San Juan 17

1Tɨ'ɨj Jesús ayan tyu'utaxajtaca'a, aj pu'i ute'e a'ujnyeeraca'a ayan ti'ixaata, tɨcɨn: ―Mɨ pej ni'iya'upua, pu'uri hui ajna tyaja'ure'enye pej peri raaxa'apɨ'ɨntare. Pata'aj tihua'utaseijrate'en ɨ tyaɨte pej peri rɨ'ɨ tinaata'a i nyaj ayauj pueen, nyej ni nyajta rɨ'ɨ timuaata'an mueetzi, 2a'ini muaa paj paɨjna cɨn peyan tinyeijca nyej ni nain cɨn antinmua'aréera hua'a jemi ɨ tyaɨte, nyej ni neyan hua'uta'an mej ruuri mua'ara'ani para rusen cɨme'e, matɨj mana'a pua'amua ɨ pej naatatui inyeetzi. 3Ayaa mu een cɨn ruuri mua'ara'ani para rusen cɨme'e maɨjna cɨme'e mej meyan muáamua'ati mɨ pej muaa pana'a asaɨj paɨn pueen tzaahuati'ira'a cɨme'e ɨ Dioj, majta maɨjna cɨme'e mej meyan náamua'ati, nyej Jesús pueen, i nyaj nyajta aɨn pueen ɨ Cɨriistu'u ɨ pej nyaja'utaityaca'a. 4’Ayaa nu een cɨn rɨ'ɨ timuaata'a hua'a jemi ɨ mej yan huachaatɨme iiyan chaanaca japua, a'ini nu'uri ra'antipua'ari ɨ paj cɨn peyan tinyeijca. 5Ari ijii, mɨ pej ni'iya'upua, pata'aj hui peyan che'eta pana'a rɨ'ɨ tinaatyajtuaani mueetzi jemi a'ij pej rɨ'ɨ tinaata'acare'e nyatɨ'ɨj nyaun a'ucatii mueetzi jemi tɨ'ɨj cai xɨ seijra'acaa ɨ chaanaca. 6’Nu'uri neyan hua'utaseijrate a'ij pej een nyaɨme jemi ɨ pej peyan naatatuiiri'i aɨme ɨ mej hua'a jetze ajtyama'acantacaa ɨ mej yan huachaatɨme iiyan chaanaca japua. Ayaa mu atyaɨtestyamua'a mu pueenya'a. Pajta muaa, muaa paj naatatuiiri'i. Majta aɨme, aɨ mu meyan ra'ara'astijre a'ij paj tyu'utaijtaca'a. 7- 8’Mu'uri ramua'aree tɨ mueetzi jetze a'iraanye nain tɨj pana'a paj peyan paɨjna cɨn tinyeijca, a'ini neyan che'eta nyana'a tihua'uta'ixaa a'ij pej peri tinaata'ixaa inyeetzi. Majta aɨme, ayaa mu ra'ancura'a ɨ nyaj hua'uta'ixaa. Ayaa mu tzaahuati'ira'a cɨn ramua'areeraca'a nyaj mueetzi jemi a'uve'eme, majta meyan rá'antzaahua pej peyan yan nyaja'utaityaca'a. 9’Ayaa nu hua'a cɨme'en muahuavii. Canu neyan muahuavii hua'a cɨme'en matɨj mana'a pua'amua meyan iiyan seijre'e ɨ chaanaca japua, silu hua'a cɨme'en ɨ paj pana'a peri naatávi'itɨste, a'ini atyaɨtestyamua'a mu pueen. 10Matɨj mana'a pua'amua ɨ mej nyetyaɨtestyamua'a pueen, aɨ mu majta atyaɨtestyamua'a pueen mueetzi. Majta aɨme ɨ mej atyaɨtestyamua'a pueen mueetzi, ayaa mu che'eta mana'a nyetyaɨtestyamua'a pueen inyeetzi. Ayaa mu rɨ'ɨ tinaata'aca inyeetzi maɨjna cɨme'e mej meyan rɨ'ɨ ti'ityujcha'ɨ nyatɨj inyaa. 11’Canu hui che'e yan huatyaturaasin iiyan chaanaca japua. Ma majta aɨme, aɨ mu xaa meyanna huatyaturaasin. Nyajta inyaa, mueetzi jemi nu a'uma'a na'ame. Ayaa nu ti'imuahuavii pata'aj rɨ'ɨ tihua'uchaɨn amuare'eri'ira'a cɨme'e, aɨme ɨ pej naatávi'itɨste mej mi meyan che'eta mana'a naijmi'i seira'a maj saɨj mana'a pueenye'en tyatɨj ityan. 12Nyatɨ'ɨj hua'a jemi huacatii, nyaa nu rɨ'ɨ tihua'achaɨɨca'a mueetzi jetze ma'acan. Capu a'atɨ á'uvej tɨ hua'a jetze ajtyama'acan silu aɨjna tɨ ayan tiraavijte'e tɨ ayan pueijtzi raacɨ'ɨti. Ayaa pu een cɨn huarɨj tɨ ij ayan aráurasten a'ij tɨ te'eyu'usi'i ɨ yu'uxari jetze. 13’Nyajta ijii nu a'uma'a na'ame mueetzi jemi. Me nyajta inyaa, ayaa nu neyan ti'ixa nyatɨ'ɨj nyauj hua'a jemi ya huacaj mej mi nain cɨn meyan che'eta mana'a huataujtyamua'ave'en nyatɨj inyaa ti'inyetyamua'ave'e. 14Nyaa nu tihua'uta'ixaa ɨ nyuucari ɨ paj cɨn peyan tineijca. Majta aɨme ɨ maj yan huachaatɨme iiyan chaanaca japua, aɨ mu hua'ajchaɨre'e ɨ nyetyaɨtestyamua'a a'ini camu hua'a jetze ajtyama'acan ɨ mej iiyan seijre'e. Nyajta inyaa, canu nyajta hua'a jetze ajtyama'acan. 15’Canu nyaɨjna cɨn neyan muahuavii pej pi hue'irajtuaani iiyan chaanaca japua silu pata'aj rɨ'ɨ tihua'uchaɨn tɨ ij cai aɨn tɨ a'ij pua'a ti'itevi hua'antimue'itɨn ɨ nyetyaɨtestyamua'a. 16Camu hua'a jetze ajtyama'acan ɨ mej yan huachaatɨme iiyan chaanaca japua. Nyajta inyaa, ayaa nu che'eta nyana'a cai hua'a jetze ajtyama'acan. 17Pata'aj rɨ'ɨ tihua'utyajtuaani mueetzi jemi paɨjna cɨme'e ɨ nyuucari tɨ ayan ti'ayajna. Tɨj na'a pej peyan tyu'utaxajtaca'a, aɨ pu ayan ti'ayajna. 18Ayaa nu che'eta nyana'a tihua'utaityaca'a maj a'ucɨ́jxɨ'ɨn nainjapua ɨ chaanaca japua patɨj muaa yan tinyaja'utaityaca'a. 19Nyajta inyaa, ayaa nu huatyánya'a mueetzi jemi hua'a jetze ma'acan mej mi majta tzaahuati'ira'a cɨn huataura'an majta mueetzi jemi. 20- 21’Canu nyaɨme nyana'a cɨme'en muahuavii, silu nyajta neyan ti'imuahuavii nyaɨme cɨme'en ɨ mej meyan tya'antzaahuate'esin maɨjna cɨme'e a'ij mej tihua'uta'ixaate'esin, mej mi naimi'i meyan saɨj mana'a pueenya'a mua'ara'ani, patɨj peyan nyeetzi jemi seijre'e, mɨ pej ni'iya'upua, nyatɨj nyajta inyaa mueetzi jemi seijre'e. Miche'e hui majta meyan tyejmi jemi seira'a mua'ara'ani mej mi aɨme ɨ maj yan huachaatɨme iiyan chaanaca japua, meyan tya'antzaahuate'en pej peyan yan nyaja'utaityaca'a. 22- 23’Aɨjna tɨ huapɨ'ɨ naa seijre'e ɨ paj cɨn rɨ'ɨ tinaata'a, ayaa nu che'eta nyana'a nyaɨjna cɨn rɨ'ɨ tihua'uta'a mej mi meyan saɨj mana'a pueenya'a mua'ara'ani tyatɨj ityan, nyatɨj nyajta hua'a jemi seijre'e, patɨj pajta muaa nyeetzi jemi seijre'e. Nyajta nu nyaɨjna cɨn rɨ'ɨ tihua'uta'a mej mi nain cɨn saɨj mana'a pueenya'a mua'ara'ani, mej mi aɨme ɨ maj yan huachaatɨme iiyan chaanaca japua, meyan raamua'aree pej peyan yan nyaja'utaityaca'a, pajta peyan che'eta pana'a hua'utaxe'eve patɨj pajta tinaataxe'eve inyeetzi. 24’Ayaa nu ti'ijxe'eve'e, mɨ pej ni'iya'upua aɨme cɨme'en ɨ pej peyan naatávi'itɨste, mej mi maun a'utyaturan a'u nyaj a'utyaváa na'ame, mej mi majta meyan raaseij maɨjna tɨ huapɨ'ɨ naa seijre'e ɨ paj cɨn rɨ'ɨ tinaata'a, aɨjna ɨ paj cɨn rɨ'ɨ tinaata'a paɨjna cɨme'e pej peyan nyexe'eva'acaa jajcua ɨmɨ tɨ'ɨj cai xɨ seijra'acaa ɨ chaanaca. 25’Niya'upua, mɨ paj nain cɨn uraré'en, camu hui meyan muamua'ate aɨme ɨ mej yan huachaatɨme iiyan chaanaca japua. Me nyajta inyaa, nyaa nu xaa muamua'ate. Majta ɨ nyetyaɨtestyamua'a, aɨ mu meyan ramua'aree pej peyan yan nyaja'utaityaca'a. 26Nu'uri neyan hua'utaseijrate a'ij pej een. Nyajta nu hui nyauj neyan hua'utaseijrate'esin mej mi meyan che'eta mana'a huaujxe'eve'en seij majta seij patɨj muaa ti'inyexe'eve'e, nyej ni nyajta hua'a jemi seira'a na'ara'ani. ―Ayaa pu tyu'utaxajtaca'a aɨjna ɨ Jesús.

will be added

X\