San Juan 3

1Aun pu saɨj a'utyavaaca'a tɨ aɨme jetze ajtyama'acantaca'a ɨ fariseos. Ayaa pu antyahuaaca'a tɨcɨn Nicodemo. Aɨ pu saɨj aɨn pueenya'a ɨ hua'avaujsi ɨ mej Israel jetze ajtyama'acan. 2Aɨ pu tɨca'ɨmɨ a e'ire'enye ɨ Jesús jemi. Ayaa pu tiraata'ixaa tɨcɨn: ―Rabí, tyan tu ramua'aree paj paun a'uve'eme ɨ Dioj jemi aɨjna cɨme'e a'ij pej titaata'ixaate'en. Ayaa pu ti'ijmua'aree tɨ cai a'ij ti'irɨ'ɨri tɨ a'atɨ ayan rɨjca patɨj muaa, aɨjna cɨme'e ɨ tyaj cɨn ava'atajɨ'ɨsivi'iraxɨ'ɨn tɨ pua'a cai Dioj ayan jemin seijra'a. 3Ajta Jesús ayan tyu'utanyúu tɨcɨn: ―Ee xaa nya'u, ayaa nu ti'imue'ixaate'e tzaahuati'ira'a cɨme'e, tɨ pua'a a'atɨ cai ajtahua'a huanu'eihua, capu rɨ'ɨri tɨ aɨn aun a'utyarute aujna Dioj tɨ e'eseijre'e. 4Aj pu'i Nicodemo ayan tiraataihua'uri'i tɨcɨn: ―¿A'ini ti'irɨ'ɨri tɨ a'atɨ ayan ajtahua'a huanu'eihua tɨ pua'a aɨn ari vasta'a pueenye'en? Capu xaa nya'u a'ij ti'irɨ'ɨri tɨ ajtahua'a atyahui'ixɨn ɨ ucaara'an jetze ɨ runaana tɨ ij ajtahua'a huanu'eihua. ―Ayaa pu tiraata'ixaa aɨjna ɨ Nicodemo. 5Tɨ'ɨqui Jesús ayan tiraata'ixaa tɨcɨn: ―Ayaa nu ti'imue'ixaate'e tzaahuati'ira'a cɨme'e, tɨ pua'a cai ayan huaujjajcuare'en aɨjna cɨme'e tɨ ayan huaujmuaɨ'ɨhua jaj cɨme'e, ajta tɨ pua'a cai ayan ajtahua'a huanu'eihua aɨjna cɨme'e tɨ aɨn xaijnyu'ucara'ara'an ɨ Dioj ayan huatyaturan ɨ jemin, capu a'ij ti'irɨ'ɨri tɨ aɨn a'atɨ aun a'utyarute aujna Dioj tɨ e'eseijre'e. 6Saɨque pu een aɨjna tɨ aɨjna jetze e'iraninyei tɨ ayan ratyáhue'ira'a. Ayaa pu che'eta na'a saɨque een aɨjna tɨ aɨjna jetze e'iraujnejte ɨ xaijnyu'ucara'ara'an ɨ Dioj. 7’Capej a'ij tyá'amuajca nyej neyan ti'imue'ixaate'e yee ruxe'eve'e paj pajtahua'a huanu'eihua. 8Casi'i, ayaa pu rɨcɨ ɨ aaca. Nain japua pu hua'aacaj. Pajta ranamua tɨ́ ujhua'ana. Ma ajta, capu a'ij mua'amitejte'e a'u tɨ pujme'en a'uve'eye'i na'ari a'u tɨ pujme'en huarú'ipi. Ayaa pu che'eta na'a tihua'aruure matɨj mana'a pua'amua ɨ mej meyan e'iraujnejte maɨjna jetze ɨ xaijnyu'ucara'ara'an ɨ Dioj. ―Ayaa pu tiraata'ixaa aɨjna ɨ Jesús. 9Ajta aɨn Nicodemo ayan tiraataihua'uri'i tɨcɨn: ―¿A'ini ti'irɨ'ɨri tɨ ayan tyaja'ure'enyen? 10Tɨ'ɨqui Jesús ayan tiraata'ixaa tɨcɨn: ―Mɨ pej tihua'amua'ate aɨme ɨ mej Israel tyaacan jetze ajtyama'acan, ¿ni tzaa ayan ti'ayajna paj cai yau'eite a'ij nyej ti'imue'ixaate'e? 11Ayaa nu ti'imue'ixaate'e tzaahuati'ira'a cɨme'e, ayaa tu tyaɨjna cɨn ti'ixaxa'a ɨ tej teyan ramua'aree, tyajta tyaɨjna cɨn tyu'utaxajta ɨ tyaj tyajɨ'ɨsin cɨn tyu'useij. ’Ma sajta muan, caxuuxɨ ra'ancura'a a'ij tyej tyaja'amue'ixaate'e. 12Ayaa nu nyaɨjna cɨn timuaata'ixaa a'ij tɨ ti'irɨnyaca iiyan chaanaca japua. Ma pajta muaa, capaj cɨme'en tya'atzaahuate'e. ¿A'ini ti'irɨ'ɨri pej peyan tya'antzaahuate'en tɨ pua'a neyan nyaɨjna cɨn timuaata'ixaate'en a'ij tɨ ti'irɨnyaca u tajapua Dioj tɨ e'eseijre'e? Capu xaa nya'u a'ij ti'irɨ'ɨri. 13’Capu a'atɨ a'anaj ayan u a'ujnyéj u tajapua silu aɨ pu'u ɨ tɨ yava'acaanye iiyan chaanaca japua. Nyaa nu nyaɨn pueen i nyaj nyajta tyaata'a jetze airaanye. 14- 15Ajta, tɨj aɨn Moisés ajmi'i ra'ajpi aɨjna ɨ cu'ucu'u aujna a'ahua'a tɨ cai e'e ti'itɨɨtaca'a, ayaa pu che'eta na'a ruxe'eve'e tɨ Dioj ayan na'ajjan inyeetzi i nyaj nyajta tyaata'a jetze airaanye, tɨ ij ayan tihua'ucɨ'ɨti a'achu maj pua'amua na'antzaahuate'esin mej mi meyan ruuri huatyaturan tɨj na'a rusen cɨme'e. 16’Ayaa pu Dioj ayan hua'utaxe'eve aɨme ɨ mej yan huachaatɨme iiyan chaanaca japua tɨ i ayan nyaja'utaityaca'a inyeetzi, nyej nyaa nyana'a caj ti'iyaujra'an, nyej ni neyan huamɨ'ɨni hua'a jetze ma'acan mej mi cai antipuá'are silu tɨ ayan tihua'ucɨ'ɨti mej mi meyan ruuri huatyaturan tɨj na'a rusen cɨme'e, a'achu maj pua'amua meyan na'ara'astijre'esin inyeetzi. 17Ayaa pu xaa nya'u ti'ayajna. Capu Dioj ayan nyaja'utaityaca'a nyaj yava'acáanyen iiyan chaanaca japua nyej ni neyan hua'uxɨjte'en nyaɨme ɨ mej yan huachaatɨme nyaɨjna cɨme'e nyej ni pueijtzi hua'uta'an silu ayaa pu nyaja'utaityaca'a nyej ni hua'ajapua huanyuuni nyaɨjna cɨme'e nyaj naijmi'ica tyu'utauuni'i. 18’Ayaa pu ti'ijcɨ'ɨti a'atɨ tɨ na'a tɨ ayan na'astijre'e inyeetzi, nyej ni cai ra'uxɨ́jte'en, nyajta cai pueijtzi raata'an. Ma ajta aɨn, a'atɨ tɨ na'a tɨ cai na'astijre'e inyeetzi, Dioj pu ari ra'uxɨ́jte tɨ ij ayan pueijtzi raata'an aɨjna cɨme'e tɨ aɨn cai na'astijre'e inyeetzi nyej nyaa nyana'a caj ti'iyaujra'an ɨ Dioj. 19Ayaa pu ari hua'a cɨme'en ra'uxɨjte ɨ Dioj nyej nyeri hua'a jemi huataseijre aɨme jemi ɨ mej yan huachaatɨme chaanaca japua nyej ni neyan tíhua'utyátatzavi'in. Ma majta maɨn ɨ tyaɨte, ayaa mu eitze'e raataxe'eve maj maun a'utyaturan a'u tɨ a'utɨca'a maj cai raataxe'eve maj maun a'utyaturan a'u tɨ á'unyeeri'i. Ayaa mu een cɨn raataxe'eve a'ini a'ij mu pua'a titetyújchaɨca'a. 20Ayej xaa nya'u ti'ayajna, a'atɨ tɨ na'a tɨ ayan a'ij pua'a ti'ityujchaɨ, capu a'atzu ra'araanajchi tɨ ayan huarɨni tɨ a'ij pua'a een cɨme'e a'u tɨ á'unyeeri'i. Capu xaa nya'u ayan á'ujca'anye tɨ ayan a'ij pua'a huarɨni a'u tɨ á'unyeeri'i aɨjna cɨme'e tɨ ratzɨɨnye'e tɨ ij ayan huatamiteere'en a'ij tɨ een aɨjna tɨ cɨn ayan rɨcɨ. 21Ma ajta a'atɨ tɨ na'a tɨ hui tzaahuati'ira'a cɨn rɨ'ɨ ti'ityujchaɨ, aɨ pu xaa ayan á'ujca'anye tɨ ayan rɨjca a'u tɨ á'unyeeri'i tɨ ij ayan huatamiteere'en tyamua'a naa tɨ ayan rɨcɨ aɨjna cɨme'e tɨ ra'astijre'e ɨ Dioj. ―Ayaa pu tyu'utaxajtaca'a ɨ Jesús. 22Tɨ'ɨj i Jesús aun á'umej ajna a'ahua'a, aun tɨ a'utacá'a u Judea. Majta mu jamuan a'ucɨj aɨme ɨ maj jamuan á'ujhua'anya'a. Au pu hua'a jamuan a'utyavaaca'a a'achu pua'an xɨcaj. Majta mu hua'umuaɨ'ɨhuaca'a ɨ tyaɨte. 23Ajna'ɨmɨ, aɨ pu Juan ajta hua'amuaɨ'ɨhuaca'a ajna a'ahua'a chajta'a tɨ ayan tyaja'arajtyahuaa tɨcɨn Enón. Au pu vejli'i a'utacá'a u chajta'a tɨ ayan tyaja'arajtyahuaa Salim. Ayej ti'iruurajca'a a'ini eihua pu jájmuaaca'a aujna. Majta mu eihua tyaɨte e'iré'eninyeica'a ɨ jemin tɨ ij hua'umuaɨ'ɨhua. 24Ayaa pu ti'iruurajca'a a'ini camuu xɨ ra'ityanajca'a maɨjna ɨ Juan. 25Matɨ'ɨj mi autyajhuii aɨme ɨ maj Juan jamuan á'ujhua'anya'a mej tyújtya'axɨn aɨme jamuan ɨ seica ɨ maj Israel jetze ajtyama'acan maɨjna cɨme'e ɨ hua'aye'ira, ɨ tɨ nu'u ayan ruxe'eve'e maj nu'u e'etyɨ'ɨhuaxɨn. 26Matɨ'ɨj mi e'ire'enye ɨ Juan jemi. Aj mu mi meyan tiraata'ixaa tɨcɨn: ―Rabí, casi'i a'ij tɨ rɨcɨ aɨjna tɨ aun a'utyavaaca'a mueetzi jemi patɨ'ɨj paun u jetze pujme'en u Jordán. Ai pu hui aɨn pueen ɨ paj cɨme'en tyu'utaxajtaca'a. Ajta ijii, aɨ pu hua'amuaɨ'ɨhua ɨ tyaɨte. Majta naimi'i mu e'ire'eninyei ɨ jemin. 27Ajta aɨn Juan ayaa pu tyu'utanyúu tɨcɨn: ―Tɨj na'a tɨ a'atɨ ayan ra'ancura'asin, ayaa pu ti'ijcɨ'ɨti aɨjna cɨme'e tɨ Dioj ayan raata'asin. 28Muan xu hui sajta seri náanamuajri'i nyej neyan tyajamuaata'ixaa yee nyaj cai nyaɨn pueen ɨ Cɨriistu'u tɨ Dioj ra'antihuau, silu Dioj pu ayan nyaja'utaityaca'a nyej ni anacai huataseijre'en muejmi jemi. 29Ayaa pu ti'irɨnyaca tɨ'ɨj a'atɨ huatyenyaɨche. Aɨjna ɨ jɨita'a, aɨ pu huatyaturaasin aɨjna jemi tɨ ra'ancure'evi'itɨ. Ajta aɨn amiincura'an ɨ a'atɨ, aɨ pu a vejli'i a'utyavaaca tɨ ij ayan ra'anvi'itɨn aɨjna ɨ jɨita'a aɨjna jemi ɨ tyaata'a. Aɨ pu ajta ayan rutyamua'ave'e aɨjna cɨme'e tɨ ayan ranamua a'ij tɨ aɨn a'atɨ tyu'utaxajta aɨjna cɨme'e tɨ ari ra'ancure'evi'itɨ aɨjna ɨ jɨita'a. Ayaa nu hui che'eta nyana'a nyetyamua'ave'e inyaa a'ini pu'uri antipua'ari ɨ nyaj cɨn antinmua'aree. 30Ayaa pu ruxe'eve'e tɨ aɨn eitze'e va'acan cɨn tye'entyarute. Ajta inyeetzi jemi, ayaa pu ajta ruxe'eve'e nyej eitze'e cɨleenya'a cɨn tyu'utyavaɨre'en. ―Ayaa pu tyu'utaxajtaca'a aɨjna ɨ Juan―. 31’Aɨjna tɨ hui u e'icaanye u ute'e, aɨ pu nain cɨn antyujmua'aree. Nyajta inyaa, i nyej iiyan chaanaca japua ma'acan, iiya nu hui ma'acan, nyajta neyan ti'ixaxa'a a'ij tɨ ti'itɨj rɨɨ a'aye'i iiyan chaanaca japua. Ajta aɨn tɨ ute'e e'icaanye, aɨ pu nain cɨn antyujmua'aree. 32Aɨ pu ayan aɨjna cɨn ti'ixaxa'a a'ij tɨ aɨn tyu'useij, ajta a'ij tɨ aɨn tyu'unamuajri'i ɨ Dioj jemi. Ma ajta, capu a'atɨ ra'atzaahuate'e a'ij tɨ ti'ixaj. 33Ajta aɨn tɨ ayan ra'antzaahuate'e, aɨ pu ayan raata'itiira tɨ ayan ti'ayajna tɨ Dioj ayan tzaahuati'ira'a cɨn ti'ixaxa'a. 34Aɨjna tɨ Dioj ya'utaityaca'a, ayaa pu hui che'eta na'a aɨjna cɨn ti'ixaj a'ij tɨ tyu'utaxajtaca'a ɨ Dioj. Ayaa pu aɨjna cɨn rɨcɨ a'ini Dioj pu ayan raata'a tɨ aɨn xaijnyu'ucara'ara'an ɨ Dioj nain cɨn huatyaturan ɨ jemin. 35Ajta, aɨn ya'upuaara'an raxe'eve'e ɨ ruyauj, ajta ayan raata'a tɨ aɨn yaujra'an nain cɨn antyujmua'aréera a'ara'ani. 36Aɨjna tɨ ra'astijre'e aɨjna ɨ yaujra'an, aɨ pu ruuri huatyaturaasin ɨ Dioj jemi tɨj na'a rusen cɨme'e. Ajta aɨn tɨ cai ayan tira'ará'astijre'e, capu ayan racɨ'ɨti tɨ ruuri huatyaturan ɨ Dioj jemi silu Dioj pu pueijtzi raata'asin, jicu.

will be added

X\