San Juan 15

1’Nyaa nu nyaɨn pueen ɨ cɨye tɨ xaa re'en. Ajta niya'upua pu aɨn pueen ɨ tɨ rɨ'ɨ raruure ɨ pi'ista. 2Aɨ pu ayan ra'antivé'iche tɨj na'a ɨ pi'ista tɨ nyeetzi jetze e'iraninyei tɨ ajta cai taaca. Ajta tɨj na'a ɨ pi'ista tɨ xaa taaca, aɨ pu cɨj caj tira'antive'iche tɨ ij eitze'e huatáca'an. 3Xu'uri yeehui uraré'en muan, aɨjna cɨme'e ɨ nyuucari ɨ nyaj cɨn neri tyajamuaata'ixaa. 4Sata'aj sauj seyan nyeetzi jemi seijra'a. Aj nu ni neyan che'eta nyana'a muejmi jemi seira'a na'ame. ’Capu a'atzu a'ij ti'irɨ'ɨri tɨ seij pi'ista ayan rusaɨj huatáca'an silu ayaa pu ruxe'eve'e tɨ auj ajtávaaca ɨ cɨye jetze. Ayaa pu che'eta na'a een muejmi jemi. Capu yeehui a'atzu a'ij ti'irɨ'ɨri sej ti'itɨj huamué'itɨn ɨ saj cɨn tyu'utatuiire'en ɨ Dioj jemi tɨ pua'a sacai nyeetzi jemi seijra'a. 5’Nyaa nu nyaɨn pueen ɨ cɨye. Ma sajta muan, muan xu pi'ista pueen tɨ nyeetzi jetze ajta'upu'u. Tɨ pua'a a'atɨ ayan nyeetzi jemi seijra'a, tɨ pua'a nyajta inyaa jemin seijra'a, aɨ pu yeehui ayan eihua ti'imue'itɨn ɨ tɨ cɨn tyu'utatuiire'esin ɨ Dioj jemi. Sajta muan, tɨ pua'a sacai nyeetzi jemi seijra'a, caxu ti'itɨ a'ij ruuren. 6Ayaa pu een tɨj na'a tɨ cai che'e ayan nyeetzi jemi seijre'e. Ayaa pu een tɨj aɨjna ɨ pi'ista, ɨ tɨ antivéichi'ihuaca'a, tɨ ajta a'atɨ a ya'uhua'axɨ tɨ ij huatyaahuan. Ayaa mu raruuren naijmi'ica ɨ pi'ista maj meyan ra'ara'asaɨre'en, majta an yá'uhua'axɨn ɨ taij japua tɨ ij huatyajtaani. 7’Tɨ pua'a seyan nyeetzi jemi seijra'a, tɨ pua'a sajta seyan ra'ara'astijre'en ɨ nyuucari ɨ nyaj ámuaamuá'ate, ayaa pu yeehui Dioj ayan amuaata'asin ti'itɨ saj a'ij tiraatahuaviira. 8Tɨ pua'a seyan eihua raamue'itɨn ɨ saj cɨn tyu'utatuiire'en ɨ Dioj jemi, aɨj pu aɨjna cɨn amiteera'a a'ame sej seyan na'astijre'e inyeetzi. Ayaa xu saɨjna cɨn rɨ'ɨ tiraata'asin ɨ niya'upua. 9Ayaa nu che'eta nyana'a neri tyajamuaataxe'eve a'ij tɨ ajta ari tinaataxe'eve ɨ niya'upua. Sata'aj sauj nyeetzi jemi seijra'a nyej ni amuaaxe'eve'en. 10’Tɨ pua'a yeehui seyan ra'ara'astijre'en a'ij nyej neri tyajamuaataij, aj xu si seyan nyeetzi jemi seira'a xa'aju'un nyej ni amuaaxe'eve'en. Nyajta inyaa, ayaa nu che'eta nyana'a ra'astijre'e a'ij tɨ tinaataij ɨ niya'upua. Aɨj nu yeehui cɨn neyan jemin seira'a na'ame tɨ ij ajta niya'upua ayan naataxe'eve'en. 11Ayaa nu een cɨn tyaja'amue'ixaate'e tɨ ij muejmi jemi seira'a a'ara'ani ɨ nyaj cɨn nyetyamua'ave'e, sej si sajta nain cɨn huataujtyamua'ave'en. 12’Ayaa nu yeehui nyaɨjna cɨn tyaja'amueijcate'en sej si seyan che'eta sana'a huaujxe'eve'en a'ij nyej neri tyajamuaataxe'eve muejmi. 13Ai pu aɨn pueen ɨ tɨ eitze'e muare'eri ɨ tɨ cɨn a'atɨ ayan raataxe'eve'en ɨ ruxa'aj tevi tɨ i ayan jetzen ma'acan huamɨ'ɨni. 14’Muan xu yeehui saɨn pueen ɨ nyetyaɨtestyamua'a tɨ pua'a seyan huarɨni a'ij nyej tyaja'amueijte'e. 15Canu che'e neyan amuaatamua'atzi yee mɨ sej yeehui ti'ivaɨre'e inyeetzi jemi, a'ini saɨj tɨ ayan ti'ivaɨre'e capu ramua'aree a'ij tɨ rɨcɨ aɨjna tɨ ti'iraijte'e. Me nyajta inyaa, ayaa nu amuaatamua'atzi yee mɨ sej nyetyaɨtestyamua'a, a'ini nu'uri neyan tyajamuaata'ixaa nain a'achu nyaj nyana'a neyan raanamuajri'i ɨ niya'upua jemi. 16’Caxu muan seyan na'ava'ahuau inyeetzi, silu ayaa nu yeehui neyan amua'antihuau, nyajta nu neyan nyaɨjna cɨn tyajamueijca sej si u a'uju'un sej si seyan ti'itɨ huamué'itɨn ɨ saj tyu'utatuiire'en ɨ Dioj jemi. Nyajta neyan raxe'eve'e tɨ i ayan rusen cɨn huatyaturan ɨ saj raamue'itɨ. Aj pu xaa, aɨn niya'upua ayan amuaata'asin ti'itɨj saj raatahuaviira inyeetzi jetze ma'acan. 17Ayaa nu tyaja'amueijte'e, saj yeehui huaujxe'eve'en seij sajta seij. 18’Caxu saɨjna á'uhua'anan. Tɨ pua'a yeehui maɨn amuajchaɨre'e ɨ maj yan japuan huachaatɨme ɨ chaanaca, aɨ mu anacai nyeetzi tichaɨra'acaa. 19Aɨme ɨ mej yan japuan huachaatɨme ɨ chaanaca japua, aɨme mu meyan che'eta mana'a tia'amuaxe'eva'acache'e tɨj ɨ rutyaɨtestyamua'a tɨ pua'a seyan hua'a jetze ajtyama'acantache'e. Ma sajta muan, caxu hua'a jetze ajtyama'acan, silu nyaa nu yeehui amua'antihuau aɨme tzajta'a. Aɨj mu cɨn meyan amuajchaɨre'e aɨme ɨ mej yan huachaatɨme ɨ chaanaca japua. 20’Caxu yá'uhua'anan a'ij nyej tyajamuaata'ixaa yee eitze'e pu ruxe'eve'e aɨjna tɨ ti'ijta cai aɨjna tɨ ravaɨre'e. Tɨ pua'a a'ij pua'a mana'a naaruu inyeetzi, aɨ mu che'eta mana'a a'ij pua'a á'amuaruuren muejmi. Na'ari tɨ pua'a meyan ra'ara'astijre'en a'ij nyej tihua'umuá'ate, aɨ mu majta ra'ara'astijre'esin a'ij saj tihua'amua'aten. 21Ayaa mu yeehui á'amuaruuren maɨjna cɨme'e sej seyan na'astijre'e inyeetzi, a'ini camu ramua'ate aɨjna tɨ yan nyaja'utaityaca'a. 22’Tɨ pua'a nyacai yáva'acányejniche'e, nyajta cai a'ij tíhua'uta'ixáate'enche'e, capu hua'acɨ'ɨtíiche'e tɨ Dioj pueijtzi hua'uta'an aɨjna cɨme'e maj nyetite. Ajta, ijii, capu yeehui che'e me'e ti'itɨ ɨ maj cɨn jetzen pua'arite'e maɨjna cɨme'e ɨ maj cɨn autyajturaa ɨ Dioj jemi. 23A'atɨ tɨ nyejchaɨre'e inyeetzi, aɨ pu ajta tichaɨre'e ɨ niya'upua. 24Tɨ pua'a nyacai neyan huárɨniiche'e ti'itɨj tɨ cai maa a'atɨ ayan raayɨ'ɨtɨhua'a, capu ayan tiraavijtya'acache'en tɨ Dioj ayan pueijtzi hua'uta'an aɨjna cɨme'e ɨ maj cɨn autyajturaa ɨ jemin. Ma majta aɨme, mu'uri naaseij, majta nyejchaɨra'acaa inyeetzi, majta meyan che'eta mana'a raaruu ɨ niya'upua. 25Ayaa mu yeehui meyan huarɨj tɨ ij aráurasten a'ij tɨ te'eyu'usi'i aɨjna jetze ɨ nyuucari ɨ maj cɨn ti'ijta tɨcɨn: “Aɨ pu cai tiraaviitya'a a'araa maj mana'a meyan tinyajcháɨra'a mua'araa.” 26’Tɨ'ɨj aɨn hui yan uve'enyén aɨjna tɨ a'amua japua huanyuuni, ɨ nyaj yan ya'utaiti muejmi jemi, tɨ ajta Dioj jemi e'ema'acan, aɨ pu ayan tinyetyaxáatajma'a a'ame inyeetzi. Aɨ pu aɨn pueen ɨ xaijnyu'ucari tɨ tzaahuati'ira'a cɨn ti'imua'ata, tɨ ajta aun a'uve'eme ɨ Dioj jemi. 27Sajta muan, ayaa pu ajta ruxe'eve'e sej seyan tinaatyáaxajta inyeetzi a'ini nyatɨj nyana'a yan huataseijre tɨ yu e'ire'enye, muan xu á'ujhua'anya'a inyeetzi jamuan.

will be added

X\