San Juan 9

1Tɨ'ɨj aun a'atama'acaa, Jesús pu a'atɨ huaseij tɨ arácuuni'i pu huanu'eihuaca'a. 2Majta aɨme ɨ maj Jesús jamuan á'ujhua'anya'a, ayaa mu tiraataihua'uri'i tɨcɨn: ―Maeestru, ¿a'ataani yeehui ayan autyajturaa ɨ Dioj jemi tɨ ij aɨn ayan arácuuni'i huanu'eihua? ¿Ni qui aɨn autyajturaa ca'ɨn ɨ vaujsimua'ame'en? 3Aj pu'i Jesús ayan tihua'uta'ixaa tɨcɨn: ―Capu yeehui a'atɨ autyajturaa ɨ Dioj jemi. Capu amɨjna a'atɨ ayan autyajturaa, camu majta ɨ vaujsimua'ame'en. Ayaa pu yeehui tiraaruu tɨ ij ayan huataseijre'en ɨ jemin a'ij tɨ Dioj tiraayɨ'ɨtɨ aɨjna cɨme'e ɨ rumua'are'eri'ira'ara'an. 4Ayaa pu ruxe'eve'e tɨ'ɨj auj tujca'ari tzajta'a pɨti'irɨcɨ tej teyan tyaɨjna jetze tyu'umuare'en Dioj tɨ cɨn ayan yan nyaja'utaityaca'a. Pu'uri yeehui ajna tyaja'ure'enyejsin tɨ huatyatɨca'ari. Capu che'e rɨ'ɨriista a'ame ajna tɨ a'atɨ ayan tyu'umuare'en. 5Ijii, nyatɨ'ɨj nyauj neyan huaca iiyan chaanaca japua, ayaa nu ti'ivaɨre'e hua'a tzajta'a ɨ tyaɨte tɨj tatzari tɨ cɨn hua'a japua huanyeeri'i mej mi meyan ti'itɨj huaseij matɨj mana'a pua'amua ɨ maj yan japuan huachaatɨme ɨ chaanaca japua. ―Ayaa pu tihua'uta'ixaa. 6Tɨ'ɨj ayan tyu'utaxajtaca'a, aj pu'i, aɨn a chuaata'a a'arájtzitzee. Ajta, ruɨjque'e cɨn rajrú'unye ɨ xarij. Aj pu i ra'arajpɨtijri'i a jɨ'ɨsaara'an jetze aɨjna tɨ aracun. 7Ajta ayan tiraata'ixaa tɨcɨn: ―Aricu yeehui, u a'ume'e paujna a'u tɨ ja'ajmuaa tɨ ayan tyaja'arajtyahuaa tɨcɨn Siloé. (Ayaa pu huataujmua'a aɨjna ɨ nyuucari tɨcɨn tɨ huataiti'ihuaca'a.) Aj pu'i u á'umej aɨjna ɨ a'atɨ, ajta acaurista'ami. Tɨ'ɨqui mu a'uve'eme. Pu'uri ayan atanyéeri. 8Majta aɨme ɨ mej a vejli'i a'uchaatɨme a'acaa a'u tɨ e'echajca'a aɨjna ɨ a'atɨ, majta aɨme, ɨ mej mejmi'i meyan raseijracaa tɨ'ɨj aɨn auj limujna huauca'a, ayaa mu tyu'utaxajtaca'a tɨcɨn: ―¿Ni cai yeehui aɨn pueen tɨ ayan aun a'utacái a'aye'i tɨ ij limujna hua'utahuavii ɨ tyaɨte? 9Seica mu meyan tyu'utaxajtaca'a tɨ nu'u aɨn pueen. Majta seica meyan tɨcɨn: ―Capu yee aɨn pueen, silu ayaa pu'u na'a seijre'e tɨj aɨjna. Ajta aɨn, ayaa pu tyu'utaxajtaca'a tɨcɨn: ―Nyaa nu yeehui nyaɨn pueen. 10Matɨ'ɨj mi meyan tiraataihua'uri'i tɨcɨn: ―¿A'ini ye'i petya'atányeeraca'a? 11Aj pu'i ayan tihua'uta'ixaa tɨcɨn: ―Aɨjna yeehui ɨ mej meyan ratamua'amua tɨcɨn: Jesús, aɨ pu xarij huatyáaru'unyáa, tɨ'ɨqui yeehui na'arapɨtijri'i ye nyajɨ'ɨ jetze. Aj pu'i ayan tinaataij nyaj nu'u nyaun u á'ume'en nyaujna Siloé, a'u tɨ ja'ajmuaa nyaj nu'u ni aranja'usixɨ'ɨn. Nyatɨ'ɨj yeehui ni u a'umej, nyajta aranja'usixɨ. Aj nu ni neyan maunyeeraca'a. ―Ayaa pu tihua'uta'ixaa. 12Matɨ'ɨj mi meyan tiraataihua'uri'i tɨcɨn: ―¿A'uni a'ij een aɨjna ɨ a'atɨ? Ayaa pu tihua'uta'ixaa tɨcɨn: ―Canu yeehui me'e ya'amua'aree. 13Matɨ'ɨj mi ya'uvi'itɨ maɨjna tɨ arácuuni'i aɨme jemi ɨ fariseos. 14Ajta, ayaa pu ajna pɨti'irɨjcaa ajna xɨcaara'an jetze mej jetzen rusa'upi tɨ'ɨj Jesús ayan raatyáaru'unyej ɨ xarij, ajta tiraahuaa. 15Aɨj mu cɨn, aɨme ɨ fariseos majta meyan raataihua'uri'i a'ij tɨ aɨn tya'atanyeeraca'a. Ajta aɨn a'atɨ ayan tihua'uta'ixaa tɨcɨn: ―Aɨ pu yeehui na'arapɨtijri'i ye nyajɨ'ɨ jetze. Nyajta neyan aranja'usixɨ. Ajta ijii, nyaa nu yeehui neri mauunyee. 16Majta ɨ mej hua'a jetze ajtyama'acan ɨ fariseos, ayaa mu tyu'utaxajtaca'a tɨcɨn: ―Capu yeehui aun e'ema'acan ɨ Dioj jemi aɨjna a'ini capu ayan ra'astijre'e aɨjna cɨme'e ɨ xɨcaj tyej jetzen tasa'upi. Majta seica meyan tɨcɨn: ―¿A'ini yeehui ti'irɨ'ɨri tɨ a'atɨ ayan huarɨni tɨ huapɨ'ɨ ruxe'eve'e tɨ pua'a ayan nu'u a'utya'ɨtza'ara'an ɨ Dioj jemi? Aɨj pu cɨn, seica mu saɨque tí'ixajtacaa. Majta ɨ seica, saɨque mu majta tí'ixajtacaa. Camu naimi'i ruxa'a mana'a meyan tí'ixajtacaa. 17Matɨ'ɨj meyan majtahua'a tiraataihua'uri'i tɨcɨn: ―Pajta muaa, ¿a'ini yeehui peti'imua'atze a'atɨ tɨ pɨrɨcɨ?, a'ini aɨ pu timuaahuaa pej pi atanyeeraca'a. Ajta aɨn a'atɨ ayan tihua'uta'ixaa tɨcɨn: ―Aɨ pu yeehui Dioj jetze ma'acan ti'ixaxa'a. 18Majta aɨme ɨ mej aun ti'ijta teyujta'a, camu rá'antzaahua tɨ ayan arácuuni'i huanu'eihuaca'a, tɨ ari huaruj tɨ i ari atanyee ijii icu. Matɨ'ɨj mi meyan hua'utaijtaca'a mej mi u a'uva'aju'un ɨ vaujsimua'ame'en. 19Ayaa mu tihua'utaihua'uri'i tɨcɨn: ―¿Ni tzaa yeehui aɨn pueen a'amuayauj? ¿Ni aɨn pueen sej seyan ti'ixaj yee arácuuni'i pu huanu'eihuaca'a? ¿A'ini yeehui auj ti'irɨ'ɨri tɨ ari mauunyee? 20Majta aɨme ɨ vaujsimua'ame'en, ayaa mu tyu'utanyúu tɨcɨn: ―Ayaa tu xaa ramua'aree tɨ aɨn tayauj pɨrɨcɨ, tyajta yeehui ramua'aree tɨ arácuuni'i huanu'eihuaca'a. 21Me tyajta ityan, catu xaa nya'u ramua'aree a'ij tɨ een cɨme'e tɨ ayan ari mauunyee nusu a'atɨ tɨ ayan raarujte. Sata'aj yeehui seyan tiraataihua'u a'ini, pu'uri vasta'a. Aɨ pu ajta rusaɨj tyu'utaxajta. 22Ayaa mu een cɨn tyu'utaxajtaca'a ɨ vaujsimua'ame'en a'ini mahua'atzɨɨnya'acaa aɨme ɨ mej aun teyujta'a ti'ijta, ɨ maj majta meri meyan tiraaxa'apɨ'ɨntare mej mi ru'ire'ite maujna teyujta'a a'atɨ tɨ na'a tɨ ayan tyu'utaxaj yee Jesús pu nu'u aɨn pueen ɨ Cɨriistu'u tɨ Dioj ra'antihuau. 23Aɨj mu cɨn meyan tyu'utaxajtaca'a ɨ vaujsimua'ame'en yee mata'aj raataihua'u maɨjna a'ini aɨjna ɨ hua'ayauj pu'uri vastacaa. 24Majtahua'a mu meyan raatajé maɨjna tɨ arácuuni'i huanu'eihuaca'a. Ayaa mu tiraata'ixaa tɨcɨn: ―Pata'aj peyan pana'a rɨ'ɨ tiraata'an ɨ Dioj. Pajta cai yeehui peyan rɨ'ɨ tiraata'acare'en paɨjna ɨ a'atɨ a'ini aɨ pu atya'ɨtza'ara ɨ Dioj jemi. 25Ajta aɨn, ayaa pu tihua'uta'ixaa tɨcɨn: ―Tɨ pua'a yeehui ayan atya'ɨtza'ara ɨ Dioj jemi nusu cai, canu xaahui a'atzu ramua'aree, silu ayaa nu xaa ramua'aree nyaj anacai arácuuni'i. Me nyajta ijii, nyaa nu hui mauunyee. 26Matɨ'ɨj mi meyan tiraataihua'uri'i tɨcɨn: ―¿A'ini ye'i muaaruu? ¿A'ini ye'i timuaahuaa pej pi yeehui atanyeere? 27Aj pu'i ayan tihua'uta'ixaa tɨcɨn: ―Nu'uri amuaata'ixaa. Sajta muan, caxu náanamuajri'i. ¿A'ini een cɨme'e seyan raxe'eve'e nyaj nyajtahua'a amuaata'ixaate'en? Tij sajta muan seyan raxe'eve'e saj sajta jamuan á'ujhua'anye'en. 28Majta meyan eihua mu a'ij pua'a tiraata'ixaa tɨcɨn: ―Aa ti'ijta nya'u. Muaa paj yeehui paɨjna jamuan a'ucha'acan, tzɨte'e. Tyajta ityan, tyan tu teyan ra'astijre'e tyaɨjna ɨ Moisés tyaacan. 29Tyan tu yeehui teyan ramua'aree tɨ Dioj ayan jamuan tyu'uxajtaca'a ɨ Moisés. Ajta, cɨme'en aɨjna ɨ a'atɨ, catu yeehui a'atzu ramua'aree a'u tɨ e'ema'acan. 30Aj pu'i ayan tyu'utanyúu aɨjna ɨ a'atɨ tɨcɨn: ―¿Ni cai nya'u icu? Muan xu cai ramua'aree a'u tɨ e'ema'acan. Ma ajta aɨn ayan naarujte nyej ni neyan atanyeere. 31Ayaa tu yeehui ramua'aree tɨ Dioj cai ayan ranamua a'atɨ tɨ ayan ata'ɨtza'ara ɨ jemin. Dioj pu xaa ayan ranamua aɨjna ɨ a'atɨ tɨ ayan rana'amiche, ajta tɨ ayan ra'astijre'e a'ij tɨ Dioj ti'ijxe'eve'e. 32Capu yeehui a'anaj a'atɨ ayan raanamuajri'i tɨ seij ayan raarujte aɨjna tɨ arácuuni'i huanu'eihuaca'a tɨ ij ayan atanyéeri a'ara'ani. 33Tɨ pua'a hui cai Dioj jemi a'ama'acantacache'e, capu a'ij rɨniiche'e tɨ naarújte'enche'e inyeetzi. ―Ayaa pu tihua'uta'ixaa. 34Majta aɨme meyan tiraata'ixaa tɨcɨn: ―Nain paj cɨn autyajturaa ɨ Dioj jemi muaa, tɨj na'a pej yeehui peyan huanu'eihuaca'a tɨ yu e'ire'enye. ¿Ni tzaa muaa peyan huatya'aca'anye pej peyan titaamua'aten? ―Ayaa mu tiraata'ixaa. Majta ru'ire'ityaca'a. 35Ajta aɨn Jesús, ayej raamua'areeri'i mej meyan ru'ire'ityaca'a. Tɨ'ɨj ayan yá'utyau aɨjna ɨ a'atɨ, ayaa pu tiraata'ixaa tɨcɨn: ―¿Ni peyan ra'atzaahuate'e paɨjna tɨ tyaata'a jetze e'iraujnyejte? 36Aj pu'i aɨn a'atɨ ayan tiraataihua'uri'i tɨcɨn: ―Nyavastara'a yeehui, ¿a'ataani aɨn pɨrɨcɨ nyej ni neyan rá'antzaahuate'en? 37Jesús pu ayan tiraata'ixaa tɨcɨn: ―Papu'uri yeehui raaseij. Ee xaa nya'u ayan ti'ayajna, aɨ pu a jamuan ayan ti'ixaj. 38Ajta aɨn tevi ayej tiraata'ixaa tɨcɨn: ―Nyavastara'a, nyaa nu yeehui mua'atzaahuate'e. Aj pu'i raatyanajchaca'a. 39Ajta aɨn Jesús ayan tyu'utaxajtaca'a tɨcɨn: ―Ayaa nu yeehui nyaɨjna cɨn a'uve'eme iiyan chaanaca japua nyej ni hua'uxɨjte'en naijmi'ica ɨ mej yan huachaatɨme iiyan chaanaca japua, mej mi meyan atanyéjnye'ere aɨme ɨ mej aracucu'unijmee, mej mi majta yeehui meyan aracucu'unijma'a mua'ara'ani aɨme ɨ maj nu'u meyan atanyéjnye'e. 40Meenti seica ɨ fariseos, au mu vejli'i a'utyáuuca'a. Matɨ'ɨj meyan raanamuajri'i a'ij tɨ tyu'utaxajtaca'a, matɨ'ɨj mi meyan tiraataihua'uri'i tɨcɨn: ―¿Ai nu'u ye'i? ¿Ni tzaa yeehui tyajta ityan aracucu'unijmee? 41Ayaa pu tihua'uta'ixaa tɨcɨn: ―Tɨ pua'a yeehui seyan aracucu'unijme'eni tɨ ij cai ti'itɨj a'ij tyajamua'amityejtya'a, capu rɨ'ɨriista a'ame'enche'e tɨ a'atɨ ti'ijtɨj cɨn muejmi jetze tya'ujpuá'ajte'en. Ma sajta muan, ayaa xu yeehui ti'ixa saj nu'u seyan atanyéjnye'e tɨ ij nain cɨn tyajamua'amitejte'e, aɨj pu cɨn sauche'e xu ata'ɨtza'ara ɨ Dioj jemi.

will be added

X\