San Juan 7

1Tɨj na'a ajna'ɨmɨ, au pu a'utyajturaa ɨ Jesús aujna u Galileeya. Capu che'e aun á'ucha'acanya'a u Judea a'ini aɨme ɨ mej Israel jetze ajtyama'acantaca'a ɨ mej aun e'echajca'a, ayaa mu raxe'eva'acaa maj raaje'ica. 2Pu'uri ajta vejli'itaca ajna matɨ'ɨj meyan ti'iyestyahua'a maɨjna cɨme'e maj ava'ɨnaamua'asin, ɨ mej Israel jetze ajtyama'acan. 3Matɨ'ɨj mi meyan tiraata'ixaa ɨ ihuaamua'ame'en ɨ Jesús tɨcɨn: ―Pata'aj hui peyan huiirajra'ani peyujna pej paun a'ura'ani aujna u Judea, mej mi aɨme ɨ maj mueetzi jamuan á'ujhua'an meyan raaseij a'ij paj rɨcɨ paɨjna cɨme'e tɨ hui huapɨ'ɨ ruxe'eve'e, ɨ maj cɨn ava'ujjɨ'ɨsivi'iraxɨ'ɨsin. 4Tɨ pua'a hui a'atɨ ayan raxe'eve'e mej mi me eijre'e meyan raamua'ati, capu ayan aviitzi cɨn ti'imuare'e. A'ini ayaa paj hui rɨcɨ paɨjna cɨme'e tɨ huapɨ'ɨ ruxe'eve'e, naa pu xa'apɨ'ɨn pej peyan a eijre'e huata'aseijrata hua'a jemi, matɨj mana'a pua'amua maj yan huachaatɨme iiyan chaanaca japua. ―Ayaa mu tiraata'ixaa. 5Majta aɨme ɨ maj ihuaamua'ame'en pueenya'a, camu majta rá'antzaahua maɨjna ɨ Jesús. 6Aj pu'i ayan tihua'uta'ixaa tɨcɨn: ―Capuu xɨ ajna tyaja'ure'enye tɨ huaxa'apɨ'ɨn inyeetzi jemi nyej ni nyaun a'utanyen. Aru muejmi jemi, a'anaj tɨ na'a pu ayan i'ixa'apɨ'ɨn. 7Capu hui a'atzu rɨ'ɨri mej amuajchaɨra'a ɨ maj yan huachaatɨme iiyan chaanaca japua. Ma majta xaa inyeetzi menyéjchaɨre'e maɨjna cɨme'e nyaj cai neyan a'ij pua'a tihua'axajta mej meyan a'ij pua'a titetyújchaɨ. 8Sata'aj saun a'ujnyén anna a'u maj tyejé'eyeste. Caxɨɨ nu a'uma'a na'ame inyaa nyej ni nyaun ijii tyaja'uva'amua'ariive'en a'ini capu xɨ ayan tyaja'ure'enye tɨ ari huaxa'apɨ'ɨn. 9Tɨ'ɨj ayan tihua'uta'ixaa, aj pu'i aun a'utyajturaa aujna u Galileeya. 10Ma ajta aɨn, ayaa pu huarɨj. Matɨ'ɨj a'ucɨj ɨ ihuaamua'ame'en mej mi maun tyajá'uyesten, aɨ pu ajta u á'umej. Capu ruseiirata u á'umej, silu aviitzi pu'u cɨn u á'umej. 11Majta maɨn ɨ mej maun tyeje'eyestyahua'a, aɨ mu rá'ixe'eri'iraca'a maɨjna ɨ Jesús. Meyan ti'ixaata tɨcɨn: ―¿A'uni a'ij een aɨjna ɨ a'atɨ? 12Eihua mu a'ij pua'a tí'ixajtacaa aɨjna cɨme'e ɨ Jesús hua'a tzajta'a ɨ tyaɨte ɨ maj maun e'etyujsaɨra'acaa. Seica mu meyan tí'ixajtacaa tɨcɨn: “Rɨ'ɨ pu ti'itevi.” Majta seica meyan tí'ixajtacaa tɨcɨn: “Capu a'atzu. Aɨ pu hui hua'acuanamua ɨ tyaɨte.” 13Majta, capu a'atɨ ayan á'ujca'anyajca'a tɨ ayan ruseiirata tyu'utaxajta aɨjna cɨme'e ɨ Jesús a'ini mahua'atzɨɨnya'acaa aɨme ɨ mej ti'itɨj cɨn antyujmua'areeraca'a aɨme jemi ɨ mej Israel jetze ajtyama'acan. 14Matɨ'ɨj meri e'ita'a ujú'uncaa ɨ maj ti'iyestyahua'a, aj pu'i Jesús aun a'utyajrupi teyujta'a. Tɨ'ɨqui autyejche tɨ tihua'amua'aten ɨ tyaɨte. 15Eecan mu rɨ'ɨ tira'utaseij aɨme ɨ mej maun ti'ijta teyujta'a. Ayaa mu tyu'urixaatya'acaa tɨcɨn: ―¿A'ini ti'irɨ'ɨri tɨ aɨn cai a'anaj ti'ihuaujmua'ate, aɨ pu raayɨ'ɨtɨ tɨ ayan tihua'umua'aten? 16Jesús pu ayan tihua'uta'ixaa tɨcɨn: ―Canu a'ij tirajtyau nyasaɨj a'ij nyej tihua'amua'aten silu aɨ pu ayan tinaata'a aɨjna tɨ ya nyaja'utaityaca'a. 17Tɨ pua'a hui a'atɨ ayan á'ujca'anye tɨ ayan huarɨni a'ij tɨ ti'ijxe'eve'e ɨ Dioj, aɨ pu xaa ayan ramua'areeran tɨ pua'a Dioj ayan naata'a nyej neyan ti'imua'ata ca'ɨn nyasaɨj nyana'a a'ij tirajtyau. 18Aɨjna tɨ ayan ti'ixaxa'a a'ij tɨ aɨn na'a tirajtyau rusaɨj, ayaa pu een cɨn ayan rɨcɨ tɨ ij rɨ'ɨ tyu'utaura'an rusaɨj. Me nyajta inyaa, ayaa nu nyaɨjna cɨn ti'imuare'e nyej ni neyan rɨ'ɨ tiraata'an nyaɨjna tɨ yan nyaja'utaityaca'a. Tɨ pua'a hui a'atɨ ayan á'ujca'anye tɨ ayan huarɨni a'ij tɨ ti'ijxe'eve'e ɨ Dioj, aɨ pu xaa ayan ramua'areeran tɨ pua'a Dioj ayan tinaata'a nyej neyan ti'imua'ata ca'ɨn nyasaɨj nyana'a a'ij tirajtyau. 19’¿Ni cai aɨn Moisés tyaacan ayan amuaatyajtuaa aɨjna ɨ nyuucari ɨ maj cɨn ti'ijta? Aa ni'ijta nya'u. Ma sajta muan, capu a'atɨ tɨ muejmi jetze ajtyama'acan ayan aráurasten a'ij tɨ aɨn nyuucari ti'ixa. ¿A'ini een cɨme'e seyan ti'ijxe'eve'e saj naaje'ica? 20Majta aɨme ɨ maj maun ajtyáxɨɨraca'a, ayaa mu tityaatanyú tɨcɨn: ―Tiyaaru'u pu mueetzi tzajta'a seijre'e. ¿A'ataani hui ayan ti'ijxe'eve'e tɨ'ij muaaje'ica? 21Aj pu'i Jesús ayan tihua'uta'ixaa tɨcɨn: ―Seij nu'u cɨn neyan huarɨj tɨ ayan huapɨ'ɨ ruxé'eva'acaa. Ajta aɨn amuaatyejtyau naijmi'ica. Eecan xu ava'ujjɨ'ɨsivi'iraxɨ. 22Ma sajta muan, ayaa xu ti'ijrɨ'ɨre saɨjna cɨme'e tɨ Moisés tyaacan ayan amuaataij saj nu'u ra'antisijchixɨ'ɨn ɨ naviira'an. Ee xaa, capu Moisés tyaacan jetze huanyej, silu Dioj pu ayan raatyajtuaa aɨme jemi ɨ á'amuaya'upuacɨ'ɨstyamua'a. Aɨj xu cɨn seyan ra'antisi'iche ɨ naviira'an ɨ unyaaca'i tɨ tyaata'a sajna xɨcajra'an saj jetzen rusa'upi. 23Ayaa xu een cɨn ti'ijrɨ'ɨre sej si cai autya'ɨtzen saɨjna jemi ɨ nyuucari tɨ Moisés tyaacan raatyajtuaa. Tɨ pua'a ayan een, a'ini een cɨn sij nínyu'ucacu inyeetzi jemi saɨjna cɨme'e nyej neyan nain cɨn raarujte seij ɨ a'atɨ nyajna xɨcajra'a saj jetzen rusa'upi. 24Xaatapuá'ajta sej seyan tihua'axɨjte'e a'ij tɨ tyajamua'amitejte'e. Ma sajta muan, ayaa xu huarɨni sej si seyan tihua'uxɨjte'en a'ij tɨ tiraavijte'e tzaahuati'ira'a cɨme'e. 25Cɨme'en pu'u ayan tiraataxajtaca'a, aj mu mi seica meyan autyajhuii mej ti'ihuáurihua'u. Meyan tɨcɨn: ―¿Ni cai aɨn pueen ɨ maj meyan cɨme'en ti'ityese'e maj raaje'ica? 26Yaa pu hui eijre'e huatyavaa tihue'ixaate'e. Ma majta, camu a'ij ti'ijee. ¿Ni qui meri meyan raamuá'a tɨcɨn: “Ai pu aɨn pueen ɨ Cɨriistu'u”? 27Me tyajta ityan, tyan tu hui ramua'aree a'u tɨ e'ema'acan tyaɨjta ɨ a'atɨ. Ma ajta aɨn ɨ Cɨriistu'u, tɨ'ɨj aɨn ya uvé'enyen, capu a'atɨ ramua'areeran a'u tɨ e'ema'acan aɨjna. ―Ayaa mu tí'ixajtacaa. 28Ajta aɨn Jesús, auche'e pu tihua'amua'atyajcaa u teyujta'a. Aj pu'i ayan ca'anin cɨn tyu'utaxajtaca'a tɨcɨn: ―Ee xaa nya'u, ayaa pu hui ti'ayajna saj nyamua'ate, sajta seyan ramua'aree a'u nyaj e'ema'acan. Canu nyasaɨj nyana'a ya va'acaanye silu tɨ ya nyaja'utaityaca'a, aɨ pu nain cɨn ayan ti'ijrɨ'ɨre. Capu ti'ihue'itzi ɨ jemin. Ma sajta muan, caxu ramua'ate a'ini caxu ra'astijre'e. 29Me nyajta inyaa, nyaa nu xaa ramua'ate a'ini au nu e'ema'acan ɨ jemin. Aɨ pu hui ajta yan nyaja'utaityaca'a. 30Cɨme'en pu'u ayan tyu'utaxajtaca'a, aj mu mi meyan tyu'utatése maj raatyeevi'i. Ma ajta, capu a'atɨ ayan raatyeevi'i a'ini capuu xɨ ajna tyaja'ure'enye ajna tɨ jetzen huaxa'apɨ'ɨntari'ihuaca'a tɨ ayan huamɨ'ɨni. 31Majta aɨme ɨ mej jemin e'etyujsaɨ, mui'itɨ mu meyan rá'antzaahua. Ayaa mu tyu'utaxajtaca'a tɨcɨn: ―Tɨ'ɨj ya uvé'enyen aɨjna ɨ Cɨriistu'u Dioj tɨ ra'antihuau, ¿ni qui eitze'e ayan aɨjna cɨn rɨni tɨ huapɨ'ɨ ruxe'eve'e cai amɨjna mɨ a'atɨ? 32Majta aɨme ɨ fariseos, ayaa mu tyu'unamuajri'i aɨme ɨ tyaɨte mej meyan xahuaani'i mu cɨn tyu'urixaate'e. Matɨ'ɨj mi aɨme ɨ mej ti'ijta u teyujta'a, majta aɨme ɨ fariseos, aɨ mu seica huataityaca'a aɨme ɨ maj maun tí'icha'ɨ mej mi raatyeevi'in. 33Aj pu'i Jesús ayan tihua'uta'ixaa tɨcɨn: ―Canu che'e a'ateeren muejmi jemi a'ini pu'uri vejli'i nyej ni nyaun a'ujnyén nyaɨjna jemi tɨ yan nyaja'utaityaca'a. 34Muan xu nyahuauni, aru caxu me'e nyeje'etyauni. Ajta, capu rɨ'ɨrista a'ame saj saun a'ujnyén a'u nyaj a'ij eenya'a na'ame. 35Majta aɨme ɨ mej maun ti'ijta teyujta'a, ayaa mu tyu'urihua'uraca'a tɨcɨn: ―¿A'uqui hui a'uméj a'u tɨ cai rɨ'ɨri tyej teyan yá'utyauni? ¿Ni qui aun seij chuejra'a japua a'uméj hua'a jemi ɨ tyaɨte ɨ maj a'ucɨ́jxɨ hua'a tzajta'a aɨme ɨ maj Grecia e'ema'acan? ¿Ni qui hui ajta ayan tihua'amua'aten aɨme ɨ mej Grecia e'ema'acan? 36¿A'iqui huataujmua'a aɨjna ɨ nyuucari tɨ cɨn tyaj nu'u rahuauni, tyajta nu'u cai ratyauni, tɨ ajta nu'u cai rɨ'ɨri tyaj aun a'uju'un a'u tɨ a'ij eenya'a a'ame? ―Ayaa mu tyu'urihua'uraca'a. 37Tɨ'ɨj ari te'entipuá'arijma'aca ɨ mej ti'iyeste, ajna xɨcajra'an tɨ eitze'e ruxe'eva'acaa ɨ maj maɨjna jetze ti'iyestyahua'a, aj pu'i Jesús ayan huatyeechaxɨ hua'a tzajta'a. Aj pu'i ayan ca'anin cɨn tyu'utaxajtaca'a tɨcɨn: ―Tɨ pua'a hui a'atɨ ayan ruxaamɨstya'a aɨjna cɨme'e tɨ cai uraré'enya'a cɨn huatyajturaa ɨ Dioj jemi, che'e aɨn ayan ve'ere'enyen inyeetzi jemi nyej ni nyeyan ca'anijra'a tiraata'an. 38Ayaa pu che'eta na'a raruuren aɨjna ɨ a'atɨ tɨ ayan na'ara'astijre'esin inyeetzi a'ij tɨ te'eyu'usi'i ɨ yu'uxari jetze tɨcɨn: “Aɨj pu jetzen e'iraninyei ɨ tzajta'an tyamua'a naa aɨjna ɨ jaj tɨ jetzen araujca'anyen aɨjna ɨ tɨ cɨn ruuri a'ame. Ayej seiira'a a'ame tɨj jetzen a'irámɨ'ɨye ɨ jaj.” ―Ayaa pu tihua'uta'ixaa. 39Aɨjna ɨ nyuucari tɨcɨn “jaj”, ayaa pu huataujmua'a tɨcɨn: ɨ xaijnyu'ucara'ara'an ɨ Dioj, ɨ tɨ Dioj raatyajtuaaniiche'e hua'a tzajta'a aɨme ɨ mej rá'antzaahua. Ayaa pu aɨjna cɨn tyu'utaxajtaca'a aɨjna ɨ Jesús a'ini capu xɨ a'ahua'aca'a aɨjna ɨ xaijnyu'ucara'ara'an ɨ Dioj, aɨjna cɨme'e tɨ aɨn Jesús cai xɨ a'ujnyéj u ute'e tɨ ij Dioj ayan an ya'acájrati ɨ ɨpuari japua. 40Cɨme'en mu'u meyan raanamuajri'i tɨ ayan tyu'utaxajtaca'a, aj mu mi meyan tyu'utaxajtaca'a seica ɨ tyaɨte tɨcɨn: ―Ayej hui xaa nya'u ti'ayajna tɨ aɨn pueen tɨ ayan ti'ixaxa'a ɨ Dioj jetze ma'acan, ɨ tyaj teyan rachu'eve'e. 41Majta seica mu meyan tyu'utaxajtaca'a tɨcɨn: ―Ai pu hui ain i'i pɨrɨcɨ tɨ i'i Cɨriistu'u. Majta seica meyan tyu'urihua'uracaa tɨcɨn: ―¿A'ini hui ti'irɨ'ɨri tɨ aɨn Cɨriistu'u ayan aun e'ema'acanta u Galileeya? 42¿Ni cai ayan te'eyu'usi'i ɨ yu'uxari jetze tɨ nu'u aɨn Cɨriistu'u ayan e'iraujnyejte'esin aɨjna jetze ɨ tyaɨtestyamua'ame'en ɨ David tyaacan? Ajta nu'u tɨ aun e'ema'acanta a'ame aujna u Belén, a'u tɨ aɨn David tyaacan e'echajca'a. ―Ayaa mu tyu'utaxajtaca'a. 43Aɨj mu cɨn e'ita'a a'utacɨj ɨ tyaɨte maɨjna cɨme'e ɨ Jesús. Seica mu saɨque tí'ixajtacaa. Majta seica saɨque. 44Seica mu meyan raxe'eva'acaa mej meyan raatyeevi'i. Ma ajta, capu a'atɨ ahuaujca'anye tɨ rajví'i. 45Matɨ'ɨj mi aɨme ɨ mej tí'icha'ɨ u teyujta'a, au mu a'uré'enye hua'a jemi ɨ maj maun ti'ijta u teyujta'a, majta ɨ fariseos jemi. Matɨ'ɨj meyan tihua'utaihua'uri'i tɨcɨn: ―¿A'ini een cɨn sacai ya'araavi'itɨ? 46Majta aɨme ɨ mej ti'icha'ɨve, ayaa mu tihua'uta'ixaa tɨcɨn: ―Capu hui a'atɨ ayan ti'ixaxa'a tɨj amɨn ti'ixaxa'a. 47Ayaa mu tyu'utanyúu aɨme ɨ fariseos tɨcɨn: ―¿Ni ajta ari ayan amuaacuanamua muejmi? 48¿Ni cai seij tɨ ti'itaijte'e ari rá'antzaahua aɨjna, na'ari seij tɨ tyejmi jetze ajtyama'acan i tyej fariseos pueen? 49Majta ɨ tyaɨte ɨ maj maun e'etyújsaɨra'acaa, camu a'atzu yau'eite a'ij tɨ te'eyu'usi'i aɨjna jetze ɨ nyuucari Moisés tyaacan tɨ raatyajtuaa. Dioj pu ari hua'uxɨjte amɨme. ―Ayaa mu tyu'utaxajtaca'a aɨme ɨ fariseos. 50Ajta aɨn Nicodemo, aɨjna tɨ ari ɨ Jesús jemi a'atányajca'a, tɨj ajta seij pueenya'a tɨ hua'a jetze ajtyama'acan, ayaa pu tihua'uta'ixaa tɨcɨn: 51―Capu ayan tiraavijte'e tej teyan ra'uxɨ́jte'en tɨ'ij pueijtzi raacɨ'ɨti. Ayaa pu tya'axa ɨ yu'uxari jetze ɨ tyaj cɨn ti'ijta tɨ ayan nu'u ruxe'eve'e tyej nu'u tiráihua'u anacaiican cɨn tyaɨjna ɨ a'atɨ tyej ti raamua'aree a'ij tɨ ti'itɨj cɨn rɨcɨ. ¿Ni cai ayan ti'ayajna? 52Matɨ'ɨj mi meyan tiraata'ixaa tɨcɨn: ―¿Ni hui muaa pa pajta paun e'ema'acan u Galileeya? Auhuauchi ɨ yu'uxari jetze pej pi peyan raamua'aree tɨ cai a'atɨ aun e'ema'acan u Galileeya tɨ Dioj jetze ma'acan ti'ixaxa'a. 53Ayaa mu tyu'utaxajtaca'a. Matɨ'ɨj mi a'ucɨ́jxɨ a'u tɨ seij e'eche.

will be added

X\