San Juan 5

1Pu'uri a'atzu a'atéevi'ica matɨ'ɨj tyu'uyé'este aɨme ɨ maj Israel jetze ajtyama'acan. Ajta aɨn Jesús, aun pu a'ujnyéj anna Jerusalén. 2- 3Aun pu jajmuaa ajna vejli'i ta'aj pueerta a'u mej jetzen a'utyaru'ipi ɨ canya'axɨ. Ayaa pu tyaja'arajtyahuaa tɨcɨn Betesda. Anxɨvi pu a'aportaalijma'acaa a'u mej e'etyujsa'ɨrihua'a eihua tyaɨte ɨ mej tí'icucui'icaa. Seica mu meyan aracúcu'unijma'acaa, majta seica, a'ij pua'a mu huatzúna'icha'a, majta seica cɨyaaxavi'icaa ɨ huáɨɨca. 4Aɨ mu meyan rachu'eva'acaa tɨ ij a'atɨ ayan ra'utaruurajxɨ'ɨn ɨ jaj, a'ini a'anaj tɨna'a, ayaa pu rɨjcaa saɨj tɨ ute'e ti'ivaɨre'e Dioj tɨ e'eseijre'e. Aɨ pu ava'acáninyéica'a ajna tɨ jajmuaa, tɨ ij aɨn ra'utaruurajxɨ'ɨn. Ajta aɨn a'atɨ tɨ anacai atyajra'ani ɨ jaj tzajta'a, aɨ pu ayan rujni tɨj na'a tɨ cɨn ti'icu'i. 5Meenti seij aun a'utyavaaca'a tɨ ayan ari a'atee a'achu cumu seité japuan tamuaamuata'a japuan arahueicaj ninye'ira'a tɨ ayan ti'icu'i. 6Tɨ'ɨj i Jesús ayan raaseij tɨ aun aúuca'atii, ayaa pu raamua'areeri'i tɨ aɨn nu'u a'atɨ ari a'atee tɨ ayan een. Aj pu'i ayan tiraataihua'uri'i tɨcɨn: ―¿Ni peyan ti'ijxe'eve'e pej huarún? 7Ajta aɨn tɨ ti'icu'i, ayaa pu tyu'utanyúu tɨcɨn: ―Nyavastara'a, tɨ'ɨj ayan ra'utaruurajxɨ'ɨn ɨ jaj, capu hui ma'a a'atɨ tɨ naatavaɨre'en nyej ni atyajra'ani ɨ jaj tzajta'a. Ajta, nyatɨ'ɨj nyauj a a'umé'en, saɨj pu hui ca'anacan aun atyeeme nyaj cai inyaa. ―Ayaa pu tiraata'ixaa aɨjna tɨ ti'icu'i. 8Aj pu'i Jesús ayan tiraata'ixaa tɨcɨn: ―Ajchesi. Anchuaa mɨ a'utaatzi. Pajta hui a'ura'ani. 9Cɨme'en pu'u ayan tyu'utaxajtaca'a, aj pu'i aɨn a'atɨ huarúj. Ajta yá'uchui ɨ ru'utaatzi. Tɨ'ɨqui á'uraa. Ajta ajna pɨti'irɨjcaa ajna xɨcajra'a mej jetzen rusa'upi tɨ'ɨj huaruj. 10Ajta aɨme ɨ mej Israel jetze ajtyama'acan, ayaa mu tiraata'ixaa maɨjna ɨ a'atɨ tɨ ayan huaruj tɨcɨn: ―Pu'uri hui ajna pɨti'irɨcɨ ɨ xɨcajra'an tyaj jetzen tasa'upi. Ajta ayaa pu te'eyu'usi'i aɨjna jetze ɨ yu'uxari tɨ ayan ti'itaijte'e tɨ nu'u cai a'ij ti'irɨ'ɨri pej peyan raachuisime'en mɨ a'utaatzi ijii. 11Ajta aɨn tɨ anácɨyaaxaraca'a, ayaa pu tihua'uta'ixaa tɨcɨn: ―Ayaa pu tinaata'ixaa aɨjna tɨ naarujte tɨcɨn yee nyaj nu'u ra'anchueni ɨ nya'utaatzi, nyajta nu'u u a'ura'ani. 12Aj mu mi meyan tiraataihua'uri'i tɨcɨn: ―¿A'ataani pueen aɨjna ɨ a'atɨ tɨ ayan timuaata'ixaa paj nu'u peyan ra'anchueni, pajta nu'u a'ura'ani? 13Ajta aɨn ɨ a'atɨ tɨ ayan huarúj, capu a'atzu ramua'atyajcaa a'atɨ tɨ puéenya'a, a'ini aɨjna ɨ Jesús pu'uri a aurutyaca'a hua'a tzajta'a ɨ tyaɨte ɨ maj maun e'etyujsaɨra'acaa. 14Tɨ'ɨqui Jesús aun yá'utyau aujna teyujta'a. Ayaa pu tiraata'ixaa tɨcɨn: ―Ma'acui xaa, papu'uri huaruj. Capej che'e ti'itɨj cɨn a'aturaa ɨ Dioj jemi. Na'ari cai, ayaa pu tyaja'ure'enyejsin tɨ eitze'e pueijtzi muaacɨ'ɨti cai ajmi'i. 15Aj pu'i á'uraa aɨjna ɨ a'atɨ. Ajta ayaa pu tihua'uta'ixaa aɨme ɨ maj Israel jetze ajtyama'acan tɨ aɨn Jesús aɨn puéenya'a tɨ ayan raarujte. 16Majta aɨme ɨ mej Israel jetze ajtyama'acan, ayaa mu een cɨn a'ij pua'a raruurajca'a maɨjna ɨ Jesús maɨjna cɨme'e tɨ aɨn ayan rɨjcaa ajna xɨcajra'a mej jetzen rusa'upihua'a. 17Jesús pu ayan tihua'uta'ixaa tɨcɨn: ―Tɨj na'a tɨ yu auca'itɨ a'ame, aɨ pu auj ti'imuare'e ɨ niya'upua. Ayaa nu che'eta nyana'a inyaa ti'imuare'e. ―Ayaa pu tihua'uta'ixaa. 18Ayaa mu een cɨn eitze'e meyan ti'ityesa'acaa mej mi raaje'ica maɨjna cɨme'e tɨ nu'u ayan Jesús raataxaahuataca'a tɨ ayan huarɨni a'ij mej ti'ijrɨ'ɨre ajna xɨcajra'an jetze maj rusa'upihua'a. Aɨ pu ajta nu'u ayan ratamua'amua'atya'a ɨ Dioj tɨ nu'u ya'upuaara'an pueen. Aɨj pu nu'u cɨn ayan tyú'ujseijrataca'a tɨ ayan che'eta na'a een tɨj ɨ Dioj. 19Ayaa pu tyu'utanyúu aɨjna ɨ Jesús tɨcɨn: ―Ayaa nu tyaja'amue'ixaate'e tzaahuati'ira'a cɨme'e, capu rɨ'ɨri nyej neyan ti'itɨj huáruuren nyasaɨj, i nyaj nyajta tyaata'a jetze airaanye. Ayaa nu che'eta nyana'a ti'iruure a'ij nyaj ti'isise'i tɨ ayan ti'iruure ɨ niya'upua. 20Ayaa pu ɨ niya'upua nyexe'eve'e inyeetzi i nyaj yaujra'an pueen. Aɨ pu ajta ti'inyeseijrate'e nain a'ij tɨ aɨn ti'iruure. ’Ee xaa nya'u, ayaa pu tinaataseijrate'esin ti'itɨ tɨ eitze'e huapɨ'ɨ ruxe'eve'e cai a'ij nyej nyeri tyu'uruu sej si tyamua'a naa tira'utaseij. 21Ayaa pu hui niya'upua huá'ajjajpuaxɨ'ɨsin ɨ tyaɨte hua'a tzajta'a ɨ mej meri huacuii. Aɨ pu ajta hua'ata'asin mej mi majtahua'a ruuri mua'ara'ani. Ayaa nu che'eta nyana'a hua'uta'asin a'achu pua'amua aɨme tɨ ayan na'araanajchi nyaj neyan hua'uta'an mej mi majtahua'a ruuri mua'ara'ani. 22Ajta yeehui aɨn niya'upua, capu a'atɨ á'axɨjte'e silu pu'uri ayan nain cɨn tinyeijca inyeetzi, i nyaj yaujra'an pueen nyej ni naijmi'ica a'uxɨ́jte'en. 23Ayaa pu een cɨn huarɨj ɨ niya'upua mej mi meyan che'eta mana'a rɨ'ɨ tinaata'an inyeetzi matɨj majta rɨ'ɨ tirata'aca maɨjna ɨ niya'upua. Ajta, aɨn tɨ cai rɨ'ɨ tinaata'aca inyeetzi, i nyaj yaujra'an pueen, aɨ pu ajta cai rɨ'ɨ tiraata'aca ɨ niya'upua tɨ iiyan nyaja'utaityaca'a. 24’Ayaa nu tyaja'amue'ixaate'e tzaahuati'ira'a cɨme'e, a'atɨ tɨ na'a tɨ ayan ranamuaj a'ij nyej ti'ixaj, ajta tɨ ayan ra'ara'astijre'en aɨjna tɨ yan nyaja'utaityaca'a, aɨjna ɨ a'atɨ, ayaa pu ruurican cɨn huatyaturaasin tɨj na'a rusen cɨme'e. Capu a'anaj pueijtzi racɨ'ɨti a'ini aɨ pu ari huiirajraa a'u tɨ ayan tiya'acɨ'ɨtinche'e tɨ huamɨ'ɨni. Aɨ pu ajta ari aun a'utyajrupi a'u tɨ ayan ya'acɨ'ɨti tɨ ruuri a'ara'ani. 25’Ayaa nu tzaahuati'ira'a cɨn tyaja'amue'ixaate'e. Ayaa pu tyaja'ure'enyejsin, ee xaa nya'u. Ayaa pu ari tyaja'ure'enye ajna xɨcajra'an tɨ jetzen ayan tihua'acɨ'ɨti aɨme ɨ mej meri huacuii mej mi meyan raanamua a'ij nyej ti'ixa inyaa, i nyaj yaujra'an pueen ɨ Dioj. Majta aɨme ɨ mej meyan ra'ancura'asin a'ij mej ti'ijnamuajran, aɨ mu rusen cɨme'e ruuri mua'aju'un. 26A'ini rujetze pu ayan rusen cɨn ruuri ɨ Dioj, aɨ pu ayan naata'a inyeetzi i nyaj yaujra'an pueen nyej ni neyan che'eta nyana'a nyejetze rusen cɨn ruuri. 27Aɨ pu hui ajta naata'a nyej ni nyaɨjna cɨn antinmua'aréera na'ara'ani nyej ni hua'uxɨjte'en ɨ tyaɨte a'ini nyaa nu nyajta tyaata'a jetze airaanye. 28’Caxu saɨjna cɨn rɨ'ɨ tiyá'useijra, a'ini aj pu tyaja'ure'enyejsin matɨj mana'a pua'amua ɨ mej meri huacuii, ayaa mu ranamuajran nyatɨ'ɨj hua'utajeeve. 29Au mu e'itajú'un a'u mej a'ava'anami'ihuajmee. Majta aɨme, ɨ mej rɨ'ɨ titetyujchaɨca'a, aɨ mu e'itajú'un mej mi ruuri mua'ara'ani. Ma majta aɨme ɨ mej a'ij pua'a titetyújchaɨca'a, aɨ mu e'itajú'un nyej ni neyan hua'uxɨjte'en tɨ ij ayan pueijtzi tihua'ucɨ'ɨti. 30’Capu rɨ'ɨri nyej neyan ti'itɨ huáruuren nyasaɨj nyana'a, silu ayaa nu che'eta nyana'a hua'axɨjte'e a'ij nyej ti'ijnamua ɨ niya'upua jemi. Ajta, ayaa pu tiraavijte'e a'ij nyej tihua'axɨjte'e a'ini canu neyan rahuauca nyej neyan rɨcɨ a'ij tɨ tina'araanajchi silu ayaa nu rɨcɨ nyej ni neyan rɨ'ɨ tiraata'an aɨjna tɨ yan nyaja'utaityaca'a. 31Tɨ pua'a nyasaɨj nyana'a neyan tyu'utanxaj, canu neyan tzaahuati'ira'a cɨn nyeyan tyu'utanxajta. 32’Ma ajta, saɨj pu ayan tinaatyáxajta inyeetzi, nyajta inyaa, ayaa nu ramua'aree tɨj na'a a'ij tɨ tí'inyaxaj inyeetzi, ayaa pu tzaahuati'ira'a cɨn tí'inyaxaj aɨjna. 33’Muan xu seica huataityaca'a ɨ Juan jemi. Aɨ pu ajta tzaahuati'ira'a cɨn tyajamuaata'ixaa inyeetzi cɨme'e. 34Capu hui ayan ruxe'eve'e tɨ a'atɨ ayan tí'inyaxajta inyeetzi. ’Me nyajta, ayaa nu tyaja'amue'ixaate'e nyaɨjna cɨme'e ɨ Juan tɨ ij Dioj ayan tyajamuatáuuni'i. 35Ayaa pu a'atzu tyu'utyavaɨ aɨjna ɨ Juan tɨj tatzari tɨ a'ataa, tɨ ajta nain japua huatátzave'ejye'i. Sajta muan, ayaa xu a'atzu huataura'a sej seyan huataujtyamua'ave'en saɨjna cɨme'e saj ra'ancura'a a'ij tɨ aɨn tyu'utaxajtaca'a. 36’Ti'itɨ pu eitze'e ruxe'eve'e cai a'ij tɨ tyu'utaxajtaca'a aɨjna ɨ Juan. Aɨjna tɨ Dioj ayan cɨn tinyeijca nyej ni neyan nyaɨjna cɨn tya'ara'asten ɨ nyaj nyeri neyan nyaɨjna rɨcɨ, aɨ pu ajta ti'ivaɨre'e sej si seyan raamua'aree tɨ ayan nyaja'utaityaca'a aɨjna ɨ niya'upua. 37Ajta aɨn ɨ niya'upua tɨ ayan nyaja'utaityaca'a, aɨ pu ajta naatyaxájtaca'a inyeetzi cɨme'e. Muan xu cai a'anaj raanamuajri'i tɨ tyu'uxajtaca'a. Caxu sajta a'anaj a'amuajɨ'ɨsi cɨn raaseij a'ij tɨ een. 38Caxu sajta ra'ancura'asin a'ij tɨ aɨn tyu'utaxajtaca'a a'ini caxu na'ara'astijre'esin inyeetzi, Dioj tɨ nyaja'utaityaca'a. 39’Muan xu aujca'anyaacan cɨn tyu'ujmua'ate saɨjna jetze ɨ yu'uxari a'ini ayaa pu tyajamua'amitejte'e sej saɨjna jetze yau'eitaa xa'aju'un a'ij sej ye'i huarɨni sej si rusen cɨn ruuri xa'ara'ani. Ai pu hui aɨn pueen ɨ yu'uxari tɨ jetzen te'eyu'usi'i a'ij mej tyu'utaxajtaca'a inyeetzi cɨme'en. 40’Ma sajta muan, caxu á'ujca'anye sej seyan na'ara'astijre'en inyeetzi nyej ni amuaata'an sej si rusen cɨn ruuri xa'ara'ani. 41’Capu nye jetze ruxe'eve'e tɨ pua'a tevi ayan rɨ'ɨ tinaata'an. 42Ma sajta muan saɨque xu ti'imua'atze. Nyaa nu neyan ramua'aree saj cai hui raxe'eve'e ɨ Dioj ɨ a'amua tzajta'a. 43Ayaa nu een cɨn ava'acaanye niya'upua jetze ma'acan. Ma sajta muan, caxu na'ancure'evi'itɨ. Aru tɨ pua'a a'atɨ runyuucajtze'en cɨn mu a'uve'eme'en, muan xu xaa ra'ancure'evi'itɨ saɨjna. 44’¿A'ini ti'irɨ'ɨri saj tzaahuati'ira'a cɨn tya'antzaahuate'en tɨ pua'a seyan rɨ'ɨ tyu'utaura'an rujɨɨmua'a sana'a, sajta cai ti'ityesa'a saj raahuauni tɨ Dioj rɨ'ɨ tyajamuaata'an? Capu xaa nya'u a'ij ti'irɨ'ɨri. 45Caxu seyan muan ti'imua'atza nyaj tyaja'amuaxajtzi'iran ɨ niya'upua jemi. Ai pu aɨn pueen ɨ tɨ tyaja'amuaxajtzi'iran aɨjna ɨ Moisés tyaacan, ɨ sej seyan rachu'eve'e tɨ aɨn a'amuajapua nyuuni. 46’Tɨ pua'a seyan tya'atzaahuatya'a saɨjna jemi ɨ Moisés, ayaa xu sajta na'antzaahuate'enche'e inyeetzi saɨjna cɨme'e tɨ aɨn ayan nyeetzi cɨme'en ra'utéyu'uxaca'a. 47¿A'ini sej si cai ra'atzaahuate'e a'ij tɨ aɨn tira'utyeyu'uxaca'a?, ¿a'ini ti'irɨ'ɨri sej seyan rá'antzaahuate'en a'ij nyej inyaa tyajamuaata'ixaate'esin? Capu xaa nya'u a'ij ti'irɨ'ɨri. ―Ayaa pu tihua'uta'ixaa aɨjna ɨ Jesús.

will be added

X\