San Lucas 10

1A'atzu a'ateevi'i, Jesús pu ajtahua'a seica avá'ajajpuaxɨ ɨ maj ayan pua'amuaca a'achu cumu hueicate japuan tamuaamuata'a ara'ase. Aɨ pu hua'utaityaca'a hua'apuacajme'en mej mi anáatyá'a u mua'ara'asti nainjapua a'u tɨ na'a maj huachaatɨme, a'u tɨ Jesús huája'amuáarenche'e. 2Ayaa pu tihua'uta'ixaa tɨcɨn: ―Mui'itɨ mu'uri tɨn á'ujca'ane tɨ Dioj tihua'utaijte'en, aru camu mui'i aɨme ɨ maj aɨjna cɨn ti'ivaɨre'e mej tihua'uta'ixaate'en ɨ nyuucari tɨ cɨn Dioj hue'irajtuaani. Aɨj xu hui cɨn seyan tiraatahuavii ɨ tavastara'a tɨ jemin tyu'utatuire'esin naijmi'ica cɨme'e ɨ mej tya'atzaahuate'e, tɨ aɨn tyajamuaataijte'en saj a'ucɨ́jxɨ'ɨn nainjapua a'u mej e'eseijre'e. 3’Sericu muan. Ayaa nu hui tyajamuaataijte'esin sej si hua'a tzajta'a á'ujhua'anye'en ɨ tyaɨte. Ayaa xu seira'a xa'aju'un matɨj canya'axɨ maj hua'a tzajta'a á'ujhua'an ɨ jɨɨra'ave. 4Caxu hui ca'ani te'epin saj tumin tzajta'a uca'an, caxu sajta ca'ani te'epin saj yu'ujcɨɨxu tya'uca'an, caxu sajta yu'ujca'acái tyaɨ'ɨpɨ'ɨn. Caxu a'atɨ taujtya'a ɨ juye jetze. 5Satɨ'ɨj chi'ita utyarutya, mi'i saj seyan tiraatataujte'en yee: “Rɨ'ɨ xu yee tí'itechajca.” 6’Sajta tɨ pua'a aun e'eseijre'e seij ɨ tevi tɨ xaa rɨ'ɨ tí'iche, aɨ xu hui huatyaturaasin jemin ɨ saj cɨn raatataujte. Na'ari cai, ajtahua'a huatyaturaasin muejmi jemi ɨ saj cɨn raatataujte. 7’Au xu e'eteere ajna chi'i jetze a'u saj a'aráiixa. Ti'itɨ tɨj na'a maj tyaja'amuamin, aɨj xu hui huacua'ani, sajta raaye'en. Ayaa xu huarɨni a'ini ayaa pu tiraavijte'e mej tiraanajchite'en aɨjna tɨ ti'imɨjhuaca. Caxu á'ujhua'anye'en meyee sajta meyee hua'ache. 8’Satɨ'ɨj saun a'utyarute seij jetze ɨ chajta'ana, tɨ pua'a aɨme majamua'ancuré'evi'itɨn, ayaa xu huarɨni. Ti'itɨ maj an amuaajá'ujmuaniira, aɨj xu huacua'ani. 9Sata'aj sajta tihua'uhuaate'en aɨme ɨ mej ti'icucui'ijmee. Sajta hui seyan hua'uta'ixaate'en yee pu'uri tɨmua'a tyaja'ure'enyejsin tɨ Dioj nainjapua tyu'utaijta iiyan chaanaca japua. 10- 11’Na'ari, tɨ pua'a macai amua'ancure'evi'itɨn satɨ'ɨj ara'asti seij jetze ɨ chajta'ana, ayaa xu caaye jetze á'ujhua'anye'en. Ayaa xu hui tihua'uta'ixaate'en yee: “Aɨjna ɨ chuej, tɨ muiiní tɨ ajtavi'itaxɨ ɨ taca'acai jetze, iiya tɨ chajta'a ma'acan, aɨj tu huatyaca'atzɨjxɨ'ɨsin sej si raamua'aree saj va'acan cɨn autyajturaa ɨ Dioj jemi. Capu amɨn a'ij sej seri tyu'uruu. Auche'e pu yaraiixa a'anaj tɨ tyaja'ure'enyejsin tɨ Dioj tyu'utaijta nainjapua iiyan chaanaca japua.” Ayaa xu hui tihua'uta'ixaate'en. 12’Ayaa nu hui tyaja'amue'ixaate'e tzaahuati'ira'a cɨme'e. Ajna xɨcajra'a jetze tɨ'ɨj yaraiixa ɨ Dioj tɨ ij aɨn hua'uxɨjte'en, eitze'e mu hui rajpueitzi mua'aju'un aɨme ɨ maj cai amua'ancure'evi'itɨ aujna chajta'a maj cai aɨme ɨ maj Sodoma e'echajca'a. 13’Mɨ saj hui Corazín e'ema'acan, sata'a huataujxaamɨste'en. Sajta muan, mɨ saj Betsaida e'ema'acan, sata'a sajta huataujxaamɨste'en, a'ini muejmi tzajta'a, eihua nu neyan huarɨj tɨ huapɨ'ɨ ruxe'eve'e. Ma sajta muan, caxu na'ancure'evi'itɨ. Aru tɨ pua'a neyan huárɨniiche'e hua'a tzajta'a aɨme ɨ mej mejmi'i Tiro a'uchaatɨma'acaa o hua'atzajta'a aɨme ɨ mej mejmi'i Sidón e'echajcaa a'ij nyej neri huarɨj muejmi jemi, aɨ mu hui mejmi'i saɨque tyu'umuá'a a'ame'enche'e. Aɨ mu meyan ucaujchejtya'axɨ'ɨnche'e maɨjna cɨme'e ɨ maj cɨn custaa tí'ita'ahuaca. Aɨ mu hui majta nasi caujhuaate'enche'e, majta meyan eenya'a maj a'ujra'aseche'e mej mi raamua'aree ɨ seica ɨ tyaɨte mej meri saɨque tyu'umuá'a. 14’Aru muan, eitze'e xu hui rajpueiitzi xa'aju'un macai aɨme ajna xɨcajra'a jetze tɨ Dioj ayan tihua'axɨjte'en. 15’Ari muan, mɨ saj Capernaum e'ema'acan. ¿A'ini tyajamua'amitejte'e muejmi? ¿Ni qui Dioj pu amua'avi'itɨn u ute'e? Capu hui tzɨte'e, silu Dioj pu muaja'ucahua'axɨjsin tyeta'ɨmɨ ɨ chaanaca jete aɨjna cɨme'e saj cai na'ancure'evi'itɨ. ―Ayaa pu tyu'utaxajtaca'a aɨjna ɨ Jesús. 16Ajtahua'a pu ayan tihua'uta'ixaa aɨme ɨ tɨ hua'utaityaca'a tɨcɨn: ―Aɨjna ɨ a'atɨ tɨ ayan a'amuanamua, aɨ pu hui ajta nyanamua ineetzi. Ajta aɨjna ɨ a'atɨ tɨ amuaatíti, aɨ pu ajta nyetíti ineetzi, ajta, aɨ pu hui ratíti aɨjna tɨ tinaataij ineetzi. 17Matɨ'ɨj mi a'ucɨ́jxɨ aɨme ɨ maj hueicate japuan tamuaamuata'a ara'ase. Matɨ'ɨj uve'enyajxɨ, eihua mu rutyamua'ava'acaa. Ayaa mu tiraata'ixaa tɨcɨn: ―Tavastara'a, majta aɨme ɨ tiyaaru'u, aɨ mu majta ta'ará'astijre'e tyatɨ'ɨj ityan tihua'utaij anyuucajtze'e. 18Ayaa pu tyu'utanyúu aɨjna ɨ Jesús tɨcɨn: ―Nyaa nu raaseij nyaɨjna ɨ Satanás tɨ'ɨj aɨn u e'icajve u ute'e. Ayaa pu hui tyeje'icajve cumu maj tyámaxcɨva'ara'an. 19’Nyajta inyaa, nu'uri tyajamueijca nyaɨjna cɨme'e saj hua'ave'etziinaxɨ'ɨn saɨme ɨ cu'ucu'use, ajta saɨme ɨ tyaxcate sej si tyu'utyamue'itɨn. Nyajta nu hui tyajamueijca sej si tyu'uytyamue'itɨn nain cɨme'e ɨ hua'amuare'eri'ira'a aɨme ɨ maj amuajchaɨre'e. Capu ti'itɨ a'ij á'amuaruuren. 20’Ma sajta muan, caxu hui saɨjna cɨn huataujtyamua'ave'en ɨ maj amua'arástijre'esin ɨ tiyaaru'use silu ayaa xu saɨjna cɨn tityaataujtyamua'ave'en, ee xaa nya'u, tɨ ari a'ayu'usi'i tajapua a'ij saj hui antya'aruu sej si saun a'utyaturan tɨj na'a rusen cɨme'e. ―Ayaa pu tihua'uta'ixaa aɨjna ɨ Jesús. 21Ajna'ɨmɨ, eihua pu huataujtyamua'ave aɨjna ɨ Jesús aɨjna cɨme'e tɨ huatyajturaa jemin ɨ xaijnyu'ucara'ara'an ɨ Dioj. Ayaa pu tyu'utejnyuu tɨcɨn: ―Eihua nu rɨ'ɨ timuaata'asin, mɨ paj niya'upua, mɨ pej tie'ijta u tajapua, pajta iiyan chaanaca japua. Ayaa nu hui een cɨn rɨ'ɨ timuaata'asin a'ini muaa pa raatyá'avaata aijna ɨ nyuucari mej mi cai yau'eitaa mua'araa aɨme ɨ maj eihua raayɨ'ɨtɨ, majta aɨme ɨ maj eihua tyu'ujmua'ate. Pajta muaa tihua'utaseijrate'e aɨme ɨ maj cai a'ij ti'ijviicue'i. Ee xaa nya'u, mɨ paj niya'upua, ayaa pu hui mua'aránajchaca'a. 22’Nain pu cɨn tineijca ɨ niya'upua. Capu a'atɨ ramua'aree a'atɨ nyaj yaujra'an pueen. Aɨ pu'u ramua'aree ɨ niya'upua. Capu a'atɨ ajta ramua'aree a'atɨ tɨ pueen ɨ niya'upua. Nyaa nu'u hui ramua'aree i nyaj yaujra'an pueen. Majta aɨme ramua'areeran ɨ nyaj hua'utaseijrate'esin nyexe'evi'ira'a cɨme'e. ―Ayaa pu tyu'utejnyuu. 23Tɨ'ɨqui hua'antaseirajraa ɨ maj jamuan á'ujhua'anya'a. Rujɨme'e pu hua'uta'ixaa tɨcɨn: ―Eecan pu hui rɨ'ɨ tyajamuaata'a aɨjna cɨme'e ɨ sej seri ti'iseij. 24Ayaa nu tyaja'amue'ixaate'e. Aɨme ɨ maj ti'ixaxa'ata'a ɨ Dioj jetze ma'acan, majta aɨme ɨ mej títatyatyá'acaa rey cɨme'e, mui'itɨ mu raxe'eva'aca'a maj raaseij a'ij sej ti'iseij muan. Majta eihua mu raxe'eva'aca'a maj raanamua a'ij sej seri ti'inamua. Aru capu hui ayan tihua'ucɨ'ɨ. ―Ayaa pu tihua'uta'ixaa aɨjna ɨ Jesús. 25A'anaj pu ayan huarɨj. Saɨj pu ajche, tɨ ti'imua'ata ɨ yu'uxari jetze tɨ Moisés ra'uyu'uxaca'a. Ayaa pu tí'ityesa'aca'a aɨjna ɨ a'atɨ tɨ ayan tiraacuanamua tɨ ij aɨn Jesús ti'itɨj cɨn aiira'ɨtzen. Ayan tɨcɨn: ―Maeestru, ¿ti'itani ruxe'eve'e nyej neyan huarɨni tɨ ij naacɨ'ɨti ineetzi nyaj ruuri na'ara'ani rusen cɨme'e aujna a'u tɨ Dioj e'eseijre'e? 26Ayaa pu tyu'utanyúu aɨjna ɨ Jesús tɨcɨn: ―¿A'ini te'eyu'usi'i ɨ yu'uxari jetze? ¿Ti'itaani pa'ujijve paɨjna jetze ɨ yu'uxari? 27Aj pu i ayan tiraata'ixaa tɨcɨn: ―Pata'aj nu'u peyan rɨ'ɨ tirajcha'ɨ aɨjna ɨ tavastara'a ɨ taDioj nain cɨme'e ɨ a'a tzajta'a, pajta nain cɨme'e a'achu paj caj tya'aca'anye ɨ a'axaijnyu'uca jetze, pajta nain a'axe'evi'ira'a cɨme'e, ajta á'amuá'areeri'ira'a cɨme'e. Ajtahua'a pu seij seijre'e tɨ cɨn ayan yee pata'aj nu'u hui peyan che'eta pana'a rɨ'ɨ tirajcha'ɨ ɨ axa'aj tevi patɨj muaa asaɨj ti'itiá'acha'ɨ. 28Jesús pu ayan tiraata'ixaa tɨcɨn: ―Xa'apɨ'ɨn paj tiraataxajtaca'a. Tɨ pua'a peyan huarɨni, a'ij paj hui tiraataxajtaca'a, paruuri paj pua'ame rusen cɨme'e a'u tɨ Dioj e'eseijre'e. 29Ajta aɨn tɨ ti'imua'ataca, aɨ pu raxe'eva'aca'a mej mi raamua'aree ɨ tyaɨte tɨ cai a'anaj autyajturaa ɨ Dioj jemi. Aɨj pu cɨn, ayan tiraataihua'uri'i aɨjna ɨ Jesús tɨcɨn: ―¿A'atani pueen ɨ nyaxa'aj tevi? 30Ajta aɨn Jesús, ayaa pu tyu'utanyúu tɨcɨn: ―A'atɨ pu nu'u Jerusalén a'arajraa. Au pu nu'u hui a'ucama'aca u Jericó. Matɨ'ɨj nu'u mi nahua'ari ra'antinajchaca'a. Metira'ari'iri'i ɨ cɨɨxura'ara'an. Majta raatyaavajxɨ. Matɨ'ɨj nu'u mi a yauuté ɨ juye jetze. Pu'uri á'ame'erajcaa. Majta nu'u maɨn nahua'ari a'ucɨj. 31’A'atzu a'ateevi'i, tɨ'ɨj nu'u i saɨj a'ucama'aca juye jetze. Puaari pu hui pueen aɨjna. Tɨ'ɨqui raaseij tɨ á'ame'erajcaa. Aa pu nu'u ɨmɨ a'atanyaan ɨ juye. Ajta nu'u mu á'umej. 32’Ajtahua'a pu nu'u saɨj anna a'ucama'aca. Aɨ pu nu'u aɨn pueen saɨj tɨ Leví tyaacan jetze ajtyama'acan. Aɨ pu ajta ti'ivaɨra'acaa hua'ateyujta'a. Tɨ'ɨj aun a'ucáanye a'u tɨ aucá'a ɨ tɨ á'ame'erajcaa, aɨ pu ajta nu'u hui raaseij. Ayaa pu che'eta na'a huarɨj. Aa pu nu'u ɨmɨ tanyaa. Ajta nu'u mu á'umej. 33’Ajtahua'a pu nu'u saɨj a'ucama'aca. Ai pu nu'u aɨn pueen saɨj tɨ seij chuejra'a japua e'ema'acan tɨ ayan tyaja'arajtyahuaa tɨcɨn Samaariya. Tɨ'ɨj aj a'ucama'aca, aɨ pu nu'u a'ucáanye a'u tɨ aucá'a aɨjna tɨ a'ame'ere. Tɨ'ɨj raaseij, aɨ pu nu'u rá'ancu'uvajxɨ. 34’Tɨ'ɨj nu'u i jemin a a'ire'enye. Aj pu i racaaja'usi a jetzen a'u tɨ tyaja'apueijti'ihuaca'a aɨjna cɨme'e ɨ aceiti, ajta u viinu. Ajta nu'u raare'icataxɨ a'u tɨ tyaja'apueijti'ihuaca'a. Aj pu nu'u i ra'ava'ara rucɨi japua ɨ puuru'u. Tɨ'ɨj nu'u i ya'uvi'itɨ, ajna a'ahua'a a'u maj a'asaca ɨ maj puasaaruve'e. Au pu nu'u yáuutuaa. Tyamua'a pu nu'u hui raaxa'apuei. 35’Yaa ruijmua'a yee, aɨ pu nu'u hui ru'itaɨ'ɨpɨ hua'apuaca ɨ tumin. Ajta raataɨ'ɨpɨ'ɨ aɨjna tɨ antyujmua'aree aɨjna cɨme'e ɨ chi'i. Ayaa pu nu'u tiraata'ixaa tɨcɨn: “Pata'aj rɨ'ɨ tiraaxa'apuei. Nyajta inyaa, nyatɨ'ɨj uvé'enyen, aj nu yeehui muaata'asin nain a'achu paj caj tiraaxɨjte huaatari cɨme'e, ajta ti'itɨ tɨ huacuaa.” Ayaa pu nu'u hui tiraata'ixaa, aɨjna ɨ Samaariya tɨ e'ema'acan. 36Ajta aɨn Jesús, ayaa pu tiraataihua'uri'i tɨcɨn: ―¿A'ini timua'amitejte'e, aime ɨ maj hueica, a'ataani eenya'a aɨn pɨrɨcɨ tɨ rɨ'ɨ ti'ityevistaa a'araa amɨjna jemi ɨ ruxa'a tevi ɨ mej tiraanahue'iri'i ɨ nahua'ari? 37Ajta aɨn tɨ ti'imua'ataca ɨ yu'uxari jetze tɨ Moisés ra'uyu'uxaca'a, ayaa pu tiraata'ixaa tɨcɨn: ―Ayej nya'ase tɨ aɨn tɨ rá'ancu'uvajxɨ, ai pu aɨn pueen ɨ tɨ xa'apɨ'ɨn ti'itevi aɨjna jemi ɨ ruxa'a tevi. Jesús pu ayan tiraata'ixaa tɨcɨn: ―Aricu hui, pata'aj peyan huarɨni a'ij tɨ aɨn huarɨj. 38Ajta aɨn Jesús, majta aɨme ɨ maj jamuan á'ujhua'anya'a, matɨ'ɨj mauj huaju'ucaa, au pu a'ará'a a'u tɨ a'atɨ e'echajca'a. Ayaa pu antyahuaa aɨjna ɨ jɨita'a tɨcɨn Marta. Tɨ'ɨj i aɨn ra'ancure'evi'itɨ ɨ ruche. 39Seij pu ti'ihuaara'a, jɨitacan. Ayaa pu antyahuaa tɨcɨn Mariiya. Ajta aɨn Mariiya, an pu vejli'i a'ujyeijxɨ jamuan ɨ Jesús. Ránamuajraca'a a'ij tɨ tí'ixajtacaa. 40Ajta aɨn ɨ Marta, capu a'ij tirá'atyauve'e a'ij tɨ huarɨni a'ini eihua pu ti'ijmuara'acaa tɨ ij tihua'umín. Tɨ'ɨj i e'ire'enye jemin ɨ Jesús. Ayaa pu tiraataihua'uri'i tɨcɨn: ―Nyavastara'a, ¿ni cai a jetze ruxe'eve'e tɨ nye'ihuaara'a rusaɨjtacan ya naatyajtuaa nyej ni nyasaɨj ti'imuare'e? Pata'aj hui raata'ixaate'en tɨ naatavaɨre'en. 41Tavastara'a pu ayan tyu'utanyúu tɨcɨn: ―Marta, Marta, eihua paj ti'imua'atze, pajta eihua a'ij tya'amua'ate. 42Seij pu'u hui ruxe'eve'e pej peyan huarɨni. Aɨjna ɨ Mariiya, aɨ pu ra'ava'ahuau ɨ tɨ eitze'e re'en. Nyajta inyaa canu hui rá'ari'ira nyamɨjna. ―Ayaa pu tiraata'ixaa aɨjna ɨ Jesús.

will be added

X\