San Juan 21

1Tɨ'ɨjta'i, Jesús ajtahua'a huataseijre aɨme jemi ɨ maj jamuan á'ujhua'anya'a. Ayaa pu tyu'urɨj. 2Au mu a'utyáuuca'a aɨjna ɨ Simón tɨ ajta i'i Pedro, ajta aɨjna ɨ Tomás ɨ mej meyan ratamua'amua tɨcɨn ɨ tɨ hua'apuarí. Au mu majta a'utyáuuca'a aɨjna ɨ Natanael tɨ aun e'ema'acan u Caná, chajta'a tɨ aun huatacá'a u Galileeya, majta aɨme ɨ yaujmua'ame'en pueen ɨ Zebedeo, majta seica ɨ maj hua'apua ɨ maj majta jamuan á'ujhua'anya'a. 3Ajta aɨn Simón tɨ ajta i'i Pedro, ayaa pu tihua'uta'ixaa tɨcɨn: ―Nyauche'e nu hui tityáuhue'itepuan. Matɨ'ɨj mi meyan tiraata'ixaa tɨcɨn: ―Tyan tu yeehui tyajta a'uju'un ta'aju'un. Matɨ'ɨj mi u a'uju'un. Majta maun atyaacɨ ɨ baarcu jetze. Muaataxai mej hue'itepua. Majta, camu ti'itɨ huateevi'i. 4Iya'ata pu'u, tɨ'ɨj ari tapua'arijma'aca, Jesús pu aun a'utyavaaca'a a saata'a. Majta aɨme ɨ maj jamuan á'ujhua'anya'a, camu raamuá'a tɨ aɨn puéenya'a. 5Aj pu'i Jesús ayan tihua'utaihua'uri'i tɨcɨn: ―Mɨ sej nye'ihuaamua'a, ¿ni seri hui hua'uvívi'i ɨ hue'ite? Matɨ'ɨj mi meyan tyu'utanyúu tɨcɨn: ―Catú. Catu yeehui a'atzu. 6Aj pu'i ayan tihua'uta'ixaa tɨcɨn: ―Sata'aj hui ra'atyahua'axɨn ɨ a'amua xajmua'a ɨrɨɨta'an pujme'en ɨ baarcu jetze. Amaa xu yee seica tyauuni. Matɨ'ɨj mi meyan huarɨj. Cɨme'en mu'u meyan huarɨj, aj mu mi ava'ajɨstyaca'a ɨ hue'ite ɨ xajmua'ari tzajta'a. Ajta, capu huatarɨ'ɨristaraca'a maj ra'itapín aɨjna cɨme'e ɨ maj mui'icaa ɨ hue'ite. 7Ajta aɨn ɨ tɨ Jesús raxe'eva'acaa, ayaa pu tiraata'ixaa ɨ Pedro tɨcɨn: ―Tavastara'a pu pueen amɨjna. Ajta aɨn Pedro, aɨ pu tye'ijvihuáani a'utyavaaca'a tɨ ij ruxaahua tyu'umuare'en. Cɨme'en pu'u ayan raanamuajri'i tɨ amingura'an ayan tyu'utaxajtaca'a yee aɨn a'atɨ pu tavastara'a pueen, aj pu'i ucaujchejte ɨ rusiicu'u. Aj pu'i atyejve a jaata'a. 8Majta aɨme ɨ seica, cujta'an mu huaju'uncaa. Maraajájpuajmá'a ɨ xajmua'ari, mua'ava'ɨstican ɨ hue'ite. Capu a'achu áuteevi'i a'utɨ avastɨmee ɨ jaj, a'achu cumu anxɨte meetru. 9Matɨ'ɨj meri maun a'ará'a a'u tɨ a'uhuáchi, aj mu mi meyan raaseij tɨ aun á'ataaca'a, ajta ari á'atɨ'ɨxcuara'acaa. Hue'ite mu an á'uje'etii ɨ tɨ'ɨxcuá japua. Ajta pan pu an á'umuaanica'a. 10Jesús pu ayan tihua'uta'ixaa tɨcɨn: ―Sata'aj hui má muaja'avá'ɨn seica ɨ hue'ite ɨ saj sauchan hua'uvívi'i. 11Aj pu'i Simón tɨ ajta i'i Pedro, au pu atyajraa ɨ baarcu jetze. Ajta ra'ityajájpuaca'a ɨ xajmua'ari a'u tɨ a'uhuáchi. Tyamua'a mu titya'avá'ɨstica'a ɨ hue'ite mej vivéjmee. Ayaa mu ará'asica'a a'achu cumu anxɨte japuan hua'apuate japuan tamuaamuata'a japuan hueica. Ajta aɨn xajmua'ari, capu huasujtza'an, capu amɨn a'ij mej meyan ava'ɨstica'a. 12Aj pu'i Jesús ayan tihua'uta'ixaa tɨcɨn: ―Iya'aj sétyú'ucua'a. Capu a'atɨ ahuaujca'anye tɨ ayan raataihua'u yee a'atɨ tɨ pɨrɨcɨ a'ini mu'uri ramua'areeraca'a tɨ aɨn pueenya'a ɨ tavastara'a. 13Aj pu'i Jesús aun e'ire'enye ɨ hua'a jemi, ajta ra'antyɨ'ɨpɨ'ɨ ɨ pan. Aj pu'i hua'ura'ɨpɨ'ɨte. Ayaa pu che'eta na'a huarɨj aɨjna cɨme'e ɨ hue'ite. 14Pu'uri i'i hueica tɨ Jesús ayan huataseijre aɨme jemi ɨ maj jamuan á'ujhua'anya'a tɨ'ɨj ari a'itáraa hua'a tzajta'a ɨ mej meri huacuii. 15Matɨ'ɨj meri tyu'ucuaa, Jesús pu ayan tiraata'ixaa ɨ Simón tɨ ajta i'i Pedro tɨcɨn: ―Simón, mɨ pej yaujra'an pueen ɨ Juan, ¿ni tzaa peyan eitze'e nyexe'eve'e maj nu'u cai amɨme? Ajta aɨn Pedro, ayaa pu tiraata'ixaa tɨcɨn: ―Ee xaa nya'u, nyavastara'a. Muaa pa yeehui ramua'aree nyaj muaxe'eve'e. Jesús pu ayan tiraata'ixaa tɨcɨn: ―Pata'aj yeehui rɨ'ɨ tihua'uchaɨn ɨ nyatɨ'ɨrijmua'a. 16Ajtahua'a pu Jesús ayan tiraata'ixaa tɨcɨn: ―Simón, mɨ pej yaujra'an pueen ɨ Juan, ¿ni qui panxe'eve'e? Ayaa pu tyu'utanyúu tɨcɨn: ―Ee xaa nya'u, nyavastara'a. Muaa paj ramua'aree nyej muaxe'eve'e. Jesús pu ayan tiraata'ixaa tɨcɨn: ―Pata'aj rɨ'ɨ hua'uruuren paɨme ɨ mej nyeetzi jemi tyujsa'ɨrihua'a mua'aye'i. 17Ajtahua'a pu ayan che'eta na'a tiraataihua'uri'i tɨcɨn: ―Simón, mɨ pej yaujra'an pueen ɨ Juan, ¿ni qui peyan tzaahuati'ira'a cɨn nyexe'eve'e? Ajta aɨn Pedro, a'ij pu pua'a raata'a tɨ Jesús ayan che'eta na'a hueica tiraataihua'uri'i tɨ pua'a nu'u ayan raxe'eva'acaa. Aj pu'i ayan tiraata'ixaa tɨcɨn: ―Nyavastara'a, muaa paj yeehui nain cɨn ru'umua'aree. Muaa paj peyan ramua'aree nyaj xaa muaxe'eve'e. Jesús pu ayan tiraata'ixaa tɨcɨn: ―Pata'aj rɨ'ɨ tihua'uchaɨn ɨ mej nyeetzi jemi tyujsa'ɨrihua'a mua'aye'i. 18Ayaa nu hui ti'imue'ixaate'e tzaahuati'ira'a cɨme'e. Patɨ'ɨj pauj pa'arɨ'ɨstaca'a, ayaa papu'u ti'ite'echetyahua'a pej pi axaahua á'ucha'acanye'en a'ij tɨ timua'aranajchaca'a. Ma ajta, majca'i huayee, patɨ'ɨj peri vastacɨra'itan, ayaa papu'u hui ajméijca'ataxɨ'ɨsin tɨ ij a'atɨ ayan mu'ucachejte'en. Aɨ pu mua'avi'itɨn a'u paj cai a'uye'imɨ'ɨ. ―Ayaa pu tiraata'ixaa aɨjna ɨ Jesús. 19Ayaa pu een cɨn tyu'utaxajtaca'a ɨ Jesús mej mi meyan raamua'aree a'ij tɨ ye'i tí'imɨ'ɨni aɨjna ɨ Pedro, tɨ ajta cɨn rɨ'ɨ tiraata'asin ɨ Dioj. Aj pu'i Jesús ayan tiraata'ixaa aɨjna ɨ Pedro tɨcɨn: ―Pauche'e peyan na'astijra'a asta pana'a cai huamɨ'ɨni. 20Aj pu'i Pedro pɨ a'ure'eve tɨ'ɨj raaseij tɨ cujta'an huama'acaa aɨjna tɨ Jesús raxe'eva'acaa. Aɨ pu aɨn pueenya'a tɨ ayan e'icaujtutzi an taviitze'en ɨ Jesús matɨ'ɨj ti'icua'acaa, tɨ ajta ayan tiraataihua'uri'i tɨcɨn aɨjna ɨ Jesús: “Tavastara'a, ¿a'atani hui muaatatuiire'esin aɨme jemi?” 21Tɨ'ɨj Pedro ayan raaseij, ayaa pu tiraataihua'uri'i tɨcɨn: ―Ari amɨjna, nyavastara'a, ¿a'iqui ti'itɨj raruuren? 22Aj pu'i Jesús ayan tiraata'ixaa tɨcɨn: ―Capu hui mueetzi jetze ruxe'eve'e tɨ pua'a ayan na'araanajchi tɨ aɨn ayan ruuri huatyaturan asta nyana'a cai yan uvé'enyen. Pata'aj peyan na'astijra'a inyeetzi. ―Ayaa pu tiraata'ixaa. 23Aɨj mu cɨn meyan ta'utanamuajri'i yee tɨ nu'u cai a'anaj mɨ'ɨni aɨjna ɨ a'atɨ tɨ Jesús jamuan á'ucha'acanya'a. Ma ajta, capu ayan tyu'utaxajtaca'a aɨjna ɨ Jesús tɨ nu'u cai mɨ'ɨni silu capu jetzen ruxe'eva'acaa tɨ pua'a aɨn a'atɨ ayan ruuri huatyaturan asta na'a cai uvé'enyen ɨ Jesús. 24Nyaa nu nyaɨn pueen i nyaj Jesús jamuan á'ucha'acanya'a. Nyajta nu neyan nyaɨjna cɨn ti'ityáxajta. Nyajta neyan tira'utéyu'uxaca'a. Tyajta ityan, ayaa tu ramua'aree tɨ ayan ti'ayajna a'ij nyaj ti'ityáxajta. 25Capu ti'iseicaj na'a ɨ seica tɨ Jesús ayan tyu'uruu. Tɨ pua'a meyan nain a'uyú'uxanche'e, ayaa pu tina'amitejte'e tɨ cai yan japuan á'avejri ɨ chaanaca japua nain ɨ yu'uxari tɨ ayan tyu'ujxé'eve'enche'e mej tya'uyú'uxan.

will be added

X\