San Juan 16

1’Ayaa nu nyaɨjna cɨn tyaja'amue'ixaate'e sej si cai ti'itɨj cɨn huamue'itɨchen. 2Aɨme mu amue'iré'iti u teyujta'a. Ee xaa nya'u, ayaa pu ajna tyaja'ure'enyejsin ɨ xɨcaara'an jetze tɨ jetzen ayan te'eme. Ayaa pu tiraatámitejte'esin ɨ a'atɨ tɨ ayan tyu'utavaɨ ɨ Dioj jemi aɨjna cɨme'e tɨ amuáacuii muejmi. 3Ayaa mu maɨjna cɨn ti'iruuren a'ini camu nyamua'ate inyeetzi, camu majta ramua'ate ɨ niya'upua. 4Ayaa nu hui tyaja'amue'ixaate'e sej si seyan ra'utamua'aree nyej neyan tyajamuaata'ixaa tɨ pua'a ari ayan tyaja'ure'enyen. Canu neyan tyajamuaata'ixaa jajcua ɨmɨ a'ini nyauche'e nu hui seijra'acaa muejmi jemi. 5Nyajta inyaa, ijii nu nyaun a'uma'a na'ame nyaɨjna jemi tɨ yan nyaja'utaityaca'a. Ma sajta muan, caxu a'atzu ne'ihua'u a'u nyaj a'uméj. 6’Eecan xu huataujxaamɨste saɨjna cɨme'e nyej neyan neri tyajamuaata'ixaa. 7Me nyajta inyaa, ayaa nu tyaja'amue'ixaate'e tzaahuati'ira'a cɨme'e tɨ ayan tyajamuaatyava'ɨri nyej neyan a'ura'ani. A'ini tɨ pua'a nyacai a'ura'ani, capu ya va'acányejsin, muejmi jemi aɨjna tɨ hui a'amua japua huanyuuni. ’Ma nyajta inyaa, tɨ pua'a neyan a'ura'ani, aj nu ya'utaiti nyaɨjna tɨ aɨn yava'acáanyen iiyan muejmi jemi. 8Tɨ'ɨj aɨn yava'acáanyen, aj pu'i ayan aɨjna cɨn hua'axɨjte'en aɨme ɨ mej yan japuan huachaatɨme ɨ chaanaca japua, aɨjna cɨme'e ɨ maj cɨn autyajturaa ɨ Dioj jemi, ajta aɨjna cɨme'e nyej neyan urare'enya'acan cɨn seijre'e. Aɨ pu ajta aɨjna cɨn hua'axɨjte'en aɨjna cɨme'e tɨ Dioj pueijtzi hua'uta'asin. 9’Ayaa pu een cɨn hua'axɨjte'en aɨjna cɨme'e ɨ maj cɨn autyajturaa ɨ Dioj jemi a'ini camu na'atzaahuate'e inyeetzi. 10Ayaa pu ajta een cɨn hua'axɨjte'en aɨjna cɨme'e nyaj neyan urare'enya'acan cɨn seijre'e a'ini au nu a'uma'a na'ame a'u tɨ e'eseijre'e ɨ niya'upua, a'u tɨ yeehui cai che'e rɨ'ɨri saj naaseij. 11Cɨme'en pu'u aɨjna ɨ nyuucari tɨ Dioj pueijtzi ayan tyu'uta'asin, ayaa pu hua'axɨjte'en a'ini pu'uri raaxa'apɨ'ɨntare ɨ Dioj tɨ ayan pueijtzi raata'asin aɨjna tɨ tie'ijta iiyan chaanaca japua. 12’Ayaa pu na'araanajchi nyej eihua huapɨ'ɨ neyan tyajamuaata'ixaate'en. Ma sajta muan, caxuu xɨ nain au'eitaa sa'aju'un ijii. 13Ma ajta aɨn yeehui ɨ xaijnyu'ucara'ara'an ɨ Dioj tɨ tzaahuati'ira'a cɨn ti'ixaxa'a, tɨ'ɨj uve'enyén, aɨ pu nain cɨn tyajá'amuamua'aten tɨ ayan ti'ayajna. Capu ayan aɨjna cɨn tyajamuaata'ixaate'esin a'ij tɨ rusaɨj na'a a'ij tirajtyau silu ayaa pu'u na'a ayan tyajamuaata'ixaate'esin a'ij tɨ na'a ti'inamua. Aɨ pu ajta tyajamuaata'ixaate'esin a'ij tɨ auj tyaja'ure'enyejsin. 14’Aɨ pu hui ayan ra'ancura'asin nyeetzi tɨ nya'a, ajta ayaa pu che'eta na'a a'ahuaritaacan cɨn tyajamuaata'ixaate'esin. Ayaa pu aɨjna cɨn huarɨn, aɨ pu ayan rɨ'ɨ tinaatyatuaasin. 15Tɨj na'a tɨ ayan niya'upua jemi seijre'e, aɨ pu ajta nyeetzi nya'a. Aɨj nu cɨn neyan raataxajtaca'a yee aɨn xaijnyu'ucari pu nu'u ayan ra'ancura'an nyeetzi tɨ nya'a tɨ ij ajta nu'u tyajamuaata'ixaate'en a'ahuauritaacan cɨme'e muejmi jemi. 16’Capu a'achu a'ateeri saj cai che'e seyan me'e nyeje'eseijran. Tɨ'ɨj ajta capu ajta che'e a'ateeri, saj rujajcuatze'en sajtahua'a nyeseijran. ―Ayaa pu tihua'uta'ixaa. 17Majta seica ɨ maj jamuan á'ujhua'anya'a, ayaa mu tyu'urihua'uraca'a tɨcɨn: ―¿A'ini yeehui huataujmua'a aɨjna ɨ nyuucari tɨ nu'u cai a'achu a'ateeri tyaj cai che'e me'e ye'eseijran, ajta nu'u cai che'e a'ateeri tyaj tyajtahua'a tajajcuatze'en raseijran? ¿A'ini yeehui ajta huataujmua'a ɨ seij tɨ ayan nu'u a'ini aɨ pu a'uma'a a'ame ɨ ruya'upua jemi? 18Mauche'e mu'u meyan tyu'urihua'uraca'a tɨcɨn: ―¿A'ini yeehui huataujmua'a aɨjna ɨ nyuucari tɨ cɨme'en yee tɨ nu'u cai a'achu a'ateeri? Catu a'atzu yau'eite a'ij tɨ een cɨn ayan tyu'utaxajtaca'a. 19Tɨ'ɨqui Jesús ayan raamua'areeri'i mej meyan raxe'eva'acaa mej maɨjna cɨn meyan tiraataihua'u. Aj pu'i ayan tihua'uta'ixaa tɨcɨn: ―¿Ni seyan saɨjna cɨn tyu'urihua'u a'ij tɨ huataujmua'a aɨjna ɨ nyej neyan tyu'utaxajtaca'a yee tɨ nu'u cai a'achu a'ateeri saj cai che'e me'e nyeje'eseijran, ajta tɨ cai nu'u ajta a'achu a'ateeri saj rujajcuatze'en sajtahua'a nyeseijran? 20’Ayaa nu hui tyaja'amue'ixaate'e tzaahuati'ira'a cɨme'e. Muan xu ruyeinixɨ'ɨn, sajta huataujxaamɨste'esin, meenti majta aɨme meyan huataujtyamua'ave'esin aɨme ɨ maj yan chaanaca japua huachaatɨme. Muan xu xaa huataujxaamɨste'esin. Ma ajta aɨn ɨ saj cɨn huataujxaamɨste'esin, aɨj pu ajta jetzen ayan e'iranyejsin ɨ saj sajta cɨn huataujtyamua'ave'esin. 21’Ayaa pu tyaja'amuaaruuren tɨj ajta ti'ijruuren ɨ jɨita'a tɨ ayan ti'ijcui'inye tɨ tiyauj a'ame. Tɨ'ɨj ajna tyaja'ure'enyen tɨ jetzen tiyauj a'ara'ani, ayaa pu eihua tirajpueiitzi a'ame. Ma ajta aɨn, tɨ pua'a ari huanu'eihua ɨ pa'arɨ'ɨ, aj pu'i yá'uhua'axɨjsin ɨ tɨ cɨn rajpueijtzica'a aɨjna cɨme'e tɨ eihua huapɨ'ɨ rutyamua'ave'e a'ini pa'arɨ'ɨ pu ayan huanu'eihuaca'a iiyan chaanaca japua. 22’Ayaa pu che'eta na'a tyaja'amuaruuren muejmi. Pu'uri ayan ajna tyaja'ure'enye ɨ xɨcaara'an jetze saj jetzen huataujxaamɨste'esin. Me nyajta inyaa, nyajtahua'a nu a'amuaseijran. Sajta muan, ajna xu huataujtyamua'ave'esin. Ajta capu che'e rɨ'ɨriista a'ame tɨ a'atɨ ayan amua'ari'iran ɨ saj cɨn rutyamua'ave'e. 23’Ayaa pu hui te'eme ajna xɨcaara'an jetze, saj cai che'e ti'itɨ nyahuaviira inyeetzi. Ayaa nu tyaja'amue'ixaate'e tzaahuati'ira'a cɨme'e, ajna xɨcaara'an jetze tɨ aɨn niya'upua ayan amuaata'asin tɨj na'a ɨ saj seyan raatahuaviira inyeetzi jetze ma'acan. 24Tɨj na'a jajcua ɨmɨ tɨ yu e'ire'enye, caxu hui xɨ ti'itɨ raatahuaviiri'i inyeetzi jetze ma'acan. Sata'aj seyan raatahuavii a'ini ayaa xu saɨjna cɨn huarɨn, aj xu si seyan ra'ancura'asin, aj xu si sajta seyan nain cɨn huataujtyamua'ave'esin. 25’Tɨj na'a jajcua ɨmɨ tɨ yu e'ire'enye, ayaa nu nyaɨjna cɨn tyajamuaata'ixaa nyuucari cɨme'e tɨ saɨque namuajre'e. Ma ajta, ajna tyaja'ure'enyejsin ɨ xɨcaara'an jetze nyaj cai che'e neyan saɨque tyaja'amue'ixaatya'a na'ame, silu nyaa nu huataujnyátacan cɨn tyajamuaata'ixaate'esin nyaɨjna cɨme'e a'ij tɨ een niya'upua tɨ e'eseijre'e. 26’Ayaa xu yeehui huarɨni sajna xɨcaara'an jetze sej seyan raatahuavii inyeetzi jetze ma'acan. Canu neyan tyaja'amue'ixaate'e tɨ ayan ruxe'eva'a a'ame nyej neyan raatahuavii ɨ niya'upua nyej ni muejmi jetze ma'acan huatanyuuni. 27Capu xaa nya'u. Niya'upua pu rusaɨj a'amuaxe'eve'e aɨjna cɨme'e saj hui naataxe'eve inyeetzi, sajta seyan rá'antzaahua nyaj nyaun u e'iraanye ɨ niya'upua jemi. 28’Au nu e'iraanye ɨ niya'upua jemi, nyajta nu neyan a'uve'eme iiyan chaanaca japua. Nyajta ijii, ayaa nu hui tichesin iiyan chaanaca japua nyej ni nyaun a'ujnyén ɨ niya'upua jemi. ―Ayaa pu tihua'uta'ixaa aɨjna ɨ Jesús. 29Majta aɨme, ɨ maj jamuan á'ujhua'anya'a, ayaa mu tiraata'ixaa tɨcɨn: ―Papu'uri ijii xaa nya'u peyan a'ahuauritaacan cɨn ti'ixaj. Capej che'e saɨque ti'ixaj, paɨjna cɨme'e tɨ cai a'ahuáurite. 30Tu'uri xaa teyan ramua'aree paj nain ru'umua'aree, ajta yeehui tɨ cai ayan ruxe'eve'e tɨ a'atɨ ayan ti'itɨj cɨn ti'imue'ihua'ura. Aɨj tu cɨn teyan ra'atzaahuate'e paj paun e'iraanye ɨ Dioj jemi. 31Aj pu'i Jesús ayan tihua'uta'ixaa tɨcɨn: ―¿Ni tzaa seyan seri sicu tina'atzaahuate'e? 32Me nyajta inyaa, ayaa nu tyaja'amue'ixaate'e tɨ ajna tyaja'ure'enyejsin ɨ xɨcaara'an jetze mej jetzen amuaatamuarite'esin. Au xu a'ucɨ́jxɨ'ɨsin a'u tɨ seij e'eche, seij sajta seij. Muan xu yeehui ma nuujɨsin nyej ni nyasaɨj nyana'a huatyaturan. Me nyajta, canu nyasaɨj yu huatyaturaasin a'ini niya'upua pu nyeetzi jemi seijre'e. 33Ayaa nu hui een cɨn tyaja'amue'ixaate'e sej si seyan huatyaujpua'arite'en ɨ rutzajta'a saɨjna cɨme'e sej nyeetzi jetze ajtyama'acan. Eihua mu pueijtzi amuaata'asin aɨme ɨ mej yan huachaatɨme iiyan chaanaca japua. Capu amɨn a'ij. Sata'aj seyan huataujtyamua'ave'en saɨjna cɨme'e nyej neri hua'antimue'itɨ.

will be added

X\