San Lucas 11

1A'anaj pu ayaa tyuju'urɨj. Aa pu a'ahua'a a'utyavaaca'a aɨjna ɨ Jesús. Tyenyuusima'a ɨ Dioj jemi. Tɨ'ɨj raatapua'ajtaca'a tɨ huateenyuu, saɨj maj jamuan á'ujhua'anya'a, ayaa pu tiraata'ixaa tɨcɨn: ―Tavastara'a, pata'aj peyan titaamua'aten tej huatejnyuuni ɨ Dioj jemi tɨj Juan tihua'umuá'ate aɨme ɨ maj jamuan á'ujhua'anya'a. 2Tɨ'ɨj i ayan tihua'uta'ixaa tɨcɨn: ―Satɨ'ɨj huatejnyuuni, ayaa xu hui tyu'utaxaj yee: Muaa ɨ paj ta'iya'upua, Miche'e rɨ'ɨ me'e tiyau'an ɨ paj cɨn antyahuaa. Che'e ayan tyaja'ure'enyen ajna xɨcajra'a pej jetzen tyu'utaijta iiyan chaanaca japua. Miche'e meyan che'eta mana'a tira'ara'asten a'ij pej ti'ijxe'eve'e aɨme ɨ maj yan huachaatɨme iiyan chaanaca japua matɨj aɨme tira'ara'aste ɨ maj tajapua a'utyáuu. 3Pata'aj titaata'an ɨ tɨ ti'icue'iri'i ɨ tyaj cɨn tya'utaviicue'i ijii tɨj na'a yu tɨ auca'itɨ a'ame. 4Pata'aj titaatauuni'i ɨ tyaj cɨn autyajturaa mueetzi jemi a'ini ayaa tu che'eta tiraatauuni'ira a'atɨ tɨ na'a tɨ autyajturaa itejmi jemi. Pata'aj pajta cai raata'acare'en ɨ tiyaaru'u tɨ aɨn ca'anijra'a taata'acare'en tej ti cai teyan huarɨni ti'itɨj cɨme'e tɨ a'ij pua'a een. ―Yaa pu'u. 5- 6Aj pu i ayan tihua'uta'ixaa tɨcɨn: ―Tiche'e teyan raataxaj yee saɨj xu muan ti'amiincu. Ajta e'eyan aɨjna ɨ a'atɨ, tɨ'ɨj ari e'ita'a tɨca'a pɨti'irɨcɨ, au pu hui a'umej a'u tɨ e'eche'e ɨ amiincura'an. Aj pu i ayan tiraata'ixaate'esin tɨcɨn: “Nya'amiincu, hueicaca naatanyaɨjte'e ɨ pan, a'ini auchan pu yeehui uve'enye seij ɨ nya'amiincu tɨ mu'u a'atama'acaa. Me nyajta inyaa, canu ti'itɨj ticha'ɨ ɨ nyaj raamiin.” 7’Tɨ'ɨqui ayan hui tyu'utanyuusin aɨjna tɨ huirajca tɨcɨn: “Capej nya'ɨtziitya'a. Pu'uri yeehui e'ityanami'i ɨ pueerta, majta maɨn ɨ tɨ'ɨrii, mu'uri huatyeeje'e. Nyajta inyaa, nu'uri huatyáaca'a. Capu che'e rɨ'ɨri nyaj ájcheni nyaj ti'itɨ muaata'an.” Ayaa pu tiraata'ixaate'esin. 8’Me nyajta inyaa, ayaa nu hui tyaja'amue'ixaate'e. Capu xaa ájchesin tɨ ti'itɨ raata'an aɨjna cɨme'e tɨ amiincura'an pueen, silu, aɨ pu ájchesin aɨjna cɨme'e tɨ i cai ma'a ra'ɨtziitya'a ɨ amiincura'an. Aj pu i raata'asin tzɨte'e a'achu tɨ caj ti'itɨj tiraatahuaviira. 9’Aɨj nu hui cɨn neyan tyaja'amue'ixaate'e yee sata'aj sauj rahuaviira ɨ Dioj jemi a'ini aɨ pu xaa tyajamuaata'asin. Sajta, sauj rahuauca ɨ jemin. Aɨ xu jemi ratyauuni ɨ Dioj. Sajta sauj tye'ejtyátu'asixɨ'ɨn ta'apueerta. Aj pu i xaa Dioj tya'antacuuna. Tɨ'ɨqui amuaata'asin ɨ saj rahuavii. 10’Ayaa xu hui huarɨni a'ini tɨ pua'a a'atɨ ayan ti'itɨj ti'ijhuaviira, aɨ pu ra'ancura'asin. Tɨ pua'a a'atɨ ti'itɨj huauuca, aɨ pu hui ratyauuni. Ajta tɨ pua'a a'atɨ ayan tye'ejtyátu'asixɨ'ɨn ta'apueerta, Dioj pu xaa tira'antacuunye'esin. 11’Casi'i muan, ¿ni qui seij ayan huarɨni muan, mɨ sej huayaujmua'a? Tɨ pua'a a'ayauj ayan hue'ite muahuaviira, ¿ni qui cu'ucu'u paraatapijte'esin? Capaj xaa nya'u. Hue'ite papu'u hui raata'asin. 12Na'ari tɨ pua'a ta'u muahuaviira, ¿ni qui tyaxca paratachuite'esin? Capaj xaa nya'u. Ta'u papu'u raata'asin. 13’Ayaa xu muan, mɨ saj a'ij pua'a e'en ɨ ru tzajta'a, xu'uri ramua'aree saj hua'utapueijve'en ɨ ruyaujmua'a ti'itɨ tɨ re'en. Ajta aɨn ɨ tɨ a'amuaya'upua ɨ tajapua tɨ e'eseijre'e, eihua pu hui eitze'e raayɨ'ɨtɨ tɨ hua'uta'an tɨ aɨn xaijnyu'ucara'ara'an aun a'utyaturan aɨme jemi ɨ maj rahuavii. ―Ayaa pu tihua'uta'ixaa aɨjna ɨ Jesús. 14A'anaj pu ayan tyuju'urɨj. Jesús pu tiyaaru'u huatamuaritya'acaa tɨ tevi tzajta'a seijra'acaa. Ajta aɨn ɨ tiyaaru'u, capu raata'acara'a tɨ aɨn tevi tyu'utaxaj. Cɨme'en pu'u Jesús raatamuari, aj pu i tyu'utaxajtaca'a aɨjna ɨ tevi. Majta maɨn ɨ tyaɨte, eihua mu naa rɨ'ɨ tira'utaseij. 15Majta seica meyan tyu'utaxajtaca'a tɨcɨn: ―Amɨjna mɨ tevi, mɨ Jesús, Beelzebú pu hui jetze araujca'anye tɨ ij ayan tihua'utamuarite'en ɨ tiyaaru'use, a'ini aɨjna ɨ Beelzebú, aɨ pu tihue'ijte'e ɨ seica ɨ tiyaaru'use. Beelzebú pu ca'anijra'a rata'aca tɨ ij ayan amɨn tihua'utaijte'en ɨ tiyaaru'use. ―Ayaa mu tyu'utaxajtaca'a. 16Majta seica, ayaa mu rɨ'ɨ tí'ira'ihua'u maɨjna cɨme'e tɨ aɨn hua'utaseijrate'en ti'itɨ tɨ huapɨ'ɨ ruxe'eve'e, tɨ ajta ɨ tajapua e'ema'acan. 17Ajta aɨn Jesús, aɨ pu rú'umua'areeracaa a'ij mej ti'imuajcaa. Ayaa pu tihua'uta'ixaa tɨcɨn: ―Matɨj mana'a ɨ maj seij chuejra'a japua tie'ijta, tɨ pua'a e'ita'a ma'utacɨɨnye, aj mu mi huataujnya'usi'ite'esin. Majta hui, camu che'e a'ateeri mej tieiita mua'aju'un. Ajta tɨ pua'a meyan che'eta mana'a a'ita'a a'utácɨɨnye aɨme ɨ maj saɨque mana'a a e'eche, camu majta che'e a'ateeri a me'echaa majna. 18’Ajta aɨn Satanás, tɨ pua'a meyan e'ita'a a'utácɨɨnye aɨme ɨ tɨ tihue'ijte'e, ¿a'ini ti'irɨ'ɨri tɨ aɨn a'ateere tɨ tihue'ijte'e naijmi'ica? Capu hui a'atzu a'ij ti'irɨ'ɨri. Ayaa nu ti'ixa nyaɨjna cɨme'e sej seyan ti'inyaxa yee nyaj nu'u Beelzebú jetze aranca'anye nyej ni hua'utamuarite'en ɨ tiyaaru'use. 19’Niche'e a'atzu tyajamuaataihua'u. Tɨ pua'a hui neyan Beelzebú jetze aranca'anye nyej ni hua'utamuarite'en ɨ tiyaaru'use, majta aɨme ɨ maj a'amua jamuan á'ujhua'an, aɨ mu majta hua'utamuarite'en ɨ tiyaaru'use. ¿A'atani jetze mua'araujca'anye? Aɨ mu hui mijmu raataxajta yee muan xu autya'ɨtze. 20’Na'ari cai, tɨ pua'a inyaa xaijnyu'ucara'ara'an jetze nya'aranca'anye ɨ Dioj, ayaa pu huataujmua'a tɨ ari hui xaa ajna tyaja'ure'enye muejmi jemi tɨ aɨn Dioj nainjapua tyu'utaijta iiyan chaanaca japua. 21’Ajta aɨn ɨ a'atɨ tɨ ruca'anye, tɨ eihua tí'ijcha'ɨ ɨ tɨ cɨn huatyenya'use'en, tɨ'ɨj auj cɨme'en rajcha'ɨ ɨ ruchi'i, naa pu tyamua'a ti'aviitzi'i tɨj na'a tɨ tye'irá'a. Capu a'atɨ ti'ijnahue'iran. 22’Ma ajta, tɨ pua'a seij mu a'uve'eme'en tɨ eitze'e ruca'anye cai aɨjna, tɨ pua'a raatyenya'usi'ite'en, ajta raataviicue'i, ayaa pu rɨni aɨjna tɨ mu a'uve'ema'a a'ame. Nain pu hui tira'ari'ira ɨ tɨ cɨn nya'usa'acaa. Aj pu i tihua'ura'asin tɨj na'a tɨ tí'ijchaɨca'a ɨ tɨ tihua'unahue'iri'i. 23’Ayaa nu tyaja'amue'ixaate'e. A'atɨ tɨ na'a tɨ cai nyavaɨre'e ineetzi, aɨ pu hui nyejchaɨre'e ineetzi. Ajta a'atɨ tɨ na'a tɨ cai tyaɨte tisá'ɨri ineetzi jemi, aɨ pu hui hua'ure'ityaca. 24Ajta ayan tɨcɨn: ―Ayaa pu rɨcɨ ɨ xaijnyu'ucari tɨ a'ij pua'a e'en. Tɨ'ɨj aun huiirajraa tzajta'an seij ɨ tevi, aɨ pu á'ucha'acanye'en tɨ rahuauhuau a'u tɨ a'ahuáujsa'upe'en, a'u tɨ a'uhuáchi. Aru capu hui ratyauuve. Ayaa pu ti'imua'atze tɨcɨn: “Niche'e yeehui huara'ara'ani u niche a'u nyaj a'arajraa.” 25’Tɨ'ɨj uvé'enyén, ayaa pu hui een aɨjna ɨ a'atɨ. Naa pu een ɨ ru tzajta'a. Cu xuee mej mauchan uhuare'icha'utaca'a. Nain pu rɨ'ɨ huáruu. 26Aj pu i aɨn xaijnyu'ucari huajauuvi'itɨn ɨ seica ɨ maj arahua'apua ara'ase. Aɨ mu majta eitze'e a'ij pua'a e'en cai ɨ saɨj. Matɨ'ɨj mi a'utyarute naimi'i mej mi huatyá'a mua'ara'ani maɨjna tzajta'a ɨ tevi. Ajta e'eyan, ayaa pu hui te'iraame tɨ eitze'e a'ij pua'a eenya'a a'ame aɨjna ɨ tevi cai tɨ ajmi'i eenya'a. ―Ayaa pu tyu'utaxajtaca'a aɨjna ɨ Jesús. 27Tɨ'ɨj Jesús auj tí'ixajtacaa, ajta seij jɨita'a aujna a'utyaavaaca'a hua'a tzajta'a ɨ tyaɨte. Aj pu i ayan tyu'utaxajtaca'a ca'anin cɨme'e tɨcɨn: ―Rɨ'ɨ pu tiraata'a aɨjna ɨ jɨita'a pej jetzen huanu'eihuaca'a, paj pajta jetzen huatzii. 28Aj pu i Jesús ayan tyu'utanyúu tɨcɨn: ―Ma ajta aɨme, eitze'e pu hui rɨ'ɨ tihua'ata'aca aɨme ɨ maj ranamua ɨ nyuucari tɨ cɨme'en raxa ɨ Dioj, majta meyan ra'ara'astijre'en. 29Meenti aɨme ɨ tyaɨte, mauche'e mu maaj ajtyaxɨɨrijma'a ɨ Jesús jemi. Ajta aɨn, ayaa pu tyu'utaxajtaca'a tɨcɨn: ―Eihua mu a'ij pua'a ti'ityetyaɨte ɨ maj ijii huátyaamua. Ayaa mu hui raxe'eve'e nyaj tihua'utaseijrate'en ti'itɨ tɨ huapɨ'ɨ ruxe'eve'e. Aru canu ti'itɨ hua'utaseijrate'esin. Aij nu'u hua'uta'ixaate'esin tɨ cɨme'en raxa ɨ Jonás tyaacan tɨ ti'ixaxa'ata'a ɨ Dioj jetze ma'acan. 30’A'ini aɨ pu hui aɨn pueenya'a ɨ tɨ huapɨ'ɨ ruxe'eve'e ɨ maj raaseij aɨme maj Nínive e'echajca'a, ayaa nu che'eta nyana'a nyaj aɨn pueen ɨ tɨ huapɨ'ɨ ruxe'eve'e ɨ maj raseij aɨme ijii maj huátyaamua. 31’Ayaa nu tyaja'amue'ixaate'e, ajna xɨcajra'a jetze tɨ jetzen Dioj hua'axɨjte'en ɨ tyaɨte, aɨjna tɨ ajmi'i ti'ityavaaca'a reyna cɨme'e aujna antanɨmɨ huarita'an ɨ jaj tɨ ve'e, aɨ pu hui anna a'utyechaxɨjsin hua'a jamuan aime ijii mej huátyaamua. Aɨ pu ajta hua'a jetze tya'ujpua'arite'esin ti'itɨj cɨme'e. Au pu ɨmɨ a'uve'eme tɨ ij raanamua aɨjna ɨ Salomón tyaacan tɨ rɨ'ɨ me tyaúumua'arajca'a. Nyajta inyaa, i nyaj yee huatyejvee ɨ tyaɨte tzajta'a, eitze'e nu hui va'acan cɨn ti'ityejvee cai aɨjna ɨ Salomón. Aɨj pu cɨn aɨjna ɨ reyna hua'a jetze tya'ujpua'arite'esin a'ini camu nyanamua ineetzi. 32’Majta aɨme ɨ mej Nínive e'echajca'a, ayaa mu rɨni ajna xɨcajra'an ɨ Dioj tɨ jetzen hua'axɨjte'en ɨ tyaɨte. Aɨ mu huatyahuiixɨ'ɨn aɨme jamuan ɨ maj ijii huátyaamua. Matɨ'ɨj mi tya'ujpua'arite'esin ti'itɨj cɨme'e. Saɨque mu hui tyu'umuá'a matɨ'ɨj raanamuajri'i a'ij tɨ tihua'uta'ixaa aɨjna ɨ Jonás tyaacan. Nyajta inyaa, eitze'e nu hui va'acan cɨn ti'ityejvee cai aɨjna ɨ Jonás. Aɨj pu cɨn aɨme ɨ tyetyaca Nínive mej e'echajca'a, aɨ mu tya'ujpua'arite'esin ti'itɨj cɨme'e ɨ maj ijii huátyaamua a'ini camu saɨque tyu'umuá'a nyatɨ'ɨj tihua'uta'ixaa inyaa. 33’Cɨme'en hui aɨjna ɨ aparaatu ti'itɨ ɨ maj rá'ajtaira, capu a'atɨ ajna ya'utya'avaata. Capu ajta xa'ari tzajta'a ru'utyechajtza. Capu xaa nya'u silu an pu ɨmɨ ya'ujchájtza mej mi raaseij ɨ maj maun a'utyaruti. 34’Ayaa pu hui ti'ivaɨre'e a'ajɨ'ɨ tɨj taij tɨ a'ataa ɨ a'atzajta'a. Aɨj pu cɨn, tɨ pua'a re'en a'ajɨ'ɨ, ayaa pu een, cu xuee tɨ huanyeeri'icɨ nainjapua ɨ a'atzajta'a. Na'ari cai, tɨ pua'a pacai re'enye'en a'ajɨ'ɨ jetze, ayaa pu een, cu xuee tɨ huatɨca'a ɨ a'atzajta'a. 35’Sata'aj seyan huarɨni tɨ ij cai aumɨ'ɨni tɨ a'ataa ɨ a'atzajta'a. 36Tɨ pua'a naa pu a'ataa ɨ a'atzajta'a, ajta cai a'atzu á'amɨ'ɨca, nainjapua pu hui huanyeeri'icɨ a'ame. Ayaa pu te'eme, cu xuee aparaatu a jetze ráatatza. ―Ayaa pu tyu'utaxajtaca'a aɨjna ɨ Jesús. 37Cɨme'en pu'u raatapua'ajtaca'a tɨ tihua'uta'ixaa, aj pu i saɨj pu raata'inee tɨ tyaja'ucua'ani aa tɨ e'eche. Aɨjna ɨ a'atɨ, fariseo pu pɨrɨcɨ. Au pu a'utyajrupi. Tɨ'ɨj i a vejli'i aura'ahui'ixɨ a'u tɨ meesa a'utyejvee. 38Ajta aɨn fariseo, au pu raaseij tɨ cai Jesús anacai anaujmueijte a'ij mej ti'ijrɨ'ɨre ɨ maj ra'astijra'acaa maɨjna ɨ Moisés tyaacan. Eecan pu a'ij pua'a tira'utaseij. 39Aj pu i tavastara'a ayan tiraata'ixaa tɨcɨn: ―Muan mɨ saj fariseos pueen. Ayaa xu'u ti'itete sej anaujmueijtya'axɨ'ɨn mɨ rumuajca'a jetze. Ma ajta cai a'atzu a'ij amua'amitejte'e saj rɨ'ɨ huaujruuren mɨ ru tzajta'a. Ayaa xu een, cu xuee tɨj a'atɨ raacaja'usin me eijre'e mɨ vaasu, ajta amɨjna mɨ xa'ari. Ayaa xu'u ruseijrata hua'a tzajta'a mɨ tyaɨte saj rɨ'ɨ ti'ityetyaɨte. Ma sajta muan, ayaa xu een mɨ rutzajta'a. A'ij xu pua'a ti'ityetyaɨte saɨjna cɨme'e sej tihua'unahue'iri'i, sajta a'ij pua'a hua'uruu. 40’Mɨ saj hui cai ti'itɨ u'umua'aree. Aɨjna tɨ raatyataahuaca'a ɨ saj me eijre'e ratyáhue'ira'a, ¿ni cai aɨn ajta raatyataahuaca'a ɨ a'amuatzajta'a tɨ seijre'e? 41Sata'aj seyan hua'uta'an ɨ maj cai a'ij ti'ijviicue'i seijna tɨ urá'a ɨ a'amuatzajta'a. Ayaa xu aɨjna cɨn huarɨni, tɨ ij tyamua'a te'irajra'ani muejmi jemi. 42’Sata'aj huataujxaamɨste'en, muan, mɨ sej fariseos pueen. Ayaa xu ti'itete sej raatatuire'en ɨ Dioj jemi, sei tamuaamuata'a anxɨte jetze ajtyama'acan aɨjna ɨ tu'upi, ti'itɨ menta, sajta saɨjna ɨ tu'upi, ti'itɨ ɨ tɨ ayan huataujmua'a tɨcɨn ruda, sajta nain tɨj na'a pua'amua ti'ixuavi ɨ tu'upi. Muan xu hui ra'utamua'aree naijmi'i tɨj na'a ti'ipua'amua. ’Ma sajta muan, seya'uhuá'axɨ ɨ tɨ eitze'e ruxe'eve'e ɨ Dioj jemi, sej si seyan rɨ'ɨ hua'uruuren ɨ a'amuaxá'a tyaɨte a'ij tɨ tiraavijte'e, sajta sej si rɨ'ɨ tirajchaɨ́ ɨ Dioj. Sana'atzɨ cai yá'uhua'anaacache'e sej seyan aráurasten seijna cɨme'e ɨ tɨ eitze'e ruxe'eve'e. Ajta ayan tyu'ujxe'eve'e sej tyu'uta'an saɨjna cɨme'e tɨ cɨj na'a caj ti'ivaɨre'e. 43’Sata'aj huataujxaamɨste'en, muan, mɨ saj fariseos pueen. Eecan xu hui raxe'eve'e tɨ ti'itɨ amuaacɨ'ɨti saj a'ujrá'asen ɨpuari japua a'u maj á'ujraarase ɨ a'amuavaujsi u teyujta'a. Eecan pu a'amuaranajchi maj maɨn tyaɨte amuaatataujte'en aj maj tyaja'atua. 44’Sata'aj huataujxaamɨste'en a'ini ayaa xu e'en cumu a'u maj hua'ava'ana ɨ mɨ'ɨchite. Majta hui aɨme ɨ tyaɨte, ɨ maj japuan á'ujhua'anya'a, camu hui ramua'aree a'ij tɨ een átyete'e a'ini capu a e'e ti'itɨ ɨ maj cɨn raamua'aree maj majna hua'avá'anaxɨ. ―Ayaa pu tihua'uta'ixaa aɨjna ɨ Jesús. 45Tɨ'ɨj i saɨj tɨ ti'imua'ata ɨ yu'uxari jetze, Moisés tyaacan tɨ ra'uyu'uxaca'a, ayaa pu tiraata'ixaa tɨcɨn: ―Maeestru, paj peyan ti'ixa, aɨj paj cɨn a'ij pua'a ti'itajepe'e itejmi. 46Jesús pu ayan tiraata'ixaa tɨcɨn: ―Sajta muan, mɨ sej ti'imua'ata ɨ yu'uxari jetze tɨ Moisés ra'uyu'uxaca'a, sata'aj huataujxaamɨste'en. Ayaa xu hui va'acan cɨn tihue'ijcate'en ɨ tyaɨte aɨjna cɨme'e tɨ ayan huapɨ'ɨ muare'eri, tɨ cai a'atɨ raayɨ'ɨtɨ tɨ ayan huarɨni. Sajta e'eyan, muan xu tihua'utaijte'en ɨ tyaɨte maj nu'u mi maɨjna cɨn ra'ara'astijre'en. Ma sajta muan, caxu a'atzu huataura'asin sej si ti'itɨj cɨn hua'utavaɨre'en. 47’Sata'aj huataujxaamɨste'en a'ini muan xu rá'ajta'ahuaca ɨ maj tzajta'an hua'utyátu'asin aɨme ɨ maj Dioj jetze ma'acan ti'ixaxa'ata'a. Majta aɨme a'amuahuaacɨxa'astyamua'acɨ'ɨ, aɨ mu hui hua'ucuii. 48’Aɨj xu cɨn seyan muan tyu'utaxajta yee amua'aránajchaca'a a'ij mej hua'uruu ɨ a'amuahuaacɨxa'astyamua'acɨ'ɨ. Aɨ mu hui hua'ucuii aɨme ɨ maj Dioj jetze ma'acan ti'ixaxa'ata'a. Sajta muan, xu'uri ramua'aree tyamua'a naa a'ij maj hua'uruu. Ayaa pu ajta tyajamua'aranajchaca'a. Sajta, ayaa xu rá'ajtaahuaca'a a'u maj huaje'etyatu'asin. Sajta, ayaa xu che'eta sana'a nyaruuren ineetzi. 49’Aɨj pu cɨn ayan Dioj rumua'atziira'a pu cɨn tiraataxajtaca'a tɨcɨn: “Nyahua'utáiti'ira hua'ajemi ɨ tyaɨte seica mej neetzi jetze ma'acan ti'ixaxa'a, nyajta seica ɨ nyaj hua'antihuau mej mi nyavaɨre'e. E'icaca mu cui'ini aɨme ɨ tyaɨte. Aɨ mu hua'acui'ini. Majta seica, a'ij pua'a mu hua'aruuren.” 50- 51’Aɨj pu cɨn, ayaa pu hui tira'amitejte'e ɨ Dioj jemi, aɨ mu pú'eenya'a aɨme ijii maj huátyaamua maɨjna cɨme'e matɨj mana'a pua'amua huacuii aɨme ɨ maj Dioj jetze ma'acan ti'ixaxa'ata'a, naijmi'i matɨj pua'amua huacuii tɨj na'a tyu'uséijre ɨ chaanaca, naijmi'i tɨj na'a Abel tɨ huamɨ'ɨ asta aɨjna ɨ Zacarías, aɨjna maj ra'upua'ari e'ita'a a'u tɨ a'utyejvee aɨjna ɨ maj japuan ti'imuaɨ'ɨvajtaca, a'u tɨ teyuu a'ijnee. Jee xaa nya'u, ayaa nu tyaja'amue'ixaate'e xaa nya'u. Ayaa pu hui tira'amitejte'e ɨ Dioj jemi, aɨ mu pú'eenya'a nain cɨme'e aɨme ijii maj huátyaamua. 52’Sata'aj huataujxaamɨste'en mɨ sej ti'imua'ata ɨ yu'uxari jetze Moisés tyaacan tɨ ra'uyu'uxaca'a. Muan xu rujɨɨmua'a sana'a antyujmua'areeraca'a saɨjna cɨme'e ɨ maj cɨn raamua'aree a'ij tɨ ti'ijxe'eve'e ɨ Dioj. Sajta muan, caxu hui huataura'a tɨ Dioj tyajamueijte'en. Sajta hue'ijmɨ aɨme ɨ seica mej mi cai meyan huataura'an tɨ Dioj tihueijte'en. ―Ayaa pu tihua'uta'ixaa aɨjna ɨ Jesús. 53- 54Tɨ'ɨj Jesús aun huiirajraa, aɨme ɨ fariseos, majta aɨme ɨ mej ti'imua'ata ɨ yu'uxari jetze Moisés tɨ ra'uyu'uxaca'a, aɨ mu autyajhuii mej a'ij pua'a tirájeeve ca'anin cɨme'e. Eecan mu eihua tiraihua'uri'i mej mi raatyauni ɨ maj cɨn jetzen tya'ujpuá'ajte'en maɨjna cɨme'e a'ij tɨ aɨn tyu'utaxajtaca'a.

will be added

X\