Judas 1

1Inyaa, i nyaj i'i Judas, nyaa nu saɨj pɨrɨcɨ tɨ ti'ivaɨre'e aɨjna jemi ɨ Jesús tɨ ajta Cɨriistu'u pueen. Nyaa nu nyajta juutzajra'an pueen aɨjna ɨ Jacobo. Ayaa nu tyaja'amuayu'use'e muan mɨ tɨ amuaatajée ɨ Dioj aɨjna ɨ tyaj tyajta rajya'upua. Aɨ pu ajta a'amuachaɨ a'ame tɨ ij ayan tyajamuaacɨ'ɨti sej seyan seira'a sa'aju'un jemin ɨ Cɨriistu'u. 2Che'e ayan tyajamuaacɨ'ɨti tɨ Dioj, ayan amua'ancu'uvajxɨ'ɨn tyamua'a naa, tɨ ij ajta nain cɨn amuaatyápua'arite'en sej si seyan huapɨ'ɨ huaujxe'eve'en seij sajta seij. 3Ayaa pu'u, ne'ihuaamua'a mɨ nyaj a'amuaxe'eve'e, ayaa nu ti'ijxe'eva'acaa nyej neyan nyaɨjna cɨn tyajamuaataiti'i nyaɨjna cɨme'en tɨ Dioj tu'irajtuaasin tyatɨj tyana'a pua'amua tej teyan ra'astijre'e. Ma ajta, ca'anijra'a pu naata'aca nyej ni neyan ca'anejri cɨn tyajamuaatayu'use'en nyej ni neyan tyajamuaatahuavii sej seyan tyu'utatyese'en sej si sauj ra'ara'astijre'en saɨjna ɨ nyuucari tɨ seij na'a raatyajtuaa hua'a jemi ɨ tɨ Dioj huataura'ate. 4Seica mu aviitzi cɨn ajtyaujnaxcaca'a muejmi jemi. Ai mu aɨn pueen ɨ maj cai ra'astijre'e ɨ Dioj. Majta saɨque pu ayan tihua'amitejte'e aɨjna ɨ nyuucari ɨ tyaj cɨn raamua'areeri'i tɨ huaapua'a pu rɨ'ɨ titaatá'a aɨjna tɨ ti'itaijte'e, aɨjna ɨ tavastara'a, ɨ Jesús tɨ ajta Cɨriistu'u pueen. Ayaa pu tihua'amitejte'e tɨ nu'u aɨn tavastara'a ayan rɨ'ɨ tihua'uta'a mej mi meyan cha'a mana'a a'ij pua'a titetyújchaɨca a'ij tɨ tihua'amitejte'e. Ayaa mu maɨjna cɨn huarɨn, aɨ mu majta ma rúujɨpua ɨ tavastara'a. Ajta ayan tihua'acɨ'ɨti a'ij tɨ ajmi'i te'eyu'usi'ihuaca'a ɨ maj cɨn rajpueitzi mua'aju'un. 5Ayaa nu raxe'eve'e nyej neyan amuaata'an saj ra'utamua'aree tɨ aɨn tavastara'a xaa hue'irajtuaa aujna u Egipto aɨme ɨ rutyaɨtestyamua'a. Aj pu'i e'eyan aɨn ayan hua'upua'ari aɨme ɨ maj cai ra'ara'astijre. 6Majta aɨme ɨ mej tajapua ti'ivaɨre'e, ɨ maj majta cai arauraste maɨjna cɨme'e ɨ tɨ cɨn Dioj hua'antihuau, silu maraatyaxaahuataca'a maɨjna cɨme'e ɨ́ maj cɨn titetya'upu'uca'a u tajapua a'u mej a'utyá'acaa mej mi pua'amuaque ti'itɨ cɨn te'entyarute tɨ eitze'e cɨn seijre, aɨj pu cɨn Dioj ayan hue'ityaana a'u tɨ a'utɨca'a. Au mu e'ityanami'i mua'aju'un tɨj na'a tɨ yu auca'itɨ a'ame tɨj na'a rusen cɨme'e, tɨ i aɨn Dioj ayan pueijtzi hua'uta'an ajna xɨcajra'an tɨ'ɨj hua'axɨjte'en naijmi'ica matɨj mana'a pua'amua seijre'e. 7Ayaa pu che'eta na'a Dioj hua'uxɨjte aɨme ɨ maj Sodoma e'echajca'a, majta ɨ seica ɨ maj Gomorra e'ema'acantacaa, majta seica ɨ maj a'ɨmɨ a'atachaatɨma'acaa. Ayaa mu huataura'a aɨme mej mi huataujxana'acɨre'en, mej mi majta saɨque huataujxana'acɨre'en a'ij tɨ cai tiraavijte'e, tyaata'a jamuan ɨ ruxa'aj tyaata'a. Ayaa mu tyu'utaseijriti'ihuaca'a maj maɨn pueen ɨ mej meyan tirajpueiitzi mua'aju'un maɨjna jetze ɨ taij tɨ cai a'anaj a'amɨ'ɨni. 8Majta aɨme ɨ mej aviitzi cɨn ajtyaujnaxcaca'a muejmi jemi, ayaa mu che'eta mana'a maɨjna jetze ti'imua'atze yee maj ruxaahua huataujxana'acɨre'en. Aɨj mu cɨn a'ij pua'a raruure ɨ rutevi. Majta meyan ma rúujɨpua a'atɨ tɨ na'a tɨ ti'itɨ cɨn antyujmua'aree. Aɨ mu majta a'ij pua'a tihua'axa aɨme ɨ maj tajapua e'eseijre'e, ɨ maj majta rɨ'ɨ huapɨ'ɨ naa seijre'e. 9Ma ajta aɨn Miguel tɨ eihua ti'itɨ cɨn ti'ivaɨre'e ɨ tajapua, capu ayan huataura'a tɨ ayan ca'anin cɨn ra'uxɨ́jte'en aɨjna ɨ tiyaaru'u matɨ'ɨj ti'itesa'acaa maɨjna cɨme'e a'ij mej raaruuren ɨ tevijra'an aɨjna ɨ Moisés tyaacan. Capu xaa ayan ca'anin cɨn ra'uxɨ́jte silu ayaa pu tiraata'ixaa tɨcɨn: “Che'e aɨn tavastara'a mua'ajtya'axɨ'ɨn.” 10Ma majta aɨme ɨ tyetyaca, ayaa mu cha'a mana'a a'ij pua'a ti'ixaxa'a maɨjna cɨme'e ti'itɨ tɨ a'ij maj cai yau'ite. Ajta ayaa mu maɨjna cɨn rujɨɨmua'a ahuaujpua'arite'e maɨjna cɨme'e ɨ maj rujɨɨmua'a a'ij tirajtyauve ajta aɨjna tɨ a'ij pua'a tihua'amitejte'e. Ayaa mu e'en matɨj ɨ ti'itɨ maj cai raayɨ'ɨtɨ maj tyu'umua'ati. Aɨj mu cɨn rujɨɨmua'a ahuaujpua'arite'e. 11Cui'i xaa, Dioj pu pueijtzi hua'uta'asin aɨme. Ayaa mu che'eta mana'a a'ij pua'a titetyújchaɨca'a tɨj ajta aɨjna ɨ Caín. Huaapua'a mu meyan huataura'a mej mi meyan eihua huapɨ'ɨ raamue'itɨn ɨ pueijtzi. Ayaa mu che'eta mana'a tɨj huarɨj aɨjna ɨ Balaam tyaacan tɨ eihua huapɨ'ɨ auta'ɨtze ɨ Dioj jemi. Ayaa mu che'eta mana'a ahuaujpua'arixɨ'ɨn tɨj ajta á'upua'araca'a aɨjna ɨ Coré tɨ'ɨj aɨn ca'anin cɨn raatyaxaahuataca'a aɨjna tɨ cɨn antyujmua'aréera aɨjna ɨ Moisés tyaacan. 12Satɨj sana'a e'etyujsaɨre'en sej si naimi'i tyu'ucua'ani saɨjna cɨme'e saj huaujxe'eve'en, aɨme mu a'ij pua'a rɨɨ mua'aye'i. Ayaa mu'u, camu a'ij mana'a ti'icua'aca muejmi jamuan, majta meyan ti'iseijre'e muejmi jemi tɨj cɨɨxuri tɨ ti'icameijri'i. Aɨ mu rujɨɨmua'a mana'a tyu'ujmi'icuaca, majta, camu tihua'ami'icuaca ɨ seica. Ayaa mu e'en tɨj jaitɨri maj cai jetzen vijvi'iye silu aaca pu raatɨsin. Ayaa mu majta e'en tɨj cɨye tɨ cai taaca tɨ'ɨj cai che'e xɨjcata'a pɨti'irɨjcaa, tɨ pua'a a'atɨ ra'ijcupi. Cu xuee hua'apua pu huatyaahua nain cɨme'e. 13Majta meyana e'en tɨj ɨ jaj tɨ á'ujruuréjvee ca'anin cɨme'e, tɨ ajta jetzen aamɨxcue'iri ajninyei. Ajta aɨjna tɨ hua'a jetze airáninyei aɨme ɨ tyaɨte, ayaa pu hua'utatévi'iraste'en. Majta mu meyan e'en tɨj xu'ura'ave ɨ maj mauj á'ujhua'an a'u tɨ a'utɨca'a. Ayaa pu tihua'acɨ'ɨti maj maun a'utyaturan a'u tɨ eihua huapɨ'ɨ a'utɨca'a. 14Ajta aɨn ɨ Enóc, aɨjna tɨ arahua'apua jetze ti'itej aɨme ɨ maj Adán jetzen airaanye, aɨ pu ayan tyu'utaxajtaca'a aɨme cɨme'en tɨ'ɨj ayan tyu'utaxajtaca'a ɨ Dioj jetze ma'acan tɨcɨn: “Casi'i, xaaseij tavastara'a pu yava'acányejsin hua'a jamuan ɨ maj ravaɨre'e ɨ tajapua, aɨme tɨ ajta huataura'ate. 15“Aɨ pu hua'axa'apɨ'ɨntari'iran naijmi'ica, ajta aɨj pu cɨn hua'axɨjte'en naijmi'ica ɨ mej rajchaɨra'acaa ɨ Dioj aɨjna cɨme'e ɨ mej a'ij pua'a rɨjcaa tɨ cai ayan tiraavijte'e ɨ Dioj jemi. Aɨ pu ajta aɨjna cɨn hua'axɨjte'en aɨjna cɨme'e maj meyan eihua huapɨ'ɨ a'ij pua'a tí'ixajtacaa ɨ Dioj aɨme ɨ maj autyajturaa ɨ jemin mej mi cai meyan huarɨni a'ij tɨ tiraavijte'e ɨ jemin.” Ayaa pu tyu'utaxajtaca'a aɨjna ɨ Enóc. 16Aɨme ɨ tyaɨte, ai mu aɨn pueen ɨ maj ti'itɨ cɨn runyuuste'e, ɨ maj nínyu'ucacu. Ayaa mu titetyújcha'ɨ a'ij tɨ tihua'amitejte'e ɨ hua'a tzajta'a. Ca'anin mu cɨn ti'ixaata mua'aye'i mej mi maɨjna cɨn á'ujtzaahuate'e. Majta meyan rɨ'ɨ tihua'ajee ɨ tyaɨte mej mi ti'itɨ cɨn hua'utyamue'itɨn. 17Ma sajta muan, mɨ nyaj a'amuaxe'eve'e, sata'aj ra'utamua'aree a'ij mej tyu'utaxajtaca'a ɨ Dioj jetze ma'acan aɨme ɨ tɨ hua'antihuau ɨ tavastara'a, aɨjna ɨ Jesús tɨ ajta Cɨriistu'u pueen. 18Ayaa mu tyu'utaxajtaca'a tɨ ayan tyaja'ure'enyejsin tɨcɨn: “Ajna, tɨ'ɨj ari nain te'entipua'arijme'en, aɨ mu huataseijre'esin aɨme ɨ maj titya'axaahuari'i, ɨ mej meyan titetyújchaɨ mua'aju'un a'ij tɨ tihua'amitejte'e ɨ hua'a tzajta'a, tɨj na'a tɨ cai ayan tiraavijte'e ɨ Dioj jemi.” 19Ai mu aɨn pueen ɨ mej ca'anijra'a hua'ata'aca ɨ tyaɨte mej mi e'ita'a a'utacɨ'ɨca'an. Aɨ mu rujɨɨmua'a mana'a a'ij tirajtyau a'ij mej rɨcɨ. Camu a'atzu jetzen araujca'anye ɨ xaijnyu'ucara'ara'an ɨ Dioj. 20Ma sajta muan, mɨ nyaj a'amuaxe'eve'e, sata'aj ca'anijra'a tyu'uta'an seij sajta seij sej si tya'utaviicue'i saɨjna cɨme'e saj ra'ara'astijre'en saɨjna tɨ Dioj ayan huataura'ate. Sata'aj sajta araujca'anyen saɨjna jetze ɨ xaijnyu'ucara'ara'an ɨ Dioj, sej si seyan huatejnyuuni ɨ Dioj jemi. 21Sata'aj sauj ra'utamua'aree tɨj na'a tɨ yu auca'itɨ a'ame tɨ aɨn Dioj ayan a'amuaxe'eve'e. Sata'aj sajta seyan rachue'eva'a saɨjna ɨ tavastara'a, aɨjna ɨ Jesús tɨ ajta Cɨriistu'u pueen tɨ ij aɨn aɨjna cɨn amua'ancu'uvajxɨ'ɨn aɨjna cɨme'e tɨ ayan tyajamuaata'asin sej seyan jemin ruurican huatyaturan tɨj na'a rusen cɨme'e. 22Sata'aj sajta ca'anijra'a hua'uta'an seica ɨ maj cai rɨ'ɨ tya'atzaahuate'e. 23Sata'aj sajta hue'irajtuaani seica, muare'eri cɨme'e. Ayaa pu seira'a a'ame. Cu xuee saj hue'irajtuaani ɨ taij jetze. Sajta seica, ɨ mej ti'itzɨɨni'ire'e, sata'aj hua'ancu'uvajxɨ'ɨn. Ayaa xu saɨjna cɨn ti'itzɨɨnya'a a'ini eihua mu huapɨ'ɨ xana'avisi'i. Cu xuee ajta tihua'acɨɨxu ayan ti'ichuaamua aɨjna cɨme'e ɨ maj cɨn autyajturaa ɨ Dioj jemi. 24- 25Ajta aɨn ɨ Dioj tɨ saɨj na'a pueen, ai pu aɨn pueen tɨ tu'irajtuaani. Aɨ pu raayɨ'ɨtɨ tɨ ca'anijra'a amuaata'an sej si cai ti'itɨ cɨn atya'ɨtza'ara'an ɨ jemin. Aɨ pu ajta amuaatyahuiite'esin ɨ jemin a'u tɨ rɨ'ɨ huapɨ'ɨ naa ti'iseijre'e. Muan xu cai ti'itɨ a'aturaacan cɨn saun huate'en, sajta huapɨ'ɨ xu huataujtyamua'ave'esin. Tiche'e teyan rɨ'ɨ tiraata'an a'ini aɨ pu aɨjna cɨn ti'ityejvee aɨjna cɨme'e tɨ eitze'e ve'e. Aɨ pu ajta nain cɨn ti'ijta, ajta nain cɨn antyujmua'aree. Aɨ pu ajta ayan tyejmi japua huanyúu aɨjna cɨme'e tɨ Cɨriistu'u tu'irajtuaa tɨ'ɨj cai xɨ huataséiira'a ɨ chaanaca tyaj japuan seijre'e. Tiche'e teyan tyaɨjna cɨn rɨ'ɨ tiraata'an tɨjna'a tɨ yu auca'itɨ a'ame tɨj na'a rusen cɨme'e. Che'e ayan tyaja'ure'enyen.

will be added

X\