San Juan 8

1Ajta Jesús pu aun á'umej jɨri tɨ a'utacá'a tɨ ayan tyaja'arajtyahuaa tɨcɨn Aceituunajremi. 2Tapua'arijma'aca pu aun a'ujnyéj teyujta'a. Majta mu eihua tyaɨte ajtyáxɨɨraca'a ɨ jemin. Aj pu'i a'ujyeijxɨ tɨ i tihuá'umua'aten. 3Majta aɨme ɨ mej jetzen tyu'ujmua'ate ɨ nyuucari ɨ maj cɨn ti'ijta, majta aɨme ɨ fariseos, aɨ mu seij a'araavi'itɨ ɨ jɨita'a. Ayaa mu raatyeevi'i tɨ'ɨj auj ayan rɨjcaa ɨ jɨita'a tɨ ruxana'acɨra'acaa. Matɨ'ɨj mi raataij tɨ aun e'ita'a a'utyechaxɨn mej mi raaseij ɨ tyaɨte. 4Matɨ'ɨj mi meyan tiraata'ixaa maɨjna ɨ Jesús tɨcɨn: ―Maeestru, ayaa mu yeehui raatyeevi'i amɨjna mɨ jɨita'a tɨ'ɨj auj huaujxana'acɨra'acaa. 5Ajta aɨn Moisés, ayaa pu yeehui titaataij aɨjna jetze ɨ nyuucari tɨ raatyajtuaa tɨ ayan ruxe'eve'e tyaj nu'u tetej cɨn raaje'ica. Ari muaa, ¿a'ini yeehui pajta ti'ixa? 6Ayaa mu maɨjna cɨn tiraataihua'uri'i mej mi maɨjna cɨn ra'antimue'itɨn a'ij tɨ aɨn ti'itɨj cɨn tihua'uta'ixaate'esin. Ayaa mu rahuauca'a maɨjna ɨ maj cɨn tiraaxajtzi'i. Ajta aɨn Jesús, aɨ pu aicaujtutzi. Aj pu'i ayan autyejche tɨ ruxɨte cɨn ra'uyu'uxa a chuaata'a. 7Mauche'e mu ti'ira'ihua'uracaa. Aj pu'i Jesús ayan huatyeechaxɨ. Ayaa pu tihua'uta'ixaa tɨcɨn: ―Tɨ pua'a hui saɨj muan a'anaj cai aɨjna cɨn ayan autya'ɨtze ɨ á'amuamua'atziira'a cɨme'e, che'e aɨn a'atɨ anacai raatatú'a ɨ tetej cɨme'e. ―Ayaa pu tihua'uta'ixaa. 8Ajtahua'a pu ayan aicaujtutzi. Ajta ra'uyu'uxaca'a a chuaata'a. 9Majta aɨme, cɨme'en mu'u meyan raanamuajri'i a'ij tɨ tyu'utaxajtaca'a aɨjna ɨ Jesús, matɨ'ɨj mi maun tihuii, seij majta seij, anacaican aɨjna tɨ eitze'e vasta'a. Tɨ'ɨqui aɨ na'a ɨ Jesús aun a'utyajturaa jamuan aɨjna ɨ jɨita'a tɨ aun e'ita'a a'utyavaaca'a. 10Aj pu'i Jesús ayan huatyeechaxɨ. Aj pu'i ayan tiraataihua'uri'i tɨcɨn: ―Jɨita'a, ¿a'uni hui á'ij me'en aɨme? ¿Ni cai ma'a a'atɨ tɨ ayan ti'itɨj cɨn mueetzi jetze ti'ipua'ajte'e? 11Aj pu'i ayan tiraata'ixaa tɨcɨn: ―Nyavastara'a, capu yeehui a'atɨ ayan nyeetzi jetze ti'itɨj cɨn ti'ipua'ajte'e. Jesús pu ayan tiraata'ixaa tɨcɨn: ―Canu nyajta inyaa ti'itɨj cɨn mueetzi jetze tya'ujpuá'ajte'esin. Pata'aj a'ura'ani. Capej hui che'e peyan paɨjna cɨn autya'ɨtza'ara'an. ―Ayaa pu tiraata'ixaa. 12Tɨ'ɨj ajtahua'a ayan tihua'uta'ixaa ɨ tyaɨte ɨ Jesús, ayej tyu'utaxajtaca'a tɨcɨn: ―Nyaa nu yeehui nyaɨn pueen ɨ tatzari tɨ cɨn huanyeeri'i hua'a japua naijmi'ica ɨ maj yan huachaatɨme iiyan chaanaca japua. A'atɨ tɨ na'a hui tɨ nyaa jamuan á'ucha'acanye'en, capu a'anaj ayan tɨca'amiste'e á'ucha'acanya'a a'ame, silu ayaa nu yeehui raatyajtuaani ɨ jemin nyaɨjna ɨ tatzari ɨ tɨ cɨn ruuri a'ara'ani. 13Matɨ'ɨj mi aɨme fariseos meyan tiraata'ixaa tɨcɨn: ―Muaa paj peyan asaɨj tityá'axajta. Aɨj pu yeehui cɨn cai ti'itɨj vaɨre'e a'ij pej tityá'axajta asaɨj. 14Aj pu'i ayan tihua'uta'ixaa aɨjna ɨ Jesús tɨcɨn: ―Tɨ pua'a neyan nyasaɨj tí'inxajta, auche'e pu yeehui ti'ivaɨre'e nyej neyan ti'inxajta nyasaɨj aɨjna cɨme'e nyej neyan ramua'aree a'u nyej a'arajraa, nyajta neyan che'eta nyana'a ramua'aree a'uj nyaj a'uméj. Ma sajta muan, capu yeehui a'ij tyajamua'amitejte'e, a'u nyaj a'arajraa, na'ari a'u nyaj a'uméj. 15Ayaa xu seyan sana'a hua'axɨjte'e a'ij saj rujɨɨmua'a tirajtyauve. Me nyajta inyaa, canu a'atɨ ijii á'axɨjte'en. 16Aru, tɨ pua'a hui neyan a'atɨ a'axɨjtya'a, auche'e pu ayan tiraavijte'e nyej neyan rɨcɨ a'ini canu nyasaɨj neyan a'ij tirajtyau, silu aɨ pu ayan naata'a aɨjna tɨ yan nyaja'utaityaca'a. 17Ayaa pu yeehui te'eyu'usi'i aɨjna jetze ɨ nyuucari ɨ saj cɨn ti'ijta tɨ ayan nu'u ti'ivaɨre'e tɨ pua'a mahua'apua meyan ti'itɨj cɨn huataujxajta. 18Nyaa nu yeehui nyaɨn pueen saɨj ɨ nyej neyan ti'inxajta nyasaɨj. Ajta yeehui ɨ saɨj tɨ ayan tinyetyáxajta, aɨ pu aɨn pueen ɨ niya'upua tɨ iiyan nyaja'utaityaca'a. 19Matɨ'ɨj mi meyan tiraataihua'uri'i tɨcɨn: ―¿A'uni yeehui a'ij een tɨ aya'upua pueen? Jesús pu ayan tyu'utanyúu tɨcɨn: ―Caxu yeehui nyamua'ate a'atɨ nyaj pueen. Caxu sajta ramua'ate ɨ niya'upua. Tɨ pua'a seyan nyamua'atyaa, ayaa xu yeehui sajta ramua'ajcaa ɨ niya'upua. 20Ayaa pu tyu'utaxajtaca'a aɨjna ɨ Jesús tɨ'ɨj auj tihua'amua'atyajcaa aujna teyujta'a, ajna vejli'i a'u maj ya'asa'ɨri ɨ tumin. Ma majta ɨ tyaɨte, capu a'atɨ ayan raatyeevi'i a'ini capuu xɨ ajna tyaja'ure'enye aɨjna xɨcajra'a jetze tɨ jetzen Jesús huamɨ'ɨni. 21Ajtahua'a pu Jesús ayan tihua'uta'ixaa tɨcɨn: ―Nyaa nu yeehui nyaun a'ujnyejsin, sajta muan xu nyahuauni inyeetzi. Ajta, cai Dioj tyajamuaatauuni'ira. Muan xu cui'ini saɨjna cɨme'e saj autyajturaa ɨ Dioj jemi. Capu rɨ'ɨri saj saun a'ujnyén a'u nyaj a'ujnyejsin. 22Matɨ'ɨj mi meyan tityúrihua'uri'i aɨme ɨ mej maun ti'ijta teyujta'a tɨcɨn: ―¿A'ini yeehui huataujmua'a aɨjna ɨ nyuucari tɨ nu'u cai rɨ'ɨri tyaj tyaun a'ujnyén a'u tɨ nu'u a'ujnyejsin? ¿Ni qui ayan huataujmua'a tɨ aɨn huaujje'ica? 23Auche'e pu ayan tihue'ixaatya'acaa tɨcɨn: ―Muan xu hui yuucɨ pujme'en e'ema'acan. Nyajta inyaa, ute'e nu e'ema'acan. Muan xu yeehui hua'a jetze ajtyama'acan aɨme ɨ mej yan seijre'e iiyan chaanaca japua. Nyajta inyaa, canu neyan hua'a jetze ajtyama'acan. 24Ayaa nu hui neyan amuaata'ixaa tɨ pua'a cai ayan Dioj tyajamuaatauuni'ira, muan xu cui'ini saɨjna cɨme'e saj autyajturaa ɨ Dioj jemi. Tɨ pua'a yeehui sacai seyan tya'antzaahuate'en nyaj nyaɨn pɨrɨcɨ a'ij nyej ti'ixaj, muan xu xaa cui'ini saɨjna cɨme'e saj autyajturaa ɨ Dioj jemi. 25Matɨ'ɨj mi meyan tiraataihua'uri'i tɨcɨn: ―¿A'ataani yeehui paj pueen? Ajta Jesús pu ayan tihua'uta'ixaa tɨcɨn: ―Nyaa nu nyaɨn pueen ɨ nyaj neyan cɨme'en tyaja'amue'ixaatya'acaa tɨj na'a jajcua ɨmɨ tɨ yu e'ire'enye. 26Eihua nu neri ti'ixajtamɨ'ɨ muejmi cɨme'e, nyajta neyan nyaɨjna cɨn amuá'uxɨjte'en. Ma ajta aɨn tɨ yan nyaja'utaityaca'a, aɨ pu tzaahuati'ira'a cɨn ti'ixaxa'a. Nyajta nu hui neyan tihue'ixaate'e aɨme ɨ mej yan japuan seijre'e iiyan ɨ chaanaca japua a'ij nyej neyan raanamuajri'i nyaɨjna jemi tɨ yan nyaja'utaityaca'a. ―Ayaa pu tihua'uta'ixaa. 27Majta aɨme, camu yau'eitaa mua'araa a'ij tɨ tihue'ixaatya'acaa, tɨ ayan cɨme'en raxa tɨ ya'upuaara'an pueen. 28Aɨj pu cɨn Jesús ayan tihua'uta'ixaa tɨcɨn: ―Satɨ'ɨj yeehui aj nyaja'utavé'en inyeetzi i nyaj tyaata'a jetze e'irannyejte, aj xu si ramua'areeran a'atɨ nyaj pueen, sajta xu ramua'areeran nyaj cai nyasaɨj nyana'a a'ij tirajtyau a'ij nyej tyajamuaata'ixaa silu ayaa nu che'eta nyana'a ti'ixaxa'a a'ij tɨ niya'upua ayan tinaamua'ate. 29Aɨjna tɨ hui yan nyaja'utaityaca'a, aɨ pu nyeetzi jemi seijre'e. Capu ayan rusentacan naatyajtuaa a'ini ayaa nu yeehui tɨ'ɨj pɨna'a neyan ti'ijrɨ'ɨre a'ij tɨ tira'araanajchi. 30Majta aɨme ɨ tyaɨte, tɨ'ɨj Jesús auj ayan tihue'ixaatya'acaa, mui'itɨ mu meyan rá'antzaahua. 31Aj pu'i Jesús ayan tihua'uta'ixaa aɨme ɨ mej Israel jetze ajtyama'acan ɨ maj majta rá'antzaahua tɨcɨn: ―Tɨ pua'a hui seyan tya'utaviicue'i sej si seyan tira'ara'astijre'en a'ij nyej tyaja'amue'ixaate'e, aj xu xaa seyan á'ujhua'anya'a xa'aju'un inyeetzi jamuan. 32Muan xu sajta yeehui ramua'areeran saɨjna tɨ nain cɨn ayan ti'ayajna. Aɨj xu cɨn ruxaahua á'ujhua'anya'a xa'aju'un. 33Matɨ'ɨj mi meyan tiraata'ixaa tɨcɨn: ―Tyan tu yeehui Abraham tyaacan jetze e'iraanyej. Catu yeehui a'anaj seica jemi ca'anyejri cɨn tyu'utyavaɨ. Aɨj pu yeehui cɨn, ¿a'ini auj ti'irɨ'ɨri pej peyan ti'ita'ixaate'e tyaj nu'u taxaahua á'ujhua'anya'a ta'ara'ani? 34Jesús pu ayan tihua'uta'ixaa tɨcɨn: ―Ayaa nu yeehui tyaja'amue'ixaate'e tzaahuati'ira'a cɨme'e tɨ a'atɨ tɨ na'a tɨ ayan autya'ɨtza'ara'an ɨ Dioj jemi, aɨ pu ca'anyejri cɨn ti'imuare'e aɨjna jemi tɨ a'ij pua'a een. 35Ajta aɨn tɨ ca'anyejri cɨn tyaja'amuare'e a'u mej e'eche ɨ tyaɨtestyamua'ame'en aɨjna tɨ ti'iraijte'e, aɨ pu cai aun rusen cɨn huatyaturaasin aujna. Majta aɨn tɨ yaujra'an pueen, au pu yeehui huatyaturaasin para rusen cɨme'e. 36’Aɨj pu cɨn, tɨ pua'a neyan huarɨni inyaa, i nyaj nyajta yaujra'an pueen, nyej ni amue'irajtuaani sej si ruxaahua á'ujhua'anye'en, ayaa xu xaa nya'u ruxaahua a'uhua'anya'a xa'aju'un, tzɨte'e. 37Nyaa nu hui neyan ramua'aree saj saɨjna jetze e'iraanyej saɨjna ɨ Abraham tyaacan. Ma sajta muan, xu'uri seyan á'ujca'anye sej seyan naaje'ica saɨjna cɨme'e saj cai che'e ranamuajracu a'ij nyej tyaja'amue'ixaate'e. 38Ayaa nu nyaɨjna cɨn tyaja'amue'ixaate'e a'ij nyaj yeehui neri nyaun tyajá'useij ɨ niya'upua jemi. Sajta muan, ayaa xu che'eta sana'a ti'ijrɨ'ɨre a'ij saj sajta tiraanamuajri'i ɨ ruya'upua. 39Matɨ'ɨj mi meyan tyu'utanyúu tɨcɨn: ―Tyan tu yeehui rajya'upuaca'a tyaɨjna ɨ Abraham tyaacan. Aj pu'i Jesús ayan tihua'uta'ixaa tɨcɨn: ―Tɨ pua'a yeehui seyan yaujmua'ame'en pueenye'en aɨjna ɨ Abraham tyaacan, ayaa xu che'eta sana'a rɨ'ɨ titetyújchaɨ xa'aju'un a'ij tɨ aɨn ajta rɨ'ɨ ti'ityújchaɨca'a. 40Ayaa pu i eenya'a, xu'uri seyan tiraaxa'apɨ'ɨntarej saj naaje'ica. Capu yeehui ayan ti'ijrɨ'ɨrajcaa aɨjna ɨ Abraham tyaacan. Nyajta inyaa, nyaa nu nyaɨn pueen saɨj tɨ ayan tyajamuaata'ixaa aɨjna tɨ ayan ti'ayajna, ɨ nyaj nyajta neyan raanamuajri'i nyaɨjna jemi ɨ Dioj. 41Ayaa xu seyan a'ij pua'a titetyújchaɨ a'ij tɨ ajta rɨcɨ ɨ a'amuaya'upua. Matɨ'ɨj mi meyan tyu'utanyúu tɨcɨn: ―Catu yeehui huanu'eihuaca'a hua'a jetze ɨ mej rusaɨjtajma'acaa patɨj muaa. Saɨj pu'u yeehui aɨn pueen ɨ tyaj rajya'upua. Aɨ pu yeehui aɨn pueen ɨ Dioj. 42Aj pu'i Jesús ayan tihua'uta'ixaa tɨcɨn: ―Tɨ pua'a yeehui aɨn Dioj a'amuaya'upua pueenye'en, muan xu nyexe'eva'a xa'aju'un a'ini au nu a'uve'eme ɨ jemin. Canu yeehui nyasaɨj nyana'a neyan a'uve'eme silu aɨ pu yan nyaja'uta'ityaca'a. 43¿A'ini een cɨn sacai nyajau'eite a'ij nyej tyaja'amue'ixaate'e? Caxu xaa nya'u yau'eite a'ini sacai ahuaujca'anye saj ra'ancura'an a'ij nyej ti'ixa. 44Muan xu yeehui saɨjna jetze ajtyama'acan ɨ tiyaaru'u. Ai pu aɨn pueen ɨ a'amuaya'upua. Sajta muan, ayaa xu'u sana'a saɨjna cɨn seyan ra'astijre'e a'ij tɨ ti'ijxe'eve'e ɨ a'amuaya'upua. Tɨj na'a tɨ huataseijre ɨ tyaata'a tɨ yu e'ire'enye, aɨ pu yeehui ti'ityacui'ica. Capu a'anaj tzaahuati'ira'a cɨn tyu'utaxajtaca'a. Aɨ pu yeehui nain cɨn ti'ihue'itaca. Tɨj na'a tɨ ayan ti'ihue'i, aɨ pu jetzen e'iraninyei ɨ tzajta'an aɨjna tɨ hue'itzi pueen. Ayej xaa nya'u, ai pu aɨn pueen tɨ ti'ihue'itaca. Ajta tɨj na'a tɨ hue'itzi pueen, aɨj pu jetzen e'iraninyei. 45’Me nyajta inyaa, ayaa nu tzaahuati'ira'a cɨn ti'ixaxa'a. Aɨj xu cɨn, caxu yeehui na'atzaahuate'e. 46¿Ni saɨj muejmi jetze tɨ ajtyama'acan ayan ti'itɨj cɨn na'axɨjte'e aɨjna cɨme'e nyej ti'itɨj cɨn autyajturaa ɨ Dioj jemi? A'ini capu rɨ'ɨri sej seyan huarɨni, ayaa pu huataujmua'a nyej neyan tzaahuati'ira'a cɨn tyaja'amue'ixaate'e. Tɨ pua'a ayan, ¿a'ini yeehui een cɨme'e sacai na'atzaahuate'e? 47Ayaa nu tyaja'amue'ixaate'e. Aɨjna tɨ Dioj jetze ajtyama'acan ayan ra'astijre'e a'ij tɨ ti'ixaj ɨ Dioj. Sajta muan, ayaa xu een cɨn cai seyan ra'astijre'e saɨjna cɨme'e sacai Dioj jetze ajtyama'acan. 48Majta aɨme ɨ mej ti'ijta teyujta'a, ayaa mu tiraata'ixaa tɨcɨn: ―¿Ni yeehui cai ayan ti'ayajna a'ij tyej ti'ixaj pej peyan Samaariya e'ema'acan, ajta tiyaaru'u pu mueetzi tzajta'a seijre'e? 49Jesús pu ayan tihua'uta'ixaa tɨcɨn: ―Capu tiyaaru'u nyeetzi tzajta'a seijre'e silu nyaa nu rɨ'ɨ tirata'aca ɨ niya'upua. Sajta muan, ayaa xu majca'i núutache inyeetzi. 50Me nyajta inyaa, canu yeehui nyasaɨj nyana'a neyan rahuauhuau tɨ a'atɨ rɨ'ɨ tinaata'an, silu seij pu'u xaa ayan rahuauhuau. Ai pu yeehui aɨn pueen tɨ tzaahuati'ira'a cɨn ayan tiraaxa'apɨ'ɨntare'en. 51Ayaa nu tyaja'amue'ixaate'e tzaahuati'ira'a cɨme'e. Tɨ pua'a a'atɨ ayan ra'astijre'en a'ij nyej ti'ixaxa'a, capu yeehui a'anaj racɨ'ɨti tɨ huamɨ'ɨni. 52Cɨme'en mu'u meyan raanamuajri'i, aj mu mi meyan tyu'utaxajtaca'a tɨcɨn: ―Tu'uri yeehui ramua'aree tɨ ayan ti'ayajna tɨ tiyaaru'u pu mueetzi tzajta'a seijre'e. Aɨ pu yeehui Abraham huamɨ'ɨ, majta aɨme ɨ mej Dioj jetze ma'acan ti'ixaxa'ata'a. Ma pajta muaa, ayaa papu'u yeehui ti'ixa tɨ ayan nu'u, tɨ pua'a a'atɨ ayan ra'astijre'en a'ij pej ti'ixa, tɨ nu'u cai a'anaj mɨ'ɨni. 53¿Ni tzaa yeehui peyan eitze'e va'acan cɨn ti'ityejvee cai ɨ ti'itɨ tɨ cɨn ti'ityavaaca'a ɨ taya'upua ɨ Abraham? Aɨ pu yeehui xaa huamɨ'ɨ. Majta aɨme ɨ mej Dioj jetze ma'acan ti'ixaxa'ata'a, aɨ majta huacuii. Ari muaa, ¿a'ini peti'ixa a'ataani paj pɨrɨcɨ? 54Ajta aɨn Jesús, ayaa pu tihua'uta'ixaa tɨcɨn: ―Capu yeehui ti'itɨj vaɨre'e tɨ pua'a neyan nyasaɨj ahuantzaahua'ate'en. Ai pu aɨn pueen tɨ ayan rɨ'ɨ tinaata'aca ɨ niya'upua, aɨjna ɨ saj cɨme'en seyan ti'ixa yee aɨ pu a'amua Dioj pueen. 55Sajta muan, caxu yeehui ramua'ate. Me nyajta inyaa, nyaa nu xaa ramua'ate. Tɨ pua'a neyan tyaja'amue'ixaatya'a yee canu ramua'ate, ayaa nu tí'ihue'itaca satɨj muan. Me nyajta inyaa, nyaa nu xaa ramua'ate, nyajta neyan ra'astijre'e a'ij tɨ ti'ixaxa'a. 56Ajta yeehui aɨjna ɨ Abraham tɨ a'amuaya'upua pueen, aɨ pu huataujtyamua'ave aɨjna cɨme'e tɨ ayan tira'amitejtya'acaa tɨ ayan raaseij a'anaj xɨcajra'an nyaj jetzen nain cɨn antinmua'aréera. Aɨ pu xaa raaseij, ajta aɨjna cɨn huataujtyamua'ave. 57Majta aɨme ɨ maj Israel jetze ajtyama'acan, ayaa mu tiraata'ixaa tɨcɨn: ―¿Ni tzaa yeehui peyan raaseij paɨjna ɨ Abraham tyaacan? Capu a'ij ti'irɨ'ɨri a'ini capaj xɨ peyan hua'apuate japuan tamuaamuata'a ninye'ira'a rajcha'ɨ. 58Ajta ayan tihua'uta'ixaa aɨjna ɨ Jesús tɨcɨn: ―Ayaa nu tzaahuati'ira'a cɨn tyaja'amue'ixaate'e. Tɨ'ɨj cai xɨ Abraham huaseijre, nyaa nu neri seijra'acaa. 59Cɨme'en mu'u meyan raanamuajri'i, aj mu mi tetej titu'utu ɨ maj cɨn raatyatua'asixɨ'ɨn. Ajta aɨn Jesús huatauravaataca'a. Aj pu'i aun huirajraa aujna teyujta'a.

will be added

X\