San Lucas 12

1Majta maɨn ɨ tyaɨte, eihua mu ajtyáxɨɨraca'a. Ayaa mu ará'axcaa a'achu hua'apua vi'ira'a, hueica vi'ira'a, a'achu maj mana'a pua'amua. Aɨj mu cɨn á'acataca'a eihua. Ajta aɨn ɨ Jesús, aɨ pu anacai tihua'atixaatya'ajraa aɨme ɨ maj jamuan á'ujhua'anya'a. Ayan tɨcɨn: ―Rɨ'ɨ xu'u hui muan aɨjna cɨme'e fariseos maj ranajchite'e ɨ pan jetze. Ayaa pu huataujmua'a aɨjna ɨ nyuucari tɨcɨn ɨ tɨ hua'a tzajta'a uraninei, ɨ tɨ cai huataujnyátacan cɨn seijre'e. 2’Ayaa pu'u, ti'itɨ tɨ na'a tɨ ru'avaa aviitzi cɨme'e, aɨ pu hui huataseijre'esin me eijre'e mej mi raaseij ɨ tyaɨte. Ajta ti'itɨ maj ra'avaataca'a, aɨ pu antícuuni'ihua mej mi raamua'aree a'ij tɨ een. 3’Aɨjna ɨ paj raataxajtaca'a tɨca'amiste'e, Dioj pu raataxajta tujca'ari tzajta'a. Ajta aɨn ɨ paj raataxajtaca'a xahuaanin cɨme'e u chi'ita u tyetye'e, Dioj pu hui raataxajta ca'anin cɨme'e anna ɨ chi'i japua ta'ava'apa'atza. 4’Ayaa nu tyaja'amue'ixaate'e mɨ sej nya'amiincustyamua'a pueen, caxu hua'atzɨɨnya'a aɨme ɨ maj mana'a raayɨ'ɨtɨ maj raaje'ica ɨ saj ratyáhue'ira'a, aru camu raayɨ'ɨtɨ maj ra'upua'arite'en ɨ a'amua tzajta'a tɨ seijre'e. 5’Me nyajta inyaa, ayaa nu tyaja'amue'ixaate'esin a'atɨ saj xaa tzɨɨne'e. Sata'aj ratzɨɨnya'a aɨjna tɨ ayan raayɨ'ɨtɨ tɨ raaje'ica ɨ saj ratyáhue'ira'a, tɨ ajta raayɨ'ɨtɨ tɨ yauraini ɨ a'amua tzajta'a tɨ seijre'e aujna taij jetze tɨ cai a'ana a'amɨ'ɨni. Ee tzɨte'e, ayaa nu hui tyaja'amue'ixaate'e tɨcɨn: sata'aj ratzɨɨnya'a saɨjna. 6’Aru, caxu a'ij tyá'ujmuajca. ¿Ni sacai seyan tyu'utanajchita a'achu cumu hua'apua centaavu anxɨvica cɨme'e ɨ pina'ase maj cɨle'en? Camu eihua ti'ijnajchi. Ma ajta aɨn Dioj, aɨ pu naijmi'ica autamua'areera. 7Ee xaa nya'u, ayaa pu ti'ayajna. Dioj pu hui ari raaté'itaaxɨ mɨ a'amuacɨpua a'achu tɨ pua'amuájmee. Caxu ti'itzɨɨnya'a a'ini muan xu eihua eitze'e jetzen ruxe'eve'e ɨ Dioj macai ɨ pina'ase, a'ini aɨ pu xaa amua'ancu'uvajxɨ'ɨsin. 8’Ayaa nu tyaja'amue'ixaate'e, a'atɨ tɨ na'a tɨ ayan tyu'utaxajta aɨme jemi ɨ tyaɨte yee na'ara'astijre'en ineetzi, inyaa i nyaj nyajta hua'a jetze airaanye ɨ tyaɨte, ayaa nu nyajta raataxajta aɨme jemi maj tajapua ti'ivaɨre'e ɨ Dioj jemi yee naatyávaɨj ineetzi. 9Ajta aɨn tɨ ti'ixa aɨme jemi ɨ tyaɨte yee capu nyamua'ate, ayaa nu hui che'eta raataxajta aɨme jemi maj tajapua ti'ivaɨre'e ɨ Dioj jemi yee canu ramua'ate. 10’Nyajta nu tihua'utauuni'ira aɨme, a'achu maj mana'a pua'amua a'ij pua'a ti'inyaxa ineetzi i nyaj nyajta hua'a jetze airaanye ɨ tyaɨte. Aru aɨme, a'achu maj mana'a pua'amua a'ij pua'a ti'ijxa aɨjna ɨ xaijnyu'ucara'ara'an ɨ Dioj, canu a'anaj tihua'utauuni'ira aɨme. 11- 12’Sajta muan, matɨ'ɨj u amua'aravi'itɨn aɨme jemi maj teyujta'a tie'ijta, nusu aɨme jemi ɨ maj ti'itɨj cɨn antyujmua'aree, ayaa xu huarɨni. Caxu hui a'ij tyá'ujmuajca a'ij sej ye'i tityeetyaujnan na'ari a'ij sej ye'i tyu'utaxaj, a'ini ajna xɨcajra'an jetze, aɨn xaijnyu'ucara'ara'an ɨ Dioj, aɨ pu tyajá'amuamua'aten a'ij sej ye'i tyu'utaxaj. ―Ayaa pu tihua'uta'ixaa aɨjna ɨ Jesús. 13Meenti saɨj hua'a tzajta'a a'utyavaaca'a. Ayaa pu tiraata'ixaa tɨcɨn: ―Maeestru, pata'aj peyan tiraata'ixaate'en ɨ nyaja'a yee tɨ e'ita'a tinaata'an aɨjna tɨ titaacɨ́'ɨ aɨjna cɨme'e tɨ saɨj huamɨ'ɨ, a'ini capu tinaata'asin ɨ neetzi tɨ nya'a. 14Jesús pu ayan tyu'utanyúu tɨcɨn: ―Huumpi, ¿a'ataani tinyeijca juees cɨme'e? ¿A'ataani naata'a nyej neyan tyu'uxa'apɨ'ɨntare'en muejmi jemi? ―Ayaa pu'u tiraata'ixaa. 15Ajta ayan tihua'uta'ixaa tɨcɨn: ―Rɨ'ɨ xu'u muan, sata'aj á'ujcu'uvaa sana'a tyamua'a naa. Che'e cai huapɨ'ɨ sana'a ti'inyacua'atza sej eihua tyu'uchaɨtɨme'eni, ti'itɨ tɨ na'a, a'ini tɨ pua'a a'atɨ eihua ti'itɨ ticha'ɨ, capu hui ti'itɨ a'ij tiraatyavaɨre'esin tɨ ij cai ti'itɨ a'ij raruuren. 16Tɨ'ɨj i seij nyuucari cɨn tihue'itiiri'i tɨcɨn: ―Aa pu nu'u a'ahua'a chijtyaani e'eche. Chuej pu nu'u ticha'ɨ tɨ japuan tyu'uhuaste. Tyamua'a pu nu'u hui eihua tyu'ucɨɨraca'a. 17’Tɨ'ɨj i ayan tyu'umuá'a aɨjna ɨ chijtyaani tɨcɨn: “¿A'ini yeehui naarɨni? Capu che'e ma'a a'arɨ'ɨri a'u nyaa yeehui ya'uruuren ɨ tɨ huacɨɨraca'a.” 18Tɨ'ɨj nu'u i ayan tyu'umuá'a tɨcɨn: “Ayaa nu rɨni. Nyaraatauuna ɨ nechi'i ma tɨ huavaatɨmee. Nyajta seica nu ajtaahuaxɨ'ɨsin tɨ eitze'e vivejmá'a a'ara'ani. Nyatɨ'ɨj ni nyaun ru'utya'asin ɨ tɨ tyu'ucɨɨraca'a, ajta nain i nyej tí'ijcha'ɨ. 19Nyajta nu yeehui neyan tyu'utaxajta ɨ nyatzajta'a yee nu'uri nyaun rɨ'ɨ tyu'uruu u chi'ita. Eecan pu a'ateeri tɨ rɨ'ɨ tinaatyavaɨre'esin. Nu'uri yeehui nyasa'upe'en. Niche'e ti'icua'aca, nyajta ya'aca, nyajta netyamua'ava'a.” Ayaa pu nu'u tyu'umuá'a aɨjna ɨ a'atɨ. 20’Ajta aɨn ɨ Dioj, ayaa pu hui tiraata'ixaa tɨcɨn: “Muaa, mɨ paj cai ti'itɨj mua'aree. Ijii, tɨca'a paj mɨ'ɨni. Patɨ'ɨj huamɨ'ɨn, ¿a'ataani ti'ijcɨ'ɨti aɨjna ɨ paj muaa rɨ'ɨ raaruu pej pi asaɨj huata'atyámua'ave'enche'e?” Ayaa pu Dioj tiraata'ixaa. 21’Nyajta neyan tyaja'amue'ixaate'e. Ayaa pu hui te'eme aɨme jemi matɨj mana'a pua'amua ɨ maj rujɨɨmua'a rajsá'ɨri ti'itɨ tɨ na'a mej mi eihua tí'ijcha'ɨ, majta camu ti'itɨj ticha'ɨ ɨ Dioj jemi. 22Tɨ'ɨj i Jesús ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Aɨj nu cɨn neyan tyaja'amue'ixaate'e. Caxu saɨjna cɨn ti'imuajcaa yee a'iqui ye'i teti'icua'ani nusu yee a'iqui ye'i tyetí'iye'en na'ari yee a'iqui ye'i tyetyu'utátachejte'esin. 23’¿Ni cai eitze'e ruxe'eve'e ɨ Dioj jemi saj ruuri xa'ara'ani cai ɨ tɨ saj raacua'ani? ¿Ni cai ayan che'eta na'a eitze'e ruxe'eve'e ɨ Dioj jemi tɨ ruuri a'ame ɨ saj ratyáhue'ira'a cai tɨ náa seiira a'ame ɨ saj cɨn tyu'utaujchejte'en? Aa ni'ijta xaa nya'u. 24’Casi'i, xaaseij amɨme cua'atza ɨ maj ute'e rá'ara'a. Camu hui a'atzu ti'ihuastya, camu majta ti'itza'anaca. Camu majta huatyeechi'i ɨ maj tzajta'an rɨ'ɨ ya'uruuren ɨ mej meri rajsaɨj. Capu amɨn a'ij, auche'e pu Dioj tihua'amicua. Ma sajta muan, eitze'e xu jemin ruxe'eve'e ɨ Dioj macai aɨme ɨ cua'atza. 25’¿A'ataani raayɨ'ɨtɨ tɨ a'ateeren tɨ eitze'e ruuri a'ame aɨjna cɨme'e tɨ ti'imuajcaa? Capu a'atɨ xaa nya'u. 26Tɨ pua'a sacai raayɨ'ɨtɨhua'an sej si seyan huarɨni saɨjna cɨme'e tɨ cai muare'eri, ¿a'ini hui een cɨn seyan ti'imuajcaa saɨjna cɨme'e ɨ tɨ tí'ijturaa? 27’Casi'i, xaaseij amɨjna mɨ caiipi'i, a'ij tɨ ye'i ti'ivaujse'e. Capu ti'imɨjhuaca amɨjna mɨ caiipi'i, capu ajta ti'itzaca. Capu amɨn a'ij. Dioj pu hui ayan raaruu tɨ eitze'e naa seijre'e cai Salomón tɨ naa seijra'acaa tɨ'ɨj auj ti'ityavaaca'a rey cɨme'e. Capu a'anaj ayan tyu'utyaujchejte ti'itɨ cɨme'e tɨ ayan naa seijre'e tɨj mɨ caiipi'i. 28’Casi'i, muan, Dioj pu ayan rɨ'ɨ tirajcha'ɨ mɨ tu'upi tɨ aun á'avaujse'e a'u maj á'atasa'ahuaca. Ajta aɨn tu'upi, capu a'ateeri silu yaa ruijmua'a yee, aɨ mu raaré'eveichi, matɨ'ɨj mi ratairan. Tɨ pua'a hui Dioj ayan rɨ'ɨ tirajcha'ɨ mɨ tu'upi, ¿ni cai eitze'e amuaata'asin ɨ saj cɨn tyu'utyaujchejte'en, muejmi mɨ saj cai a'atzu tya'atzaahuate'e? 29- 30’Caxu a'ij ti'ixajta yee a'iqui ye'i tyeti'icua'ani nusu a'iqui ye'i tyetí'ityeye'en. Ayaa xu'u, caxu ti'imuajcaa saɨjna cɨme'e, a'ini naimi'i matɨj mana'a pua'amua yan maj huachaatɨme iiyan chaanaca japua, ayaa mu maɨjna cɨn rahuauhuau. Ma ajta aɨn a'amuaya'upua, tajapua tɨ e'eseijre'e, aɨ pu hui ari ru'umua'aree ti'itɨ tɨ amua'aturaate'e. 31’Sata'aj mi'i rajhuauuni tɨ Dioj tyajamueijte'en, sajta ra'ara'astijre'en a'ij tɨ aɨn ti'ijxe'eve'e. Tɨ pua'a seyan huarɨni, Dioj pu hui tyajamuaata'asin tɨj na'a tɨ tyajamua'aturaate'e. 32’Caxu ti'itzɨɨnya'a muan, mɨ sej seyan ma á'ujhua'an. Cu xuee canya'axɨ sana'a ɨ maj rujɨɨmua'a mana'a ma á'ujhua'an. Ayaa pu tira'aranajchaca'a ɨ saj rajya'upua tɨ ij aɨn amuaata'an sej saun a'utyarute a'u tɨ aɨn tyeje'ijta. 33’Sata'aj tyu'utuaani nain a'achu saj caj tí'ijcha'ɨ, sajta tihua'ura'an aɨme ɨ maj cai a'ij ti'ijviicue'i. Ayaa xu aɨjna cɨn huarɨni tɨ i aɨjna tyajjua'aca ɨ tɨ e'eyan tyajamuaacɨ'ɨti. Ayaa pu eenya'a a'ame tɨj ti'itɨ ca'ani tɨ cai a'anaj huataujtu'isin. Au pu e'etyá'a a'ame muejmi jemi ti'itɨ tɨ huapɨ'ɨ ti'inajchi. Ajta capu hui a'anaj huatyaxɨjsin, a'ini camu aun a'utyaru'ipi ɨ nahua'ari. Camu majta racɨ'ɨn aɨme ɨ jatzipu'use. 34’Ayaa xu eenya'a xa'aju'un a'ini aɨj xu jetzen ti'imua'astɨ xa'aju'un saɨjna jetze tɨ eitze'e amua'aranajchi, tɨ eitze'e a'amua jetze ruxe'eve'e. 35’Rɨ'ɨ xu'u tityahuaujcaten sej si tyu'utyavaɨre'en. Sauche'e xu hui atanyéjnye'eri tɨj a'atɨ tɨ taij huityechuaaca tá'ataa. 36’Ayaa xu eenya'a xa'aju'un matɨj aɨme ɨ mej ti'ivaɨre'e a'atɨ jemi tɨ aun á'umej a'u mej teje'eye'este aɨjna cɨme'e tɨ saɨj huatyényaɨchej. Majta aɨme ɨ maj ti'ivaɨre'e, mauche'e mu ti'ichu'eve'en a'atzaj tɨ pua'a uve'enyejsin aɨjna tɨ tihue'ijte'e mej mi ca'anacan tira'antácuune'en tɨ'ɨj aɨn tye'ejtyátu'asixɨ'ɨn ɨ pueerta jetze. 37’Rɨ'ɨ pu tihua'utavaɨre'esin aɨme ɨ mej ti'ivaɨre'e tɨ'ɨj aɨn hua'useij maj rachu'eve'e a'atzaj tɨ pua'a uve'enye aɨjna tɨ tihue'ijte'e. Ayaa nu hui tyaja'amue'ixaate'e tzaahuati'ira'a cɨme'e, ayaa pu rɨni aɨjna tɨ tihue'ijte'e. Aɨ pu rucaten tɨ ij hua'utyavaɨre'en. Ajta tihua'utaijte'esin maj auhuiixɨ'ɨn ɨ meesa jetze. Ajta tihua'amin. 38’Capu amɨn a'ij a'atzaj tɨ pua'a uve'enyejsin aɨjna tɨ tihue'ijte'e, tɨ pua'a e'ita'a tɨca'a uve'enye nusu tapua'arijma'aca. Rɨ'ɨ pu hui tihua'utyavaɨre'esin aɨme ɨ maj ravaɨre'e tɨ pua'a mauj rachu'eva'a. 39’Ayaa nu tyaja'amue'ixaate'e tzaahuati'ira'a cɨme'e. Aɨjna ɨ a'atɨ tɨ huatyeechi'i, tɨ pua'a aɨ ramua'areera a'atzaj tɨ pua'a ányaiixa ɨ nahua'ari, capu ratá'asin tɨ anya'asti tɨ tyu'unahua'an. 40Sajta hui muan, rɨ'ɨ xu'u sej si rɨ'ɨ huaujcaten a'ini inyaa, i nyaj nyajta hua'a jetze airaanye ɨ tyaɨte, nyaa nu uve'enyejsin a'atzaj saj pua'a cai nyechu'eve'e. ―Ayaa pu tihua'uta'ixaa aɨjna ɨ Jesús. 41Pedro pu ayan tiraataihua'uri'i tɨcɨn: ―Tavastara'a, ¿ni tejmi pana'a huata'ixaa i nyuucari ca'ɨn naijmi'ica puaata'ixaa? 42Ajta aɨn tavastara'a, aɨ pu ayan tyu'utanyúu tɨcɨn: ―¿A'ataani pueen, aɨjna tɨ ti'ivaɨre'e, tɨ ajta rɨ'ɨ me tyauumua'aree, tɨ ajta cai a'anaj ti'itɨ cɨn auta'ɨtzee? Ajta aɨn tɨ ti'iraijte'e, aɨ pu hui tí'iraijcate'en tɨ ij aɨn aɨjna cɨn antyujmua'aréera aɨme ɨ seica ɨ maj majta ti'ivaɨre'e. Aɨ pu tihua'amin a'atzaj maj pua'a raaxa'apɨ'ɨntare'en mej tyu'ucua'ani. 43- 44’Tɨ pua'a ayan rɨjcaa tɨ'ɨj uvé'enyen aɨjna tɨ ti'iraijte'e, rɨ'ɨ pu tiraatyavaɨre'esin aɨjna tɨ ti'ivaɨre'e a'ini nain pu tiraataijcate'esin a'achu tɨj ti'itɨj ticha'ɨ aɨjna tɨ ti'iraijte'e. Ayaa pu te'eme. Ayaa nu tyaja'amue'ixaate'e tzaahuati'ira'a cɨme'e. 45’Ma ajta aɨn tɨ hui ti'ivaɨre'e, tɨ pua'a ayan ti'imuajcaa yee eecan pu u e'eteere aɨjna tɨ tinyeijca, ayaa pu ajta tira'amitejtya'a a'ame tɨ cai iya'ata uve'enyejsin. Tɨ'ɨj i autyejcheni tɨ hua'utyávajxɨ'ɨn aɨme ɨ mej ti'ivaɨre'e, ɨ mej tyetyaca, ajta ɨ ma juuca. Ajta pu hui autyejchesin tɨ tyu'ucua'ani, ajta tɨ nahuaj antiye'en. Tɨ'ɨj i huatyátahueisin. 46’Ajta aɨn tɨ ti'iraijte'e, aɨ pu uve'enyejsin a'anaj tɨ pua'a cai rachu'eve'e. Aɨ pu xaa uve'enyejsin a'atzaj tɨ pua'a cai pɨtyámua'are. Aɨ pu hui ajta pueijtzi raata'asin, eihua huapɨ'ɨ. Ayaa pu che'eta ti'ijcɨ'ɨti a'ij tɨ tihua'acɨ'ɨti ɨ seica ɨ maj majta auta'ɨtza'ara ɨ Dioj jemi. 47’Aɨjna tɨ ti'ivaɨre'e tɨ ajta ru'umua'aree a'ij tɨ ti'ijxe'eve'e aɨjna tɨ ti'iraijte'e, eihua pu ra'ire'evejsin navij cuaartara'a cɨme'e tɨ pua'a cai rɨ'ɨ huaujruuren na'ari cai ayan huarɨni a'ij tɨ ti'ijxe'eve'e aɨjna tɨ ti'iraijte'e. 48Ajta aɨn tɨ ti'ivaɨre'e tɨ ajta cai rú'umua'areeracaa a'ij tɨ ti'ijxe'eva'acaa aɨjna tɨ ti'iraijte'e, cɨj pu'u ra'ire'evejsin navij cuaartara'a cɨme'e tɨ pua'a ayan huarɨni tɨ a'ij pua'a een cɨme'e a'ini capu rú'umua'areeracaa a'ij tɨ ye'i huarɨni. Capu ayan ti'ijcɨ'ɨti a'ij tɨ tiraavijte'e. ’Ayaa pu'u xaa nya'u, a'atɨ tɨ na'a mej meyan tiraata'a tɨ va'acan cɨn antyujmua'aréera a'ara'ani, tɨ pua'a ayan va'acan cɨn ti'ityé'ijcati'ihua, ayaa pu hui tyu'ujxe'eve'e tɨ eitze'e tyu'utatuiire'en maɨjna jemi ɨ mej tiraijcate. Ajta, a'atɨ tɨ na'a mej meyan tiraata'a tɨ cɨle'enya'a cɨn antyujmua'aréera a'ara'ani, tɨ pua'a ayan cɨle'enya'a cɨn ti'ityé'ijcati'ihua, ayaa pu che'eta na'a tyu'ujxe'eve'e tɨ cɨj tyu'utatuiire'en maɨjna jemi ɨ mej tiraijcate. 49’Ayaa nu een cɨn mu a'uve'eme nyej ni pueijtzi hua'uta'an nyaɨme ɨ maj a'ij pua'a een ɨ rutzajta'a matɨj mana'a pua'amua yen me seijre'e iiyan chaanaca japua. Ajta ayaa pu tina'araanajchi ineetzi tɨ ari autyejcheni. 50Ayaa pu ajta ti'inyacɨ'ɨti ineetzi, ɨ nyaj cɨn tirajpueiitzi na'ame. Eihua pu hui a'ij pua'a nya'ase, ajta eihua pu a'ij pua'a nya'astɨ a'ame asta na'a cai nain te'entipua'are. 51’¿A'ini tyajamua'amitejte'e muejmi? ¿Ni qui nyaɨjna cɨn a'uve'eme mej mi rɨ'ɨ tí'ityechajca ɨ mej yan huachaatɨme iiyan chaanaca japua? Canu a'atzu. Ayaa nu tyaja'amue'ixaate'e yee canu nyaɨjna cɨn a'uve'eme silu mej mi e'ita'a a'utácɨɨnye. 52Ajta ijii tɨ yu auca'itɨ a'ame, ayaa pu hui te'eme. Aɨme cɨme'e ɨ maj tya'anxɨvi ɨ tyaɨte, ɨ maj saɨque mana'a che, ayaa pu te'eme aɨ mu a'ita'a a'utajú'un. Majta e'eyan ɨ maj hueica, aɨ mu hua'ajaaxáiivi'ira'a mua'aju'un aɨme ɨ maj hua'apua. Majta aɨme ɨ maj hua'apua, ayaa mu che'eta mana'a tíhuá'ajaaxáiivi'ira'a mua'aju'un ɨ maj hueica. 53’Ayaa mu a'ita'a a'utaju'un. Aɨ pu ya'upuaara'an rajaaxáiivi'ira'a a'ame aɨjna ɨ ruyauj, ajta aɨn yaujra'an ayaa pu che'eta na'a ti'ijjaaxáiivi'ira'a a'ame ɨ rutaata. Ajta aɨn ɨ naanajra'an, ayaa pu che'eta na'a ti'ijjaaxáiivi'ira'a a'ame aɨjna ɨ ruyauj tɨ jɨita'a. Ajta aɨn yaujra'an tɨ jɨita'a, ayaa pu che'eta na'a ti'ijjaaxáiivi'ira'a a'ame aɨjna ɨ runaana. Ajta aɨjna ɨ mu'unyaara'an ɨ tɨ jɨita'a ɨ tɨ ucarij, aɨ pu ajta rajaaxáiivi'ira'a a'ame ɨ rumu'u ɨ tɨ jɨita'a tɨ tyamueij. Ajta aɨjna ɨ mu'unyaara'an tɨ tyamueij, aɨ pu hui ajta rajaaxáiivi'ira'a a'ame ɨ rumu'u tɨ ucarij. 54Tɨ'ɨj i ayan tihua'uta'ixaa aɨme ɨ tyaɨte ɨ maj aun ajtyáxɨɨraca'a tɨcɨn: ―Cɨme'en xu'u jaitɨri huaseij tɨ a'ijnyej, yancɨ pujme'en, satɨ'ɨj si seyan ti'ixaxa'a yee mu'uri huatyeviiyen. Ajta, ayaa pu ti'irɨnyaca. 55Na'ari tɨ pua'a huata'aacare tɨ yeete pujme'en a'itaninyei, ayaa xu hui ti'ixaxa'a tɨcɨn tyaxɨcaj pu a'ame. Ajta, ayaa pu ti'irɨnyaca. 56’Muan, mɨ saj cai má umúumua'are, muan xu seyan raayɨ'ɨtɨ a'ij sej ye'i tyu'utaxaj a'ij tɨ ti'itɨ rɨni ɨ ute'e nusu iiyan chaanaca japua. Ma sajta muan, caxu hui a'atzu raayɨ'ɨtɨ a'ij sej ye'i tyu'utaxaj aɨjna cɨme'e a'ij tɨ ti'itɨ rɨni itejmi jemi eijna xɨcajra'a jetze nyaj ya huatyejvee inyaa muejmi jemi. 57’Niche'e seij tyajamuaataihua'u. ¿A'ini een cɨn sacai raaxa'apɨ'ɨntare'en rujɨɨmua'a a'ij tɨ tiraavijte'e? 58- 59Patɨ'ɨj pauj huame'en juye jetze jamuan aɨjna tɨ muájchaɨre'e saj raaxa'apɨ'ɨntare'en aɨjna jemi ɨ juees, pata'aj raatahuavii tyamua'a naa saj sauj juye jetze raaxa'apɨ'ɨntare'en. Na'ari tɨ pua'a pacai peyan huarɨni, aɨ pu hui mua'avi'itɨn ɨ jueesi jemi. Tɨ'ɨqui aɨn juees, aɨ pu tyu'utatuire'esin mueetzi aɨjna jemi ɨ polisiiya. Ajta aɨn polisiiya, aɨ pu mue'ityanajsin. Ayaa nu ti'imue'ixaate'e tzaahuati'ira'a cɨme'e, camu hui iiya'ata mue'iratuaasin asta pana'a cai tyu'unajchi nain cɨme'e a'achu maj muajijve'en. ―Ayaa pu tihua'uta'ixaa.

will be added

X\