauchan nu huatyenyaɨcha'a. Aɨj pu cɨn cai rɨ'ɨri nyaj nyaun á'ume'en.” 21’Ajta aɨn tɨ ti'ivaɨre'e tɨ huaja'utajee, tɨ'ɨqui huara'araa. Ajta nu'u ayan tiraata'ixaa aɨjna tɨ ti'iraijte'e a'ij mej tyu'utaxajtaca'a. Ajta aɨn tɨ huatyeechi'i, eihua pu nu'u hui huatanyu'ucaca'a. Tɨ'ɨj i raataityaca'a aɨjna tɨ ti'ivaɨre'e tɨcɨn: “Pata'aj yeehui ca'anacan paun á'ume'en caaye jetze, ajta juye jetze tɨ cɨj antayauj, tɨj na'a ta'utyeninyei u chajta'a. Pata'aj hua'aravi'itɨn aɨme ɨ maj cai a'ij ti'ijviicue'i, pajta aɨme ɨ maj rajpueijtzi cui'ini'ira'a cɨme'e, pajta aɨme ɨ maj aracucu'unijmee, pajta aɨme ɨ maj ná'achijmee ɨ ruɨɨca jetze.” 22’Ajta aɨn tɨ ti'ivaɨre'e, ayaa pu nu'u tiraata'ixaa tɨcɨn: “Nyavastara'a, nu'uri neyan huarɨj a'ij pej tinaataij. Aru mauche'e mu ú'uve mej seica mu a'uva'aju'un.” 23’Ajta aɨn tɨ huatyeechi'i, aɨ pu hui ayan tiraata'ixaa aɨjna tɨ jemin ti'ivaɨre'e tɨcɨn: “Pata'aj yeehui paun á'ume'en ɨ juye jetze a'ɨmɨ tɨ a'atanyaatɨmee, pajta meyee a'ɨmɨ maj huachaatɨme. Pata'aj ca'anyejri cɨn hua'utajeeve maj mu a'uva'aju'un, mej mi u huájɨste yu nyechi'ita. 24Ayaa nu ti'imue'ixaate'e. Aɨme ɨ nyaj anacaican hua'uta'inee, aɨme, capu saɨj yee ti'icua'ani iiyu i nyej tihua'amin.” Ayaa pu hui tyu'utaxajtaca'a aɨjna tɨ huatyeechi'i. 25Eihua mu tyaɨte á'ujhua'anya'a maɨjna jamuan ɨ Jesús. Tɨ'ɨqui aɨn hua'useirajraa aɨme ɨ tyaɨte. Ayaa pu tihua'uta'ixaa tɨcɨn: 26―A'atɨ tɨ na'a tɨ mu a'uve'eme'en ineetzi jemi, ayaa pu hui tyu'ujxe'eve'e tɨ aɨn eitze'e rɨ'ɨ tinejchaɨca ineetzi cai rɨ'ɨ tirájchaɨɨca ɨ rutaata, ajta ɨ runaana nusu ɨ ru'ɨj ajta ɨ ruyaujmua'a nusu ɨ ru'ihuaamua'a, ajta ɨ rucuutzimua'a nusu ɨ rujuutzimua'a. Na'ari cai, canu raata'asin tɨ nyaa jamuan á'ucha'acanye'en. ’Ee xaa nya'u, canu a'atɨ huata'asin tɨ neetzi jamuan á'ucha'acanye'en tɨ pua'a cai a'atɨ a'ujca'anyaa tɨ na'ara'astijre'en tɨ aɨn a'atɨ huamɨ'ɨni neetzi jetze ma'acan, tɨ ayan tya'ahuaujca'anyen ruxé'evi'ira'a cɨme'e. 27’Ayaa nu hui tyaja'amue'ixaate'e tɨ ayan ti'ayajna nyaj cai a'atɨ huata'an tɨ neetzi jamuan á'ucha'acanye'en tɨ pua'a aɨjna ɨ a'atɨ cai ruxé'evi'ira'a cɨn na'ara'asten, tɨ pua'a cai ayan che'eta na'a tirajpueiitzi a'ara'ani nyatɨj inyaa tirajpueitzi na'ame. 28’Tɨ pua'a saɨj muan ayan ra'ajtaahuamɨ'ɨ chi'i tɨ ajtee, ni cai a'atɨ ayan rɨni tɨ autyejcheni tɨ ra'ajtaahuan. Anacaican aɨ pu a'ujyeijxa tɨ'ij raate'iten a'achu tɨ ti'itɨ huataujxe'eve'esin tɨ ij raamua'aree tɨ pua'a cɨ'ɨpa ɨ tumin tɨ ij ra'ajcɨ'ɨti, nusu cai. 29’Ee xaa, ayaa pu rɨni. Na'ari cai, tɨ pua'a auchan autyeechen, ajta huaxɨn ɨ tumin, capu che'e ra'anticɨ'ɨtzi. Majta maɨn ɨ tyaɨte, matɨ'ɨj raseijra, aɨ mu autyahuijsin mej ra'utaxaahuari'ira. 30’Ayaa mu tyu'utaxajta tɨcɨn: “Amɨjna mɨ tyaata'a, aɨ pu yeehui autyejche tɨ ra'ajtaahua mɨ chi'i, aru capu che'e ti'ituave'e ɨ tɨ cɨn ra'anticɨ'ɨti.” 31’Na'ari saɨj tɨ ti'ityejvee rey cɨme'e, tɨ pua'a meri a'uju'un maj huataujnya'usi'ite'en, ¿a'ini rɨni aɨjna? ¿Ni cai anacai a'ujyeixa tɨ ij tyu'umua'ati aisɨ tɨ pua'a cai rɨ'ɨri tɨ hua'utyamue'itɨn aɨme cɨme'e ɨ maj tamuaamuata'a vi'ira'a ara'ase? Ajta aɨn ɨ saɨj tɨ ti'ityejvee rey cɨme'e, ayaa pu hue'ityévi'itɨcɨ a'achu cumu seité vi'ira'a ɨ xantaaru'u. Aa ni'ijta xaa nya'u, ayaa pu hui rɨni. 32’Ajta tɨ pua'a ayan tira'atamitejte'en tɨ cai huatarɨ'ɨristari tɨ hua'utyamue'itɨn, ayaa pu rɨni. Meenti auj a'ɨmɨ e'eve'evee ɨ saɨj, aɨ pu seica huataíti mej mi a'uju'un ɨ seij jemi ɨ rey mej mi raatahuavii maj raaxa'apɨ'ɨntare'en mej mi cai runya'usi'itya'a. 33’Ayaa pu hui che'eta na'a een muejmi jemi. A'atɨ tɨ na'a tɨ ayan ti'ijxe'eve'e tɨ nyaa jamuan á'ucha'acanye'en, ayaa pu tyu'ujxe'eve'e tɨ nain mé tyáuuhua'axɨn a'achu tɨ tí'ijcha'ɨ. Na'ari cai, canu raata'asin tɨ nyaa jamuan á'ucha'acanye'en. 34’Sajta muan, ayaa xu hui ti'ivaɨre'e saj rɨ'ɨ hua'uruuren ɨ seica ɨ tyaɨte ɨ nyuucari cɨme'e mej mi rɨ'ɨ é'enya'a mua'ara'ani ɨ ru tzajta'a. Sajta, ayaa xu che'eta sana'a ti'ivaɨre'e tɨj unaj maj ra'uré'eviváara'a mua'aye'i ɨ tyaɨte ɨ hue'ira'a japua a'ini naa pu tya'ancacá ɨ unaj. Aru tɨ pua'a huatyáru'una, tɨ'ɨqui ráxɨ'ɨsin ɨ ta'ancacá, ¿a'ini tyajamua'amitejte'e? ¿Niqui ajtahua'a rɨ'ɨri tɨ ancaca a'ara'ani? Capu hui xaa nya'u a'atzu. 35Capu che'e ti'itɨj vaɨre'e, ni ɨ chuej japua, capu ajta ti'ivaɨre'e tɨ ranajchite'en ɨ ya'amuaate chuita japua. Ayaa mu'u raru'ujca ma mu rúuraaxɨjsin. ’Ayaa pu'u hui, cɨme'en ɨ a'atɨ tɨ huityajnamua, che'e aɨn raanamua tyamua'a naa.

will be added

X\