San Juan 4

1Majta maɨn ɨ fariseos, ayaa mu raamua'areeri'i tɨcɨn eitze'e pu nu'u hua'amue'itɨjcɨ ɨ tyaɨte aɨjna ɨ Jesús cai aɨjna ɨ Juan. Ajta nu'u hua'amuaɨ'ɨhuá. 2Ma ajta aɨn Jesús, capu ayan hua'amuaɨ'ɨhuaca'a, silu aɨme mu'u ɨ maj jamuan á'ujhua'anya'a. 3Ajta aɨn Jesús, tɨ'ɨj ayan tyu'unamuajri'i mej nu'u meyan raamua'areeri'i aɨme ɨ fariseos, aj pu'i aun a'arajraa u Judea. Tɨ'ɨqui ajtahua'a aun a'utamé ajtyapua u Galileeya. 4Ayaa pu ruxe'eva'acaa tɨ aun e'ita'a a'uré'enyen u Samaariya. 5Tɨ'ɨqui aun a'ará'a chajta'a tɨ ayan tyaja'arajtyahuaa tɨcɨn Sicar, tɨ aun jetze ajtyama'acan u Samaariya. Au pu vejli'i a'utacá'a aɨjna chuejra'a tɨ aɨn nu'u Jacobo tyaacan raatapueijve ɨ ruyauj ɨ José tyaacan. 6Au pu ye'etyaacu aɨjna ɨ Jacobo. Ajta aɨn Jesús, au pu a'ujyeijxɨ a vejli'i a'utɨ e'etyacun a'ini tyamua'a pu ti'icua'anaca'a aɨjna cɨme'e tɨ a'atee tɨ huamej ɨ juye jetze. A'atza ajna pɨti'irɨjcaa a tacuarixpua. 7Tɨ'ɨqui saɨj a e'ire'enye, jɨita'a tɨ Samaariya e'ema'acan. Ayaa pu aɨjna cɨn e'ire'enye tɨ ij jaj e'itajanya'ɨn. Aj pu'i Jesús ayan tiraatajee tɨcɨn: ―Cɨj caj jaj tinaata'a. 8Majta aɨme, ɨ mej jamuan á'ujhua'anya'a, au mu a'uju'un u chajta'a mej mi cue'ira tyu'unanan. 9Ajta aɨn jɨita'a ayan tiraata'ixaa tɨcɨn: ―Muaa paj hui Israel jetze ajtyama'acan. Nyajta inyaa, inyaj i'i jɨita'a iiya nyaj Samaariya ma'acan. ¿A'ini een cɨme'e peyan jaj nyahuavii nyaj cɨj caj timuaata'an? (Ayaa pu tyu'utaxajtaca'a aɨjna ɨ jɨita'a a'ini aɨme ɨ mej Israel jetze ajtyama'acan camu a'ij á'ujmua'ara aɨme jemi, ɨ mej Samaariya e'eche.) 10Aj pu'i Jesús ayan tiraata'ixaa tɨcɨn: ―Tɨ pua'a paj mua'areera ti'itɨ tɨ cɨn Dioj ruxé'evi'ira'a cɨn muaatapueijve'esin, pajta ramua'areera a'atɨ nyaj pueen inyaa, i nyaj neyan muahuavii, ayaa paj naatahuaviiranche'e. Nyajta nu neyan nyaɨjna muaata'aniche'en nyaɨjna ɨ jaj ɨ paj cɨn rusen cɨn ruuri. 11Ajta aɨn ɨ jɨita'a, ayaa pu tiraata'ixaa tɨcɨn: ―Nyavastara'a, capej ti'itɨ ticha'ɨ ɨ paj cɨn ra'itajanya'ɨn ɨ jaj, ajta eihua pu hui ucatee ɨ tɨ atyacun. ¿A'uni jetze paya'ajanya'ɨsin paɨjna ɨ jaj? 12¿Ni peyan eitze'e ti'itɨ cɨn anti'amua'aree muaa cai aɨjna ɨ taya'upuacɨ'ɨ, aɨjna ɨ Jacobo tyaacan tɨ ayan taata'a tej teyan auye'en iiyacui? Aɨ pu ajta ayajna ya'acara'a, majta aɨme ɨ yaujmua'ame'en, majta ɨ tɨ hua'aya'amuaaca'a. 13Ayaa pu tyu'utanyúu aɨjna ɨ Jesús tɨcɨn: ―Ayaa nu ti'imue'ixaate'e tɨ ayan tihua'aruuren a'achu maj pua'amua meyan raye'e maɨjna ɨ jaj tɨ e'itaninyei mɨ ta'atyacun jetze. Matɨ'ɨj huaye'en, majtahua'a mu huata'icu majca'i huayee. 14Ma ajta, a'atɨ tɨ na'a tɨ aɨjna huaye'en ɨ jaj nyaj hui neyan raata'asin, capu che'e a'anaj huata'imɨ. Ee xaa nya'u, ayaa pu seira'a a'ame ɨ jemin tɨ aɨjna ɨ jaj nyaj neyan raata'asin ayan e'itaninyeica'a a'ame tɨ ij aɨn a'atɨ rusen cɨn ruuri a'ara'ani. ―Ayaa pu tyu'utaxajtaca'a aɨjna ɨ Jesús. 15Aj pu'i aɨn jɨita'a ayan tiraata'ixaa tɨcɨn: ―Nyavastara'a, pata'aj peyan cɨj caj tinaata'an paɨjna ɨ jaj nyej ni cai che'e huata'imɨn, tɨ ij ajta cai che'e ayan ruxe'eva'a nyej neyan yaraajein nyeyajna. 16Aj pu'i Jesús ayan tiraata'ixaa tɨcɨn: ―Aricu, u a'utájee ɨ tɨ muajá'uvi'itɨn. Pajta mu a'uve'eme'en. 17Aj pu'i aɨn jɨita'a ayan tiraata'ixaa tɨcɨn: ―Capu a'atɨ nyajá'uvi'itɨn. Aj pu'i ayan tiraata'ixaa aɨjna ɨ Jesús tɨcɨn: ―Xa'apɨ'ɨn paj tyu'utaxajtaca'a tɨ nu'u cai a'atɨ muajá'uvi'itɨn. 18Ayaa pu ti'ayajna ɨ maj meri anxɨvi ara'asi mua'araa aɨme ɨ maj muatyevi'itɨnya'a. Ajta aɨn ɨ paj jamuan á'ucaj ijii, capu muajá'uvi'itɨn aɨjna. Ayaa paj tzaahuati'ira'a cɨn tyu'utaxajtaca'a. 19Aj pu'i ayan tiraata'ixaa aɨjna ɨ jɨita'a tɨcɨn: ―Nyavastara'a, ayaa pu hui tina'amitejte'e pej peyan Dioj jetze ma'acan ti'ixaxa'a. 20Tavaujsimua'acɨ'ɨ mu rana'amicha'a ɨ Dioj aijna jetze ɨ jɨri. Ma sajta muan, mɨ saj Israel jetze ajtyama'acan, ayaa xu ti'ixaxa'a tɨ ayan ruxe'eve'e tej tyaun yá'ana'amiche'en aujna a'ahua'a u Jerusalén. ―Ayaa pu tiraata'ixaa. 21Ajta aɨn Jesús, ayaa pu tyu'utanyúu tɨcɨn: ―Jɨita'a, ayaa nu ti'imue'ixaate'e tzaahuati'ira'a cɨme'e, pu'uri tɨn tyaja'ure'enyejsin ajna xɨcajra'an jetze saj cai che'e rana'amicha'a xa'aju'un ɨ taya'upua iiyan jɨri japua, camu majta che'e rana'amicha'a mua'aju'un u Jerusalén. 22’Muan, mɨ saj Samaariya e'ema'acan, ayaa xu hui ramua'ate saɨjna ɨ saj rana'amiche. Me tyajta ityan, tyan tu ramua'ate tyaɨjna ɨ tyaj rana'amiche a'ini aɨjna tɨ ayan tajapua nyuuni, aɨme jetze pu huataseijre'esin ɨ mej Israel jetze ajtyama'acan. 23Ma ajta, pu'uri tɨn tyaja'ure'enyejsin ajna xɨcajra'an jetze mej meyan maɨjna jetze araujca'anyen ɨ xaijnyu'ucara'ara'an ɨ Dioj mej mi meyan tzaahuati'ira'a cɨn rana'amiche'en ɨ taya'upua. Ee xaa nya'u, pu'uri ajna tyaja'ure'enye mej meyan rɨcɨ aɨme ɨ mej tzaahuati'ira'a cɨn rana'amiche a'ini taya'upua pu ayan hua'ahuauhuau aɨme ɨ mej meyan rana'amiche. 24Dioj pu xaijnyu'ucari pueen, majta aɨme ɨ mej rana'amiche, ayaa pu ruxe'eve'e mej maɨjna jetze araujca'anyen ɨ xaijnyu'ucara'ara'an ɨ Dioj mej mi tzaahuati'ira'a cɨn rana'amiche'en. ―Ayaa pu tyu'utaxajtaca'a aɨjna ɨ Jesús. 25Ajta aɨn jɨita'a ayaa pu tiraata'ixaa tɨcɨn: ―Nyaa nu hui ramua'aree tɨ aɨn tyejmi jemi huataseijre'esin aɨjna ɨ tɨ jee Mesías pueen, ɨ mej meyan ratamua'amua tɨcɨn Cɨriistu'u tɨ Dioj ra'antihuau. Tɨ'ɨj aɨn ayan huataseijre'en, aɨ pu nain cɨn titaata'ixaate'esin. 26Aj pu'i Jesús ayan tiraata'ixaa tɨcɨn: ―Inyaa, i nyaj a jamuan ti'ixaj, nyaa nu nyaɨn pueen. 27Cɨme'en pu'u ayan tyu'utaxajtaca'a, aj mu mi uve'enye aɨme ɨ maj jamuan á'ujhua'anya'a. Eecan mu a'ij ra'utaseij maɨjna cɨme'e tɨ aɨn jɨita'a jamuan tí'ixajtacaa. Ma ajta, capu a'atɨ ayan tiraataihua'uri'i tɨcɨn: “¿A'ini pajruuren pamɨjna mɨ jɨita'a?” Ni camu meyan yee: “¿A'ini een cɨme'e peyan jamuan ti'ixaj?” 28- 29Ajta aɨn jɨita'a, a pu ya'utara aɨjna ɨ ruxa'ari. Tɨ'ɨqui u á'umej u chajta'a. Aj pu'i ayan tihua'uta'ixaa ɨ tyaɨte. Ayan tɨcɨn: ―Mu sa'utauriyi'i sej si ya'useij a'atɨ tɨ ayan tinaata'ixaa nain cɨme'e a'ij nyej ti'itincha'ɨ. ¿Ni qui cai aɨn pueen ɨ Cɨriistu'u? ―Ayaa pu tihua'uta'ixaa. 30Matɨ'ɨj meyan tiraanamuajri'i, aj mu mi maɨn ɨ tyaɨte huiiraacɨ u chajta'a. Matɨ'ɨj mi maun u á'uju'un ɨ Jesús jemi. 31Meenti mauj aɨme ɨ maj jamuan á'ujhua'anya'a, ayaa mu ca'anyejri cɨn rata'acara'a tɨ tyu'ucua'ani. Ayaa mu tiraata'ixaa tɨcɨn: ―Rabí, pata'aj tyu'ucua'ani. 32Aj pu'i ayan tihua'uta'ixaa tɨcɨn: ―Nyaa nu nyaɨjna cɨn huatyanvaɨre'esin nyaɨjna cɨme'e ɨ cue'ira ɨ saj cai ramua'ate. 33Majta maɨn, ayaa mu tyu'urixaatya'acaa tɨcɨn: ―Tij a'atɨ ari tirava'atuiri'i ɨ cue'ira. 34Aj pu'i Jesús ayan tihua'uta'ixaa tɨcɨn: ―Aɨj nu cɨn neyan huatyanvaɨre'esin nyaɨjna cɨme'e nyej ni neyan ra'ara'asten ɨ tɨ cɨn Dioj ayan nyaja'utaityaca'a, nyajta nyej nain cɨn ra'anticɨ'ɨti nyaɨjna ɨ tɨ cɨn tinyeijca. 35’Caxu seyan tyu'utaxajta yee auche'e tya'atura a'achu cumu muaacua maxcɨra'i, sej si tyu'urá'atzaana. Ayaa nu tyaja'amue'ixaate'e, xaaseij, sajta nainjapua huanyeerajra'ani aujna maj a'utyáuu ɨ maj ti'ihuaste'e. Eihua mu huacuéinavi'ijmee. Pu'uri huaxa'apɨ'ɨn saj hua'ajsaɨre'en sej si tyu'utatuiire'en ɨ Dioj jemi. 36Ajta ijii, pu'uri ra'ancura'asin a'atɨ aɨjna tɨ racɨ'ɨti, aɨ pu hua'ajsaɨre'esin mej mi meyan ruuri huatyaturan tɨj na'a rusen cɨme'e mej mi naijmi'i meyan huataujtyamua'ave'en, aɨjna ɨ tɨ tyu'uhuaste a'ij tɨ Dioj tiraijca, ajta aɨjna tɨ ayan tyu'urá'atza a'ij tɨ ajta Dioj tiraijca. 37’Aɨj pu cɨn ayan ti'ayajna a'ij tɨ te'eyu'usi'i tɨ ayan tɨcɨn: “Aɨ pu raayɨ'ɨtɨ tɨ tyu'uhuaste'en. Ajta aɨn ɨ saɨj ayaa pu raayɨ'ɨtɨ tɨ tyu'urá'atzaana.” 38Ayaa nu hui nyaɨjna cɨn amuaataityaca'a sej si seyan saɨjna huara'atzaanaj a'u saj cai tyaja'uhuáste. Seica mu eihua huapɨ'ɨ tyu'umuarej. Sajta muan, aɨj xu seyan ancura'a ɨ maj raamue'itɨ maɨjna cɨme'e ɨ mej tyu'umuarej. ―Ayaa pu tihua'uta'ixaa aɨjna ɨ Jesús. 39Majta aɨme ɨ mej Samaariya e'ema'acan, mui'itɨ mu rá'antzaahua maɨjna cɨme'e tɨ ayan tihua'uta'ixaa aɨjna ɨ jɨita'a tɨcɨn Jesús nain tiraata'ixaa a'ij tɨ ti'ityújchaɨca'a. 40Aɨj pu cɨn, maɨn u e'ire'enye ɨ jemin, matɨ'ɨj mi eihua rájhuaviiri'i tɨ i aɨn aun a'utyaturan hua'a jamuan. Aɨj pu cɨn, aun ayan e'etee hua'a jamuan a'achu cumu hua'apua xɨcaj. 41Majta eihua mu eitze'e rá'antzaahua ɨ Jesús maɨjna cɨme'e a'ij tɨ tihua'uta'ixaa. 42Ayaa mu tiraata'ixaa maɨjna ɨ jɨita'a tɨcɨn: ―Anacai tu hui tyaɨjna cɨn tya'antzaahua tyaɨjna cɨme'e a'ij paj pana'a peri titaata'ixaa. Tyajta ijii, catu che'e teyan tyaɨjna cɨn tyana'a tya'antzaahuate'e silu tu'uri teyan raanamuajri'i tajɨɨmua'a. Tyajta hui teyan ramua'aree tzaahuati'ira'a cɨme'e tɨ aɨn pueen aɨjna tɨ ayan tyejmi japua nyuuni tyatɨj tyana'a pua'amua yen seijre'e chaanaca japua. 43Tɨ'ɨj tyauuma'aca a'achu cumu hua'apua xɨcaj, aj pu'i aɨn Jesús huirajraa aujna. Aj pu'i aun á'umej ajtyapua u Galileeya. 44Jesús pu ayan huatauxajtaca'a rusaɨj maj nu'u cai rɨ'ɨ tirajchaɨ aɨme ɨ mej aun e'eche a'u tɨ ajta e'eche saɨj tɨ Dioj jetze ma'acan ti'ixaxa'a. Aɨj pu cɨn, huirajraa aujna u Judea. 45Ma ajta aɨme ɨ maj Galileeya e'ema'acan, tyamua'a mu naa tira'ancure'evi'itɨ tɨ'ɨj aɨn hua'a jemi a'ará'a. Ayaa mu'u meri nain tyu'uséijraca'a a'ij tɨ huarɨj aɨjna ɨ Jesús tɨ'ɨj aun a'utyavaaca'a aujna Jerusalén matɨ'ɨj tí'iyestyajcaa ajna xɨcajra'an tɨ jetzen Dioj tihua'utauuni'iri'i. Majta aɨme ɨ maj Galileeya e'ema'acan, aɨ mu majta a'utyáuuca'a maujna. 46Ajta aɨn Jesús, aɨ pu ajtahua'a hua'umuaaraca'a aɨme jemi ɨ mej maun e'echajca'a maujna Caná, a'u tɨ ɨ jaj huataujviinutaca'a. Aɨ pu saɨque ayan raaruu, nya'u. Ajta pu seij aun a'utyavaaca'a tɨ ti'itɨj cɨn ti'ityavaaca'a aɨjna jemi ɨ rey. Ajta aɨn, seij pu tiyaujca'a tɨ aun a'ucatii aujna Capernaum. Ti'icui'icaa aɨjna ɨ yaujra'an. 47Tɨ'ɨj aɨn a'atɨ ayan raamua'areeri'i tɨ Jesús aun a'arajraa aujna Judea, ajta ari aun a'ará'a u Galileeya, tɨ'ɨqui aɨjna ɨ a'atɨ u á'umej ɨ jemin. Eihua pu rájhuaviiri'i tɨ aɨn Jesús aun á'ume'en aɨjna jemi tɨ ti'icu'i tɨ ij raarujte'en a'ini pu'uri nu'u tɨmua'a mɨ'ɨni. 48Ayaa pu Jesús tiraata'ixaa, tɨcɨn: ―Caxu a'anaj tya'antzaahuate'esin tɨ pua'a nyacai neyan ti'itɨ tyajamuaataseijrate'en ɨ saj cɨn ava'ajɨ'ɨsivi'iraxɨ'ɨn na'ari ti'itɨ ɨ saj cɨn raamua'aree tɨ Dioj ayan naata'a nyej neyan huarɨni. 49Ajta aɨn tɨ ti'itɨj cɨn ti'ityavaaca'a ɨ rey jemi, ayaa pu tiraata'ixaa tɨcɨn: ―Nyavastara'a, pata'aj peyan u á'ume'en nyeetzi jamuan, na'ari cai, aɨ pu hui mɨ'ɨni ɨ niyauj. 50Ajta Jesús ayan tyu'utanyúu tɨcɨn: ―Aricu a'u pej e'eche. Pu'uri rujni ɨ a'ayauj. Ajta aɨn a'atɨ, aɨ pu rá'antzaahua a'ij tɨ tiraata'ixaa aɨjna ɨ Jesús. Tɨ'ɨqui á'uraa. 51Tɨ'ɨj ari avejli'i auma'aca aɨjna ɨ a'atɨ, aɨ mu ra'antinajchaca'a ɨ maj ravaɨre'e. Ayaa mu tiraata'ixaa tɨ nu'u ari huaruj aɨjna ɨ yaujra'an. 52Aj pu'i ayan tihua'utaihua'uri'i a'atzaj tɨ pua'a ayan huatyapua'araca'a aɨjna tɨ cɨn pɨstaca'a aɨjna ɨ yaujra'an. Ayaa mu tiraata'ixaa tɨcɨn: ―A'atzaj pu hui huatyapua'araca'a ɨ tajcai a'atzaj tya'acáará'a ɨ tacuarixpua. 53Cɨme'en mu'u meyan tiraata'ixaa, aj pu'i raamua'areeri'i aɨjna ɨ ya'upuaara'an tɨ ayan pua'a pɨti'irɨjcaa a'atzaj tɨ pua'a Jesús ayan tiraata'ixaa tɨ nu'u aɨn yaujra'an ari rujni. Aɨj pu cɨn, huataujtuiitze ɨ tavastara'a jemi. Majta aɨme ɨ tyaɨtestyamua'ame'en, aɨ mu majta meyan huarɨj. 54Ai pu aɨn pueen ɨ tɨ hua'apua tɨ ayan huapɨ'ɨ ruxe'eve'e tɨ ayan tyu'uruu aɨjna ɨ Jesús aujna a'ahua'a u Galileeya tɨ'ɨj aun huirájraa u Judea.

will be added

X\