San Juan 6

1A'atzu a'ateevi'i, tɨ'ɨqui Jesús aun u jetze pujme'en antaraa ɨ jaj japua tɨ ayan tyaja'arajtyahuaa tɨcɨn Galileeya. Ayaa pu ajta tyaja'arajtyahuaa tɨcɨn Tiberias. 2Eihua mu tyaɨte a'ucɨj jamuan a'ini mu'uri raaseij maɨjna tɨ huapɨ'ɨ ruxe'eve'e tɨ ayan tihua'uhuaa aɨme ɨ mej tí'icucui'icaa. 3Aj pu'i Jesús anna a'ujnyéj jɨri japua. An pu a'utayeijxɨ, majta aɨme ɨ maj jamuan á'ujhua'anya'a. 4Pu'uri vejli'itaca ajna xɨcajra'an mej jetzen ti'iyestyahua'a maɨjna cɨme'e tɨ Dioj hue'irajtuaa aɨme ɨ mej Israel jetze ajtyama'acantaca'a. 5Tɨ'ɨqui Jesús ayan huanyéerajraa. Tɨ'ɨj i hua'useij maj a'ava'aju'uncaa ɨ tyaɨte. Aj pu'i Jesús aɨn Felipe ayan tyu'utaihua'uri'i tɨcɨn: ―¿A'uni tyeya'ananan ɨ pan ɨ maj racua'ani aɨme ɨ tyaɨte? 6Pu'uri ramua'areeraca'a ɨ Jesús a'ij tɨ rɨni. Ma ajta, ayaa pu een cɨn raataihua'uri'i ɨ Felipe tɨ ij ayan raaseij a'ij tɨ rɨni. 7Felipe pu ayan tyu'utanyúu tɨcɨn: ―Tɨ pua'a teyan ti'ituava'a a'achu maj ramue'itɨjca arahueica maxcɨra'i cɨme'e, capu aɨ na'a cɨ'ɨpe tyej ti pan huananan tej ti naijmi'ica tyu'umín. 8- 9Aj pu'i seij tɨ jamuan á'ucha'acanya'a, aɨjna ɨ Andrés tɨ juutzajra'an pueen ɨ Simón, aɨ pu ayan tyu'utaxajtaca'a tɨcɨn: ―Yaa pu pa'arɨ'ɨ huatyejvee. Anxɨvica pu hui pan ticha'ɨ, ajta hua'apuaca ɨ hue'ité. Ma ajta, capu a'atzu cɨ'ɨpe mej mi naimi'i tyu'ucua'ani. 10Jesús pu ayan tihua'uta'ixaa tɨcɨn: ―Sata'aj hua'utaijte'en ɨ tyaɨte maj a'ujrá'asixɨ'ɨn. Ayaa pu een cɨn ayan raataxajtaca'a a'ini eihua pu hua'ɨxaata'acaa aujna. Majta aɨme ɨ tyetyaca, au mu a'uráasajraa. Ayaa mu ara'asijma'a a'achu cumu anxɨj vi'ira'a meyee majta meyee. 11Aj pu'i Jesús ra'ancuraɨ'ɨpɨ'ɨ ɨ pan. Ajta rɨ'ɨ tiraatataujtzi'ire ɨ Dioj jemi. Ajta hua'uraɨ'ɨpɨ'ɨ aɨme ɨ mej a'ucaitɨma'acaa a'achu tɨ seij raxe'eva'acaa. Ayaa pu che'eta na'a hua'uraɨ'ɨpɨ'ɨ ɨ hue'ite. 12Matɨ'ɨj ruxaahua tyu'ucuaa, ayaa pu tihua'uta'ixaa aɨme ɨ maj jamuan á'ujhua'anya'a tɨcɨn: ―Sata'aj raaraɨ'ɨpɨ'ɨn ɨ tɨ ava'aturaa. Che'e cai ti'itɨ a'uvaɨ'ɨtzɨ'ɨn. 13Matɨ'ɨj mi raaraɨ'ɨpɨ. Ayaa mu tya'ava'ɨstya'axɨ ɨ sicɨri jetze aɨjna ɨ pan tɨ ava'aturaa mej tyu'ucuaa. 14Majta aɨme ɨ tyaɨte, matɨ'ɨj meyan raaseij maɨjna ɨ Jesús tɨ ayan huarɨj, ayaa mu tyu'utaxajtaca'a tɨcɨn: ―Ayej xaa nya'u ti'ayajna, amɨ pu hui aɨn pueen aɨjna tɨ Dioj jetze ma'acan ti'ixaxa'a, tɨ ayan ya nu'u uve'enyejsin iiyan chaanaca japua. 15Ajta aɨn Jesús, ayaa pu rú'umua'areeracaa ɨ rutzajta'a mej meyan raaxa'apɨ'ɨntare maj e'ire'enyejsin mej mi ca'anyejri cɨn tiraijcate'en tɨ aɨn te'entyarute ɨ rey cɨme'e. Aɨj pu cɨn, ayan ajtáraa. Au pu jɨri japua a'ujnyéj rusaɨj. 16Tɨ'ɨj huara'acáanajma'aca, au mu a'ucáanye a'utɨ a'avastɨmee ɨ jaj aɨme ɨ maj Jesús jamuan á'ujhua'anya'a. 17Au mu baarcu jetze atyaacɨ. Matɨ'ɨj mi antacɨj u jetze pujme'en u Capernaum. Pu'uri huará'atɨca'arijma'a. Ajta aɨn Jesús, capu ma'ahua'acaa. 18Ca'anin pu cɨn hua'aacaca'a. Ajta pu'uri a'ujruurajca'a ɨ jaj. 19Matɨ'ɨj auju'uncaa a'achu anxɨ, o arájsevi kiloometro, matɨ'ɨj mi raaseij tɨ e'eve'ema'acaa aɨjna ɨ Jesús. Jaj japua pu huama'acaa. Eecan mu tyu'utatzɨn. 20Aj pu'i ayan tihua'uta'ixaa tɨcɨn: ―Nyaa nu aɨn pueen. Caxu ti'itzɨɨnya'a. 21Matɨ'ɨj mi meyan huatyaujca'ane mej mi meyan ra'atyajtuaani ɨ baarcu jetze. Camu a'achu a'ateevi'i maun a'utanye ajna a'u maj á'uju'uncaa. 22Majta aɨme ɨ tyaɨte ɨ maj aun u jetze pujme'en e'etyujsaɨ ɨ Jesús jemi, aɨ mu aun a'utyajturaa. Yaa ruijmua'a yee, ayaa pu tihua'amityejtya'acaa tɨ saɨj na'a a'acáva'acaa ɨ baarcu, ajta tɨ aɨn Jesús cai aɨjna jetze atyajraa hua'a jamuan ɨ maj jamuan á'ujhua'anya'a, silu rujɨɨmua'a mu'u antacɨj. 23Matɨ'ɨj mi seica maun újhuiixɨ ɨ baarcu ajna vejli'i a'u maj tyaja'ucuaa ɨ tyaɨte tɨ'ɨj Jesús rɨ'ɨ tiraata'a ɨ Dioj. Au pu e'ema'acan ɨ baarcu, chajta'a tɨ ayan tyaja'arajtyahuaa tɨcɨn Tiberias. 24Matɨ'ɨj mi aɨme tyaɨte meyan raamua'areeri'i tɨ nu'u cai ajta aun a'ucatii u Tiberias aɨjna ɨ Jesús, majta aɨme ɨ maj jamuan á'ujhua'anya'a. Matɨ'ɨj mi maɨjna jetze u huatyaacɨjxɨ aɨjna jetze ɨ baarcu tɨ ti'imui'i. Seica mu atyaacɨjxɨ seij jetze, majtahua'a ɨ seica, seij jetze mu mijta atyaacɨ, mej mi maun a'atanyén u Capernaum, mej mi maun raahuauni maɨjna ɨ Jesús. 25Matɨ'ɨj ráatyau maujna u jetze pujme'en a'alaguun jetze, aj mu mi meyan tiraataihua'uri'i tɨcɨn: ―Rabí, ¿a'anajni ya para'a peyujna? 26Jesús pu ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e. Caxu saɨjna cɨn nyahuauhuau saɨjna cɨn saj tyu'useij a'ij nyej huarɨj ɨ saj cɨn ava'ujjɨ'ɨsivi'iraxɨ'ɨn silu ayaa xu een cɨn nyahuauhuau saɨjna cɨme'e saj raacuaa saɨjna ɨ pan, sajta saj tyamua'a naa tityáaju'uxai. 27Caxu seyan sana'a tyu'umuare'en sej si saɨjna huamué'itɨn ɨ cue'ira tɨ a'uvaɨjtzi silu sata'aj seyan tyu'umuare'en sej si saɨjna huamué'itɨn ɨ saj cɨn huataujvaɨre'en tɨj na'a rusen cɨme'e. Nyajta inyaa, i nyaj nyajta tyaata'a jetze e'irannyejte, nyaa nu nyaɨjna amuaata'asin a'ini aɨn Dioj tɨ niya'upua pueen, aɨ pu aɨjna cɨn tinyeijca. 28Matɨ'ɨj mi meyan tiraataihua'uri'i tɨcɨn: ―¿Ti'itajni hui ruxe'eve'e tej teyan tyaɨjna cɨn huarɨni a'ij tɨ ti'ijxe'eve'e ɨ Dioj? 29Jesús pu ayan tyu'utanyúu tɨcɨn: ―Ayaa pu ti'ijxe'eve'e ɨ Dioj saj seyan na'antzaahuate'en inyeetzi tɨ Dioj nyaja'utaityaca'a. 30Matɨ'ɨj mi meyan tiraataihua'uri'i tɨcɨn: ―¿Ti'itajni cɨn peyan rɨcɨ tɨ huapɨ'ɨ ruxe'eve'e tyej ti teyan raaseij, tyej ti tyaɨjna cɨn mua'antzaahuate'en? ¿A'ini pej pi peyan rɨcɨ? 31Tavaujsimua'acɨ'ɨ mu meyan raacuaa maɨjna tɨ jee maná pueen maujna a'u tɨ cai e'eti'itɨjcaa. Ayaa pu te'eyu'usi'i tɨcɨn: “Aɨ pu nu'u hua'uta'a maj maɨjna huacua'ani ɨ cue'ira tɨ nu'u ute'e e'ema'acan.” 32Jesús pu ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e tɨ cai aɨn pueen ɨ Moisés tyaacan tɨ ayan hua'uta'a aɨme a'amuaya'upuacɨ'ɨstyamua'a maj raacua'ani ɨ cue'ira tɨ ute'e e'ema'acan. Capu xaa nya'u, silu niya'upua pu ayan amuaata'asin sej si huataujvaɨre'en saɨjna cɨme'e ɨ cue'ira tɨ tzaahuati'ira'a cɨn ute'e e'ema'acan. 33A'ini nyaa nu aɨn pueen ɨ cue'ira tɨ Dioj jemi e'ema'acan, nyeetzi pu jemi ajta e'ema'acan. Nyaa nu ute'e e'icaanye nyej ni hua'uta'an maj ruuri mua'ara'ani tɨj na'a rusen cɨme'e matɨj mana'a pua'amua yan huachaatɨme iiyan chaanaca japua. 34Matɨ'ɨj mi meyan tiraata'ixaa tɨcɨn: ―Tavastara'a, pata'aj peyan taata'an paɨjna ɨ cue'ira tɨj na'a tɨ yu auca'itɨ a'ame. 35Aj pu'i Jesús ayan tihua'uta'ixaa tɨcɨn: ―Nyaa nu aɨn pueen ɨ tɨ jetzen e'ema'acan ɨ cue'ira ɨ maj cɨn huataujvaɨre'en mej mi ruuri mua'ara'ani tɨj na'a rusen cɨme'e. A'atɨ tɨ na'a tɨ nyeetzi jemi ve'ere'enyen, capu a'anaj i'icuata a'ame. Ajta, a'atɨ tɨ na'a tɨ ayan na'ara'astijre'en inyeetzi, capu ajta a'anaj huata'imɨ, silu Dioj pu rusen cɨn raata'asin. 36’Nyajta inyaa, ayaa nu neri tyajamuaata'ixaa saj seri nyeseij inyeetzi. Ma sajta muan, caxu tya'atzaahuate'e. 37Matɨj mana'a pua'amua ɨ tɨ Dioj naatatuire'esin, aɨme mu ve'ere'enyejsin inyeetzi jemi. Ajta tɨ pua'a a'atɨ ayan nyeetzi jemi ve'ere'enyen, canu a'anaj raara'iti. 38’Canu nyaɨjna cɨn mu a'uve'eme nyej ni neyan huarɨni a'ij nyaj nyasaɨj nyana'a ti'ijxe'eve'e silu nyej ni neyan huarɨni a'ij tɨ ti'ijxe'eve'e aɨjna tɨ yan nyaja'utaityaca'a. 39Ajta, ayaa pu ti'ijxe'eve'e aɨjna tɨ yan nyaja'utaityaca'a tɨ cai seij a'uveti aɨme ɨ mej ve'ere'enye inyeetzi jemi silu nyej ni naijmi'ica japua huanyuuni ajna xɨcajra'an tɨ jetzen nain cɨn te'entipua'ari. 40’Ee xaa nya'u, ayaa pu ti'ijxe'eve'e ɨ niya'upua tɨ ayan tiraacɨ'ɨti tɨ ruurican cɨn huatyaturan tɨj na'a rusen cɨme'e a'atɨ tɨ na'a tɨ ayan tira'amitejte'e a'atɨ nyaj pɨrɨcɨ, ajta ayan na'astijra'a inyeetzi. Nyajta inyaa, ayaa nu ra'ajjájsin huá'a tzajta'a ɨ mej meri huacuii ajna xɨcajra'an tɨ jetzen nain cɨn te'entipua'ari. 41Majta aɨme ɨ maj Israel jetze ajtyama'acan, matɨ'ɨj mi autyajhuii maj runyuuste'e rujɨɨmua'a maɨjna cɨme'e tɨ Jesús ayan tyu'utaxajtaca'a tɨ nu'u aɨn pueen ɨ cue'ira tɨ ute'e e'icaanye. 42Ayaa mu tyu'utaxajtaca'a tɨcɨn: ―¿Ni cai aɨn pueen ɨ Jesús tɨ ajta yaujra'an pueen aɨjna ɨ José? ¿Ni qui tyacai hua'amuajte ɨ taatajra'an, ajta ɨ naanajra'an? A'ini tijta nya'u. Aɨj pu cɨn, ¿a'ini ti'irɨ'ɨri tɨ aɨn ayan ti'ixajta tɨ nu'u ute'e e'icaanye? 43Aj pu'i Jesús ayan tyu'utanyúu tɨcɨn: ―Caxu hui seyan che'e runyuustya'a. 44Capu rɨ'ɨri tɨ a'atɨ ayan ve'ere'enyen inyeetzi jemi tɨ pua'a cai Dioj anacai ca'anijra'a raata'an tɨ ij ayan huarɨni. Nyajta nu neyan ra'ajjájsin hua'a tzajta'a ɨ mej meri huacuii ajna xɨcajra'a tɨ jetzen nain cɨn te'entipua'ari. 45’Ayaa mu tira'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan tɨcɨn: “Dioj pu nu'u ayan tihua'amua'aten naijmi'ica.” A'atɨ tɨ na'a tɨ ayan ranamua ɨ rutzajta'a a'ij tɨ ti'ixa ɨ niya'upua, ajta tɨ ayan raaruuren a'ij tɨ aɨn ti'ijxe'eve'e, aɨ pu ayan ve'ere'enyejsin inyeetzi jemi. 46’Capu ayan huataujmua'a tɨ a'atɨ ari raaseij aɨjna ɨ niya'upua silu inyaa, i nyaj nyaun a'uve'eme a'u tɨ aɨn e'eseijre'e, nyaa nu neri raaseij ɨ niya'upua. 47Ayaa nu tyaja'amue'ixaate'e tzaahuati'ira'a cɨme'e tɨ a'atɨ tɨ na'a tɨ ayan tya'antzaahuate'en a'ij nyej ti'ixa, aɨ pu ruurican cɨn huatyaturaasin tɨj na'a rusen cɨme'e. 48Nyaa nu nyaɨn pueen ɨ cue'ira tɨ jetzen e'iraninyei ɨ maj cɨn ruuri mua'ara'ani tɨj na'a rusen cɨme'e. 49’A'amuahuaacɨxa'astyamua'acɨ'ɨ meyan raacuaa maɨjna ɨ maná aujna a'ahua'a a'u tɨ cai e'eti'itɨjcaa. Majta e'eyan mu huacuii. 50Ma ajta, ya pu seijre'e aɨjna ɨ cue'ira tɨ ute'e e'icaanye. Tɨ pua'a a'atɨ ayan raacua'ani aɨjna, capu a'anaj mɨ'ɨni. 51Nyaa nu nyaɨn pueen aɨjna ɨ cue'ira tɨ ute'e e'icaanye, tɨ jetzen a'iráninyei ɨ maj cɨn ruuri mua'ara'ani. Tɨ pua'a a'atɨ ayan raacua'ani aɨjna ɨ cue'ira, aɨ pu ruurican cɨn huatyaturaasin tɨj na'a rusen cɨme'e. Ajta, aɨjna ɨ cue'ira, ai pu aɨn pueen ɨ nyaj ratyáhue'ira'a, ɨ nyaj nyajta ratámuaɨ'ɨvajta hua'a jetze ma'acan matɨj mana'a maj yan huachaatɨme iiyan chaanaca japua mej mi ruuri mua'ara'ani tɨj na'a rusen cɨme'e. ―Ayaa pu tihua'uta'ixaa aɨjna ɨ Jesús. 52Majta aɨme ɨ mej Israel jetze ajtyama'acan, ca'anin mu cɨn autyajhuii mej tihuaurixaate'en. Meyan tɨcɨn: ―¿A'ini ti'irɨ'ɨri tɨ aɨn a'atɨ ayan nu'u ruhue'ira'a taamin? 53Aj pu i Jesús, ayan tihua'uta'ixaa tɨcɨn: ―Ayaa nu tyajamuaata'ixaate'esin. Tɨ pua'a sacai raacua'ani i nyahue'ira'a, i nyaj nyajta tyaata'a jetze e'irannyejte, ajta tɨ pua'a sacai raaye'en i nyaxuure'e, caxu rusen cɨn ruuri xa'aju'un. 54A'atɨ tɨ na'a tɨ ayan raacua'ani i nyahue'ira'a, ajta ayan raaye'en i nyaxuure'e, aɨ pu ayan ruurican cɨn huatyaturaasin tɨj na'a rusen cɨme'e. Nyajta nu neyan ra'ajjájsin ajna xɨcajra'an tɨ jetzen nain cɨn te'entipua'ari. 55’Ayej ti'ayajna xaa nya'u. Aɨ pu nyahue'ira'a, aɨn pueen ɨ tɨ cue'ira jetzen e'iraninyei ɨ maj tzaahuati'ira'a cɨn ruuri mua'ara'ani ɨ Dioj jemi. Ajta aijna, ai pu xaa nya'u aɨn pueen ɨ jaj ɨ maj tzaahuati'ira'a cɨn iraaye'en mej mi cai che'e ruxaamɨstya'a ɨ Dioj jemi. 56A'atɨ tɨ na'a tɨ ayan raacua'ani i nyahue'ira'a, ajta tɨ ayan raaye'en i nyaxuure'e, aɨ pu huatyaturaasin inyeetzi jemi. Nyajta nu neyan che'eta nyana'a huatyaturaasin ɨ jemin. 57’Aɨ pu ayanna nyaja'utaityaca'a ɨ niya'upua tɨ i'iruuri. Nyajta nu nyaɨjna jetze aranca'anye nyej ni ruuri na'ara'ani ɨ niya'upua jemi. Ajta aɨn ɨ a'atɨ tɨ ayan ti'icua'aca inyeetzi jemi, aɨ pu ayen che'eta na'a nyeetzi jetze araujca'anye tɨ ij aɨn ruuri a'ara'ani ɨ Dioj jemi. 58Ai pu aɨn pueen ɨ cue'ira tɨ ute'e e'icaanye. Tahuaacɨxa'astyamua'acɨ'ɨ mu meyan raacuaa maɨjna ɨ maná. Majta huacuii. Ma ajta, aɨn tɨ ayan racua'aca aɨjna ɨ cue'ira tɨ nyeetzi jetze e'iraninyei, aɨ pu ruurican cɨn huatyaturaasin tɨj na'a rusen cɨme'e. 59Ayaa pu tihua'uta'ixaa aɨjna ɨ Jesús tɨ'ɨj aun tihuá'amua'atyajcaa a'u maj e'etyujsa'ɨrihua'a aujna u Capernaúm. 60Matɨ'ɨj maɨjna huanamuajri'i, ayaa mu mui'itɨ tyu'utaxajtaca'a aɨme ɨ mej jamuan á'ujhua'anya'a tɨcɨn: ―A'ij pu pua'a taata'a tɨ ayan ti'ixa. Eecan pu hui muare'eri tyej teyan yau'eitaa ta'ara'ani. 61Ajta aɨn Jesús, ayaa pu rú'umua'areeracaa mej meyan runyuustya'acaa. Aj pu'i ayan tihua'utaihua'uri'i tɨcɨn: ―¿Ni a'ij pua'a amuaata'a nyej neyan tyajamuaata'ixaa? 62Ari tɨ pua'a seyan naaseij inyeetzi, i nyaj tyaata'a jetze e'irannyejte, nyej ni aun a'ujnyén utya'ɨmɨ a'u nyaj anacai á'ucatii. 63Aɨjna jetze ɨ xaijnyu'ucara'ara'an ɨ Dioj, aɨ pu jetzen e'iraninyei ɨ saj cɨn ruuri xa'ara'ani. Ma ajta, capu aɨjna cɨn ti'ivaɨre'e aɨjna tɨ jetzen e'iraninyei ɨ saj ratyáhue'ira'a. Capu a'atzu xaa nya'u. Ma ajta, aɨjna ɨ nyuucari ɨ nyej neyan tyaja'amue'ixaate'e, aɨjna ɨ xaijnyu'ucara'ara'an ɨ Dioj, aɨ pu ca'anijra'a naata'a nyej neyan tyu'utaxaj. Ajta, aɨj pu jetze e'iraninyei ɨ saj cɨn ruuri xa'ara'ani. 64Ma sajta muan, mui'itɨ xu cai tya'atzaahuate'e. Ayaa pu tihua'uta'ixaa a'ini tɨj na'a jajcua ɨmɨ tɨ yu e'ire'enye, aɨ pu rú'umua'areeracaa a'atɨ tɨ pɨrɨcɨ tɨ cai ra'atzaahuatya'acaa, ajta a'atɨ tɨ pueen tɨ Jesús cɨme'en tyu'utatuiire'esin. 65Ajta, ayaa pu tihua'uta'ixaa tɨcɨn: ―Ayaa nu een cɨn tyajamuaata'ixaa tɨ cai rɨ'ɨri tɨ a'atɨ ayan huataujtuiire'en inyeetzi jemi tɨ pua'a cai Dioj anacai ca'anijra'a raata'an tɨ ayan huarɨni. ―Ayaa pu tihua'uta'ixaa. 66Ajna'ɨmɨ mui'itɨ mu meyan tityaacáujxaahuataca'a mej mi cai che'e jamuan á'ujhua'anye'en. 67Aj pu'i Jesús ayan tihua'utaihua'uri'i aɨme ɨ maj tamuaamuata'a japuan hua'apua ara'ase tɨcɨn: ―Ari muaan, ¿ni sajta seri ajtácɨɨnicu inyeetzi jemi? 68Ajta aɨn ɨ Simón, tɨ ajta i'i Pedro, ayaa pu tiraata'ixaa tɨcɨn: ―Nyavastara'a, ¿a'atajni maa jemin tyá'uju'un? Mueetzi pu'u jemi seijre'e ɨ nyuucari ɨ tyaj cɨn ruuri ta'ara'ani, tɨj na'a rusen cɨme'e. 69Ayaa tu hui ra'atzaahuate'e, tyajta teyan ramua'aree paj paɨn pueen i paj Dioj jemi e'icaanye, tɨ Dioj ajta muaja'utyatuaasin ɨ ru'ɨrɨɨta'a. 70Aj pu'i Jesús ayan tyu'utanyúu tɨcɨn: ―¿Ni qui nyacai neyan amua'antihuau muejmi mɨ saj tamuaamuata'a japuan hua'apua ara'ase? A'ini nijta nya'u. Ma ajta, seij tɨ muejmi jetze ajtyama'acan, tiyaaru'u pu jetzen seijre'e. ―Ayaa pu tihua'uta'ixaa. 71Aɨjna tɨ nu'u tiyaaru'u jetzen seijre'e, aɨ pu ayan huatamua'a ɨ Judás. Aɨ pu yaujra'an puéenya'a aɨjna ɨ Simón tɨ ayan te'entimu'utaca tɨcɨn Iscariote. Ajta aɨn Judás, hua'a jetze pu ajtyama'acantaca'a ɨ maj tamuaamuata'a japuan hua'apua ara'ase. Aɨ pu aɨn pueen tɨ ayan tyu'utatuiire'esin aɨjna cɨme'en ɨ Jesús.

will be added

X\