San Lucas 13

1Ajna'ɨmɨ, seica mu e'ire'enye ɨ Jesús jemi. Matɨ'ɨj mi meyan tiraata'ixaa maɨjna cɨme'e ɨ maj Galileeya e'echajca'a, Pilaatu tɨ nu'u hua'ucuii matɨ'ɨj mauj canya'axɨ muaɨ'ɨvajtaca'a. 2Jesús pu ayan tihua'utaihua'uri'i tɨcɨn: ―¿A'ini tyajamua'amitejte'e muejmi? ¿Ni qui macai eitze'e a'ij pua'a ti'ityetyaɨtestaca'a saj cai muan aɨjna cɨme'e mej meyan tirajpueijtzica'a? 3’Ayaa nu tyaja'amue'ixaate'e. Capu ayan ti'ayajna. Ma ajta, tɨ pua'a sacai saɨque tyu'umua'ati ɨ Dioj jemi, muan xu hui sajta antipua'ari. 4’Ari aɨme ɨ maj tamuaamuata'a japuan arahueica ara'ase, ɨ tɨ hua'a japua rajve ti'itɨ tɨ ajtee tɨ aun a'utyavaaca'a ajna a'ahua'a Siloé, ¿a'ini tyajamua'amitejte'e? ¿Ni qui eitze'e a'ij pua'a metí'ityetya'a macai aɨme ɨ seica ɨ maj Jerusalén huachaatɨme? 5’Ayaa nu tyaja'amue'ixaate'e tɨcɨn: capu hui ayan ti'ayajna. Ma ajta, tɨ pua'a sacai saɨque tyu'umua'ati ɨ Dioj jemi, muan xu sajta antipua'ari. ―Ayaa pu tihua'uta'ixaa aɨjna ɨ Jesús. 6Tɨ'ɨj i sei nyuucari pu cɨn tihue'itiiri'i tɨcɨn: ―A'atɨ pu nu'u hui huarej taitya'ɨca. Aa pu nu'u ye'etyahuii a'u tɨ uuva a'uvaatɨmee. Tɨ'ɨqui u ya'utyeeseij avee si ari taca'a. Capu nu'u a'atzu taca'acaa. 7Tɨ'ɨqui ayan tiraata'ixaa aɨjna tɨ aun tí'ichaɨca'a tɨcɨn: “Pu'uri yeehui a'atee a'achu cumu hueica ninye'ira'a nye yee raatyesise'ij a vee si ari taca'a. Aru, capu a'atzu taca'a. Pata'aj re'ijvéijche, a'ini amɨn me ti'itávaaca, capu ti'itɨj vaɨre'e.” 8’Ajta aɨn tɨ tí'ichaɨca'a, ayaa pu nu'u tiraata'ixaa tɨcɨn: “Nyavastara'a, che'e auj me távaaca sei ninye'ira'a. Nyaa nu yeehui raaté'ijche'esin, nyajta ti'itɨ atyáraatɨra'asin chuej jamuan. 9Tɨ pua'a huatáca'an ru'usi, che'e ayan me ti'itávaaca. Na'ari tɨ pua'a cai huatáca'an, aj paj xaa yeehui pi re'ijvéijche.” 10Ayaa pu a'anaj tyuju'urɨj tɨ ajna pɨti'irɨjcaa a'anaj xɨcajra'an mej jetzen rusa'upi. Jesús pu tihuá'amua'atyajcaa u teyujta'a. 11Meenti saɨj jɨita'a, au pu anu'uhuatyávaaca'a. Pu'uri tyauma'aca tamuaamuata'a japuan arahueica ninye'ira'a tɨ ti'icui'icaa aɨjna cɨme'e tiyaaru'u tɨ tzajta'an seijre'e. Aɨjna ɨ jɨita'a, eecan pu á'ajtɨpu. Capu a'atzu rɨ'ɨristacaa tɨ huatáujtzaara. 12Tɨ'ɨj Jesús raaseij, aj pu i raatajé tɨ jemin a ve'ere'enyen. Ayaa pu tiraata'ixaa tɨcɨn: ―Jɨita'a, nu'uri timua'ari'iri'i ɨ paj cɨn ti'icu'i. 13Tɨ'ɨj i ra'ajtamuárej. Cɨme'en pu'u ra'ajtamuárej, aj pu i aɨn jɨita'a huataujtzaaraca'a. Aj pu i rɨ'ɨ tiraata'a ɨ Dioj. 14Ajta aɨn tɨ tie'ijta u teyujta'a, eecan pu huatanyu'ucaca'a a'ini Jesús pu tiraahuaa ajna xɨcajra'an jetze matɨ'ɨj pua'a rusa'upi. Ayaa pu tihua'uta'ixaa aɨme ɨ tyaɨte tɨcɨn: ―Ayaa pu hui tya'ara'ase ɨ mej jetzen ti'imɨjhuaca arájsevi xɨcaj. Sata'aj mu a'uva'aju'un sata'aj sajna tihuáujhuaate'en. Caxu mu a'uva'acɨ'ɨca'an ajna xɨcajra'a mej jetzen rusa'upi. 15Jesús pu ayan tyu'utanyúu tɨcɨn: ―Mɨ saj cai huataujnyátacan cɨn ti'ivaɨre'e ɨ Dioj jemi, cɨme'en ajna xɨcajra'a me jetzen rusa'upi, ¿ni sacai seyan ti'imɨjhuaca naijmi'i muan? ¿Ni sacai hué'ixɨɨxɨn ɨ a'amuaya'amua, tɨ pua'a ti'itɨj puéenye'en puuye na'ari puuru'u sej si huaja'uve'ite'en ajna xɨcajra'a mej jetzen rusa'upi? Ni'ijta xaa nya'u. Ayaa xu ti'imɨjhuaca. 16’Ari amɨjna mɨ jɨita'a, aɨ pu hui jetzen huanyej aɨjna ɨ Abraham tyaacan. Ajta pu'uri tyajauume a'achu cumu tamuaamuata'a japuan arahueica ninye'ira'a tɨ Satanás ra'atyaajɨ'ɨque cui'ini'ira'a cɨme'e. ¿Ni cai ayan tiraavijte'e nyej tiraahuaate'en nyej ni ru'irajtuaani aɨjna cɨme'e tɨ ti'icu'i? ―Ayaa pu tihua'uta'ixaa aɨjna ɨ Jesús. 17Tɨ'ɨj ayan tyu'utaxajtaca'a, aɨme ɨ maj rájchaɨra'acaa maɨjna ɨ Jesús, eecan mu tyu'utatyévi'iri'i ɨ jemin. Majta aɨme ɨ seica ɨ tyaɨte, eecan pu rɨ'ɨ hua'uta'a nain cɨme'e a'ij tɨ ti'itɨ huarɨj tɨ huapɨ'ɨ ruxe'eve'e. 18Aj pu i Jesús ayan tiha'utaihua'uri'i tɨcɨn: ―¿A'ini ti'irɨnyaca iiyan chaanaca japua tɨ Dioj tie'ijta? ¿A'ini ti'iseijre'e tɨ cɨme'en Dioj tie'ijta? 19’Ayaa pu seijre'e tɨj mustaaza ti'itɨ tɨ ayan ti'ityájatze'e tɨj jɨɨcan. A'atɨ pu nu'u hui yá'utɨɨ aɨjna ɨ jatzi. Tɨ'ɨj nu'u i raahuaste a'u tɨ tyaja'ará'ana. Tɨ'ɨqui huanye aɨjna ɨ jatzi. Aj pu nu'u i huavaujse. Tɨ'ɨqui ayan a'ajtɨ́tɨ'ɨj a'araa tɨj cɨye. Majta maɨn pina'ase ɨ maj ra'ara'a, aɨ mu nu'u e'ire'enyaa, an mu nu'u a'urá'ara'asaca'a ɨ pi'istaara'an jetze. 20Ajtahua'a seij hua'utaihua'uri'i tɨcɨn: ―¿A'ini seijre'e tɨ cɨme'en Dioj tie'ijta? 21’Ayaa pu hui een tɨj aɨjna ɨ levaduura. Tɨ'ɨj aɨn jɨita'a ru'ityajtɨcɨ, ajta nu'u rajnajchi cueijtzi jetze tɨ hueica mediida ara'ase. Eihua pu nu'u rajcueijtzitaca'a. Ajta aɨn ɨ levaduura, aɨ pu nu'u tzajta'a huanyajxɨ nainjapua ɨ cueijtzi. ―Ayaa pu tihua'uta'ixaa aɨjna ɨ Jesús. 22Tɨ'ɨqui Jesús aun a'uma'acaa ɨ juye jetze tɨ Jerusalén a'uye'iri. A'u tɨ na'a tɨ a'ure'eninyéica'a, tɨ huachájta'atajme, na'ari a'ɨmɨ ma antachaatɨme, au pu tihua'amua'atyahua'a ɨ tyaɨte. 23A'atɨ pu ayan tiraataihua'uri'i tɨcɨn: ―Tavastara'a, ¿ni cɨj mana'a titya'ara'ase ɨ tɨ Dioj hue'iratuaasin? Ajta aɨn Jesús, ayaa pu tiraata'ixaa tɨcɨn: 24―Sata'aj huataujca'anyen sej si saɨjna jetze utyarute ta'apueerta tɨ cɨj antyéeyauj. Ayaa nu tyaja'amue'ixaate'e tɨcɨn mui'itɨ mu meyan huataujca'anyejsin mej mi maun a'utyarute. Ma ajta cai, capu hua'uta'asin. 25’Tɨ'ɨqui aɨjna tɨ a e'eche, tɨ'ɨj i ájchesin, ajta tye'ityanajsin ta'apueerta. Sajta muan, amaa xu pua'aque huatyáuu xa'aju'un. Sajta tye'ejtyatu'asixɨ'ɨsin ɨ pueerta jetze. Ayaa xu ca'anin cɨn tiraatajeeva aɨjna tɨ huatyeechi'i. Ayaa xu tɨcɨn: “Tavastara'a, tita'antácuune'e.” Ajta aɨn ayaa pu tyajamuaata'ixaate'esin tɨcɨn: “Canu hui a'amuamuajte a'atyaɨn saj pɨrɨcɨ. Canu nyajta ramua'aree a'u saj a'araacɨ.” 26’Sajta muan, ayaa xu tyu'utaxajta tɨcɨn: “Tyan tu tyu'ucuaa a jamuan, tyajta a jamuan hue'í. Pajta muaa ti'itamua'atyahua'a a'u tɨ juye a'uré'eninyei.” 27Ajta aɨn, ayaa pu tyajamuaata'ixaate'esin tɨcɨn: “Canu hui ramua'aree inyaa a'u sej e'ema'acan. Sericu muan, mɨ sej a'ij pua'a ti'ityetyaɨte.” 28- 29’Ayaa pu te'eme ajna xɨcajra'an jetze. Muan xu hua'aseijran aɨme ɨ maj maun a'uráatyá'a mua'aju'un aujna Dioj tɨ e'eseijre'e. Aɨme xu hui seijran saɨme ɨ mej mejmi'i e'echajca'a, saɨjna ɨ Abraham, sajta saɨjna ɨ Isaac, sajta saɨjna ɨ Jacobo. Majta seica mu a a'ire'enyejsin mej mi a'ujra'ase a'utɨ meesa a'utyejvee mej mi tyu'ucua'ani aujna Dioj tɨ e'eseijre'e. Sajta muan, aa xu pua'aque a'utyáuu xa'aju'un. Eihua xu ruyeinya xa'aju'un, sajta ancura'ujcɨ'ɨme ye'icaa xa'aju'un mɨ rutamej cɨme'e saɨjna cɨme'e sej seri rajpueiitzi xa'aju'un. 30’Ee xaa nya'u, ayaa pu hui ti'ayajna. Seica ɨ maj nu'u vivejme'en cɨn títyatatí ijii, aɨ mu cɨle'enye'en cɨn títyatatyá'a mua'aju'un ajna xɨcajra'a jetze. Majta seica ɨ maj nu'u cɨle'enye'en cɨn títyatatí ijii, aɨ mu vivejme'en cɨn títyatatyá'a mua'aju'un ajna xɨcajra'a jetze. ―Ayaa pu tihua'uta'ixaa aɨjna ɨ Jesús. 31Tɨ'ɨj Jesús auchan raatapua'ajtaca'a tɨ tihue'ixaatya'acaa ɨ tyaɨte, matɨ'ɨj mi seica jemin a e'ire'enye. Aɨ mu pueenya'a ɨ fariseos. Ayaa mu tiraata'ixaa tɨcɨn: ―Pata'aj ticheni peyajna a'ini amɨ pu nu'u Herodes muaje'icatamɨ'ɨ mueetzi. 32Aj pu i Jesús ayan tyu'utanyúu tɨcɨn: ―Sata'aj hui saun á'uju'un saɨjna jemi ɨ Herodes tɨ aviitzi cɨn nyatzajra'ajmua'a ineetzi. Sata'aj sajta seyan tiraata'ixaate'en saɨjna yee pu'uri ijii nyehua'utamuarite'esin nyaɨme ɨ tiyaaru'use ɨ maj hua'a tzajta'a seijre'e ɨ tyaɨte, nyajta yee tihua'ahuaate'en ɨ tyaɨte ijii, nyajta ruijmua'a. Nyajta yee, aaruijmua'a nu aránastyejsin nyaɨjna cɨme'e ɨ nyaj cɨn antinmua'aree. 33’Capu amɨn a'ij. Ayaa pu hui tyu'ujxe'eve'e nyej nyauj huame'en ijii, nyajta ruijmua'a, nyajta aaruijmua'a, a'ini capu ayan tiraavijte'e tɨ huamɨ'ɨni ayajna pua'aque u Jerusalén saɨj tɨ Dioj jetze ma'acan ti'ixaxa'a. 34’Muan mɨ saj Jerusalén e'eche'e, mɨ saj Jerusalén e'ema'acan, muan xu hua'acui'ica aɨme ɨ maj Dioj jetze ma'acan ti'ixaxa'a. Sajta huá'atu'axaca tyetye cɨme'e aɨme tɨ Dioj huaja'utaityaca'a muejmi jemi. Mui'i nu hui neyan raxe'eva'aca'a nyaj hua'asaɨre'en ɨ a'amuayaujmua'a nyej ni hua'uchaɨn cumu ɨ tyacuaara'i tɨ hua'acha'ɨ ɨ ruyaujmua'a, tɨ hue'icánaamɨ ɨ ru'ana cɨme'e. Sajta muan, caxu seyan ra'utyaaca'anye. 35’Casi'i, xaaseij. Nu'uri hui má amuuhuá'axɨ muejmi mɨ sej Jerusalén e'eche. Ayaa nu tyaja'amue'ixaate'e. Caxu che'e nyeseijran asta na'a cai tyaja'ure'enyen ajna xɨcajra'an jetze saj pua'a seyan tyu'utaxajta yee che'e rɨ'ɨ tiraatyajtuaani aɨjna ɨ tɨ me e'eve'eme nyuucara'ara'an ɨ tavastara'a. ―Ayaa pu tyu'utaxajtaca'a aɨjna ɨ Jesús.

will be added

X\