San Juan 18

1Tɨ'ɨj Jesús ayan raatapua'ajtaca'a tɨ tyu'uxajtaca'a, aj pu'i á'uraa, majta aɨme ɨ maj jamuan á'ujhua'anya'a. Matɨ'ɨj mi antacɨj achi japua tɨ ayan tyaja'arajtyahuaa tɨcɨn Cedrón. Au pu u jetze pujme'en eihua tyu'uvaatɨma'acaa ɨ cɨye, aseituuna cɨye. 2Ajta aɨn ɨ Judás tɨ ayan tyu'utatuire'esin ɨ Jesús cɨme'e, aɨ pu a'amua'atyajca'a aujna a'ini mui'i mu maun e'etyujsaɨ, aɨjna ɨ Jesús, majta ɨ maj jamuan á'ujhua'anya'a. 3Majta aɨme ɨ mej maun ti'ijta teyujta'a, majta aɨme ɨ fariseos, ayaa mu hua'ava'ahuau aɨme ɨ xantaaru'u ɨ mej maun tí'icha'ɨ u teyujta'a. Ayaa mu ara'asicaa a'achu cumu hueicate. Naimi'i mu tatzari tyu'ɨsima'a, majta ti'itɨj aparaatu, majta ɨ maj cɨn huatyenya'use'en. Ajta aɨn ɨ Judás, aɨ pu hua'uvi'itɨjma'a. Matɨ'ɨj mi maun a'ará'a a'utɨ Jesús a'utyavaaca'a. 4Ajta aɨn Jesús aɨ pu ari ramua'areeraca'a a'ij tɨ ti'itɨ raruuren. Aj pu'i hua'antinajchaca'a. Ayaa pu tihua'utaihua'uri'i tɨcɨn: ―¿A'atajni sahuauhuau? 5Ayaa mu tiraata'ixaa tɨcɨn: ―Jesús, tɨ Nazaret e'ema'acan. Aj pu'i Jesús ayan tihua'uta'ixaa tɨcɨn: ―Nyaa nu nyaɨn pueen. Ajta aɨn Judás, tɨ ayan tyu'utatuiire'esin, au pu hua'a jamuan a'utyavaaca'a ɨ xantaaru'u. 6Tɨ'ɨj Jesús ayan tihua'uta'ixaa yee tɨ nu'u aɨn pueen, aɨ mu ruhuarita'a caacɨj. Majta a'aráavatzɨ a chuaata'a. 7Ajtahua'a pu ayan tihua'utaihua'uri'i tɨcɨn: ―¿A'atajni sahuauhuau? Majta meyan tiraata'ixaa tɨcɨn: ―Jesús tɨ Nazaret e'ema'acan. 8Aj pu'i ayan tihua'uta'ixaa tɨcɨn: ―Nu'uri hui neyan tyajamuaata'ixaa yee nyaj nyaɨn pueen. Tɨ pua'a seyan nyeetzi huauhuau, sata'aj seyan hua'uta'an maj á'ucɨɨnye amɨme ɨ mej nyaa jamuan á'ujhua'an. ―Ayaa pu tihua'uta'ixaa aɨjna ɨ Jesús. 9Ayaa pu tyuju'urɨj tɨ ij ayan aráurasten a'ij tɨ aɨn ari tyu'utaxajtaca'a tɨcɨn: “Capu nu'u a'atɨ á'uvej tɨ hua'a jetze ajtyama'acan aɨme paj nu'u naatatuiiri'i.” 10Ajta aɨn Simón, tɨ ajta i'i Pedro, aɨ pu chun huitechuiica'a. Aɨ pu rú'ijcupi. Aj pu'i aɨjna cɨn tiraapueij tɨ ravaɨra'acaa aɨjna ɨ tɨ nain cɨn antyujmua'areeraca'a u teyujta'a. Pedro pu ayan ra'ajtaveijchaca'a ɨ naxaira'an ɨ a'atɨ. Ayaa pu antyahuaaca'a aɨjna tɨ ti'ivaɨre'e tɨcɨn Malco. 11Aj pu'i Jesús ayan tiraata'ixaa aɨjna ɨ Pedro tɨcɨn: ―Ucarujte'e mɨ a'achun. ¿Ni cai ayan ruxe'eve'e nyej nyaɨjna cɨn ra'ara'astijre'en ɨ tɨ niya'upua ayan cɨn tinyeijca? 12Matɨ'ɨj mi aɨme ɨ xantaaru'u, ajta aɨn ɨ tɨ hua'a capitán pueen, majta aɨme ɨ maj maun tí'icha'ɨ u teyujta'a, aɨ mu raatyeevi'i maɨjna ɨ Jesús. Matɨ'ɨj mi ra'anaajɨ'ɨque. 13Anacai mu maun ya'uvi'itɨ maɨjna jemi ɨ Anás, a'ini aɨ pu aɨn pueenya'a ɨ mu'unyaara'an aɨjna ɨ Caifás tɨ ajna'ɨmɨ nain cɨn antyujmua'areeraca'a u teyujta'a. 14Ajta aɨn Caifás, aɨ pu aɨn pueenya'a tɨ ayan tihua'uta'ixaa ɨ maj Israel jetze ajtyama'acan tɨ ayan nu'u tihua'atyava'ɨrihua'an tɨ saɨj na'a ɨ tevi ayan huamɨ'ɨni hua'a jetze ma'acan ɨ tyaɨte. 15Ajta aɨn Pedro, aɨ pu ɨmɨ huama'acaa cujta'an ɨ Jesús. Ajta jamuan huama'acaa seij tɨ ajta Jesús jamuan á'ucha'acanya'a. Ajta aɨn ɨ saɨj tɨ Jesús jamuan á'ucha'acanya'a, aɨ pu ramua'atyajcaa aɨjna tɨ nain cɨn antyujmua'areeraca'a u teyujta'a. Aɨj pu cɨn, jamuan ɨ Jesús aun a'utyajrupi a'u tɨ a'aráyaujta'a ajna tɨ e'eche aɨjna ɨ tɨ ti'ijta. 16Ajta aɨn Pedro, pua'aque pu a'utyajturaa ta'apueerta. Aj pu'i ɨ saɨj tɨ Jesús jamuan á'ucha'acanya'a, aɨ pu a'uré'enye ta'apueerta. Aj pu'i ayan tiraata'ixaa aɨjna ɨ jɨita'a tɨ aun tí'icha'ɨ ta'apueerta. Aj pu'i aun ya'uvi'itɨ aɨjna ɨ Pedro. 17Aj pu'i aɨn jɨita'a tɨ aun tí'icha'ɨ ta'apueerta, ayaa pu aɨn ɨ Pedro tyu'uta'ixaa tɨcɨn: ―¿Ni hui pacai pajta muaa hua'a jetze ajtyama'acan aɨme ɨ mej maɨjna jamuan á'ujhua'anya'a? Aj pu'i ayan tiraata'ixaa tɨcɨn: ―Canu hui a'atzu. 18Eecan pu huaseevi'i ajna'ɨmɨ. Majta aɨme ɨ mej ti'ivaɨre'e u teyujta'a, majta aɨme ɨ maj maun tí'icha'ɨ, aɨ mu auunai. Majta au mu atavaatɨma'acaa a'u tɨ a'ataa mej mi huaujcɨxaite'en. Ajta aɨn Pedro, aɨ pu hua'a jamuan a'utyavaaca'a, ajta pu aɨn rucɨxaitya'acaa. 19Meenti aɨn tɨ nain cɨn antyujmua'areeraca'a, aɨ pu ayan tiraataihuauri'i aɨjna ɨ Jesús aɨjna cɨme'en ɨ maj jamuan á'ujhua'anya'a, ajta aɨjna cɨme'en a'ij tɨ aɨn tí'imua'atajca'a. 20Jesús pu ayan tiraata'ixaa tɨcɨn: ―Nyaa nu hui eijre'e tihua'uta'ixaa ɨ tyaɨte ɨ mej yan seijre'e iiyan chaanaca japua. Tɨ'ɨj pɨ na'a nu tihuá'amua'atyajcaa hua'a teyujta'a, nyajta nyaujna teyujta'a a'u maj e'etyujsa'ɨri aɨme ɨ mej Israel jetze ajtyama'acan. Canu hui ti'itɨ aviitzi cɨn tyu'utaxajtaca'a. 21¿A'ini een cɨn peyan ti'inye'ihua'u? Pata'aj peyan tihua'utaihua'u paɨme ɨ mej náanamuajri'i. Casi'i, aɨ mu xaa nya'u meyan ramua'aree a'ij nyej tyu'utaxajtaca'a. ―Ayaa pu Jesús tiraata'ixaa. 22Meenti saɨj tɨ hua'a jetze ajtyama'acan ɨ maj maun tí'icha'ɨ teyujta'a, aa pu vejli'i a'utyavaaca'a. Cɨme'en pu'u ayan raanamuajri'i a'ij tɨ Jesús tyu'utaxajtaca'a, aj pu'i ra'arajvee. Ajta ayan tira'ajtya'axɨ tɨcɨn: ―¿Ni tzaa ayan tiraavijte'e pej peyan tí'ire'ixaatya'a paɨjna tɨ nain cɨn antyujmua'aree u teyujta'a? 23Aj pu'i Jesús ayan tiraata'ixaa tɨcɨn: ―Tɨ pua'a nyacai ti'itɨj cɨn xa'apɨ'ɨn huarɨj nyatɨ'ɨj neyan tiraata'ixaa, pata'aj hui peyan a'ij tyu'utaxaj. Na'ari cai, tɨ pua'a neyan xa'apɨ'ɨn tyu'utaxajtaca'a a'ini een cɨn peyan na'arajvee. 24Aj pu'i aɨn Anás ayan tihua'utaij maj ra'anvi'itɨn maɨjna jemi ɨ Caifás. Ajta, aɨn Jesús, aɨ pu auj anájɨ'ɨqui'ihuaca'a. 25Auche'e pu aun rucɨxaitya'a aɨjna ɨ Simón, tɨ ajta i'i Pedro. Aj pu'i a'atɨ ayan tiraataihua'uri'i tɨcɨn: ―¿Ni tzaa ayan ti'ayajna paj hua'a jetze ajtyama'acan ɨ maj Jesús jamuan á'ujhua'anya'a? Aj pu'i Pedro ayan tyu'utaxajtaca'a tɨcɨn: ―Canu. 26Meenti saɨj tɨ ayan ravaɨra'acaa ɨ tɨ nain cɨn antyujmua'areeraca'a, aun pu a'utyavaaca'a. Aɨ pu ajta ihuaara'ara'an pueenya'a aɨjna ɨ a'atɨ tɨ Pedro ayan ra'ajtaveijchaca'a ɨ naxaira'an. Aj pu'i ayan aɨn ɨ Pedro tyu'uta'ixaa tɨcɨn: ―Ayej nya'ase nyaa nu nyaun muaje'eseij amɨjna jamuan a'u tɨ a'uvaatɨmee ɨ aceituuna cɨye'e. 27Ajtahua'a pu saɨque tyu'utaxajtaca'a aɨjna ɨ Pedro tɨ nu'u cai ramua'ate aɨjna ɨ Jesús. Cɨme'en pu'u ayan tyu'utaxajtaca'a, aj pu'i ayan huajijhuaca'a ɨ tyacuaara'i. 28Matɨ'ɨj mi aɨme ɨ mej ti'ijta u teyujta'a, au mu ru'iraavi'itɨ maujna a'u tɨ Caifás huiracai a'aye'i. Matɨ'ɨj mi maun ya'uvi'itɨ u chi'ita a'u tɨ a'ucatii ɨ tajtuhuan tɨ ti'ivaɨre'e hua'a jetze ma'acan ɨ Roma mej e'eche. Pu'uri tɨn tapua'arijma'aca, ajta mu'uri tɨn a'utyahuijsima'a mej tyu'uyesten. Aɨj mu cɨn cai aun a'utyajrupi a'u tɨ aɨn tajtuhuan a'ucatii mej mi cai ti'itɨ cɨn autyaturan ɨ ruye'ira cɨme'e a'ini capu hua'a jetze ajtyama'acantaca'a aɨjna ɨ tajtuhuan. Ayaa mu raxe'eva'acaa mej meyan raacua'ani ɨ cue'ira ɨ maj cɨn ra'utamua'areera majna xɨcaara'an tɨ jetzen Dioj tihua'utauuni'iri'i. 29Aɨj pu cɨn aɨn Pilaatu ayan huirajraa a pua'aque hua'a jemi. Aj pu'i ayan tihua'utaihua'uri'i tɨcɨn: ―¿Ti'itajni yeehui saj cɨn seyan tí'ijxajtzi'i samɨjna mɨ a'atɨ? 30Matɨ'ɨj mi meyan tiraata'ixaa tɨcɨn: ―Tɨ pua'a yeehui cai ayan ti'itɨj cɨn autyájturánche'e tɨ a'ij pua'a een, catu teyan muaatatuíire'enche'e. 31Aj pu'i Pilaatu ayan tihua'uta'ixaa tɨcɨn: ―Sata'aj seyan ra'anvi'itɨn sata'aj rujɨɨmua'a seyan ra'uxɨ́jte'en saɨjna cɨme'e a'ij tɨ tyajamuaata'aca ɨ a'amua ye'ira. Matɨ'ɨj mi meyan tyu'utanyúu aɨme ɨ mej ti'ijta u teyujta'a tɨcɨn: ―Capu hui ayan titata'aca tyej ti teyan a'atɨ huaje'ica. 32Ayaa pu tyu'urɨj tɨ ij ayan aráurasten aɨjna ɨ nyuucari ɨ tɨ cɨn Jesús ayan tyu'utaxajtaca'a a'ij tɨ nu'u ayan tí'imɨ'ɨni. 33Aj pu'i Pilaatu ajtahua'a aun a'utyajrupi u chi'ita. Tɨ'ɨqui u ya'utajée ɨ Jesús. Ayaa pu tiraataihua'uri'i tɨcɨn: ―¿Ni paj hui paɨn pueen ɨ tɨ tihue'ijte'e aɨme ɨ mej Israel jetze ajtyama'acan? 34Jesús pu ayan tiraataihua'uri'i tɨcɨn: ―¿Ni yeehui asaɨj pana'a peyan a'ij tirajtyau nusu saɨj ayan tinaatyaxajtaca'a mueetzi jemi? 35Aj pu'i aɨjna ɨ Pilaatu ayan tiraata'ixaa tɨcɨn: ―¿Ni tzaa neyan Israel jetze ajtyama'acan? Canu xaa nya'u yeehui. Aɨme ɨ mej atyaɨtestyamua'a pueen, majta aɨme ɨ mej maun ti'ijta u teyujta'a, aɨ mu aɨn pueen ɨ maj mueetzi yava'atua inyeetzi jemi. ¿Ti'itajni hui a'ij puaaruu? 36Ajta aɨn Jesús ayan tiraata'ixaa tɨcɨn: ―Aɨjna ɨ nyaj cɨn ti'ijta, capu hui yan japuan ma'acan ɨ chaanaca japua. Tɨ pua'a ayan eenye'en a'ame'enche'e, ayaa mu maɨjna cɨn tyu'utatyese'enche'e ɨ mej nyavaɨre'e mej mi cai meyan naateevi'in aɨme ɨ maj maun ti'ijta u teyujta'a. Ma ajta, saɨque pu eenya'a seijre'e ɨ nyaj cɨn ti'ijta. 37Aj pu'i Pilaatu ayan tiraata'ixaa tɨcɨn: ―Aa ni'ijta nya'u, muaa paj xaa hui ti'itɨj cɨn tihue'ijte'e aɨme ɨ tyaɨte. Ajta aɨn Jesús ayan tiraata'ixaa tɨcɨn: ―Xa'apɨ'ɨn pej peyan tyu'utaxajtaca'a nyaj nu'u ti'itɨj cɨn tihue'ijte'e. Ee xaa nya'u ayan ti'ayajna nyaj nyaɨjna cɨn huanu'eihuaca'a. Ayaa nu een cɨn yan huataseijre iiyan chaanaca japua nyej ni neyan tyu'utaxaj nyaɨjna cɨme'en tɨ ayan ti'ayajna. Matɨj mana'a pua'amua ɨ mej meyan ra'ancura'a maɨjna tɨ ayan ti'ayajna, naimi'i mu hui nyanamua. 38Aj pu'i Pilaatu ayan tiraataihua'uri'i tɨcɨn: ―¿Ti'itajni aɨn yeehui pueen aɨjna tɨ ayan ti'ayajna? Tɨ'ɨj ayan tyu'utaxaataj, aj pu'i huiirajraa, ajta aun a'uré'enye hua'a jemi ɨ mej Israel jetze ajtyama'acan. Ayaa pu tihua'uta'ixaa tɨcɨn: ―Capu hui ti'itɨj a'ij ayan tina'amitejte'e ɨ nyaj cɨn ti'itɨj cɨn jetzen tya'ujpuá'ajte'en. 39Ma sajta muan, ayaa xu ti'ijrɨ'ɨre nyaj neyan amue'iratuiitze'en seij tɨ aityanami'i satɨ'ɨj seri seyan ra'utámua'areeri'i ɨ xɨcaara'an jetze tɨ Dioj jetzen tihua'utauuni'iri'i ɨ a'amuavaujsicɨ'ɨ. ¿Ni seyan hui raxe'eve'e nyej neyan amue'iratuiitze'en nyamɨjna tɨ ayan nu'u tyaja'amue'ijte'e mɨ sej Israel jetze ajtyama'acan? ―Ayaa pu tihua'utaihua'uri'i. 40Matɨ'ɨj mi meyan ca'anin cɨn tityeejíjhuaca'a tɨcɨn: ―Catu. Catu raxe'eve'e tyamɨjna. Pata'aj yeehui tu'iratuiitze'en paɨjna ɨ Barrabás. Ajta aɨn Barrabás, aɨ pu hua'a jetze ajtyama'acantaca'a aɨme ɨ mej hua'utyenya'usi'i mej mi huá'ari'i ɨ maj cɨn ti'ijta aɨme ɨ mej Roma e'ema'acan.

will be added

X\