San Juan 19

1Aj pu'i Pilaatu ya'uvi'itɨ aɨjna ɨ Jesús mej mi ra'ityavajxɨ'ɨn maɨjna cɨme'e ɨ cuaarta. 2Matɨ'ɨj mi aɨme ɨ xantaaru'u, tzicare'e mu huatyácɨstaca'a mej mi curuun huatyátaahua. Matɨ'ɨj mi ra'avá'amuaniiri'i. Matɨ'ɨj mi cɨɨxuri ru'ucávɨjri'i tɨ nacamua. 3Mui'itɨ mu ajtyáxɨɨraca'a vejli'i ɨ jemin. Ayaa mu ti'ire'ixaatya'acaa tɨcɨn: ―Aja'ɨ, mɨ paj nu'u yeehui tihue'ijte'e ɨ mej Israel jetze ajtyama'acan. Matɨ'ɨj mi ra'araavajxɨ. 4Aj pu'i ajtahua'a huirajraa aɨjna ɨ Pilaatu. Ayaa pu tihua'uta'ixaa tɨcɨn: ―Casi'i muan, nu'uri hui neyan amuaatatuire'esin sej si seyan raamua'aree tɨ cai ti'itɨ a'ij tina'amitejte'e ɨ nyaj cɨn ti'itɨj cɨn jetzen tya'ujpuá'ajte'en. 5Aj pu'i Jesús ajta huirajraa. Auche'e pu ayan tira'ava'amuá aɨjna ɨ curuun tɨ tzicare'e cɨn cɨstíjhuaca'a, ajta ru'ucavɨ́ɨ aɨjna ɨ cɨɨxuri tɨ nacamua. Tɨ'ɨj Jesús huirajraa, aj pu'i Pilaatu ayan tihua'uta'ixaa tɨcɨn: ―Ya'acui, pu'uri ya huatyéjvee i tyaata'a. 6Majta aɨme ɨ mej meyan ti'ijta u teyujta'a, majta aɨme ɨ mej maun tí'icha'ɨ, cɨme'en mu'u meyan raaseij, aj mu mi ca'anin cɨn huatyejiihuajraa tɨcɨn: ―A'utataichi ɨ curuu jetze. A'utataichi papu'u. Aj pu'i Pilaatu ayan tyu'utanyúu tɨcɨn: ―Muan xu hui ra'anvi'itɨn sej si rujɨɨmua'a sana'a rá'utatan. Me nyajta nyaa, capu hui a'ij ayan tina'amitejte'e ɨ nyaj cɨn ti'itɨj cɨn jetzen tya'ujpuá'ajte'en. 7Majta aɨme ɨ mej maun ti'ijta u teyujta'a, eihua mu meyan tí'ira'ixaatya'acaa tɨcɨn: ―Ayaa tu yeehui tirájye'ira tɨ cɨme'en ayan tiraavijte'e tɨ aɨn aɨjna cɨn huamɨ'ɨni aɨjna cɨme'e tɨ ayan huataujseijrataca'a tɨ aɨ pu nu'u aɨn pueen ɨ yaujra'an ɨ Dioj. 8Tɨ'ɨj ayan raanamuajri'i aɨjna ɨ Pilaatu, eitze'e pu tyu'utatzɨn. 9Ajtahua'a aun utyajrupi u chi'ita. Ajta ya'uvi'itɨ ɨ Jesús. Aj pu'i ayan tiraataihua'uri'i tɨcɨn: ―¿A'uni yeehui a'ɨmɨ peyan e'ema'acan muaa? Ajta aɨn Jesús, capu a'atzu huatanyúu. 10Aj pu'i Pilaatu ayan tiraata'ixaa tɨcɨn: ―¿Ni tzaa pacai peyan ahua'aca'anyej pej yeehui tinaata'ixaate'en? ¿Ni cai ayan timua'amitejte'e nyaj nyaɨjna cɨn antinmua'aree nyej ni mue'irajtuaani, nusu nyej ni nyajta ma'utatan ɨ curuu jetze? 11Ajta Jesús ayan tiraata'ixaa tɨcɨn: ―Tɨ pua'a cai anacai Dioj ayan muaata'acarénche'e pej peyan tye'enti'amua'areera, capej ti'itɨj cɨn anti'amua'arenche'e inyeetzi jemi. Aɨj pu cɨn, aɨme ɨ mej nyeetzi cɨme'en tyu'utatuii mueetzi jemi, eitze'e mu ti'itɨj cɨn autyajturaa ɨ Dioj jemi. 12Tɨj na'a tɨ Jesús ayan tyu'utaxajtaca'a, aɨn Pilaatu pu ayan rahuauca'a a'ij tɨ huarɨni tɨ ru'irajtuaani aɨjna ɨ Jesús. Ma majta aɨme, ɨ mej maun ti'ijta teyujta'a, majtahua'a mu meyan tityeetejiihuajraa tɨcɨn: ―Tɨ pua'a hui peyan ru'irajtuaani pamɨjna mɨ tyaata'a, capej che'e ti'itɨj cɨn ti'ityavaa pua'ame paɨjna jemi ɨ César tɨ ti'itaijte'e a'ini a'atɨ tɨ na'a tɨ ayan huataujseijrata tɨ aɨn pueen tɨ ti'itaijte'e, aɨ pu hui ayan rájchaɨre'e aɨjna ɨ César. ―Ayaa mu tyu'utaxajtaca'a. 13Tɨ'ɨj Pilaatu ayan raanamuajri'i, aj pu'i ru'iraavi'itɨ aɨjna ɨ Jesús. Aj pu'i Pilaatu an a'ujyeijxɨ japuan ɨ ɨpuari a'u mej tyaja'axa'apɨ'ɨntare'e. Ayaa pu tyaja'arajtyahuaa aujna tɨcɨn Au tɨ tetej a'umuáanijmee tɨ pa'atza. Ajta, ayaa pu tyaja'arajtyahuaa hua'anyuuca cɨme'e ɨ hebreo tɨcɨn Gabata. 14Pu'uri ajna pɨti'irɨjcaa ɨ xɨcaara'an mej jetzen rɨ'ɨ huaujruuren mej mi meyan maɨjna cɨn ra'utamua'aree ajna xɨcaara'an jetze tɨ Dioj jetzen tihua'utauuni'iri'i. Pu'uri ayan pɨti'irɨjcaa a'atzaa cumu tacuarixpua. Aj pu'i Pilaatu ayan tihua'uta'ixaa tɨcɨn: ―Ya'acui ari'icu, mɨ tɨ hui tyaja'amue'ijte'e. 15Majta maɨn, ayaa mu titeetejiihuajraa tɨcɨn: ―Huiravi'itɨchi. Majta meyan tɨcɨn: ―Huiravi'itɨchi, pata'aj rá'utatan ɨ curuu jetze. Aj pu'i Pilaatu tihua'utaihua'uri'i tɨcɨn: ―¿Ni tzaa seyan raxe'eve'e nyej ni hui neyan rá'utatan nyamɨjna tɨ tyaja'amueijte'e? Majta aɨme ɨ mej maun ti'ijta teyujta'a, ayaa mu tiraata'ixaa tɨcɨn: ―Capu hui a'atɨ ti'itaijte'e silu aɨ pu'u tɨ César cɨn ti'ityejvee. 16Tɨ'ɨj ta'i Pilaatu ayan hua'utatui aɨjna ɨ Jesús mej mi meyan rá'utatan ɨ curuu jetze. 17Matɨ'ɨj mi aɨme ɨ xantaaru'u meyan ya'uvi'itɨ. Ajta aɨn Jesús, aɨ pu yá'uchui ɨ rucúruu. Matɨ'ɨj mi mauna a'ará'a a'u tɨ ayan tyaja'arajtyahuaa tɨcɨn Mɨ'ɨchimu'uta. Ayaa pu tyaja'arajtyahuaa hua'anyuuca cɨme'e ɨ Hebreo tɨcɨn Gólgota. 18Au mu rá'utatai jamuan hua'apuaca, saɨjta'a mu rá'utatai ɨ saɨj, majta saɨjta'a ɨ saɨj. Ajta aɨn Jesús, au pu e'ita'a á'utataihuaca'a. 19Pilaatu pu ayan raataijtaca'a mej meyan ra'uyu'uxa jetzen ɨ taabla tɨ ayan tyá'axajtacaa tɨcɨn: “Jesús Nazaret tɨ nu'u e'ema'acan, tɨ ajta nu'u tihue'ijte'e aɨme ɨ maj Israel jetze ajtyama'acan.” Matɨ'ɨj mi rá'utatai ɨ curuu jetze a'u tɨ á'ujmu'u ɨ Jesús. 20Majta aɨme ɨ mej Israel jetze ajtyama'acan, mui'itɨ mu meyan ra'ujijve a'ini au pu vejli'i pɨja'arɨjcaa u chajta'ana jetze a'u maj rá'utatai. Ajta aɨn tɨ a'asɨɨmue'ihuaca'a, hueica nyuucari pu cɨn á'ayu'usi'ihuaca'a, ɨ hua'a nyuuca ɨ Hebreo, ajta hua'anyuuca ɨ mej Roma e'ema'acan, ajta hua'anyuuca ɨ Griego. 21Majta aɨme ɨ mej maun ti'ijtaca'a u teyujta'a, ayaa mu huaujnyuuste maɨjna jemi ɨ Pilaatu. Ayaa mu tiraata'ixaa tɨcɨn: ―Capej peyan hui ra'ayu'uxa yee aɨ pu nu'u ti'itaijte'e ityejmi i tyaj Israel jetze ajtyama'acan silu ayaa papu'u yee aɨ pu ayan ruseijrata tɨ aɨn pueen ɨ tɨ ti'itaijte'e. 22Aj pu'i Pilaatu ayan tihua'uta'ixaa tɨcɨn: ―Che'e yeehui ayan eenye'en a'ini nu'uri neyan ra'uteyu'uxaca'a a'ij nyej tiraaxa'apɨ'ɨntare. 23Majta aɨme ɨ xantaaru'u, matɨ'ɨj meri rá'utatai ɨ Jesús, matɨ'ɨj mi ti'ijpí ɨ tí'icɨɨxura'ara'an. Matɨ'ɨj mi muaacuaque'e ti'ijxáɨra'axɨ maɨjna ɨ tí'icɨɨxura'ara'an. Tɨj na'a tɨ saɨque tí'ijcatii, saɨj pu raacɨ́'ɨ ɨ xantaaru'u. Ajta aɨ pu ava'aturaa ɨ siicu'ura'ara'an tɨ ru'ucavɨ́ɨ a'aye'i. Seij pu cɨn jitzijhuaca'a nain japua. 24Aɨj mu cɨn meyan tyu'utaurixaa tɨcɨn: ―Tiche'e cai yeehui rasujtza'ana silu tiche'e teyan ti'ihuatamue'itɨn tetej cɨme'e tyej ti teyan raamua'aree a'atɨ tɨ ayan racɨ'ɨti. Ayaa pu ayan tyu'urɨj tɨ ij ayan aráurasten a'ij tɨ te'eyu'usi'i ɨ yu'uxari jetze tɨ ayan tɨcɨn: “Aɨ mu yeehui saaxu'ijme'en huara'ujpi ɨ ti'inyacɨɨxu. Majta mu maɨn ti'ihuaujmue'itɨ tetej cɨme'e mej mi yeehui raamua'aree a'atɨ tɨ racɨ'ɨti ɨ nyesiicu'u.” Ayaa mu xaa nya'u meyan huarɨj aɨme ɨ xantaaru'u. 25Majta seica, a mu vejli'i a'utyáuuca'a a'u tɨ a'uvaatɨma'acaa ɨ curuu. Ai mu aɨn pueenya'a ɨ naanajra'an ɨ Jesús, ajta ɨ juutzajra'an ɨ naanajra'an, ajta aɨjna ɨ Mariiya tɨ ɨra'ara'an pueenya'a aɨjna ɨ Cleofas, ajtahua'a seij, aɨjna ɨ Mariiya, Magdala tɨ e'ema'acan. 26Aj pu'i Jesús ayan raaseij tɨ aun a'utyavaaca'a ɨ runaana. Ajta pu aun vejli'i a'utyavaaca'a aɨjna Jesús tɨ raxe'eva'acaa, tɨ ajta jamuan á'ucha'acanya'a. Aj pu'i ayan tiraata'ixaa ɨ runaana tɨcɨn: ―Casi'i, muaa jɨita'a, ma'a pu huatyejvee amɨjna tɨ ayauj pueen. 27Ajta ayan tiraata'ixaa aɨjna tɨ jamuan á'ucha'acanya'a tɨcɨn: ―Ya'acui ari huatyejvee aɨjna tɨ hui anaanaj pueen. Tɨj na'a tɨ ayan tyu'utaxajtaca'a, tɨ yu e'ire'enye aɨn tɨ jamuan á'ucha'acanya'a ayan ya'uvi'itɨ ɨ naanajra'an ɨ Jesús tɨ ij aun huatyaturan u ruche. 28Tɨ'ɨqui ayan huarɨj aɨjna ɨ Jesús. Pu'uri ramua'areeraca'a tɨ ari nain te'entipua'ari. Tɨ'ij ayan aráuraste'esin a'ij tɨ te'eyu'usi'ihuaca'a ɨ yu'uxari jetze, ayaa pu i tyu'utaxajtaca'a tɨcɨn: ―Ne'imɨ'ɨ. 29Aa pu vejli'i xa'ari a'utácatii tɨ ava'ɨsticaa aɨjna ɨ viinu tɨ antzina. Matɨ'ɨj mi ti'itɨj huatyáaru'une tɨ ta'achira'a ɨ viinu cɨme'e, matɨ'ɨj mi jisopo cɨya'ara'an jetze ma ru'ucaaxu'i, aj mu mi ra'ajtyaxɨɨraca'a vejli'i ɨ tenya'ara'an jetze. 30Tɨ'ɨj aɨn ra'anti'i, aj pu'i ayan tyu'utaxajtaca'a tɨcɨn: ―Pu'uri icu. Nu'uri ra'antipua'ari. Cɨme'en pu'u ayan tyu'utaxajtaca'a, aj pu'i a'icámu'uvajxɨ. Aj pu'i huamɨ'ɨ aɨjna ɨ Jesús, icu. 31Pu'uri ajna pɨti'irɨjcaa ɨ xɨcaara'an jetze, ɨ mej jetzen rɨ'ɨ huaujruuren. Ajta aɨn xɨcaara'an jetze tɨ ra'itya'asi, ajna pɨti'irɨjcaa matɨ'ɨj ra'utyahuijsin mej meyan tyu'uyesten maɨjna cɨme'e ɨ xɨcaara'an jetze tɨ jetzen Dioj tihua'utauuni'iri'i. Aɨj mu cɨn, camu raxe'eva'acaa aɨme ɨ maj maun ti'ijtaca'a u teyujta'a mej mi aɨme mɨ'ɨchite meyan huatyaturan majna curuu jetze tɨ'ɨj ari tyaja'ure'enyen ajna saaba jetze. Aɨj mu cɨn rájhuaviiri'i maɨjna ɨ Pilaatu tɨ aɨn ayan tyu'utaijta mej mi aɨme xantaaru'u meyan hua'antína'axɨn ɨ huáɨɨca jetze aɨme ɨ mej hua'utatai, mej mi ca'anacan huacui'ini. Tɨ pua'a meyan huarɨni, aj pu'i rɨ'ɨrista a'ame mej hua'acajtuaani ɨ mɨ'ɨchite. 32Aɨj mu cɨn u a'uva'aju'un aɨme ɨ xantaaru'u. Matɨ'ɨj mi ra'antina'axɨ ɨ ɨɨcajra'an jetze ɨ saɨj ɨ maj rá'utatai ɨ Jesús jamuan. Majta meyan che'eta mana'a huarɨj ɨ seij jemi. 33Ma ajta, matɨ'ɨj Jesús jemi a e'ire'enye, matɨ'ɨj mi raaseij tɨ aɨn ari mɨ'ɨchica'a. Aɨj mu cɨn cai ra'antina'axɨ ɨ ɨɨcajra'an. 34Ma ajta seij ɨ xantaaru'u, aɨ pu ra'ajtyéjtze itza'apuara'ara'an jetze cɨye cɨme'e tɨ antipiti. Aj pu'i airaaxɨrej eihua ɨ jaj, ajta ɨ xuure'e. 35Nyajta inyaa, i nyej neyan raaseij, nyaa nu neyan ti'ityáxajta. Ajta ayaa pu ayan ti'ayajna a'ij nyaj ti'ityáxajta. Nyaa nu ramua'aree nyej neyan tzaahuati'ira'a cɨn ti'ixaj. Nyajta neyan nyaɨjna cɨn ti'ityáxajta sej si sajta rá'antzaahuate'en. 36Ayaa pu een cɨn tyu'urɨj tɨ ij ayan aráurasten a'ij tɨ te'eyu'usi'i ɨ yu'uxari jetze tɨ ayan tya'axa tɨcɨn: “Camu nu'u seij antína'aca ɨ cariira'an.” 37Ajta seica jetze tɨ ayan tya'axa tɨcɨn: “Aɨ mu nu'u raseijran maɨjna ɨ maj ra'ajtyéjtze.” 38Tɨ'ɨqui aɨn José, tɨ Arimatea e'ema'acan, aɨ pu rájhuaviiri'i aɨjna ɨ Pilaatu tɨ aɨn raatatuiire'en ɨ tevijra'an ɨ Jesús. Ajta aɨn José, aɨ pu ajta ra'astijra'acaa aɨjna ɨ Jesús. Ma ajta aɨn ayan aviitzi cɨn huarɨj a'ini aɨ pu hua'atzɨɨnya'acaa ɨ maj maun ti'ijtaca'a u teyujta'a. Aj pu'i Pilaatu ayan raata'a. Aɨj pu cɨn u a'uve'eme. Aj pu'i ra'acajtuaa ɨ tevijra'an ɨ Jesús. Tɨ'ɨqui yá'uchui. 39Nicodemo pu ajta jamuan u a'uve'eme. Ai pu aɨn pueenya'a tɨ tɨca'amiste'e ráamuaaraca'a ɨ Jesús. Ti'itɨ pu a'arajtɨɨ, aɨjna ɨ mirra tɨ muatɨ'ɨsi ranaxca tɨ áloes ma'acan, ti'itɨ tu'upi. Ayaa pu tijetyajca'a a'achu cumu seite kiilu japuan tamuaamuata'a. 40Matɨ'ɨj mi yá'uchui ɨ tevijra'an ɨ Jesús. Matɨ'ɨj mi racáhuaa maɨjna cɨme'e tɨ náa tyáará'i. Majta raca'ijcataca'a cɨɨxuri cɨme'e tɨ mestí. Ayaa mu maɨjna cɨn huarɨj a'ij mej tirájye'irajca'a maj hua'ava'anan ɨ mɨ'ɨchite aɨme ɨ mej Israel jetze ajtyama'acan. 41Huastari pu tyeje'ere'evee ajna vejli'i a'u maj rá'utatai maɨjna ɨ Jesús. Ajta aujna, au pu tyasta'a seijra'acaa tɨ a'atɨ aun ya'ujcú tɨ ij aun a'atɨ ava'anan. Ajta, capu xɨ a'atɨ aun ava'anami'ihuaca'a. 42Au mu ya'utyeete maɨjna ɨ Jesús a'ini au pu vejli'i a'utacá'a, ajta pu'uri ajna pɨti'irɨjcaa ɨ xɨcaara'an jetze mej jetzen rɨ'ɨ huaujruuren aɨme ɨ mej Israel jetze ajtyama'acan.

will be added

X\